“Çelësi muzikor 6” po troket

Kanë nisur përgatitjet për festivalin “Çelësi muzkior” i cili këtë vit do të organizohet për të gjashtën herë radhazi.
Këtë vit do të ketë emra të njohur dhe këngëtarë të rinj në natën garuese të këtij festivali.
Ashtu si vitin e kaluar, artistët që jetojnë në Evropë do të kenë mundësinë të konkurrojnë në “Rinora 4” më 11 maj, ndërsa edhe artistët që jetojnë në Amerikë dhe Kanada do të jenë pjesëmarrës në këtë garë kënge.
Nata finale parashikohet të mbahet më 30 maj. 

Çka vidhet nëpër hotele

Hotelet e ndryshme nëpër botë kanë humbje miliona dollarëshe nga gjërat me vlera të ndryshme të cilat i “zhdukin” mysafirët.
Në botë flitet pa kompleks në lidhje me gjësendet e vlefshme të cilat çdo ditë vidhen kryesisht nga dhomat e hoteleve luksoze. Situatën absurde më së miri e përshkruan rasti i disa turistëve anglezë të cilët vjedhjen e peshqve të artë nga një hotel luksoz, janë munduar ta arsyetojnë me atë se ato ju ndihmojnë më mirë për zgjidhjen e problemeve me stresin.
Arsyetimet bizare nuk kanë fund, pasi mediat kanë arritur të kuptojnë se nga një hotel i zinxhirit Starwood është zhdukur një piano, ndërsa një çift amerikan kishte arritur që gjithë inventarin e dhomës ta fusë në furgon dhe ta dërgojë në drejtim të panjohur. Në të dyja rastet, stafi i hotelit kishte menduar se këtë e kishin bërë punëtorët që rregullojnë dhomat.
Një drejtor i një hoteli në SHBA ka treguar se një çift kishte kërkuar dhomë pranë parkingut, me arsyetimin se ishin duke u bartur dhe dëshironin të kenë kujdes ndaj gjërave të tyre. Ndërkaq, mëngjesin e radhës, pastruesja e dhomës kishte vërejtur se qëllimi kishte qenë bartja e gjithë inventarit të dhomës, i cili ishte zhdukur së bashku me çiftin në fjalë.
Sipas një hulumtimi të realizuar në Britani të Madhe, nga të ashtuquajturat vjedhje të përditshme, më së shpeshti mungojnë tepihët, dritat, pasqyrat dhe mbulesat. Ndërkohë, në SHBA shpesh zhduken edhe librat e përshtypjeve të mysafirëve, varëset, mantelet dhe peshqirët, me ç’rast për shkak të vjedhjeve të shpeshta, drejtuesit e hoteleve duhet të shpenzojnë disa herë më shumë në raport me buxhetin e planifikuar në fillim.
Edhe pse në peshqirët në të shumtën e rasteve ndodhet emri dhe logoja e hotelit, zinxhiri amerikan i hoteleve Holiday Inn, brenda vitit humbet rreth 560.000 peshqirë si pasojë e vjedhjeve, ndërsa aty përfshihet edhe zhdukja e madhe e jorganëve, çarçafëve dhe jastëkëve. Besoni ose jo, në kuadër të gjërave të vjedhura nga hotelet përfshihen edhe llambat e dritës, madje edhe dirigjuesit e televizorëve dhe bateritë e tyre.
Nuk është e rrallë edhe zhdukja e rubineteve, fotografive dhe televizorëve, të cilët nuk është edhe aq lehtë për t’i nxjerrë nga dhoma. Objekt i shpeshtë i vjedhjes janë edhe lapsat dhe blloqet me logo të hoteleve, të cilat mysafirët i marrin për të kujtuar vendin ku ka kanë kaluar pushimet.
Krahas gjësendeve të përmendura, në listën ‘e nxehtë’ të prioriteteve të hajnave të hoteleve hyjnë edhe tharëset e flokëve, telefonat, aparatet për kafe, radiot, hekuri etj. 

Ushqimi vegjetarian zvogëlon rrezikun për katarakt

Personat të cilët konsumojnë më rrallë produkte të mishit, janë më pak të rrezikuar nga zhvillimi i kataraktit- turbullimit të thjerrëzës së syrit.
Sipas të dhënave të grumbulluara nga shkencëtarët pranë Universitetit të Oxfordit në një studim 15 vjeçar, katarakti ishte i pranishëm te 3 nga 50 persona që rregullisht konsumonin mish, ndërsa te vegjetarianët katarakti paraqitej te 2 nga 50 persona.
Studimi në të cilin kanë marrë pjesë 27.000 participantë të moshave mbi 40 vjeç, pohon se vegjetarianët dhe veganët kanë 30 deri në 40 për qind rrezik më të ulët për shfaqjen e kësaj sëmundjeje të syrit, në raport me njerëzit që nuk e përjashtojnë mishin nga ushqimi i tyre.
Nga faktorët e rrezikut për zhvillimin e kataraktit përmendim: mosha e shtyrë, duhanpirja, diabeti dhe ekspozimi ndaj dritës së fortë të diellit.

HTC One X, S dhe V vijnë në Evropë

Këtë vit, në Kongresin Botëror Mobil në Barcelonë, HTC ka lansuar disa modele të reja të telefonave të mençur, nën linjën e re të quajtur “HTC One”.
Me siguri se modelet më të famshme të kësaj linje për momentin janë HTC One X, One S dhe One V, për të cilët faqja Unëired thotë se do të vijnë në Evropë, që nga 2 prilli i këtij viti.
Sipas të gjitha gjasave, këto tri modele të reja të telefonave HTC One do të paraqiten fillimisht në Gjermani, Zvicër dhe Austri, për të pasuar më pas edhe në vendet tjera evropiane.
Bazuar në informacionin e fundit, HTC One X do të kushtojë 599 euro, One - S 499 euro, ndërsa HTC One V do të jetë model më i lirë, i cili do të kushtojë rreth 299 euro.

Dell del nga tregu i smartphonëve

Dell po tërhiqet nga tregu i celularëve. Nga kompania kanë konfirmuar se është ndërprerë prodhimi i smartphonëve të kompanisë Venue dhe Venue Pro.
Pajisjet do të mbesin ende në dispozicion në Japoni dhe Kore, por kompania nuk ka në plan të kryej zëvendësimin e modeleve ekzistues me modele të rinj. Këtë vit Dell do të lansoj edhe disa pajisje mobile, por nga kompania nuk konfirmouan nëse bëhet fjalë për smartphone, që sugjeron edhe se ndoshta do të orientohen kah tabletët.
Dell në tregun mobil hyri me disa modele të bazuar në Android, dhe me modelin Venue Pro të bazuar në Windows Phone i cili ka tastierën harduerike QWERTY. Kompania në ofertë ka edhe tabletët me Android, e investimet më të mëdha në këtë kategori priten pas paraqitjes së Windows 8.

