Elefantët urdhërohen në dietë!

Menaxhmenti i cirkut zviceran “Knie” ka vendosur që të hedhë në dietë tre elefantë, të cilët duhet të humbin nga 50 deri 300 kilogramë, sepse i konsiderojnë me mbipeshë.
Tages Anzeiger raporton se veterinarët i kanë peshuar elefantët në një peshore speciale të cilën e përdorin doganierët për caktimin e tonazhit të kamionëve dhe kanë vërejtur se Sabu, Siri dhe Rani kanë tepricë kilogramësh.
Dietës më rigoroze duhet t’i nënshtrohet Sabu, 28-vjeç, i cili peshon 4.3 tonelata, ndërsa i duhet të humbë 300 kilogramë.
Për dietën e elefantëve, veterinarët kanë menduar një formë të ushqyerjes, e cila njëkohësisht do t’i detyrojë ata që të ushtrojnë çdo ditë. Në fakt, ushqimi do t’u vendoset në fuçi mbi kokat e tyre, ashtu që elefantët do të duhet të zgjaten për ta arritur atë. 

Në garë vallëzimi në moshën 102-vjeçare (Video)

Victoria Harvey është 102-vjeçarja e cila është duke u stërvitur për të marrë pjesë në një garë vallëzimi.
Në një prononcim për ABC News, Harvey e cila vjen nga shteti amerikan Utah, ka thënë se vallëzon tango që nga mosha 15-vjeçare dhe se vallëzimi e mban në jetë.
“Mendoj se është një ushtrim i përsosur fizik dhe më duket se vallëzimi më ndihmon të hapem pakëz më shumë ndaj njerëzve tjerë”, ka thënë 102-vjeçarja, ndërsa transmeton Huffington Post. 
 

Foshnja 31-vjeçare

Amerikani Stanley Thornton i ka kaluar 18 vitet e fundit të jetës së tij duke u sjellë si një foshnje e madhe e rritur, duke mbajtur pelena dhe duke fjetur në një krevat të vogël.
31-vjeçarit i pëlqen të mendojë se i ka dy vjet dhe i pëlqen tavolina për foshnja në të cilën e konsumon ushqimin.
“Ndjehem sikur nëna më përqafon gjithnjë kur mbaj pelena. Mendoj se do të sillem si foshnje gjithë jetën time... Mendoj se djepi është gjëja më e rëndësishme në jetë”, citon The Sun fjalët e Stanleyt. 

Hoxhaj “zëvendëson” Tahirin

Paralajmërimet se bisedimet e ardhshme Kosovë-Serbi nuk do të jenë të karakterit teknik por të atij politik, dhe se njëra nga temat e bisedimeve do të jetë veriu i vendit, kanë shtyrë kryeministrin e vendit, Hashim Thaçi, që të mendojë për ndërrimin e delegacionit të bisedimeve.
Burime të afërta me Qeverinë e Kosovës, i kanë thënë “Zërit” se shefi i qeverisë kosovare është duke menduar që ta “pensionojë” kryenegociatoren e deritashme, Edita Tahiri, dhe ta zëvendësojë me një person tjetër.
“Kryeministri po pretendon që ta shkarkojë Editën, e në vend të saj ta emërojë Enver Hoxhajn. E në Ministrinë e Jashtme do të vijë ministrja e Tregtisë dhe Industrisë, Mimoza Kusari-Lila, me çka AKR-ja do ta marrë edhe një ministri të re, përveç Ministrisë së Tregtisë dhe Industrisë të cilën gjithashtu do ta udhëheqë kjo parti”, ka thënë burimi.
Ky person sqaron se vërejtjet që i ka shprehur opozita e shoqëria civile në shumë pika që kanë të bëjnë me zëvendëskryeministren Tahiri, qoftë sjellja e saj karshi Serbisë, apo shpenzimet e mëdha, duke përfshirë edhe udhëtimin në Shqipëri për 8 mars ku janë shpenzuar pesëdhjetë mijë euro, ia kanë mbushur mendjen kryeministrit që të mendojë për ndryshime.

