Mbyllet kanali i Dafina Zeqirit në YouTube

Është mbyllur kanali zyrtar i Dafina Zeqirit në rrjetin më të madh social të videove, YouTube, ku këngëtarja kishte dhjetëra miliona klikime nëpër këngët e saj.

 Teksa po kërkonim videoklipin “Supernova” në kanalin e saj zyrtar për arritjen që ka pasur kënga pas një muaji të lansimit, kemi hasur në mos ekzistencë të videos në fjalë dhe ç’është më e çuditshme nuk ekziston më as kanali i këngëtares.

Gjithçka flet për një mbyllje të kanalit të këngëtares në YouTube, që sipas burimeve të Telegrafit ka ardhur për shkak të shikimeve të rrejshme të shtuara nga bashkpunëtorët e këngëtares, megjithëse këta të fundit dhe as vet këngëtarja nuk ka bërë ndonjë konfirmim zyrtar për atë që ka ndodhur.

Lexo më shumë

Cristiano Ronaldo i jep fund beqarisë

Cristiano Ronaldo po i jep fund beqarisë. Ai dhe supermodelja Irina Shayk do të kurorëzojnë dashurinë e tyre në altar më 12 korrik pas një lidhje dy vjeçare.

 Ylli portugez ka zgjedhur të vendosë kurorë me modelen ruse pas Kampionatit Europian.

Irina, raportojnë mediat spanjolle, është duke përzgjedhur fustanin e bardhë për ditën e saj të madhe. Dasma do të mbahet në Madeira, ishullin e Portugalisë ku ka lindur kampioni i familjes Dos Santos Riveira.

Lexo më shumë

Guardiola: Reali duhet të jetë i kënaqur

Trajneri i Barcelonës, Pep Guardiola, e ka pritur me mjaft sportivitet kënaqësinë e Los Blancos për lojën e shfaqur në Camp Nou, duke ironizuar se ata kanë të drejtë të kënaqen.

“Reali kishte paraqitje të mirë dhe kjo gjithmonë të lë me shije të ëmbël në gjuhë. Ne jemi të fokusuar në gjëra të mira dhe fakt është që ne jemi në gjysmëfinale. Ne bëmë gjëra të mira dhe jo të mira dhe pas 180 minutave, arritëm qëllimin tonë”.

“Ne kemi rival të fortë, gjithmonë do të vuajmë sa do ta kemi Realin rival”, u shpreh Guardiola.

Lexo më shumë

Fitojnë Bayern e Dortmund

Dy liderët e Bundesligas, Bayern Munich dhe Borussia Dortmund, kanë regjistruar fitore kundër Wolfsburgut, respektivisht Hoffenheimit.

Me dy gola të shënuar në pjesën e dytë me anë të Mario Gomez (60’) dhe Ivica Olic (90’), bavarezët dolën fitues në Allianz Arena.

Ndërkohë, me dy gola të Shinji Kagawa (16’ dhe 55’) dhe një gol të Kevin Grosskreutz (31’), kundrejt një goli të Fabian Johnson (63’), kampioni në fuqi grumbulloi tre pikë të reja.

Pas javës së 19-të, Bayern Munichu dhe Borussia Dormundi vazhdojnë kryesimin e Kampionatit gjerman me nga 40 pikë të grumbulluara. 

Lexo më shumë

Pedro nuk luan ndaj Villarrealit

Barcelona nuk mund të llogarisë në shërbimet e Pedro Rodriguez në përballjen e të shtunës mbrëma ndaj Villarrealit.

Në faqen zyrtare të Blaugranëve thuhet se sulmuesi 24-vjeçar nuk do të luajë në El Madrigal për shkak të problemeve me muskuj.

Ndërkohë, në skuadrën e plotë të Pep Guardiolas është përfshirë Alexis Sanchez, i cili është pritur të mungojë më gjatë pas lëndimit në Kupën e Mbretit ndaj Real Madridit. 

Lexo më shumë

Ferguson: Fitoren e merituam ne

Liverpooli e ka eliminuar Manchester Unitedin nga Kupa FA, ndërsa Sir Alex Ferguson mendon se skuadra e tij e meritonte fitoren pasi luajti më mirë.

“Nuk e di se si humbëm, ishte një paraqitje shumë e mirë nga ne”.

“Mirëpo, unë mendoj se nëse e shikon në kontekst të Kupës FA, gjëra të tilla ndodhin”, ka thënë Ferguson për ITV, duke shtuar se një lëshim i vogël dhe mund ta humbësh ndeshjen.

Më tej, ai ka theksuar se është i kënaqur për paraqitjen e lojtarëve të tij, të cilët “e dominuan ndeshjen, luajtën vërtet mirë dhe nuk merituan të humbnin”.

“Në fakt, është dashur që ne ta fitonim ndeshjen, ishim skuadër më e mirë, por ky është futbolli në FA Cup nga i cili frikësohem, dhe nuk është hera e parë që po ndodh”, ka shtuar Fergie. 

Lexo më shumë

Gerrard: Liverpooli nuk e meritoi fitoren

Kapiteni i Liverpoolit, Steven Gerrard, ka pranuar se skuadra e tij nuk e meritoi fitoren ndaj Manchester Unitedit në kuadër të Kupës FA.

Duke folur për ITV, mesfushori anglez ka thënë se Redsat ishin më të dobët në posedim, si edhe në përgjithësi gjatë ndeshjes.

“Meritat i takojnë Manchester Unitedit, ata kontrolluan periudha më të mëdha të ndeshjes sot (e shtunë)”.

“Megjithatë, gjëja më e rëndësishme është rezultati, dhe ne e nxorëm në fund”, ka deklaruar Gerrard. 

Lexo më shumë

Allegri: Lopez do të jetë i suksesshëm

                                            

Trajneri i Milanit, Massimiliano Allegri, beson se Maxi Lopez do të dëshmojë se është transfer i dobishëm për Rossonerët.

27-vjeçari është huazuar në San Siro deri në fund të sezonit aktual, ndërsa Allegri është i kënaqur për ardhjen e tij.

“Maxi Lopez është një lojtar që ka aftësi fizike dhe teknike, prandaj ai do të jetë i suksesshëm te Milani”, ka thënë Allegri. 

Lexo më shumë

The Reds gjunjëzojnë Djajtë

Me rezultat 2-1 ka përfunduar derbi më i madh anglez i zhvilluar në Anfield, mes Liverpoolit dhe Manchester Unitedit, sfidë e vlefshme kjo për 1/8-ën e finales së FA Cup.

 Ndeshja filloi me tempo të lartë. Liverpooli filloi duke e dominuar takimin dhe rrezikoi disa herë nga distanca, përderisa nuk u spraps as Manchester United.

