Vetëm minus një pik

Pas fitores prej 4-0 kundër Getafes, Barcelona e ka shtuar edhe më shumë presionin kundrejt Real Madridit në garën për titullin e kampionit të Spanjës.

Vetëm një skuadër luajti në pjesën e parë, ndërsa skuadra tjetër mbrohej para gjashtëmbëdhjetëmetërshit. Megjithatë, edhe pse mund të shënonin shumë gola, vendasit realizuan vetëm dy herë në këtë pjesë.

Ishte minuta e 13-të kur Alexis Sanchez pranoi një top nga Leo Messi për t’i entuziazmuar të pranishmit në Camp Nou.

Në fund të pjesës së parë (44’), një aksion si në ‘PlayStation’ mes Andres Iniestas dhe Lionel Messit, argjentinasi e përfundoi me një gol të bukur.

Vlen të përmendet se në këtë pjesë ishte edhe një gol i dyshimtë i Xavit, mirëpo, sipas gjyqtarëve, topi nuk e kaloi vijën fatale.

Edhe në gjysmën e dytë, katalunasit vazhduan dominimin, ndërsa arritën të shënojnë edhe dy gola të tjerë.

Një krosim të Isaac Cuencas e shndërroi në gol Alexis Sanchez (73’), i cili e mposhti me kokë portierin Moya.

Dy minuta më pas, Messi harkoi nga gjuajtja e lirë, ndërsa Pedro Rodriguez shënoi gol (75’).

Pas kësaj fitoreje, Barcelona ka 78 pikë, një më pak se Real Madridi që të mërkurën zhvillon derbin lokal ndaj Atletico Madridit. 

Lexo më shumë

Milani kthehet në vend të parë

Kampioni i Italisë në fuqi, Milan, ka regjistruar fitore prej 1-0 si mysafir i Chievos për ta rimarrë kreun e tabelës së Serie A.

Në takimin e zhvilluar në Stadio Marc'Antonio Bentegodi, skuadra vendase luajti më mirë në fraksionin e parë të lojës, megjithatë ishin mysafirët ata që krijuan avantazh.

Pas një kundërsulmi të Milanit, Sulley Muntari shënoi një gol të bukur për epërsinë e Rossonerëve (8’).

Edhe në gjysmën e dytë të takimit mysafirët nuk ishin bindës, megjithatë arritën ta ruajnë avantazhin nga gjysma e parë.

Kjo fitore e kthen Milanin në pozitën e parë në tabelë me dy pikë më shumë se Juventusi që të mërkurën zhvillon takimin e kësaj xhiroje ndaj Lazios.

Lexo më shumë

Okunowo: Chelsea nuk mund t’i bëjë ballë Barcës

Ish-mbrojtësi i Barcelonës, Samuel Okunowo, mendon se Blaugranët janë shumë të fortë për Chelsean.

Dy klubet takohen në gjysmëfinale të Ligës së Kampionëve, ndërsa nigeriani është i bindur se katalunasit do t’i eliminojnë Blutë.

“Lojtarët e Chelseat janë shumë të etur të luajnë kundër Barcës. Mirëpo, mendoj se Barca do të fitojë dhe do ta eliminojë Chelsean”, ka thënë Okunowo për Mas Esports de Com Radio.

Për më shumë, ai mendon se Barcelona mund ta përsërisë suksesin e tre viteve më parë, duke i fituar të tre titujt, edhe pse gjendet katër pikë prapa Real Madridit në tabelën e La Ligas. 

Lexo më shumë

Thaçi dhe Ban biseduan edhe për Mitrovicën

Kryeministri i Republikës së Kosovës, Hashim Thaçi, ka vazhduar vizitën e tij në Shtetet e Bashkuara të Amerikës. Ai është takuar të martën në selinë e Kombeve të Bashkuara në New York, nga Sekretari i Përgjithshëm i Kombeve të Bashkuara, Ban Ki-moon.

 Temë kryesore e diskutimit ishin zhvillimet e fundit në Republikën e Kosovës. Me këtë rast, kryeministri Thaçi e informoi Sekretarin e Përgjithshëm të OKB-së edhe për tensionimin e situatës së fundit në Mitrovicë.

Në takim, Kryeministri Thaçi e falënderoi Sekretarin Ban për përkrahjen e tij personale dhe refuzimin që Kombet e Bashkuara të organizojnë zgjedhjet e Serbisë në territorin e Republikës së Kosovës, e cila tendencë jo vetëm që është në kundërshtim me Kushtetutën dhe ligjet e Kosovës, por edhe me Rezolutën 1244.

Në takim pos tjerash u bisedua edhe për dialogun teknik në mes të Kosovës dhe Serbisë, zhvillimet dhe reformat e fundit, legjislative, politike, si dhe ekonomike në Republikën e Kosovës.

Kryeministri Thaçi gjatë takimit theksoi rëndësinë e përkrahjes së Kosovës, dhe ritheksoi se vizioni i tij dhe Qeverisë së Kosovës është integrimi i Kosovës dhe i gjithë rajonit në BE dhe në NATO, si dhe në një të ardhme jo të largët Kosova të jetë edhe anëtare në OKB.

Kryeministri Thaçi në takim ka kërkuar gjithashtu mbështetjen personale të Sekretarit të Përgjithshëm që t’i mundësohet edhe Kosovës të merr pjesë në Lojërat Olimpike. 

Lexo më shumë

Kastrati: Mbroni familjet tuaja!

Të zhgënjyer me situatën e sigurisë në veriun e Mitrovicës, shqiptarët kërkojnë ndihmën e shtetit për t’u mbrojtur. Gjatë ditës së martë ata zbritën në jug dhe i kërkuan mbrojtje kryetarit të Komunës së Mitrovicës Avni Kastrati.

 Pas takimit me banorët, Kastrati zhvilloi një takim edhe me banorët e lagjes së Boshnjakëve dhe gjatë kësaj vizite ai porositi banorët që tani e tutje secili me forcat vetjake të mbrojnë familjet e tyre.

“Secili shqiptar ta mbrojë familjen e vet. Kjo nuk do të thotë që policia nuk do të ofrojë siguri, mirëpo them që secili shqiptar i veriut, që sheh ndonjë rrezik të mbrohet në formë vetjake”, deklaroi Kastrati, raporton TCH.

Situata në veri të Mitrovicës është tensionuar prej ditës së diel, kur në lagjen Tre Rrokaqiejt, në banesën e tij, u vra Selver Haradinaj, ndërkaq mbetën të plagosur bashkëshortja dhe dy fëmijët e tij. Ndërkaq të hënën serbët e veriut shkatërruan pikën statike të Policisë së Kosovës. 

Lexo më shumë

‘Dortmund-Bayern, atmosferë e Ligës së Kampionëve’

Sulmuesi i Bayern Munichut, Mario Gomez, e ka paralajmëruar skuadrën e tij para derbit ndaj Borussia Dortmundit.

Përballja më e rëndësishme e sezonit në Bundesliga ka bërë që 450.000 njerëz të kërkojnë bileta, megjithatë vetëm ata me fat do ta mbushin stadiumin Signal Iduna Park.

Mediat e citojnë Gomezin të ketë thënë se pret një atmosferë të ngjashme me ato në Ligën e Kampionëve, megjithatë ka pohuar se sfida vlen po aq sa edhe ndeshjet tjera të mbetura të sezonit.

“Duhet të fitojmë nëse duam të bëhemi kampionë. Nëse lëshojmë pikë, kjo neve nuk na konvenon”, u ka thënë sulmuesi gazetarëve. 

Lexo më shumë

Mustafi: Do t’i publikoj emrat e shantazhuesve

Prokurori Nazmi Mustafi pretendon se është i pafajshëm e i shantazhuar për shkak të katër rasteve të mëdha, të cilat ishte duke i hetuar. Në një letër drejtuar EULEX-it nga Qendra e Paraburgimit në Pejë, Mustafi ka thënë se pas rastit të tij qëndrojnë edhe figura të larta të drejtësisë kosovare.

 Edhe një javë pas arrestimit, Mustafi ende nuk është marrë në pyetje, ndërsa një seancë intervistimi është caktuar për datën 19 prill, raporton KTV.

U arrestua të hënën e shkuar dhe ende nuk është intervistuar as nga policët, as nga hetuesit e rastit. Ky përbën një problem për prokurorin Nazmi Mustafi, i cili si njohës i këtyre procedurave ka nisur disa letra në adresë të Prokurorisë së EULEX-it nga Qendra e Paraburgimit në Pejë. Në njërën prej tyre, të cilën e ka siguruar KTV-ja, prokurori Mustafi premton t’i zbulojë emrat e atyre që e shantazhuan dhe morën ryshfet në emër të tij. Ai shpreh gatishmërinë të ballafaqohet në çdo rast me secilin person apo dëshmitar dhe shprehet i interesuar ta përfundojë këtë rast sa më shpejt që është e mundshme.

