Ramires: Barca është favorit

Mesfushori i Chelseat, Ramires, ka deklaruar se skuadra e tij mbetet inferiore kundrejt Barcelonës sa i përket kualifikimit në finale të Ligës së Kampionëve.

Blutë kanë avantazh prej 1-0 nga ndeshja e parë gjysmëfinale, ndërsa të martën mbrëma ata udhëtojnë në Camp Nou për sfidën kthyese.

“Presioni do të jetë mbi Barcelonën. Ata duhet të shënojnë, ndërsa ne mund ta shfrytëzojmë këtë”.

“Ata nuk më frikësojnë. Barca nuk është pamposhtshme. Këtë e kemi dëshmuar në Stamford Bridge”.

“Ne e kemi bërë hapin e parë – mirëpo avantazhi ynë është minimal. Ata janë akoma favoritë”, ka thënën braziliani për Sun on Sunday.

Lexo më shumë

Guardiola: Ndeshja ndaj Chelseat vendos sezonin

Trajneri i Barcelonës, Pep Guardiola, e ka vënë në pah rëndësinë e sfidës kthyese të gjysmëfinales së Ligës së Kampionëve ndaj Chelset.

Blaugranët u mposhtën me rezultat prej 1-0 në ndeshjen e parë që u zhvillua në Stamford Bridge, ndërsa të martën mbrëma ata janë nikoqirë të Bluve në Camp Nou.

Pas humbjes së të shtunës në ‘el Clasico’, Barca nuk është më në garë për titullin e La Ligas, prandaj të gjitha forcat do t’i përqendrojë në Ligën e Kampionëve dhe në Kupën e Mbretit.

“Të martën do të shohim nëse mund ta kalojmë testin, por mendoj se lojtarët tanë do të mundohen të gjejnë një mënyrë që gjërat të shkojnë mirë për ne kundër Chelseat”.

“Ajo që do të ndodhë të martën do të shënojë atë që ka mbetur nga sezoni”, ka deklaruar Pep në një konferencë me gazetarë. 

Lexo më shumë

Allegri: Juventusi favorit për titull

Pas barazimit prej 1-1 ndaj Bolognas, trajneri i Milanit, Massimiliano Allegri, ka deklaruar se Juventusi është favorit për titullin e Italisë.

“Jemi të zhgënjyer, sepse nuk mundëm të fitojmë. Ne besuam se mund ta fitonim ndeshjen dhe përkohësisht të ngjiteshim në krye të tabelës”.

“Mirëpo, është e vërtetë se janë edhe pesë ndeshje të mbetura. Nëse Juventusi fiton sonte (e diel), ka gjasa të mëdha që ata ta fitojnë Scudetton, por nëse nuk fitojnë, gjithçka do të mbetet si ka qenë”, ka thënë Allegri për Sky Sport Italia.

Zonja e Vjetër zhvillon kryendeshjen e kësaj jave në Juventus Stadium kundër Romës, dhe me fitore eventuale do të largohet tri pikë nga Milani. 

Lexo më shumë

Derbi i Mançesterit vendos titullin

Me rezultat prej 2-0, Manchester City ka triumfuar në Molineux Stadium kundër Wolverhampton Wanderers për të bërë një hap mjaft të rëndësishëm në garën për titullin e Anglisë.

Në gjysmën e parë (27’), Sergio Aguero shënoi golin e tij të 22-të këtë edicion në Ligën Premier dhe me epërsi të ekipit mysafir skuadrat shkuan në pushim.

‘Pasanikët’ ishin ata që shënuan edhe në fraksionin e dytë, ndërsa realizues ishte Samir Nasri (74’), i cili u asistua nga Carlos Tevez.

Pas kësaj fitoreje, Manchester City gjendet vetëm tri pikë prapa Manchester Unitedit, ashtu që pritet një derbi i zjarrtë mes dy skuadrave nga kreu i tabelës, i cili do të jetë vendimtar se si do të shkojnë gjërat sa i përket titullit.

Nga ana tjetër, Wolverhamptoni përshëndetet nga Liga Premier dhe tashmë është pjesë e ligës Championship.

Ndryshe, Liverpooli ka përjetuar një tjetër dështim. Kësaj radhe është mposhtur me epërsi minimale nga WBA në Anfield. 

Lexo më shumë

Rada kërkon lirimin e serbëve të arrestuar

Deputetja e Listës së Bashkuar Serbe në Kuvendin e Kosovës, Rada Trajkovic ka apeluar tek bashkësia ndërkombëtare që të ndikojë për t’u liruar nga arrestimi Goran Arsicin – kryetar i të ashtuquajturit Rrethi i Kosovës dhe sekretarin e Kryqit të Kuq në Lipjan, Novica Zivic, të arrestuar një ditë më parë.

Goran Arsic dhe Novica Zivic, janë arrestuar pas akuzave të ngritura nga disa qytetarë serbë në Lipjan, se po u bënin presion për t’i detyruar që të marrin pjesë në zgjedhjet serbe. Ata i kanë kërcënuar bashkëkombësit e tyre, se nëse nuk votojnë, do të arrestohen kur të hynë në territorin e Serbisë.

Në një deklaratë me shkrim, që ua shpërndarë mediave, Trajkovic ka theksuar se arrestimi i dy serbëve është vazhdim i aksionit të arrestimit pa shkak të serbëve në Kosovë, i cili ka për qëllim që të gjithë të tjerëve t’u çojë mesazhin se janë të padëshirueshëm në Kosovë.

"Kjo ndjekje e serbëve është ekskluzivisht e motivuar etnikisht dhe nuk mund t’i arsyetojë as deklaratat e rrejshme të dëshmitarëve dhe as arsyetimet absurde të Policisë së Kosovës”, ka thënë Trajkovic.

Lexo më shumë

Tadic: Pa zgjedhje lokale në Kosovë

Pretenduesi edhe për një mandati të presidentit në Serbi, Boris Tadic ka theksuar se zgjedhjet lokale në Kosovë nuk do të mbahen, sepse është krijuar një situatë e re në të cilën bashkësia ndërkombëtare insiston në rezolutën 1244, sipas së cilës përgjegjës për organizim zgjedhjesh në Kosovë është UNMIK-u.

Tadic ka theksuar se problemi i zgjedhjeve në Kosovë ekziston sepse Serbia nuk ka sovranitet të plotë pas vitit 1999 dhe pas miratimit të rezolutës 1244 në të cilën tekstualisht theksohet se UNMIK-u është përgjegjës për organizimin e zgjedhjeve në Kosovë e jo organet përkatëse në Serbi, njofton B92, citon Koha.net.

"Me Rezolutën 244 mbrojmë pjesën e mbetur të sovranitetit që është i mundur të mbrohet në Kosovë dhe po qe se sillemi në kundërshtim me të, do të shkelnim të drejtën ndërkombëtare dhe do t’iu jepnin të drejtë kundërshtarëve”, ka thënë Tadic, lider i Partisë Demokratike.

Ai ka theksuar se UNMIK-u nuk mund të garantojë zgjedhjet në Kosovë dhe se po zhvillohen bisedime delikate me OSBE-në dhe se Serbia nuk ka potenciale të sigurisë për të mbajtur si duhet zgjedhje lokale në Kosovë.

“Ato mund të mbahen vetëm në bashkëpunim me bashkën ndërkombëtare”, ka thënë Tadic, duke përsëritur se "edhe Kosova edhe Evropa" është politika e vetme e mundshme e që mund ta zhvillojë Serbia. 

Lexo më shumë

Mbëltohen drunj dekorativë në kazermën “Adem Jashari”

Në kuadër të shënimit të Ditës së Tokës, në kazermën “Adem Jashari” të FSK-së, në Prishtinë, sot simbolikisht u mbëltuan fidanë (drunj dekorativë, bredha, trëndafila dhe lule sezonale).

