Të pagjeturit do kërkohen në 36 lokacione

Viti 2012 është përcaktuar si vit strategjik për hulumtimin dhe zbulimin e personave të zhdukur.

Kjo është bërë e ditur të enjten në një konferencë për media nga Grupet punuese për persona të pagjetur, që kanë zhvilluar takimin e radhës në të cilën diskutohet mundësia për zbardhjen e fatit të të pagjeturve.

Në një prononcim për media, para takimit, përfaqësuesi i grupit punues për persona të pagjetur nga Kosova, Pajazit Nushi, ka thënë se një nga çështjet më problematike në Kosovën e pasluftës, mbetet zbardhja e fatit të të pagjeturve.

Ai ka thënë se deri më tash është arritur që gjysma e numrit të të zhdukurve t’u kthehen familjeve, por, sipas tij, ende mbete shumë punë për t’u bërë në këtë drejtim, raporton Kosovapress.

Sipas kryesuesit të Grupit kosovar, një ndër strategjitë për vitin 2012 është hapja e 36 lokacioneve ku pretendohet se ka të zhdukur, ku në 29 lokacione pretendohet se ka shqiptar. Ai ka thënë se pavarësisht rrethanave të krijuara, ky Grup punues nuk është ndalur as edhe një moment së punuari për zbardhjen e personave të zhdukur nga lufta

Ai ka shtuar se është e kuptueshme se nuk mund të zbulojnë të gjithë të zhdukurit, por insistimi i grupit punues është që të bëjë përpjekje deri në gjetjen e skeletit të fundit.

Ai ka përshëndetur edhe interesimin e EULEX-it i cili ka kërkuar nga Serbia për zbulimin dhe kryerjen e punëve në hapjen e varrezës masive afër Rashkës, ku supozohet se gjenden 250 skelete.

Përfaqësuesi i Grupit punues për persona të pagjetur nga Serbia, Veliko Odalovic, ka theksuar se shkëmbimi i punës së grupeve ka thënë edhe rezultatet e veta, ku nga 3 mijë e 300 persona sa kanë qenë të zhdukur është arritur që gjysma e tyre të zbulohen.

Të rikujtojmë se ende vazhdon të mbetet i paqartë fati i rreth 1800 persona që konsiderohen ende të zhdukur që nga përfundimi i luftës në Kosovë në vitin 1999. 

Lexo më shumë

Ilegalët e veriut kushtëzojnë lëvizjen e EULEX-it

Anëtarët e Kuvendit ilegal Komunal të Zveçanit u morën vesh me përfaqësuesit e KFOR-it që deri të mërkurën drejtë Jarinjës mund të lëvizin dy deri në tri automjete në ditë të EULEX-it.

Sipas marrëveshjes, që do të jetë e vlefshme deri të mërkurën, apo deri në takimin e ardhshëm ndërmjet serbëve dhe misioneve ndërkombëtare, automjetet e EULEX-it duhet të jenë në kolonën e automjeteve të KFOR-it, ndërsa nuk duhet të bartin doganierët e Kosovës.

Anëtari i Kuvendit paralel të Zveçanit, Stevan Radovanovic, u ka thënë gazetarëve se koloneli i KFOR-it, Joseph Lynch, i cili ka shkuar në takim me përfaqësues të EULEX-it, “ka premtuar se deri të mërkurën do ta respektoj marrëveshjen”, por se ata po ashtu kanë kërkuar zgjidhje afatgjate për lëvizjen e lirë të EULEX-it.

Ndryshe, sot në mëngjes, rreth orës 10, serbët në rrugën Zveçan-Zubin Potok kanë bllokuar për dy orë automjetet e EULEX-it. Bllokim të tillë serbët kanë bërë edhe dje, në të njëjtin vend. 

Lexo më shumë

AAK: Edhe një Raport negativ-Droga hyn me kamionë

Aleanca për Ardhmërinë e Kosovës theksoi të premten se përdorimi dhe trafikimi i drogës në Kosovë është një prej shqetësimeve të mëdha për vendin.

Duke iu referuar raportit të Departamentit amerikan të shtetit për kontrollin ndërkombëtar të narkotikëve, AAK thekson se ky raport bën të qartë se ekzistojnë zona të pakontrolluara kufitare, që mundësojnë trafikun e drogës si dhe ka korrupsion dhe struktura klanore që pengojnë hetimin e rrënjëve të trafikut të drogës.

Burim Ramadani, sekretar i përgjithshëm i AAK-së, tha se para dy ditësh Kosova ka marrë edhe një raport negativ nga partnerët ndërkombëtarë.

“Tashmë, Departamenti amerikan i shtetit në Raportin vjetor për kontrollin ndërkombëtar të narkotikëve, ka theksuar shumë të meta të shtetit të Kosovës në raport me luftimin e trafikantëve të drogës”, tha ai.

Sipas tij, AAK ka folur për këtë temë edhe në Kuvendin e Kosovës dhe do të vazhdojë aktivitetet për të vetëdijesuar qytetarët me rrezikun e përdorimit dhe trafikimit të drogës. “Gjatë kësaj kohe, Qeveria e Kosovës nuk i ka marrë seriozisht vërejtjet tona. Dhe, tashmë, Qeveria Amerikane i bën të qarta disa elemente tejet negative për Kosovën”, tha Ramadani.

Po ashtu, zyrtari i AAK-së tha se raporti tregon se droga në Kosovë hyn me kamionë, autobusë dhe vetura si dhe doganierët marrin ryshfet dhe mbyllin sytë para drogës.

Në këtë drejtim, AAK paraqiti pikat e planit në luftimin e përdorimit dhe trafikut të drogës: vendosjen e kontrollit të duhur në të gjithë kufijtë e Kosovës, të rriten kapacitetet në Polici, të emërohet numri i nevojshëm i prokurorëve që merren vetëm me rastet e luftimit të trafikantëve të drogës, të largohen strukturat klanore dhe rrethet familjare në cilëndo agjenci shtetërore, të financohen projekte për vetëdijesimit e qytetarëve, veçanërisht të rinjve, kundër përdorimit, shpërndarjes dhe trafikut të drogës.

Lexo më shumë

Kamberi akuzon Mustafën

Veprimtari politik i LDK-së, Haxhi Kamberi, i cili para disa ditësh është përjashtuar nga Këshilli i Përgjithshëm, ka lëshuar një varg akuza ndaj kryetarit të LDK-së, Isa Mustafa dhe ndaj kryesisë së kësaj partë politike. Sipas tij, Isa Mustafa, nëpërmjet proceseve të reformimit po tenton që me ngulm LDK-në t’ia përshtat mentalitetin dhe formimin e vet komunist.

Kamberi ka deklaruar se kjo mënyrë e tillë e sjelljes kreun e LDK-së e ka futur në konflikt të hapur me anëtarësinë.

Ish-anëtari i këshillit të Përgjithshëm të LDK-së, Haxhi Kamberi, ka thënë se e tërë fuqia në LDK është e konceptuar në një rreth shumë të vogël.

Ai, gjatë një interviste për “Epokën e Re” është shprehur se përderisa si drejtues i lëvizjes studentore e ka luftuar sistemin e shtypjes së Jugosllavisë ndaj shqiptarëve në vitet e 80-ta, Isa Mustafa e ka mbrojtur atë sistem. Duke numëruar shkeljet e statutit të partisë që janë bërë në kuvendin e fundit, ai ka treguar se nuk ka pasur të drejtë ta shkarkoj askënd, sepse kjo pikë nuk ka qenë në rend të ditës.