Largoni stresin duke shkatërruar gjithçka me tanke!

Një agjenci turistike në Zelandën e Re u mundëson klientëve të vet që të ulen në tanke dhe me të të shkelin veturat, motoçikletat apo çfarëdolloj objekti që gjendet në poligon.
Kompania “Tanks for Everything” ka tetë tanke, të cilat mund t’i shfrytëzojnë klientët për të “çliruar frustrimin”.
“Nëse keni pasur një ditë të keqe, kjo është një mënyrë e mirë për t’u shkarkuar”, ka deklaruar pronari i kompanisë. 

Kalon Atlantikun me lundër

Hungarezi Gabor Rakonczay është njeriu i parë, i cili e ka kaluar oqeanin Atlantik me lundër.
Ai ka lundruar nga Evropa deri në Karaibe për 76 ditë, ndërsa rreth 50 ditë ka mbetur pa komunikim, duke qenë se lundra e tij është rrotulluar dhe uji ia kishte dëmtuar radion.
Rakonczay e ka filluar aventurën më 21 dhjetor në Lagos të Portugalisë, ndërsa disa ditë ka pushuar në ishujt Kanare, dhe të dielën ka mbërritur në ishullin Antigua.
30-vjeçari ka arritur që ta përfundojë rrugëtimin e tij pa sistem të navigacionit satelitor, i cili do t’ia tregonte drejtimin.
Ndërkohë që rreth shtatë javë nuk ka kontaktuar me familjen e tij, por të gjithë kishin shpresuar se ai është mirë dhe se do ta kryejë me sukses aventurën që kishte filluar. 

Kitara në formë të anijeve kozmike (Video)

Admiruesi i muzikës, Tom Bingham, është duke prodhuar kitara nga materialet e ndryshme, ndërsa më interesantet janë ato të frymëzuara nga “Star Wars”.
64-vjeçari me këtë hobi merret qe dhjetë vite, ndërsa deri më tani ka ndërtuar rreth 20 kitara.
Instrumentet i krijon nga pjesët e automjeteve të vjetra, kutitë e cigareve, shkrepëset, orët, hapësit e shisheve dhe materiale të tjera.
“E vëzhgoj botën sikur e tëra mund të shndërrohet në kitarë. Nëse diçkaje mund t’i vendos një qafë dhe në të të fsheh pjesët elektronike, atëherë mundem që nga ajo të krijoj një kitarë”, ka thënë Bingham.
Nga kitarat interesante të tij janë ato që u ngjajnë fluturakeve nga filmat “Star Wars”, ‘Millennium Falcon’ dhe ‘Jedi Anakin Fighter’.

Macja shfaqet në ndeshjen e basketbollit (Video)

Në ndeshjen e basketbollit mes Maccabi TelAviv dhe Bnei HaSharon është shënuar një detaj i pazakontë, kur një mace është paraqitur në terren, ndërkohë që pas saj vrapoi njeriu me maskë në formë të qenit.
‘Donny’ filloi ta ndiqte macen, megjithatë ajo ia doli që të ikte dhe të zhdukej mes tifozëve. 

Çeku takon pjesëmarrës të “Kartës së Adriatikut”

Ministri i Forcës së Sigurisë së Kosovës, Agim Çeku, zhvilloi disa takime bilaterale me disa prej delegacioneve pjesëmarrës, në ditën e parë të Konferencës “SHBA-Karta e Adriatikut”, që filloi në Shkup të Republikës së Maqedonisë.

Ministri Çeku fillimisht u takua me delegacionin e Shteteve të Bashkuara të Amerikës të udhëhequr nga zonja Celeste Walender, zëvendës sekretare e Mbrojtjes për Rusi, Ukrainë dhe Euro-Azi. Po ashtu ministri i FSK-së Agim Çeku u takua edhe me ministrin e Mbrojtjes së Republikës së Kroacisë, Ante Kontromanovic, pastaj me atë të Malit të Zi, Milica Pejanovic-Gjurisic si edhe me delegacionin e Ministrisë së Mbrojtjes të Sllovenisë të kryesuar nga Primoz Savc, drejtor gjeneral i Drejtoratit të Politikave të Mbrojtjes.
Në të gjitha këto takime që zhvilloi ministri Çeku dhe delegacioni i ministrisë së FSK-së me homologët u bisedua për bashkëpunimin regjional si edhe për mbështetjen për proceset për FSK-në në NATO.

Rama: Të papranueshme zgjedhjet serbe në Kosovë

Kryetari i Partisë Socialiste Edi Rama, priti të mërkurën ambasadorin e Republikës së Kosovës në Tiranë, Sylejman Selimi.
Gjatë takimit Rama rikonfirmoi qëndrimin e Partisë Socialiste, në mbështetje të popullit, Qeverisë dhe kryeministrit të Kosovës si dhe siguroi ambasadorin Selimi për vullnetin e plotë të forcës politike që ai drejton, sa i përket forcimit të mëtejshëm të bashkëpunimit mes të dyja vendeve.
Kreu i socialistëve shprehu admirim dhe respekt për kurajon dhe vizionin e luftëtarëve të UÇK-së e për arritjet e Qeverisë së Kosovës, në drejtim të ngritjes dhe konsolidimit të institucioneve shtetërore si dhe të forcimit të pozitës ndërkombëtare të saj, raportojnë mediat.
Sipas Ramës, organizimi i zgjedhjeve serbe në Kosovë është një akt i papranueshëm dhe i paligjshëm dhe në këtë kuadër ai mbështet pa rezerva qëndrimin e Qeverisë së Kosovës. Gjithashtu, gjatë takimit Rama përshëndeti arritjet e rëndësishme të Kosovës, në drejtim të avancimit të agjendës evropiane.
Nga ana e tij, Ambasadori Selimi, falënderoi Partinë Socialiste për mbështetjen e vazhdueshme ndaj Kosovës dhe shprehu bindjen se bashkëpunimi do të intensifikohet më tej në të ardhmen. 