Në aktivitetin e organizuar në shënimin e kësaj dite ishin të pranishëm ministri i FSK-së Agim Çeku dhe komandanti i FSK-së, gjenerallejtënant Kadri Kastrati me bashkëpunëtorë, përfaqësues të Ministrisë së Mjedisit dhe Planifikimit Hapësinor, MBPZHR-së, MASHT-it, Komunës së Prishtinës dhe USAID BEP.

“Mbjellja e këtyre drunjve dekorativ dhe fidanëve, në kazermat tona, është një simbolikë, sepse këta drunj do të jetojnë dhe paraqesin një lidhje mes nesh dhe gjeneratave të ardhshme”, tha ministri i FSK-së, Agim Çeku.

Ai apeloi te të gjithë qytetarët e Kosovës, që të angazhohen maksimalisht për një ambientet më të bukur dhe më të pastër në Kosovë.

Pjesëtarët e FSK-së, në ambientet e kazermës “Adem Jashari” kanë mbjellë qindra drunj dekorativë pishe, kumbulla dekorative, trëndafila dhe lule sezonale.

Dita e Tokës me një aktivitet u shënua edhe në Parkun Nacional në Gërmi. 

Lexo më shumë

Klinikat e QKUK-së pa drejtorë

Klinikat e QKUK-së drejtohen ende nga ushtrues detyre, sepse Ministria e Shëndetësisë dy herë me radhë ka anuluar zgjedhjen e drejtoreve pas miratimit të statusit për këtë qendër sipas të cilit, do të pamundësohen parregullsitë në këtë proces. Por sipas, drejtorit ekzekutiv të QKUK-së, Nijazi Gashi, ky statut lë hapësirë për manipulim.

”Unë mendoj se statuti i ngërthen në vete të gjitha interesat e palëve të përfshira në këtë statut përpos që nuk është mirë i definuar. Statuti i profesorëve që janë të angazhuar në procesin mësimor mund të lë hapësirë për interpretim të dyfishtë”, tha Gashi për RTK-në.

Me këtë statut të mjekëve të angazhuar në QKUK, njëkohësisht u lejohet që të punojnë po ashtu me orar të plotë edhe në procesin mësimor, thotë Gashi.

Ndërsa drejtori i zyrës për informim në Ministrinë e shëndetësisë, Faik Hoti, tha se statuti është punë kryer dhe se ky është udhëzim për QKUK-në. ”Ai është një dokument i vlefshëm në bazë të cilit do të punoj QKUK-ja”.

Sa i përket shpalljes se konkursit për drejtor të Klinikave, Hoti tha se po punohet në këtë drejtim, por pa nxitim. ”MSH-së në bashkëpunim më QKUK-në do të do të përcaktojnë dinamiken për shpalljen e konkursit të drejtorëve të klinikave. Do të jetë një proces i përbashkët nuk do të nxitohet në momentin që do të krijohen kushte të mira atëherë do të shkohet më shpallje të konkursit”.
Edhe drejtues të Grupit të Ekspertëve të Shëndetësisë në Lidhjen Demokratike të Kosovës (LDK) kanë deklaruar se gjendja në shëndetësi vazhdon të mbetet e rendë dhe Ministria e Shëndetësisë po vazhdon me politika joefikase në menaxhimin e institucioneve shëndetësore, pasi që sipas tyre për më shumë se dy vite klinikat po udhëhiqen nga ushtrues detyre.
LDK vlerëson se por gjithashtu mungon edhe inspektimi i këtij sektori dhe llogaridhënia e institucioneve private, transmeton Kosovapress.

Në emër të Grupit të Ekspertëve të Shëndetësisë në LDK, Izet Sadiku, gjatë një konference për media, të dielën deklaroi se në një analizë të bërë për gjendjen në Shëndetësinë kosovare ka konstatuar se gjendja në këtë sektor të rëndësishëm për popullsinë vazhdon të mbetet e rendë dhe se Qeveria e Kosovës, përkatësisht Ministria e Shëndetësisë, po vazhdon me politika joefikase në menaxhimin e institucioneve shëndetësore. 

Lexo më shumë

Spahiu, ambasador në Holandë

Ambasadori i deritashëm i Kosovës në SHBA, Avni Spahiu, do të vazhdojë karrierën diplomatike, por në një shtet tjetër. Burime të KosovaTimes kanë thënë se ai do të shërbejë si ambasador i Kosovës në Holandë.

Ambasador i ri i Kosovës në SHBA është caktuar Akan Ismaili, i cili pritet që më 2 maj t’ia dorëzojë letrat kredenciale presidentit Barack Obama, në Shtëpinë e Bardhë.

Kjo është konfirmuar të mërkurën e kaluar kur presidentja Atifete Jahjaga ka pritur në një takim ambasadorin Ismaili.

Avni Spahiu, ambasadori i parë i Republikës së Kosovës në Amerikë, ka shërbyer në Washington rreth katër vjet. Spahiu do të shkojë në Hagë të Holandës në kuadër të rotacionit në shërbimin diplomatik të Kosovës. Para se të marrë këtë detyrë të re, ambasadori Spahiu do të kthehet fillimisht në Ministrinë e Punëve të Jashtme të Kosovës. 

Lexo më shumë

Fakte për krimet serbe në Kosovë

Instituti për Hulumtimin e Krimeve të Luftës në Kosovë për vetëm një vit të funksionimit, ka nxjerr të dhëna e fakte të bollshme për krimet e kryera nga Serbia në Kosovë, me të cilat mund të shërbehen institucionet dhe organet e ndjekjes. Ata kërkojnë përshpejtimin e ligjit dhe buxhet të veçantë për të pasur punë më efektive.

Anëtarët e Institutit për Hulumtimin e Krimeve të Luftës në Kosovë po kërkojnë buxhet më të madh nga qeveria e vendit për të çuar përpara mbledhjen e pjesës më të paprekur të dëshmive të krimeve të luftës, dhunimet.

Ismet Salihu, anëtar i këtij instituti, përgjegjës për pjesën e hulumtimit për krime kundër njerizimit dhe gjenocid thotë se i duhet një ekip më i madh në terren për të mbledhur dhe sistemuar dëshmitë e krimeve, sidomos dhunimet.

“Do të mundohemi të mbledhim të dhënat për vrasjet, vrasjet e fëmijëve, deportimet dhe do të jetë segment i veçantë për herë të parë mbledhja dhe dëshmimi i dhunimeve, sepse dyshohet se janë dhunuar mbi 10 mijë femra shqiptare”, i ka thënë Salihu Radio Kosovës.

Salihu thotë se Instituti për herë të parë do t’u jap formën profesionale dëshmive të mbledhura në terren. “Kemi paraparë që të dhënat e institutit përveç që do t’u shërbejnë të gjitha institucioneve ato do të jenë të gatshme edhe për organet e ndjekjes”, ka thënë Salihu.

Fejaz Drançolli, që kryeson ekipin për hulumtimin e krimeve në trashëgiminë kulturore kosovare thotë se ka mbledhur fakte që do shërbejnë jo vetëm si shifra dëmesh, por edhe si dëshmi për organet e ndjekjes.

“Shkatërrimi i trashëgimisë kulturore ka qenë një gjenocid. Jemi duke mbledhur dokumentacionin dhe tash shpejt mund të bëhet edhe padia. Ne shpejt gjithashtu mund t'i japim edhe koston sa kushtojnë, por në të shumtën kanë ndodhur dëmtime të pariparueshme”, ka thënë Drançolli.

Bedri Bahtiri, sekretar i përhershëm në Ministrin e Drejtësisë pjesë e së cilës është Instituti ka thënë se presin ligjin për Institutin për të mundur të përcaktohet qartë rregullimi buxhetor i tij.