Për më tepë, Kamberi, i cili ka qenë veprimtar i LDK-së prej themelimit, ka vlerësuar se gjatë punimeve të kuvendit ka pasur njerëz që nuk kanë qenë fare delegat, pavarësisht faktit se me statut të LDK-së është e rregulluar që punimet e kuvendit i udhëheqin kryetari dhe kryesia e punës e zgjedhur në kuvend.

Sipas Kamberit, pas këtij kuvendi, LDK-ja është më e hendikepuar se sa që ka qenë në të kaluarën, ngase, sipas tij, duket qartë se në supet e saj tash rëndon e kaluara e Isa Mustafës dhe mënyra e ardhjes së tij në krye të kësaj partie. 

Lexo më shumë

Mali i Zi pajtohet për hapjen e ambasadave

Zëvendësministri i Punëve të Jashtme i Republikës së Kosovës, Ibrahim Gashi, ka zhvilluar dje një vizitë zyrtare në Mal të Zi, ndërkaq është njoftuar se tashmë ekziston gatishmëria për hapjen e ambasadave të dy shteteve në Prishtinë dhe Podgoricë.

Gjatë kësaj vizite, zëvendësministri i Punëve të Jashtme i Republikës së Kosovës, Ibrahim Gashi, ka takuar sekretarin shtetëror në Ministrinë e Punëve të Jashtëm të Malit të Zi, Nebojsha Kalugjerovic dhe drejtorin politik për marrëdhënie dypalëshe Ramiz Bashic.

Duke u ndalur rreth pozitës të komunitetit malazias në Kosovë, Gashi ka deklaruar se tashmë ka hyrë në fuqi Ligji për Mbrojtjen dhe Promovimin e të Drejtave të Komuniteteve, sipas të cilit komuniteti malazias përkufizohet i barabartë me të gjitha grupet kombëtare, etnike, kulturore, gjuhësore apo fetare tradicionalisht të pranishme në Republikën e Kosovës.

Gashi po ashtu, është siguruar nga zyrtarët e lartë të shtetit fqinj për integrimin e plotë dhe avancimin e mëtutjeshëm të përfaqësimit të shqiptarëve që jetojnë në Mal të Zi, në të gjitha nivelet institucionale të shtetit.

Zëvendësministri është pritur edhe nga Ivana Petricevic, shefe e kabinetit të kryeministrit malazias dhe bashkëpunëtorë të tjerë, me ç’rast është konstatuar se ekziston gatishmëria për hapjen e ambasadave të dy shteteve në Prishtinë dhe Podgoricë.

Në njoftim thuhet se është biseduar edhe për disa marrëveshje shumë të rëndësishme në fushën e ekonomisë, sigurisë dhe arsimit.

Po ashtu bëhet e ditur se kohëve të fundit është shtuar interesimi i kompanive malaziase për të qenë të pranishme në tregun kosovarë, ndërsa është mirëpritur ideja për organizmin e një forumi ekonomik në Prishtinë, me ç’rast do të promovoheshin kompanitë dhe produktet malaziase. 

Lexo më shumë

Sannino: Pranimi i integritetit territorial të Kosovës - përparim

Drejtori i Përgjithshëm në Komisionin Evropian për Zgjerimin e Bashkimit Evropian, Stefano Sannino, ka shprehur kënaqësinë për faktin se me njohjen e integritetit territorial të Kosovës është bërë përparim i rëndësishëm në zgjidhjen e çështjeve në Ballkanin Perëndimor.

Zyrtari i Komisionit Evropian tha se sheh që “ekziston pragmatizëm në Beograd dhe në Prishtinë" dhe shprehu shpresën se negociatat do të vazhdojnë “eventualisht në një format tjetër", transmetojnë mediat serbe.

Sannino në Berlin po merr pjesë në konferencën "Serbia dhe Bashkimi Evropian: cila është rruga përpara", i organizuar nga Fondacioni Robert Bosch dhe Fondi i Beogradit për përsosmëri Politike.

Ai ka paralajmëruar se Komisioni Evropian synon që gjatë marsit, siç u shpreh "paraprakisht", të fillojë shqyrtimi se në ç’masë Serbia, Mali i Zi dhe Maqedonia, si kandidate për anëtarësim në BE (të cilave ende nuk u është përcaktuar data e fillimit të negociatave) përmbushin kërkesat e kapitullit 23 dhe 24, në lidhje me sundimin e ligjit, drejtësisë dhe të drejtave të njeriut. 

Lexo më shumë

Gashi: LDK-ja angazhohet për shtetin e së drejtës

Deputeti nga radhët e Lidhjes Demokratike të Kosovës, Arben Gashi shpalosi të premten programin e LDK-së për qeverisje dhe shtetin ligjor, duke vlerësuar se kjo fushë është shumë e rëndësishme për ndërtimin e shtetit funksional dhe të sundimit të shtetit të së drejtës.

Ai në një konferencë për media theksoi se LDK-ja ka për qëllim ndërtimin e një Kosovë evropiane, në të cilën forcohet demokracia qytetare, sundon ligji dhe respektohen të drejtat e njeriut, promovohet mirëqenia e qytetarit dhe zhvillimi ekonomik, stimulohet tregu i hapur dhe lëvizja e lirë e qytetarëve dhe e ideve.

“Në besojmë se për të arritur qëllim për një Kosovë të zhvilluar dhe Evropiane, duhet që patjetër të kemi qeverisje demokratike dhe legjitime, sundim të ligjit dhe të rendit me qëllim të forcimit të Shtetit të Kosovës”, tha Gashi.

Po ashtu ai tha se duke u bazuar në orientimet strategjike dhe detyrimet programore LDK-ja është e vendosur për luftimin e pakompromis të kriminalitetit, korrupsionit, krimit të organizuar, krimit ekonomik, trafikimit të qenieve njerëzore, eliminimit të strukturave paralele, dhe formave dhe llojeve të tjera të kriminalitetit.

“LDK-ja beson se kjo luftë mund të realizohet vetëm me njerëz që kanë duar të pastra dhe që janë të përgjegjshëm. LDK-ja është e përkushtuar për mbrojtjen efektive të të drejtave dhe lirive themelore të qytetarëve të Kosovës, të mishëruara në Kushtetutë dhe në konventa e akte të tjera ndërkombëtare, që janë drejtpërdrejt të aplikueshme në Kosovë”, tha ndër të tjera Gashi.

Ai tha se synojnë që sistemi i drejtësisë dhe i sigurisë në Kosovë të jetë funksional, profesional, i depolitizuar, i integruar dhe i shtrirë në tërë territorin e vendit, në përputhje me standardet evropiane në fushën e ligjit dhe të sigurisë.

“Në fushën e sistemin të hetimit dhe të prokurorisë, LDK-ja angazhohet për reformimin e vazhdueshëm të organit të akuzës dhe fuqizimin e saj, si parakusht për luftimin efikas dhe efektiv të kriminalitetit. Në fushën e mbrojtjes, LDK-ja angazhohet që forcat e sigurisë të shndërrohet ne ushtri të Kosovës dhe të këtë ngritje të vazhdueshme profesionale dhe modernizim me pajisje konform standardeve të NATO-së dhe mekanizmave të tjerë ndërkombëtarë përkatës”, tha Gashi.

Lexo më shumë

Verbani nuk është arrestuar, Bajgora kërkon drejtësi

Pas incidentit të së enjtes pasdite, kryeimami i Kosovës, Sabri Bajgora, dha detaje për motivin e sulmit ndaj tij, të cilin e cilësoi "të befasishëm dhe tinëzar".