Haxhiu: “Reformat zgjedhore” nuk kanë qëllim mbrojtjen e votës

Deputetja nga radhët e Lëvizjes Vetëvendosje, Albulena Haxhiu deklaroi para deputetëve të Kosovës se Komisioni për reformë zgjedhore me ndryshimet e propozuar në Ligjin për Zgjedhjet nuk ka qëllim mbrojtjen reale të votës së qytetarëve, por ndryshimet e bëra janë vetëm sipërfaqësore.
Ajo në seancën plenare të Kuvendit u shpreh se në vend asnjëherë nuk ka pasur zgjedhje të mirëfillta, ndërkaq sipas saj degradimi i votës që qytetarëve ndodhi në zgjedhjet e fundit, duke e shtrembëruar edhe rezultatin e zgjedhjeve.
Sipas saj, të gjitha amendamentet e propozuar nga Komisioni zgjedhor për reformim të sistemit zgjedhor si çështja e largimit të posterëve të vendosur gjatë fushatës, kohëzgjatja e fushatës për 20 ditë, trajnimi i vëzhguesve nuk lidhen direkt me mbrojtjen e votës së qytetarëve.

Falsifikatori i dokumenteve në hierarkinë e lartë të Qeverisë

Një veturë e vjedhur në Stokholm të Suedisë po kërkohej në gjithë botën nga Interpoli. Të gjitha të dhënat e saj ishin postuar në faqen e internetit të Policisë Ndërkombëtare. Ishin bërë tre vjet prej 31 marsit të vitit 2000, kur vetura nuk po gjendej kurrkund.
Por, rreth 2000 kilometra larg këtij shteti skandinav, kjo veturë e tipit “Jeep Grand Cherokee” po bënte rrugë nëpër Kosovë. Atë po e ngiste prej kohësh një zyrtar i Kosovës - Astrit Haraqija, shkruan “Koha Ditore”.
Haraqija, që tash mban pozitën e zëvendësministrit të Financave në Qeverinë e Hashim Thaçit, me këtë veturë të vjedhur në Suedi e me dokumente false ishte nisur drejt Shqipërisë më 24 shkurt 2003.
Në atë kohë mbante pozitën e shefit ekzekutiv të Komunës së Gjakovës, kur në pikën kufitare ndërmjet Kosovës dhe Shqipërisë ishte ndalur nga Policia e Kosovës.
Gjatë një kontrolli të dokumenteve ishte konstatuar se autorizimi për ngasje ishte i falsifikuar dhe se Policia kishte rënë në veturën që po kërkohej prej tre vjetësh nga Interpoli. Automjetin e kishte konfiskuar.
Ky zëvendësministër tashmë me vendim gjykate është i gjykuar dhe shpallur fajtor si falsifikator i dokumentit zyrtar. E, megjithatë, vendimi i gjykatës nuk i ka dalë pengesë që të përfshihet në Qeverinë e Hashim Thaçit, që kishte ardhur në pushtet me zotimin për të luftuar krimin dhe korrupsionin.
Xheladin Osmani, gjyqtar në Gjykatën komunale në Prizren e konfirmon procedurën penale dhe dosjen kundër Astrit Haraqisë.
Ai kishte nxjerrë aktgjykim duke e shpallur fajtor zëvendësministrin për veprën penale të falsifikim dokumentit dhe kishte vendosur me urdhër ndëshkimor sipas kërkesës së Prokurorisë publike komunale të Prizrenit.
Gjoba ishte modeste,megjithatë konstatonte se Haraqija ishte falsifikator.
I dënuari nuk ishte pajtuar me aktgjykimin. Ai ishte ankuar në shkallën e dytë, në Gjykatën e Qarkut në Prizren. Mirëpo, një kolegj penal i kësaj gjykate kishte refuzuar ankesën e Haraqisë si të pabazuar dhe e kishte vërtetuar në tërësi aktgjykimin e Gjykatës komunale të Prizrenit.
Pas këtij aktgjykimi, falsifikatori nuk është ndalur me kaq. Kishte bërë kërkesë në Gjykatën Supreme të Kosovës për mbrojtje të ligjshmërisë.
Një vit më venë, kolegji penal prej tre gjyqtarësh i udhëhequr nga Rexhep Haxhimusa, më 10 shtator 2008 kishte nxjerr aktgjykim duke e pranuar si të bazuar kërkesën për mbrojtje të ligjshmërisë.
Me këtë aktgjykim Supremja kishte ndryshuar aktgjykimin e formës së prerë të Gjykatës komunale të Prizrenit dhe vërtetuar nga Gjykata e Qarkut për shkak të shkeljes së ligjit penal, konkretisht të nenit 332, paragrafi 3, lidhur me paragrafin 1.
Ky kolegj kishte hequr paragrafin 3, duke e lënë vetëm paragrafin 1. Me këtë kishte konstatuar se vepra penale ishte përshkruar në mënyrë absolute. Por në asnjë pikë nuk ka vënë në dyshim kryerjen e veprës penale.

Krasniqi i painteresuar për postin e Presidentit

Kryetari i Kuvendit të Kosovës, Jakup Krasniqi ka deklaruar se nuk pritet të mbahen sivjet zgjedhjet presidenciale, ndërkaq ka thënë se nuk ka ambicie për t’u bërë president i shtetit.
Në një intervistë për gazetën “Express”, Krasniqi ka folur edhe rreth zgjedhjeve brenda partiake.
Ai ka thënë se ende nuk ka vendosur nëse do të kandidojë për kryetar të PDK-së, mirëpo sipas tij, zgjedhjet në parti duhet të mbahen në pjesën e dytë të vitit.
Sipas Krasniqit, të gjitha partitë politike duhet të demokratizohen. 