Anëtarët e Institutit kanë thënë se po hulumtohen edhe krimet e kryera ndaj etniteteve të tjera në Kosovë.

Instituti kosovar për Hulumtimin e Krimeve të Luftës ka marrë për detyrë të mbledh, sistematizoj, përpunoj dhe publikoj të dhënat për krime kundër paqes, krime të luftës, krime kundër njerëzimit dhe akteve të gjenocidit të kryera gjatë viteve 1990 – 1999. 

Lexo më shumë

Nuk precizohen “mjetet kushtetuese”

Edhe pse Beogradi zyrtar ka hequr tashmë dorë nga organizimi i zgjedhjeve lokale në territorin e Kosovës, disa nga përfaqësuesit e banorëve serbë të pjesës veriore të vendit vazhdojnë të insistojnë që më 6 maj të ketë zgjedhje për kryesitë dhe asambletë komunale të Zveçanit dhe Zubin Potokut.

Përfaqësues të Qeverisë së vendit janë shprehur në mbështetje të mbajtjes së zgjedhjeve presidenciale e parlamentare të shtetit serb në Kosovë, bazuar në parimin e dyshtetësisë, ndërsa kanë paralajmëruar përdorimin e “të gjitha mjeteve kushtetuese” për parandalimin dhe pengimin e zgjedhjeve lokale.

Në Policinë e Kosovës thonë se ekzistojnë plane operative për këtë çështje, por se deri më tani nuk ka një urdhër të prerë për veprimet që parashihet të ndërmerren në ditën e zgjedhjeve, shkruan Radio Evropa e Lirë.

Në pyetjen se çfarë veprimesh parashihet të ndërmerren sipas planeve në fjalë dhe se a hyn konfiskimi i materialit zgjedhor në kuadër të këtyre veprimeve, zëdhënësi i Policisë rajonale në Mitrovicë, Besim Hoti, shprehet: “Veprimet tona nuk duhet gjithmonë të jenë të pavarura, duke marrë parasysh kompetencat ekzekutive të partnerëve ndërkombëtarë të sigurisë - EULEX-it dhe KFOR-it”.

Rëndësinë për veprime të koordinuara me mekanizmat ndërkombëtarë në veri e theksojnë edhe njohësit e rrethanave politike dhe proceseve zgjedhore në Kosovë.

E rëndësishme në këtë aspekt, sipas profesorit Mazllum Baraliu, do të jetë që Beogradi të mos luajë një “lojë të dyfishtë”.

“Besoj dhe shpresoj që kësaj radhe Beogradi është i sinqertë në relacion me Bashkësinë Ndërkombëtare dhe me vetë serbët e veriut - si qytetarë të Kosovës - që të mos lejojë ose të mos përkrahë të paktën mbajtjen e atyre zgjedhjeve që janë jolegjitime”, vlerëson Baraliu.

Analistët në Beograd thonë se me tërheqjen e Serbisë nga vendimi për mbajtjen e zgjedhjeve lokale në Kosovë, nuk është ndërprerë mbështetja dhënë strukturave paralele të instaluara në pjesën veriore të Kosovës.

Jelena Milic, drejtoreshë e Qendrës për Studime Euroatlantike në Serbi, thekson rëndësinë për një dialog ndërmjet shtetit serb dhe serbëve lokalë në veri për këtë çështje.

Zhbërja e strukturave paralele serbe në Kosovë ishte përmendur disa herë si parakusht për avancimin e Serbisë drejt integrimit në Bashkimin Evropian.Në kuadër të kërkesave të deritashme që disa nga shtetet anëtare të BE-së i kanë bërë qeverisë serbe, ishte dhe mos mbajtja e zgjedhjeve lokale në territorin e Kosovës, meqë me këtë, siç thuhet, do t’u vazhdohej mbështetja politike strukturave paralele ekzistuese. 

Lexo më shumë

Klopp: Dortmundi im, ‘i çmendur’

Trajneri i Dortmundit, Jurgen Klopp, e ka përshkruar ekipin e tij si asgjë tjetër pos të ‘çmendur’, pasi gjermanët me sukses kanë mbrojtur titullin në Bundesliga të shtunën.

“Është vërtet fantastike kjo që ka arritur ekipi im, nuk kam fjalë për të përshkruar triumfin”.

“Nëse ka pasur ndonjëherë ndonjë kampion meritor, atëherë jemi ne ata. Ekipi im ka karakter të jashtëzakonshëm dhe gjërat që ata po bëjnë janë thjeshtë të çmendura”, ka potencuar Klopp. 

Lexo më shumë

United kërkon Jordi Alban

Manchester United është duke e menduar një ofertë prej 18 milionë eurosh për mbrojtësin e Valencias, Jordi Alba.

Gjiganti anglez është vënë në kërkim të një zëvëndësuesi të Patrice Evras dhe kanë shprehur dëshirën për të dëgjuar ofertat për francezin.

Sipas Goal, Sir Alex Ferguson ka dërguar agjentët e vet për të përcjellë gjendjen e Jordi Albas, teksa në luftë për të e ka konkurrent edhe rivalin lokal, Manchester Cityn. 

Lexo më shumë

Tjetër gabim nga Milani

Milani ka arritur vetëm një barazim ndaj me rezultat 1-1 ndaj Bolonjës në San Siro, duke vështirësuar kështu pozitën në luftën për titull të kampionit në Serie A.

Ishte kjo një sfidë ordinere, ku Milani filloi me dominim, por Rossonerëve u mungoi vizioni për të shënuar.

Këtë e shfrytëzuan më së miri mysafirët, të cilët me anë të Gaston Ramirezit shënuan golin e vetëm të sfidës (26’).

Në vazhdim të takimit Milani bën presion dhe vihet në kërkim të golit. Në pjesën e dytë në një moment Ibrahimovic edhe realizoi, por gjyqtari tregoi për pozicion jashtë loje. Sipas asaj që kemi parë, Ibrahimovic nuk ishte në pozicion jashtë loje dhe goli i shënuar nga ai ishte i rregullt.

Edhe pas këtij momenti Milani bëri presion të madh, por Bolonja mbylli ekipin. Milani mbetet me 10 lojtarë në minutën e 84 kur përjashtohet Bonera me kartonin e dytë të verdhë.

Milani bëri gjithçka në fund por arriti vetëm te golii barazimit të cilin e shënoi Zlatan Ibrahimovic (90’) pas harkimit nga Urby Emmanuelson. Milani kishte dhe një mundësi të mirë të lëshuar nga Nocerino, por kjo ishte gjithçka që Rossonerët bënë, një barazim me rezultat 1-1.

Kështu Milani barazon pikët me Juventusin në krye të tabelës së Serie A, teksa Bianconerët sonte në mbrëmje zhvillojnë derbin ndaj Romës.

Lexo më shumë

Nadal deklason Djokovicin

Rafael Nadal është fituesi i turneut Monte Carlo Masters, pasi deklasoi rivalin e tij serb, Novak Djokovic.

Nadal i dha leksion numrit 1. të botës së tenisit, duke mposhtur atë pa problem me rezultat 6-3 dhe 6-1.

Spanjolli fantastik edhe niher paralajmëroi rivalët e tij se në French Open ai nuk e ka ndërmend të pranojë diçka më pak se sa vendin e parë, teksa dëshoi formën kolosale në terrenet me rërë. 

Lexo më shumë

Casillas: Fitore gjigante

Kapiteni i Real Madridit, Iker Casillas, e ka quajtur fitoren e mbretërve në Camp Nou të shtunën si hap gjigant drejt titullit në La Liga.