Sulmi i kryer nga Musli Verbani, imam në xhaminë e Kaçanikut, ka ardhur si reagim ndaj “moszgjidhjes së tij si kryetar i Bashkësisë Islame në Kaçanik, për një mandat të tretë apo të katërt”, thotë kryemami Bajgora në një prononcim për “Radio Evropa e Lirë”.

Sipas tij, përmes akteve të tilla individë të caktuar po ndikojnë në prishjen e imazhit të Bashkësisë Islame.

“Me gojën plot mund të them se Bashkësia Islame ka një unitet të jashtëzakonshëm në mes të imamëve, por ja që dalin individë të caktuar që e prishin këtë imazh", u shpreh Bajgora. "Ndërkohë, shumica e imamëve të Kaçanikut e kanë dënuar aktin dhe janë kundër veprimeve që i ka kryer imami i apostrofuar”.

Ndaj sulmit kundër kryeimamit ka reaguar Bashkësia Islame dhe Këshilli për Mbrojtjen e Lirive dhe të Drejtave të Njeriut.

Bajgora, ndërkaq, shfaqi shpresën që organet e hetuesisë t’i zbatojnë detyrat që kanë në mënyrë që drejtësia ta thotë fjalën e vet.

“Ai sigurisht shumë shpejt do të arrestohet dhe do të vihet para drejtësisë. Përndryshe, kam besim të plotë në organet e rendit dhe të drejtësisë që këtë rast do ta çojnë deri në fund”, tha ai.

Mësohet se arrestimi i personit që akuzohet se ka sulmuar kryeimamin Bajgora nuk është bërë ende. Policia e Kosovës bëri të ditur se menjëherë pas marrjes së informatave, ka nisur hetimet duke e kërkuar sulmuesin në disa lokacione, por se nuk ka arritur ende të identifikojë vend-ndodhjen e tij.

Zëdhënësi i Policisë së Kosovës, Baki Kelani, nuk deshi të japë të dhëna për personin e dyshuar për sulm, ndërsa kundërshtoi të flasë edhe për motivet eventuale të sulmit.

“Motivi dhe gjërat e tjera bëhen të ditura pas përfundimit të rastit në përgjithësi, meqenëse çdo gjë është në hetim e sipër”, theksoi Kelani.

Ndërkohë, është paralajmëruar një mbledhje e jashtëzakonshme e Bashkësisë Islame të Kosovës për këtë çështje, që pritet të mbahet në orët e pasdites. 

Lexo më shumë

Kosova lë gjurmë në Berlin

Konferenca e nivelit të lartë mbi investimet në Kosovë, e mbajtur me 7 mars në Berlin nën organizimin e Nismës Ekonomike për Kosovën (ECIKS) dhe institucioneve partnere, vlerësohet të ketë dhënë një kontribut të çmuar në fillimin e ndryshimit të perceptimeve gjermane për kushtet dhe mundësitë e investimeve dhe të të bërit biznes në Kosovë. Mbi njëqind investitorë potencial, përfaqësues të interesave të biznesit gjerman, parlamentarë, përfaqësues të Ministrisë së Jashtme Gjermane, diplomatë e vendimmarrës nga politika dhe ekonomia kanë dëgjuar dëshmi nga përfaqësuesit e Kosovës, investitorët e huaj që tashmë kanë investuar në Kosovë dhe nga personalitete të rëndësishme publike gjermane e austriake mbi aktualitetin politik dhe ekonomik në Kosovë.

Në panelin e parë ku merrnin pjesë zëvendëskryeministrja Mimoza Kusari-Lila, udhëheqësi i Konferencës së Sigurisë në Mynih Wolfgang Ischinger, ish-vicekancelari austriak Erhard Busek, ministri i Zhvillimit Ekonomik Besim Beqaj, kryetari i ECIKS Kujtim Dobruna, përfaqësuesi i Ministrisë gjermane për Ekonomi dhe Teknologji Helge Tolksdorf si dhe drejtori i komitetit gjerman për marrëdhënie ekonomike Rainer Lindner, u tha se Kosova ka arritur të krijojë një bazë të shëndoshë të zhvillimit ekonomik, e cila duhet të përcjellët me reforma të vazhdueshme politike dhe ekonomike. Përkundër sfidave aktuale, ekonomia e Kosovës vazhdon të shënojë rritje dhe të tërheqë investime të huaja. Kosova, krahas Ukrainës dhe Turqisë, do të jetë edhe sivjet një ndër shtetet me shkallën më të lartë të rritjes ekonomike në Evropë. Për të rritur atraktivitetin si destinacion për investime të huaja, vendit i duhet të vazhdojë me reformat në klimën afariste, të forcojë sundimin e ligjit dhe të investojë më shumë në arsim dhe në mbështetjen e sektorit privat, u tha mes tjerash në këtë panel.

Konferenca, që u hap nga ambasadori i Republikës së Kosovës në Berlin, Vilson Mirdita dhe u përshëndet nga ambasadori austriak në Berlin Ralph Scheide dhe nga përfaqësuesja e Commerzbankës, vazhdoi me panelin e dytë, ku u paraqitën storjet e suksesit të investitorëve të huaj. Pas fjalës hyrëse të shefit të IPAK, Valdrin Lluka, dhe shpalosjes së bazës ligjore për investimet e huaja nga avokati Dastid Pallaska, përfaqësues të tri kompanive të huaja që kanë investuar në Kosovë Pro-Credit Bank, Birra Peja/Union dhe Xella paraqitën përvojat e tyre duke inkurajuar investitorët gjermanë që të mos hezitojnë të mësyjnë tregun e Kosovës, sepse realiteti është më i mirë se sa perceptimet ekzistuese.

Konferenca është organizuar nga Nisma Ekonomike për Kosovën (ECIKS) në vazhdën e aktiviteteve për promovimin e Kosovës në regjionin gjermanofolës, dhe është mbështetur nga Ambasada e Kosovës në Berlin, Komiteti Gjerman për Marrëdhënie Ekonomike dhe Shoqata Gjermane për Evropën Juglindore, me financim nga qeveria austriake.

Lexo më shumë

Mbi 1 milion të papunë në Greqi

Papunësia ka mbetur pothuajse e pandryshueshme gjatë muajit dhjetor në Greqi, duke e tejkaluar pragun prej një milion të papunëve duke arritur në 21 për qind, njoftoi Autoriteti Grek i Statistikave.

"Numri i të papunëve ka arritur në 1 033 milionë, në një popullsi të përgjithshme prej 11 milionë banorë, ose një rritje prej 40.9 për qind në raport me muajin dhjetor të vitit 2010 dhe me 0.38 për qind në raport me muajin nëntor të vitit 2011”, theksohet në komunikatë.

Papunësia ka prekur veçanërisht të rinjtë e moshës nga 15 deri në 24 vjeç, që përbëjnë më tepër se gjysmën 51 për qind, nuk kanë vend pune. Gjithashtu gratë janë shumë të prekura, me një normë papunësie prej 25.3 për qind ndaj 18.7 për qind në muajin dhjetor të vitit 2010.

Lexo më shumë

Dëmet e zjarrit në Bast Trade mbi 1 milion euro

Me qëllim të inkurajimit për të vazhduar punët zëvendësministri i Zhvillimit Ekonomik, Ramadan Hasani ka vizituar të premten kompaninë “Bast Trade”, e cila ditë më parë është përfshirë nga zjarri.

Me këtë rast zëvendësministri Hasani tha se qëllimi i vizitës është inkurajimi i kësaj Kompanie për të vazhduar punët edhe pas fatkeqësisë së ndodhur duke shtuar se MZHE-ja do të angazhohet që të gjej forma për të lehtësuar situatën e krijuar . “MZHE do të angazhohet që të gjej forma që të lehtësojë situatën e krijuar. Duke qenë të vetëdijshëm që këto situata mund të ndodhin unë inkurajoj përfaqësuesit e ‘Bast Trade’ të vazhdojnë angazhimet e tyre me fokus të veçantë në ruajtjen e tregut”, theksoi Hasani.