Sidoqoftë, rreziku i parë serioz erdhi nga mysafirët, të cilët kanë mundur të kalojnë në epërsi kur nga distanca me një goditje qëlloi shtyllën anësori Antonio Valencia.

Megjithatë, The Reds kaluan të parët në epërsi. Pas një harkimi nga këndi, në zonë më së miri u gjend Daniel Agger, i cili me kokë shënoi për 1-0 dhe epërsinë e parë të Liverpoolit në këtë takim (21’).

United u kthye në sfidë me anë të Ji-Sung Park, i cili me një goditje të saktë barazoi rezultatin në 1-1 (39’).

Në pjesën e dytë u zhvillua lojë relativisht e baraspeshuar, me raste herë për njërën e herë për skuadrën tjetër. Kur të gjithë menduan se do të nevojitet ndeshja kthyese në Old Trafford, kështu nuk mendoi Dirk Kuyt, i cili shënoi për 2-1 dhe fitoren e madhe të Liverpoolit (88’).

Me këtë fitore Liverpooli eliminon Manchester Unitedin nga FA Cup dhe The Reds kështu siguruan kualifikimin në 1/8-ën e finales.

Lexo më shumë

Krasniqi kundër propozimeve të Bankës Botërore

Banka Botërore në Kosovë dhe një grup i shoqërisë civile kanë qëndrime të kundërta rreth prodhimit të energjisë në Kosovë. Njëra sugjeron që Kosova ta shfrytëzojë linjitin që ka, kurse tjetra promovon energjinë alternative.

Prodhimi i energjisë përmes linjitit konsiderohet si opsioni më i lirë për prodhim të energjisë elektrike në Kosovë, sugjeron Banka Botërore. Në një raport të saj të nxjerrë këto dite shkruan se opsioni i linjitit është opsioni më i lirë termoenergjetik, edhe në rastin kur futet kostoja relativisht më e lartë e mjedisit.

Nga ana tjetër kreu i Kuvendit të Kosovës, Jakup Krasniqi, ka përkrahur prodhimin e energjisë alternative në Kosovë në një tryezë të mbështetur nga Instituti për Politika Zhvillimore me temë “Alternativat e Energjisë në Kosovë”, të mbajtur të premten.

Në këtë tryezë profesori Daniel Kammen, i cili merret me studime të energjisë në Universitetin e Energjisë Laboratori i Kalifornisë, Brekeley, ka thënë se Kosova duhet të përdorë energjinë e ripërtërishme.

BB-ja pro thëngjillit

“Rezervat vendore të linjitit janë vlerësuar të jenë rreth 12.5 miliardë tonë, nga të cilat 10.9 miliardë tonë janë të eksploatueshme. Mihja e propozuar e Sibovcit, i cili është konsideruar si opsioni më i pranueshëm nga pikëpamja ekonomike, sociale dhe mjedisore, ka linjit të mjaftueshëm për të furnizuar kapacitetet ekzistuese të prodhimit deri në fund të jetës së tyre operacionale, si dhe për të furnizuar prodhimin e propozuar të energjisë elektrike prej 600 MË për dyzet vjet të tjera”, thuhet në raport.

Nga ana tjetër disa OJQ thonë se energjia Alternative në vend, mund të gjenerojë minimumi 22 për qind të energjisë totale në vend.

Nga ana tjetër profesori, Daniel Kammen, tha se deri në vitin 2020 duhet të shkojë sipas analizës që ka përgatitur ai, që Kosova të ndjekë rrugën e 20 për qind të zvogëlimit të CO2, për përmirësimin e efiçiencës së energjisë për 20 për qind dhe për shfrytëzimin e burimeve të ripërtërishme për 20 për qind.

“Deri në vitin 2020, Kosova pritet të gjenerojë deri në 800 KË nga blloqet aktuale të KEK-ut, ndërsa 400 KË nga hidrocentrali i zhurit”, ka thënë ai, duke shtuar se duhet kuptuar se hidrocentrali i zhurit nuk mund të shfrytëzohet tërë kohën, por vetëm në kohë piku.

Ai ka thënë se nëse investohet në këtë trend, maksimumi mund të shkojë në 38 për qind të prodhimit të energjisë efiçiente dhe deri në 30 për qind të rritjes së vendeve të punës.

Sipas tij, ai ka thënë se shihet një rrugë që Kosova A duhet të mbyllet, ndërsa Kosova B, duhet të vazhdojë prodhimin e energjisë deri më 2020.

Jakup Krasniqi pro energjisë alternative

Jakup Krasniqi, kryetar i Kuvendit të Kosovës, ka shprehur mbështetje për këto projekte të prodhimit të energjisë së ripërtëritshme. Ai ka thënë se edhe për kundër investimeve në këto 12 vjetëve të fundit, KEK-u nuk ka treguar performancë të mirë.

Sipas tij, Korporata Energjetike, nuk ka ecur si duhet edhe për kundër investimeve që ka pasur dhe nuk ka treguar se mund të vetë financohet.

“Prandaj shfrytëzimi i resurseve natyrore për prodhim të energjisë alternative do të thotë shumë”, është shprehur ai.

Ai ka thënë se energjia alternative është tej mase e nevojshme, e cila ka ndikim të drejtpërdrejtë në zvogëlimin e importit të rrymës e po ashtu edhe ndikim në zvogëlimin e ndotjes së ambientit.

Sipas tij, duke aprë që ka shumë burime të pashfrytëzuara për prodhim të energjisë së ripërtëritshme, Qeveria e vendit do të mbështesë tërë këtë proces.

“Gjatë 12 vjetëve janë ndjekur politika të gabuara. Ta përmbyllim këtë kapitull dhe të shfrytëzojmë të gjitha kapacitetet për të prodhuar energji alternative”, ka theksuar Krasniqi.

Kammen, ka thënë se privatizimi i distribucionit të KEK-ut duhet të ndodhë, për shkak të mosfunksionimit si duhet.

Ai po ashtu ka shtuar se planet ekzistojnë, për fillim të investimeve për prodhim të energjisë alternative, por sipas tij, ktu ka interes dhe duhet të gjendet dhe të krijohet një interes i përbashkët, edhe për Kosovës edhe për investitorët.

Lexo më shumë

Kryetari i Gjilanit sqaron “konfliktin e interesit”

Kryetari i Komunës së Gjilanit, Qemajl Mustafa, ndaj të cilit Agjencia Kundër Korrupsionit ka dërguar një kërkesë në Gjykatën për Kundërvajtje në Gjilan, për fillimin e procedurës kundërvajtëse, për shkak të, siç thuhet “konfliktit të interesit”, ka thënë se “Frutta Viva”, është organizatë fiktive dhe ka zero qarkullim.