“Ne kemi bërë një hap gjigant drejt titullit në La Liga duke mposhtur Barcelonën. Janë edhe shumë pikë për t’u luajtur, por mendoj se duhet të respektojmë kundërshtarët. Është hap i madh ky që kemi bërë”.

“Ne jemi sillur si ekip i vërtetë. Cristiano Ronaldo bëri punë shumë të mirë, por të gjithë luajtën mirë, nga fillimi deri në fund. Ishte ndeshje shumë e rëndësishme dhe ne arritëm një fitore të vështirë. Ne punuam shumë mirë gjatë gjithë ndeshjes, por kemi vuajtur pasi ata shënuan golin e barazimit. Sidoqoftë, ne reaguam dhe fituam”, është shprehur Casillas. 

Lexo më shumë

Çfarë lëshon United...

Manchester United ka bërë një lëshim të madh duke rrezikuar maksimalisht titullin, gjithë kjo pasi nuk arriti të mbajë avantazhin prej dy golave ndaj Evertonit në Old Trafford, për të barazuar në fund me rezultat 4-4.

Ishte kjo një ndeshje fantastike ku u zhvillua futboll i jashtëzakonshëm me shumë gola dhe me shumë kthesa. Evertoni në këtë takim luajti pa presione, pasi nuk ka ndonjë ambicie, por United ishte skuadra që kërkoi fitoren. Këto kanë pasur pak vlerë në fund...

Fillimisht Nikica Jelavic hapi serinë e golave, duke ia dhënë epërsinë Evertonit (34’) me një gol me kokë për 1-0. Manchester United u kthye në lojë dhe atë me anë të sulmuesit më të mirë anglez, Wayne Rooneyt, i cili po ashtu shënoi me kokë (41’) për 1-1 dhe rezultatin e pjesës së parë.

Në pjesën e dytë u zhvillua dramë e vërtetë. Danny Welbeck (57’) shënoi për 2-1, para se Nani të realizonte për 3-1 (61’), kjo kur të gjithë menduan se ndeshja përfundua.

Një fjalë pa thënë kishte edhe Feallaini (67’), i cili mbajti në lojë Evertonin për 3-2, para se Wayne Rooney t’i ‘siguronte’ 75 mijë të pranishmit në Old Trafford (69’) se titulli do të mbetet te vendi, pranë rezultatit 4-2.

Sidoqoftë, të pa interesuar për titullin e Manchester United janë treguar futbollistët e Evertonit, të cilët shfrytëzuan relaksimin e lojtarëve të United, për të shënuar edhe dy herë të tjera. Nikica Jelavic (83’) dhe Steven Pienaar (85’) realizuan për 4-4 dhe rezultatin përfundimtar të këtij takimi.

Me këtë barazim United ka 83 pikë në tabelë, gjashtë pikë më shumë se sa Manchester City që i shkon Wolvesit.Javën e ardhshme, më 30 prill, Manchester United i shkon Manchester Cityt në derbin lokal, i cili pritet që ta vendosë titullin e kampionit në Ligën Premier.

Lexo më shumë

Interi sigurt jashtë LK-së

Interi ka minimizuar maksimalisht gjasat për kualifikim në Ligën e Kampionëve, pas barazimit pa gola në Artemio Franchi ndaj Fiorentinës.

Në pjesën e parë u zhvillua lojë kryesisht monotone, pa raste shënimi, por me një dominim të lehtë të Interit në posedim që me anë të depërtimeve të Zarates tentoi të gjente portën.

Në fraksionin e dytë nuk ndryshuan gjërat. Interi dominoi në posedim, kërkoi të shënonte, por munguan rastet, përkundër inkuadrimit të Sneijder.

Një penalti për Fiorentinën u akordua në minutën e 62-të, e të cilën e ndali për mrekulli Julio Cesar, që mbajti ekipin e tij në lojë deri në fund, por përkundër kësaj, rezultati mbeti 0-0.

Me këtë barazim Interi mbetet në vendin e shtatë me 49 pikë, një pikë më pak se Roma në vendin e gjashtë dhe pesë pikë më pak se Lazio që është në vendin e tretë. Me pesë javë pa përfunduar Serie A dhe me ndeshje të vështira në udhëtim te Lazio dhe Udinese, mund të konkludojmë se Interi ka humbur çdo mundësi për t’u kualifikuar në Ligën e Kampionëve dhe kjo pas më shumë se një dekade të tërë pjesëmarrjeje në kompeticionin më të rëndësishëm për klubet evropiane.

Lexo më shumë

Alonso: Ta fitojmë titullin!

Mesfushori i Real Madridit, Xabi Alonso, mendon se fitorja ndaj Barcelonës ka bërë që titulli i Kampionatit të Spanjës të jetë në duart e Los Blancos.

“Është një fitore e madhe, por jo definitive. Kemi bërë një hap të rëndësishëm përpara dhe tash duhet t’i japim fund”.

“E kontrolluam ndeshjen deri në përsosmëri dhe rezultati është fantastik. Tash kemi një ndeshje tjetër vendimtare të mërkurën (kundër Bayern Munichut në Ligën e Kampionëve”, ka theksuar spanjolli.

Real Madridi gjendet shtatë pikë përpara Barcelonës në tabelën e La Ligas dhe i duhen edhe gjashtë pikë në katër ndeshjet e mbetura për t’u shpallur sigurt kampion.

Lexo më shumë

Luis Enrique: Do ta sulmojmë Juventusin

Trajneri i Romës, Luis Enrique, ka thënë se ekipi i tij dëshiron të marrë pjesë në Ligën e Kampionëve dhe për këtë arsye romakët do ta sulmojnë Juventusin të dielën.

“Unë kurrë nuk do të pranoja një barazim para ndeshjes. Preferoj të rrezikoj gjithçka për të fituar”.

“Ekziston dallim i madh mes fitores dhe barazimit, por ne nuk do të heqim dorë, ne do ta sulmojmë Juventusin dhe do ta kërkojmë fitoren në Juventus Stadium. 

Lexo më shumë

Welbeck të rinovojë kontratën

Sulmuesi i Manchester United, Danny Welbeck, do të nënshkruajë një kontratë të re pesëvjeçare me Manchester Unitedin në fund të këtij sezoni, pasi arriti akordin me klubin për detajet kontraktuale.

21 vjeçari është pajtuar që të nënshkruajë një kontratë prej 45 mijë funtesh në javë, për të trefishuar kështu pagën e tij aktuale dhe për t’i garantuar vlera ekipit të Sir Alex Ferguson edhe për pesë sezone të ardhshme.

Sulmuesi Danny Welbeck ka qenë një prej figurave kyçe së bashku me Wayne Rooneyn për suksesin kolosal të Manchester United këtë sezon, në tejkalimin e Manchester Cityt në Ligën Premier.

Lexo më shumë

Ramos: Merituam fitoren

Mbrojtësi i Real Madridit, Sergio Ramos, ka thënë se fitorja ndaj Barcelonës ishte plotësisht e merituar për Los Blancos, por tha se ende nuk ka përfunduar lufta për titull.

“Ne kthehemi në shtëpi me tri pikët e ekipit më të mirë në botë dhe ne besojmë se merituam të fitojmë”.

“Janë edhe katër ndeshje që kanë mbetur për t’u luajtur dhe ne ende kemi nevojë për gjashtë pikë për të fituar matematikisht. Por, realisht, dallimi në pikë ishte jo dhe aq i madh këto javët e fundit e prandaj do t’iu gënjej nëese ju them se nuk kam festuar si i çmendur. Duhet të mbesim të qetë, ende s’kemi fituar asgjë”, ka thënë Ramos.