“I nderuari prokuror i rastit. Jam i gatshëm në çdo kohë të ballafaqohem me çdo person – dëshmitar, me të pandehurit e tjerë të këtij rasti dhe jam i interesuar që ky rast të zgjidhet shumë shpejt e të vërtetohet gjendja faktike reale; të vërtetohet se kush janë ata persona që më kanë shantazhuar, duke marrë ryshfet në emrin tim. Kush është ai që ka dhënë ryshfet, pse nuk del para drejtësisë kur dhënia e ryshfetit është e dënueshme”.

Më tej, Mustafi pretendon se shantazhi ndaj tij po bëhet për shkak të katër rasteve të mëdha, që është duke i hetuar. “Ky është montim ndaj meje, në mënyrë që të më diskreditojnë mua dhe familjen time. Për momentin kam qenë duke hetuar 4 raste të mëdha të njerëzve që kanë shpërdoruar disa dhjetëra miliona, e të gjithë këta janë bashkëpunëtorë të personave që ma kanë kurdisur këtë montim”.

Ai thotë se njerëzit që u vunë kundër tij paragjykojnë profesionalizimin e tij. “Ata edhe çuditen se si është e mundur që një njeri i nacionalitetit boshnjak ta udhëheqë Task Forcën Anti Korrupsion.”

Në fund të letrës, Mustafi, thotë se është i pafajshëm dhe me arrestimin e tij koha do të punojë për kriminelët. “Gjendem në paraburgim, i pafajshëm, pa kurrfarë arsye se do ta humbi edhe vendin e punës, gjë që do të shkojë në favor të shumë kriminelëve që janë nëpër pozita, e të cilët kam qenë duke i hetuar dhe që janë të ndërlidhur me figura të larta në drejtësinë e Kosovës”, përfundon letra.

Prokurori Mustafi dhe Xhelal e Reshat Zherka u arrestuan të hënën e kaluar në dyshimet për shpërdorim të detyrës zyrtare dhe marrje të ryshfetit. Denoncimi erdhi nga Pashk Mirashi, ish-punonjës i BQK-së, ndaj të cilit prokuroi Mustafi ishte duke zhvilluar hetime.

Lexo më shumë

Milani nuk është në krizë

Andrea Pirlo është i vetëdijshëm për rrezikun që do të shfaqë Milani kundrejt Juventusit për titullin e Serie A deri në fund të sezonit, megjithatë ka pohuar se bardhezinjtë e kanë fatin në duart e tyre.

“Kthimi në krye mbi të gjithë është kënaqësi. Nuk kemi qenë liderë qe një kohë, por ne jemi gjithmonë të vetëdijshëm se mund të kemi sukses”.

“Tash jemi në maje, duhet të vazhdojmë të mendojmë për gjëra të mëdha dhe t’i marrim ndeshjet një nga një. Gjasat tona janë 50-50, sepse nevojitet vetëm një rrëshqitje e vogël dhe gjithçka ndryshon”.

“Nuk mendoj se Milani është në krizë. Është normale se ekziston lodhja pas Ligës së Kampionëve”.

“Ne duhet të përqendrohemi te vetvetja, sepse jemi në vend të parë dhe kemi shtatë finale para vetes”, ka thënë Pirlo për Sky Sport Italia. 

Lexo më shumë

Reja: Titullin do ta fitojë Juventusi

Trajneri i Lazios, Edy Reja, mendon se titullin e Serie A këtë sezon do ta fitojë Juventusi.

Zonja e Vjetër gjendet në maje të tabelës me një pikë më shumë se Milani, ndërsa Reja, i cili do ta sfidojë Juven të mërkurën mbrëma, mendon se Bianconerët do ta mbajnë kreun deri në fund të kampionatit.

“Duke shikuar listën e ndeshjeve, mendoj se ata (Juventusi) do të qëndrojnë aty (në vend të parë) deri në fund”.

“Duhet ta përgëzoj Conten, ai ka bërë punë të jashtëzakonshme. Antonio i ka dhënë një mentalitet të veçantë ekipit të tij, ai e ka ndërruar filozofinë e tyre dhe ka sjellë lojtarë të rinj”.

“Ata janë finalistë të Kupës së Italisë dhe gjenden në krye të kampionatit”, u ka thënë Reja gazetarëve.

Lexo më shumë

Judah: Problemi i veriut mund të zvarritet me vite

Përderisa Kosova nuk arrin t’u mbush mendjen serbëve të veriut se do të merren parasysh dhe se do të mbrohen interesat e tyre në Kosovë, kjo situatë mund të zvarritet deri në pafundësi, tha në një intervistë për Radion Evropa e Lirë, publicisti britanik Tim Judah.

 “Natyrisht se është e nevojshme një zgjidhje politike-përndryshe s’do të ketë asnjëherë ndonjë zgjidhje. Por, nuk pres që do të shohim bisedime serioze për një kohë mjaft të gjatë, meqë Serbia ka nisur tani një cikël dhe është e mundshme që Kosova të nis një cikël zgjedhor më vonë këtë vit”, tha Judah.

“Pra, është e mundshme që të mos ketë bisedime serioze deri në një të ardhme të largët, sepse kur ke cikle zgjedhore kalon disa muaj deri në formimin e qeverive të reja e kështu me radhë. Andaj, do të humbet shumë kohë dhe nuk pres që këtë vit të ndodhë ndonjë gjë në këtë drejtim”.

Judah tha se ka pasur aq shumë klasifikime të zgjidhjeve ekstreme: sipas njërit ekstrem është i nevojshëm integrimi i tërësishëm i veriut sikurse i pjesëve të tjera në Kosovë, ekstremi tjetër flet për ndarje. Pastaj, sipas tij, përmenden lloje të ndryshme të autonomive: autonomia e llojit të Republika Srpska, autonomia sipas planit Ahtisaari ose autonomia sipas Ahtisaarit në një formë tjetër.

“Ka 100 klasifikime të zgjidhjeve, por nuk pres që të ndodhë ndonjë zgjidhje. Pres që të vazhdojë gjendja aktuale do të lëkundet andej-këtej pa ndryshuar në të ardhmen e afërt. Nuk pres që të ndryshojë diçka e nëse më kontaktoni edhe pas një viti ka gjasa që situata të jetë e njëjtë”, tha Judah. 

Lexo më shumë

AGPK dënon kërcënimet dhe fyerjet ndaj ekipit të RTK-së

Asoaciacioni i Gazetarëve Profesionistë të Kosovës (AGPK) me shqetësim ka pranuar ankesën e gazetarit të RTK-së, Faton Salihu, me rastin e sjelljes arrogante, fyerjeve dhe kërcënimeve nga ana e drejtoreshës së kompanisë KPU Inspect, Lirije Karaxha-Pula, gjatë realizimit të një storie të transmetuar të hënën në RTK.

 Salihu ka njoftuar AGPK-në se Karaxha-Pula është sjellë shumë keq me ekipin e gazetarëve, kur nga ajo kanë kërkuar sqarime rreth rezultateve të një raporti të lëshuar nga kjo kompani, që ka bërë inspektimin e vajit për ngrohje. Nga analizat e fituara del se në vaj për ngrohje prania e sulfurit është 1.17 %, derisa në udhëzimin administrativ për cilësi të naftës, thuhet se vlera e lejuar është 1.0%. Përqindjen 0.17 e kanë konstatuar si matje jo e përcaktueshme.

KPU Inspect është e autorizuar nga Ministria e Tregtisë dhe Industrisë për të bërë inspektime në karburantet e lëngëta të naftës, të cilat duhet të jenë konform udhëzimit administrativ të fuqizuar nga Ministria...

Karaxha-Pula fillimisht kishte pranuar të intervistohej, por më pastaj e ka përzënë ekipin e gazetarëve nga zyra, ndërkohë që ma pas ka shkuar edhe në zyrat e RTK-së, duke kërcënuar dhe fyer recepcionisten dhe personat e sigurimit.

AGPK dënon sjelljet e tilla të znj. Karaxha-Pula, si dhe fyerjet dhe kërcënimet e saj. Duke sjellë ndërmend se publiku ka të drejtë të informohet për tema dhe probleme që ndikojnë drejtpërdrejt në jetën e tyre, AGPK bën thirrje për transparencë të zyrtarëve, kushdoqofshin ata, karshi publikut.