Qeveria s’mund t’i ndalë ekstradimet

Serbia nuk e ka ndërmend të ndalojë hakmarrjen ndaj Kosovës dhe kosovarëve, duke përdorur çfarëdo forme të mundshme.
Një prej këtyre formave është lëshimi i urdhërarresteve ndërkombëtare, kryesisht kundër ish-luftëtarëve të UÇK-së, viktima të të cilave deri më tash kanë qenë edhe jo pak zyrtarë të lartë kosovarë.
Rasti i fundit është ai i Shemsi Nuhiut, i cili ndonëse i lindur në Preshevë, ai kishte vetëm nënshtetësi kosovare. Sidoqoftë, në bazë të kërkesës së bërë nga Serbia, shteti zviceran që është ndër të parët që ka krijuar marrëdhënie diplomatike me Kosovën, e dërgoi Nuhiun në Beograd.
Ai atje u prit në kuadër të një ceremonie të veçantë që më shumë i ngjante një show televiziv, në krye të të cilit ishte ministri i Brendshëm serb, Ivica Dacic, që është edhe pasuesi i Slobodan Milloshevicit në krye të Partisë Socialiste serbe.
Avokati i Shemsi Nuhiut, Ludovik Tirelli, i ka thënë “Zërit” përmes telefonit se ka raste të caktuara kur një shtet sado ka marrëdhënie të mira me Kosovën, nuk mund të përgjigjet negativisht në kërkesat për ekstradim nga Serbia. “Zvicra është një vend që e respekton Kosovën si shtet i pavarur, por ka raste kur për shkak të nënshkrimit të traktateve ndërkombëtare për ekstradim, në 98 % të rasteve duhet plotësuar kërkesat për ekstradimin e atyre që i kërkon p.sh. Serbia”, ka thënë Tirelli.
Ai ka sqaruar se shteti kosovar përfshi, edhe Ambasadën e Kosovës në Bernë, e kanë ndihmuar atë si avokat të Nuhiut, por edhe EULEX-i, por prapëseprapë askush nuk ka mundur të bëjë më shumë për të ndryshuar dërgimin e ish-ushtarit të UÇK-së në Beograd.
Përpjekjet e Kosovës në këtë drejtim i ka përmendur edhe zëvendëskryeministri i Kosovës, Hajredin Kuçi, i cili megjithatë nuk pajtohet në tërësi me avokatin Tirelli.
“Përpjekjet në ndihmë jo vetëm të Shemsi Nuhiut, por edhe të gjithë të tjerëve që përballen me kërkesat për ekstradim në Serbi nuk do ndalojnë. Sidoqoftë, më duhet të them se vendimi për dhënien fund njëherë e përgjithmonë të plotësimit të kërkesave serbe për ekstradim apo arrestim varet nga shtetet dhe institucionet ndërkombëtare, veç e veç”, ka thënë Kuçi.

Musa Ramadani fitoi Çmimin “Azem Shkreli”

Juria Profesionale për vlerësimin dhe ndarjen e Çmimit Kombëtar Letrar për Vepër Jetësore “Azem Shkreli” dhe për Çmimet Vjetore për Letërsi, ka vendosur që për vitin 2011 Çmimi Kombëtar Letrar për Vepër Jetësore “Azem Shkreli” t’i ndahet prozatorit, poetit dhe dramaturgut Musa Ramadani.
Ndërkohë, në kategoritë tjera, çmimet kanë shkuar për këta autorë: Çmimi Letrar për veprën më të mirë në prozë i është ndarë Eqrem Bashës me veprën “Lakorja e ik’sit”; Çmimi Letrar për veprën më të mirë në poezi i është ndarë Sali Bashotës me veprën “Dorëshkrimi i ngjallur”.
Adil Ollurit i është ndarë Çmimi Letrar për veprën më të mirë në kritikë me veprën e tij “Romani postmodern shqiptar; ndërkaq, Çmimi letrar për veprën më të mirë të përkthyer i është ndarë Smajl Smakës, për përkthimin e veprës ‘Tabuti i Sarajevës” të shkrimtarit Abdullah Sidran.
Juria që ishte në përbërje nga Rifat Ismaili, Engjell I. Berisha, Qibrie Demiri, Jonuz Fetahaj, Bajram Rugovali, ka vlerësuar se poeti dhe prozatori Musa Ramadani me krijimtarinë e vet ka ndikuar në avancimin e kulturës së shkrimit dhe zhvillimin e formave të reja shprehëse që u qëndrojnë pranë veprave të mëdha të letërsisë evropiane.
Po ashtu, juria vlerëson se Ramadani me veprën e tij shumëdimensionale e përmbushi misionin e krijuesit të përkushtuar, që nëpërmjet artit ta kultivojë dhe afirmojë botën e etnisë në përmasa qytetëruese, njerëzore.
Ndarja e Çmimit Kombëtar Letrar për vepër jetësore “Azem Shkreli” dhe Çmimet Vjetore për Letërsi, janë të parapara me një rregullore që mban po këtë emër, e që është nxjerrë në vitin 2009.
Ministria e Kulturës, Rinisë dhe Sportit pritet që shumë shpejt të organizojë edhe ceremoninë e ndarjes së këtyre çmimeve.

Kurti: Serbia nuk ndryshon pa presion ndërkombëtar

Lideri i Lëvizjes Vetëvendosje, Albin Kurti, ka kërkuar që Bashkimi Evropian t’i bëjë më tepër presion Serbisë, pasi sipas tij, mënyra se si ajo trajtohet aktualisht, nuk e ndryshon Beogradin.
Këto komente Kurti i bëri të mërkurën në Prishtinë, gjatë takimit me zëvendës drejtorin e përgjithshëm të drejtoratit për zgjerim në Komisionin Evropian, Joost Korte.
Përfaqësuesit e Vetëvendosjes shpalosën qëndrimin e Lëvizjes se pa luftimin e strukturave ilegale të Serbisë në Kosovë nuk mund të ketë integrim të qëndrueshëm institucional e shoqëror të pakicës serbe në Kosovë.
Në takim është diskutuar edhe për zhvillimet e fundit politike në Kosovë, me theks të veçantë në sfidat e Republikës së Kosovës në rrugën drejt BE-së.
Në njoftim theksohet se të dy palët vlerësuan se për të gjitha qëndrimet është e dobishme t’i vazhdojnë debatet dhe diskutimet edhe në të ardhmen, me qëllim të përparimit politik, shoqëror dhe ekonomik në Kosovë.

Zagrebi dhe Prishtina thellojnë bashkëpunimin

Nxitja e programeve ekologjike më theks të veçante në mbrojtjen e mjedisit, nxitja e bashkëpunimit në fushën e infrastrukturës, urbanizmit dhe trashëgimisë kulturore në mes të Prishtinës dhe Zagrebit janë pikat kyçe të marrëveshjes për miqësi dhe bashkëpunim, që kryetari i Prishtinës, Isa Mustafa dhe kryetari i Zagrebit, Milan Bandiq kanë nënshkruar të mërkurën në kryeqytetin kroat.
Mustafa po qëndron për një vizitë zyrtarë në kryeqytetin kroat me ftesë të kryetarit të Zagrebit, Bandiq, ku përveç nënshkrimit të marrëveshjes se bashkëpunimit në mes të dy qyteteve, po diskutohet edhe për projektet konkret për fusha të ndryshme.
Sipas një komunikate për media, Mustafa dhe Bandiq, theksuan se është nënshkruar marrëveshja për miqësi dhe bashkëpunim në mes të dy qyteteve, e cila sipas dy kryetarëve thelon bashkëpunimin në shumë fusha.
Përveç takimit me kryetarin e Zagrebit, kryetari Mustafa me ftesë të Filarmonisë se Zagrebit ka marrë pjesë në koncertit e kësaj që u zhvillua të martën në mbrëmje.