Kurse Basri Statovci përfaqësues i “Bast Trade” tha se dëmi i shkaktuar nga zjarri kap shifrën mbi një milion euro. “Demet e shkaktuara nga zjarri janë mbi një milion euro, mirëpo fatmirësi në këtë është sepse nuk është lënduar askush nga punëtorët e kompanisë”, theksoi Statovci .

Ndryshe, Kompania “Bast Trade” ka të punësuar 300 punëtorë. 

Lexo më shumë

Motta: Nuk isha i lumtur te Interi

Thiago Motta ka mbrojtur vendimin e tij për t’u transferuar te Paris Saint-Germain në janar, duke thënë se nuk ishte i lumtur në San Siro.

“Te Interi, pavarësish trajnerit, luaja, por kishte gjëra të cilat nuk më pëlqenin dhe thjesht doja një ndryshim”.

“Në ditën e fundit të afatit kalimtar i dërgova një SMS presidentit [Massimo Moratti] për t’i treguar dhe ai përfundimisht më lejoi”.

“Trajtohesha si person, jo si lojtar. Por në Itali shumë njerëz kanë thënë se unë nuk kam qenë i mirë ndaj Interit – kjo është gabim”, ka thënë Motta në një intervistë për L'Equipe. 

Lexo më shumë

Cech shpreson të luajë edhe dhjetë sezone

Portieri i Chelseat, Petr Cech, 29-vjeçar, mendon se ai ka edhe dhjetë vite në dispozicion për të luajtur në top formë.

“Mendoj se për një lojtar që lëviz nëpër fushë është më ndryshe pasi ata nuk mund të vazhdojnë të bëjnë atë që bënin më parë, pasi ata plaken dhe pastaj kanë nevojë ta përshtatin lojën e tyre në mënyrë që të mendojnë më shpejt, ose diçka e tillë”.

“Por për një portier, mendoj se reagimi juaj mund të jetë pak a shumë i njëjtë deri në moshën 39-vjeçare. Nuk është me rëndësi shpejtësia, andaj kam nevojë të ruaj standardet e lojës time gjithë kohën, në çdo aspekt”.

“Sigurisht, ka diçka të re për të shtuar ose diçka në të cilën duhet të përmirësoheni, ne punojmë në këto gjëra”, ka thënë Cech. 

Lexo më shumë

NBA: Orlando rikthen “magjinë” kundër Bulls

Të tronditur nga disfata e turpshme nga Charlotte Bobcats më herët gjatë kësaj jave, Orlando Magic janë përgjigjur në mënyrën më të mirë duke shënuar fitore me rezultat 99-94 ndaj liderit të NBA, Chicago Bulls.

Dwight Howard ishte më i dalluari te “magjistarët” me 29 pikë dhe 18 kërcime duke i dhënë fund serisë prej tetë fitoreve radhazi të Chicagos.

Carlos Boozer ishte më i miri te Bulls me 26 pikë, derisa Derrick Rose shënoi vetëm 17 dhe ishte i saktë në 6 nga 22 tentimet nga fusha.

Fitorja ishte e 26-ta këtë sezon përkundër 15 disfatave për Orlando Magic, derisa disfata e Chicago Bulls ishte vetëm e nënta këtë sezon, krahas 33 fitoreve. 

Lexo më shumë

Zola: Torres ka mungesë vetëbesimi

Legjenda e Chelsat, Gianfranco Zola, thotë se Fernando Torres ka mungesë të vetëbesimit.

“Është çështje vetëbesimi, dukshëm. Për të kuptuar se cili është problemi, ju duhet të jeni të afërt me të, ju duhet ta njihni atë shumë mirë – çfarë karakteri është ai, si mendon”.

“Vetëm një person i cili është i afërt me të mund ta kuptojë këtë. Nga këndvështrimi im, ai ka nevojë për më shumë vetëbesim dhe mjafton kaq”, ka thënë Zola. 

Lexo më shumë

Moratti: Ranieri ka mbështetjen time

Presidenti i Interit, Massimo Moratti, thotë se trajneri nën-presion, Claudio Ranieri, e ka mbështetjen e tij të plotë dhe ka thënë se ai nuk ka qenë në kontakte me ndonjë trajner tjetër.

Nerazzurrët kanë kaluar shtatë ndeshje pa fitore në Serie A dhe është spekuluar se ditët e Ranierit janë të numëruara, me Andre Villas-Boas dhe me Pep Guardiola që përmenden se mund të jenë pasardhësit e tij.

“Nuk është e lehtë për një trajner të lexojë gazetat çdo ditë se ka një trajner të ri që do të vijë ta zëvendësojë, kur në të vërtet nuk ka pasur kontakte me ndonjë trajner tjetër”.

“Ai është profesional, ai po e bën detyrën e tij dhe ai e ka mbështetjen time të plotë në këtë kohë të vështirë që po e kalon dhe se ne të gjithë përpiqemi ta kalojmë këtë”, ka thënë presidenti i klubit për Sky Sport24. 

Lexo më shumë

Gigli: Buffon për pak nuk iu shit Milanit

Ish-presidenti i Juventusit, Giovanni Cobolli Gigli, ka zbuluar se klubi kishte qenë shumë afër për ta lejuar Gianluigi Buffon të largohet në drejtim të Milanit, shtatë vite më parë.

67-vjeçari ka shpjeguar gjatë një interviste për Sky Sport24, se ishte arritur një marrëveshje me Rossonerët e cila lejonte largimin e kapitenit të Italisë në shkëmbim të portierit tjetër italian, Christian Abbiati.

“Galliani mund të mos e mbajë mend, por vite më parë Buffon po thuajse shkoi te Milani. Ne kishim caktuar një shkëmbim Abbiati-Buffon, por pastaj për arsye të ndryshme, nuk ndodhi asgjë”, ka thënë Gigli.

Buffon iu bashkua Juventusit nga Parma në vitin 2001 për një shumë që raportohet se kapi vlerën e 49 milionë eurove. 

Lexo më shumë

Miranda dhe Visari sjellin “Itinerar”

Miranda Hashani dhe Visar Rexhepi kanë sjellë videoklipin e duetit të tyre “Itinerar”.

Me këtë këngë dyshja ishte paraqitur në festivalin “Kënga Magjike 2011”.

Videoklipi i kësaj kënge është realizuar nga produksioni “Fabrika”.

Më poshtë mund ta shikoni klipin “Intinerar”.

Lexo më shumë

Xherdani edhe futbollist edhe beat-boxer

Xherdan Shaqiri përveç një futbollist i talentuar, ai është duke zbuluar edhe talente të tjera.

Ylli kosovar i Baselit, ka mahnitur të gjithë duke e përcjellë një këngë të zhanrit rep me ‘beatbox’.

Shaqiri ishte i pranishëm në një mbrëmje gala të organizuar në Zurich të Zvicrës nga kompania gjigante sportive Nike, me të cilën ka kontratë për veshmbathje.

Shaqiri bashkëpunoi me reperin Knackeboul. “Nuk e kemi provuar këtë më parë, por shkoi mirë”, ka thënë reperi zviceran. Yll i natës ishte kampioni i botës me Italinë, ish-futbollisti Marco Materazzi.

