Bielsa në planet e Barcelonës

Pep Guaridola sipas të gjitha gjasave do të largohet nga Barcelona me të perfunduar sezoni, ndërsa tashmë klubi katalanas e ka menduar zëvëndësuesin e strategut që ka lënë gjurmë të mëdha në historinë e klubit.

Ai është Marcelo Bielsa. Tekniku i Athletic Bilbaos ka treguar me klubin bask se është në gjendje të gjunjëzojë edhe ekipe gjigante si Manchester United, teksa ka aplikuar filozofi tepër sulmuese, me orientim kah inkuadrimi i lojtarëve të rinj.

Në rast të pensionimit të Guardiolës, mediat spanjolle besojnë se Bielsa do të jetë strategu i ardhshëm i Barcelonës, i cili do ta udhëheqë klubin katalanas drejt një cikli të ri, me motivim të ri.

Pep Guardiola gjatë tri viteve të qëndrimit të tij në krye të Barcelonës ka arritur të fitojë çdo titull të mundshëm, kurse vlen të përmendet se Barcelona e tij për shkak të filozofisë së tij të një futbolli që argëtoi gjithë botën, konsiderohet si një prej ekipeve më të mira në histori të futbollit. 

Lexo më shumë

Vetëm nga 17 mijë bileta për finalistët

Klubit londinez, Chelsea, i janë dhënë jo më shumë se 17,500 bileta për finalen e Ligës së Kampionëve që zhvillohet më 19 maj në Allianz Arena. Ky është vetëm 25% i të gjitha biletave në dispozicion.

Kundërshtari i Chelseat, Bayerni i Munichut, ka po ashtu numër të njëjtë të biletave në dispozicion, përkundër mbi një milion kërkesave sipas mediave gjermane.

Biletat do të kenë një çmim prej 70 deri në 370 euro, bëhet fjalë për biletat që do të jenë në dizpozicion të tifozëve të Chelseat.

Chelsea do të jetë në finale përballë Bayernit të Munichut, skuadra këto që eliminuan Real Madridin dhe Barcelonën në gjysmëfinale.

Lexo më shumë

Allegri: Vendimtar goli i anuluar i Muntarit

Trajneri i Milanit, Massimiliano Allegri, është shprehur se goli i anuluar i Muntarit pa të drejtë në duelin derbi ndaj Juventusit të zhvilluar në San Siro është vendimtar në luftën për titull në Serie A.

“Unë besoj se gjyqtarët kanë qenë shumë të mirë këtë sezon. Është vetëm një incident që ka prekur luftën për titull dhe ai është goli i anuluar i Muntarit”.

“Nëse Juventusi e fiton titullin për tri pikë, ashtu sikurse është tani, atëherë ky incident i vetëm është treguar vendimtar”, ka potencuar Allegri para sfidës ndaj Sienës në udhëtim.

Lexo më shumë

Anzhi ofertë për Dani Alves

Klubi rus, Anzhi Makhachkala besohet se është duke e menduar një ofertë të jashtëzakonshme për mbrojtësin e Barcelonës, Daniel Alves.

Braziliani ishte një prej komponenteve kyçe të ekipit fitues të Pep Guardiolës që nga viti 2008, teksa vetëm vitin e kaluar nënshkroi kontratën që do ta mbajë atë në klub deri në vitin 2015.

Sidoqoftë, skuadra që njihet për shpenzimet astronomike, Anzhi, besohet se tashmë mendon të bëjë një ofertë të jashtëzakonshme prej dhjetra milionë eurosh për asin brazilian, vetëm e vetëm që ai të kalojë në kampionatin rus.

Lexo më shumë

Sneijder: Jam rikthyer

Mesfushori i Interit, Wesley Sneijder, është shprehur tejet i kënaqur me rikthimin e tij të fuqishëm në aksion ndaj Udineses, ku holandezi shënoi dy gola në fitoren prej 3-1.

“Është ndjenjë e mrekullueshme të jesh i rëndësishëm për Interin përsëri”.

“Unë kam vendosur të rikthehem fuqishëm vetëm pasi jam rikuperuar plotësisht. Është vërtet fantastike që jam kthyer, kam tentuar të vij më shpejt, por nuk funksionoi. Tani jam në formën time më të mirë”, ka deklaruar Sneijder.

Lexo më shumë

Chelsea fiton 90 mil. nga finalja

Chelsea është duke notuar në të holla pas kualifikimit në finale të Ligës së Kampionëve, me ç’rast Blutë regjistruan rekord të fitimeve nga të drejtat televizive.

Daily Mail shkruan se Chelsea ia ka garantuar vetes përfitimet më të mëdha televizive në histori të klubit pas eliminimit të Barcelonës në gjysmëfinale.

Klubi nga Stamford Bridge do të fitojë së paku edhe 45 milionë funte me 2.8 milionë funte tjera shtesë që mund të vijnë në rast të fitimit të trofeut.

Filnalja e madhe e Ligës së Kampionëve zhvillohet në Allianz Arena më 19 maj.

Lexo më shumë

Marchisio: Po vjelim frytet e punës

Mesfushori i Juventusit, Claudio Marchisio, ndjen se puna e madhe e Bianconerëve gjatë sezonit po fillon që të shpaguhet, pasi ata kanë pasur avantazhin para rivalit për titull më shumë se një herë këtë sezon.

“Forma jonë fizike është falë punës që po bëjnë në bazë ditore. Ndoshta jo të gjithë prej nesh e kemi pranuar këtë në fillim, sepse janë përdorur metoda tjera. Sidoqoftë, ne kemi marrë parasysh se sa po shpaguhet kjo dhe tani po i vjelim frytet”.

“Ndeshja ndaj Cesenas tregoi se kurrë nuk bën të nënvlerësoni asnjë ekip. Ndeshja ndaj Romës është dukur e vështirë, por ne mbaruam takimin në pjesën e parë. Ndeshja e të mërkurës është dashur të jetë më e lehtë, të paktën kështu ishte në letër”, ka theksuar Marchisio.

Lexo më shumë

Marcelo: Eliminohemi kryelart

Mbrojtësi i Real Madridit, Marcelo, ka shprehur zhgënjimin e ekipit madrilen pas eliminimit nga Liga e Kampionëve, duke shtuar se liderët e kampionatit spanjoll eliminohen duke qenë kryelart.

“Ne kemi shfaqur paraqitje të jashtëzakonshme në minutat hapëse, por ne nuk kemi arritur ta vendosim në fund. Është pikëlluese, por ne jemi kryelart për shkak se kemi sezon të mrekullueshëm. Ne kemi luftuar, vrapuar dhe bëmë gjithçka për të fituar”.

“Ne kemi pasur rast shumë të mirë për të shijuar finalen. Ne jemi një ekip dhe kur njëri dështon, të gjithë dështojnë. Ne kemi shfaqur performancë të mrekullueshme, ishim luftëtarë, kemi bërë gjithçka për të fituar. Ne kemi punuar shumë dhe për shumë pak kemi pasur nevojë. Ne nuk kemi arritur në finale, por përkundër kësaj jemi ekip i mrekullueshëm. Penaltitë janë sikur lotari dhe ju i humbisni kur nuk keni fat”, ka thënë Marcelo.

Lexo më shumë

Ribery: Merituam finalen

Mesfushori i Bayernit të Munichut, Franck Ribery, është shprehur tejet i kënaqur me kualifikimin e bavarezëve në finalen e Ligës së Kampionëve dhe ndjen se ata merituan vendin e finalistit në Allianz Arena.

“Jam shumë i kënaqur. Kjo është arritje e madhe për klubin dhe lojtarët. Ne nuk kemi treguar frikë dhe merituam finalen”.