Gega: Salihu ma ofroi revolen ta vras Jusuf Gërvallën

Hysen Gega, ish i burgosur politik, në një intervistë për Kosova Sot ka folur për aktivitetin e tij në emigracion në Gjermani dhe njohjen e tij me Riza Salihun, i cili kishte agjituar kundër Jusuf Gërvallës. Ai tregon se si Salihu i kishte ofruar revolen që të vriste Jusuf Gërvallën.
“Riza Salihu thoshte dhe propagandonte se Jusufi (Gërvalla) është agjent i UDB-së. Pohimet e tij më shtynë që unë të bëja pyetje në ambasadën shqiptare në Vjenë se mos kishin ndonjë fakt për Jusufin. Aty atëherë ishte njëri që më duket se quhej Simon Qirici, sekretar i parë, ndërsa vetë ambasadori ishte farefis me Avni Rrustemin. Prej tyre mora garancinë se Jusufi është i pastër dhe se mund të bashkëpunonim lirisht e pa asnjë rezervë me të. Ata madje edhe na rekomandonin bashkëpunimin”, ka thënë Gega për Kosova Sot.
“Është me rëndësi ta theksoj edhe një fakt, sepse sot po thuhet gjithçka. Asnjëherë nga kjo ambasadë nuk na është folur për dogma ideologjike, por vetëm për histori e literaturë kombëtare, për heronj e ngjarje të lavdishme nga rezistenca e popullit tonë. Ata vetë na thoshin që të mos merreshim as me Marksin, as me Leninin dhe as me Stalinin, po me historinë e kombit tonë, me Azem Bejtën, Mic Sokolin, Isë Boletinin e Hasan Prishtinën, me arsyetimin se çështja kombëtare është para çështjes klasore. Me t’u kthyer nga Vjena takova Riza Salihun dhe i thashë që të mos merrej me thashetheme, me akuza të rreme e me shpifje ndaj bacës Jusuf. I propozova që të shkonim së bashku në ambasadën shqiptare e të dëgjonte vetë se ç’thuhej aty për Jusuf Gërvallën. Ai parimisht pranoi, ndërsa kur i shkova të nesërmen në banesë për ta realizuar këtë gjë, mbeta i tronditur kur në korridorin e tij dëgjova se si flitej serbo-kroatisht. Vetëm shumë kohë më vonë mora vesh se ai kishte qenë i martuar me një femër nga Kroacia dhe kishin një fëmijë me të. Nuk kam ndonjë paragjykim rreth kësaj lidhjeje të tij përveç faktit se na e kishte mbajtur plotësisht të fshehur. Në këtë rast ai nuk pranoi që të shkonim bashkë në Vjenë, me arsyetimin se po i dhembte syri, me gjithë ngulmimin tim se unë do të vozisja dhe ai vetëm do të rrinte i qetë”, ka thënë Gega.
“ Megjithatë, edhe pas këtij episodi ai vazhdonte shpifjet e tij kundër Jusuf Gërvallës, duke shkuar aq larg sa në një rast më tha: ‘I vjen keq se s’ka kush e bën, sepse ai madje e meriton edhe plumbin”, duke nxjerrë me këtë rast edhe revolen e duke më thënë: “Ja merre këtë dhe vrite, sepse ai e meriton plumbin”, propozim të cilin ia refuzova me fjalët: ‘Më mirë mbaje për vete, sepse mund të të duhet ndonjë ditë për të vrarë veten’”. Për këtë përcaktim të Rizait pastaj informova Ibrahimin, Jusufin dhe Bardhin”, ka thënë Gega. 

Avancohen marrëdhëniet me Irlandën e Veriut

Presidentja e Kosovës, Atifete Jahjaga, priti sot në takim një delegacion të Kuvendit të Irlandës Veriore, të kryesuar nga kryetari i tij, zotëri William Hay, i cili shoqërohej edhe nga ambasadori i Britanisë së Madhe në Kosovë, Ian Cliff.
Presidentja Jahjaga tha se Irlanda Veriore ka dhënë kontribut të çmuar për Kosovën, në proceset e saj të shtet ndërtimit dhe vlerësoi marrëdhëniet shumë të mira ndërmjet Kuvendit të Republikës së Kosovës dhe të Irlandës Veriore. Ajo tha se dy vendet kanë edhe gjëra të përbashkëta, por që të dyja i kanë tejkaluar dallimet e së kaluarës duke e ndërtuar të ardhmen.
Jahjaga tha se Republika e Kosovës synon anëtarësimin në BE, meqë kjo do të ndihmonte që të gjitha vendet e rajonit të Ballkanit të ecin drejt një të ardhmeje të përbashkët, si shtete të pavarura dhe sovrane. Ajo tha se anëtarësimi në BE është garanci për paqen dhe stabilitetin në rajon, thuhet në kumtesën e lëshuar nga Presidenca.
“Pavarësia e Kosovës është një realitet i pakthyeshëm dhe se qëllim kryesor është politika e fqinjësisë së mirë me të gjitha vendet e rajonit. Zbatimi i planit Ahtisaari në gjithë territorin e Republikës së Kosovës është zgjidhja më e mirë dhe ky plan i ofron komunitetit serb një gamë të gjerë të të drejtave”, tha Jahjaga.
Kryetari i Kuvendit të Irlandës Veriore, William Hay, citohet të ketë thënë se pret ndërtimin e marrëdhënieve të fuqishme ndërmjet Republikës së Kosovës dhe Irlandës së Veriut, përmes shkëmbimit të përvojave mes dy kuvendeve. 

Dacic aplikon reciprocitet në arrestime

Ministri serb i Punëve të Brendshme, Ivica Dacic, ka thënë se arrestimi i katër serbëve është shembull klasik i “paturpësisë dhe presionit” mbi serbët e Kosovës dhe ka paralajmëruar masa reciproke, në mesin e të cilave është edhe arrestimi i dy shqiptarëve mëngjesin e sotëm tek Dheu i Bardhë, në kufirin Kosovë – Serbi.