AGPK kërkon që gazetarët të lihen të lirë në punën e tyre dhe të mos pengohen. Po ashtu, AGPK iu bën thirrje gazetarëve që të hulumtojnë tema në interes të publikut, pavarësisht presioneve dhe pengesave në të cilat mund të hasin gjatë punës së tyre.

Lexo më shumë

Shqiptarët po protestojnë te Ura e Ibrit

Rreth 100 qytetarë shqiptarë janë duke protestuar në jug të urës së Ibrit në Mitrovicë, në shenjë revolte për ngjarjet e fundit që ndodhën në pjesën veriore të këtij qyteti, raporton KTV-ja.

 Në vendngjarje ka edhe forca të shumta të EULEX-it dhe pjesëtarë të Policisë së Kosovës, vazhdon njoftimi, i cili vazhdon se në vendin e ngjarjes ka dalë edhe drejtori i policisë për rajonin e Mitrovicës, Nehat Thaçi.

KTV-ja po ashtu thekson se Thaçi ka komunikuar me zyrtarët e EULEX-it dhe ka kërkuar që t’i largojnë makineritë e shumta nga ura. Ai u ka thënë zyrtarëve të EULEX-it se për çdo veprim duhet të konsultohen me Policinë e Kosovës.

Zyrtarët e EULEX-it kanë thënë se paraprakisht kanë marrë një informatë për mbajtjen e një proteste, dhe se kanë dalë në terren për të mbajtur situatën nën kontroll.

Lajmi për mbajtjen e protestës ka qarkulluar gjatë ditës së djeshme nëpër rrjetet sociale. Në protestën e sotme është parë edhe anëtari i Kryesisë së Vetëvendosjes, Fisnik Ismaili, njofton KTV-ja.

Ndërkohë njoftohet se policia e Kosovës ka penguar tubimin e më shumë qytetarëve, me arsyetimin, parandalim të tensionimit edhe më të madh të situatës në këtë pjesë të Kosovës. 

Lexo më shumë

Gashi kërkon nga Riadi zyrtar të lobojë për Kosovën

Gjatë qëndrimit të tij në Arabinë Saudite, më 7 dhe 8 të këtij muaji, zëvendësministri i Jashtëm i Kosovës, Ibrahim Gashi, ka kërkuar nga homologu i tij, Khalid Al Jindan, që Riadi të ndihmoj në lobimin për njohje të reja për Kosovën, nga komuniteti i shteteve arabe dhe islamike.

 Gashi, po ashtu ka kërkuar që të ketë investime nga Arabia Saudite në Kosovë, njoftoi ministria e jashtme e Kosovës.

Gjatë këtij turneu, zëvendësministri i jashtëm i Kosovës, Ibrahim Gashi, viziton edhe Egjiptin, ku do të përsërisë kërkesën e autoriteteve kosovare për ta njohur pavarësinë e Kosovës.

Lexo më shumë

Nikolic pritet ta vizitojnë Mitrovicën

Kryetari i Partisë Përparimtare Serbe, Tomislav Nikolic dhe zëvendësi i tij, Aleksandar Vucic, pritet të qëndrojnë të mërkurën në veri të Mitrovicës.

 Këtë informacion e kanë konfirmuar përfaqësues të Partisë Përparimtare Serbe në Mitrovicë.

Nikolic pritet të merr pjesë në një tubim parazgjedhor që do të mbahet në Mitrovicë të mërkurën në orën 13:00, raporton RFE

Serbia ka shpallur zgjedhjet lokale, parlamentare dhe presidenciale më 6 maj, ndërsa Nikolic, dikur zëvendës në partinë e Vojislav Sesel-it, është kandidat për president.

Ndërsa, për mbajtjen e zgjedhjeve lokale në Kosovë, pas kritikave ndërkombëtare, Serbia ka sinjalizuar se do të heqë dorë; nuk dihet nëse një gjë të tillë do ta bëjë edhe për zgjedhjet tjera, për mbajtjen e të cilave thirret në parimin e dyshtetësisë.

Lexo më shumë

Të reagojmë përpara spastrimit etnik në veri!

I shqetësuar për situatën në veri të Mitrovicës, Albin Kurti, kryetar i Lëvizjes Vetëvendosje, njëherësh deputet në Kuvendin e Republikës së Kosovës, u është drejtuar me nga një letër të posaçme liderëve të institucioneve të Kosovës, presidentes Atifete Jahjaga, kryeparlamentarit Jakup Krasniqi, si dhe presidentit të Republikës së Shqipërisë, Bamir Topi.

 “Dhuna dhe terrori ndaj shqiptarëve në veri të Mitrovicës janë intensifikuar. Pardje, me eksploziv të sofistikuar u vra Selver Haradinaj dhe u plagosën e lënduan anëtarët e familjes së tij: gruaja dhe katër fëmijët. Dje, pika statike e policisë së Kosovës që u vendos atje nuk qëndroi as pesë minuta meqë u shkatërrua nga strukturat armiqësore e kriminale të Serbisë. Nën terrorin e përditshëm, duke qenë edhe të varfër e të papunë, shqiptarët në veri të Mitrovicës sot janë njerëzit më të rrezikuar në Evropë”, thuhet në letrën që Kurti i ka dërguar Jahjagës.

“Duke u bazuar në nenin 84, pika 22, të Kushtetutës së Republikës së Kosovës, Ju mund të shpallni gjendjen e jashtëzakonshme. Si kryetar i Lëvizjes VETËVENDOSJE! dhe si deputet i Kuvendit, Ju sugjeroj që ta shpallni gjendjen e jashtëzakonshme në Mitrovicë. Pra, gjendjes që tashmë është e jashtëzakonshme, t’ia jepni të tillë edhe emrin zyrtar” thuhet ndër të tjera në letrën dërguar Jahjagës.

Në letrën dërguar kryeparlamentari Krasniqi, Kurti kërkon mbajtjen e një seance të jashtëzakonshme. “Duke marrë parasysh situatën e rënduar në veri të Mitrovicës pas sulmeve të fundit me pasoja tragjike, Lëvizja VETËVENDOSJE! ka marrë iniciativën për mbajtjen e një seance të jashtëzakonshme të Kuvendit të Kosovës, të mërkuren, më 11 prill 2012”.

“E dimë që dje dhe sot institucionet e Kosovës janë në pushim për shkak të festës së Pashkëve dhe ditës së Kushtetutës. Dhe, mund të mos jenë të rastësishme këto sulme pikërisht në ditët kur nuk punojnë institucionet. Le të mos harrojmë që shumë vrasje e masakra të forcave të Serbisë në luftën e fundit në Kosovë janë kryer në ditët e fundjavës: Abria, Reçaku, Krusha e Vogël, Theranda, Izbica, zhdukja e Ukshin Hotit etj. Njerëzit jetojnë edhe gjatë pushimeve e gjatë festave. Institucionet e Kosovës duhet të jenë përherë pranë qytetarëve e në shërbim të tyre”, i shkruan ndër të tjera Kurti kryeparlamentarit.

Ndërsa nga kryetari i Shqiprisë, Bamir Topi, lideri i Vetëvendosjes, kërkon inicimin e debati në organizata të ndryshme ndërkombëtare për të parandaluar spastrimin etnik në veri. “Siç e dini, Republika e Kosovës nuk mundet që këtë çështje ta iniciojë për diskutim në organizata apo struktura ndërkombëtare si OKB dhe NATO. Ndërsa Ju, si përfaqësuesi i Republikës së Shqipërisë dhe i shqiptarëve në OKB dhe NATO, mundeni që ta inicioni diskutimin mbi rrezikun e afërt të spastrimit etnik të shqiptarëve në Mitrovicë. Nevojitet pra, veprim politik e diplomatik kombëtar, para se përmasat e spastrimit më të ri etnik ndaj shqiptarëve në pjesën veriore të Mitrovicës, të ngjajnë me ato të viteve 1998, 1999 dhe 2000” thuhet ndër të tjera në letrën e dërguar presidentit Topi.

Lexo më shumë

UGK reagon ndaj zyrtares së MTI-së

Unioni i Gazetarëve të Kosovës (UGK) me shqetësim ka pranuar lajmin për pengimin në punë të ekipit të Radio Televizionit të Kosovës (RTK) dhe gazetarit Faton Salihu, nga ana e Lirije Karaxhës, drejtoreshë e organit inspektues “KPU Inspekt”, të Ministrisë së Tregtisë dhe Industrisë.

 Përmes një letre dërguar UGK-së, Salihu sqaron që Karaxha ka penguar në punën e ekipit të RTK-së duke mos i dhënë deklaratë zyrtare në lidhje me temën e trajtuar, por duke reaguar në mënyrë të vrazhdë dhe më pastaj duke përzënë ekipin nga zyrat e saja.