“Kjo do të jetë finalja ime e parë e Ligës së Kampionëve, pasi dy vite më parë isha i suspenduar për finalen ndaj Interit. Jam absolutisht i ngazëllyer me këtë”, është shprehur francezi.

Lexo më shumë

NATO nuk do të lejojë dhunë ndëretnike

NATO-ja ka tërhequr vërejtjen se nuk do të lejoj që tensionet ndëretnike në Kosovë të përshkallëzojnë në dhunë për shkak të zgjedhjeve në Serbinë fqinje më 6 maj.

Gjenerali danez, Knud Bartels, kryesues i Komitetit Ushtarak të NATO-s, tha të enjtennë Bruksel se batalioni për reagim të shpejtë gjermano-austriak, që aktualisht po vendoset në Kosovë, do të siguroj një ambient të qetë dhe të sigurt.

Të enjten ateroi në Kosovë edhe një zbarkim i 70 trupave gjermane të Batalionit të dytë të Forcës Operacionale Rezervë. Kjo është pjesa e dytë e zbarkimit të 550 ushtarëve gjermanë dhe 150 ushtarëve austriakë, i cili do të kompletohet deri të hënën e ardhshme.

Përforcimet me trupa nga Gjermania dhe Austria, do ta shtojnë në afro 7 mijë pjesëtarë, misionin paqeruajtës KFOR në Kosovë, të udhëhequr nga NATO-ja.

Institucionet e Kosovës kanë paralajmëruar se nuk do të lejojnë mbajtjen e zgjedhjeve lokale të Serbisë në Kosovë dhe as organizimin e zgjedhjeve parlamentare apo presidenciale nga ana e Serbisë për shtetasit me dyshtetësi.

Lexo më shumë

Tadic: Kosova është e jona, por jo zemra e Serbisë

Kandidati për president i Republikës së Serbisë, Boris Tadic, gjatë fushatës së tij në Sabac, ka deklaruar se nuk mendon që Kosova është zemra e Serbisë, por qytetarët e saj.

“Secili qytetar është zemra e Serbisë, sepse siguron të ardhmen e vendit. Nuk lejoj të na shkelin në Kosovë, të cenohet integriteti ynë në Kosovë, por nuk dëshiroj luftë. Duam që me rrugë paqësore të luftojmë për Kosovën” ka thënë Tadic, raporton B92.

Ai ka thënë se nuk e përkrahë idenë e ndarjes së Kosovës, nuk do ta njeh pavarësinë e Kosovës, por sipas tij duhet të gjendet një zgjidhje, e cila nuk do të jetë e lehtë.

“Duke mbrojtur Kosovën ne mbrojmë integritetin e vendit tonë. Andaj nuk do të ndalemi të mbrojmë interesat tona nacionale, ndryshe do të vinim në pikëpyetje integritetin, dhe gjithçka tjetër, siç janë investimet dhe e ardhmja”, ka thënë ndër të tjera Tadic.

Babait të kombit serb, Dobrica Cosic, vazhdimisht e ka promovuar gënjeshtrën si instrumentin më të mirë institucional për interesa kombëtare të Serbisë. Po ashtu, shumica e politikanëve serbë vazhdojnë ta quajnë Kosovën “zemra e Serbisë” për të treguar gjoja lidhshmërinë që ka Serbia me Kosovë, të cilën në fakt e kishte okupuar në fillim të shekullit të kaluar. 

Lexo më shumë

Qeveria e gatshme të takohet me ilegalët e veriut

Qeveria e Kosovës duket të ketë ndërruar mendje sa i përket komunikimit me përfaqësuesit ilegalë të veriut.

Për të tejkaluar këtë gjendje, njofton KTV, këshilltarja e kryeministrit Hashim Thaçi, Dhurata Hoxha, nuk e ka përjashtuar mundësinë që të ketë takime edhe me kryetarët ilegalë, nëse ata zgjidhen nga qytetarët e asaj pjese.

Në veri të Kosovës funksionojnë disa komuna me këshilltarë e kryetarë të dalë nga votimet e bëra sipas ligjeve dhe kushtetutës së Serbisë. 

Lexo më shumë

ICO për veriun: Beogradi të ndryshojë qasjen, Prishtina të afrohet

Zyra Civile Ndërkombëtare (ICO) në Kosovë, ka shpallur publikimin e raportit “Mysafirë në shtëpinë tonë: Propozimi Gjithëpërfshirës për Statusin dhe komuniteti serb në veri të Kosovës”.

 Raporti është rezultat i një aktiviteti të konsultimit me qytetarët i zhvilluar nga zyra e ICO-s në Mitrovicë, me ç’rast është diskutuar me mbi 100 serbë. “Për të parën herë, ky është zëri i një mostre solide dhe përfaqësuesve të serbëve, që jetojnë në veri të Kosovës” thuhet në raport.

Në raport citohen po ashtu edhe fjalët e një serbi që ka theksuar se e di që në Propozimin Gjithëpërfshirës për Statusin parashihet universiteti, donacionet nga Beogradi, por dëshiron të dijë se cili është plani i qeverisë së Kosovës. “Sa shkolla, sa spitale etj, do të hapin në veri?”

Në raport konkludohet se serbët e veriut nuk kanë mekanizma të pranueshëm apo të dëshiruar, që do të mundësonin adresimin e shqetësimeve të tyre. Thuhet se gjendja në terren nuk do të përmirësohet nëse nuk do të ndryshoj mendimi dhe qëndrimi në Beograd.

Po ashtu, në këtë raport theksohet se edhe qeveria e Kosovës duhet të bëjë maksimumin për t’ia shtrirë dorën komunitetit serb në veri, me qëllim të integrimit më të shpejtë të tyre në shoqërinë kosovare.

Lexo më shumë

Konfirmohet përkrahja e Turqisë

Turqia do të vazhdojë të mbështesë Kosovën edhe në të ardhmen në procesin e njohjeve, por edhe në fushat tjera. Kështu premtuan kryetari i Kuvendit të Madh të Turqisë, Cemil Çiçek dhe presidenti i Republikës së Turqisë, Abdullah Gül, në takime të ndara me delegacionin e Kuvendit të Kosovës, i cili i udhëhequr nga kryeparlamentari, Jakup Krasniqi, po qëndron për vizitë të Turqi.

Në takim me presidentin e Republikës së Turqisë,Abdullah Gül, kryeparlamentari Krasniqi e njoftoi atë me zhvillimet e fundit në Kosovë, me përparimet që ka bërë Kosova dhe me sfidat me të cilat ajo po përballet, duke kërkuar vazhdimin e mbështetjes së Turqisë si në procesin e njohjeve ndërkombëtare, ashtu edhe në proceset tjera.

Ndërsa, presidenti Gül theksoi se Turqia do të vazhdojë të mbështesë Kosovën edhe në të ardhmen në procesin e njohjeve, por edhe në fushat tjera.

Kë takim me kryetarin e Kuvendit të Madh të Turqisë, kryeparlamentari i shprehu mirënjohje Turqisë për mbështetjen që po i jep Kosovës . Ai përmendi edhe marrëveshjet që Kosova dhe Turqia kanë arritur, duke theksuar se marrëdhëniet ndërmjet dy vendeve duhet të thellohen dhe zgjerohen edhe më tej, thuhet në njoftimin e lëshuar nga Zyra për Informim e Kuvendit të Kosovës.