“Nëse dikush dëshiron të bëjë gara kemi edhe ne përgjigjen tonë. Është e turpshme se çfarë toleron komuniteti ndërkombëtar, është turp të arrestohen njerëzit, të cilët nuk kanë bërë asnjë vepër penale dhe tani shtrohet pyetja si janë duke u zbatuar në fakt marrëveshjet e arritura”, u ka thënë Dacic gazetarëve në Beograd.
Të arrestuarit janë Hasan Abazi, kryetar i Sindikatës së Industrialistëve të Kosovës, i cili ishte nisur për në Kroaci dhe Adem Murseli.
Abazi është arrestuar, sipas Dacicit, nën dyshimet për “spiunazh” dhe bazuar në një fletë arrest të lëshuar nga “gjykata e qarkut në Gjilan”, kurse Murseli për “tregti me drogë” bazuar në një fletë arrest të lëshuar nga drejtoria e Policisë në Beograd, raporton REL.
Në pikë kalimin kufitar Dheu i Bardhë, Policia e Kosovës ka arrestuar të martën katër serbë, nën dyshimet se kanë shkelur rendin juridik të Kosovës. Tek të arrestuarit, në mesin e të cilëveështë edhe kryetari i komunës paralele në Viti, autoritetet e rendit kanë gjetur material zgjedhor të Serbisë.

UGK dënon kërcënimin ndaj “Express”

Unioni i Gazetarëve të Kosovës (UGK) është tejet i shqetësuar me kërcënimin e hedhjes së bombës që i është bërë gazetës “Express” nga persona ende të panjohur.
Ky kërcënim është bërë pasi që në numrin e sotëm të gazetës është botuar tema me titull “Pompat e ujit?”, ku flitet për kompanitë e naftës që janë dënuar nga Ministria e Tregtisë për shitjen e karburanteve të përziera me ujë, thuhet në reagimin e UGK.

UGK e dënon ashpër një akt të tillë të kërcënimit dhe konsideron se shkrimi i gazetës ka qenë në nivel të lartë profesional dhe nga kjo shihet qartë se kërcënimi është bërë nga grupe të ndryshme të interesit të cilat janë prekur nga e vërteta e publikuar në gazetën “Express”.
Për UGK-në këto akte janë të papranueshme, andaj i bëjmë thirrje organeve të hetuesisë së Policisë së Kosovës që sa më parë të merren dhe rastin dhe autorët e këtij kërcënimi direkt t’i vë para organeve të drejtësisë, pare se nga njerëz të tillë të pësoj gazetarët dhe mediet.

Kreu ilegal i Zveçanit i vendosur për mbajtjen e zgjedhjeve

Kryetari ilegal i Komunës së Zveçanit, Dobrosav Dobric, ka deklaruar sot se në atë komunë do të organizohen zgjedhjet lokale dhe parlamentare të Serbisë, “pavarësisht nga paralajmërimet e Prishtinës se do të arrestojë serbët që do t’i organizojnë ato”.
"Ne kemi të drejtë të organizojmë zgjedhje demokratike dhe nuk do të presim që këtë ta bëjnë për neve shqiptarët”, i ka thënë Dobric agjencisë Beta.
Ai ka thënë se serbët do të organizojnë zgjedhje për institucionet serbe dhe vetë do të zgjedhin përfaqësuesit e tyre pa pritur që “shqiptarët të vendosin njerëz të blerë dhe të dëgjueshëm”.
"Policia e Kosovës nuk mund të arrestojë 100 mijë serbë dhe ne nuk i frikësohemi kësaj” , tha Dobric, duke potencuar se arrestimet e djeshme të serbëve në vendkalimin kufitar Dheu i Bardhë dhe në Vushtrri janë bërë me qëllim të frikësimit të qytetarëve dhe me porosinë se për ata nuk ka vend në Kosovë. 

Policia serbe arreston sindikalistin kosovar

Sindikata e pavarur e metalistëve të Kosovës përmes një kumtese ka njoftuar se me datë 28.03.2012 rreth orës 9:30 të mëngjesit te Dheu i Bardhe janë arrestuar nga policia serbe kryetari i Sindikatës Industriale, Hasan Abazi dhe kryetari i Sindikatës së pavarur energjetike të Kosovës, Izet Mustafa, të cilët ishin duke udhëtuar për në Zagreb.
Të dy sindikalistët ishin duke udhëtuar për takimin e organizatave anëtare të Federatës Industriale për të ardhmen e punëtorëve evropian (EIWF) i cili do të mbahej në Zagreb më 29 dhe 30 mars 2012.
Zyrtarët të Sindikatës së pavarur të metalistëve të Kosovës kanë konfirmuar për Telegrafin arrestimin e dy sindikalistëve, ndërkohë që theksuan se nuk dihen arsyet për arrestimin e tyre, dhe nuk dihet se ku ndodhen ata.
Ndryshe, gazeta Jeta në Kosovë shkruan se Hasan Abazi, kryetari i Sindikatës së Metalistëve të Kosovës, është arrestuar nga policia serbe në bazë të një fletarrestimi të lëshuar nga Gjykata paralele e Qarkut në Gjilan, në vitin 2005, .
Abazi ishte duke udhëtuar për në Kroaci me udhëheqësin e sindikatës së Korporatës Energjetike të Kosovës, KEK, Izet Mustafa, për të marrë pjesë në një konferencë të sindikatës evropiane.
Sipas JNK-së, që shkruan se është arrestuar vetëm Abazi dhe jo Mustafa, ky i fundit thuhet se ka treguar se bashkudhëtari i tij ishte arrestuar në pikën kufitare “Dheu i Bardhë”, në afërsi të Gjilanit, nga një pjesëtar i policisë kufitare të Serbisë, i përkatësisë shqiptare etnike.
Abazi tashmë është dërguar në paraburgim në Vranje të Serbisë. Slagjan Velinovic, shefi i Policisë në Vranjë, tha për JNK se Abazi ishte arrestuar dhe ishte duke u marrë në gjykatë në Vranjë, ku ai do të paraqitet para gjykatësit hetues.
Velinovic refuzoi të komentonte mbi arsyet e arrestimit të tij, deri sa Abazi të merret në pyetje nga gjyqtari.
Por një burim i Gazetës Jeta në Kosovë saktëson se Abazi është arrestuar në bazë të një fletarrestimi të Gjykatës paralele të Qarkut në Gjilan, të lëshuar që në vitin 2005. Ai dyshohet për “spiunazh”, sipas nenit 305 të Kodit Penal të Serbisë.
65-vjeçari ka qenë ishte aktivist politik në vitet 1990-ta në Kosovë dhe ka shërbyer dy herë në parlamentin paralel të Ibrahim Rugovës.
Haki Abazi, i biri i Hasanit, i cili është drejtor i programit të Rockefeller Brothers për Ballkanin Perëndimor, tha se familja është e shqetësuar për sigurinë e Hasanit.
Vladimir Jovicic, zëvendës kryesuesi i ekipit negociator të Serbisë në bisedimet Beograd-Prishtinë, i tha Gazetës JnK se ai nuk ka dëgjuar për këtë arrestim, por theksoi se policia e Kosovës ka arrestuar katër serbë të martën në mbrëmje.