Lexo më shumë

AGPK: Gazetarët, nesër në protestë

Asociacioni i Gazetarëve Profesionistë të Kosovës njofton përfaqësuesit e mediave se të hënën më datë 23 Prill 2012, duke filluar nga ora 11:15 deri në ora 12:00, organizon një protestë të qetë para dyerve të Kuvendit të Kosovës dhe Presidencës.

Protesta ka për qëllim kundërshtimin e Kodit të ri Penal të Republikës së Kosovës me anë të të cilit gazetarët bëhen përgjegjës për vepra penale dhe obligohen që të zbulojnë burimet e tyre, thuhet në kumtesën e AGPK-së.

“Grumbullimi i protestuesve fillon nga ora 11:15. Që nga ora 11:30, në kohëzgjatje prej 15 minutash, protestuesit do të qëndrojnë në heshtje para legjislativit që me anë të votës së tyre përdhunuan deri në këtë masë Lirinë e Shtypit”.

Me anë të kësaj proteste kërkohet nga Presidentja e Kosovës që të mos e nënshkruaj Kodin Penal, përderisa i njëjti përmban nenet 37 dhe 38.

“Ftohen, gazetarët, kameramanët, fotoreporterët, redaktorët dhe të gjithë përfaqësuesit e tjerë të mediave anembanë Kosovës që t`i bashkohen kësaj proteste. Ftohen organizata që përfaqësojnë dhe punojnë me mediat që të na mbështesin në këtë protestë, e cila në mënyrë simbolike demonstron pakënaqësinë ndaj përdhunimit të të drejtave të të punësuarve në media”, thuhet ndër të tjera në komunikatë.

Lexo më shumë

Dy milionë euro - për vetura!

Ministria e Tregtisë dhe e Industrisë, ajo e Arsimit, e Shkencës dhe e Teknologjisë dhe Administrata Tatimore e Kosovës janë tri institucionet që për blerjen e vetura ketë vit, i kanë ndarë secila nga 200 mijë euro. Në tabelat buxhetore për këtë vit, këto tri institucione prijnë si institucionet që kanë vendosur të shpenzojnë më se shumti në blerjen e veturave.

Kur të gjitha institucionet qendrore bëhen bashkë, atëherë shpenzimet vetëm për blerjen e vetura shkojnë në afër dy milionë euro, shkruan Express.

“Blerja e veturave për ATK - 212,310, blerja e veturave për Ministrinë e Tregtisë dhe Industrisë 200 mijë euro dhe 200 mijë euro Ministria e Arsimit, e Shkencës dhe e Teknologjisë”, janë shpenzimet për vetura për këto tri institucione që figurojnë në tabelat buxhetore për këtë vit.

Ndërkaq, nga 130 mijë euro për këtë vit në blerjen e veturave do t’i shpenzojnë Ministria e Punëve të Jashtme dhe Ministria e Diasporës. Ministria e Administratës Publike vendosi t’i ndajë 100 mijë euro, 70 mijë euro Ministria e Punës dhe Ministria e Bujqësisë i ndau 50 mijë euro.

Agjencia Kosovare e Privatizimit për blerjen e veturave të reja për pasagjerë i ka ndarë 135 mijë euro, derisa Gjykata Kushtetuese është treguar më modeste, kur i ndau 40 mijë euro.

Në vetura më së paku për këtë vit do të shpenzojë Kuvendi i Kosovës, 12 mijë euro.

Lexo më shumë

Gjykatat pengohen nga mashtrimet e zgjedhjeve

Zgjedhjet e Dhjetorit të 2010 u dëmtuan nga mashtrimi dhe manipulimi. Tani, ata të akuzuar kanë ditët e tyre në gjykatë.

Në atë që është rasti më i madh i paraqitur para sistemit të drejtësisë në Kosovë, Zyra e Prokurorëve ka akuzuar 1,343 njerëz për mashtrim zgjedhor - duke abuzuar me të drejtën për të votuar dhe duke shkatërruar dokumentet e votimit - që burojnë nga zgjedhjet e dhjetorit 2010. Është vlerësuar se 931 njerëz të tjerë do të akuzohen në Prishtinë dhe Prizren.

Laura Pula, koordinatore e ekipit të prokurorisë për mashtrime zgjedhore, tha për SETimes se prokurorët e rrethit kanë punuar për të sjellë para drejtësisë individët të cilët manipuluan votat gjatë zgjedhjeve, por se kjo ishte një sfidë.

Seb Bytyçi, drejtor ekzekutiv i Institutit të Politikave për Ballkanin, tha se kapaciteti i gjykatave në Kosovë është i kufizuar në përballjen me një ngarkesë kaq të madhe.

"Kosova ka përqindjen më të vogël të gjyqtarëve në Evropë - 14 gjyqtarëve për çdo 25,100 banorë - dhe në këtë situatë kapaciteti i gjykatave është i dobët. Por, kjo nuk do të thotë se gjykatat duhet të përdorin këtë si një justifikim për mungesën e gjykimeve. Rastet duhet të gjykohen në mënyrë rigoroze dhe dënimet jepen për të parandaluar mashtrimin - jo vetëm me dënime simbolike siç ka ndodhur deri tani", tha Bytyçi.

Pula thotë se për prokurorinë sqarimi i mashtrimit zgjedhor ishte një prioritet.

"Është krijuar konfuzion gjatë zgjedhjeve të përgjithshme në media dhe shoqërinë civile... Për të qenë transparent me të gjithë, kemi botuar raporte periodike mbi ecurinë e hetimit dhe sqarimin e manipulimeve. Ne nuk mund të qëndrojmë duarkryq kur shohim raste të tilla mashtrimi", tha Pula.

Bytyçi është dakord.

"Niveli i mashtrimit ka qenë shumë i madh dhe legjitimiteti i institucioneve është dëmtuar... Ne kemi zhgënjim midis qytetarëve dhe procesit demokratik", tha ai.

Pula thotë se ata që janë dënuar do të pengohen të punojnë me procesin zgjedhor për katër vjet, përveç vuajtjes së ndonjë dënimi që do të marrin.

Adrian Bejtullahu nga Demokracia Qytetare në Veprim, ka shërbyer si një vëzhgues i zgjedhjeve.

"Ishte e tmerrshme për demokracinë të shikoje çfarë ka ndodhur në dhjetor të vitit 2010 - përfaqësues nga të gjitha palët manipuluan - firma dhe vota false etj.", tha Bejtullahu.

Gjykata e Rrethit në Ferizaj dënoi tre komisionerë zgjedhjesh - Naim Sahiti (PDK), Agron Zeqiri (Vetëvendosja) dhe Agim Ramadani (LDK) - me gjashtë muaj burg në shkurt. Të tre u gjetën fajtorë për abuzime gjatë procesit zgjedhor në fshatin Softaj.

Paneli i gjykatësve - i udhëhequr nga Bashkim Hyseni - tha se zyrtarët mbushën kutinë e votimit me 274 emra që mbështesin kandidatët e tyre dhe hoqën 171 vota për kundërshtarët e tyre.

"Gjykata do të vazhdojë dënimin e të gjithë atyre njerëzve të që kanë abuzuar me votat”, thotë Hyseni.

Duke iu përgjigjur ankesave të prokurorëve se gjykata nuk po jep dënime të mjaftueshme, gjyqtari shpjegoi se niveli i implikimit kundër secilit nga të akuzuarit është i ndryshëm, dhe që në disa raste akuzat e plota nuk janë provuar.

"Gjykata ka dhënë dënime të konsiderueshme të vështira. Ne kemi dënuar njerëz në burg", shton Hyseni. 

Lexo më shumë

Iniesta: Humbja na lëndon shpirtin

Mesfushori i Barcelonës, Andres Iniesta, ka pranuar se humbja në El Clascio të shtunën mbrëma ka shkatërruar shpirtin e Blaugranëve, por shpreson për një rikthim jo më larg se të martën ndaj Chelseat.

