Guardiola: Vështirë të arrihet Reali

Trajneri i Barcelonës, Pep Guardiola, ka vazhduar me thëniet se skuadra e tij ka gjasa minimale për titullin e La Ligas. Sipas tij, arritja e Real Madridit tash është shumë më e vështirë, sesa kur diferenca ishte 10 pikë.

Blaugranët gjenden në pozitën e dytë në tabelë me katër pikë më pak se Los Blancos, megjithatë Pep thekson se të zgjedhurit e tij nuk do ta kenë aspak të lehtë të shpallen kampionë.

“Ata guxojnë të lëshojnë pikë, por ne nuk mundemi. Është shumë më e vështirë tash, sesa kur ishim dhjetë pikë prapa”.

“Duket se ne kemi gjasa për titull, mirëpo katër pikë janë shumë kundër këtij Madridi. Ka shumë punë për t’u bërë”.

“Asnjë ekip në histori të ligës nuk ka arritur ta përmbysë avantazhin prej dhjetë pikësh kundrejt Madridit”, ka thënë Guardiola në një konferencë për media. 

Lexo më shumë

‘Mourinho është urryes - Guardiola është një xhentëlmen’

Ish-lojtari argjentinas, Jorge Solari, ka bërë krahasime mes Jose Mourinhos dhe Pep Guardiolas, duke thënë se pëlqimi i tij shkon për trajnerin e Barcelonës.

“Mourinho është pak a shumë urryes; ai nuk është njeri i mirë. E them këtë në kuptimin e asaj që nuk tregon aspak karizëm me rivalët e tij”.

“Pep Guardiola është një xhentëlmen kur ai flet. Kjo të bën të ndjehesh më mirë dhe është më bindës”.

“Të dy janë trajnerë të shkëlqyer, por kur Guardiola flet nuk shfaq armiqësi, qoftë nëse ka fituar ose humbur, prandaj mendoj se ai sillet dhe shprehet në një mënyrë shumë më të mirë sesa Mourinho”, ka deklaruar Solari për COMRadio.

Ndërkaq, duke folur për Lionel Messin, ka thënë: “Ai është lojtari më i mirë në histori të futbollit”.

Lexo më shumë

Giovinco do të përshtatej te Barca

Ish-anëtari i stafit të Juventusit, Franco Ceravolo, i cili ka punuar me Sebastian Giovincon në të kaluarën, beson se sulmuesi i Parmës i ka të gjitha kualitetet për të rezultuar i suksesshëm te Barcelona.

25-vjeçari është në bashkëpronësi mes Juves dhe Parmës dhe ndërkohë që po spekulohet se ai mund të kthehet te Bianconerët, agjenti i lojtarit ka njoftuar se Blaugranët janë të interesuar për italianin.

“Sikurse shumë klube të tjera në Evropë, Barcelona është gjithmonë në kërkim të talenteve të rinj”.

“Sebastian po e bën namin në Serie A dhe mendoj se ai do të përshtatej për mrekulli te Barcelona, duke pasur parasysh se si luan ekipi i Pep Guardiolas”, ka thënë Ceravolo përTuttomercatoweb.

Lexo më shumë

Ofertë nga Katari për Raul

Klubi nga Katari, Al Rayyan, është i interesuar për transferimin e sulmuesit të Schalkes, Raul.

Kontrata e 34-vjeçarit skadon në fund të sezonit aktual, ndërsa palët akoma nuk kanë arritur marrëveshje për vazhdimin e saj, duke qenë se Schalke i ka ofruar kontratë njëvjeçare, ndërsa spanjolli dëshiron të nënshkruajë së paku deri në vitin 2014.

Sipas Estad Aldoha, Al Rayyan tashmë ka filluar të kontaktojë personat që mund të ndikojnë te Raul që të transferohet në Gjirin Persik.

Lexo më shumë

Të shpallet gjendje e jashtëzakonshme në Mitrovicë!

Nëpërmjet strukturave të saj të paligjshme dhe të armatosura Serbia po ndërmerr sulm ndaj shqiptarëve të veriut të Kosovës. Vrasja e Selver Haradinajt (38 vjeç) në zonën e Tre Rrokaqiejve në veri të Mitrovicës ishte sulm terrorist, me ç’rast cak kanë qenë civilët e paarmatosur, fëmijët dhe familja Haradinaj në përgjithësi. Ky akt terrorist është realizuar nëpërmjet vendosjes së eksplozivit në ndërtesën e të ndjerit dhe shpërthimit të tij të planifikuar.

 Kështu thuhet në një deklaratë për media të Lëvizjes Vetëvendosje, e cila kritikon Qeverinë, respektivisht Ministrinë e Punëve të Brendshëm, për mungesë të përgjegjësisë dhe planit operacional për mbrojtjen e banorëve shqiptarë në pjesën veriore të Kosovës.

“Dërgimi i vetëm dy policëve në lagjen Tre Rrokaqiejt, dëshmon për një mungesë të përgjegjësisë, planit operacional dhe të seriozitetit nga ana e Ministrisë së Brendshme. Me këtë ndërhyrje gjysmake dhe të pamjaftueshme qeveria e Kosovës po i shërben planit të Serbisë, që po del gjithnjë e fituar prej incidenteve të krijuara. Vijimësia e këtyre incidenteve, falë iniciativave dështake të qeverisë së Kosovës, po e shpie vendin drejt negociatave të tjera, kësaj radhe konkretisht për veriun e Kosovës”.

“Situata në veriun e vendit mbetet e tendosur dhe me shenja përkeqësimi. Shqiptarët atje janë pa përkujdesje institucionale dhe të pambrojtur nga mekanizmat e sigurisë. Ndërkohë që fëmijët e Selver Haradinajt, mbetën jetimë për shkak të krimit serb, gjithë shqiptarët që jetojnë atje kanë mbetur jetimë pasi janë braktisur nga qeveria e Kosovës. Prandaj ata aktualisht janë nën mëshirën e strukturave ilegale të Beogradit të cilat po ushtrojnë trysni të vazhdueshme nëpërmjet forcës, dhunës e frikësimit, ashtu që shqiptarët atje t’i lëshojnë shtëpitë, banesat, tokat dhe pronat e tyre”.

Lëvizja Vetëvendosje kërkon mbajtjen e një seance të jashtëzakonshme në Kuvendin e Republikës së Kosovës. “Kjo seancë duhet të nxjerrë vendime konkrete për institucionet politike. Për këtë gjë tashmë i kemi kontaktuar partitë LDK dhe AAK dhe jemi në pritje të përgjigjes së tyre. Po ashtu, do t’i dërgojmë një letër Presidentes të Republikës së Kosovës për shpalljen e gjendjes së jashtëzakonshme në Mitrovicë si dhe do t’i dërgojë letër komandantit të KFOR-it e shefit të shtabit të përgjithshëm të NATO-s për të siguruar mbrojtjen e jetës dhe pronës së qytetarëve shqiptarë në Mitrovicë. Presidentit të Republikës së Shqipërisë, Bamir Topi, do t’i shkruajmë që ai të thërrasë një mbledhje urgjente të OKB-së e të NATO-s, mbi gjendjen e rëndë të sigurisë në Mitrovicë”.

“Pas koncesioneve të vazhdueshme ndaj Serbisë që kulmuan me fusnotën, pas gjendjes së rënduar në veri ku qeveria kontribuon me papërgjegjësinë e saj, nuk mund të presim asgjë serioze e të sinqertë nga kjo qeveri. Prandaj Vetëvendosje kërkon dorëheqjen e menjëhershme të Ministrit të brendshëm Bajram Rexhepit, Kryeministrit Hashim Thaçi dhe gjithë qeverisë së Kosovës që është bashkëpunëtore me Serbinë në incidentet të cilat po shpijnë drejt negociatave për veriun e vendit tonë dhe po e dështojnë shtetin e Kosovës”.

Lexo më shumë

Shqipëria dënon dhunën në veri të Kosovës

Një ditë pas shpërthimit të eksplozivit në shtëpinë e një shqiptari në zonën e “Tre Rrokaqiejve” në veri të Mitrovicës, ku mbeti i vdekur 38-vjeçari kosovar Selver Haradinaj dhe u plagosën dy anëtarë të familjes së tij, ka reaguar edhe Tirana zyrtare, raporton agjencia e lajmeve NOA.

 Ministria e Punëve të Jashtme e Shqipërisë, përmes një komunikate, “dënon ashpër shpërthimin që shkaktoi vdekjen e një qytetari të pafajshëm në veri të Mitrovicës, si dhe çdo akt tjetër dhune që cenon forcimin e sigurisë, stabilitetit dhe bashkëjetesës në veri të Kosovës”.

MPJ e Shqipërisë më tej bën thirrje për qetësi e maturi, për kapërcimin e kësaj situate.

Ministria e Punëve të Jashtme të Shqipërisë ngushëllon familjarët e Selver Haradinaj për humbjen e kryefamiljarit të tyre dhe u uron shërim të shpejtë të lënduarve. “Shprehim bindjen se autoritetet përgjegjëse, Policia e Kosovës dhe EULEX-i do të sjellin para drejtësisë autorët e këtyre akteve kriminale”, thuhet ndër të tjera në reagimin e MPJ-së.

Lexo më shumë

Roje te ‘Tre Rrokaqiejt’

Në lagjen ‘Tre Rrokaqiejt” në veri të Mitrovicës, pas ngjarjeve të dy ditëve të fundit, banorët shqiptarë janë organizuar dhe po bëjnë roje përpara ndërtesave ku ata banojnë. Ndërkohë analistët bëjnë vlerësojnë se është koha e fundit që KFOR-i dhe EULEX-i të ndryshojnë qëndrimin, ndërsa Qeveria të ballafaqohet me strukturat paralele të Serbisë.

Përveç banorëve që bëjnë roje në lagjen e “Tre Rrokaqiejve”, të pranishëm janë edhe Policia e Kosovës, ndërkaq aty nuk vërehen policië të EULEX-it apo pjesëtarë të KFOR-it. Policia e Kosovës, po përpiqen të ruajnë qetësinë dhe të mbrojnë banorët e kësaj lagje, pa dallim etnie.

