Të dhënat e importit, të cilat Gazeta Express i ka marrë nga Doganat e Kosovës, tregojnë se qindra mijëra kilogramë qumësht pluhur importohen çdo vit në Kosovë, në mënyrë të rregullt. Pjesa më e madhe thuhet se destinohet për kompanitë përpunuese të qumështit. E Agjencia Ushqimit dhe Veterinarisë së Kosovës, deklaron se vetëm një kompani për prodhimin e akulloreve e shfrytëzon këtë produkt.
Në mesin e kompanive që më së shumti punon me qumësht pluhur, zyrtarë të Doganave të Kosovës në kushte anonimiteti thonë se është kompania për prodhimin e qumështit Vita, Devolli Group.
Por, përfaqësuesit e kësaj kompanie kanë mohuar për Gazetën Express, duke thënë se nuk e përdorin qumështin pluhur për prodhimin e qumështit.
Statistikat e doganës tregojnë se gjatë vitit 2011 kanë ardhur nga importi më shumë se 113 mijë kilogramë qumësht pluhur. Ndërsa vendi më i madh prej nga furnizohen kosovarët del të jetë Holanda me 41 mijë kilogramë dhe Bosnja e Hercegovina me 16 mijë kilogramë.