A do të hapë rrugë Jahjaga?

Pas përfundimit të procedurave për ndryshimet kushtetuese, qëndrimi i Presidentes Atifete Jahjaga do të jetë vendimtar kur është fjala për shpalljen e zgjedhjeve presidenciale në vend.
Në fund të majit pritet që deputetët t’i miratojnë amendamentet e ndryshuara, por, zgjedhjet presidenciale nuk mund të shpallen nëse nuk jep dorëheqje Atifete Jahjaga, shkruan “Express”.
Kjo paralajmërohet edhe nga deputetët e Kuvendit të Kosovës, të cilët thonë se fjala e Presidentes do ta drejtojë procesin nëse zgjedhjet presidenciale mund të mbahen sipas marrëveshjes së partive politike apo në bazë të mandatit pesëvjeçar, që shefja aktuale e shtetit e ka sipas Kushtetutës së vendit.
Presidentja Jahjaga nuk pritet të deklarohet për ndryshimet kushtetuese, derisa nuk e kthen përgjigjen Gjykata Kushtetuese rreth kushtetutshmërisë së propozimeve të deputetëve. “Derisa të mos kryhen procedurat për ndryshimet kushtetuese ne nuk deklarohemi”, ka thënë zëdhënësi i Presidencës, Arbër Vllahiu.
Megjithatë, deputeti i Lëvizjes Vetëvendosje, Afrim Kasapolli, i cili është pjesë e Komisionit për Ndryshimet Kushtetuese, thotë se Presidentja mund të mos e pranojë shkurtimin e mandatit.
Ai thotë se është në vullnetin e saj nëse do të pranojë të përfundojë mandatin kushtetues pjesë vjeçar. Por, thekson se shkurtimi i mandatit është antikushtetues.
Ndërkaq, anëtarja tjetër e Komisionit Kushtetues, Vjosa Osmani thotë se deri tash gjithçka ka shkuar në pajtueshmëri dhe pret që zgjedhjet presidenciale të mbahen këtë vit.
“Edhe në vetë amendamentet kushtetuese thuhet se brenda gjashtë muajsh kryetari i Kuvendit shpall zgjedhjet presidenciale, që i bie më së largu në nëntor do të mund të mbaheshin zgjedhjes të mund të mbaheshin zgjedhjet sipas kësaj dinamike që është përcaktuar deri më tani”, ka thënë Osmani.
Edhe kryetari i Komisionit, Arsim Bajrami thotë se varet nga partitë politik se kur do të shkojnë në zgjedhje.

Haliti: Muralet në Kuvend, janë kopje dhe të pavlera

Në vitin 2004, pas përfundimit të renovimit të sallës së Kuvendit të Kosovës, u vendosen tri piktura me përmbajtje kombëtare shqiptare. Asokohe kjo ishte mirëpritur nga qytetarët e Kosovës dhe nga shumica e deputetëve të Parlamentit.
Mirëpo, deputetët serbë të ish koalicionit “Kthimi” i cilësuan si monoetnike dhe sipas tyre duhej të largoheshin nga Kuvendi i Kosovës. Kjo, edhe u realizua, pasi që në shenjë pakënaqësie ata i bojkotuan seancat e rregullta të Kuvendit.
Ndërkaq, tash e sa vjet këto piktura vazhdojnë të jetë të mbuluara dhe askush nuk merret me to. Sipas zv/kryeministrit të Kosovës, Hajredin Kuçi, kjo është çështje e Kuvendit të Kosovës, e jo e Qeverisë. “Kjo është kompetencë e Kuvendit të Kosovës”, tha ai për “Tribuna Shqiptare”.
Pikturat e vendosura në hollin e Kuvendit të Kosovës janë kopje që nuk kanë asnjë vlerë artistike, ka thënë për “Tribuna Shqiptare”, nënkryetari i Kuvendit, Xhavit Haliti. Sipas tij, në objektin e Kuvendit duhet të ketë piktura me vlera arti e jo kopje dhe kiç. 