Të dielën në orët e hershme të mëngjesit, në këtë lagje ka ndodhur një shpërthim, ku për pasojë u vra Selver Haradinaj, ndërkaq mbetën të plagosur dy fëmijët dhe bashkëshortja e tij. Sulimi në fjalë është cilësuar nga prokuroria si akt terrorist, dhe si i tillë ka rritur tensionet ndëretnike në këtë pjesë të Kosovës.

Të hënën, kontejneri i vendosur nga policia, për të bërë kontroll në këtë lagje, është larguar pas pak minutash nga dhjetëra serbë, ku është vërejtur edhe Zarko Veselinovic, vëllai i Zvonko Veselinovic, të dyshuar dhe kërkuar nga policia si drejtues të strukturave kriminale në veri.

Arben Qirezi, ekspert i sigurisë, tha për RTK-në se gjendja ne veri të Mitrovicës nuk është e re, dhe se përgjegjësinë kryesore për këtë situatë, sipas tij, e mbanë bashkësia ndërkombëtare, me qëndrimin tolerues ndaj strukturave paralele të Serbisë.

Ai tha se sulmi i fundit ka për qëllim tensionimin e sërishëm të situatës, moslejimin e vendosjes së institucioneve të Republikës së Kosovës dhe mbajtjen e bisedime për këtë pjesë të Kosovës.

“Tani KFOR-i dhe EULEX-i duhet të ndërrojnë qëndrimin, ndërsa Qeveria e Kosovës duhet të formulojë qasjen ndaj veriut, sepse nuk është në pyetje rezistenca qytetare, por e strukturave të Serbisë. Pra Qeveria e Kosovës duhet të përballet me ato struktura, që nuk ka rëndësi si quhen, kriminale, paralele apo struktura shtetërore të Serbisë”. 

Lexo më shumë

Studentët e Tiranës kërkojnë ndërprerjen e bisedimeve Prishtinë-Beograd

Studentёt e Universiteteve tё Tiranёs janё tё shqetёsuar pёr vazhdimёsinё e terrorit serb kundёr shqiptarёve nё veri tё vendit. “Shqetёsimi ynё rritet edhe mё shumё nga prapavija e kёtij terrori tё mbёshtetur nga Beogradi dhe tё lehtёsuar nga heshtja e Tiranës zyrtare dhe qëndrimi antikombëtar i qeverisë në Prishtinë: shkёputja e veriut pёr kah Serbia” thuhet në një komunikatë për media të shoqatës së studentëve “Studim, Kritikё, Veprim”.

"Nё tё tillё gjendje kur Prishtina zyrtare po pёrpiqet ta relativizojё vrasjen e Selver Haradinajt tek ‘Tre Rrokaqiejt’, thuajse nё njё aksidencё banale, duke e zhveshur politikisht dhe denigruar edhe mё dinjitetin e tё vrarit-hero tё qёndresёs sё shqiptarёve nё trojet tona kombёtare;

Kur strukturat paralele serbe kanё pёrzёnё Policinё e Kosovёs nga veriu e kur Serbia ёshtё duke penguar funksionimin e pikave doganore nё Merdare;

Kur Tirana zyrtare nuk e ka gjykuar ende tё shprehet pёr situatёn, por qё me siguri do tё vazhdojё me shterpёsinё dhe boshёsinё e deklaratave tё saj ndёrkombёtare pёr kombin shqiptar, duke shkelur kёshtu sistematikisht Kushtetutёn e Republikёs sё Shqipёrisё;

Kur media shqiptare e Prishtinёs dhe veçanёrisht ajo e Tiranёs vazhdon ta mbajё nё heshtje dhe larg vёmendjes sё shqiptarёve gjendjen e vёshtirё 13 vjeçare nё veri;

Kur tё gjitha palёt partiake, ndёrkombёtare dhe tё shoqёrisё civile kanё rёnё dakord qё tё lejojnё konçesionin e rradhёs: negocimin me Serbinё pёr veriun deri nё status tё privilegjuar pёr tё;

Pra, kur gjendja jonё ёshtё duke u pёrkeqёsuar dita ditёs, falё edhe indiferencёs sonё pёr tё pёrbashkёtёn, pritja pёr akte tё moralshme nga ana e Prishtinёs dhe Tiranёs ёshtё njё shpresё e kotё. Diçka duhet ta kemi mёsuar sё paku nga 25 korriku 2011".

“Studentёt e Tiranёs shprehen kundёr prapavijёs dhe konsensusit qeveritar pёr negociimin e veriut. Ne shprehemi pёr organizim gjithёpopullor tё shqiptarёve, sado e vёshtirёsuar kjo nga pushteti. Vetёm vullneti ynё pёr organizim dhe qёndrimi ynё i palёkundur mund tё shkaktojё ndёrmarrjen e akteve tё moralshme tё qeveritarёve tanё: ndaljen e menjёhershme tё negociatave me Serbinё dhe moszhvillimin e atyre speciale pёr veriun; anullimin e tё gjitha konkluzave tё deritashme; vendosjen e reciprocitetit politik e ekonomik me Serbinё; bёrjen e Kosovёs sovrane dhe rrjedhimisht shtet; heqjen e kufirit me RSh-nё, bashkimin kombëtar”.

“Pa kёtё vullnet gjendja e sotme e shqiptarёve kёtu e 13 vjetё, por gjith-herё mё e pёrkeqёsuar, do tё jetё gjendja jonё e pёrheshme”, thuhet në deklaratë.

Lexo më shumë

Dacic: Rrugët alternative mos i bëni afër KFOR-it

Ministri i Punëve të Brendshme i Serbisë, Ivica Dacic, deklaroi të hënën se xhandarmëria serbe nuk i ka bllokuar rrugët alternative për në Kosovë, por sipas tij ka pasur probleme vetëm në një vend, dhe se policia serbe ka ndërruar drejtimin kah rrugët tjera.

 “Mos të bëhemi të marrë. Nëse krijohen rrugë alternative, thelbësore është që ato të bëhen atje ku nuk shihen e jo 10 metra larg postbllokut, siç është rruga alternative 50 metra larg pikëkalimit dhe KFOR-i e sheh se kush po kalon”, ka deklaruar Dacic raporton REL.

Ish-zëdhënësi i partisë së Slobodan Milosevicit, Dacic, ka deklaruar se është ndërmarrë një hap i tillë, pasi sipas tij, ka deklarata se gjatë fundjavës, KFOR-i, do të mbyllë me forcë rrugët alternative.

Që nga vera e vitit të kaluar, rrugët që çojnë nga jugu për në veri të Kosovës, serbët i kanë bllokuar me barrikada. Ndërkaq, për të mos kaluar nëpër vendkalimet kufitare ne veri, ku tashmë janë vendosur policët dhe doganierë kosovarë dhe të EULEX-it, ata po përdorin rrugët alternative që lidhin Kosovën me Serbinë.

Lexo më shumë

Krasniqi, me vonesë, uron Ditën Kushtetutës

Kryetari i Kuvendit i Republikës se Kosovës, Jakup Krasniqi, të hënën pasdite, ka dërguar një mesazh urimi me rastin e 9 Prillit, Ditës se Kushtetutës.

 “Dita e miratimit të Kushtetutës së Republikës se Kosovës, është një ditë e shënuar në kalendarin tonë shtetëror. Miratimi i Kushtetutës, si akti ligjor më i lartë i një shteti, shpreh vullnetin e lirë të popullit të Republikës se Kosovës”, thuhet në mesazh.

“Mbi bazën e Kushtetutës së vendit tonë, ne kemi ndërtuar dhe po vazhdojmë të konsolidojmë institucionet tona demokratike, me anë të së cilave promovohen vlerat dhe vendosmëria jonë për të krijuar mundësi të barabarta për çdo qytetar të Republikës së Kosovës”.

“Është detyrë e secilit prej nesh që të kontribuojmë në fuqizimin e shtetit, shtrirjen e sundimit te ligjit, si dhe në zhvillimin e demokracisë, në mënyrë që të sigurojmë një të ardhme të sigurt dhe me perspektivë edhe për brezat e ardhshëm”. 

Lexo më shumë

Barca – Real më 21 prill

Federata spanjolle e futbollit ka njoftuar se supersfida e La Ligas ndërmjet Barcelonës dhe Real Madridit në Camp Nou, do të zhvillohet të shtunën me 21 prill në orën 20:00.

‘El Clasico’ fillimisht ishte caktuar të luhej të dielën (më 22 prill), mirëpo nuk ishte caktuar një datë përfundimtare. Tani është vendosur që dy klubet nga kreu i tabelës të takohen një ditë më herët.

Në ndeshjen e parë kampionale të zhvilluar në Santiago Bernabeu, Barcelona fitoi me rezultat 3-1. Ndërkaq, kjo ndeshje do të jetë mjaft e rëndësishme sa i përket titullit të Kampionatit spanjoll.

Lexo më shumë

‘Bayerni nuk guxon të humbë!’

Shefi ekzekutiv i Bayern Munichut, Karl-Heinz Rummenigge, ka deklaruar se skuadra e tij me çdo kusht duhet ta shmangë humbjen nga Borussia Dortmundi.

Bavarezët gjenden tre pikë prapa Dortmundit në tabelën e Bundesligas, ndërsa të mërkurën zhvillojnë derbin në Westfalenstadion, i cili pritet të jetë vendimtar për titull.

“Ne nuk guxojmë të humbim, sepse kjo do ta vendoste kampionatin shumë herët”.

“Në rast të barazimit, gara do të ishte ende e hapur, ndërsa me fitore ne do të ishim në gjendje t’ia merrnim Dortmundit kryesimin që po e gëzon tash”, ka thënë Rummenigge. 

Lexo më shumë

Allegri: Juve nuk e ka fituar titullin

Milani nuk ka hequr dorë nga titulli i Serie A. Këtë e ka bërë të qartë trajneri Massimiliano Allegri.

“Duam ta fitojmë Scudetton. Ende kemi shumë lëndime dhe suspendime, por ky nuk është një justifikim ose një alibi”.