Duke folur për raportet me fqinjët dhe integrimet rajonale, Krasniqi ka pohuar se Kosova ka raporte të shkëlqyeshme me fqinjët, pos me Serbinë, e cila nuk e ka njohur Kosovën dhe vazhdon t'i bëjë pengesa zhvillimit dhe afirmimit ndërkombëtar të vendit. Në këtë aspekt ai kërkoi nga autoritetet turke që në takimet me zyrtarët serbë të ushtrojnë ndikimin e tyre për ndërrimin e qasjes së Serbisë ndaj Kosovës.

Kryetari i Kuvendit të Madh të Turqisë, Cemil Çiçek, vlerësoi se marrëdhëniet midis Kosovës dhe Turqisë janë shumë të mira , ndërsa këtë vizitë e cilësoi si mundësi shumë të mirë për thellimin e marrëdhënieve midis dy vendeve në përgjithësi e në veçanti thellimin e bashkëpunimit ndërmjet dy parlamenteve. Ai theksoi se Turqia do të vazhdojë të mbështesë Kosovën në të gjitha aspektet, si në vazhdimin e konsolidimit te institucioneve, ashtu edhe në zhvillimin ekonomik të saj.

Dy kryeparlamentarët janë pajtuar për nevojën e thellimit të mëtejmë të marrëdhënieve ndërmjet parlamenteve të dy vendeve mike. Krasniqi me këtë rast i ka bërë ftesë homologes turk, z. Çiçek, për vizitë zyrtare në Kosovë.

Lexo më shumë

Transformim radikal i qeverisjes lokale

Qeverisja lokale në Kosovë, përgjatë katër viteve të fundit, është ballafaquar me një transformim radikal, i cili ka ndodhur në tri nivele, në nivelin e zbritjes së përgjegjësive nga qendra tek niveli komunal përmes procesit të decentralizimit dhe ligjeve që janë në fuqi dhe kushtetutës, pastaj përmes riorganizimit territorial, respektivisht themelimin e pesë komunave të reja dhe zgjerimin e komunës së Artanës. Ky vlerësim doli të enjten gjatë prezantimi të një raporti nga Instituti i Kosovës për Qeverisje Lokale (IKQL) me temën “Blerësit misteriozë”.

Drejtori i IKQL, Besnik Tahiri, gjatë prezantimit të raportit tha se qeverisja lokale në tri vjetet e fundit ka pasur një transformim radikal, i cili ka ndodhur në tri nivele. Ai pohon se raporti ka nxjerrë në pah se ka shpërputhje në mes të asaj që është në letër dhe realizimit të tyre në praktikë nëpër komunat e Kosovës, transmeton Kosovapress.

Sipas Tahirit kur flitet për qeverisjen lokale në Kosovë, zakonisht mendja shkon tek themelimi i komunave të reja, a në fakt shumë pak hulumtohen, debatohen dhe testohen shërbimet që i ofrojnë komunat për qytetarët e saj.

Sipas tij, nga hulumtimi i bërë, kanë vërejtur se ekziston një hendek i madh në mes të asaj që është në letër dhe zbatimit të praktikë. Kjo, sipas Tahirit, ka ndodhur, jo për shkak së komunat nuk kanë dashur t’i zbatojnë ato, por për shkak se komunat gjatë kohës së reformave nuk kanë pasur mbështetje financiare e shumë shërbime të tjera.

Raporti i IKQL-së ka nxjerrë në shesh shumë defekte sa i përket shërbimeve komunale. Sipas tij, uebfaqet komunal duhet të jenë të punuar në atë mënyrë që ato të jenë më lehtë të shfrytëzueshme për qytetarët; problemet e qasjes në gjuhë të ndryshme dhe mungesës së shërbimeve shtesë për pajisje online me dokumente për qytetarë. 

Lexo më shumë

Togu i FSK-së u kthye nga Turqia

Është kthyer nga Turqia, togu i FSK-së i cili mori pjesë në një trajnim në Brigadën e 28-të Korpusit të Tretë të Forcave të Armatosura të Ushtrisë së Turqisë dhe në Qendrën e Partneritetit për Paqe në Ankara, për operacione mbështetëse të paqes.

Trajnimi i pjesëtarëve të FSK-së në Turqi, nga 22 marsi deri më 26 prill, u mundësua nga Ministria e Mbrojtjes dhe Shtabi i Përgjithshëm i Ushtrisë së Turqisë, në bazë të Marrëveshjes bilaterale për bashkëpunimin ndërmjet FSK-së dhe Ushtrisë Turke, thuhet në një kumtesë të FSK-së.

Në vizitë zyrtare në Ankara qëndroi edhe komandanti i FSK-së, gjenerallejtënant Kadri Kastrati, së bashku me komandantin e Brigadës për Reagim të Shpejtë të FSK-së, gjeneral brigade Nazmi Brahimaj, të cilët u pritën nga personalitet të larta ushtarake të Turqisë.

Komandanti i FSK-së, gjeneral Kastrati, falënderoi Forcat e Armatosura të Turqisë, për mbështetjen e vazhdueshme që po i japin Forcës së Sigurisë së Kosovës, posaçërisht trajnimin e Togut të FSK-së, për operacione paqeruajtëse jashtë vendit, si dhe njëherësh përcolli nga afër trajnimet finale të Togut të FSK-së.

Ky është trajnimi i parë për mbështetje të operacioneve paqësore në botë i një Togu të FSK-së.

Trajnimin e kanë përfunduar me sukses të gjithë pjesëtarët e FSK-së, të cilët janë shpërblyer me medalje dhe certifikata nga Akademia Ushtarake e Forcave të Armatosura të Turqisë. 

Lexo më shumë

Rosell shpreson në rinovim të Guardiolës

Presidenti i Barcelonës, Sandro Rosell, shpreson që trajneri Pep Guardiola ta rinovojë kontratën e tij me klubin nga Camp Nou.

Rosell ishte pyetur për situatën e Guardiolës pasi Blaugranët ishin eliminuar nga Liga e Kampionëve.

“Unë shpresoj që trajneri jonë për sezonin e ardhshëm të jetë Pep Guardiola. Mendoj se gjatë këtyre javëve do të kemi kohë për të reflektuar. Ne duhet të kemi besim tek ai, është fundamentale për stilin tonë të lojës që të zhvillojmë lojë të bukur. Shpresoj që ne, grupi, të mbetet i bashkuar”, ka potencuar Rosell. 

Lexo më shumë

United dhe Reali pas Lucas

Manchester United është vënë në ndjekje të yllit të Sao Paulos, Lucas, por problem për Djajtë e Kuq mbetet konkurrenca e fortë.

Manchester United e sheh mesfushorin ofensiv si perspektivë ekipore, pasi Scholes nuk është në vitet e tij rinore.

Sidoqoftë, kampioni i Anglisë duhet të mendojë një ofertë më të lartë se sa 12 milionë funte, pasi në garë fuqishëm është edhe Real Madridi dhe nuk duhet të përjashtohet as Interi.

Lexo më shumë

Butragueno: Sezon i mirë për Realin

Drejtori i Real Madridit, Emilio Butragueno, ka refuzuar që të hedhë poshtë të bëmat e lojtarëve të tij gjatë sezonit pas eliminimit nga Liga e Kampionëve, duke thënë se përkundër kësaj, madrilenët mund të jenë të kënaqur me sezonin e tyre.

“Ekipi po kalon sezon të jashtëzakonshëm. Statistikat tona në La liga janë të pa besueshme dhe ne kemi shkuar shumë larg në këtë kompeticion. Ne nuk mund të kërkojmë më shumë nga lojtarët tanë”.

“Ekipi tentoi, bëri gjithçka për të arritur në finale dhe ne jemi krenarë me lojtarët tanë. Ne jemi përballur me një ekip me karakter shumë të madh, të jashtëzakonshëm. Lodhja ishte evidente për të dyja palët. Penaltitë ishin të pa parashikueshme dhe shpeshherë janë fituar nga ekipi më i inspiruar”, ka thënë Butragueno. 