Problemi i Kosovës është korrupsioni

Një raport i fundit që studion përparimin e 128 vendeve në zhvillim dhe në tranzicion, Fondacionit Bertelsmann, arrin në përfundimin se shumë vende po e ulin gjithnjë e më shumë lirinë politike. Vendet e rajonit të Evropës Juglindore janë në mesin atyre ku një dukuri e tillë është më e theksuar. Ndërsa Kosova vlerësohet si vendi më i varfër në rajon.
Indeksi i Transformimit, një tregues i shoqëruar nga një raport dyvjeçar (2009-2011), i Fondacionit Bertelsmann, me qendër në Gjermani, shqyrton prirjet kryesore politike, sociale dhe ekonomike të 128 vendeve të përfshira në raport.
Përsa i takon Kosovës, në raport thuhet se tre vjet pas pavarësisë është arritur sukses i konsiderueshëm, por ende mbeten shumë sfida. “Përfaqësuesit e zgjedhur vazhdojnë ta ndajnë pushtetin me praninë ndërkombëtare, ndërsa integriteti territorial dhe siguria ruhen nga KFOR-i”.
Në raport thuhet theksohet se problemi kryesor me të cilin përballet administrata është korrupsioni shumë i përhapur, ndërsa një problem tjetër është politizimi i administratës publike me klientë politikë që mbajnë pozita të ndryshme pa kualifikimin e duhur.
Duke folur për zgjedhjet e vitit 2010, raporti thekson se ato u dëmtuan nga shumë raste mashtrimesh dhe manipulimesh, raporton VOA.
Sfida më e madhe për vendin është ekonomia, ku rritja nuk ka qenë e mjaftueshme për të luftuar varfërinë dhe papunësinë. Kosova mbetet vendi më i varfër në rajon. Ekonomia informale, korrupsioni dhe shteti ligjor i dobët janë pengesat kryesore për një ekonomi tregu funksionale.
Kosova radhitet e 41-a mes 128 vendeve përsa i takon treguesit të statusit në përgjithësi me një vlerësim 6.28 pikë. Përsa i takon transformimit politik, Kosova zë vendin e 43-ë me 6.70 pikë dhe transformim ekonomik me 5.86, në vendin e 58-ë. Përsa i takon treguesit të menaxhimit, që mat cilësinë e qeverisjes, Kosova është e 57-a me 5.35 nga 10 pikët e mundshme.

Reali, ishull super luksoz në Emirate

Klubi mbretëror spanjoll, Real Madrid, ka marrë vendimin që të ndërtojë një ishull superluksoz në Emiratet e Bashkuara Arabe, projekt që do të kushtojë hiç më pak se një miliard dollarë.
Projekti do të inaugurohet në vitin 2015 dhe ajo që madrilenët e quajnë ‘parajsë’ të tyre lokacionin e ka në ishullin Al Marjan në Emiratet e Bashkuara Arabe. Më poshtë mund të gjeni disa prej detajeve të këtij ishulli.

- Përmasa gjigante prej 430 mijë m²
- 60 Vendpushime superluksoze
- 48 vila gjigante me plazh privat
- Jahte luksoze me klube nate
- Një park madhështor
- Një hotel me 5 yje dhe me 450 dhoma
- Nje muze të Real Madridit
- 400 apartamente
- Stadiume sportive për seanca stërvitore
- Stadium ku do të zhvillohen ndeshjet me kapacitet prej 10 000 spektatorëve.