“Serie A është ende e hapur dhe ne do të luftojmë deri në fund. Juventusi varet nga vetvetja, por nuk është i pamposhtshëm”.

“Ata nuk e kanë fituar kampionatin, kanë mbetur edhe shtatë ndeshje dhe ne jemi vetëm një pikë pas”, ka thënë Allegri në një konferencë me gazetarë.

Lexo më shumë

Reali mund ta humbë titullin

Portieri Iker Casillas ka pranuar se Real Madridi mund ta përfundojë sezonin pa titullin e La Ligas.

Vetëm një muaj më parë, Los Blancos kryesonin me dhjetë pikë më shumë se përcjellësi i parë Barcelona, ndërsa lëshimi i pikëve ka bërë që aktualisht diferenca të jetë vetëm katër pikë.

“Besoj që Real Madridi mund ta humbë La Ligan, sepse edhe Barcelona po lufton dhe ne nuk kemi fituar asgjë”.

“Asnjëherë nuk kemi thënë se e kemi fituar (titullin)”, u ka thënë Casillas gazetarëve.

Lexo më shumë

Balotelli nuk theu kodet etike

Pjesëmarrja e Mario Balotellit në Kampionatin Evropian me Italinë nuk është e rrezikuar- ka thënë Cesare Prandelli.

Sulmuesi i Manchester Cityt u përjashtua në fund të takimit ndaj Arsenalit pasi mori kartonin e dytë të verdhë.

Ai është kritikuar nga drejtuesit e klubit të tij, mirëpo trajneri i përfaqësueses Azzurre e ka pranuar si diçka normale përjashtimin e 21-vjeçarit.

“E shikova përjashtimin, por kësaj here ishte një ndërhyrje që ishte pjesë e lojës. Nuk mendoj se kodet etike duhet të aplikohen në këtë situatë të veçantë”, citon Eurosport fjalët e Prandellit. 

Lexo më shumë

Ronaldo, Valdes e Sanchez mund të mungojnë në ‘el Clasico’

Disa lojtarë mjaft të rëndësishëm të rivalëve, Barcelona dhe Real Madrid, rrezikojnë që të mos jenë të pranishëm në ndeshjen kryesore të sezonit, ‘el Clasico’ nëse marrin nga një tjetër karton të verdhë para supersfidës.

Për Barcelonën - Victor Valdes, Seydou Keita, Alexis Sanchez dhe Thiago Alcantara, të gjithë kanë nga katër kartonë të verdhë dhe një tjetër karton do t’ua pamundësonte lojën në Camp Nou.

Nga ana tjetër, për Real Madridin - Cristiano Ronaldo, Xabi Alonso dhe Fabio Coentrao - janë ata që rrezikojnë sfidën që pritet të jetë vendimtare për titullin e kampionit të Spanjës. 

Lexo më shumë

Serbët sulmojnë gazetarët shqiptarë në veri

Gazetarë të mediave shqiptare të Kosovës, Kosovapress, Top Channel, Rtv 21, KTV, RTK, Koha Ditore etj., janë provokuar dhe sulmuar nga një grup serbësh të hënën pasdite në zonën e “Tre rrokaqiejve” në veri të Mitrovicës.

Për fat të mirë, menjëherë kanë intervenuar pjesëtarë të Policisë së Kosovës, duke parandaluar këtë sulm të grupeve kriminale serbe mbi gazetarët shqiptarë, raporton Kosovapress. 

Lexo më shumë

Memorial për Betejën e Koshares

Lufta e Koshares rrumbullakon luftën 100-vjeçare për prishjen e kufirit, ku nuk është dashur të jetë për 100 vjet, ka thënë zëvendëskryeministri i Kosovës, Hajredin Kuçi sot në Koshare, në përkujtim të 13 vjetorit të njërës nga betejat më të njohura që ka bërë UÇK-ja. Me këtë rast, përfaqësuesi i familjes Jashari, Rifat Jashari, ka vënë gurthemelin e ndërtimit të Kompleksi memorial të Koshares.

“Sa herë që përmendim Betejën e Koshares, duhet të kemi parasysh se ajo ka prishur një kufi dhe ka vendosur një tjetër”, ka thënë zv.kryeministri Kuçi ,me rastin e shënimit të 13 vjetorit të Betejës së Koshares.

Ai tha se beteja e Koshares ka simbolikën e unitetit politik e kombëtar.

“ Në këtë betejë luftuan djem e vasha nga anë e kënd Kosova e trojet shqiptare, ka shtuar Kuçi. Kur i shohim këto varre dëshmorësh që vijnë nga të gjitha trevat shqiptare, kuptohet se kjo luftë ka pasur një qëllim dhe një ideologji, lirinë dhe pavarësinë e Kosovës dhe forcimin e kombit shqiptar”, tha ai duke iu drejtuar luftëtarëve se për këtë duhet të ndiheni krenarë.

“Të ndiheni krenarë se beteja juaj dha aq shumë dëshmorë liridashës dhe të ndiheni krenarë që brigada juaj dha dy heronj të kombit, Agim Ramadani e Sali Çekaj”, tha Kuçi, transmeton Koha.net.

Në manifestimin organizuar në përkujtim të 13-vjetorit të Betejes së Koshares kanë marrë pjesë përveç zyrtarëve të shtetit edhe përfaqësues të familjeve të dëshmorëve, ministra, deputetë, kryetarë komunash dhe ish- luftëtarë të UÇK-së.

Deputeti Daut Haradinaj tha se është një dhembje, por edhe krenari të jesh prezent në përkujtim të përvjetorëve të tillë. “Para 13 vjetësh këtu është shënuar lavdia e komandantit Agim Ramadani, por edhe e Sali Çekut, Xhemajl Fetahut dhe 114 dëshmorëve tjerë. Falë guximit të tyre Beteja e Kosharës u bë një nga kapitujt më me peshë për luftën tonë për liri”, tha Haradinaj.

Rrustem Berisha, i cili ka folur në emër të Brigadës 138 ”Agim Ramadani”, tha se “e gjithë bota është e kthyer nga e ardhmja, atë e synojmë edhe ne, por e ardhmja është e sigurt vetëm pasi të gjejmë paqen për të kaluarën . Për hir të së ardhmes, ne duhet ta kujtojmë të kaluarën, për të ndërtuar të ardhmen për të gjithë qytetarët e Kosovës, e në veçanti për fëmijët e dëshmorëve, invalidët e luftës , ushtarët dhe familjet e tyre”, u shpreh Berisha.

Ndërsa, përfaqësuesi i familjes Jahari, Rifat Jashari ka vendosur gurthemelin e ndërtimit të Kompleksit Memorial në Koshare.

“Ky gurthemel duhet të jetë një masazh i të gjithë neve këtu dhe shqiptarëve kudo që janë për një bashkim e unitetet, nëse duam të çojmë amanetin e bijve dhe bijave tona ku ata dëshiruan”, tha ai.

Lexo më shumë

Nasri: Megjithatë, City mbi Arsenalin

Samir Nasri u është kundërpërgjigjur tifozëve të Arsenalit, pasi skuadra e tij Manchester City u mposht 1-0 nga ish-klubi i tij në derbin e djeshëm të Ligës Premier.

“Jam i vetëdijshëm çfarë kam thënë për titujt. Jam i sigurt se do të ngre trofe me Manchester Cityn para Arsenalit”.

“Dhe, për të gjithë tifozët e Arsenalit, ecni përpara. City është 10 pikë para jush. Mbështesni skuadrën tuaj dhe më harroni mua”, ka shkruar mesfushori francez në Twitter. 

Lexo më shumë

Inter, PSG dhe Roma pas Suarez

Sulmuesi i Liverpoolit, Luis Suarez, është duke joshur vëmendjen e shumë klubeve evropiane.

People shkruan se Suarez pritet të bëhet caku më i nxehtë i afatit kalimtar të verës, me Interin dhe Paris Saint-Germain që synojnë ta sjellin uruguaianin në radhët e veta.

Roma po ashtu ka shprehur interesim për Suarez, por do të kthehet kah ai vetëm nëse përfundon në top katërsh, që i siguron pjesëmarrjen në Ligën e Kampionëve sezonin e ardhshëm. 

Lexo më shumë

Topi priti Hasanin

Presidenti i Republikës së Shqipërisë, Bamir Topi dhe kryetar i Këshillit të Lartë të Drejtësisë, pritën sot kryetarin e Gjykatës Kushtetuese të Republikës së Kosovës, Enver Hasani.

Në takim me përfaqësuesin më të lartë të drejtësisë së Kosovës, presidenti Topi nënvizoi rëndësinë e konsolidimit të një sistemi gjyqësor të pavarur, të paanshëm e profesional e të painfluencuar nga trysnitë politike, apo ekonomike.

Presidenti Topi, gjatë këtij takimi, vlerësoi lart rolin e rëndësishëm ligjor dhe konstruktiv të Gjykatës Kushtetuese të Shtetit të Kosovës dhe theksoi rëndësinë e rritjes së bashkëpunimit të gjithanshëm mes institucioneve ligjore të të dyja vendeve tona në përpjekje për forcimin dhe konsolidimin e shtetit të së drejtës sipas standardeve më bashkëkohore evropiane.
Presidenti Topi dhe kryetari i Gjykatës Kushtetuese të Kosovës, Enver Hasani, vunë në pah rëndësinë e hartimit dhe zbatimit të projekteve konkrete të gjykatave kushtetuese respektive dhe marrëveshjeve të ndryshme në fushën e drejtësisë mes dy vendeve tona.

Kryetari i Gjykatës Kushtetuese të Republikës së Kosovës, Enver Hasani, e ka siguruar presidentin Topi se institucioni që ai drejton do të vazhdojë të rrisë e të zgjerojë bashkëpunimin me Gjykatën Kushtetuese të Shqipërisë, si dhe do të punojë edhe më shumë në drejtim të forcimit të institucioneve ligjore dhe shtetit të së drejtës në Kosovë.

Lexo më shumë

Kolona të gjata në Merdar

Për shkak të ngadalësisë së kontrollit në anën serbe të kufirit, në Merdar sot janë krijuar kolona të gjata automjetesh. Udhëtarët nga drejtimi i Kosovës për në Serbi po presin me orë të tëra.