“Zonja në fjalë ka shkuar edhe në zyrat e RTK-së, duke kërcënuar dhe fyer recepsionisten dhe personat e sigurimit me fjalë tejet të vrazhda që nuk përkojnë me nivelin intelektual”, thuhet në letrën e Salihut.

UGK e konsideron të papranueshëm sjelljen e zonjës Karaxha ndaj ekipit të RTK-së dhe kërkon nga ajo që të kërkojë falje publike ndaj këtij televizioni.

Lexo më shumë

Pele: Messi fillimisht duhet të bëhet më i mirë se Neymar

Legjenda braziliane e futbollit, Pele, ka vazhduar me ‘xhelozinë’ e tij kundrejt futbollistit më të mirë në botë aktualisht, Lionel Messi, duke e konsideruar atë prapa sulmuesit të Santosit, Neymar.

“Tash të gjithë po flasin për Messin, ai është një yll. Mirëpo, (për t’u bërë më i miri i të gjitha kohërave) ai njëherë duhet të bëhet më i mirë se Neymar”.

“Për momentin, Messi thjesht ka më shumë përvojë”, ka deklaruar Pele. 

Lexo më shumë

Supergoli i Shaqirit, gati dy milionë shikime (Video)

Mesfushori shqiptar, Xherdan Shaqiri, të shtunën shënoi një supergol në barazimin prej 1-1 ndaj Luzernit.

Lojtari i Bayern Munichut, i cili po zhvillon ndeshjet e tij të fundit me Baselin, ka pranuar një harkim të mirë në zonë, për të shënuar në mënyrë akrobatike.

Goli i tij duket se është pëlqyer shumë nga futbolldashësit, pasi që vetëm për pak ditë është shikuar nga gati dy milionë njerëz në YouTube.

Lexo më shumë

Hitzfeld: Bayerni do ta fitojë titullin

Borussia Dortmundi dhe Bayern Munichu do të luajnë baras të mërkurën mbrëma, mirëpo bavarezët do ta fitojnë titullin e Bundesligas në fund të sezonit. Kështu mendon Ottmar Hitzfeld.

Kampioni i Gjermanisë në fuqi gjendet tre pikë përpara Bayernit, ndërsa trajneri që i ka drejtuar të dyja klubet është i mendimit se bavarezët po kalojnë një formë të shkëlqyer, prandaj janë ata që do të shpallen kampionë.

Hitzfeld ka thënë për Spox.com se Bayerni nuk guxon ta humbë këtë ndeshje dhe se nuk lejohen humbje pikësh në këtë fundsezoni.

“Bavarezët kanë më shumë për të humbur. Një tjetër vit pa titull kampionati do të ishte katastrofë për Munichun”, ka deklaruar trajneri i Zvicrës, duke shtuar se Bayerni mund t’i fitojë të tre titujt këtë sezon (Bundesligan, DFB-Pokal dhe Ligën e Kampionëve). 

Lexo më shumë

Qetësi e brishtë në Mitrovicë

Pas vlerësimeve të situatës dhe shqyrtimit të mundësive për ndonjë eskalim eventual, autoritetet e rendit në Mitrovicë do të marrin vendimin për vendosjen e sërishme ose jo të një kontejneri në lagjen e “Tre Rrokaqiejve”, thonë zyrtarët e Policisë së Kosovës.

Bëhet e ditur se policia vazhdon të jetë e pranishme 24 orë në lagjen e "Tre Rrokaqiejve", si dhe në lagjet e tjera ku ka banorë të komuniteteve të ndryshme, shkruan Evropa e Lirë.

“Urdhri është për vendosjen e pikave statike dhe pikat statike janë. Për rivendosje të një kontejneri ose të një shtëpize të tillë, duhet të bëhet rivlerësimi i situatës, nëse një gjë e tillë mund të gjenerojë një problem më të madh. Mirëpo, me rendësi është që pika statike të jetë aty”, thotë zëdhënësi i policisë për rajonin e Mitrovicës, Besim Hoti.

Njëri nga përfaqësuesit e serbëve në veri të Mitrovicës, Marko Jakshic, ka deklaruar se komuniteti serb në veri nuk ka asgjë kundër që në atë pjesë të vendosen kontejnerët e policisë, por sipas tij, serbët kërkojnë që aty të jenë të pranishëm policët e stacionit verior të policisë.

Por, të martën, sipas zëdhënësit Besim Hoti, në lagjen e “Tre Rrokaqiejve” janë duke qëndruar policet e stacionit policor të veriut.

“Janë kryesisht personel i stacionit policor në veri të mbështetur edhe nga pjesëtarë të policisë nga stacioni në jug”, bëri të ditur Hoti.

Nga ana tjetër, njohësit e rrethanave të sigurisë, gjendjen në veri të Kosovës e shohin si tejet të tensionuar.

Eksperti për çështje ushtarake dhe të sigurisë, Ramadan Qehaja, tha se në bashkëpunim me komponentin e policisë së EUELX-it dhe KFOR-in, autoritetet e rendit duhet të ndërmarrin veprime për një siguri më të madhe në veri të Kosovës.

Qehaja kritikoi institucionet përgjegjëse për veprimet e paanalizuara mirë, para se ato të ndërmerreshin.

“Të ndërmerret një aksion i tillë në këtë situatë të tensionuar është dashur që shumë anshmërisht të vlerësohet situata. Unë mendoj që ky aksion është i dështuar dhe nuk do të ketë rezultate. Kur të fillojmë të ndërmarrim një aksion, duhet të shkohet deri në fund. Kjo neve na ka kushtuar, fillo zmbrapsu. Kjo nuk është në rregull”, theksoi Qehaja.

Ai ka shprehur shqetësimin e tij që autoritetet e rendit kanë lejuar mundësinë që në lagjet e banuar me popullatë të përzier, të veprojnë vetëm policët e stacionit policor të veriut, ashtu siç kanë kërkuar përfaqësuesit e serbeve.

“Ajo polici, e cila quhet Polici e Kosovës, nuk po i kryen detyrat siç duhet. Ajo nuk i përgjigjet domosdoshmërish zinxhirit komandues të shtabit regjional të Mitrovicës. Për serbët atje është me rendësi të jetë një polic serb i asaj ane atje, sepse ai do të jetë më tolerant. Nuk munden ata të diktojnë që Republika e Kosovë kë do ta dërgojë atje që t’i kryejë detyrat e policisë”, u shpreh Qehaja.

Natën mes së shtunës dhe të dielës ka ndodhur një shpërthim në një banesë në afërsi të "Tre Rrokaqiejeve", nga i cili ka mbetur i vdekur 38 vjeçari Selver Haradinaj, dhe janë plagosur 5 anëtarët e familjes së tij.

Autoritetet në vend këtë sulm e kanë cilësuar si akt terrorist.

Ndryshe, zyrtarët e Policisë së Kosovës bëjnë të ditur se nata e mbrëmshme në veri të Mitrovicës ka qenë e qetë dhe nuk është raportuar ndonjë incident.

Lexo më shumë

Scholes të vazhdojë edhe një vit

Mesfushori i Manchester Unitedit, Paul Scholes, duket se ka vendosur ta pranojë ofertën e Sir Alex Ferguson për të qëndruar edhe një vit në Old Trafford.

Veterani u kthye te Djajtë e Kuq në janar dhe që nga ajo kohë, United ka humbur vetëm dy pikë në 12 ndeshje dh kjo ka bërë që ata të jenë shumë pranë që të shpallen kampionë të Anglisë.

Sipas The Times, anglezi është i gatshëm që ta pranojë ofertën e Ferguson për të vazhduar edhe një vit në mesfushën e Manchester Unitedit.

Lexo më shumë

Lampard: Barazimi ndaj Fulhamit, si humbje

helsea humbi një rast të mirë për pozitën e katërt në tabelë me barazimin ndaj Fulhamit- ka deklaruar mesfushori Frank Lampard.

Anglezi realizoi golin e 150-të në karrierë në Ligën Premier nga penaltia, mirëpo në fund të ndeshjes Clint Dempsey ua mohoi Bluve fitoren.

“Është një shans i madh i humbur, duke parë rezultatin e Tottenhamit (që humbi nga Norwichi) ne e dinim se mund ta ngushtonim diferencën”.

“Ishte vështirë, duket si humbje, ky nuk është mosrespekt ndaj Fulhamit, mirëpo ne e patëm një administrim të ndeshjes dhe i lejuam ata që të ktheheshin në lojë”, ka thënë Lampard. 