“Dhemb në shpirt që nuk ishim në gjendje që të luftojmë tutje për La Ligën, por ne duhet ta pranojmë këtë fakt. Titulli praktikisht është i Realit. Dallimi në pikë është i madh dhe janë edhe pak javë të mbetura”.

“Ne e kemi ditur se do të jetë e vështirë, sidomos kur e dimë se ata varen nga vetvetja, por ne tani u kemi dhënë shtytje. Opsioni i vetëm për ne ishte fitorja dhe ata luajtën me atë gjë në kokë. Me një barazim, kur ne luftuam për fitore, ata ishin të kënaqur, kurse kur e shënuan golin e dytë, gjithçka u vështirësua”, ka deklaruar i zhgënjyer Iniesta pas ndeshjes.

Lexo më shumë

Besart Berisha hero, shpallet kampion i Australisë

Sulmuesi shqiptar, Besart Berisha, ia ka siguruar titullin ekipit të tij Brisbane Roar, me një dygolësh në sfidën kruciale që vendosi titullin ndaj skuadrës Perth Glory.

Besart Berisha ishte fantastik në këtë sfidë, duke shënuar në minutat finale të takimit dy gola të cilët i dhanë ekipit të tij titullin.

Fillimisht Ivan Franjic kaloi në epërsi Perth Gloryn në minutën e 51-të, para se Besart Berisha në minutën e 84 ta barazojë rezultatin.

Në minutat shtesë ishte edhe njëherë sulmuesi shqiptar ai që doli në skenë, duke nxjerrë nje penalti (90 +7’), të cilën ai me sukses e konkretizoi për 2-1, përkundër protestave të mysafirëve për simulim.

Besart Berisha pritet të jetë objektiv i ekipeve më të mëdha evropiane pasi është shpallur po ashtu edhe golashënuesi më i mirë në kampionatin australian me 21 gola. 

Lexo më shumë

Goli i Khedirës nuk ishte ofsajd

Ish-gjyqtari i La Ligas, Raul Garcia de Loza, ka thënë se vendimi i Undiano Mallencos për të pranuar golin e Sami Khediras në El Clasico të shtunën ishte vendim i drejtë.

Kishte polemika pas ndeshjes për golin e Khediras, që i dha epërsinë Real Madridit në pjesën e parë dhe që udhëhoqi Los Blancos drejt fitores prej 2-1, pasi u besua se Khedira ishte në pozicion jashtë loje në momentin e golit dhe se Pepe kishte ndërhyrë në mënyrë të palejuar në një prej lojtarëve të Barcelonës.

“Te goli i parë nuk kishte ndërhyrje nga Pepe, e as Khedira nuk ishte në pozicion jashtë loje. Ai u vë në lojë nga Adriano. Goli i Barcelonës është i rregullt, ashtu sikurse i Ronaldos. Nuk kishte gabime nga gjyqtari. Ai meriton notë të lartë”, është shprehur De Loza.

Lexo më shumë

Guardiola ia uron Realit titullin

Pas disfatës në Camp Nou, trajneri i Barcelonës, Pep Guardiola, është dorëzuar në garën për titullin e Primera Divisionit spanjoll.

Real Madridi triumfoi me rezultat 2-1 në ‘el Clasico’ dhe tash është shtatë pikë përpara Barcelonës kur kanë mbetur edhe katër ndeshje për t’u zhvilluar.

“Para së gjithash, urime Madridit për fitoren dhe për konfirmimin e titullit”, ka deklaruar Pep pas ndeshjes.

Ai ka thënë se Blaugranët tash do të fokusohen në Ligën e Kampionëve dhe to të përpiqen ta përmbysin epërsinë e Chelseat. 

Lexo më shumë

Ronaldo falënderon bashklojtarët

Njeriu i cili arriti të heshtë 100 mijë katalanas në Camp Nou, Cristiano Ronaldo, ka lëvduar paraqitjen e ekipit të tij dhe falënderoi bashkëlojtarët për suksesin e arritur në tempullin katalanas.

“Ishte paraqitje e mirë kjo që kemi shfaqur dhe dua të përgëzoj bashklojtarët e mi, sepse ata kanë qenë fantastik dhe ne meritojmë këtë sukses”.

“Ne jemi të kënaqur që fituam në Camp Nou dhe që thyem rekordin e golave të shënuar për një sezon në La Liga”, është shprehur Ronaldo.

Ai shtoi se Real Madridi është tejet optimist edhe për Bayernin e Munichut, ekip të cilin e porositi të mos niset fare për në Bernabeu. 

Lexo më shumë

Heynckes: Shkojmë me besim në Bernabeu

Trajneri i Bayernit të Munichut, Jupp Heynckes, ka këmbëngulur se ekipi i tij do të hyjë në ndeshjen kthyese çerekfinale ndaj Real Madridit me besim të madh, pas fitores ndaj Werderit të shtunën.

“Nuk është e lehtë të luash çdo tre ditë dhe kjo është arsyeja pse ndërrova ekipin e parë. Unë jam i kënaqur me qëndrimin dhe përkushtimin”.

“Zëvëndësimet kishin impakt pozitiv në lojën tonë. Ëerderi kishte raste të mira, por ne merituam fitoren. Ishte një fitore që na ngriti moralin. Ne shkojmë te Reali me shumë besim, sepse gjithmonë shënojmë në udhëtim. Jam optimist për të mërkurën dhe kështu janë edhe lojtarët e mi”, ka thënë Heynckes. 

Lexo më shumë

Di Matteo i kënaqur me pikën

Menaxheri i Chelseat, Roberto Di Matteo, është shprehur i kënaqur me pikën e fituar nga ekipi i tij ndaj Arsenalit në Emirates.

“Mendoj se ishte paraqitje e shkëlqyer. Kur vini në Emirates, është e vështirë të mposhtësh Arsenalin. Ne kemi pasur raste të mira, por pasimi final mungoi . Megjithatë, ishte paraqitje fantastike nga ana jonë”, ka thënë Di Matteo.

Chelsea ka gjasa të mëdha ta sigurojë vendin e katërt që dërgon në Ligën e Kampionëve për shkak se Tottenhami pësoi humbje nga QPR.

Lexo më shumë

Capital T publikon këngën “Karma”

Reperi nga Prishtina, Capital T, ka lansuar këngën e tij të re me klip, të titulluar “Karma”.

Kënga “Karma” flet për një histori të dashurisë, ku një i ri vuan për dashuri dhe pas një kohe në këtë ngjarje vajzës i kthehet bumerang e gjitha, në atë që duhet karma.

Videoklipi i jashtëzakonshëm, i cili mund të konsiderohet leksion për të gjithë artistët tjerë dhe produksionet kosovare, është xhiruar në New York dhe është punuar nga Kristian Kruz, e ku bie në sy vajza super atraktive.

Kënga “Karma” vjen në kuadër të albumit “Kapo”, i cili do të dalë në shitje më 25 maj të këtij viti.

Lexo më shumë

Bogdanovic: Arrestimi i Arsicit - për frikësim të serbëve!

I ashtuquajturi ministër për Kosovën, Goran Bogdanovic, tha se motivi dhe qëllimi i arrestimit të shefit të “Qarkut të Kosovës”, Goran Arsic, është vazhdimësi e politikës për frikësimin e serbëve në Kosovë.

"Është koha për të reaguar EULEX-i dhe të gjithë faktorët relevantë ndërkombëtarë në krahinë për të ndaluar keqtrajtimin e paarsyeshëm të Policisë së Kosovës ndaj serbëve”, ka thënë Bogdanovic për Beta.

Sipas tij, me afrimin e zgjedhjeve serbe të 6 majit, po “intensifikohen tensionet dhe dhuna”.