Policia e Kosovës për tollovinë e krijuar fajëson policinë e Serbisë, e cila ka bllokuar procesin e kontrollit në kufi, njofton radio KIM, e cila citon zëdhënësin e policisë së Kosovës, Arbër Beka, sipas të cilit policët serbë po bëjnë me ngadalësi të pashpjegueshme kontrollin e automjeteve në kufi, transmeton Koha.net.

“Sipas raportit të Policisë Kufitare në anën Kosovës kolona e veturave dhe kamionëve është e gjatë disa kilometra. Procedura e kontrollit nga policia serbe po zhvillohet shumë ngadalë dhe për pasojë udhëtarët presin dy deri tri orë që të hyjnë në Serbi”, ika thënë Beka.

Komunikacioni nga Serbia në drejtim të Kosovës pohohet se po zhvillohet pa pengesa. 

Lexo më shumë

Serbët marrin pikat statike të policisë në veri

Policia e Kosovës, në përputhje me premtimin e ministrit të Brendshëm Bajram Rexhepi, kishte vendosur sot disa pika statike të policisë në pjesët neuralgjike të pjesës veriore të Mitrovicës. Mirëpo, ato sot janë demoluar dhe janë marrë nën kontrollin e serbëve të rebeluar.

Qindra serbë janë tubuar në zonën e “Tre Rrokaqiejve” në veri të Mitrovicës, duke demoluar kontejnerin e policisë të vendosur nga ana e Policisë së Kosovës.

Pak pas orës 13:00, pjesëtarët e Policisë së Kosovës kanë vendosur në zonën e “Tre Rrokaqiejve” një postbllok statik. Menjëherë është dëgjuar alarmi, pas të cilit për pesë minuta janë tubuar qindra serbë në këtë zonë, duke përndjekur dy pjesëtarët e Policisë së Kosovës dhe duke rrotulluar kontejnerin, raporton Kosovapress.

Ndryshe, pika statike të policisë në veri të qytetit ishin vendosur me urdhrin e dhënë dje nga ministri i Punëve të Brendshme, Bajram Rexhepi.

Zëdhënësi i Policisë së Kosovës poër Rajonin e Mitrovicës, Besim Hoti i ka thënë sot REL se në lagjet e banuara me popullatë etnikisht të përzier, janë vendosur pika statike të kujdestarisë dhe të kontrollit.

“Pikat statike janë vendosur jo vetëm në ato lokacione ku ka pasur incidente, por edhe në lokacionet e tjera ku mund të ketë tensione. Kjo është bërë dhe do të vlejë deri në një urdhër të ardhshëm”, beri të ditur Hoti.

Mirëpo, siç raportojnë mediet nga veriu, grupe serbësh i kanë demoluar ato dhe tani vetë po i mbajnë nën kontroll, ndërsa policët e Kosovës tashmë janë larguar.

Derisa gjendja është e tensionuar në këtë zonë, banorët shqiptarë janë të shqetësuar për sigurinë e tyre.

Forca të shtuara ndërkombëtare janë duke qarkulluar në këtë vend, ndërsa policë të EULEX-it ka edhe në urën kryesore në lumin Ibër.

Nuk raportohet për të lënduar. 

Lexo më shumë

Situatë e tensionuar në veri

Një ditë pas vrasjes së një qytetari shqiptar në veri të Mitrovicës, si pasojë e një shpërthimi me një mjet eksplodues, autoritetet e rendit thonë se situata në këtë pjesë të vendit mbetet e tensionuar.

Zëdhënësi i Policisë së Kosovës, për rajonin e Mitrovicës, Besim Hoti tha për Radion Evropa e Lirë, se policia në bashkëpunim me autoritetet tjera të komunës, janë duke u përpjekur për të ofruar një siguri më të madhe për qytetarët, e po ashtu edhe për uljen e tensioneve.

“Sa i përket situatës, mund të them lirisht se kemi një situatë jashtëzakonisht të tensionuar, marrë parasysh ndjeshmërinë e rastit, shqetësimet e banorëve - jo vetëm të veriut, banorëve shqiptarë e serbë - por të të gjithë banorëve të tjerë në komunë e me gjerë.
Policia e Kosovës me strukturat e tjera të sigurisë dhe të pushtetit lokal ka përgjegjësi për marrjen e masave ose veprimeve shtesë për uljen e tensioneve”, deklaroi Hoti pwr REL.

Ai tha se tash për tash ende nuk dihen motivet dhe shkaktarët e sulmit, por siç u shpreh ai, policia është duke hetuar të gjitha rrethanat e këtij incidenti kriminal.

“Ky është një rast që i tejkalon ndoshta edhe përmasat e ngjarjeve ditore dhe ngjarjeve që kanë ndodhur më herët. Prandaj veprimet tona kërkojnë të jenë të matura dhe të kenë koordinim shumë të rëndësishëm me të gjitha institucionet, edhe ato ndërkombëtare të sigurisë, por në radhë të parë edhe me vetë qytetarët”, tha Hoti.

Zëdhënësi Hoti tha po ashtu se në lagjet e banuara me popullatë etnikisht të përzier, janë vendosur pika statike të kujdestarisë dhe të kontrollit.

“Pikat statike janë vendosur jo vetëm në ato lokacione ku ka pasur incidente, por edhe në lokacionet e tjera ku mund të ketë tensione. Kjo është bërë dhe do të vlejë deri në një urdhër të ardhshëm”, beri të ditur Hoti.

Sulmin ndaj familjes Haradinaj, kryeprokurori i Prokurorisë së Qarkut në Mitrovicë, Shyqyri Syla, e ka cilësuar si një akt terrorist.

Për më tepër, ai konsideron se ky sulm "mund të jetë bërë edhe për motive etnike".

“Hetimet janë duke u zhvilluar. Mendoj që ka elemente terrorizmi, nuk mund të përjashtohet edhe motivi etnik për frikësimin e popullatës shqiptare që është në veri”, deklaroi Syla.

Kryeprokurori Syla nuk ka dashur të flasë rreth hetimeve dhe arrestimeve të mundshme, por ka deklaruar se në bashkëpunim me autoritet e rendit do të arrijnë deri të burimet e sakta për kapjen e autorëve.

“Unë konsideroj që me një punë të përbashkët mund të arrijmë deri tek identifikimi i personave, pastaj edhe kapja, por fillimisht duhet të bëhet identifikimi i kryesve.
Nuk e di se sa ka pista që na çojnë te ndonjë emër tash për tash. Kështu që, për shkak të hetimeve nuk mund të flas, disa burime i kemi, por nuk mund të flas për to”, tha kryeprokurori Syla.

Lidhur me sulmin ndaj familjes Haradinaj, kanë reaguar institucionet e Kosovës, ato ndërkombëtare si dhe partitë politike në vend.

Të gjithë e kanë dënuar aktin e sulmit dhe kanë kërkuar nga organet e drejtësisë që ta ndriçojnë rastin dhe përgjegjësit t’i vënë para drejtësisë. 

Lexo më shumë

Jahjaga: Kushtetutshmëri në gjithë territorin e Kosovës

Me rastin e 9 Prillit, Ditës së Kushtetutës së Republikës së Kosovës, Presidentja Atifete Jahjaga, ka thënë miratimi i i dokumentit më të lartë juridik të vendit tonë, katër vjet më parë, është një akt historik, që shpreh vullnetin e popullit të Republikës së Kosovës.

“Duke qenë garanti i të drejtave dhe i lirive të të gjithë qytetarëve të vendit tonë, garanti i fjalës së lirë, i lëvizjes së lirë dhe i sundimit të ligjit, Kushtetuta e Republikës së Kosovës i ka hapur rrugë zhvillimit të vendit tonë në të gjitha fushat”, thuhet në deklaratën e Jahjagës.

Ndërtimi i shtetit ligjor kërkon përpjekje dhe përfshirje të vazhdueshme të institucioneve dhe të gjithë shoqërisë në Republikën e Kosovës, të njerëzve të barabartë që respektojnë atdheun e tyre.

“Kushtetutshmëria dhe ligjshmëria duhet të shtrihen në gjithë territorin e Republikës së Kosovës, përfshirë edhe tri komunat në veri të vendit, dhe qytetarët e shtetit tonë, pavarësisht përkatësive të tyre, duhet të ndjehen të barabartë dhe të mbrojtur me Kushtetutë”, thuhet në deklaratën e Presidentes. 

Lexo më shumë

Kuçi: Kushtetuta, si me shkelë në tepih

Katër vjet pas miratimit të Kushtetutës nga Kuvendi i Kosovës,qeveritarë dhe njohës të çështjeve Kushtetuese, thonë se ajo nuk ka arritur të zbatohet në tërë territorin e vendit. Ata theksojnë se në shumë raste, Kushtetuta është shkelur edhe nga institucionet qendrore dhe ato lokale.

Njohësi i çështjeve kushtetuese, Ismet Salihu, Profesor në Universitetin e Prishtinës, thotë se fajtorët kryesorë për moszbatimin e vazhdueshëm të Kushtetutës në gjithë territorin e vendit janë institucionet ndërkombëtare.

“Madje si krizë më e madhe e zbatimit të Kushtetutës është pamundësia që iu është bërë institucioneve të Kosovës të instalojë dhe t’i bëjë efektive organet e veta kyçe shtetërore siç janë policia, gjykata dhe prokuroria. Por në pjesën tjetër të territorit të Kosovës që përbën 80 për qind në masën më të madhe fajtorë për moszbatimin konsekuent të Kushtetutës dhe ligjeve janë kosovarët”, thekon ai për RTK-në.

Por, përfaqësuesit e institucioneve të Kosovës që nga shpallja e pavarësisë dhe hyrja në fuqi e Kushtetutës, vazhdimisht potencojnë se ajo do të gjejë zbatim herët ose vonë edhe në veri të Kosovës.

“Unë jam i bindur se çdo zgjidhje që do të bëhet për veriun do ta respektojë Kushtetutën e Kosovës, pakon e Ahtisaarit dhe ligjet tona”, thekson zëvendëskryeministri Hajredin Kuçi.