Lexo më shumë

Juve krenar që është rival i Milanit

Trajneri i Juventusit, Antonio Conte, ka deklaruar se Bianconerët janë krenarë që e rivalizojnë Milanin për titullin e kampionit të Italisë këtë sezon.

Zonja e Vjetër ende nuk ka regjistruar asnjë humbje këtë sezon, ndërsa gjatë gjithë rrjedhës së tij ka konkurruar me Rossonerët për pozitën e parë. Aktualisht, kreun e mban Juventusi me një pikë më shumë se Milani.

“Jemi krenarë që jemi rivalë të Milanit, duke pasuar parasysh se nga filluam”.

“Ky vit i jashtëzakonshëm ka ardhur falë angazhimit të madh të lojtarëve të mi që nga fillimi i sezonit”, u ka thënë Conte gazetarëve.

Këtë mesjavë, Juventusi është nikoqir i Lazios në Torino. 

Lexo më shumë

FDH: Të zbardhen rastet e incidenteve ndëretnike

Fondi për të Drejtën Humanitare Kosovë ka shpreh shqetësim ndaj rritjes së numrit të incidenteve ndëretnike të cilat kanë ndodhur javëve të kaluara në Kosovë.

“Akti i fundit kriminal ndodhi në veri të Mitrovicës në lagjen te ‘Tre rrokaqiejt’ që rezultoi me vrasjen e Selver Haradinajt dhe lëndimin e tre anëtarëve të familjes së tij. Vrasja e Slever Haradinajt është kulmi në ciklin e ushtrimit të dhunës së motivuar etnikisht në këtë pjesë të Kosovës kohëve të fundit. Sulmet fizike, përcjellja nga grupet kriminale, frika për të lëvizur lirshëm është shndërruar në përditshmëri”, thuhet në reagimin e Fondit për të Drejtën Humanitare Kosovë.

FDH në Kosovë, dënon gjithashtu sulmin fizik ndaj Vladimir Denovic, nga Suhodolli i Mitrovicës, i sulmuar nga tre persona identiteti i të cilëve ende mbetet i panjohur për Policinë e Kosovës.

Vladimir Denovic ka pësuar lëndime të rënda trupore. Sipas viktimës, në mbrëmjen e 8 prillit duke u kthyer në shtëpi është ndaluar dhe sulmuar nga tre persona të nacionalitetit shqiptar.

“....Fondi për të Drejtën Humanitare Kosovë apelon tek organet e rendit dhe ndjekjes që të ndërmarrin të gjitha veprimet që janë në përputhje me kompetencat e tyre në mënyrë që kryerësit e këtyre veprave të shëmtuara të arrestohen, të dorëzohen para organeve të drejtësisë dhe të marrin dënimin e merituar”, thuhet në reagimin e FDH-së. 

Lexo më shumë

Juventusi pas Seedorf?

Juventusi raportohet se është duke menduar të transferojë mesfushorin e Milanit, Clarence Seedorf, shkruan La Gazzetta dello Sport.

Zonja e Vjetër dëshiron të shtojë më shumë përvojë në skuadër derisa përgatitet për Ligën e Kampionëve në sezonin e ardhshëm dhe beson se 36-vjeçari, i cili ka fituar garën evropiane katër herë, është një shtesë e përkryer në mesfushë.

Veterani holandez ka një kontratë që skadon me Rossonerët, dhe Milani është i gatshëm ta lejojë atë të largohet në fund të sezonit.

Seedorf po ashtu është lidhur me një transferim në kampionatin amerikan dhe atë brazilian, por as një transferim te Juventusi nuk përjashtohet, ku ai do të ribashkohej me ish-shokun e skuadrës, Andrea Pirlo. 

Lexo më shumë

Casillas: Të mendojmë vetëm për Atleticon

Portieri i Real Madridit, Iker Casillas, ka porositur bashkëlojtarët e tij të mos shikojnë përtej, por të foskuohen në ndeshjen e të mërkurës ndaj Atletico Madrid.

“Ne duhet të mendojmë për të fituar kundër Atleticos me qëllim që të kemi shanse ta fitojmë titullin. Ata janë të etur të na mposhtin neve çdo vit, por ne jemi të qëndrueshëm në udhëtim. Derbi do të jetë një ndeshje e shkëlqyeshme”.

“Ata mund të kenë ca ngritje e zbritje në La Liga, por ata në përgjithësi po përmirësohen. Vetëm shikoni sa larg kanë shkuar ata në Europa League”.

“Ata mezi e presin ndeshjen pasi vërtet duan ta mposhtin Real Madridin. Ata kanë një prekje të mirë të topit dhe dinë çfarë duhet të bëjnë. Për më tepër, ju duhet të merrni parasysh shtytjen e tyre, faktin se ata janë nikoqir të ndeshjes si dhe publikun”, ka thënë Casillas.

Lexo më shumë

Këngëtari Tom Cruise

Ndoshta mund të jetë pak e besueshme, por Tom Cruise është një këngëtar serioz.

Aktori, i cili luan frontmenin e një rok-grupin në komedinë-muzikore “Rock of Ages”, ka talent këndimi.

Ylli i filmave aksion raportohet se është joshur aq shumë nga këndimi për filmin e ardhshëm të tij dhe tash e ka të vështirë të ndalojë.

“Tom ka punuar shumë në këndimin e tij për këtë film pasi, si në skenat aksion, ai gjithmonë dëshiron të japë gjithçka nga vetja”.

“Ai ka vazhduar të këndojë dhe tash është duke menduar për një karrierë në muzikë. Katie (Holmes, bashkëshortja e Tom) është duke e inkurajuar atë dhe Tom Cruise mund të nxjerrë një album shumë shpejt”, ka thënë burimi.

Lexo më shumë

Edhe serbët "e duan" kosovaren Rita Ora

Këngëtarja kosovare Rita Ora, e cila për pak kohë të shkurtër bëri famë pothuajse në gjithë botën, e admiruar dhe e përkrahur nga shqiptarët, kohëve të fundit është përkrahur jashtëzakonisht shumë edhe nga portalet serbe.

Portale të ndryshme serbe vazhdojnë të shkruajnë pa ndalë për kosovaren. "Vajza londineze nga Kosova",nisin shkrimet për këngëtaren e cila kohëve të fundit është duke u krahasuar si Rihanna e ardhshme.

Portali serb "B-Turn", i cili i kushtohet kulturës ballkanike në përgjithësi, mes shumë artikujve për artistë të ndryshëm evropianë,është shkruar edhe për bukuroshen Rita Ora.

"Hot right now" ka pushtuar toplistat dhe Rita po zbardh fytyrën e Kosovës. "Rita, Kosova ka nevojë për ty dhe muzikën tënde", lexohej midis rreshtash në artikullin e fundit për Orën, duke shtuar në fund edhe pjesë nga intervistat e ndryshme të Ritës, ku ajo tregon se gjithçka që e bën, e bën "për familjen dhe shtetin tim, Kosovën".

Pas nuk ka mbetur as portali tjetër kulturor serb "Seecult". Portali në të cilin raportohet edhe nga ngjarjet kulturore kosovare dhe ku mund të gjesh artistë nga mbarë Evropa të profilizuar e intervistuar, ka sjellë po ashtu lajmin për Orën dhe pjesëmarrjen e saj në fushatën "VEVO lift UK" ku Rita Ora ka lançuar një video në "Youtube" me titullin "Becoming Rita Ora" (Të bëhesh Rita Ora).

"Seecult" i cili menaxhohet nga vetë Ministria serbe e Kulturës dhe përditësohet shumë shpesh me lajme të reja, tregon se në këtë video kosovarja paraqitet e thjeshtë, pozitive, gjithmonë duke treguar se ndihet e bekuar që vjen nga Kosova.

Lajmi tregon edhe për videoklipin e ri të Orës "R.I.P", ndërsa komplimentet vijnë edhe nga komentuesit serbë, disa prej tyre duke e quajtur Orën si Gwen Stefani e ardhshme, apo "vajza ndryshe, me stil urban". 

Lexo më shumë

DJ Protone, premton vit të ngjeshur

Dj Protone është Dj nga Lugina e Preshevës, i cili i është bashkuar estradës kosovarë në muzikën elektro –house, është duke punuar pa pushim në aktivitetet e tij muzikore.

Dj Protone, i cili ka filluar të merret me muzikë që nga mosha e re, këto ditë përveç që është i angazhuar në klube të natës në Kosovë, ai këtë vit është i angazhuar edhe jashtë Kosovës.

Gjatë një prononcimi për Telegrafi, ai ka pohuar se këtë vit është i angazhuar me koncerte në Ballkan dhe në disa vende të Evropës.