Kabashi priti kryeprokurorin bavarez

Kryeprokurori i Shtetit dhe njëherësh Kryetar i Këshillit Prokurorial të Kosovës, Ismet Kabashi, priti sot në takim një delegacion nga Prokuroria Publike e Mynihut - Landi i Bavarisë, i kryesuar nga Ragnar Schneider, kryeprokuror dhe udhëheqës i Departamentit të Luftës kundër Narkotikëve në Prokurorinë Publike të Mynihut.
Në këtë takim Kabashi i njoftoi mysafirët me prioritetet dhe me synimet që ka, si kryeprokuror i Shtetit dhe si kryetar i Këshillit Prokurorial të Kosovës, si dhe për fazën nëpër të cilën është duke kaluar sistemi prokurorial i Republikës së Kosovës, me theks të veçantë për strukturën e re organizative të Prokurorit të Shtetit, e cila strukturë do të fillojë së funksionuari nga 1 janari i vitit 2013.
Gjithashtu u bisedua edhe për punët, sfidat dhe problemet, me të cilat ballafaqohen prokuroritë në të dyja vendet, si dhe për mundësitë e thellimit të bashkëpunimit në mes dy vendeve në përpjekjet për luftimin e krimit të organizuar, thuhet në njoftimin e lëshuar nga takimi.
Një temë tjetër për të cilën u bisedua ishte edhe mundësia e bartjes së çështjeve ekzistuese të ndjekjeve penale dhe hetimeve që po zhvillohen kundër shtetasve kosovarë në kuadër të ndihmës juridike, nga organet e drejtësisë gjermane tek organet e drejtësisë në Republikën e Kosovës.

Delegacioni nga Gjermania u prit edhe nga Aleksandër Lumezi - kryeprokuror i Prokurorisë së Qarkut në Prishtinë.

Zgjedhjet në veri rrezikojnë sigurinë në Ballkan

Ministri i Punëve të Jashtme të Kosovës, Enver Hoxhaj në ditën e parë të vizitës zyrtare në Itali, ka thënë se nuk duhet të ketë zgjedhje serbe në veri, duke vlerësuar se kjo do të rrezikonte tërë arkitekturën e sigurisë, paqes dhe stabilitetit në Ballkan
Në një ligjëratë para studentëve, profesorëve dhe diplomatëve në Universitetin “La Sapienza” në Romë, Hoxhaj ka folur për zhvillimet e fundit në Kosovë dhe dinamikën e integrimeve evropiane.
Duke shpjeguar rrugën e gjatë që ka bërë populli i Kosovës deri në shpalljen e pavarësisë, ministri i Jashtëm ka theksuar se dëbimi i më se një milion shqiptarëve, dhjetëra mijëra të vrarë dhe spastrimi etnik, kishte për qëllim ndryshimin e shifrave demografike në Kosovë.
“Serbia asnjëherë nuk e ka qarë kokën për popullatën në Kosovë. Asaj i ka interesuar gjithmonë vetëm territori. Kjo politikë e spastrimit etnik është ndaluar, me intervenimin humanitar të NATO-së dhe ka sjell paqe, siguri dhe stabilitet në Ballkan dhe Evropë”, ka shtuar ministri.
Hoxhaj ka falënderuar kontributin e Italisë për shtetndërtimin e Kosovës dhe për pjesëmarrjen e madhe të forcave ushtarake në kuadër të KFOR-it.
“Shpallja e pavarësisë së Kosovës mbi gjitha është storie evropiane e suksesit”, ka theksuar Hoxhaj, duke folur edhe për drejtat e komuniteteve në Republikën e Kosovës, të cilat rrjedhin nga Pakoja e Ahtisaarit.
“Republika e Kosovës, në katër vjetët pas pavarësisë ka arritur të akomodojë komunitetet në nivel qendror dhe lokal. Sot, komunitetet në Kosovë kanë të drejta më të avancuara se çdo komunitet tjetër në Evropë”, ka shtuar Hoxhaj.
Duke folur për paralajmërimin e Beogradit për mbajtjen e zgjedhjeve lokale në tri komunat e veriut të Kosovës, ministri Hoxhaj ka thënë se mbajtja e tyre do të rrezikonte sigurinë në Ballkan.
“Nuk duhet të ketë zgjedhje serbe në veri. Kjo do të rrezikonte tërë arkitekturën e sigurisë, paqes dhe stabilitetit në Ballkan”, ka thënë Hoxhaj.
Ministri Hoxhaj ka folur edhe për perspektivën evropiane, duke theksuar se fillimi i studimit të fizibilitetit për Republikën e Kosovës, shënon hapin më të rëndësishëm drejt aspiratës së dy milionë kosovarëve për t’u bërë pjesë e Bashkimit Evropian.
Në Universitetin “La Sapienza”, ministri Enver Hoxhaj ka zhvilluar edhe një takim me Antonello Biagini, zëvendësrektor për Marrëdhënie Ndërkombëtare dhe shumë profesorë të këtij Universiteti, ku është biseduar për thellimin e bashkëpunimit në fushën e arsimit.
Pas dite, ministri Hoxhaj do të takohet me ministrin e Punëve të Jashtme të Italisë, Giulio Terzi.