“Reali le të qajë në park”

Mbrojtësi i Villarrealit, Angel Lopez, i ka dhënë një ide gjithë stafit të Real Madridit, duke përfshirë dhe tifozët që të qajnë nëpër parqe për gabimet e gjyqtarit në sfidën që përfundoi me barazim.
“Ata janë duke tentuar të bëjnë presion në gjyqtarët për ndeshjet e tyre të radhës. Ne mund të themi se Lassana Diarra është dashur të përjashtohej dhe se ne është dashur të fitojmë një penalti, por ne nuk mund të bëjmë asgjë”.
“Siç e thonë nga vendi ku jam rritur, ata mund të shkojnë dhe të qajnë në park. Ne jemi me fat që gjyqtari pati aq shumë personalitet. Unë e njoh gjyqtarin Paradas dhe ai më përjashtoi edhe mua sikurse Ozilin”, ka thënë Lopez.

Galliani pendohet për Tevezin

Zëvëndëspresidenti i Milanit, Adriano Galliani, pendohet që nuk e ka transferuar sulmuesin e Manchester Cityt, Carlos Tevez.
“Një tren i tillë nuk kalon për herë të dytë. E pash Tevezin në formë të lartë. Edhe pas gjashtë muaj mos lojë, ai erdhi dhe ndryshoi lojën, ndihmoi Cityn ta fitojë një ndeshje kruciale”.
“Por, ne jemi të kënaqur me Maxi Lopez, ai po bën mirë. Unë gjithmonë do të jem në dashuri me Tevezin, ne e kemi dashur atë në ekip, por fati vendosi ndryshe”, ka thënë Galliani.

Ibra dhe Silva të gatshëm për Romën

Zlatan Ibrahaimovic dhe Thiago Silva kanë marrë dritën e gjelbërt për t’u paraqitur në ndeshjen e të shtunës ndaj Romës.
Sulmuesi suedez ishte në dyshim për Romën pasi u zëvëndësua në pjesën e dytë të ndeshjes me Juventusin për një problem në shpinë, teksa i lënduar u largua edhe Thiago Silva.
Sidoqoftë, Tuttosport raporton se Thiago Silva dhe Ibrahimovic janë kthyer në kohë për supersfidat e Rossonerëve, teksa janë rikthyer edhe Alexander Merkel, Alessandro Nesta dhe Kevin-Prince Boateng.
Ndeshja zhvillohet të shtunën në ora 18:00 në San Siro, ku Rossonerët do të kërkojnë të mbesin në krye të klasifikimit në Serie A, para supersfidës ndaj Barcelonës që zhvillohet të mërkurën e ardhshme. 

Projektligji për Hoçën e Madhe, edhe një hap përpara

Amendamentet e Projektligjit për Hoçën e Madhe sot kanë marrë vizën nga Komisioni për Bujqësi, Pylltari, Zhvillim Rural dhe Mjedis e Planifikim Hapësinor. Ndërsa, për harmonizimin e qëndrimeve të këtij projektligji edhe në këtë mbledhje ishin të pranishëm kryeministri Hashim Thaçi dhe përfaqësuesi i ICO-së në Kosovë, Pieter Feith.
Kryetari i këtij Komisioni, Nait Hasani, duke folur për rëndësinë e ligjit dhe kërkoi nga anëtarët e Komisionit të jenë konstruktiv gjatë debatit lidhur me amendamentet e propozuara nga ICO-ja dhe Qeveria e Republikës së Kosovës.
Kryeministri Thaçi, ka thënë se çështja e ligjeve që dalin nga Plani i propozimit gjithëpërfshirës të presidentit Ahtisari për statusin e Kosovës, tejkalon raportet e kornizave pozitë opozitë. Edhe kryeministri apeloi që t’i kushtohet rëndësi procedimit të këtij Ligji duke e konsideruar me interes për vendin, thuhet në kumtesën e lëshuar nga shërbimi për informim i Kuvendit.
Pas kësaj, anëtarët e Komisionit vazhduan së shqyrtuari amendamentet (12 sosh), për të cilat nuk pati ndonjë mospajtim të theksuar (përpos amendamenteve, një, katërt dhe shtatë).
Lidhur me amendamentet, 1, 4 dhe shtatë, përfaqësuesi i ICO-së, Pieter Feith, bëri sqarimet duke arsyetuar propozimet nga ana e institucionit që përfaqëson.
Anëtari i Komisionit nga radhët e Vetëvendosjes, Liburn Aliu, tërhoqi vërejtjen duke thënë se “Nëse u japim kompetenca njerëzve jo kompetentë për mbrojtjen e trashëgimisë kulturore, atëherë, ajo nuk do të mund të mbrohet ashtu siç pretendohet me këtë Projektligj”.
Pas miratimit të amendamenteve nga ana e Komisionit, kryetari Hasani e shpalli të përfunduar procedurën e amendamentimit të Projektligjit për Hoçën e Madhe, i cili në vijim do të shqyrtohet edhe në komisionet e tjera funksionale, dhe së fundmi në mbledhje plenare në Kuvendin e Kosovës. 