Lexo më shumë

Ancelotti: Nuk ka mbaruar epoka e Barçës

Trajneri i PSG-së, Carlo Ancelotti, ka këmbëngulur se Barcelona do të kthehet më e fuqishme se kurrë sezonin e ardhshëm, që duhet t’i japë fund zhgënjimit të pësuar nga Blaugranët këtë edicion.

“Derisa Messi, Xavi, Iniesta dhe pjesa tjetër e ekipit të mos ndahen, nuk është mirë të themi se epoka e tyre ka mbaruar. Barcelona nuk është harxhuar. Përkundrazi, ata do të kthehen më të fortë se kurrë”.

“Ata thonë se Messi është jashtë formës vetëm për një penalti të dështuar, por është naive të kritikojmë Messin, i cili është lojtari më i mirë në botë. Guardiola është fantastik, ai ka fituar gjithçka dhe argëtoi botën me filozofinë e tij. Pse duhet që ai të ndërrojë ekip? Është e lehtë të bëjmë pohime nga prapaskena. Ndoshta ata janë lodhur. Ju duhet të merrni parasysh fuqizimin e rivalëve. Real Madridi ishte më konsistent dhe më konkret në La Liga dhe ata merituan fitoren në Camp Nou”, ka deklaruar ‘Carlito’. 

Lexo më shumë

Redknapp menaxher i Anglisë?

Bosi i Tottenhamit, Harry Redknapp, do të pranojë postin e menaxherit të Anglisë, pasi javën e ardhshme atë te Tottenhami do ta zëvëndësojë Brendan Rodgers.

Menaxheri i Swanseas është lakuar jozyrtarisht si njeriu që mund të zëvëndësojë Redknapp te klubi nga White Hart Lane dhe si duket këto pohime janë të sakta, pasi Rodgers do të emërohet shumë shpejt menaxher i Tottenhamit.

Siç ka mësuar Goal, oferta e FA për Redknapp do të arrijë jo më larg se javën e ardhshme, e cila dhe do të pranohet para fillimi të Kampionatit Europian, Euro 2012. 

Lexo më shumë

Capello dëshiron Ligën Premier

Ish-përzgjedhësi i Anglisë, Fabio Capello, dëshiron të rikthehet në ishull për të drejtuar ndonjë skuadër të Ligës Premier.

Me postet e zbrazëta te Chelsea dhe Tottenhami në fund të sezonit, italiani ka thënë për Daily Mail se ai ishte dashuruar në Londrën.

“Dua të jem trajner edhe për dy vite të tjera. Më pëlqen Londra. Preferoj të jem trajner në Ligën Premier. Do të rikthehesha në Itali vetëm për diçka shumë të shijshme”, ka thënë Capello.

Lexo më shumë

Anglia kërkon Guardiolën?

Trajneri i Barcelonës, Pep Guardiola është caku i Federatës Angleze të futbollit.

El Mundo Deportivo shkruan se Guardiola është i joshur nga ideja për të drejtuar Anglinë në fushë dhe jashtë saj.

Raportohet se Federata Angleze do të mund t’i ofrojë atij edhe një rol këshillëdhënësi nëse ideja e zëvendësimit të Fabio Capellos është jo-atraktive për spanjollin.

Lexo më shumë

Mou: Sezoni i Ronaldos, më i mirë se i Messit

Jose Mourinho mendon se Cristiano Ronaldo ka pasur një sezon më të mirë se Lionel Messi, pavarësisht se sulmuesi humbi penaltinë në gjysmëfinale të Ligës së Kampionëve ndaj Bayern Munichut.

“Cristiano Ronaldo është fantastik. Unë nuk do ta krahasoj atë me Messin, ne po bisedojmë për dy lojtarë të shkëlqyeshëm. Unë do të them se këtë vit Cristiano Ronaldo ka qenë më i mirë”, ka deklaruar Mourinho pas takimit të mbrëmshëm.

“Ata që humbin penalti janë ata që e kanë topin për të goditur. Pa frikë, jo vetjak, ata shkojnë dhe mundohen”.

“Unë jam krenar për djelmoshat e mi. Ata janë super njerëz, por Supermeni është film. Messi humbi dje dhe sot tre djelmosha humbën pasi kështu është futbolli dhe këto gjëra ndodhin”, ka shtuar portugezi.

Lexo më shumë

Allegri nuk mendon për të ardhmen

Massimilliano Allegri ka refuzuar të komentojë të ardhmen e tij me Milanin pas fitores së mbrëmshme vendimtare ndaj Genoas, por ka kujtuar se ai ka edhe dy vite nga kontrata aktuale.

Me Rossonerët që tashmë janë eliminuar nga Liga e Kampionëve dhe kanë ngecur tre pikë prapa Juventusit në garën për titull, u spekulua se pronari i klubit, Silvio Berlusconi është duke menduar ta shkarkojë Allegrin.

Por, ky i fundit nuk është duke menduar për spekulimet dhe thotë se është i fokusuar në garën për Scudetto dhe se ende beson se titulli mund të fitohet.

“Ne do të flasim për të ardhmen një herë tjetër... por unë ende kam edhe dy vite të mbetura në kontratë. E vetmja që mund të bëj është t’u jap këshilla lojtarëve, trajneri zgjidhet nga klubi”.

“Presidenti Berlusconi më telefonoi para ndeshjes, siç bën gjithmonë. I thash se ende besoj në titull dhe shpresoj se Juventusi do të humbë pikë”, ka thënë Allegri pas fitores 1-0 ndaj Genoas. 

Lexo më shumë

Conte: Juve e uritur për tituj

Trajneri i Juventusit, Antonio Conte, ka shpjeguar se dëshira e klubit për ta fituar Scudetton është intensifikuar në vitet e fundit duke parë rivalët e tyre derisa fitojnë trofe.

Bianconerët mbrëmë ruajtën avantazhin prej tre pikësh ndaj Milanit në krye të renditjes së Serie A pas fitores së vështirë 1-0 ndaj Cesenas.

“Ne jemi në maje të tabelës dhe pasi kemi ndjekur festat e skuadrave të tjera, uria jonë tash është shtuar”.

“Sot [e mërkurë] ne treguam pjekuri: një ndeshje e vështirë dhe një dëshirë për fitore, kundër një skuadra që luftoi deri në fishkëllimën e fundit”.

“Ne dhamë gjithçka. Siç është e pashmangshme kur kundërshtari juaj mbyllet, ne vuajtëm ca më shumë”, ka thënë Conte për faqen zyrtare të klubit. 

Lexo më shumë

Robben: Ajo që bëmë ishte mrekulli

Arjen Robben është më se i kënaqur që skuadra e tij ka arritur në finale të Ligës së Kampionëve, veçanërisht me rikthimin dhe lojën e bukur të bërë pas disavantazhit 2-0.

“Ishte mrekulli. Jam shumë krenar për bashkëlotjarët e mi. Kur ju e filloni ndeshjen dhe jeni 2-0 pas 14 minutash, ju duhet të jeni mentalisht të fuqishëm për t’u rikuperuar”.

“Në pjesën tjetër të lojës ne luajtëm një futboll shumë të mirë dhe në fund mendoj se ishte fitore e merituar”, ka thënë holandezi.

Bayerni në finale do të takohet me Chelsean kur do të synojë ta fitojë titullin e pestë evropian.