Lexo më shumë

Rita Ora: Dua Kosova të ndihet krenare me mua

Rita Ora, e cila kohëve të fundit është duke bërë bujë në top listat botërore, edhe një herë ka potencuar se është krenare që është kosovare dhe se dëshiron që populli i saj të ndihet krenar me talentin e saj.

Në gjitha intervistat e dhëna së fundi, Rita Ora ka pohuar se ajo është kosovare dhe e lindur në Prishtinë dhe krenohet me popullin e saj.

Në intervistën e dhënë ditë më parë për Top Channel, ajo ishte thënë se prejardhja e saj është nga Shkodra, por Rita ka pohuar se është lindur në Prishtinë dhe vetën e prezanton si kosovare.

Gjatë intervistës së fundit për RTK, Rita ka thënë se ajo ndihet shumë e lumtur që kënga e saj “Hot right now” është në vendin e parë në Britaninë e Madhe.

Lexo më shumë

Longoria sërish e vetmuar

Aktorja e serisë “Desperate Housewives”, Eva Longoria, sërish është e vetmuar.

Longoria, e cila në vitin 2010 u divorcua nga ish-burri i saj Tony Parker pas tre vitesh martesë, raportohet se është ndarë nga i dashuri i saj Eduardo Cruz.

“Ishte një vendim i dyanshëm. Ata do të qëndrojnë miq. Ajo është e fokusuar në punën e saj dhe fundin e ‘Desperate Housewives’”, ka thënë burimi. 

Lexo më shumë

Kim planifikon të adoptojë

Ylli televiziv Kim Kardashian planifikon të adoptojë fëmijë, shkruajnë revistat amerikane.

Bukuroshja 31-vjeçare ka filluar procesin e adoptimit të një foshnje si nënë e vetmuar, bën të ditur revista amerikane OK.

“Kim gjithmonë ka qenë shumë amënore. Nga të tre motrat, Kim është ajo që ka thënë më së shumti se është e gatshme për fëmijë. Është një top sekret, por adoptimi tashmë është në rrugë”.

“Kim është e gatshme. Ajo ka bërë pyetje dhe ka marrë informacione. Tash vetëm duhet të vendosë prej nga e do foshnjën”, ka thënë burimi. 

Lexo më shumë

Le të vrapojë pas jush

Dëshironi ta mahnitni të dashurin tuaj? Afrojani kënaqësinë e gjuetisë dhe nuk do t’ju largojë nga mendja.

Ruajeni zemrën tuaj

Sado që i dashuri juaj ta tund botën tuaj, rezistoni të mos i hapeni menjëherë dhe t’i dorëzoheni plotësisht.

E para: Nëse e kupton se po “çmendeni” pas tij, atëherë do t’ia merrni kënaqësinë e gjuetisë, që është njëra nga arsyet pse nuk pushon së telefonuari ose së ftuari.

E dyta: Nëse menjëherë filloni të shprehni kujdes të tepërt ndaj tij, atëherë ai do të frikësohet, saqë me kalimin e kohës do të bëheni njëra nga ato vajzat që ngjiten për mashkullin e tyre si çamçakëzi për këpucë.

Bëhuni e pashmangshme

Fillimisht, pa dyshim, me të dashurin tuaj do të komunikoni me e-mail ose me porosi sms. Shfrytëzojeni këtë, luani dhe përpiquni që fjalët tuaja të kenë edhe kuptim të fshehtë.

Meshkujt duan pak mëlmesa djegëse gjatë komunikimit, prandaj lirisht ngacmojeni dhe nxiteni. Për çfarë do të bisedoni, me kënaqësi do t’i përgjigjet lojës. Shfrytëzojeni gjuhën e trupit:

Ndoshta tingëllon pak si vulgare, porse gjithherë duhet pasur në dispozicion disa lëvizje të mira që janë me ndikim: për shembull mund t’i mbështetni duart në ije ose në bel. Mashkulli këtë do ta marrë si shenjë se dëshiroi që edhe ai t’ju prekë dhe si mesazh se jeni shumë sensuale.

Lexo më shumë

A merrni sa duhet vitaminë D?

Në këtë periudhë të vitit është shumë lehtë të zhvillohet mungesa e vitaminës në organizëm, ndërsa mungesa e saj shkakton një varg të problemeve shëndetësore.

Vitamina D është një nga burimet e rëndësishme të energjisë dhe po ashtu rregullon disponimin tonë. Ndihmon tek ndërtimi i eshtrave, zemrës, nervave, lëkurës dhe dhëmbëve. Vitamina D po ashtu mbështet shëndetin e tiroideve, që mbajnë nivelin e energjisë, peshën e shëndetshme trupore dhe shpejton metabolizmin.

Hulumtimi i ri tregon që personat të cilët kanë nivel më të lartë të vitaminës D kanë rrezik më të vogël nga zhvillimi i diabetit të tipit 2. Shkencëtarët pohojnë që mbajtja e nivelit optimal të vitaminës D në gjak mund të jetë strategji për parandalimin e diabetit të tipit 2.

Pjesa e dytë e hulumtimeve ka treguar që vitamina D luan rol të rëndësishëm te aktivizimi i sistemit të imunitetit për t'u mbrojtur nga sëmundjet si gripi. Mungesa e kësaj vitamine të rëndësishme mund të rezultojë me rrezik më të madh nga infeksionet me sëmundje virale. Hulumtimet shtesë kanë treguar që sasitë e vogla të vitaminës D mund të shkaktojnë kancer, depresion dhe sëmundjet e zemrës.

Shumë njerëz në mënyrë të gabuar mendojnë që ekspozimi në diell është i mjaftueshëm për të përmbushur nevojat ditore për vitaminë D. Megjithatë, pasi që lëkura juaj i ekspozohet diellit,duhen 48 orë për t'u shndërruar në vitaminë D. Gjatë asaj kohe ajo shumë lehtë mund të shpërlahet me sapun dhe ujë.

Marrja e sasisë së mjaftueshme të kësaj vitamine në këtë periudhë të vitit mund të jetë e vështirë, dhe gati e pamundshme përmes diellit. Prandaj, vitaminën D merreni përmes ushqimit, siç janë peshku, vaji i peshkut, patatja e ëmbël, farat e lule diellit, të kuqtë e vezëve dhe kërpudhat. Gjithsesi këshillohuni me mjekon, që nëse është nevojshme të merrni edhe shtesa të vitaminës D.

Lexo më shumë

Pritjet më të vogla nga shitja e kompjuterëve

Sipas analizës së bërë nga Gartner, këtë vit nuk pritet ndonjë rritje e shitjes së kompjuterëve. Analistët vlerësojnë se në krahasim me vitin e kaluar do të shiten për 4.4% më shumë kompjuterë. Rritje më e madhe është planifikuar për vitin 2013.

Konkretisht, pritet të shiten 368 milion njësi, e arsyeja e shitjes më të dobët janë tabletët. Analistët e Gartner pohojnë se nuk është se njerëzit më nuk po i përdorin kompjuterët, por se nuk po i zëvendësojnë kompjuterët e tyre ekzistues. Fakti se shumë gjëra – për shembull e-maili, rrjetat shoqërore dhe qasja në Internet – mund të kryhen në tablet, zvogëlon prioritetin për blerjen e kompjuterit të ri.

Novacionet të cilat pritet të ndodhin në fushën e kompjuterëve, në radhë të parë ato që kanë të bëjnë me ultrabookët dhe Windows 8, këtë vit sipas të gjitha gjasave nuk do të ndikojnë në masë të madhe në shitjen e kompjuterëve. Pasi që numri më i madh i pajisjeve me Windowsin e ri do të paraqitet vetëm kah fundi i vitit, për disa ndryshime më të mëdha në treg gjatë këtij viti thjesht nuk do të ketë kohë, porosisin nga Gartner. 