Dj Protone, i cili njihet për muzikën e tij të zhanrit ‘house’, gjithashtu ka shtuar se ka provuar edhe zhanre të tjera të muzikës, por në këtë zhanër ai gjen vetën më shumë.

Protone këtë vit pritet të sjellë edhe shumë remix-e të reja, që shpreson që do të pëlqehen nga publiku.

Lexo më shumë

Videothirrjet në Firefox

Pasi që shumicën e kohës së kaluar pranë kompjuterit e kalojmë duke përdorur shfletuesin e internetit, në Mozilla e gjetën të arsyeshme të përfshijnë mundësinë e bërjes së video-thirrjeve.

Në konferencën IETF 83 në Paris Mozilla demonstroi implementimin e WebRTC – një komponentë kjo e HTML5 e cila mundëson video dhe audio thirrjet, dhe shkëmbimin e fajllave. Për paraqitje në sistem përdoret Social API i Mozillas, e për ndryshim nga ueb zgjidhjet e ngjashme, sistemi për video-thirrje të cilin e demonstroi Mozilla nuk kërkon kurrfarë plug-in shtesë.

Ende nuk është përcaktuar nëse mundësia e kryerjes së video-thirrjeve do të përfshihet në ndonjërin nga versionet e ardhshme të Firefoxit. Edhe lojtarët e tjerë të mëdhenj në këtë fushë, e ata janë Microsoft, Google dhe Opera, kanë shprehur përkrahjen për standardin WebRTC. 

Lexo më shumë

Lewandowski: Kujdes nga Robben e Ribery

Sulmuesi i Dortmund, Robert Lewandowski, ka paralajmëruar bashkëlojtarët e tij për rrezikun që paraqesin Arjen Robben dhe Franck Ribery.

Dy skuadrat e kreut të Bundesligës do të takohen të mërkurën në derbin e javës në kampionatin gjerman që mund të vendosë edhe fatin e kampionit të ri, dhe sulmuesi i Borussia ka veçuar lojtarët më të rrezikshëm të Bayernit.

“Ribery dhe Robben të dy janë lojtarë shumë të rrezikshëm të klasit botëror. Ne duhet t’u kushtojmë kujdes atyre, veçanërisht gjatë lojës në krah”, ka thënë Lewandowski për Goal.

Derbi i Bundesligës zhvillohet të mërkurën në Signal Iduna Park me fillim nga ora 20. 

Lexo më shumë

Diego: Reali nuk është i pamposhtshëm

Diego thotë se Atletico Madridi do të kërkojë të thyejë serinë negative të rezultateve përballë rivalit lokal Real Madridit, kur dy skuadrat do të takohen të mërkurën në Vicente Calderon.

Los Blancos nuk janë mposhtur nga Atletico në 13 vite, derisa janë në periudhën vendimtare në garën për titull, me aktualisht katër pikë para Barcelonës në maje të tabelës.

“Ne do të përballemi me skuadrën më të mirë në ligë, por ne do të kërkojmë fitore dhe do të shohim çfarë do të ndodhë”.

“Madrid nuk është i paprekshëm, por ata janë liderë dhe ju duhet t’i respektoni. Por ne nuk duhet të harrojmë se jemi në shtëpi dhe kjo duhet të na motivojë neve”.

“Është e qartë se të shkojë kaq gjatë pa e mposhtur Madridin nuk është normale, por ne nuk jemi të obsesinuar me këtë. Ne jemi shumë të motivuar dhe shpresojmë t’i japim fund kësaj”, ka thënë Diego.

Lexo më shumë

Prandelli i impresionuar nga Stramaccioni

Trajneri i Italisë, Cesare Prandelli, është i impresionuar nga menaxheri i ri i Interit, Andrea Stramaccioni, i cili ka nxjerrë një fitore dhe një barazim në dy ndeshjet e tij të para me Nerazzurrët.

“Do t’i jap komplimente Stramaccionit [kur të takohem me të] pasi ai nuk ka ndryshuar. Ai e transmeton entuziazmin dhe vetëbesimin me saktësi, pasi ai ka mbetur vetja. Vërtet duhet t’i shpreh atij urimet e mia më të sinqerta”.

“Përveç motit... atmosfera këtu është ok, me shumë entuziazëm nga lojtarët. Kjo është ajo çfarë gjithmonë duhet të jetë e pranishme në një skuadër futbolli dhe kjo është ajo që unë po shot sot këtu”, ka thënë Prandelli për faqen zyrtare të Interit.

Lexo më shumë

Shqiptarët në veri po bëjnë gati valixhet

Një ndjenjë e thellë e pasigurisë ka prekur shqiptarët të cilët jetojnë në lagjen e Tre Rrokaqiejve në veri të Mitrovicës.

Të lodhur nga shqetësimet dhe kërcënimet e vazhdueshme, vrasja e fqinjit duket se i dha fund durimit dhe pritjes se një ditë do të bëhet më mirë.

Banorët, kryesisht gratë dhe fëmijët, janë parë me valixhe në duar duke u larguar nga shtëpitë e tyre.

Shqiptarët, shumica e të cilëve jetojnë prapa dyerve të blinduara, thonë se kanë para vetes vetëm dy zgjidhje, mbrojtjen e pragut të shtëpisë ose braktisjen e saj njëherë e përgjithmonë.

Se këtu mbretëron urrejtja ndëretnike e tregojnë edhe muret e shkarravitura me mbishkrime nacionaliste kryesisht serbe e po kështu edhe xhamat e thyer në po thuaj secilin kat të ndërtesë, njofton TCH.

Vetëm dy pjesëtarë policie janë parë duke patrulluar në këtë zonë të nxehtë. Ndërsa ka munguar tërësisht prezenca e KFOR-it dhe policisë së EULEX-it.

Lexo më shumë

Hyseni: ‘3-përqindëshi’ vetëm zhurmë!

Ish ministri i Punëve të Jashtme, Skender Hyseni nuk tërhiqet nga pretendimi se dialogu me Serbinë po i ngadalëson njohjet.

Për ish-ministrin e Jashtëm, marrëveshja e fundit për përfaqësimin rajonal të Kosovës, do të shkaktojë shumë amulli tek vendet që kanë hamendje për ta njohur apo jo shtetin e pavarur të Kosovës.

Hyseni ka thënë në një intervistë për “Tribuna Shqiptare”, se rreziku nuk qëndron aq shumë te zhvillimi i dialogut, por më shumë te paaftësia e kësaj Qeverie dhe gatishmëria e pashpjegueshme për të lëshuar pe për shumë çështje të rëndësishme. Ai thotë se Serbia po e shfrytëzon këtë.

Ndërkohë, Hyseni thotë se LDK-ja nuk është e ndarë në krahun e Isa Mustafës dhe krahun e Fatmir Sejdiut. Akuzat dhe kundërakuzat rreth fondit të 3 përqindëshit i quan zhurmë politike. 

Lexo më shumë

Thaçi e quan akt terrorist vrasjen në veri

Kryeministri i Kosovës, Hashim Thaçi në një fjalim që ka mbajtur në Universitetin Denver, në shtetin Colorado ka thënë se mbështetja dhe udhëheqja amerikane është e domosdoshme për të siguruar tolerancën, drejtësinë dhe demokracinë, ndërsa duke folur për ngjarjet e fundit në veri e ka quajtur akt terrorist vrasjen e Selver Haradinaj.

Duke folur para studentëve të këtij universiteti në SHBA, Thaçi deklaroi se dy ditë para nisjes për në Shtetet e Bashkuara ngjarjet në vendlindje ia përkujtuan brishtësinë e paqes.

“Dy ditë para nisjes për Shtetet e Bashkuara, ngjarjet në vendlindjen time ma përkujtuan brishtësinë e paqes, që po e lija pas. Në një demonstrim të inatit ballkanik, dy pjesëtarë të policisë së Kosovës u kidnapuan nga xhandarmeria e Serbisë, derisa bënin patrullimin e rregullt përgjatë vijës kufitare. Fotografitë e tyre, të shtrirë përtokë u shpërndanë anekënd rajonit derisa Qeveria serbe krekosej me aftësinë e policisë së saj. Policët tani janë liruar, ndërkohë që retorika e ndërsjellë kërcënuese sot jehon përgjatë opinionit publik të rajonit”, ka thënë Thaçi.

Ai po ashtu ka përmendur vrasjen e Selver Haradinajt në pjesën veriore, duke e cilësuar si një akt terrorist, pikërisht për shkak të mungesës së sundimit të ligjit në atë pjesë.