Zgjedhjet serbe cenojnë sovranitetin

Mbajtja e zgjedhjeve serbe në Kosovë, qofshin ato lokale, parlamentare apo presidenciale, është e papranueshme dhe në kundërshtim me Kushtetutën e Kosovës, por edhe me parimet dhe ligjet ndërkombëtare, vlerësojnë ekspertët e çështjeve juridike - kushtetuese në Kosovë.
Ata i quajnë jo konstruktive dhe tejet të dëmshme deklaratat e fundit të përfaqësuesit të posaçëm të Bashkimit Evropian në Kosovë, Samuel Zbogar, i cili ka thënë se zgjedhjet lokale serbe në Kosovë janë krejtësisht të papranueshme, por ato parlamentare, sipas tij, mund të mbahen nën organizimin e OSBE-së, duke pasur parasysh që në Kosovë ka qytetarë me shtetësi të dyfishtë.
Por, Riza Smaka, ekspert i çështjeve juridike - kushtetuese, vlerëson se lejimi eventual i mbajtjes së zgjedhjeve parlamentare serbe në Kosovë, ashtu siç thotë në deklaratën e tij Zbogar, është krejtësisht në kundërshtim me principet evropiane, por edhe të drejtën ndërkombëtare.
“Nuk ka bazë. Në shtetin e huaj, kjo është e paprecedentë. Nuk njihet ndonjë rast nga e drejta ndërkombëtare publike, që organizon një shtet zgjedhje në shtetin tjetër. Ata që e kanë dyshtetësinë, kanë pretendime dhe aspirata për të realizuar këtë të drejtë, mund të shkojnë në shtetin tjetër. Do të thotë, serbët le të shkojnë në Serbi dhe lë të votojnë atje, ne qoftë se e kanë dyshtetësinë. Por, jo në Kosovë dhe jo që të organizohen dhe mbahen këtu”, tha Smaka për Radio Evropa e Lirë.
Edhe eksperti tjetër i çështjeve juridike-kushtetuese, Mazllum Baraliu, e quan të papranueshme mbajtjen e çfarëdo zgjedhjeve nga ana e Serbisë në territorin e Republikës së Kosovës.
“Duhet t’i thuhet Zbogarit që ka ligje të shtetësisë, të cilat lejojnë edhe shtetësinë e shumëfishtë, por në asnjë mënyrë nuk lejohet në asnjë shtet, që të mbahen zgjedhjet e një shteti të huaj në një shtet tjetër sovran. Kjo askund në botë nuk lejohet. Është, po ashtu, për keqardhje dhe e papranueshme që OSBE-ja t’i organizojë ato, që tashmë ka status të tij dhe qëndrim neutral ndaj statusit të Kosovës – një organizatë e cila nuk e njeh pavarësinë e Kosovës të autorizohet që të maje zgjedhje, të cilat janë jo legjitime”, thotë Baraliu.
Mbështetja e mbajtjes së zgjedhjeve serbe në Kosovë, nga kushdo qoftë, thotë Baraliu, paraqet cenim të sovranitetit të vendit dhe, sipas tij, institucionet e Kosovës duhet të reagojnë.
Edhe Smaka, vlerëson se institucionet duhet të reagojnë në mënyrë të vendosur përballë organizimit eventual të çfarëdo zgjedhjeve serbe në Kosovë.
Sidoqoftë, zyrtarët e Qeverisë së Kosovës kanë deklaruar se zgjedhjet serbe në Kosovë do të trajtohen si ilegale.
Ndërkaq, Kuvendit i Kosovës, përmes një rezolute, e ka obliguar ekzekutivin e vendit që të mos e lejojë fare mbajtjen e zgjedhjeve serbe në Kosovë. 