Mustafa, i cili nuk e konteston të drejtën e AAK-së për t`u marrë me këtë çështje, në aspektin ligjor, sqaron se ky biznes është fiktiv dhe ka zero qarkullim dhe ka ngelur i tillë, për shkak se dy nga gjashtë bashkëthemeluesit gjenden jashtë vendit dhe nuk kanë mundur ta shuajnë edhe ligjërisht kompaninë “Frutta Viva”, që është regjistruar më 14.09.2006, atëherë kur ai dhe PDK-ja kanë qenë opozitë.

Për më tepër, ai ka thënë se për shkak të tërheqjes të katër bashkëthemeluesve, kjo kompani nuk ka funksionuar asnjëherë dhe më pas, më 2006, ai dhe pronari i Kompakt Group, Mustafa Shala, kanë themeluar biznesin tjetër “Viva Frutta”, i cili funksion dhe i kryen të gjitha obligimet ndaj shtetit, gjë që mundtë verifikohet edhe në ATK.

Në biznesin “Viva Frutta”, Mustafa ka thënë se ai nuk është person i autorizuar, por është njëri nga dy aksionarët, me 15 për qind dhe kjo nuk paraqet konflikt interesi sipas Ligjit për Parandalimin e Konfliktit të Interesit në ushtrimin e funksionit publik, duke rikujtuar se aksione në biznese të ndryshme kanë zyrtarë tjerë, madje ka edhe njëri nga zëvendëskryeministrat.

Mustafa kritikoi AKK-në, e cila, siç tha ai “e ka bërë mizën buall”, duke u marrë me imtësi, ndërsa shtoi se sqarimi i tij, më tepër i dedikohet opinionit publik, i cili ka nevojë ta dijë të vërtetën, për të mos krijuar përshtypje të gabuar për ne.

Megjithatë, Mustafa e ka vlerësuar të dëmshme komunikatën e AAK-së. “Ky është një dëm i madh për mua si kryetar Komune dhe partinë time”, tha ai, duke sqaruar se edhe AAK-së i kishte kërkuar që ta verifikojë gjendjen, gjë të cilën nuk e ka bërë, prandaj ka krijuar një zhurmë të panevojshme në opinion.

Kryetari i Qemajl Mustafa tha se AKK-ja duhet të edukohet më mirë dhe duhet të merret me gjera më serioze dhe të mos bëj gabime të tilla, duke penguar ecjen përpara të shoqërisë sonë. Ndryshe, sipas tij, kompania “Viva Frutta”, që është një biznes legal, merret me ruajtjen dhe pjekjen e bananeve, të cilat më pas i plason në tregun kosovar.

Mustafa ka thënë se të gjitha këto fakte do t`i ofrojë në gjykatën për kundërvajtje, ku është dërguar kërkesa e AAK-së për fillimin e një procedure kundërvajtëse dhe është i bindur se e vërteta do të dalë në shesh. 

Lexo më shumë

Kosova, shteti i vizave

Kosova ka filluar dialogun për liberalizimin e vizave dhe ajo së shpejti do të marrë udhërrëfyesin me kriteret që duhet përmbushur. Qytetarët e Kosovës janë të vetmit në rajon të cilët i nënshtrohen regjimit të vizave

Moti me borë e sqotë dhe rrugët e rrëpirëta të Arbërisë - lagje kodrinore në perëndim të Prishtinës në të cilën gjenden disa prej ambasadave të huaja në Kosovë - as sot nuk ishin pengesë për qytetarët të cilët kishin ardhur nga anë të ndryshme për të vazhduar procedurën për marrjen e vizave.

Ndër ta është edhe Isak Rexha, 68 vjeç nga Ponasheci i komunës së Gjakovës, i cila ka kaluar 120 kilometra me shpresën se sot do të marrë vizën për Gjermani.

“Kjo na mori n´qafë se po duhet me u end. 60 euro veç benzin m´kanë shku e mandej edhe dokumentet: çertifikatë e lindjes, e martesës, e familjes, tatimi në pronë. E n´fund, a ma japin-a s´ma japin?!”, thotë Rexhaj për DW, të cilin e gjejmë në një kafene pranë ambasadës, teksa pret orën 14-të për të marr përgjigjen për vizën.

Sipas Zyrës së Shtypit të Ministrisë Federale të Punëve të Jashtme Gjermane, me seli në Berlin “dokumentet të cilat duhet kompletuar secili aplikant për vizë drejt Gjermanisë, janë jo vetëm të dhënat e qëllimit të udhëtimit, por buxheti i mjaftueshëm për mbulimin e shpenzimeve të udhëtimit dhe të jetesës, si dhe gatishmërinë për të lënë territorin e shteteve të Shengenit para skadimit të vlefshmërisë së vizës”.

Ismet Kryeziu, 39 vjeçar, taksist nga Kamenica, qe disa herë kalon rrugën 60 kilometërshe, me dëshirën që ta vizitoj motrën në Gjermani. Por, duke pasur parasysh moshën e tij, ai është i përgatitur edhe për refuzimin e vizës nga ambasada gjermane.

“Jam ardhë qe tri-katër herë se m´u deshën disa dokumente. Ato që u deshën i bëra gati, motra atje i plotëson kushtet edhe unë punoj këtu qe 18-të vjet e shpresoj më lëshojnë vizën. Po, nëse jo, unë kthehem e kurrgja kurrkujt. Jo, nuk provoj më, se shpenzime, e larg e ftohtë”, thotë Kryeziu.

Procedura e gjatë e regjimit të vizave dhe kostoja e shumëfishtë për sigurimin e dokumenteve dhe udhëtimet, janë arsye e mjaftueshme që shumica e qytetarëve të Kosovës të mos provojnë të udhëtojnë jashtë shtetit. Artani, 32 vjeçar, megjithëse i ri, po për këto arsye nuk ka provuar të vizitojë vëllezër e motra të shkapërderdhur nëpër disa shtete të Evropës.

“Jo, asnjëherë nuk kam qenë diku tjetër, veç n´Turqi e n´Shqipëri, se s´po na i japin vizat. Para tri vjetëve kam provu për Zvicër e s´ma kanë dhanë. Pas kësaj s´kam provuar ma se edhe po shpenzojmë, edhe s´po na i japin vizat. Keq për ne...”, thotë Artani. Përderisa Hyseni, 40 vjeçar, pas një tentimi të kotë për të udhëtuar për në Amerikë, s´ka provuar më kurrë.

Qytetarët e Kosovës ndjehen të izoluar dhe të diskriminuar karshi fqinjëve të shteteve të rajonit.