Thaçi më tej shprehet se ndër arsyet kryesore për vizitën e tij në SHBA është pikërisht përpjekja për të vazhduar kërkimin e gjetjes së zgjidhjeve për maratonën e problemeve, që e rrethojnë Kosovën.

“Megjithatë, Kosova vazhdon të ballafaqohet me shumë sfida: të ardhurat për kokë banori janë ende më të ulëtat në rajon, norma e papunësisë është relativisht e lartë dhe ka varësi të lartë nga importi. Mirëpo, Qeveria është e përkushtuar të ballafaqohet me këto sfida me seriozitetin më madh. Si kurdoherë më parë, përkrahja dhe udhëheqja e fuqishme amerikane është e domosdoshme për ta ndihmuar rajonin në tejkalimin e dallimeve të ndërsjella. Është e domosdoshme për t’i siguruar banorët dhe popujt e tij në përfitimet zhvillimore, që mundësohen nga arsyeja, toleranca, drejtësia dhe demokracia”, ka thënë Thaçi para studentëve.

Ai ka deklaruar se sikur në procesin e Rambujesë, 13 vjet më herët, ashtu edhe në takimet e Brukselit, udhëheqja shtetërore e Kosovës dëshmon gatishmërinë e vet që t’i pranojë vendimet sfiduese të së sotmes për hir të lehtësimit të jetës së nesërme.

“Mbi të gjitha, kosovarët e kanë kuptuar se anëtarësimi në familjet e mëdha demokratike nuk mund të bëhet përmes pengimit të zhvillimit të tjetrit. Personalisht jam thellësisht i bindur se i gjithë rajoni do të humb, nëse portën e hapur të Bashkimit Evropian përpiqet ta mbyllë pas vete, për të tjerët. Veprimet e tilla janë fundamentalisht kundër-produktive dhe kundër-evropiane”, u shpreh ndër të tjera Thaçi.

Pas Denverit, kryeministri i Kosovës do të vazhdojë vizitën e tij në New York, ku në selinë e organizatës botërore pritet të takohet me Sekretarin e Përgjithshëm të Kombeve të Bashkuara, Ban ki-Moon. 

Lexo më shumë

Hapet ankandi i dytë i Letrave me Vlerë

Ministria e Financave (MF), përkatësisht Departamenti i Thesarit ka hapur ankandit e dytë për ofrimin e ofertave për Letra me Vlerë. Edhe ky sikur ankandi i parë do të jetë në shumë prej 10 milionë eurove.

Nëpërmjet letrave me vlerë Qeveria e Kosovës po mundohet që të mbledhë sa më shumë mjetë financiare.

Këshilltari në Ministrinë e Financave (MF), Menderes Ibra, tha për Telegrafin, se edhe në këtë ankand në bazë të rregulloreve ankandet e Letrave me Vlerë kryesisht u dedikohen bankave. Sipas tij, ato mund të ofertojnë në emër të klientëve të tyre.

“Gjatë këtij vitit Qeveria e Kosovës ka planifikuar të grumbullojë 74 milionë euro nga Letrat me Vlerë”, thotë Ibra.

Ankandi i dytë i Letrave me Vlerë do të jetë i hapur deri më 17 prill në ora 11.
 

Lexo më shumë

Bernanke: Bankat ta rrisin kapitalin

Kreu i Rezervës Federale, Ben Bernanke deklaroi në një fjalim se bankat duhet të rrisin më shumë kapital mbështetës për të garantuar qëndrueshmërinë e sistemit financiar. Ai tha se rregullatorët e industrisë financiare po kryejnë më shumë veprime për të detyruar lojtarët e këtij tregu të rrisin kapitalin mbështetës, pavarësisht se po lejojnë që zbatimi i rregullave të kryhet për një periudhë të gjatë kohore në mënyrë që të mos shkaktohen çrregullime në tregun financiar.

"Bota ka nevojë për banka me më shumë kapital, dhe kjo garantohet nga rregullat e Basel III. Kapitali është thelbi i një sistemi financiar të qëndrueshëm”, tha ai duke ju përgjigjur një pyetje në një konferencë të organizuar nga rezerva federale e qytetit të Atalanta. Kjo deklaratë i referohet përpjekjeve ndërkombëtare për të shtuar monitorimin e sistemit bankar.

Deklarata e tij u krye në të njëjtën ditë kur grupimi më i madh i lobimit bankar, Instituti për Financa Ndërkombëtare, u bëri thirrje politikë-bërësve globalë të ndalin ritmin e zbatimit të rregullave të reja për industrinë. Në një letër drejtuar guvernatorëve të bankave qendrore dhe ministrave të financave, Instituti për Financa Ndërkombëtare ka argumentuar se shtrëngimi i standardeve për kapitalin, kërkesat e reja për likuiditetin dhe rregullat që kufizojnë aktivitetin, të gjitha bashkë ulin aftësinë e bankave për të kredituar biznesin dhe familjarët në nivelet që kërkojnë qytetarët për të garantuar rritje të ekonomisë.
Tema nëse bankat kanë kapital të mjaftueshëm për tu mbrojtur kundrejt humbjeve të mundshme ka qenë një burim fërkimesh mes palëve në 4 vitet e fundit. Thirrja gjatë fundit të verës së kaluar, që bëri kreu i Fondit Monetar Ndërkombëtar, për nevojë e rritjes së kapitalit me 200 miliardë euro nga bankat tregtare të eurozonës, u kundërshtua me shumë forcë nga politikanët në Bashkimin Europian.

Bernanke tha se ekonomia amerikane ende nuk është rikuperuar nga efektet e krizës financiare të vjeshtës së vitit 2008, dhe tha se rregullatorët duhet të vijojnë të punojnë më shumë për të gjetur forma që garantojnë forcimin e sistemit bankar. "Kostoja e rëndë humane dhe ekonomike e krizës, nënvizon rëndësinë e ndërmarrjes së të gjitha hapave të nevojshme për të garantuar shmangien e ngjarjeve që kaluam në këto vite," tha Bernanke.

Lexo më shumë

Shahini: Të shpallen bizneset pro serbe

Fajtor për importin e disa produkteve nga Serbia me mbishkrimin KOSOVO/UNMIK, thotë se janë edhe bizneset vendore që importojnë këto produkte nga Serbia, pasi përmes këtij veprimi sipas tij, po pranojnë që të ia humbin identitetin shtetit për përfitime personale.

Thotë se Qeveria e Kosovës e ka mbështetjen e Aleancës Kosovare të Bizneseve (AKB) dhe shumicës se qytetarëve që të merr menjëherë vendim t’i ndalojë dhe t’i largojë nga tregu këto produkte edhe bizneset që importojnë këto produkte t’i shpall si biznese pro Serbisë.

Kryetari i AKB-së, Agim Shahini në një intervistë për “Tribuna Shqiptare”, premton se edhe AKB-ja vetë do t’i shpall ato biznese që janë kundër parimeve të shtetësisë së Kosovës. 

Lexo më shumë

Pirlo ka ftuar Nestan te Juve?

Andrea Pirlo thotë se ai ka biseduar me ish-bashkëlojtarin e tij te Milani, Alessandro Nesta, për një transferim të këtij të fundit te Juventusi.

Kontrata e mbrojtësit 36-vjeçar në San Siro do të skadojë në fund të kësaj vere dhe mediat italiane kanë sugjeruar se ai mund të ndjekë hapat e Pirlos dhe t’i bashkohet atij te Zonja e Vjetër si transferim i lirë.

“Po, kam diskutuar një opsion të tillë me Nestan, por ka edhe gjëra personale. Ai luan për një skuadër të madhe dhe është i lirë të zgjedhë çfarë vendimi do të marrë. Do të shohim çfarë do të ndodhë në fund të sezonit”, ka thënë Pirlo për Sky Sport Italia. 

Lexo më shumë

NBA: Thunder rikthejnë kreun

Oklahoma City Thunder janë rikthyer në maje të Konferencës Perëndimore pas fitores së thellë 109-89 ndaj Milwaukee Bucks.

Rusell Westbrook shënoi 26 pikë për Oklahoma Cityn (42 fitore dhe 15 disfata), ndërsa Kevin Durant kontribuoi me 19 pikë.

Në anën tjetër, kandidati tjetër për kreun, San Antonio Spurs, mbrëmë u mposht nga Utah Jazz me rezultat 91-84, pasi trajneri vendosi t’i pushojë veteranët si Tim Duncan, Tony Parker dhe Manu Ginobili.

Thunder kishim kryesimin për shumicën e sezonit por seria prej 11 fitore radhazi e San Antonio Spurs i rrëzoi ata nga kreu për disa ditë. Sidoqoftë, fitorja e Thunder ndaj Milwaukee dhe disfata e fundit e Spurs ndaj Utah Jazz, riktheu gjendjen e mëhershme të tabelës.