Ukraina nuk redukton trupat në Kosovë

Nuk do të reduktohet kontigjenti i paqeruajtësve nga Ukraina në kuadër të KFOR-it, ka thënë Ministri i Mbrojtjes së këtij vendi, Dmitro Salamatin.
"Jo, nuk do të ketë reduktime. Këto nuk janë planifikuar të bëhen këtu", ka thënë ai gjatë vizitës në kampin Bondstell, ku gjendet brigada Shumëkombëshe e Lindjes, njofton portali "KyivPost", transmeton Koha.net.
Njoftohet se 134 pjesëtarë të Ukrainaës shërbëjnë në kuadër të KFOR-it në Kosovë.

EULEX-i nuk negocion lëvizjen në veri

Misioni për Sundimin e Ligjit ( EULEX) edhe njëherë dëshiron të sqarojë faktin se ne nuk kanë qenë të përfshirë në asnjë marrëveshje që kushtëzon lëvizjen e stafit dhe automjeteve të EULEX-it në pjesën veriore të Kosovës. /Telegrafi/
Ka pasur raporte në disa qarqe që EULEX-i ka qenë i përfshirë në një marrëveshje të tillë. Kjo është e pavërtetë. Misioni këmbëngul për qasje të lirë, të pakushtëzuar dhe të përhershme për stafin dhe automjetet e EULEX-it. Kjo është e panegociueshme dhe është një parakusht absolut për misionin për të ndjekur mandatin e tij për sundimin e ligjit në këtë pjesë të Kosovës”, thuhet në kumtesën e lëshuar nga EULEX-i.
Ndërkohë, edhe mëngjesin e sotëm, serbët lokalë kanë bllokuar kalimin e tri makinave të EULEX-it në fshatin Zupç, duke pamundësuar lëvizjen e tyre drejt Bërnjakut.

Misioni paqeruajtës i KFOR-it ka reaguar me masa të njëjta, duke bllokuar komunikacionin në rrugët Zveçan-Zubin Potok dhe Zubin Potok-Mitrovicë.

Veprime të ngjashme kanë ndodhur edhe të mërkurën, si dhe disa herë të tjera në ditët e fundit. 

Zbogar: BE-ja nuk e detyron Kosovën për asgjë

Shefi i Zyrës së Bashkimit Evropian në Kosovë, Samuel Zbogar, ka thënë se BE-ja nuk po imponon asgjë për Kosovën dhe se të gjitha vendimet i merr në mënyrë të pavarur Qeveria e Kosovës.
Gjatë një vizite në Pejë, duke folur rreth për autonomi të veriut, Zbogar ka thënë se BE-ja nuk merr vendime për Kosovën dhe nuk e detyron për asgjë.
“Nuk besoj që Bashkësia Evropian po e detyron Kosovën që të marrë vendime. Kjo është çështje e Republikës së Kosovës, e Qeverisë së saj dhe e popullit të Kosovës. Ne besojmë që rrugët e duhura janë dialogu, bisedimet dhe rruga paqësore e zgjidhjes së problemeve”, ka theksuar Zbogar.
Siç transmeton Qik, ai më tej ka thënë se BE-ja mund ta inkurajojë Kosovën për diçka, të jap këshilla dhe në fund të bëjë vlerësime për përparimet e arritura.
Ai ka thënë gjithashtu se qëndrimi i tij dhe i Bashkimit Evropian është që zgjedhjet serbe nuk do të mbahen në Kosovë.
“Unë besoj shumë se Serbia do ta kuptojë dhe nuk do të organizojë zgjedhje në Republikën e Kosovës. Ne kemi qenë mjaft të qartë dhe shpresoj që ata do ta kuptojnë këtë. Ne jemi vazhdimisht duke i bindur ata që të mos i mbajnë zgjedhjet lokale në Kosovë dhe besojmë që nuk do të ndodhë një gjë e tillë”, ka thënë Zbogar.