Kosova është vendi i vetëm i Ballkanit Perëndimor i cili i nënshtrohet regjimit të vizave. Pas hapjes së dialogut për viza me Kosovën, pritet udhërrëfyesi me kushtet që Kosova duhet plotësuar, si: siguria e dokumenteve, lufta kundër emigrimit, sigurimi i rendit dhe ligjit dhe i sigurisë publike, mbrojtja e pakicave, si dhe lufta kundër korrupsionit dhe krimit te organizuar.

Deri në përmbushjen e këtyre kërkesave, qytetarët e Kosovës do të vazhdojnë të mblidhen para dyerve të ambasadave, me shpresën që si evropianët më të rinj, së shpejti do të mund të lëvizin lirshëm si qytetarët tjerë të botës së qytetëruar.

Lexo më shumë

VV: Thaçi nuk na ka ftuar

Përfaqësuesit e Lëvizjes Vetëvendosje kanë mohuar se kryeministri i Kosovës, Hashim Thaçi, i ka ftuar ata në një takim me të gjitha partitë politike, për t’i njoftuar rreth mbledhjes së Grupit Drejtues Ndërkombëtar për Kosovën, që është mbajtur në Vjenë.

“Si shumë herë më parë, drejtues dhe përfaqësues të PDK-së, mirëpo edhe të partive tjera, gënjyen gazetarët duke ju thënë që edhe Lëvizja Vetëvendosje ishte e ftuar në këtë takim, por ne gjoja kishim refuzuar që të shkojmë”, thanë anëtarët VV-së në një konferencë për shtyp, për të cilët nga konkluzionet që vijnë nga ky takim, më mirë “që nuk na kanë ftuar”.

“Aty u kërkua nga partitë politike që të nënshkruhet një deklaratë që do të ishte një mesazh gjoja konsensual se ka mbetur edhe pak kohë deri në përfundimin e mbikëqyrjes së pavarësisë dhe se partitë mbështesin përmbushjen e obligimeve nga Pakoja e Ahtisaarit. Ky konsensus, gjithsesi dashakeq në këto rrethana, kërkon pajtim paraprak kolektiv për atë që do të ndodh në vitin 2012. Dhe atë pa e thënë publikisht se çfarë po ndodh”.

Sipas Vetëvendosjes, Qeveria e Kosovës po përgatitet për aktin e fundit të shitjes së Kosovës, në nivelin politik dhe atë ekonomik.

“Pas koncesionit të fundit antikushtetues për të hequr dorë nga Republika dhe për të mos paragjykuar statusin final të Kosovës, të pranuar duarhapur nga Edita Tahiri dhe Hashim Thaçi, tanimë janë shtuar zërat për paqëndrueshmërinë e situatës në veri, dhe janë shtuar propozimet për statusin special të veriut në Kosovë. Tanimë po diskutohet edhe propozimi katërpikësh i presidentit Tadiç për Kosovën duke shtuar prapë se në asnjë mënyrë nuk do të pranohet pavarësia e Kosovës”.

Vetëvendosje i bën thirrje të gjitha subjekteve politike, si dhe deputetëve dhe anëtarëve të partive pjesë të koalicionit, që “mos të bëhen pjesë e konsensusit të rrejshëm për ta shitur Kosovën”.

“Në këtë tentim dhe synim të Hashim Thaçit për të shitur Kosovën dhe për t’i bërë edhe të tjerët pjesë të saj, po i ndihmon edhe miku i tij i ngushtë dhe strukturat ilegale të cilat ata që një kohë të gjatë po thonë q[ nuk ekziston, pra Kadri Veseli dhe SHIK-u i PDK-së”, u tha në konferencë, për të shtuar se SHIK-u po tenton që të futet edhe në qeverinë e Kosovës përmes procesit të riformatimit të qeverisë, “duke përfshirë këtu edhe udhëheqësin e SHIK-ut, Kadri Veselin”.

Përkitazi me SHIK-un, Lëvizja Vetëvendosje këtë herë i shtron pesë pyetje: Kush e ka themeluar SHIK-un? Kush e financon SHIK-un? Kush e mbikëqyr SHIK-un? Kujt i raporton SHIK-u dhe Kadri Veseli?
Çfarë aktiviteti zhvillon Kadri Veseli dhe SHIK-u?

Lexo më shumë

Lojë me shtetësinë

Prezantimi i Kosovës në nismat rajonale pa emrin Republikë dhe me një fusnotë, ka ngjallur reagime në mesin e partive opozitare por edhe të analistëve. Sipas këtyre të fundit, kjo është një lojë me shtetësinë, sovranitetin dhe kushtetutshmërinë e Kosovës.

Deputeti i Lëvizjes “Vetëvendosje”, Visar Ymeri, thotë se ky veprim është kontestim i Republikës së Kosovës.

“Natyrisht që është kthim prapa dhe e konteston Republikën. Pra me vet faktin që ti po pranon që për disa nuk je Republikë, atëherë në fakt t’i nuk qenke republikë. Republikë duhet të jesh ndaj secilit dhe çdo gjëje. Nëse je, je, po nëse nuk je, nuk je. Nuk ka gjysmë Republikë, apo gjysmë pavarësi. Nuk ka pavarësi të shpallur tash e të realizuar në të ardhmen”, ka theksuar Ymera, ndërsa transmeton RTK.

Analisti Behlul Beqaj, nga ana e tij, thotë se kompromiset e kryeministrit Hashim Thaçi, po çojnë drejt rrezikimit të interesave kombëtare dhe shtetërore.

“Kryeministri një kohë të gjatë është me veprimet e tija, në sjelljet dhe deklarimet e tija në kundërshtim me vetë kushtetutën. Ai mendon se vetëm interpretimi i tij është i saktë kur është në pyetje Kushtetuta. Kryeministri është në vazhdën e rrezikimit të interesave kombëtare dhe shtetërore dhe është në vazhdën e respektimit të kërkesave të caqeve të caktuara në ndikimit ndërkombëtare, ndonëse ka marrë votën e qytetarëve të vet”, ka thënë Beqaj.

Në kuadër të dialogut me Prishtinës dhe Beogradit që po zhvillohet në Bruksel, prej kohësh është diskutuar edhe tema rreth çështjes së prezantimit të Kosovës në nisma rajonale. Zëvendëskryeministrja Edita Tahiri, e cila drejton ekipin kosovar në këtë dialog, ka konfirmuar se pala kosovare është pajtuar që Kosova të prezantohet pa fjalën Republikë, dhe me një fusnotë. 