Lexo më shumë

Miranda Kerr: Shëndeti është pasuri

Një prej femrave më të bukura në botë, modelja Miranda Kerr, thotë se shëndeti është pasuria e saj dhe se ajo e mban këtë duke praktikuar ‘yoga’ dhe dietë super të shëndetshme.

29 vjeçarja e cila ka një djalë 15 muajsh me bashkëshortin Orlando Bloom, praktikon nga 30 minuta në ditë ‘yoga’ dhe refuzon ushqimet e shijshme si pjesë e dietës së saj.

“Unë sigurohem që të bëj gjysmë ore ‘yoga’ në mëngjes, në mënyrë që të ndihem më pas më mirë. Unë kam punuar mjaft shumë duke bërë pilates dhe ‘yoga’ dhe ushtrime të lehta me pesha, teksa ushqimi super i shëndetshëm nuk mungon. Mendoj se shëndeti është pasuria juaj”, ka thënë Miranda.

Lexo më shumë

Xherdan Shaqiri sot merr çmimin "Diaspora"

Sonte në një solemnitet rasti në Bernë futbollisti më i mirë i përfaqësueses së Zvicrës, shqiptari nga Kosova, Xherdan Shaqiri, do të marrë çmimin “Diaspora” për vitin 2012.

Shaqiri nderohet me këtë çmim për kontributin e dhënë në integrimin dhe krijimin e një imazhi më të mirë të Kosovës dhe kosovarëve në Zvicër.

Ambasadori i Kosovës në Bernë, Naim Malaj, ka thënë për Albinfo se në solemnitetin e sotëm janë të ftuar mysafirë të shumtë nga Kosova dhe Zvicra.

Në mesin e të ftuarve është edhe ministri i Diasporës së Republikës së Kosovës, Ibrahim Makolli, zyrtarë të lartë të Bazelit prej nga edhe vjen Shaqiri, diplomatë të huaj të akredituar në Bernë, si dhe bashkatdhetarë.

Për ceremoninë e ndarjes së çmimit për Shaqirin kanë treguar një interesim të madh edhe mediat zvicerane, thotë Malaj.

Ambasadori i Kosovës në Bernë, Naim Malaj, ka përsëritur qëndrimin se pse është zgjedhur Shaqiri që të nderohet me çmimin "Diaspora" për vitin 2012.

"Shaqiri është përfaqësuesi më i njohur i bashkësisë kosovare-shqiptare në Zvicër", ka thënë Malaj.

Ky futbollist sipas tij është "një shembull i integrimit të suksesshëm" dhe më tutje është një ndërtues i rëndësishëm urash mes dy vendeve. "Falë Shaqirit dhe lojtarëve tjerë me prejardhje shqiptare, si Xhaka, Xhemaili, Behrami ose Mehmedi, kombëtarja e Zvicrës ka mijëra tifozë edhe në Kosovë", ka thënë Malaj për Albinfo.ch.

Edhe Shaqiri vetë ka shprehur kënaqësinë për çmimin në një prononcim të mëhershëm.
"Kosova është atdheu i babait tim dhe të parëve të mi", thotë ai duke pohuar se Kosova ka peshë shumë të madhe për të.

Lidhjen e tij me të dy kulturat, Shaqiri e përmbledh me një fjali: "Unë jam i lindur në Zvicër, luaj futboll për Zvicrën dhe e ndjej veten si një zviceran me shumë respekt për Kosovën ose si kosovar me shumë respekt për Zvicrën".

Lexo më shumë

Ledi së shpejti në Kosovë për dy këngë

Ish-banorja e “Shpija 2” dhe tashmë këngëtare, Ledi Vokshi, e cila ka kohë që është duke jetuar në Amerikë, së shpejti pritet të kthehet në Kosovë për projekte të reja.

Këngëtarja do të vijë në Kosovë në fund të majit për të incizuar një këngë të re. Realizimi i saj i ri do të bëhet nga Kiço Beats, ndërsa ajo njëkohësisht do të realizojë edhe një këngë tjetër verore me ritme dance dhe house.

Këdo dy këngë do të shoqërohen edhe me videoklipe. 

Lexo më shumë

“E vërteta” e Edonës

Ka vetëm pak ditë që në ekranet tona televizive vazhdon të shfaqet videoprojekti më i ri muzikor i këngëtares Edona Llalloshi. Kënga e titulluar “E vërtetë”.

Edona ka përshtypjen se kënga do të pëlqehet në publik, sepse është punuar shumë në të. Tekstin e kë realizuar Avni Qaili, ndërsa orkestrimin dhe kompozimin e ka bërë Virusi.

“Sapo kam lansuar në treg këngën ‘E vërtetë’ dhe jam e lumtur se kënga vazhdon të pëlqehet në publik. Është një baladë me peshë, që mund të përdoret edhe në festivale. Pra një këngë e punuar me mjeshtri të madhe”, ka thënë ajo për “Zëri”.

Edona ka planifikuar që pas një kohe të shkurtër të sjellë në treg edhe një projekt tjetër të ri.

Lexo më shumë

Edhe dashuria kërkon keqkuptime

Pa marrë parasysh se a në televizor, apo në libra: kudo hasim femra që tentojnë t'i shpjegohen meshkujve dhe anasjelltas. Me këtë rast asgjë nuk e gjallëron dashurinë më shumë, se sa keqkuptimet e vogla...

Psikologët theksojnë se gjëja e fundit që dëshiron një femër, është që ajo të kuptohet gjithmonë nga partneri i saj. Ajo dëshiron që nganjëherë të jetë e paparashikueshme. Një mashkull, i cili ka shpjegime për çdo gjë, në periudhën afatgjatë bëhet i mërzitshëm. Me këtë rast mungon fërkimi, i cili nxit tendosjet, të cilat e bëjnë marrëdhënien më interesante.

Nganjëherë femrat përdorin hidhërimin artificial, për të tërhequr vëmendjen. Ekspertët theksojnë se kjo është një gjë e mirë, pasi secili partner duhet të paraqesë tiparet, të cilët tjetri nuk i sheh dhe nuk i vëren, ngase shumë shpejt, marrëdhënia mund të bëhet tejet e ngushtë.

Kur njëri nga partnerët ruan një numër të vogël të fshehtësive që ka, mund ta bëjë partnerin e vet kureshtar dhe të joshë vëmendjen e tij. Gjithashtu mund të jetë edhe një përparësi, nëse nuk kuptoni të gjitha gjërat, por reagoni ashtu siç e ndieni veten në atë moment. 

Lexo më shumë

Ngopja me kafeinë

Kafeina, në sasi të vogla ndikon në mënyrë stimuluese, por nëse konsumohet në sasi të mëdha, efekti i saj është më shumë i dëmshëm sesa i dobishëm.

Shumicën prej nesh e tërheq filxhani i kafesë ose gota e coca-cola-s, nëse dëshirojmë ta shkrijmë sa më shpejt energjinë. Ju duhet të nisni të shqetësoheni vetëm kur sasia që keni në gotë e kalon 550 mg e kafeinës, përndryshe një filxhan, ose një gotë kafeje, ka vetëm efektin hidratues të po së njëjtës sasi uji.

Një kafe e fortë dhe mbi dozë do t‘ju dëmtojë, veç të tjerash edhe stomakun dhe do të rrisë presionin e gjakut në tru e si pasojë do të ketë ndikime jo të këndshme dhe në zemër. Përzierja që zakonisht bëhet për të qetësuar dhimbjet e kokës, mes kafes së zezë dhe paracetamolit është shumë toksike me ndikim negativ veçanërisht te mëlçia.

Nëse jeni ndër ata që janë mësuar ta pinë vazhdimisht dhe po ta ndaloni një përvojë të tillë, atëherë do të përballeni me simptoma të ndryshme, si për shembull me dhimbje koke, apo përgjumje. Nëse teprohet, kafja mund të sjell edhe sindroma të tilla si ankthi, paniku etj.