Policia e Kosovës ka konfirmuar të shtunën se ka arrestuar dy serbë, për të cilët thuhet se kanë lobuar në Lypjan që serbët të dalin në zgjedhje.

"Të gjithë ne duhet të pyesim se çfarë mesazhi dërgon Prishtina duke arrestuar Arsicin, anëtarin e shquar të komunitetit serb i cili është i njohur për përpjekjet e tij për pajtim dhe bashkëjetesë mes shqiptarëve dhe serbëve", tha Bogdanovic.

Zëdhënësi i policisë së Kosovës, Baki Kelani, ka thënë për Beta se sipas njohurive aktuale të policisë, dy serbë të Kosovës dyshohet se kanë kërcënuar banorët e një fshati të Lypjanit që të dalin në zgjedhjet serbe.

Ministri i Punëve të Brendshme të Kosovës, Bajram Rexhepi, i ka deklaruar agjencisë shtetërore serbe Tanjug se policia e ka arrestuar Goran Arsicin.

“Prokurori publik i ka caktuar Arsicit masën e paraburgimit, për shkak se ai ka kërcënuar disa persona se policia serbe do t’i arrestojë sapo të shkojnë në Serbi, në qoftë se nuk dalin në zgjedhjet e ardhshme serbe”, ka sqaruar ministri Rexhepi. 

Lexo më shumë

Zgjedhjet do të mbahen me kohë?

Isa Mustafa ka reaguar ndaj deklaratave të kryeministrit Hashim Thaçi se zgjedhjet e përgjithshme nuk do të mbahen deri më 2014. Lideri i LDK-së ka thënë se marrëveshjet duhet të respektohen në mënyrë që procesi elektoral të zhvillohet vitin e ardhshëm.

Thaçi, njëkohësisht kryetar i PDK-së, ka thënë se nuk do të respektojnë marrëveshjen e nënshkruar në prill të vitit të kaluar për mbajtjen e zgjedhjeve të përgjithshme më 2013, duke potencuar se ato do të mbahen në fund të vitit 2014, shkruan Express.

Në përvjetorin e 22-të të themelimit të Degës së LDK-së në Kamenicë, Mustafa thotë se të gjithë duhet t’i qëndrojnë prapa marrëveshjes.

Pa ia përmendur emrin Thaçit, kreu i partisë më të madhe opozitare ka thënë se dikush po tenton t’ia zgjasë vetes mandatin për të qeverisur keq Kosovën.

“Ne dëshirojmë që në Kosovë të qeverisin ata që do të marrin votën legjitime të qytetarit; ata që do ta marrin besimin e qytetarit, sepse neve na nevojitet legjitimitet i brendshëm, na nevojitet edhe legjitimitet i jashtëm, dhe legjitimiteti i veçantë është vota që buron nga vullneti i qytetarit”, ka thënë ai. 

Lexo më shumë

Kodi i fshehjes së korrupsionit

Deputetët kosovarë kanë gjetur formulën për t’ua mbyllur gojën njerëzve që i denoncojnë politikanët në media për kushtëzim shërbimesh me dhënie ryshfeti. Rezultati gjendet në nenet 38, 427 dhe 828 të Kodit Penal.

Nëse gazetari nuk e zbulon burimin që ka deklaruar t’i jetë kërkuar ryshfeti ose që ka dhënë ryshfet për një shërbim, bazuar në Kodin e ri Penal, ai mund të përfundojnë në burg. Në të kundërtën, në burg mund të përfundojë burimi që ka folur për gazetën në kushte anonimiteti, në rast se media ia publikon identitetin, shkruan Koha Ditore. I njëjti Kod nuk penalizon politikanët që deklarohen rrejshëm.

Lexo më shumë

Qeveria “kursen” për shqiptarët në veri

Banesës ku kanë jetuar me dekada të tëra, te lagjja “Tre Rrokaqiejt” në Mitrovicën veriore, i është vënë dryni, ndërsa gjërat e pakta që kanë marrë me vete janë rrobat për vajzën e tyre gjashtëmuajshe.

Derisa më shumë se gjysma e anëtarëve të familjes janë vendosur te të afërmit e tyre në jug të Mitrovicës, nusja më e re e kësaj familje, Sh. F. Së bashku me foshnjën e saj, është detyruar të kthehet te babai i saj, shkruan Zëri. Jeta e kësaj familje është rënduar edhe më shumë në aspektin ekonomik.

Deputetët e partive opozitare akuzojnë Qeverinë e Kosovës se nuk është e interesuar që t’i parandalojë largimet masive të shqiptarëve nga veriu i Mitrovicës. Ata madje akuzojnë ekzekutivin kosovar se është bërë pjesë e spastrimit etnik të veriut, ndërsa theksojnë se është e pakuptimtë se si autoritetet në Serbi ndajnë buxhet të veçantë për ta mbajtur nën kontroll këtë zënë të vendit, ndërsa Qeveria e Kosovës nuk është në gjendje t’iu ofrojë shqiptarëve të atjeshëm qoftë një lloj ndihme sociale, e cila përveç tjerash do t’i motivonte ata që të mos i braktisnin shtëpitë e tyre por të jetojnë në to.

Këtë e mohon zëvendëskryeministri Hajredin Kuçi, i cili thotë se ekzekutivi ka shpenzuar mjete në shumë projekte në veri. 

Lexo më shumë

Pastrimi pranveror kundër alergjisë

Mënyra më e mirë e luftimit të alergjisë është shumë e thjeshtë: pastrimi i rregullt i hapësirës në të cilën jetojmë.

Teshtitja, kolla, rrjedhja e hundës, kruarja dhe përlotja e syve... Sot, miliona njerëz në gjithë botën vuajnë nga alergjia, e pikërisht këto simptoma janë reaksion i organizmit ndaj alergjenëve që gjenden gjithkund rreth nesh.

Mënyra më e mirë e luftimit të alergjisë është pastrimi i rregullt i hapësirës në të cilën jetojmë. Ja se si do të shkëlqejë shtëpia juaj, pesë rregulla të arta të pastrimit pranveror:

1. Sipërfaqet e rrafshëta më së miri fshihen me leckë të lagur, me mikrofije, e cila e mbledh edhe pluhurin më të imët.

2. Thithet pluhuri edhe nga librat dhe nga ‘mbledhësit’ e tjerë të pluhurit.

3. Shfrytëzohet thithësja me filtra të mirë të ajrosjes. Thithësja e tillë mund të shërbejë edhe si pastruese e ajrit, sepse e tërheq pluhurin dhe ajrin e ndotur.

4. Duhet ajrosur e duhet thithur mirë edhe dysheku, një herë në javë duhet ndërruar çarçafët.

5. Vendet e nxehta në shtëpi duhet pastruar e dezinfektuar mirë (kuzhina dhe banja).

Lexo më shumë

Qëndroni të rehatshëm gjatë pranverës

Pranvera është stinë e rrezikshme për njerëzit të cilët nuk dinë të mbrohen. Është stina kur ju sulmojnë bakteret dhe viruset, kur ka më së shumti polen...

Shkencëtarët thonë se ekzistojnë katër hapa që janë të thjeshtë, por do t’u mbrojnë gjatë këtyre ditëve.

Ajri i freskët
Është e logjikshme që preferoni të rrini në shtëpi ku është gjithçka këndshëm dhe ngrohtë. Megjithatë, derisa jeni gjithmonë në ambient të mbyllur, ekziston rreziku që bakteret dhe viruset nga hapësira më lehtë t’ju ‘sulmojnë’. Dalja në ajër të pastër, ju siguron që të shmangni bakteret që qarkullojnë nëpër shtëpinë tuaj.