Lexo më shumë

Masa më të “rrepta” për duhanxhinjtë

Me kërkesën e Inspektoratit Sanitar, Ministria e Shëndetësisë ka formuar një komision ku po shqyrtohet mundësia e amendamentimit të Ligjit për duhanpirje. Zyrtarë nga kjo ministri kanë thënë se ligji aktual nuk po zbatohet si duhet. Ata kanë përpiluar një dokument në të cilin parashihet ndalimi qind për qind i hapësirave publike për pirje të duhanit. Ndërkaq, nismën e Ministrisë së e kanë përkrahur edhe Ministria e Ambientit dhe Organizata Botërore e Shëndetësisë. Edhe pse Ligji për përdorimin e duhanit në hapësirat publike ka hyrë në fuqi nga viti i kaluar, në bazë të rezultateve të prezantuara nga Inspektorati Sanitar dhe ai Shëndetësorë, është vlerësuar se niveli i zbatimit të Ligjit për duhanin nuk është ai i prituri. Për këtë qëllim, Inspektorati Sanitar ka kërkuar nga Ministria e Shëndetësisë që ligji për duhanin të ndryshohet në ato pjesë që ka të bëjë me dispozitat ndëshkimore dhe me përcaktimin e hapësirave për duhan pirje.
Faik Hoti, drejtor për informim në Ministrinë e Shëndetësisë, si dhe anëtarë i grupit punues, ka thënë për Kosovapress se me kërkesë të Inspektoratit Sanitar, MSH-ja ka formuar grupin punues për hartimin e koncept-dokumentit për amendamentimin e Ligjit për duhanin.
Sipas tij, me ligjin e ri do të mundësohet krijimi i hapësirave publike pa duhan, do të bëhet një monitorim më i rreptë i zbatimit të ligjit për duhanin, si dhe do të fuqizohen dispozitat ndëshkuese për ata të cilët nuk e respektojnë Ligjin për duhanin.
Kryeinspektori Ibrahim Tershnjaku ka pranuar se Inspektorati Sanitar ka hasur në vështirësi në zbatimin e këtij ligji, në raportin e ndarjes së hapësirave 70 me 30, të dedikuara për duhan. Ai po ashtu ka thënë se subjektet afariste nuk kanë qenë të përgatitura për një aplikim të këtij neni. Sipas tij, është dashur të rregullohen të gjitha hapësirat sipas standardeve në ndarje fizike të dedikuar për duhan pirje.
Nismën e Ministrisë së Shëndetësisë për ndryshimin e disa neneve të ligjit për duhanin e ka përkrahur edhe Ministria e Ambientit. Ministri Dardan Gashi ka thënë se edhe pse është vështirë të implementohet një ligj i tillë, duhet së paku të përpiqemi që në hapësirat publike të mos pihet fare duhani.
Skënder Syla, drejtor i OBSH-së, zyra në Kosovë, ka thënë se kjo zyrë edhe më herët ka rekomanduar Ministrinë e Shëndetësisë për ndryshimin e Ligjit mbi duhanin, me qëllim të zbatimit të mirëfilltë të tij. Ai ka kërkuar që ky amandemantim të bëhet sa më parë që të jetë e mundur, me qëllim të përmirësimit të cilësisë së jetës së qytetarëve të Kosovës.

Lexo më shumë

‘Drejt sovranitetit të plotë’

Kosova po ndërmerr hapa të rinj drejt sovranitetit të plotë, por njëkohësisht realizon të gjitha përgjegjësitë që ka për të konkluduar një proces dialogu me Serbinë me gjithë tërësinë e çështjeve që mbeten akoma për t’u zgjidhur- ka deklaruar zëvendëskryeministri i Shqipërisë, Edmond Haxhinasto, pas një takimi me përfaqësuesit e shqiptarëve nga Lugina e Preshevës, Riza Halimi dhe Galip Beqiri.
Haxhinasto është pyetur nga gazetarët se a mund të lexohet si një tërheqje e palës kosovare në negociatat me Serbinë, nisur nga fakti që kryenegociatorja Edita Tahiri ka rënë dakord për heqjen e termit “Republikë”, ndërsa përgjigja ishte si vijon:
“Ky është një vendim sovran i përfaqësuesve të zgjedhur të Kosovës dhe pyetja u duhet bërë atyre. Por kam besimin e plotë që ata kanë të gjithë aftësinë, maturinë, përgjegjësinë e caktuar politike për të realizuar marrëveshjen në kuadër të dialogut - marrëveshje të cilat do të zgjidhin çështje praktike që ekzistojnë midis dy vendeve”.
Ministri i Jashtëm shqiptar ka pohuar se “ajo që është e rëndësishme është që Kosova po ndërmerr hapa të rinj drejt sovranitetit të saj, drejt sovranitetit të plotë dhe kjo duhet përshëndetur. Por ndërkohë ajo realizon të gjitha përgjegjësitë që ka për të konkluduar një proces dialogu me Serbinë me gjithë tërësinë e çështjeve që mbeten akoma për t’u zgjidhur”.

Lexo më shumë

Kosova po sakrifikon për Serbinë

Kosova është vonuar jashtëzakonisht shumë me vendosjen e marrëdhënieve reciproke me Serbinë dhe me Bosnjën, pasi që nga shpallja e pavarësisë Kosova ka marrëdhënie jo të barabarta me këto dy vende- ka thënë në një intervistë për Radion Evropa e Lirë, Lumir Abdixhiku, drejtor ekzekutiv në Institutin Riinvest. Sipas tij, ka ndarje në qëndrime në skenën politike rreth marrëdhënieve të reciprocitetit dhe se a duhet Kosova të recipropojë apo jo.
“Por parimisht, çdo vend, çdo shtet serioz ka relacione të tilla me çdo vend tjetër, madje vetë Bashkimi Evropian është i ndërtuar mbi parimet e reciprocitetit. Jo më larg se këtë javë presidenti Barack Obama ndërtoi një trupë, me qëllim të reflektimit të marrëdhënieve reciproke ndërmjet SHBA-ve, Kinës dhe Rusisë. Pra, marrëdhëniet e reciprocitetit janë pas çdo shteti dhe Kosova ka të drejtë morale, të drejtë ligjore dhe ka obligim kushtetues që të bëjë reciprocitet me vendet tjera”, ka theksuar ai duke shtuar se reciprociteti në këtë fazë nuk është i plotë dhe “në qoftë se nuk është i plotë atëherë nuk ka kurrfarë reciprociteti”.
“Them se nuk është i plotë, meqenëse kosovarëve iu zhbëhet identiteti në kalim e sipër në Serbi, domethënë targat e veturave të Kosovës nuk njihen atje, ndërkaq të Republikës së Serbisë njihen në Kosovë; nuk njihen dokumentet me termin Republikë dhe rrjedhimisht Kosova po sakrifikon vet simbolet e shtetësisë për të pasur marrëdhënie të mira me Serbinë”, ka shtuar Abdixhiku.
Më tej, ai ka sqaruar se Kosova duhet domosdo të ketë një unitet rreth reciprocitetit, meqenëse marrëdhëniet jo të barabarta gjithmonë kanë dëmtuar bizneset kosovare, vetë tregun e Kosovës, dhe në fund të fundit kanë dëmtuar vetë konceptin e shtetit çfarë është një shtet, i cili nuk mund të sillet drejt ndaj vendeve tjera.

