Thirrjet ndërkombëtare për të adresuar të gjitha rastet që kanë të bëjnë me parregullsitë gjatë zgjedhjeve të fundit në vend, u ritheksuan sërish javën e kaluar në Raportin e fundit për Kosovën të Parlamentit Evropian.
Eurodeputetja Ulrike Lunacek shfaqi shpresën që rezoluta në fjalë do të nxisë dinamikën e punës në zgjidhjen e rasteve që kanë të bëjnë me manipulimet në zgjedhje.
“Jo vetëm se duhet të qartësohen parregullsitë gjatë votimeve e që keqpërdoruesit të vihen para drejtësisë, por ne gjithashtu u kërkojmë politikanëve që reformat e premtuara zgjedhore dhe kushtetuese të përfundojë me kohë”, tha Lunacek në një prononcim dhënë Radios Evropa e Lirë.
Ajo bëri të ditur se rezoluta e cila u miratua në komitetin për marrëdhënie të jashtme të legjislativit evropian, do të jetë e plotfuqishme pas miratimit në seancën e radhës plenare të këtij mekanizmi që pritet të mbahet në muajin mars.
Po në këtë muaj apo në fillim të prillit, Kuvendit të Kosovës mund t’i paraqiten amendamentet e bëra nga Komisioni për ndryshime në Ligjin mbi zgjedhjet. Në këtë komision, që nga themelimi në muajin maj të vitit të kaluar, thuhet se rëndësi e veçantë i është kushtuar çështjeve kryesore për të cilat mendohet se janë burime të keqpërdorimeve.
Mirëpo, njohësit e procedurave zgjedhore në Prishtinë akuzojnë partitë politike për mungesë të vullnetit politik për të këmbëngulur në zgjidhjen e rasteve që kanë të bëjnë me manipulimet në zgjedhjet e 12 dhjetorit të 2010-tës.