Shtimi i kafeinës në organizëm shkakton përkeqësimin akoma më të madh të lodhjes. Prandaj, kafeina duhet eliminuar sa më shumë që të mundeni. Kjo nuk do të thotë se do ta zvogëloni vetëm sasinë e kafesë; çokollata, çaji, soda, madje edhe disa ilaçe përmbajnë kafeinë, që mund ta shkaktojnë lodhjen. 

Lexo më shumë

Mac për nga siguria 10 vite prapa Windowsit

Me paraqitjen e Flashback kohë më parë, i cili isthe trojani i parë “i suksesshëm” për Mac OS X në sipërfaqe doli çështja e sigurisë së këtij sistemi tani kur ai u bë më i popullarizuar dhe më i përhapur. Natyrisht, me zgjerimin e bazës së shfrytëzuesve po rritet edhe interesimi i autorëve të kodit keqdashës për shfrytëzimin e saj.

Çfarë mendon për këtë Eugene Kaspersky, drejtori i Kaspersky Lab morri vesh Computer Business Review i cili me të pati intervistë në panairin Info Security 2012 i cili po mbahet gjatë kësaj jave në Londër. Sipas tij, Mac i Apple është së paku 10 vite, e ndoshta edhe 12 vite pas Microsoftit për sa i përket çështjes së sigurisë së sistemit.

- “Shumë shpejtë do të kuptohet se kanë të njëjtat probleme sikurse dhe Microsoft para 10 ose 12 viteve. Do të jenë të detyruar ta ndryshojnë ciklin e azhurnimeve të softuerit dhe të investojnë më shumë në pasqyrën e sigurisë. Kjo është saktësisht ajo që asokohe kishte bërë Microsoft pas infektimit me Blaster dhe paraqitjes së krimbave shumë më të komplikuar të cilët në afat të shkurtë zhvillimor infektuan miliona kompjuter. (...) Koha është që edhe Apple ta bëj të njëjtën gjë.

Në të njëjtin stil ai vazhdoi: “Cyberkriminelët tani kuptuan se Mac është një fushë intersante. Kanë gjithnjë e më shumë softuer malicioz për të, e më nuk bëhet fjalë vetëm për Flashback ose Fashfake. Mirë se vini në botën e Microsoftit. Është përlot me malware.”

Lexo më shumë

Vajza me fytyrë të përsosur

Një studente 18-vjeçare, e cila punon pjesërisht si shitëse, është shpallur si njeriu me fytyrën më të bukur në Britani të Madhe.

Shkencëtarët kanë rënë dakord se Florence Colgate ka fytyrën më të përsosur “matematikisht”.

Fytyra e vajzës është përsosmërisht simetrike dhe ajo ka raport optimal në mes të gojës, syve, fytyrës dhe ballit.

Për të marrë epitetin e fytyrës më të bukur, Florence ka fituar një garë bukurie të sponsorizuar nga Lorraine Cosmetics. 

Lexo më shumë

Merimanga han gjarprin (Video)

Një australian ka publikuar një video në internet ku shihet një merimangë e madhe duke ngrënë një gjarpër.

Xhirimi, kuptohet, është bërë në Australi, në vendin e njohur për numrin e madh të insekteve dhe reptilëve helmues.

“Skena ishte vërtet e pabesueshme. Kohë pas kohe, gjarpri e sulmonte merimangën, ndërsa ajo atëherë kthehej në rrjet”.

“Unë do të kisha vënë bast në gjarprin, duke pasur parasysh madhësinë e tij, mirëpo në fund merimanga doli fituese”, ka thënë personi që ka bërë xhirimin. 

Lexo më shumë

Kampionati botëror i mjekrave dhe mustaqeve

Në Bad Schussenried të Gjermanisë është mbajtur kampionati botëror i mjekrave dhe mustaqeve.

Në garë ishin të pranishëm 163 pjesëmarrës nga SHBA, Franca, Austria, Zvicra, Holanda dhe Gjermania.

Pjesëmarrësit kanë garuar në gjithsej 18 kategori, ndërsa disa prej tyre ishin “mustaqet mbretërore”, “mustaqet freestyle”, “mjekra e musketarëve”, “mjekra natyrore me mustaqet e stilizuara” etj.

Më të vlerësuar ishin Jens Mueller (“mjekra trendi”) dhe Lutz Giese (“mjekra kineze”), të cilët morën nga 49.5 pikë (50 pikë është maksimumi).

Kjo garë mbahet që nga viti 1987, ndërsa prej rregullave – mes tjerash – nuk lejohen ngjyrat jonatyrore të mjekrës, si edhe janë të ndaluara maskat dhe makijazhi.

Lexo më shumë

Lopa në McDonald’s (Video)

Një lopë me emrin Darcy nga qyteti Brush i Colorados kërkon shumë vëmendje dhe derisa këtë nuk e kishte marrë nga pronarët, vendosi që të shkonte te restoranti i afërt McDonald's.

Pronarja Sandy Winn ka thënë se atë e kishte thirrur policia për ta pyetur nëse ishte lopa e saj.

Punëtorët e restorantit nuk kishin mundur të besojnë kur e kanë parë lopën pranë dritares ku bëhet porositja e ushqimit.

“Lopa ime nuk ka porositur asgjë, ajo ndoshta ka shkuar që të vizitojë disa të afërm”, ka bërë shaka Sandy.

Disa të tjerë janë tallur duke thënë se Darcy kishte shkuar në restorant për të protestuar kundër prodhuesve të ushqimit të shpejtë, të cilët përdorin mishin e lopëve. 

Lexo më shumë

Kuçi: Pa kompromis kundër kriminalitetit

Kosova nuk është në nivelin e kënaqshëm të luftës kundër kriminalitetit ekonomik në përgjithësi. Por, kjo në asnjë mënyrë nuk do të thotë që ai nuk është duke u luftuar me shumë forcë nga të gjitha degët e pushtetit tonë. Kështu ka thënë zëvendëskryeministri dhe ministri i Drejtësisë, Hajredin Kuçi, në konferencën “Projekti kundër krimit ekonomik në Kosovë”, e cila u organizua nga Këshilli i Evropës.

Zëvendëskryeministri Kuçi ka falënderuar Këshillin e Evropës dhe institucionet ndihmëse të BE-së në Kosovë, të cilat kanë ndihmuar institucionet e Kosovës në luftën kundër kriminalitetit, “veçanërisht për këtë luftë që po e fillojmë sot përmes këtij projekti kundër kriminalitetit ekonomik”, transmeton Koha.net.

“Dua të veçoj këtu që Kodi i ri Penal, i cili sapo është miratuar nga Kuvendi, si qëllim parësor ka pasur ashpërsimin e luftës kundër krimit të organizuar e korrupsionit”, tha ministri Kuçi, duke paralajmëruar se edhe Kodi i ri i Procedurës Penale së shpejti do të dërgohet në Qeveri për miratim.

“Përmes këtij Kodi ne jemi përpjekur që t’i fuqizojmë prokurorët dhe gjyqtarët tanë me procedura dhe mjete të ndryshme ligjore në mënyrë që kriminaliteti të luftohet me më shume efikasitet dhe efektivitet por njëkohësisht të kujdesemi për garantimin e të drejtave të njeriut gjatë procedurës”, u shpreh ai.

Një tjetër ndryshim, sipas Kuçit, me shumë rëndësi në luftë kundër kriminalitetit, është krijimi i dhomave të veçanta brenda gjykatave themelore dhe asaj të Apelit në Prishtinë, e cila do të jetë kompetente vetëm për veprat penale nën kompetencën e Prokurorisë Speciale.