Lexo më shumë

Dalglish: Na intereson vetëm fitorja ndaj United

Bosi i Liverpoolit, Kenny Dalglish, dëshiron që lojtarët e tij të injorojnë çdo polemikë para sfidës ndaj Manchester United, duke sugjeruar që impenjimi kryesor të bëhet në mposhtjen e rivalëve të tyre.

“Ne duam të përqëndrohemi që të luajmë futboll dhe gjërat tjera që ndodhin jashtë fushe, vërtet mbesin aty”.

“Të gjithë kanë përgjegjësi për të mbajtur lart emrin e klubit të tyre dhe të gjithë ata që raportojnë ose komentojnë ndeshjen kanë përgjegjësi që të mos inicojnë probleme. Të gjithë do të jenë të përkushtuar që kjo të jetë një ndeshje e bukur, ku ne do të kërkojmë vetëm fitoren”, u shpreh Dalglish.

Lexo më shumë

“Dhjetëshja e dobët” e pretendentëve për ambasadorë

Po të varej nga Albin Kurti, Sylejman Selimi do të ishte i vetmi kandidat në mesin e dhjetë të propozuarve të Ministrisë së Punëve të Jashtme që do ta merrte dekretin për ambasador të ri të shtetit.

Vlerësimin pozitiv për ish-komandantin e FSK-së Kurti e ka shpërfaqur në raportin vlerësues për kandidatët, me të cilët Komisioni Parlamentar për Punë të Jashtme ka zhvilluar seanca dëgjimore më 6 janar.

Ky raport “konfidencial”, një kopje të të cilit ka arritur ta sigurojë “Koha Ditore”, aktualisht është në zyrën e presidentes, Atifete Jahjaga. Edhe pse “vlerësimi” i parlamentarëve nuk është obligues për të, nga ajo pritet që të vendosë se kush nga kandidatët mund të emërohet në shtetin pranues.

Ajo çka vërehet qartë në raport është se anëtarët e Komisionit funksional nuk kanë qenë në gjendje që të japin vlerësim të përbashkët për kandidatët, por secili nga ta, me përjashtim të deputetit Skënderi Hyseni, e ka dhënë vlerësimin personal. Në kushte anonimiteti, së paku tre anëtarë të Komisionit që janë kontaktuar nga KD-ja, e kanë thënë prerazi se shumica e kandidatëve nuk janë të denjë për postin e ambasadorit.

Ndërsa Kurti, si kryetar komisioni, ka shkuar në “ekstrem”, duke thënë se vetëm njëri nga dhjetë të propozuarit e MPJ-së - Sylejman Serlimi - e meriton ta marrë dekretin e presidentes Jahjaga.

Lexo më shumë

Serbia përballë presionit të GDN-së

Zyrtarët serbë mohojnë prezencën e forcave të tyre të sigurisë në Kosovë, përkundër apelit të 24 janarit të Grupit Drejtues Ndërkombëtar, që Serbia të përmbahet nga ndërhyrja në Kosovë dhe të tërheq personelin e forcave të fshehta të saj.

"Serbia nuk ka ndonjë forcë sigurie në Kosovë, që nga 1999, në përputhje me rezolutën 1244 të Këshillit të Sigurimit të OKB dhe marrëveshjen e paqes të Kumanovës", tha për SETimes zëdhënësi i qeverisë së Serbisë, Milivoje Mihajlovic.

Ministri i brendshëm i Kosovës, Bajram Rexhepi, thotë se prania e Serbisë në Kosovë është e njohur gjerësisht, pavarësisht nga mohimet serbe.

"Policia e Kosovës në disa raste ka ndaluar e verifikuar persona që janë identifikuar si anëtarë të MUP-it serb", tha ai.

Mihajlovic thotë se Beogradi e sheh deklaratën e GDN-së si një provokim dhe përpjekje për të dëmtuar Serbinë përballë dialogut në vazhdim me Kosovën.

Dusan Janjic, drejtor i Forumit për Marrëdhëniet Etnike, thotë se kërkesa - për tërheqjen nga Kosova të forcave serbe të sigurisë - nuk është aspak e re.

"Ato u përsëritën nga kancelarja gjermane Angela Merkel gjatë vizitës së saj në Beograd verën e kaluar", thotë ai.

Grupi kërkoi gjithashtu që Serbia të anulojë zgjedhjet e ardhshme lokale, në veriun e Kosovës të mbizotëruar nga serbët.

Vladimir Radomiroviç, nga Qendra e Beogradit për Alternativat Strategjike, beson se kërkesat e GDN-së janë presion shtesë mbi Serbinë përpara vendimit për kandidaturën e saj në BE.

"Tadiç tani ka një zgjedhje të qartë përpara tij: të heq institucionet serbe nga Kosova dhe të marrë statusin e kandidatit për BE, apo të mbajë zgjedhje në Kosovë dhe të provokojë Perëndimin", thotë Radomirovic.

Lexo më shumë

E “harruan” në qeli, fitoi 22 milionë dollarë dëmshpërblim

Amerikani Stephen Slevin fitoi dëmshpërblimin me vlerë prej 22 milionë dollarësh, sepse pa u gjykuar kishte kaluar dy vite në burg i izoluar. Pasi më në fund iu kujtua autoriteteve, ai u lirua nga të gjitha akuzat.

Slevin ishte arrestuar më 2005 në New Mexico, me akuzën se kishte vozitur në gjendje të dehur. U dërgua drejtë e në qeli ku në dy vitet e ardhshme autoritetet thjeshtë “e harruan”.

Rasti përfundoi më 2007, kur gjykata hodhi poshtë të gjitha akuzat. Avokati i Slevinit dëshmoi në gjykatë se klienti i tij ishte arrestuar gabimisht dhe ishte lënë të vuajë në burg. Ai tha se Slevin në një moment u detyrua ta nxjerrë dhëmbin vetë, pasi iu refuzua kërkesa për ta vizituar stomatologun.

Autoritetet e New Mexicos thonë se në kohën e arrestimit të Slevinit dosja kriminale ishte shkruar në 26 faqe. Ata planifikojnë të parashtrojnë ankesë lidhur me dëmshpërblimin e tij.