Lexo më shumë

Rënie e çmimeve të SSD-ve

Shtëpia analitike DRAMeXchange mendon se deri kah fundi i këtij viti çmimet e SSD-ve më në fund do të duhej të binin në nivelet e pranueshme. Sipas analizave të tyre, çmimet e SSD-ve gjatë gjysmës së dytë të këtij viti do të bien nën një dollarë për gigabajt hapësirë, që do të duhej të tërheq interesimin e numrit më të madh të blerësve.

Rënia e çmimeve pritet të ndodhë pasi që në prodhimin masiv të shkojnë NAND çipat e prodhuar në procesin prej 19- dhe 20-nanometrave, ndërsa popullarizimin do ta nxisin edhe prodhuesit e ultraportativëve me implementimin e SSD-ve në kompjuterët e tyre në vend të disqeve hibride. Rritja e dukshme e pritur e përfaqësimit të ultrabookëve në treg nga çereku i tretë i vitit patjetër se do të nxis kërkesën për SSD-të si dhe prodhimin e tyre, e kompanitë e shumta janë duke zhvilluar edhe zgjidhjet e reja me kosto më të ulët të shpenzimit, siç është rasti me King Crest SSD-në të Intelit me MLC NAND çipat 20-nanometërsh dhe TLC NAND zgjidhjet nga OCZ. 

Lexo më shumë

Parada më e gjatë me bikini (Video)

Një rekord i ri në librin Guinness është vendosur në Panama City të Floridës, ku është organizuar parada me bikini. Në këtë paradë kanë marrë pjesë 450 femra, të cilat kanë thyer rekordin e mëparshëm (në të cilin kishin marrë pjesë 350 femra).

Anëtaret e gjinisë së bukur kanë veshur bikinit e tyre dhe kanë dalë në plazhin Panama City. Në grupin prej 450 femrave ka pasur vajza lokale, studente, turiste etj., të cilat kanë ecur me kostumet e larjes rreth një kilometër.

“Kjo nuk është diçka që e sheh çdo ditë, jam vërtet e lumtur”, ka thënë njëra nga pjesëmarrëset.

Në të kaluarën, parada të tilla janë mbajtur në mënyrë që të tërheqin sa më shumë turistë, mirëpo tash është bërë traditë për thyerjen e rekordeve Guinnes. 

Lexo më shumë

Qeni me stilin hip-hop

Një grua nga New York është bërë e famshme për veshjen e qenit të saj në stilin hip-hop.

Dizajnerja e modës, Ji Kim, ka blerë një palë tuta Adidas dhe i ka përshtatur ato në mënyrë që t’i bien qenit të saj katërvjeçar, Rocky.

Kështu, ‘çifti’ që zakonisht përshtat veshjet e tyre është bërë sensacion, madje është përfshirë edhe në ekipin dizajnues në profilin e Adidas në Facebook.

“Rockyt i pëlqen të tërheqë vëmendje dhe kur i vesh këto tuta, tërheq shumë vëmendje. Ai entuziazmohet shumë kur e vesh me to”, ka treguar Kim.

Lexo më shumë

Druri dinozaur

Një kalimtar është habitur kur ka parë një dru gjigant në Norfolk, i cili duket sikur një dinozaur tmerrues- “me sy, gojë dhe me shpinën me gjemba”.

‘Druri përbindësh’ mund të shihet në një fushë pranë Norfolkut verior, mirëpo sikur paraardhësit e tij, edhe ky ‘dinozaur’ do të vdesë kur t’i bien gjethet.

“Isha duke ecur me gruan time Debbie dhe në një qoshe pamë drurin T-Rex. Vërtet na trishtoi dhe dukej sikur një dinozaur”.

“Është mbresëlënëse, koka është në formën e duhur dhe madje ka edhe nofull dhe duar të vogla, ngjashëm sikurse mbreti i dinozaurëve”, ka thënë Spike Malin, një 50-vjeçar nga Cromer i Norfolkut. 

Lexo më shumë

Shpëtimi delfinëve (Video)

Disa vizitorë plazhi në Brazil kanë shpëtuar një grup delfinësh, të cilët po vuanin para syve të tyre.

Një turist ka arritur të kapë me kamerë shpëtimin e jashtëzakonshëm të rreth 30 delfinëve nga një plazh në veri të Rio de Janeiros.

Delfinët notuan drejt plazhit Arraial do Cabo dhe më pas u dërrmuan çmendurisht në rërë. Duke kuptuar gjendjen e delfinëve, disa nga të pranishmit në plazh filluan t’i tërheqin për bishti në drejtim të ujit më të thellë.

Pas shpëtimit të delfinit të fundit, në plazh mbretëroi gëzimi dhe duartrokitjet për misionin mbresëlënës prej dy minutash. 

Lexo më shumë

Ferguson: De Gea na mbajti në garë

Menaxheri i Manchester United, Sir Alex Ferugon, ka lavdëruar formën e portierit David de Gea.

De Gea bëri një mori mbrojtjes të klasit në disfatën 3-2 nga Atletic Bilbao, dhe Fergson mendon se spanjolli ishte ai që mbajti gjallë shpresat e tyre për të vazhduar më tej garën në Europa League.

“Pa De Gea ne do të pranonim katër ose pesë gola. Ai ishte i shkëlqyeshëm. Ai bëri ndoshta katër ose pesë mbrojtje të tmerrshme në ndeshje”, ka thënë Ferguson.

Ndeshja e kthimit do të zhvillohet të enjten e ardhshme.

Lexo më shumë

Bielsa: Ende kemi punë me Man United

Menaxheri i Athletic Bilbao, Marcelo Bielsa, ka paralajmëruar lojtarët e tij se fitorja impresive 3-2 në Europa League ndaj Manchester United në Old Trafford, do të jetë e vlefshme vetëm nëse ata kualifikohen më tej.

Pasi e panë veten në disavatazh nga goli i Wayne Rooneyt, skuadra baske mori fuqinë për ta përmbysur rezultatin në 3-1 falë golave të Fernando Llorente, Oscar De Marcos dhe Iker Muniain.

Por Rooney shënoi edhe një gol tjetër për Man United, kësaj here nga penaltia, për t’i mbajtur gjallë shpresat e Djajve të Kuq për një fitore në ndeshjen e ardhshme dhe kualifikim në rundin e ardhshëm.

“Ka edhe një ndeshje për t’u zhvilluar, andaj ajo çfarë ne kemi arritur sot do të vlejë vetëm nëse ne e përsërisim atë në javën e ardhshme”, ka thënë Bielsa. 

Lexo më shumë

Galliani: Nuk ka problem mes Allegrit dhe Ibras

Zëvendëspresidenti i Milanit, Adriano Galliani, thotë se nuk ka probleme me të zemëruarin Zlatan Ibrahimovic.

Ibra shpërtheu në trajnerin Massimiliano Allegri, pas disfatës së tyre ndaj Arsenalit në mesjavë.

“Më pëlqen një Ibrahimovic i zemëruar. Kur ai nuk është i zemëruar, ai humb karakterin luftarak. Gjithçka është absolutisht mirë në mes të Allegrit dhe Ibras”.

“Situata me Ibrahimovic është vendosur që në momentin kur ai ka lindur. Ai është një djalosh fantastik i cili fiton aq shumë pasi gjithmonë është i fokusuar dhe i vendosur”, ka deklaruar Galliani. 

Lexo më shumë

Burdisso kërkon durim nga tifozët e Romës

Mbrojtësi i Romës, Nicolas Burdisso, ka porositur tifozët e klubit të jenë të durueshëm me rindërtimin që Luis Enrique i bën skuadrës.

