Ministri i Financave, Bedri Hamza, ka thënë se nuk mund të diskutohet për kredi nga FMN-ja, po qe se nuk aprovohen rekomandimet e kërkuara. E gjithçka varet nga marrëveshja paraprake të cilën Qeveria e Kosovës e ka me këtë institucion. “Është pjesë e marrëveshjes me FMN-në. Janë tri veprime paraprake për shqyrtim në bord, dy kanë përfunduar, ndërsa e treta ka të bëjë më ligjin për bankat dhe institucionet mikrofinanciare. Ky është veprim paraprak, as marrëveshja me bordin e FMN-së nuk mund të kalojë po qe se nuk miratohet ligji”, ka thënë Hamza.
Ai ka theksuar se mosalokimi i 20 milionë eurove deri në shpalljen e fituesit nga procesi i privatizimi të FMN-së dhe aprovimi i Ligjit për fondin e Trustit Pensional, kanë qenë dy rekomandimet e përmbushura me sukses. Ministri i Financave ka theksuar se nuk i takon Qeverisë që të ndërhyjë në procedurat e Kuvendit për të kaluar Ligjin e bankave dhe mikrofinancave. “Qeveria ka aprovuar me kohë këtë projektligj, i ka kaluar të gjitha procedurat edhe në komisionet funksionale. Është nën autoritetin e Kuvendit të vendoset për miratimit e tij”, ka theksuar Hamza, shkruan Koha Ditore.
Fundi i muajit prill është afati kur të gjitha rekomandimet e Fondit Monetar Ndërkombëtar drejtuar Qeverisë duhet të jenë të aprovuara. Rëndësinë e miratimit të Projektligjit për bankat dhe mikrofinancat, Hamza e ka përmendur edhe para deputetëve gjatë seancave plenare.
Opozita ka kundërshtuar procedimin e mëtejmë të versionit të projektligjit, duke e konsideruar atë të papranueshëm dhe në kundërshtim me praktikat dhe ligjet ndërkombëtare në fuqi. Kthimi i organizatave joqeveritare në biznese fitimprurëse për partitë opozitare është veprim kundërligjor.