Përderisa në veri nuk është zbatuar Kushtetuta, ekspertë të çështjeve juridike thonë se në pjesën tjetër të vendit ajo është shkelur në shumë raste.

Sipas profesorit të së drejtës Kushtetuese, Kurtesh Salihu, gjatë këtyre katër viteve shumë ngjarje dhe sjellje kanë shkuar në drejtimin kundërkushtetues.

“Nuk janë në pyetje vetëm presidentët por janë në pyetje edhe Kuvendi edhe qeveria me një varg shkeljesh të Kushtetutës. Tjetër është që disa u panë edhe disa nuk po shihen”, thekson Salihu.

Por zëvendëskryeministri Kuçi, thotë se është vetëm një organ që jep konstatimin që është shkelur Kushtetuta dhe ajo është Gjykata Kushtetuese.

“Kjo puna e Kushtetutës në Kosovë është bërë pak si tepih, kah të endesh po frikësohesh se mos po e shkel. Kushtetuta e ka shumë të qartë se çka shkelet dhe çka jo. Kur t’i thuash dikujt është shkelë ose jo Kushtetuta duhet me ia tregu nenin por konstatimin për shkelje ose jo të Kushtetutës vetëm një organ e jep në këtë vend dhe ajo është Gjykata Kushtetuese”, thekson Kuçi.

Derisa debatet për zbatim ose moszbatim të Kushtetutës në përmbajtjen aktuale vazhdojnë, tashmë disa muaj po punohet intensivisht në amandamentimin e saj.

Ndryshimet kryesore në Kushtetutë do të bëhen në pjesën që ka të bëjë me përfundimin e mbikëqyrjes ndërkombëtare të pavarësisë pra, të pikave që kanë të bëjnë me misionet mbikëqyrëse. Ndryshimet tjera përfshijnë nenin që ka të bëjë me zgjedhjen e presidentit dhe reformën zgjedhore. 

Lexo më shumë

Preteni, nuk tregon numrin e mosdeklaruesve të pasurisë

Më shumë punë se kurdoherë, do të ketë këtë vit Agjencia Kundër Korrupsionit (AKK), ngase edhe numri i zyrtarëve të lartë që duhet të deklarojnë pasurinë është shumë më i madh se më parë. Këtë vit për shkak të ndryshimeve në ligj, numri i atyre që kanë qenë të obliguar të deklarojnë pasurinë është 3 mijë e 659, ndryshe që një vit më parë ishte 1 mijë e 830.

 Por sa e kanë deklaruar, dhe për sa prej tyre do të iniciohet proceduar kundërvajtësve ngase nuk e kanë deklaruar? drejtori i AKK-së, Hasan Preteni nuk jep përgjigje. Ai nuk e tregon këtë numër. Edhe pse vetëm katër ditë para se të përfundonte afati ligjorë, Preteni derisa po shpaloste raportin vjetor të punës, pati thënë se as 50 për qind e tyre nuk kanë deklaruar pasurinë.

Shoqëria civile vlerësojnë se Preteni po koordinohet me zyrtarët që shkelin ligjin dhe po u jep mundësi që ta deklarojnë pas afatit vetëm sa për sy e faqe.

Hasan Preteni i pyetur nga Kosovapress se sa është numri i atyre që kanë deklaruar pasurinë, nuk jep përgjigje. Përveç që flet për diçka krejt tjetër, pra për sistemimin e formularëve, thotë se nuk mund të na favorizojë si medium të na e tregojë numrin para të tjerëve.

“Afati për deklarimin e pasurisë ka përfunduar, ne jemi duke i sistemuar të gjithë formularët dhe shumë shpejtë do të informojmë publikun për të gjitha. Emrat e atyre që nuk e kanë deklaruar pasurin do të bëhen publik dhe të njëjtit do t’i dërgojmë në gjykatat kompetente për kundërvajtje, se kush nuk e ka deklaruar do të kuptohet më vonë, sepse ne duhet të dhënat nga formularët t’i bartim nëpër regjistra, të cilët publikohen, afati ligjor për këtë është 60 ditë, por ne si zakonisht këtë do të bëjmë më herët”, thotë ai.

Madje për Pretenin, është favor të dish numrin e atyre që nuk kanë deklaruar pasurinë. “Asnjë medium nuk do të favorizohet, ditën e njëjtë do të informohen të gjithë”, ka thënë Preteni.

Por, Avni Zogiani, nga ÇOHU, pohon se deklarimi i pasurisë ka arritur në atë nivel, saqë kush do, deklaron çka do, e me këtë sipas tij, AKK-ja vetëm po e heq arsyen e ekzistimit të saj. “Jam i sigurt se nuk e jep numrin definitiv të atyre që kanë deklaruar apo nuk kanë deklaruar, ngase ka tregu që ka afinitet të manipulojë me ato deklarata, dhe nëse jep numrin definitiv normalisht duhet me i botu, dhe unë po mendoj që AKK-ja po koordinohet me zyrtarët e shtetit. Po koordinohet me ata që kanë shkel ligjin duke i fsheh, është shndërruar në një agjenci që e fsheh korrupsionin më shumë se që e lufton”, thotë ai.

“Ai nuk e nxjerr numrin ngase mendon se në ndërkohë mundet t’i koordinojë, nuk e di ndoshta mund të ketë edhe ndonjë përfitim, ka mundësi, por mundet me koordinuar, që ndonjë zyrtari që ka shkel deklarimin e pasurisë ta mbush atë sa për sy e faqe, sepse në fund të fund i tërë ky proces është sa për sy e faqe”, thotë Zogiani.

Edhe drejtori ekzekutiv i Lëvizjes “FOL”, Petrit Zogaj pohon se është e paarsyeshme që Preteni nuk tregon numrin e atyre që kanë deklaruar pasurinë. “Sipas ligjit, AKK-ja publikimin e të dhënave ka fat ta bëjë për 60 ditë. Ndërkohë që nuk shkruan askund që të bëhet publike numri i personave që kanë deklaruar, por agjencia nuk do të duhej të hezitonte që të jepte informacione mbi numrin e deklaruesve të pasurisë, nuk bënë as shkelje ligjore, por thjeshtë mund të jap atë numër. Ndoshta agjencia po heziton të jap numrin për faktin se ndoshta në një far mënyrë po tenton të nxit deklarimin e pasurisë, por nuk e shoh të arsyeshme, e as praktikë të mirë që agjencia mundet me ba”, thotë ai.

Mos respektimi i afatit ligjor për deklarimin e pasurisë, obligon AKK-në që ndaj tyre të iniciojë proceduarat kundërvajtësve në gjykatat kompetente, e gjithashtu e detyron që edhe t’i publikojë emrat e tyre.

Lexo më shumë

Fermerët mashtrues vonojnë subvencionet

Ministria e Bujqësisë gjatë vitit të kaluar ka zënë 2500 fermerë të cilët kanë deklaruar rrejshëm hektarët e mbjellur me grurë, për ketë sivjet kjo ministri është shumë më shumë e kujdesshme në verifikimin e aplikacioneve që bëhen nga fermerëve për të përfituar nga subvencionet e ministrisë.

 Zëdhënësi i Ministrisë së Bujqësisë, Adil Behramaj, thotë për Telegrafin se verifikimi i granteve po bënë që të ketë edhe vonesa në ekzekutimin e pagesës.

Sipas tij, grantet investive dhe subvencionet janë formë direkte e përkrahjes së fermerëve, me të cilat synohet të përmirësohet gjendja e fermerëve. “Ne si ministri, për shkak të tendencave të mëdha për të mashtruar nga ana e fermerëve, ku një pjesë e konsiderueshme i deklarojnë rrejshëm si numrin e krerëve të bagëtisë, ashtu edhe sipërfaqet që i kanë të mbjella, jemi detyruar që t’i kontrollojmë në shkallë 100 për qind të gjitha aplikacionet në terren. Pra, asnjë pagesë nuk e ekzekutojmë pa e kontrolluar fermerin në vendngjarje dhe nëse merret parasysh që aplikacionet arrijnë deri në mbi 30000 copë, atëherë është e kuptueshme që nevojitet kohë për t’i kontrolluar të gjitha”, tha Behramaj.

Ai ka treguar se në vitin 2011 ka pasur rreth 2500 fermerë që i kanë deklaruar rrejshëm mbi 14000 hektarë sipërfaqe të mbjella me grurë. “Kemi pasur 99 fermerë ose 23302 krerë të kafshëve të imëta dhe 204 fermerë ose 3399 krerë të lopëve qumështore që janë deklaruar rrejshëm nga ana e blegtorëve dhe pikërisht për të mos lejuar që të keqpërdoren subvencionet, kontrollohen të gjitha aplikacionet dhe subvencionet vonohen pak më shumë deri sa të ekzekutohen”, thekson ai.

Zëdhënësi Adil Behramaj ka premtuar se me vetëdijesimin e fermerëve për të mos mashtruar, do t’i marrim edhe më shpejt subvencionet. Ministria për të gjithë fermerët mashtruese ka ndërmarrë sanksione. “Të gjithë fermerët që deklarojnë rrejshëm numrin e krerëve ose sipërfaqet e mbjella do ta humbasin të drejtën për të përfituar edhe për 3 vite të tjera pas", ka thënë këshilltari dhe zëdhënësi në Ministrinë e Bujqësisë Adil Behramaj. 

Lexo më shumë

Figo: Barca është kënaqësi të shikohet

Ish-ylli i Barcelonës dhe Real Madridit, Luis Figo, mendon se Blaugranët është kënaqësi t’i shikosh duke luajtur, por po ashtu është i impresionuar edhe me Los Blancos, dhe ende ka ndjenja për të dyja klubet.

“Ende kam një joshje të madhe për të gjitha klubet ku kam luajtur, Barcelona dhe Real Madrid ishin dy prej periudhave më të rëndësishme të jetës time. Ndjehem i privilegjuar që kam luajtur për ta”.

