“Natyrisht që fjalët e Bekim Haxhiut nuk kanë asnjë të vërtetë brenda, e kushdo e kupton se përmes këtyre shpifjeve ai kërkon që të heqë vëmendjen prej pyetjeve tona mbi takimin e Thaçit me Tadicin, personin që disa ditë më parë deklaroi se ‘Kosova është tokë serbe’”, thuhet në reagim.
Molliqaj thekson se para se të fillonte “me shpifje, në seancën e sotme të Kuvendit të Kosovës, për dallim nga Thaçi, Bekim Haxhiu e pranoi se këto takime kanë ndodhur”.
Duke i përsëritur pyetjet e Lëvizjes “Vetëvendosje”, Molliqaj e ka ftuar kryeministrin Hashim Thaçi që, siç thotë ai, të mos shmanget përmes Haxhiut apo të tjerëve, por të përgjigjet në dhjetë pyetjet e tyre.
Në seancën e Kuvendit, Haxhiu ka kërkuar sqarime nga Kurti për disa takime, siç pretendon ai, që ka pasur me serbët në komunën e Klinës, pastaj gjësendet që i janë gjetur atij në një rast të ndalimit nga Policia e Kosovës, po ashtu ka kërkuar shpjegim se si edhe pas lirimit nga burgu, Albin Kurti ka mbajtur korrespondenca me një femër serbe, e cila e kishte vizituar edhe gjatë kohës sa ai ishte në burg. Po ashtu, ai ka kërkuar sqarime për rastin, sipas tij, të pranimit të një pakoje nga Serbia.