Lexo më shumë

Tetë vjeçarja që e ‘luan mendsh’ kitarën

Zoe Thomson është një vajzë shumë e veçantë nga Britania e Madhe. Kjo vajzë tetë vjeçare e “luan mendsh” kitarën elektrike, ndërsa ka edhe grupin e saj me të cilin përpunon të gjitha këngët e ‘heavy metal’ grupeve.

Bota e zbuloi Zoen dhe grupin e saj që në vitin 2011, ndërsa ripërpunimi i këngës Enter Sandman i Metallicas pati më shumë se tre milionë klikime, bile Metallica incizoi edhe një video të vogël ku lavdërojnë grupin e ri.

Në ëmbëlsirën më të re të cilën na ka përgatitur kjo vashë e veçantë mund ta shihni duke luajtur një këngë të grupit Stratovarius. Videoja e saj e re sërish ka pushtuar YouTube dhe tashmë ka mbi 800.000 klikime.

Lexo më shumë

Zbulohet organizmi i cili jeton qe 50,000 vite!

Shkencëtarët në Havaje kanë zbuluar popullatën e myshqeve që për 50,000 vite tani vetvetiu klonohet dhe sot sipas të gjitha gjasave janë organizmi më i vjetër shumëqelizorë në Tokë.

Edhe pse këto myshqe ndodhen në shumë treva të hemisferës veriore, duket se vetëm në Havaje është parë shumëzimi me klonim. Shkencëtarët kanë konfirmuar se të gjitha popullatat e myshqeve atje ndajnë një marker të rrallë gjenetik. Kjo është dëshmi se datojnë nga vetë bima e parë që ka zbarkuar atje nga bima në formën elementare, e bartura nga erërat, para disa dhjetëra mijëra vitesh, shkruan National Geographic.

Sphagnum palestre paraqitet vetëm me një gjini kështu që nuk mund të shumëzohet. “Është për të pritur se një bimë burimore të ketë këtë veti të rrallë. Mirëpo, nuk ka gjasa që kjo do të mund të ndodhte me më shumë bimë”, sqaroi koautori i studimit Eric Karlin.
Mbetjet e fosilizuara të Sphagnum palestra janë gjetur në torfe të vjetër rreth 23,900 vite. Pikërisht për shkak të kësaj shkencëtarët kanë konstatuar se myshku është i pranishëm në Havaje po aq gjatë, e ndoshta edhe më gjatë.

Për të verifikuar këto vlerësime, ata kanë kryer një analizë komplekse të llojllojshmërisë së popullatës aktuale dhe shpejtësinë e mutacionit dhe kanë vlerësuar se pjesëve të ndryshme të popullatës do ti nevojiteshin rreth 50,000 vite për tu zhvilluar në variantet ekzistuese, shkruan National Geographic. 

Lexo më shumë

Një pjesë e satelitit rus ra mbi një shtëpi në Siberi

Një pjesë e satelitit rus për komunikimet civile dhe ushtarake Meridian, i cili pa sukses u dërgua në orbitë, ra në kulmin e një shtëpie në Rrugën e kozmonautëve në një fshat të Siberisë, raportuan të shtunën mediat ruse.

“Copa me diametër prej rreth 50 centimetra ra në kulmin e një shtëpie në fshatin Vagajevc”, në rajonin Novosibirsk, tha për agjencinë Interfaks një zyrtar i shërbimit komunal të sigurisë.

Agjencia France presse thekson se për ironi shtëpia ndodhet në Rrugën e kozmonautëve.

Rusia të premten dërgoi në orbitë këtë satelit në shpinën e raketës Sojuz-2.1 A nga kozmodromi ushtarak Pleseck, 800 km në veri të Moskës. Sateliti ishte paraparë të përdoret në qëllime ushtarake dhe civile, në veçanti për komunikimin në mes të anijeve, fluturakeve dhe infrastrukturave tokësore në Arktik. 

Lexo më shumë

Në Antarktik uji rrjedh në -20

Antarktiku vazhdon të na habis si gjithmonë. Nën akullin e tij rrjedhin lumenjtë!

Deri te ky zbulim ka ardhur një grup i shkencëtarëve nga Brazili dhe Kili. Deri tani dihej se thellë nën shtresën e akullit ndodhen liqenet masive, por për që ka ujë të rrjedhshëm askush madje as që ëndërronte. Tani duhet zbuluar burimin e rrjetës së tërë të lumenjve në zonën e akullit të përhershëm.

“Po flasim për lartësinë mbidetare prej 700-800 metra, me temperaturat mesatare prej në mes 15 dhe 20 shkallë nën zero. Zbulimi i ujit të rrjedhshëm me të vërtetë është fenomen”, tha Ricardo Jana, shkencëtar nga Kili.

Lexo më shumë

Cyrus kritikohet për sjelljet e pa hijshme

Miley Cyrus ka rënë në qendër të kritikave nga pjestarë konservativë të shoqërisë amerikane, pas fotove kontraverse të postuara online.

Tinejxherja ishte në kryetitujt e lajmeve të mediave amerikane, pasi torta e ditëlindjes së të dashurit të saj Liam Hemsworth simuloi seksin oral mes çiftit dhe kjo sigurisht se nuk është pritur mirë për shkak të ndikimit që mund të ketë te tinejxherët.

“Filma sikur “Bachelorette” dhe sjelljet e pa hijshme sikurse të Cyrus, mund të jenë pjesë e jetës reale të Hollywoodit, por seksi i rastësishëm pas disa divorceve nuk ndikon në mirëqenien e të rinjve tanë. Këto sjellje mund të kenë pasoja”, shkruan në një komunikatë të Institutiti për Media dhe Kulturë. 

Lexo më shumë

Wenger: Duam FA Cup

Menaxheri i Arsenalit, Arsene Wenger, ka deklaruar se ekipi i tij do të fokusohet maksimalisht që ta fitojë së paku FA Cup këtë sezon.

“Nëse shikoni në statistikat e mia, do të shihni se FA Cup është me rëndësi për mua. Nëse shikoni në statistikat e ekipeve tjera, mendoj se të tonat janë më të mira”.

“Edhe vitin e kaluar luftuam për katër tituj. Sa shumë ekipe luftojnë për katër trofe në një sezon? Asnjë. Mendoj se ne gjithnjë luftojmë për të gjithë titujt dhe kështu këtë sezon do të fokusohemi që ta fitojmë FA Cup”, potencoi Wenger.

Lexo më shumë

Galliani pranon: Dështuam për Tevez

Zëvëndëspresidenti i Milanit, Adriano Galliani, ka zbuluar se skuadra e tij ka vendosur të ndërpresë tratativat për transferimin e sulmuesit argjentinas, Carlos Tevez.