“Ne jemi të parët që e dimë se gjërat nuk shkojnë mirë. Por klubi, ekipi dhe trajneri, janë të gjithë të bashkuar. Është një periudhë e vështirë, rezultate të këqija, si ajo në derbi, derisa situata përkeqësohet edhe më shumë me ato në Bergamo kundër Atalantas”.

“Por, këtu ne po bëjmë diçka serioze, të madhe, kjo nuk ndërtohet brenda një dite, një jave ose një muaji. Tash janë edhe 12 ndeshje për të përfunduar sezonin mirë dhe për të treguar se ky ekip ka kualitetet dhe personalitet”, ka thënë Burdisso. 

Lexo më shumë

Guardiola: Messi do të shënojë gjashtë gola

Trajneri i Barcelonës, Pep Guardiola, nuk ka dyshim se Lionel Messi një ditë do të shënojë gjashtë gola në një ndeshje.

Argjentinasi gjeti rrjetin pesë herë në sfidën e Ligës së Kampionëve ndaj Bayer Leverkusen, që ishte goli i tij i 186-të në 201 ndeshje për Barcelonën. Por trajneri spanjoll mendon se do të ketë net edhe më magjike se kjo.

“Ai është më i miri, nuk ka të tjerë si ai. Numrat flasin vetë. Një ditë ai do të shënojë gjashtë herë. Ne kurrë nuk do të shohim një lojtar si ai sërish”, ka thënë Guadriola. 

Lexo më shumë

Mancini: Do ta përmbysim Sportingun

Menaxher i Mancehster Cityt, Roberto Mancini, nuk është në panik pas disfatës 1-0 në Europa League kundër Sporting Lisbonës.

“Nuk ishte befasi, pasi gjithçka mund të ndodhë në futboll, por nuk mendoj se ne merituam të humbasim. Ne nuk luajtëm shumë mirë, por mund të kishim shënuar, pastaj pranuam një gol, dhe kjo ishte”.

“Ne kemi edhe 90 minuta të tjera dhe mendoj se do të jetë një ndeshje tjetër. Ne ende kemi një shans të madh. Shpresojmë se do të kemi rast të shënojmë dhe mendoj se do të shënojmë”.

“Nuk mendoj se ata kishin shumë shanse për të shënuar. Sporting kishte gjithmonë lojtarë prapa topit, për të luajtur në kundërsulme, dhe mendoj se ne kishim më shumë shanse se ta”, ka deklaruar italiani.

Lexo më shumë

Ferguson: Bilbao, thjesht më i mirë

Menaxheri i Manchester United, Sir Alex Ferugon, nuk ka ankesa pas disfatës 3-2 në Europa League nga Athletic Bilbao.

“Ne u mposhtëm mirë, më duhet të them se ata ishin një skuadër më e mirë. Mendova se mbrojtja jonë nuk ishte shumë e mirë sonte, dhe kjo na mbajti mbrapa gjithmonë”.

“Loja jonë sulmuese ishte shumë e mirë në momente dhe ishte një ndeshje e hapur, dhe argëtuese. Ne ende mund ta fitojmë sfidën. Pa dyshim. Ne treguam se mund të krijojmë shanse kundër tyre, por është e qartë se duhet të mbrohemi mirë”.

“Më duhet vërtet të shoh se çfarë mund të sjellë Rio Ferdinand pa prishur programin e ligës”, ka thënë Ferguson. 

Lexo më shumë

Serbët e veriut presin fjalë nga Lavrovi

Politologu serb Predrag Simic thotë se pret reagimin e Moskës, pas deklaratës së ambasadores amerikane në Beograd, Mary Warlick, se "amerikanët nuk duan mbajtjen e zgjedhjeve lokale (serbe) në Kosovë ".

"Pritet reagimi i kreut rus të diplomacisë, Sergey Lavrov, i cili ende nuk është deklaruar përkitazi me qëndrimin a ambasadores Warlick, pra të SHBA-ve, për mbajtjen e zgjedhjeve lokale në Kosovë”, ka thënë Simic për “Dnevnik”, duke shtuar se serbët e Kosovës mund të llogarisin në reagimin e Moskës.

"Serbët në Kosovë janë të vetëdijshëm se shumëçka tani varet pikërisht nga Rusia dhe nga ajo që do të thotë Lavrov. Në çdo rast, në horizonti është një krizë e re e Kosovës në lidhje me zgjedhjet lokale”.

Warlick ka thënë ditë më parë se amerikanët nuk duan zgjedhje lokale në Kosovë dhe se SHBA-të vazhdojnë ta mbështesin sovranitetin dhe pushtetin e Kosovës në tërë territorin e saj. 

Lexo më shumë

Zgjedhjet ilegale në veri: Thaçi mund të bëj vetëm zhurmë

Beogradi është në një lloj konfuzioni për mbajtjen e zgjedhjeve të saja lokale edhe në veriun e Kosovës. Kryetarja e Parlamentit të Serbisë, Slavica Dukic Dejanovic, ka thënë se zgjedhjet do të mbahen në të gjitha komunat ku të ashtuquajturve kryetarë u ka kaluar mandati. Në anën tjetër, shefi i ekipit negociator serb për bisedime me Prishtinën,. Borislav Stefanovic, ka thënë se Serbia ene nuk ka marrë ndonjë vendim për këtë. Njohësi i zhvillimeve politike në Ballkan, Tim Judah, njëkohësisht analist në “The Economics”, thotë presidenti serb Boris Tadic është në dilema të mëdha.

“Nëse nuk i mban zgjedhjet në Kosovë, mund të akuzohet se është tradhtar; nëse i shpallë, ai do ta fus veten në zemërimin e bashkësisë ndërkombëtare që deri tash i ka ofruar mbështetje”, ka thënë Judah për “Radio Evropa e Lirë”, edicionin në gjuhën serbe.

Në anën tjetër, ambasadori amerikan në Kosovë, Christopher Dell, ka thënë se vendimi për zgjedhjet serbe në Kosovë do të ishte në dëm të Serbisë. Judah mendon se përkitazi me këtë problem Evropa ka ndikim më të madh se SHBA-të.

“Një vonesë në integrimin evropian të Serbisë ka ndodhur për shkak të kushteve që ndërlidheshin me Kosovën. Ndërsa, nëse bën lëvizje me zgjedhjet në veri të Kosovës, atëherë Serbia ia ka përgatitur vetes edhe një tjetër bllokim”, shton Judah.

Sipas tij, Beogradi mund të ofroj një formulë ambivalente që ngjanë me referendumin: zgjedhjet në veri të Kosovës do të mbahen, do t’i shpallin komunat e atjeshme, ndërsa Beogradi nuk do të merrte pjesë në to!

“Natyrisht, nuk mendoj se do të jetë bash kështu, por thjeshtë po e hamendësoj si mundësi që mund t'i bie ndërmend Qeverisë së Serbisë”, thotë Judah, sipas të cilit në këtë mënyrë Tadic do të thoshte se zgjedhjet janë mbajtur, për çka nuk do të akuzohej nga serbët për tradhti, ndërsa bashkësisë ndërkombëtare do t’i thoshte se nuk ka lidhje me këtë punë.

Në pyetjen se nëse ndodhë një skenar i tillë, cili do të ishte reagimi i kryeministrit të Kosovës, Hashim Thaçi, Judah përgjigjet: “Sigurisht se do të bëjë zhurmë të madhe për këtë. Por, nuk mendoj se do të mund të bëj më shumë se kaq”. 