VV: Vetëm retorikë për liberalizimin e vizave

Zyrtarë të lëvizjes Vetëvendosje theksuan se Kosova është vendi i vetëm në rajon që nuk ka përfituar nga proces i liberalizimit të vizave, duke vlerësuar se retorika e Qeverisë së Kosovës doli të jetë boshe, për të disatën herë me radhë, pasi ende nuk ka shënuar asnjë hap drejt këtij proces.
Alma Lama nga lëvizja Vetëvendosje theksoi se Qeveria e Kosovës kishte premtuar se do të merrte udhërrëfyesin për viza në muajin mars, mirëpo në vend të tij mori mesazhin që ta luftojë korrupsionin dhe krimin e organizuar.
“Tashmë është fare e qartë se korrupsioni dhe krimi që kanë mbërthyer institucionet, e në radhë të parë qeverinë e Kosovës janë shkaktarët e vërtetë të izolimit të qytetarëve të Kosovës. Dje e vërteta doli në shesh, kur komisioneri i Bashkimit Evropian për zgjerim, Stefan Fule tha shprehimisht ‘duhet të bëhen reforma domethënëse në sigurinë e dokumenteve, migracionin dhe menaxhimin e kufijve, luftës ndaj krimit të organizuar dhe korrupsionit”, u shpreh Lama.
Por sipas saj, situata është edhe më e rëndë. Ajo vlerëso se Kosova pa dyshim mund të quhet një shtet i kapur nga elementët kriminalë, me një sistem drejtësie të kontrolluar politikisht e të korruptuar, dhe me institucione që do të duhej të ishin të pavarura, por që kontrollohen nga qeveria dhe struktura parainstitucionale.
Sa i përket fillimit të studimit të fizibilitetit, Lama tha se ky shtë një proces që është bërë një herë për Kosovën në vitin 2009, por meqë nuk ishte gjetur rrugëdalja politike për të, ka dështuar.
“Por duhet të jemi të vetëdijshëm se edhe pse u prezantua fillimi i këtij procesi, BE-ja nuk e ka gjetur ende formulën legale për të bërë marrëveshje me Kosovën dhe për të hyrë në marrëdhënie kontraktuale”, tha Lama, duke shtuar se bëhet fjalë vetëm për nja skanim të gjendjes politike ekonomike, sundimit të ligjit, tregtisë etj, por jo edhe për ndonjë garanci për të hyrë në marrëveshjen e Stabilizim – Asociimit.
Sipas saj, Qeveria ka lëshuar pe në dialog me Serbinë pa përfituar asgjë në raport me BE-në, ndërkohë që Serbisë ia mundësoi të marrë statusin e vendit kandidat.

AGPK dënon kërcënimet ndaj gazetës "Express"

Asociacioni i Gazetarëve Profesionistë të Kosovës (AGPK) ka marrë me shqetësim njoftimet se persona të panjohur kanë kërcënuar se do të hedhin bombë në lokalet e të përditshmes “Express”.
Gjatë gjithë paradites të së mërkurës persona të ndryshëm që janë prezantuar si përfaqësues të naftëtarëve kanë kërcënuar se do të “hedhin gazetën në erë”, pas publikimit të një artikulli ku njoftohet se MTI ka dënuar kompanitë Petrol Company, Baci Kompani, Delta Group, Rek Oil, Agro Kabashi, Usa Sh.p.k, kompania Kastrati dhe NP Pajtimi për cilësi të dobët të karburanteve, thuhet nw reagimin e AGPK-sw.
AGPK i bënë thirrje Policisë së Kosovës, misionit të EULEX-it dhe të gjitha institucioneve tjera të drejtësisë që të zbardhin këto kërcënime.
AGPK dënon fuqishëm këtë akt dhe çdo lloj kërcënimi që iu bëhet gazetarëve për shkak të kryerjes së punës së tyre. AGPK konsideron se kërcënimi i gazetarëve paraqet shkelje të lirisë së shprehjes dhe lirisë së informacionit, të drejta këto shumë të rëndësishme për funksionimin e demokracisë.

Kuçi: Në veri jemi të sfiduar

Gjatë ditë së djeshme, Policia e Kosovës ka arrestuar katër serbë, të cilëve u është konfiskuar material zgjedhor. I pyetur se a mund të ketë arrestime të tilla edhe në veri të vendit, zëvendëskryeministri i Kosovës, Hajredin Kuçi ka thënë se veriu paraqet një sfidë, por ka shtuar se Policia e Kosovës dhe EULEX-i e kanë mandatin për të vepruar edhe në atë pjesë.
“Ju e dini, qeveria e Kosovës i ka shpallur ilegale ato zgjedhje. Natyrisht, organizatorët e tyre, apo tentuesit për organizim, do të trajtohen për veprimet e tyre ilegale, sipas ligjit. Edhe trajtimi i tillë është sipas prokurorisë dhe gjyqësorit, por e kanë mandatin e plotë t’i trajtojnë si veprime ilegale, kudo që ata takohen në cilën do pjesë të territorit të Republikës së Kosovës. Në veri jemi të sfiduar më shumë sesa në pjesët e tjera, por kur ka mundësi policia e Kosovës, EULEX-i e kanë mandatin për veprime tilla”, ka deklaruar Kuçi në një konferencë shtypi, pas mbledhjes së sotme të Qeverisë së Kosovës. Ai këto komente i ka bërë, duke u përgjigjur në pyetjen e gazetarëve për arrestimet e serbëve, të cilët po fusnin material zgjedhor në Kosovë dhe mundësinë e arrestimeve të tjera në veri të Kosovës, transmeton Kosovapress.
Ndërsa në lidhje me deklaratat e Komisioneri për zgjerim të BE-së Stefan Fule për veriun e Kosovës, Kuçi ka thënë se kjo është sqaruar dje që nuk ka një plan sekret për veriun.
“E para ka qenë mirë që komisioneri Fule ka treguar që nuk ka plan sekret sikur që është propozuar për veriun dhe besoj se kjo u pa qartë. Dhe e dyta, po ashtu, besoj me të drejtë që është në dorën e Kosovës si e mendon atë plan dhe ne mendojmë që plani i Ahtisaarit, Kushtetuta e Kosovës bashkëpunimi ynë me qytetarët serb atje është zgjidhja më e mirë në atë pjesë të Kosovës”, ka thënë ai.

Prokurimi më i korruptuari

Agjencia Kundër Korrupsion e Kosovës, gjatë viti 2011, ka marrë 160 informacione të rasteve të korrupsionit, në të cilat janë të përfshira gjykatat dhe prokuroritë, si dhe institucionet tjera të vendit. Kështu bëri të ditur shefi i kësaj agjencie, Hasan Preteni, pas dorëzimit të raportit vjetor në qeverinë e vendit.
Në raport janë përfshirë të gjitha rastet që kanë të bëjnë me vepra penale të korrupsionit si dhe mos deklarimit të pasurisë nga personat zyrtarë. Shefi i Agjencisë Kundër Korrupsion të Kosovës, Hasan Preteni, tha se në 39 raste të përcjella në prokurori, janë denoncuar 121 persona, raporton RTK
“Fusha më e atakuar nga dukuria e korrupsionit, mbetet ajo e prokurimit”, tha Preteni.
Sipas tij, 11 raste korruptive janë evidentuar nëpër gjykatat të vendit, 60 të tjera në institucione të pavarura, 30 në Qeveri, 56 raste të pushtetit lokal si dhe 3 raste në prokuroritë e vendit.
Preteni, tha se vlera totale e dëmeve nga veprimet e mundshme korruptive, nga të cilat janë bërë 39 kallëzime penale, supozohet të jetë mbi 10 milion euro.