“Ne kemi qenë shumë pranë marrëveshjes me Manchester Cityn. Nëse në ora 18:30 dikush do tëmë kishte pytur se kë do ta transferonim, do të kisha thënë Tevezin”.

“Për çdo rast, marrëdhëniet tona me Cityn mbesin të mira dhe tani kemi zgjidhur disa keqkuptime. Unë bëra më të mirën nga ana ime, e kam pasur zemrën në gojën time sot, nuk kam mundur të bëj më shumë. Ne kemi bërë gjithçka që Tevez të vijë, por situata ndryshoi. Unë dua të falënderoj Tevezin që ka pritur deri të premtën në mbrëmje, ashtu siç ka premtuar. Ne do të flasim përsëri me Cityn në qershor”, potencoi Galliani.

Lexo më shumë

Albert Kuçi punësohet pa konkurs

Ministri i Jashtëm i Kosovës, Enver Hoxhaj, ka emëruar Albert Kuçin në pozitën e zëvendësambasadorit në Çeki, pa shpallur fare konkurs dhe pa i përfillur ligjet në fuqi, të cilat e precizojnë se si duhet të bëhen emërimet e shërbyesve diplomatikë, duke filluar nga shpallja e konkursit, intervistimet e kandidatëve e deri te punësimi i tyre. Por, ai nuk është ndalur me kaq.

Për Kuçin, që më parë nuk ka qenë pjesë e shërbimit diplomatik, por që e ka drejtuar një restorant në shtetin çek, Hoxhaj është treguar shumë “dorëlirë” duke ia dhënë gradën “Ministër Këshilltar”, gjithashtu pa i përfillur procedurat ligjore në fuqi.

Ndërkaq, sipas të dhënave në internet, Albert Kuçi është një biznesmen në Pragë të Çekisë që drejton kompaninë e patundshmërive “ADAL Grioup s.r.o”, e cila është themeluar më 29 korrik të vitit 2005.

“Sipas ligjit, përkatësisht Udhëzimit Administrativ 3/2009, para se të emëron nëpunës të Misionit Diplomatik, MPJ-ja duhet të shpallë konkurs, pastaj t’i respektojë procedurat e intervistimit, kriteret dhe përzgjedhja e kandidatëve, ndërsa për emërimin e Kuçit nuk është vepruar kështu. Kuçi deri tash ka qenë pronar i një restoranti në Çeki, pa asnjë ditë përvoje pune në shërbimin diplomatik apo në MPJ”, thotë burimi i gazetës “Zëri”.

“Tash jemi në një situatë ku përveç se nuk dihet për fushën akademike e profesionale të kandidatit, në Çeki kemi një zëvendësambasador për të cilin nuk dihet nëse është nën hetime për ndonjë vepër penale, pasi që dokumentet e tij nuk janë dorëzuar në MPJ, për faktin se nuk ka pasur fare konkurs. Në MPJ po thonë se ministri e ka mik të mirë Kuçin, prandaj i ka shpërfillur të gjitha procedurat ligjore për emërimin e tij”. 

Lexo më shumë

Krasniqi: “Kamishi” nuk e ka thënë kurrë të vërtetën

Deputeti Florin Krasniqi, i njohur si “Pullazxhiu”, i ka dalë në mbrojtje liderit të Lëvizjes vetëvendosje, Alibn Kurtit, duke i mohuar kategorikisht akuzat e deputetit të PDK-së, Bekim Haxiu – “Kamishi”, për komunikim me zyrtarë të Serbisë.

Krasniqi ka thënë se “Kamishi” asnjëherë në jetën e tij nuk e thotë të vërtetën.

“Të gjitha këto akuza që i ka bërë ‘Kamishi’ në adresë të z. Kurti janë plotësisht të pavërteta. ‘Kamishi’ që nga dalja e tij në skenë kurrë nuk ka folur diçka që është e vërtetë. Unë nuk e di që ‘Kamishi’ në jetën e tij ka folur diçka që është e vërtet. Ai ka qenë i shtyrë nga Plani i SHIK-ut që t’i thotë këto rrena”, ka deklaruar Krasniqi për “Epoka e Re”.

Sipas tij, këto akuza të pabaza janë bërë në kohën kur PDK-ja ishte në krizë.

“Këto akuza të pabaza janë bërë për shkak se PDK-ja është në krizë. Është në krizë edhe koalicioni qeverisës. Me këto akuza false është duke tentuar ta zhvendosë vëmendjen e opinionit diku tjetër, sidomos kur Kosova është në krizë ekonomike dhe politike”.

Në lidhje me deklaratat se shërbimi i SHIK-ut është mbyllur më 2008, Krasniqi thotë se “është naive të kuptohet që dikush hyn në një shërbim informativ dhe del kur të dëshirojë”.

“Në shërbime informative, sekrete dhe kriminale mund të hyhet, por jo edhe të dilet kur ta dojë qejfi. Në këto shërbime mund të dalësh vetëm i vdekur”, thotë Krasniqi. “SHIK-u ekziston. Ai nuk është shërbim informator, por kriminal... ‘Kamishi’ dhe ‘kamishat’ e tjerë kanë hyrë në këtë shërbim kriminal dhe kurrë nuk kanë për të dalë”.

Ai nuk e sheh të arsyeshme që Vetëvendosje të mbrohet ndaj këtyre akuzave “të pabaza, ashtu sikurse ishin të pabaza edhe akuzat të cilat m’i patën bërë mua”.

“Hashim Thaçi ka thënë plotë të pavërteta për mua. E kam ndjekur penalisht për shpifje, por çfarë është duke bërë penalja për të? Gjyqësia është shumë e dobët në Kosovë. Ndjeke sa të duash dikë penalisht në Kosovë se nuk ka efekt. Deri më tani asnjë zyrtar i lartë publik në Kosovë nuk është dënuar për shpifje. Nuk mund të ketë ligj në Kosovë kur këta njerëz janë mbi ligjin. Qëllim im dhe i Lëvizjes Vetëvendosje është që të gjithë të jenë të barabartë para ligjit. Ky proces është i vështirë, por i realizueshëm”.

Lexo më shumë

Lirohet i dyshuari për vrasjen e policit Zymberi

Misioni Evropian për Sundimin e Ligjit, EULEX, ka bërë me dije se e ka liruar nga paraburgimi serbin e arrestuar të enjten, Nebojsa Vucinic.

Ai u arrestua me dyshimin për pjesëmarrje në vrasjen e policit Enver Zymberi, në korrik të vitit të kaluar.

Një zëdhënëse e EULEX-it i ka thënë se identiteti i të arrestuarit është kuptuar gabimisht, dhe se ai nuk ishte personi që po kërkonin.

Lexo më shumë