“Gjithmonë është vështirë të thuash se cili ekip është më i mirë, pasi kjo varet nga shumë faktorë dhe është subjektive. Por mund të them se është kënaqësi ta shikosh Barcelonën duke luajtur. Ata janë një skuadër shumë e talentuar me shumë kualitete individuale”.

“Megjithatë, Real Madridi dhe Barcelona janë shumë afër njëri-tjetrit. Madrid mban kryesimin në tabelë, derisa Barca ka arritur në finale të Kupës. Dhe të dyja po bëjnë një punë të shkëlqyer në Ligën e Kampionëve”, ka thënë portugezi.

Lexo më shumë

Pirlo: Presioni tash mbi Juventusin

Mesfushori i Juventusit, Andrea Pirlo, thotë se presioni tash është mbi Zonjën e Vjetër, pasi ata tejkaluan Milanin për të marrë kryesimin e tabelës së Serie A.

“Ne e dimë se gjithçka tash varet nga ne. Kërkesa për t’i fituar të gjitha shtatë ndeshjet e mbetura do ta shtojë presionin në ne”.

“Siç qëndrojnë gjërat, ne kemi 50 për qind shanse për ta fituar Scudetton. Nuk mendoj se Milani është në krizë. Ata janë ndikuar nga lodhja në Ligën e Kampionëve të shtunën. Por, e përsëris, tash gjithçka është në duart tona”.

“Kanë kaluar shumë kohë që kur ne ishim në krye. Por ne gjithmonë kemi qenë të vetëdijshëm se mund t’ia dalim mirë dhe të qëndrojmë në garë për pozitën e parë”, ka thënë Pirlo gjatë një interviste për Sky Italia.

Juve të mërkurën ka një ndeshje tjetër të vështirë, pasi do të përballet me Lazion, që lufton për të ruajtur pozitën e tretë në tabelë. 

Lexo më shumë

Emery: Gjyqtari nuk ndikoi në rezultat

Trajneri i Valencias, Unai Emery, ka lavdëruar paraqitjen e skuadrës së tij në barazimin e mbrëmshëm pa gola ndaj Real Madridit në Santiago Bernabeu, dhe mendon se gjyqtari nuk kishte ndikim në rezultat.

“Mendoj se gjyqtari e kreu punën mirë. Nuk mendoj se ai kishte ndikim në rezultatin. Të luash në Bernabeu gjithmonë është vështirë dhe Madrid vinte nga një formë e mirë dhe ata ishin shumë të fuqishëm”.

“Për të nxjerrë diçka nga kjo ndeshje, ne e dinim se duhej ta çonim atë në një drejtim në të cilin mund ta ndiqnim panin tonë, të kemi posedim në top, të kemi besim në sulm, të krijojmë shanse shënimi dhe të kemi ca fat”.

“Ne kishim dy shanse të mira për të shënuar dhe jemi të kënaqur pasi ne kishim ndjenjën se ishim të qëndrueshëm dhe mund t’i fitojmë gjërat. Ne nuk e lejuam Madridin ta pasojë topin me lehtësi dhe i ndaluam kundërsulmet e tyre. Ne kishim ca fat, por gjithë kohës ne menduam se mund të fitojmë”.

“Ne largohemi me një pikë, që është arsye për të qenë të kënaqur, duke marrë parasysh se luanim në Bernabeu. Ne dëshironim fitoren, por barazimi po ashtu na le disi të kënaqur”, ka thënë Emery në konferencën për shtyp. 

Lexo më shumë

Allegri: Mediat nuk na duan

Trajneri i Milanit, Massimiliano Allegri, është shfryrë në mediat pas disfatës nga Fiorentina.

“Kam kuptuar se shumë, le të themi pjesa dërmuese, mezi presin Milani të humbasë. Ja, kjo ndodhi. Tash ne do të vazhdojmë përpara”.

“Askush nuk e ka pritur këtë disfatë, as ne, por ne kemi karakter për t’u rikthyer në këmbët tona. Kjo mund të ndodhë në një sezon”.

“Mos harroni ne kemi kaluar një periudhë të gjatë para se të shkojmë katër pikë mbi Juven, andaj ju paguani për këtë lodhje. Megjithatë, ende nuk ka mbaruar”, ka thënë Allegri.

Lexo më shumë

Karanka i pakënaqur me gjyqtarin

Ndihmës-trajneri i Jose Mourinhos te Real Madridi, Aitor Karanka, ka kritikuar ashpër qëndrimin e gjyqtarëve në barazimin 0-0 ndaj Valencias në Santiago Bernabeu.

Klubi nga kryeqyteti spanjoll kishte dy kërkesa për penalti për ndërhyrje në Cristiano Ronaldon, por të dyja u mohuan nga gjyqtari.

“Referimi? 80 mijë njerëz e panë se ne ishim të ndëshkuar, apo jo? Pasi nëse ne e pamë, atëherë kjo ka ndodhur. Gjithkush e pa”, ka thënë Karanka në konferencën për shtyp.

“Ne jemi të qetë pasi jemi katër pikë mbi Barcelonën. E di atmosferën në dhomën e veshjeve dhe ne jemi të qetë”.

“Ne mendojmë për ndeshjen tonë të ardhshme dhe ne kemi lojtarë të cilët janë të etur të vazhdojnë të luftojnë për ta fituar La Ligën”, ka shtuar Karanka.

Lexo më shumë

Arbri i “BB1” me të dashur të re

Fituesi i edicionit të parë të “Big Brother”, Arbër Çepani, ka filluar një lidhje të re dashurie.

Pas ndarjes me Edën, vajzën nga Durrësi, Arbri është lidhur me një bukuroshe tjetër, brune dhe shumë simpatike, me të cilën ka vizituar edhe Parisin.

Fotot e udhëtimit ai i ka postuar në profilin e tij në Facebook. 

Lexo më shumë

Killers të inspiruar nga Nirvana

Basisti i grupit “The Killers”, Mark Stoermer, ka zbuluar se ai është inspiruar të luajë kitarë duke dëgjuar grupin Nirvana.

Stoermer nuk ka qenë fans i muzikës rok derisa ka dëgjuar grupin e zhanrit “grunge” dhe ka kaluar disa vite duke mësuar veten të luajë këngët e Nirvanës.

“Nirvana përfundimisht është bendi i cili më ka çuar mua te roku dhe kënga ‘Come as You Are’ është kënga e parë që kam mësuar ta luaj”.

“Mbaj mend duke qëndruar ulur dhe duke u përpjekur ta mësoj këtë. Nuk e di nëse do të kisha filluar të luaj basin ose kitarën po të mos ishte Nirvana, pasi kam kaluar shumë kohë vetëm duke mësuar me veshë”, ka thënë rokeri.

Lexo më shumë

Lorena e BB5: U eliminova sepse nuk bëra “lojëra”

Lorena, banorja e cila të shtunën doli nga shtëpia Big Brother, u shpreh se eliminimi i saj erdhi sepse ajo nuk bëri “lojëra” në shtëpinë më të famshme në Shqipëri.

“Unë u shfaqa para publikut siç jam: e qetë dhe pa bërë lojëra. Kjo ishte arsyeja që unë nuk jam më pjesë e Big Brother”, theksoi konkurrentja më e fundit e eliminuar.

Lorena, e pranishme në emisionin ‘Fun Club’ të drejtuar nga Albana Osmani, shpjegoi edhe lidhjen e saj brenda shtëpisë me Gracianon.

“Kur të dalë Graciano do të shohim, nuk kemi bërë plane. Unë e kam shumë qejf Gracianon, por do i marrim gjërat shtruar. Ndjenja për të ishte e vërtetë, më ngjiti si person. Lidhja nuk ishte strategji, madje mendoj se unë u eliminova sepse nuk kisha asnjë strategji brenda shtëpisë”, ka thënë Lorena. 

Lexo më shumë

E tradhton vallëzimi (Video)

Një 16-vjeçar e ka marrë epitetin “Hajni valltar”, pasi është arrestuar për shkak të një vjedhjeje gjatë të cilës ka gjetur kohë edhe për të vallëzuar.

Kur e kanë shikuar xhirimin nga kamerat ku djaloshi tregonte aftësitë e tij në vallëzim, punëtorët e sigurimit nga shkolla e tij e mesme e kanë thirrur policinë dhe e kanë njoftuar se e dinin me saktësi se kush ishte.

Ndërkohë që ai ruante dhe bashkëpunëtorët e tij po kryenin vjedhje, 16-vjeçari është mërzitur dhe ka filluar të vallëzojë. Videoxhirimet janë paraqitur në televizionet lokale, ndërsa fajtorin e kishin zbuluar menjëherë punëtorët nga shkolla e tij.

Policia ka shkuar në shtëpi dhe ia ka lëshuar xhirimin nënës së djaloshit dhe ajo e ka pyetur e nervozuar: “Çka është kjo?”, ndërsa ai është përgjigjur: “Ky është stili im, nënë!”. 

Lexo më shumë

Dell: Për veriun mund të bisedohet sivjet

Ambasadori amerikan Christopher Dell nuk ka përjashtuar mundësinë që këtë vit të fillojë dialogu për zgjidhjen e çështjes së veriut. Ai i ka thënë RTK-së se një vështrim më serioz i situatës në veri gjithsesi do të ndodhë para se zgjedhjet e reja të ndodhin edhe në Kosovës. Por kjo, sipas tij, varet edhe nga ajo se çfarë qeverie do të ketë në Serbi.

Dell megjithatë ka përjashtuar mundësinë e zgjidhjes së problemit përmes ndonjë statusi special, apo ndonjë lloj tjetër autonomie.

Qeveria e Kosovës, por edhe Shtetet e Bashkuara nuk mbështesin zgjidhje të tilla. E tëra çfarë mund të bëhet është fillimi i një dialogu midis Qeverisë së Kosovës dhe qytetarëve serbë që jetojnë në veri për kushtet e tyre të jetë në mënyrë që ata ta ndijën vetëm sa më mirë në Republikë e Kosovës, transmeton RTK.

Ky dialog nuk është mbajtur për 13 vjet me radhë, sepse këtë nuk e kanë dashur elementet kriminale që janë në veri.