Lexo më shumë

Jol: Ndaj Chelseat merituam fitore

Menaxheri i Fulhamit, Martin Jol, beson se skuadra e tij ishte e pafat që nuk nxori pikë të plota në barazimin 1-1 ndaj rivalit londinez, Chelseat.

“A merituam të fitojmë? Mendoj se po. Ishte ndeshja jonë e dytë në disa ditë, ata bënë gjashtë ndryshime dhe ne bëmë dy. Në pjesën e parë ne u shkaktuam probleme të vërteta atyre. Vendimi për penalti ishte i butë dhe erdhi në kohë të keqe. Ne gjithmonë besuam dhe luajtëm mirë”.

“Ne kemi dy barazime të mira kundër tyre në stil të njëjtë dhe ne bëmë të njëjtën gjë sot. Ne treguam një karakter shumë të mirë”.

“Nëse shikoni në kualitetet që ata kanë, ata duhej të fitonin. Duke marrë parasysh situatën, kjo ishte një urgjencë reale. Mendoj se ne i ndaluar ata por duhej të krijonim më shumë shanse në ballë të golit”, ka thënë Jol. /

Lexo më shumë

Longoria beson të dashuri

Aktorja e Hollywoodit, Eva Longoria nuk ka hequr dorë nga dashuria.

Ylli i serisë “Desperate Housewives”, e cila vitin e kaluar u divorcua nga ish-burri, basketbollisti Tony Parker, dhe së fundi u nda edhe nga i dashuri Eduardo Cruz, thotë se ajo ende është një person romantik.

“Vërtet nuk kam një filozofi të dashurisë. Por jam një romantike e pashpresë. Më pëlqen sensi i mirë i humorit. Jam një feministe. Dhe kjo nuk shkon mirë me mua”, ka thënë Longoria.

Lexo më shumë

Shkon Jack Tramiel

Të dielën në moshën 83-vjeçare ndërroi jetë Jack Tramiel, themeluesi i kompania Commodore dhe CEO i Atari Corporation. Jack është lindur në Poloni ku ka kaluar nëpër ferrin e Luftës së dytë botërore dhe Auschwitzit, e më 1947 pati emigruar në SHBA.

Atje më 1953 themeloi kompaninë Commodore Portable Typewriter për kompletimin, shitjen dhe servisimin e makinave të shkrimit. Afarizmin më vonë e zgjeroi në kalkulatorë, e kompania më 1962 doli edhe në bursë. Në biznesin me kompjuterët Commodore u fut më 1977 me paraqitjen e modelit Commodore PET, e në fillim të vitit 1982 në treg arrin kompjuteri më i njohur i kompanisë Commodore 64.

Pas largimit të shkurtë nga industria, Jack kthehet në skenë në qershorin e vitit 1984 kur me mikun e tij Tramel Technology blen departamentin consumer të Atarit nga Warner Communication – Atari Inc. Nolan Bushnella që pati falimentuar pas shkatërrimit të tregut të lojërave në SHBA më 1983. Tramel Technology ndryshon emrin në Atari Corporation, e Jack qysh kah fundi i viteve të 80-ta tërhiqet nga menaxhimi dhe emëron djalin e tij Sam president dhe CEO të kompanisë. Tramiel më 1996 shet Atari Corporation prodhuesit të disqeve JTS Corporation.

Jack gjithmonë thoshte se kompjuterët “duhet të jenë për masat, e jo për klasat”, që edhe e dëshmoi me sistemet e veta Commodore dhe Amiga të cilat për një numër të madh të njerëzve ishin kontakti i parë me kompjuterët, programimin dhe lojërat. 

Lexo më shumë

Ivanovic: KFOR-i mos të fshihet

Trupat paqeruajtëse të KFOR-it duhet të stacionohen në lagjet e Mitrovicës ku janë të theksuara tensionet ndëretnike, ka thënë Oliver Ivanovic për “Tribuna Shqiptare”.

I ashtuquajturi sekretar për Kosovën në Qeverinë e Serbisë, Oliver Ivanovic ka thënë se në këtë situatë të tensionuar, KFOR-i nuk bën të fshihet e as të merret me bllokimin e rrugëve alternative.

Sipas tij, aktualisht angazhimi vetëm i Policisë së Kosovës vetëm mund ta provokojë situatën.

Ndërkohë, Ivanovic thotë se vendimi për mbajtjen ose jo të zgjedhjeve lokale të Serbisë në Kosovë do të merret në tri-katër ditët e ardhshme. Ndërsa, nuk beson se sivjet do të vazhdojnë negociatat Prishtinë-Beograd.

Lexo më shumë

Dell: Për veriun të bisedohet me qytetarët e atjeshëm

Ambasadori amerikan në Kosovë, Christopher Dell ka pohuar se problemi i veriut duhet të zgjidhet me një dialog të Qeverisë së Kosovës dhe njerëzve në veri, duke u respektuar në tërësi integriteti territorial dhe sovraniteti i Kosovës

Në intervistën dhënë Rtv21 në Washington, Dell pohoi se problemi i veriut duhet të zgjidhet me një dialog të Qeverisë së Kosovës dhe njerëzve në veri duke u respektuar në tërësi integriteti territorial dhe sovraniteti i Kosovës.

Ambasadori ka folur edhe për korrupsionin, duke thënë se duhet të luftohet nga e tërë shoqëria, kurse arrestimin e dy policëve të Kosovës nga xhandarmëria serbe e cilësoi si akt politik para zgjedhjeve në Serbi. 

Lexo më shumë

KFOR-i tërhiqet nga bllokimi i rrugëve alternative

Trupa paqeruajtëse e NATO-s, KFOR, ka vendosur që të pezullojë përkohësisht planet për mbylljen e rrugëve alternative, të cilat mundësojnë daljen nga Kosova në Serbi pa kaluar nëpër kontrollet kufitare, pas gjendjes së krijuar në Mitrovicë.

Qytetarët serbë të veriut përdorin këto rrugë për t`i ikur ballafaqimit me policë dhe doganierë të Kosovës dhe të EULEX-it që gjenden në dy pikëkalimet zyrtare 1 dhe 31.

Por, sipas burimeve ndërkombëtare, sulmi dhe tensionet e fundit kanë alarmuar edhe për nevojën që strukturat paralele të sigurisë së Serbisë të shuhen në atë pjesë dhe të fillojë dialogu i paralajmëruar për veriun, shkruan “Koha”.

Presioni ndaj Serbisë për të shuar strukturat paralele pritet që të shtohet edhe nëpërmjet deklaratave publike që pritet të bëhen nga institucionet relevante ndërkombëtare. Të njëjtat burime kanë shtuar se Serbia tashmë ka hequr dorë nga mbajtja e zgjedhjeve lokale në Kosovë dhe se qëndrimi pritet të bëhet publik gjatë këtyre ditëve.

Pezullimin e planeve për mbylljen e rrugëve alternative e ka konfirmuar edhe zëdhënësi i KFOR-it, Den Harvey.

Lexo më shumë

“Mbrojtja civile” dyshohet se kreu shpërthimin terrorist

Organizata e ashtuquajtur “Mbrojtja civile”, që udhëhiqet nga serbët Jovica Lazarevic dhe Desimir Janicijevic, në veri të Kosovës, dyshohet se qëndron prapa sulmit me bombë në banesën e familjes Haradinaj, në Mitrovicë.

Burime të afërta me procesin e hetimeve kanë thënë se kjo organizatë, pjesë e së cilës janë udhëheqës të strukturave të sigurisë dhe të komunave veriore, mund të jetë autore e këtij sulmi që ka ndodhur të dielën e për pasojë u vra kryefamiljari Selver Haradinaj dhe u plagosën familjarët e tij, shkruan “Koha Ditore”.

Ani se nuk ka ndonjë rezultat konkret, hetimet e para, sipas organeve të rendit, tregojnë për një organizim të mirë terrorist ndaj kësaj familjeje. Për këtë arsye, nëse zbulohen kryerësit dhe organizata pritet të gjykohen për sulme terroriste.

Të dielën pas mesnatës si pasojë e një shpërthimi është vrarë tridhjetetetëvjeçari Selver Haradinaj. Ai besohet se kishte mbetur i vdekur nga shpërthimi i një eksplozivi, që dyshohet se ia kishin vendosur në dritaren e banesës, në lagjen “Tre rrokaqiejt”, në pjesën veriore të Mitrovicës. Nga shpërthimi të plagosur kanë mbetur edhe bashkëshortja dhe katër fëmijët e tij.

Lexo më shumë