“Veprat penale të kriminalitetit ekonomik, përshirë këtu korrupsionin, krimin e organizuar, financimin e terrorizmit dhe format e tjera të tij dhe shpëlarja e parave do të gjykohen nga dhoma të specializuara pikërisht për to”, tha ai. 

Lexo më shumë

Serbia përshëndet shtimin e trupave të KFOR-it

Ministri serb i Mbrojtjes Dragan Sutanovac ka përshëndetur shtimin e trupave të KFOR-it në Kosovë, duke thënë se “Minsitria e Mbrojtjes edhe më herët, duke parë rrezikun e sigurisë, ka vlerësuar se forcat e KFOR-it në Kosovë nuk duhet zvogëluar.

“Më e rëndësishmja është që të parandalohet dhuna eventuale dhe të sigurohet paqja për të gjithë qytetarët e Kosovës”, ka thënë Sutanovac.

I pyetur nëse duhet të mbahen zgjedhjet serbe në Kosovë, Sutanovac ka thënë se personalisht mendon që duhet të mbahen zgjedhjet parlamentare, presidenciale dhe ato lokale.

Mirapo, ai ka theksuar se për këtë duhet të kihet parsyshë për sigurinë e serbëve në Kosovë, të cilët nuk jetojnë vetëm në veri, por edhe në jug të lumit Ibër. 

Lexo më shumë

Edhe Kosova edhe Evropa - iluzion i Serbisë

Premtimet se Evropa dhe Kosova do të mbeten shtyllat e politikës së jashtme serbe janë joreale dhe paraqesin riciklimin e ideve të vjetra, të destinuara publikut zgjedhor, vlerësojnë analistët e politikës së jashtme në Serbi.

Duke reaguar ndaj deklaratës së ministrit të jashtëm serb Vuk Jeremic se dy prioritet kryesore diplomatike të Beogradit do të jenë Bashkimi Evropian dhe Kosova, analistët politikë Vatroslav Vekaric dhe Bojan Brkic kanë shprehur dyshim nëse kombinimi i këtyre dy objektivave do të mund të ndodhë në realitet pas zgjedhjeve.

"Mbase ekziston bindja se kjo ishte një linjë e mirë. Këto deklarata dhe paraqitje të politikanëve, pavarësisht nga cila anë vijnë, pretendojnë ta thonë atë që do të pranojë shumica e qytetarëve," tha Vekaric, duke vlerësuar kjo është konceptim joreal që pas zgjedhjeve do të shkojë në drejtim "racional".

Pozicioni i Brukselit dhe qëndrimi i bashkësisë ndërkombëtare me rastin e organizimin e zgjedhjeve serbe në Kosovë po dëshmojnë se Serbia nuk ka ndërmarrë mjaft hapa diplomatikë për të stabilizuar situatën në Kosovë, tha Bojan Brkic, nga Forumi për Marrëdhënie Ndërkombëtare.

"Beogradi ka arritur marrëveshje të rëndësishme me Prishtinën dhe BE-ja, si një ndërmjetësues, pret përpjekje shtesë nga Beogradi për zbatimin e këtyre marrëveshjeve", tha Brkic, citojnë mediat serbe.

Ai vuri në dukje se është indikativ fakti se Gjermania dhe Austria dërgojnë trupa shtesë të KFOR-it në Kosovë në mbështetje të ruajtjes së stabilitetit me rastin e mbajtjes së zgjedhjeve parlamentare dhe presidenciale serbe, që krijon përshtypjen se Serbia në njëfarë mënyre shihet si kërcënim për stabilitetin në Kosovë.

"Nëse Serbia mendon se me veprimet e saj diplomatike, çfarë është duke aplikuar, çojnë në përmirësimin e situatës në Kosovë dhe integrimin e saj evropian, atëherë unë mendoj se dikush është thellë në lajthitje", tha Brkic.

Shikuar nga aspekti strategjik,Serbia nuk mund të llogaris se edhe Evropa edhe Kosova mund të jenë prioritetet e politikës së jashtme të saj, vlerësoi Brkic.

"Sigurisht se në një moment edhe kursi i mbrojtjes së Serbisë do të jetë gjithnjë e më shumë i varur nga marrëdhëniet me NATO-n, ndoshta edhe do të diskutohet për anëtarësimin e Serbisë në aleancë, kështu që insistimi në një kundërshtim qoftë Bashkimit Evropian qoftë NATO-s lidhur me Kosovës, në një perspektivë afatgjatë duket shumë i pamundur", tha Brkic.

Lexo më shumë

Zgjedhjet presidenciale më 2013, jo edhe të përgjithshmet

Kryeministri Hashim Thaçi ka normuar përcaktimin e tij për kohën kur duhet mbajtur zgjedhjet presidenciale. Ka vendosur të organizohen në vitin 2013.

Kohën e organizimit të zgjedhjeve Qeveria e ka publikuar në Kornizën afatmesme të shpenzimeve 2013-2015, që e ka miratuar të mërkurën. Gazeta ka siguruar një kopje të saj, dhe viti zgjedhor ndodhet i identifikuar në kapitullin ku flitet për shpenzimet. Aty jepet arsyetimi se përse në vitin e ardhshëm do të ketë rritje të ndjeshme të shpenzimeve në mallra dhe shërbime.

Një vit më parë, pas ngërçit politik rreth zgjedhjes së presidentit, dy subjektet më të mëdha, PDK-ja dhe LDK-ja, por edhe AKR-ja si parti përbërëse e koalicionit qeverisës, vendosën t’i hyjnë procesit të reformës zgjedhore. Marrëveshja përfshinte themelimin e dy komisioneve.

I pari ka pasur për detyrë të përgatisë amendamente kushtetuese për ta ndërruar mënyrën e zgjedhjes së presidentit – nga zgjedhja nëpërmjet Kuvendit, në zgjedhje të drejtpërdrejtë. Ndërkohë i është dhënë mandat shtesë për të ndryshuar edhe kompetencat e presidentit. Marrëveshja precizon se brenda gjashtë muajsh pas hyrjes në fuqi të ndryshimeve duhet organizuar zgjedhjet presidenciale. Orientimisht i bie që ato të mbahen në vjeshtën e sivjetme.

Komisioni i dytë ka hapur për ndryshim Ligjin për zgjedhje të përgjithshme. Këtë të hënë komisionit i ka skaduar mandati për të përgatitur ndryshimet. Ka kërkuar edhe tre muaj kohë shtesë. Anëtarët nuk janë dakorduar për zonat zgjedhore, për listat, për pragun zgjedhor, etj. Sikur të përfillej dinamika e punës e dakorduar me marrëveshjen politike, zgjedhjet nacionale do të duhej të mbaheshin në vjeshtën e 2013-s.

Por kryeministri Hashim Thaçi javën e shkuar publikisht ka thënë se tek në fund të 2014-s do t’ia japë opozitës shansin për t’u përballur.

Edhe në Kornizën afatmesme të shpenzimeve 2013-2015, nuk ka paraparë buxhet për zgjedhje nacionale në 2013-në. Për këtë vit u është referuar vetëm zgjedhjeve presidenciale.

Lexo më shumë

Një grup i opozitës siriane premton njohjen e Kosovës

Amar Abduhamid, udhëheqës i një delegacioni sirian që po qëndrojnë për një vizitë në Prishtinë theksoi se nëse opozita do të qeverisë me Sirinë, kjo e fundit shumë shpejt do ta njohë pavarësinë e Kosovës.