Lexo më shumë

Kupchan: Serbia me qëndrim më fleksibil ndaj Kosovës

Analisti dhe anëtari i Këshillit për marrëdhënie-politike, Charles Kupchan, thotë se dhënia e kandidaturës Serbisë është rezultat i asaj se Beogradi e ka kuptuar që integrimi më i shpejtë me Evropën kërkon një qëndrim më fleksibil ndaj çështjes së Kosovës.

Kupchan pohoi se pavarësisht shqetësimeve për shkak të krizës financiare në eurozonë, anëtarët e BE-së nuk kanë hequr dorë nga anëtarësimi i të gjitha vendeve të Ballkanit Perëndimor.

“Marrëveshja me të cilën është mundësuar që emri i Kosovës mund të përdoret në takimet ndërkombëtare është vetëm një dëshmi më tepër se gjërat po lëvizin në drejtimin pozitiv. Gjithashtu konsideroj se shansi për anëtarësimin e Serbisë në BE do të përshpejtojë procesin e zgjidhjes së konfliktit ndërmjet Serbisë dhe Kosovës”, ka thënë Kupchan në një intervistë për "Zërin e Amerikës" në serbisht, që e transmeton Qik-u. 

Lexo më shumë

Mbetet Presidente deri vitin e ardhshëm

Marrëveshja mes Hashim Thaçit, Isa Mustafës dhe Behgjet Pacollit, për zgjedhjet presidenciale, tashmë është shkelur. Arsim Bajrami thotë se ndryshimet kushtetuese për zgjedhjen e Presidentit nuk pritet të shkojnë në Parlament para muajit qershor. Kjo pamundëson që Shefi i ri i Shtetit të zgjidhet këtë vit, pasi që, sipas marrëveshjes, zgjedhjet presidenciale duhet të mbahen gjashtë muaj pas miratimit të ndryshimeve kushtetuese.

Afati nëntëmujor që ishte përcaktuar me marrëveshjen mes Hashim Thaçi, Isa Mustafa dhe Behgjet Pacolli, për ndryshimet kushtetuese që kanë të bëjnë me zgjedhjen e Presidentit, tashmë është shkelur, shkruan “Express”.

Por, jo edhe afati i ndryshimeve ligjore për zgjedhjet e përgjithshme parlamentare.

Sipas marrëveshjes mes liderëve të PDK-së, LDK-së dhe AKR-së, e arritur me presionin e ambasadorit Christopher Dell në muajin prill të vitit 2011, muaji janar i këtij viti do të duhej të shënonte edhe përfundimin e ndryshimeve kushtetuese, që do të hapte rrugën për shpalljen e zgjedhjeve për kreun e shtetit.

Në marrëveshjen e nënshkruar nga tre liderët dhe e miratuar në Kuvend, është paraparë që Komisioni të përfundojë mandatin jo më shumë se nëntë muaj (prill 2011 – janar 2012) prej votimit në Kuvend.

Por, ndryshimet nuk pritet të përfundojnë së paku deri në muajin qershor të 2012. Tek pastaj mund të votohen në Kuvend dhe të shpallen zgjedhjet presidenciale. 

Lexo më shumë

BE shtrëngon liberalizimin për Kosovën

Me gjithë dëshirën për të thënë se “detyrat e shtëpisë” për liberalizimin e vizave për Kosovën do të jenë të njëjta me vendet e tjera të Ballkanit Perëndimor, versioni fillestar i “Udhërrëfyesit” të vendit tonë ka nxjerrë në shesh një të vërtetë krejt tjetër.

Një analizë e bërë nga Qeveria e Kosovës e siguruar nga “Zëri” numëron jo pak dallime mes “udhërrëfyesve” që i kanë pasur vendet e rajonit dhe atij që po diskutohet momentalisht mes Komisionit Evropian dhe vendeve anëtare të BE-së.

Qysh në ballinën e analizës qeveritare të emërtuar “Dallimet dhe risitë në draft-udhërrëfyesin e 14 shkurtit 2012”, vlerësohet se dallimet janë substanciale me udhërrëfyesit e vendeve të tjera, por edhe me atë që e kanë hartuar vetë institucionet e Kosovës disa vjet më parë.

“Për dallim nga udhërrëfyesit për Liberalizimin e Vizave (ULV) të shteteve të tjera të Ballkanit Perëndimor, drafti i 14 shkurtit ka dallime substanciale si në qasje ashtu edhe në përmbajtje, të cilat do t’i elaborojmë më poshtë”, është vlerësimi i bërë nga zyrtarët qeveritarë që e kanë analizuar draftdokumentin evropian.

Analiza shtatëfaqeshe e qeverisë ndër të tjera përmend edhe atë që është nënvizuar edhe nga “Zëri” në raportin e së enjtes, është blloku numër tre që flet për luftën kundër korrupsionit. 

Lexo më shumë

Jahjaga fton aktoren Angelina Jolie ta vizitojë Kosovën

Presidentja e Republikës së Kosovës, Atifete Jahjaga ka marrë pjesë në hapjen e Samitit të tretë “Women in the World” (Gratë në Botë) të organizuar nga Newsweek dhe The Daily Beast që po mbahet në New York, ndërkaq me këtë rast takoi ish sekretaren amerikane të shtetit, Madeleine Albright, drejtoren e Fondit Monetar Ndërkombëtar, Christine Lagarde, si dhe ambasadoren e vullnetit të mirë të OKB-së, aktoren Angelina Jolie.

Në samit, ku po marrin pjesë afro 2000 pjesëmarrëse nga gjithë bota, do të diskutohen tema që kanë të bëjnë me sfidat globale të shekullit XXI dhe rolin e gruas në çështjen e sigurisë dhe lidershipit.

Jahjaga me ish sekretaren amerikane të shtetit, Madeleine Albright, bisedoi për çështjet aktuale për Kosovën.

Në hapje të konferencës, Albright duke folur në panelin “Çmimi i luftës” ndau me të pranishmit përvojën e saj të fëmijërisë si refugjate e Luftës së Dytë Botërore, duke e krahasuar atë me eksodin e refugjatëve gjatë kohës së luftës në Kosovë dhe vendet e tjera të ish-Jugosllavisë.

Albright e cilësoi ndërhyrjen e bashkësisë ndërkombëtare në Kosovë si të drejtë, ndërkaq rikujtoi përkushtimin e administratës së ish Presidentit Clinton për t’i dhënë zgjidhje meritore çështjes së Kosovës.

Ndërkaq, në darkën solemne të shtruar nga organizatori i Samitit, presidentja Jahjaga u takua me drejtoren e Fondit Monetar Ndërkombëtar, Christine Lagarde si dhe ambasadorin e Britanisë së Madhe në SHBA, Peter Westmacott.

Ajo gjithashtu takoi edhe aktoren e njohur amerikane, njëkohësisht ambasadoren e vullnetit të mirë të OKB-së, Angelina Jolie, të cilën e ftoi që ta vizitojë Kosovën për të parë mundësitë e zhvillimit të kinematografisë në vend.

Në njoftimin e Presidencës thuhet se Jahjaga, është liderja e vetme femër nga Ballkani e ftuar në këtë Samit dhe në dy ditët e ardhshme do të flas në panele për përvojat e saj në lidhje me ndikimin e gruas në sigurinë e vendit.

Presidentja Jahjaga do të marrë pjesë në panelet “Siguria është detyrë e gruas” si dhe në panelin “Lideret Gra Botërore” ku do të diskutohet për ndikimin global në avancimin e pozitës së gruas si dhe rolin e saj në sigurinë ndërkombëtare dhe lokale.

Lexo më shumë