Dell ka deklaruar se në këtë drejtim Qeveria e Kosovës do ta ketë edhe mbështetjen e bashkësisë ndërkombëtare, në radhë të parë të Shteteve të Bashkuara

Dell ka theksuar edhe njëherë se korrupsioni duhet të luftohet, ndryshe vendi mund të ketë pasoja të paparashikueshme. 

Lexo më shumë

Stefanovic: Dialogu vazhdon në verë

"Negociatat për Kosovën do t’i vazhdoj qeveria e re. Kjo do të thotë se në verë do të ketë një dialog midis Beogradit dhe Prishtinës. Në ndërkohë, ne duhet që deri në zgjedhje t’i implementojmë marrëveshjet e arritura," tha shefi i ekipit negociator serb për bisedime me Prishtinën, Borislav Stafanovic.

Ai thekson se qeveria e re do të ketë legjitimitet të plotë për të përcaktuar se kush dhe në cilën mënyrë do ta vazhdoj dialogun.

“Por, është e sigurt se kushdo që e formon qeverinë pas zgjedhjeve do ta kuptojë se ky është një prej proceseve më të rëndësishme që duhet të vazhduar. Unë jam i bindur se votuesit do ta japin përsëri besimin për Partinë Demokratike, që ne të formojë qeverinë dhe të vazhdojmë ta udhëheqim këtë proces në mënyrën më të mirë të mundshme”, tha stefanovic për Vecernje Novosti.

Negociatat, sipas tij, “pavarësisht provokimeve që vijnë nga Prishtina, janë e vetmja mënyrë për të arritur deri te një zgjidhje”. 

Lexo më shumë

Konjufca: LDK e AAK u dorëzuan

Lidhja Demokratike e Kosovës dhe Aleanca për Ardhmërinë e Kosovës janë dorëzuar totalisht nga trysnia ndërkombëtare sa i përket Ligjit për banka dhe institucionet mikrofinanciare, ka thënë, nënkryetari i Kuvendit të Kosovës, Glauk Konjufca, i cili është deputet i Lëvizjes Vetëvendosje.

Konjufca ka thënë se kjo nuk është hera e parë kur partitë opozitare, të cilat përfaqësohen në Kuvendin e Kosovës, që nuk kanë mundur t’i përballojnë trysnisë ndërkombëtare.

“Janë dorëzuar totalisht, sipas mendimit tim për shkak të trysnisë ndërkombëtare që u manifestua gjatë një takimi të përbashkët me përfaqësuesit e Ambasadës amerikane, të kryesisë së Kuvendit të Republikës së Kosovës dhe shefave të grupeve parlamentare”, ka thënë Konjufca për “Tribuna Shqiptare”.

Sipas tij, pas këtij takimi, grupet e tjera parlamentare i ndryshuan qëndrimet e tyre.

“Vetëvendosja mbeti e vetme, jo për herë të parë. Ka ndodhur edhe herëve tjera kur opozita fillimisht ka qenë e bashkuar, por partitë e tjera opozitare nuk kanë mundur t’i qëndrojnë këtij presioni”, thotë ai.

Lexo më shumë

Kushtetutë e pafuqishme

Katër vjet pas hyrjes në fuqi të Kushtetutës së Kosovës, ajo vazhdon të mos jetë e fuqishme në gjithë territorin. Autoriteti i Prishtinës zyrtare as që “ndjehet” në pjesën veriore të Kosovës, ndonëse me Kushtetutë parashihet që “dora” e shtetit të jetë e pranishme në gjithë territorin e Kosovës.

Sfidat për zbatimin e Kushtetutës së Kosovës janë të natyrës politike, por dhe të mungesës së vullnetit të mjaftueshëm të institucioneve, thonë ekspertët e çështjeve juridike-kushtetuese, në katërvjetorin e miratimit aktit me të lartë juridik.

Eksperti i çështjeve juridike-kushtetuese, Riza Smaka, vlerëson se edhe pas katër vjetësh të nxjerrjes së aktit më të lartë juridik nuk shihet ndonjë përkushtim i institucioneve shtetërore të zbatojnë Kushtetutën.

Sipas tij, akti më i lartë ligjor nuk përfillet nga ata që janë të thirrur për ta respektuar dhe në të njëjtën kohë ka boshllëqe e vakuume juridike, si dhe dispozita kontradiktore. “Gjykoj se Kushtetuta nuk përfillet nga institucionet që janë më të thirrura për ta përfillur, dhe më pastaj vijnë edhe subjektet tjera”, ka thënë profesori Smaka.

Mangësitë e evidencuara në këtë akt juridik, sipas tij, burojnë edhe nga fakti se ajo është hartuar me nxitim dhe nuk buron nga vullneti i popullit të Kosovës, por nga një dokument politik, siç është plani i presidentit Ahtisaari, shkruna “Zëri”.

Edhe ekspert i çështjeve kushtetuese dhe njëri nga anëtarët e grupit për hartimin e saj, Fatmir Fehmiu, thotë se dokumenti i Ahtisarit nuk është dogmë, por është një akt që duhet të zbatohet në mënyrë inventive, edhe pse aty i markon çështjet posaçërisht të pakicës serbe me diskriminim pozitiv.

“Por, Kushtetuta nuk njeh diskriminimin pozitiv dhe as atë superpozitiv, por barazi të njerëzve para ligjit. Sa për ilustrim po përmend se në sferën e sigurimit social, një serb merr pensionin nga fondi i Serbisë dhe nga buxheti i Kosovës”, rikujton Fehmiu.

Sipas tij, kaosi ekonomik dhe politik janë inkompatibil me parimet e kushtetutshmërisë dhe ligjshmërisë, prandaj, ai shfaq mendimin se institucionet e Kosovës duhet të punojnë shumë për ta shndërruar Kosovën në një shtet ligjor.

Se mungesa e zbatimit të ligjit rrjedhimisht përbën shkelje të Kushtetutës së Kosovës, e konstaton edhe Vjosa Osmani, e cila është anëtare e Komisionit për ndryshimin e Kushtetutës. Pa dyshim, sfidë më e madhe për zbatimin e aktit më të lartë ligjor, sipas saj, mbetet veriu. Ajo, ndërkaq, ka pohuar se shkelja e Kushtetutës nga qeveritarët është bërë praktikë, sikurse ka përmendur emërimin e ambasadorëve që, siç ka thënë Osmani, është një proces krejtësisht në kundërshtim me Kushtetutën.

Mirëpo, Qeveria e Kosovës në katërvjetorin e miratimit të Kushtetutës ka vlerësuar se janë konsoliduar institucionet demokratike, është fuqizuar sundimi i rendit dhe ligjit. Në mesazhin e kryeministrit Hashim Thaçi thuhet se “miratimi i Kushtetutës mundësoi rivendosjen e ekzistencës sonë kombëtare, duke mundësuar krijimin e themeleve për ndërtimin e një shteti funksional dhe demokratik”.

Kushtetuta e Kosovës është miratuar më 9 prill të vitit 2008, ndërkaq ka hyrë në fuqi gjashtë muaj më vonë. Gjatë këtyre viteve, është konstatuar se është shkelur nga institucionet e larta vendëse. Si shkeljen më të rëndë, Gjykata Kushtetuese e ka konsideruar mbajtjen e dy posteve nga ana e ish-presidentit Fatmir Sejdiu, ndërkaq së fundi edhe Kuvendi i Kosovës kishte shkelur Kushtetutën me zgjedhjen antikushtetuese të Behgjet Pacollit në postin e presidentit.

Ndryshimet kushtetuese janë parë si domosdoshmëri edhe në marrëveshjen e arritur ndërmjet kryeministrit Hashim Thaçi, kryetarit të LDK-së, Isa Mustafa, dhe ish-kreut të AKR-së, Behgjet Pacolli.

Lexo më shumë

S’po e kryejnë punën

Paralajmërimet pa ardhur njohjet janë joserioze. Këto njoftime po ndodhin për shkak se diplomacia kosovare nuk po e kryen punën si duhet dhe është krejtësisht e çakorduar. Lobimi duhet të koncentrohet krejtësisht te pesë vendet e BE-së. Në Veri duhet të zbatohet në mënyrë agresive Plani i Ahtisaarit. Këto janë disa nga shqetësimet e shprehura nga ish-Ministri i Jashtëm, Skender Hyseni.

 Paralajmërimi i Ministrit të Jashtëm, Enver Hoxhaj se gjatë muajit mars do të ketë një valë të re njohjesh ka dalë të jetë i pasaktë. Njoftimet e tilla ende pa ardhur njohjet janë konsideruar tepër joserioze nga ish-kryediplomati i parë i Kosovës, Skënder Hyseni.

Në një bisedë për Express, Hyseni ka thënë se paralajmërimet e tilla po vijnë për shkak se aktualisht diplomacia e Kosovës nuk po e kryen punën si duhet.

“Është koha e fundit që diplomacia e Kosovës të koordinohet sepse është totalisht e çakorduar, është totalisht e shpërndarë. Ajo duhet të koordinohet përfundimisht dhe me partnerët kyç në botë duhet të nis fushata të mirëfillta. Jo fushata sa për zhurmë, jo fushata sa për konsum publikë, jo fushata sa për të qenë”, ka thënë Hyseni.

Ministria e Punëve të Jashtme gjatë vitit të kaluar ka publikuar disa dokumente të cilat i ka quajtur strategji në bazë të të cilave do të vijnë edhe njohje të reja.

Por, ish-Ministri i Jashtëm i Kosovës thotë se rezultati është ai që flet.

“Rezultati është treguese më i mirë nëse strategjitë e shumta që i ka proklamuar Qeveria me aq shumë pompozitet po bëjnë punë apo jo. Pastaj është tepër jo serioze paralajmërimi i njohjeve, akoma më serioze është edhe radhitja në ëeb sajtin e Ministrisë së Jashtme si njohje edhe i dy-tre njohjeve, të cilat nuk është shumë e sigurt që kanë ndodhur”, ka deklaruar ish-ministri i Jashtëm.