Përfaqësuesit e opozitës siriane janë pritur edhe nga ministri i Jashtëm i Kosovës, Enver Hoxhaj.

“Unë mendoj se pas takimit të sotëm dhe kësaj vizite, si dhe duke u bazuar në bashkëpunimin tonë, i cili vetëm ka filluar, (njohja e pavarësisë së Kosovës) do të jetë numër një në agjendën tonë. Natyrisht se ne nuk mund të flasim në emër të popullit sirian, sepse ne jemi këshilltarë të grupeve të ndryshme politike në terren ... Por, realiteti është se Kosova është në një pozicion të mirë që të përkrahet nga populli sirian”, ka deklaroi Abduhamid, transmeton Rel.

“Ky është një fillim i mirë për raporte të fuqishme në mes të Kosovës dhe popullit sirian”, ndër të tjeram Abduhamid, i cili në vitin 2005 është detyruar të mërgojë në Merilend për shkak të aktiviteteve të tij kundër regjimit.

Ministri Hoxhaj, në anën tjetër, tha se Kosova “në mënyra të ndryshme do ta ndihmojë Sirinë në rindërtimin e një shteti demokratik, ku respektohen të drejtat e njeriut”.

Siria është përfshirë nga protestat antiqeveritare dhe dhuna qysh në mars të vitit të kaluar. Grupet opozitare kërkojnë largimin nga pushteti të presidentetit Bashar al-Assad.

Grupi sirian ka qëndruar sot në Kosovë me ftesë të Klubit për Politikë të Jashtme. 

Lexo më shumë

LDK: Buja nxjerr mësimdhënësit në fushatë

Lidhja Demokratike e Kosovës (LDK), akuzon ministrin e Arsimit Shkencës dhe Teknologjisë, Ramë Bujën se ka ndërprerë mësimin në shkolla, për të bërë fushatë për kandidatin e partisë së tij në garën për kryetar të Ferizajt.

LDK vlerëson se arsimtarët e shkollave të Ferizajt kanë marrë dje urdhër nga drejtorët e tyre që të marrin pjesë në një tubim politik me ministrin e Arsimit, Shkencës dhe Teknologjisë, Ramë Buja, në Greme, i cili kishte ardhur për të bërë fushatë për kandidatin e PDK-së për kryetar të Komunës së Ferizajt.

Madje, drejtorët e shkollave të Ferizajt, aktivistë të PDK-së, shkuan aq larg, sa i mbyllën shkollat, kështu që nxënësit dhe arsimtarët nuk patën mundësi të mbajnë mësim fare, thuhet në një njoftim të LDK-së.

Lidhja Demokratike e Kosovës, Dega në Ferizaj, reagon ashpër ndaj veprimeve të këtilla të zyrtarëve komunalë të Arsimit në Ferizaj, të cilët, për qëllime politike, po i manipulojnë nxënësit, ndërsa mësimdhënësit po i detyrojnë t’i bashkëngjiten fushatës së tyre.

Dega e LDK-së në Ferizaj gjithashtu kundërshton veprimet e ministrit të Buja, i cili, për t’i bërë argat bashkëpartiakut të tij, vjen në Ferizaj dhe jo vetëm që e miraton ndërprerjen e procesit mësimor nëpër shkolla, por, me paratë e taksapaguesve, shtron ndeja për partizanët e partisë së tij dhe për shërbyesit civilë.

LDK-ja ia kujton Ministrit Buja se, para se të jetë militant i etshëm i PDK-së, zyrtarisht, ai është njeriu i parë i Arsimit në vend, ndaj nuk i ka hije që të bëhet kaq hapur burizan i partisë, sepse nxënësit dhe mësimdhënësit nuk shkojnë në shkolla për partitë politike, por për dije.

”Besojmë që Buja, të paktën sa të jetë ministër, bën mirë që të përmbahet nga tifozllëku politik dhe paratë e taksapaguesve t’i shpenzojë për investime në arsim, e jo për ahengjet e PDK-së”, thuhet në njoftim.

Lexo më shumë

Pakoja e Ahtisarit, agjenda e vetme për veriun

Implementimi i Pakos së Ahtisarit është agjenda e vetme që ka Qeveria e Republikës së Kosovës për veriun. Kështu ka thënë ministri i Punëve të Jashtë të Kosovës Enver Hoxhaj, pas takimit që pati më zëvendëskryeministrin e Republikës së Maqedonisë, Musa Xhaferin.

Ministri i Punëve të Jashtme Enver Hoxhaj tha se Qeveria e Republikës së Kosovës është e vendosur që të jetësojë marrëveshjen për menaxhim të integruar të kufijve. Ndërkaq Plani i Ahtisarit është e vetmja zgjidhje për veriun, transmeton RTK.

Duke folur rreth bashkëpunimit me republikën e Maqedonisë, Hoxhaj potencoi se ekziston bashkëpunim i ndërsjellë mes dy republikave.

Ndërkaq, zëvendëskryeministri i Maqedonisë, Musa Xhaferi, tha se të dyja vendet synojnë anëtarësimin në Bashkimin Evropian. Prandaj, bashkëpunimi në fusha të ndryshe do t`i çonte përpara të dyja republikat. Xhaferi ti  tha se nëse Mitrovica do të kishte status special atëherë kostoja e sajë do të jetë shumë e lartë. 

Lexo më shumë

Interesohen për procesin e riatdhesimit

Një grup gjyqtarësh hungarezë për çështje penale dhe çështje të migrimit është pritur sot nga zëvendësministrat e Ministrisë së Punëve të Brendshme, Izmi Zeka dhe Sasa Rasic. Gjyqtarët hungarezë kanë kërkuan informacione nga zyrtarët e Ministrisë së Punëve të Brendshme (MPB) për shtetasit kosovarë, për kushtet që kanë personat që riatdhesohen dhe gjendjen e sigurisë në Kosovë.

Gjyqtarët u interesuan të dinë se cilat janë kushtet pas refuzimit të azilit të shtetasve kosovar dhe kërkuan bashkëpunim në mënyrë që të dihet se a rrezikohen ata persona pas kthimit në Kosovë, në mënyrë që nëse kjo rezulton me rrezik ata të mbrohen nga shteti hungarez, thuhet në një komunikatë të MPB-së.

Zëvendësministri Rasic, citohet të ketë thënë se gjendja e sigurisë në Kosovë është stabile dhe nuk është më arsye që njerëzit të kërkojnë azil në vendet e perëndimit për shkak të gjendjes së sigurisë.

Sipas tij, Qeveria e Republikës së Kosovës, ka ndarë një fond të veçantë për të ndihmuar personat që riatdhesohen në Kosovë nga shtetet e perëndimit në mënyrë që sistematizimi i tyre të jetë sa më i lehtë. Ndërsa zëvendësministri Zeka, ka thënë se MPB, në kuadër të funksionalizimit të saj ka 14 strategji nacionale dhe në kuadër të tyre është edhe strategjia për migrim dhe në këtë bazë është ligji për ri-pranim, tregues ky që Qeveria e Kosovës është e përkushtuar për të menaxhuar së më mirë këtë fushë.

“Ne kemi nënshkruar 15 marrëveshje për ri-pranim me shtete të ndryshme, ku qëndrojnë qytetarë të Republikës së Kosovës në mënyrë jo të rregullt, gjithashtu ekziston një bord i Sekretarëve të Përgjithshëm në kuadër të disa ministrive të Qeverisë së Kosovës, të cilët shqyrtojë kërkesat e personave që riatdhesohen dhe marrin vendime në përmirësimin dhe socializmin e jetës së tyre pas kthimit në Kosovë”, ka thënë Zeka. 

Lexo më shumë