Relaksimi
Stresi është një nga shkaktarët më të mëdhenj të sëmundjeve në kohën moderne, thonë ekspertët. Kur jeni nën stres, më pak i kushtoni rëndësi vetes. Prandaj është e domosdoshme që të pushoni. Ngroheni banjën, relaksohuni në vaskën e mbushur dhe qëndroni disa minuta duke pushuar trurin dhe trupin. Më vonë shtrijuni në krevat dhe mbulojuni.

Pastroni duart
Duart e pastra janë baza e shëndetit të mirë. Lani duart çdo ditë nga disa herë, lani me sapun. Lajini duart detajisht dhe shmangni prekjen e syve, hundës dhe gojës sa herë që është e mundur.

Flini mjaftueshëm
Nganjëherë është normale që ta kaloni natën zgjuar, por kjo nuk duhet t’ju bëhet shprehi. Trupi juaj dhe truri pushojnë derisa flini, prandaj flini së paku tetë orë. Disa njerëz kanë nevojë për shumë më pak kohë për të pushuar, mirëpo gjashtë orë gjumë është kufiri i poshtëm. Për shumë nga ne koha e vetme e qetë është kur shtrihemi në qetësi në dhomat tona në krevatin komod.

Lexo më shumë

Afrika “fle” mbi ujë

Shkencëtarët thonë se kontinenti i Afrikës gjendet mbi një rezervuar nëntokësor uji. Sipas tyre, vëllimi i ujit është 100 herë më i madh se sasia e ushqimit mbi sipërfaqen e tokës.

Kosovapress raporton se ekipi i shkencëtarëve ka skicuar hartën e detajuar të shkallës dhe potencialit të burimeve të fshehta. Ata nënvizojnë se shpimi ndoshta nuk është mënyra më e mirë për të shtuar burimet e ujit.

Në të gjithë Afrikën mbi 300 milionë njerëz nuk kanë ujë të pijshëm.

Kërkesa për ujë parashikohet të shtohet ndjeshëm në dekadat e ardhshme, si pasojë e rritjes së popullsisë dhe për sistemet e vaditjes për të rritur të mbjellat.

Lexo më shumë

Operohet foshnja me gjashtë këmbë

Djali më gjashtë këmbë i lindur në Pakistan do të ecë tashmë me dy këmbë, pasi operacioni për heqjen e katër gjymtyrëve të tij shtesë rezultoi i suksesshëm.

Foshnja nga Karachi në Pakistan, besohet se gjatë kohës që zhvillohej në barkun e nënës ka pasur edhe dy binjakë parazitarë të pazhvilluar, këmbët e të cilëve kanë mbetur në trupin e djalit të sapolindur.

Një ekip prej pesë mjekësh luftuan për t’i shpëtuar jetën djalit në Institutin Kombëtar të Shëndetit të Fëmijëve. Kreu i këtij institucioni, Jamal Raza, ka thënë se lindja anormale ishte si rezultat i një çrregullimi gjenetik që prek një në një milion bebe ose më shumë. Ai u shpreh i habitur që një fëmijë i parregullt me gjashtë këmbë të ishte po aq normal sa fëmijët e tjerë.

Që kur lindi javën e kaluar dhe deri në këto momente djali ka qenë nën kujdesin intensiv të mjekëve duke u trajtuar si rast i veçantë. 

Lexo më shumë

Barcelona nuk dorëzohet

Sergio Busquets është zotuar se Barcelona do të japë gjithçka deri në fund të sezonit në La Liga, përkundër humbjes në ‘el Clasico’ nga Real Madridi.

Mbretërve iu duhen vetëm gjashtë pikë nga katër ndeshjet e mbetura që të shpallen matematikisht kampionë, por mesfushori thotë se asgjë nuk ka përfunduar.

“Do të japim gjithçka deri në fund të Kampionatit”.

“Mirëpo, tash të mendojmë për Chelsean – nuk do të dorëzohemi”.

“Tifozët ishin të shkëlqyer, e mbështetën skuadrën gjatë gjithë ndeshjes, deri në fund”, ka thënë Busquets. 

Lexo më shumë

Reali me rekord golash për një sezon

Real Madridi i Jose Mourinhos ka thyer rekordin e golave të shënuar për një sezon në La Liga, pasi goli i Sami Khediras ndaj Barcelonës ishte 108-ti këtë edicion.

Në fitoren prej 3-1 ndaj Sporting Gijonit, ekipi aktual i Los Blancos pati barazuar numrin e golave (107) me ekipin e dikurshëm të John Toshack në sezonin 1989/1990, ndërsa goli i mesfushorit gjerman e theu këtë rekord.

Në të njëjtën ndeshje, Cristiano Ronaldo shënoi golin e dytë për të vënë një rekord të ri sa u përket golave të Mbretërve për një sezon dhe tashmë ata kanë të shënuar 109 gola, ndërsa kanë mbetur edhe katër xhiro për t’u zhvilluar.

Lexo më shumë

Dortmundi kampion i Gjermanisë

Me fitoren prej 2-0 kundër Monchengladbachut, Borussia Dortmundi e ka siguruar edhe matematikisht titullin e Bundesligas.

Ishte minuta e 23-të kur Ivan Perisic kaloi vendasit në epërsi dhe me këtë rezultat u mbyll gjysma e parë.

Në gjysmën e dytë që u zhvillua në Signal Iduna Park, Shinji Kagawa e vulosi fitoren (59’).

Kur kanë mbetur edhe dy javë për t’u zhvilluar, Borussia Dortmundi gjendet tetë pikë përpara përcjellësit të parë Bayern Munich dhe shpallet kampion i Gjermanisë për sezonin 2011/2012. 

Lexo më shumë

Kampioni quhet Real?

Real Madridi ka arritur që më në fund të thyejë tabunë e quajtur Barcelona duke triumfuar me rezultat 2-1 në Camp Nou dhe duke bërë një hap shumë të rëndësishëm drejt titullit të kampionit të Spanjës.

Skuadra mysafire zhvilloi një gjysmë të parë mbresëlënëse duke lënë nën hije ekipin vendas. Gjatë 45 minutave të para, Los Blancos luajtën më mirë në të gjitha pjesët e fushës, ndërkohë që faza ofensive e Blaugranëve heshti.

Pas një krosimi nga këndi, Valdes mbrojti goditjen e Pepes, mirëpo aty ishte Sami Khedira për ta plasuar topin në rrjet dhe për t’ia dhënë avantazhin skuadrës mbretërore (17’).

Një rast për t’u përmendur te katalunasit në fraksionin e parë ishte kur Messi e nxori Xavin ballë për ballë me Casillasin, por mesfushori dështoi të shënonte.

Në minutat e para të gjysmës së dytë, Barcelona tentoi të impononte lojën e vet në fushë me posedim të topit dhe me ndërtim të rasteve, mirëpo e kishte shumë të vështirë përballë mbrojtjes së Realit.

Ishte minuta e 70-të kur pas disa tentativave, Blaugranët arritën që ta futnin topin në rrjet, ndërsa realizues ishte Alexis Sanchez.

Mirëpo, nuk kaloi shumë kohë dhe Cristiano Ronaldo u tha të gjithëve në Camp Nou: “Qetësohuni, se unë jam këtu”, duke shënuar golin e fitores (73’). Asistues ishte Mesut Oezil.

Në vazhdim të ndeshjes, lojtarët vendas dukeshin të pafuqishëm për të bërë diçka në favor të tyre, ndërkohë që mysafirët kanë mundur ta rritin edhe më shumë epërsinë.

Pas kësaj fitoreje, Real Madridi gjendet shtatë pikë përpara Barcelonës kur kanë mbetur edhe katër javë për t’u zhvilluar në La Liga. 

Lexo më shumë