Lexo më shumë

E mbështesin në Facebook

Përkrahësit e Fatmir Sejdiut kanë nisur një fushatë për ta rikthyer atë në pozitën e Presidentit, përmes Facebookut. E në profilin personal Sejdiu është marrë me LDK-në. Ai ka kritikuar zhvillimet në këtë parti duke thënë se po bëhen përpjekje për të anashkaluar njerëzit që kanë qene bartës të barrës kryesore në këtë subjekt.

 Ende pa filluar fushata elektorale dhe pa u publikuar emrat e e kandidatëve për të parin e shtetit disa simpatizantë të Sejdiut kanë hapur një faqe në Facebook në të cilën kanë shkruar “Dr.Fatmir Sejdiu për President”, shkruan Express.

Partitë politike, pra as LDK-ja, ende nuk kanë publikuar emrat e kandidatëve me të cilët do të garojnë për të udhëhequr shtetin. Mirëpo, Sejdiu asnjëherë nuk e ka mohuar mundësinë që të kërkojë votën e drejtpërdrejtë për t’u rikthyer në pozitën ë Shefit të Shtetit.

Por, Sejdiu vazhdon të ketë mospajtime me lidershipin aktual të partisë së tij.

Në profilin e tij në Facebook ai e ka postuar një deklaratë, në të cilën shpreh pakënaqësinë e tij me reformat në LDK, duke thënë se nuk ka shenja të mira.

“Nuk besoj se kaq shenja të mira, sidomos tani në këtë qasje të tanishme, që në një apo në një formë tjetër ka elemente të përpjekjeve të anashkalimit të njerëzve që kanë qenë bartës të barrës, apo përgjegjësive të mëdha të zhvillimeve të LDK-së në proceset e kaluara”, thuhet në tekstin e botuar në Facebook. 

Lexo më shumë

Serbia heq dorë nga zgjedhjet lokale në Kosovë

Qeveria serbe nuk thotë se ka marrë vendim zyrtar për heqje dorë nga mbajtja e zgjedhjeve lokale në territorin e Kosovës, mirëpo një përfaqësues i saj për herë të parë ka pranuar se ky shtet do ta respektojë qëndrimin e UNMIK-ut se Rezoluta 1244 nuk e lejon një gjë të tillë

Shefi i delegacionit serb në dialogun Prishtinë - Beograd, Borislav Stefanovic, ka thënë se qeveria në Beograd e respekton këtë qëndrim pasi misioni i përkohshëm i OKB-së në Kosovë është i vetmi që mund ta interpretojë Rezolutën 1244 të Këshillit të Sigurimit të OKB-së.

“UNMIK-u është mbikëqyrësi i vetëm politik i Rezolutës 1244. Ky mision nuk është më aq i rëndësishëm, por ata janë të vetmit që e mbikëqyrin atë. Ne i pyetëm ata (UNMIK-un) për zgjedhjet dhe ata na thanë se nuk mund të lejojnë zgjedhje lokale në Kosovë dhe ne e respektojmë atë përgjigje”, ka thënë Stefanovic për “Zërin” .

Qeveria e Serbisë, megjithatë, nuk thotë se kjo nënkupton vendim final të shtetit fqinj të Kosovës për zgjedhjet . Beogradi jozyrtarisht e pranon se nuk ekziston asnjë formulë tjetër që do të mundësonte mbajtjen e zgjedhjeve për pushtetin lokal në territorin e Kosovës. 

Lexo më shumë

Nafta bie për mbi 1 dollar

Kontratat e naftës kanë çelur javën me rënie të lehtë të çmimit të arit të zi në tregjet ndërkombëtare, pasi Irani tha se është i gatshëm të rihapë bisedimet me SHBA-të dhe aleatët në lidhje me programin e vet bërthamor.

 Ky lajm ka rritur shpresën se situata konfliktuale e këtij viti që kaloi do të zgjidhet në paqe pa ndërhyrje ushtarake që mund të rezultonte në bllokimin total të furnizimit botëror me naftën iraniane.

Çmimet e kontratave të naftës janë presuar edhe nga raporti zhgënjyes i punësimit në Shtetet e Bashkuara që ka rritur shqetësimet për një performancë të dobët të ekonomisë globale me efekte negative në konsumin e naftës.

Nafta bruto Brent e Londrës për majin ra 1.03 dollarë në 122.40 dollarë për fuçi. Nafta bruto amerikane për majin ra 1.18 dollarë në 102.13 dollarë për fuçi.

Lexo më shumë

Shfrytëzimi i resurseve natyrore zhvillon ekonominë

Ndonëse Kosova është e pasur me resurse natyrore, por edhe njerëzore, ende mbetet ndër vendet e varfra të rajonit. Ekspertë të këtyre çështjeve thonë se po të shfrytëzoheshin resurset natyrore, për një periudhë shumë të shkurtër vendi do të shënonte ngritje të konsiderueshme ekonomike.

Kosova renditet ndër vendet që janë të pasura me resurse minerale dhe humane. Mirëpo, mosshfrytëzimi i tyre, po bënë që vendi të mbetet i pazhvilluar ekonomikisht.

Anëtari i Bordit të Odes Ekonomike Amerikane në Kosovë (OEAK), Lekë Musa, tha se Qeverisë së Kosovës është duke i munguar strategjia për shfrytëzimin e resurseve të shumta minerale që ka vendi. “Duhet një politikë shumë më agresive për t`i vënë në shfrytëzim këto resurse natyrore për qëllim të zhvillimit ekonomik e cila është dashtë të zbatohet nga vet qeveria e Kosovës. Ka shumë industri që janë të gatshme që të shfrytëzojnë, për shembull thëngjillin por edhe shumë resurse të tjera për qëllime të ndryshme dhe mendoj se kjo duhet të hapen për shfrytëzim”, thekson Musa.

Për ish-ministrin e Energjisë dhe Minierave, Et’hem Çeku, është gabim që deri më tash këto dy shtylla kryesore zhvillimore nuk janë vendosur në funksion të zhvillimit ekonomik të vendit. “Çështja e importit dhe eksportit do të sillej nga rreth 300 deri në 500 milionë euro në vit. Në 15 vitet e ardhshme Kosova do të kishte të hyra rreth 10 miliardë euro”, pohon Çeku.

Çelës kryesor i zhvillimit ekonomik Et’hem Çeku e sheh fillimin e aktivizimeve të resurseve në favor të progresit ekonomik të vendit. Ai veç tjerash potencon se Kosova për disa vite, në mënyrë indirekte, mund të krijojë prej 21 mijë deri në 28 mijë vende të reja të punës, raporton Radio Kosova.

Sipas ekspertëve, vetëm miniera e Trepçës me riaktivizimin e saj, do të mund të arrinte të hyra prej 120 - 250 milionë euro, varësisht nga shkalla e përpunimit të xeheve.

Lexo më shumë

Akciza në lëngje ngufat biznesin vendor

Mungesa e politikave fiskale që favorizon prodhuesit vendorë, është duke çuar drejt kolapsit shumë prodhues vendorë. Prodhuesit vendorë kritikojnë Qeverinë e Kosovës se më shumë favorizojnë importin e mallrave nga jashtë në Kosovë, sesa që favorizojnë ata që tentojnë të krijojnë hapësirë për prodhimin vendor.

Një vendim i fundit i Doganave të Kosovës në të cilin thuhet se nga muaji prill 2012 të gjitha produktet e prodhuara në Kosovë - lëngje frutash (me përjashtim të lëngjeve me përmbajtje 100 për qind të frutave), duhet t’i nënshtrohen pagesës së taksës së akcizës, ka ngritur shqetësime të mëdha te përfaqësuesit e bizneseve në Kosovë.

Fejzullah Mustafa, nga kompania “Fluidi”, e cila merret me prodhimin e lëngjeve thotë për Radion Evropa e Lirë se kjo taksë e akcizës po e dëmton biznesin e tyre.

Ai thotë se këtë taksë nuk e kanë asnjë nga vendet e rajonit. “Kjo akcizë, por edhe akcizat tjera të cilat janë për lëngje të gazuara, prodhuesit e vendit po i dëmton, dhe prodhuesi i Kosovës do të ballafaqohet me vështirësi të mëdha. Do të ulet numri i punëtorëve, do të zvogëlohet ekonomia në këtë lëmi, do të bije shitja, e të tjera”, thotë Mustafa.

Këto vendime të Qeverisë së Kosovës, thekson Mustafa, po ndikojnë që prodhuesit vendorë të mos jenë konkurrentë me prodhimet e shteteve të rajonit. “Taksa e akcizës duhet të zbatohet dhe të futet aty ku fuqia blerëse është më e madhe, si për shembull te kozmetika, te nafta, kafja, cigarja. Nëse do të kishte ngritje të çmimeve në këto artikuj, nuk do të vërehej shumë. Por, nëse ngrihet çmimi i lëngjeve dhe një konsumator do të blejë një pako lëngje për 60 cent më shtrenjtë, do të jetë e papërballueshme”, shprehet ai.

Sidoqoftë, autoritet kosovare çdo herë kanë deklaruar se janë duke punuar në përmirësimin e kushteve për prodhuesit vendorë, por që këta të fundit çdo herë janë ankuar për mungesë të një ambienti më të favorshëm biznesor.

Kryetari i Aleancës Kosovare të Biznesit, Agim Shahini, thotë se ky vendim do t’i ngufatë prodhuesit e lëngjeve.

Ai thekson se kjo akcizë duhet të jetë për lëngjet të cilat importohen, dhe jo për lëngjet që prodhohen në Kosovë. “Vendimi për futjen e akcizës në lëngje është një proces që AKB e ka kundërshtuar që nga viti 2006, dhe ne kemi bërë një hulumtim rreth pengesës dhe mundësisë së heqjes së kësaj akcize dhe kemi marrë modalitete të ndryshme në vendet e rajonit, dhe ka rezultuar se kjo akcizë është e ngarkuar dhe e dëmton prodhimtarinë vendore”, bën të ditur Shahini.

Në anën tjetër, autoritetet doganore në Kosovë thonë se ky vendim për akcizë në lëngje është ligjor dhe se dogana do të fillojë zbatimin e tij.

Lexo më shumë