Integrimi evropian, synim i përbashkët

Marrëdhëniet ndërmjet dy vendeve, me theks të veçantë në thellimin e bashkëpunimit rreth procesit të Integrimit Evropian ishin çështjet që u trajtuan në takimin e ministres së Integrimit Evropian të Kosovës, Vlora Çitaku me Teuta Arifin, zv/kryeministre për Integrim Evropian në Republikën e Maqedonisë.
Ministrja Çitaku tha që është e domosdoshme që e ardhmja jonë në Bashkimin Evropian të jetë edhe si vazhdimësi e bashkëpunimit rajonal që duhet të kemi më të gjitha vendet fqinje.
Në kumtesën e lëshuar nga takimi, thuhet se ministrja Çitaku ka potencuar progresin e arritur të të dy vendeve mike në të gjitha fushat dhe qasjen ndaj sfidave të përbashkëta dhe mundësitë për t’i kaluar ato në mënyre sa më të suksesshme.

“Kjo nënkupton bashkëpunim të mirëfilltë ndërfqinjësor dhe shkëmbim i mendimeve dhe përvojave ndërmjet nesh, sepse siç dihet pikësynime i të dy vendeve është integrimi në Bashkimin Evropian”, tha Çitaku.
Ndërsa, zv.kryeministrja Arifi tha se është shume e kënaqur më progresin e arritur në Kosovë që nga vizita e fundit dhe përgëzoi ministren Çitaku me rastin e fillimit të Studimit të fizibilitetit për Kosovën, duke shprehur gatishmërinë e ofrimit të mbështetjes në të gjitha fushat sa i përket Integrimit Evropian. 

Këtë vit kartelat biometrike të identitetit

Ministri i Punëve të Brendshme, Bajram Rexhepi theksoi se kartelat biometrike të identitetit janë një ndër parakushtet për liberalizimin e vizave dhe me këtë rast u ka bërë thirrje institucioneve relevante që të japin kontributin e tyre në këtë proces.
Rexhepi këto komente i bëri në takimin konsultativ në prag të nisjes së procesit të përgatitjes për lëshimin e kartelave biometrike të identitetit në kohën digjitale.
Zëvendëskryeministrja, Mimoza Kusari premtoi se ministria që ajo drejton do të jetë e dedikuar në këtë proces.
Ky projekt do të kushtoj diku rreth nëntë milionë euro, por ende nuk është bërë e ditur kostoja që do ta paguaj qytetari. Ndërkaq, prodhimi dhe dhënia e kartave biometrike të identitetit parashihet të bëhet në pjesën e dytë të këtij viti. 

Kosova të bëhet pjesë e Asamblesë së OSBE-së

Modalitetet që Kosova të jetë pjesë e Asamblesë Parlamentare të OSBE-së, janë shqyrtuar në takimin e sotëm të kryeparlamentarit, Jakup Krasniqi me delegacionin e parlamentarëve italianë të Asamblesë së OSBE-së, të kryesuar nga Riccardo Migliori -president i delegacionit italian në Asamblenë Parlamentare të OSBE-së.
Gjatë takimit me kryeparlamentarin Krasniqi, delegacioni italian shtroi edhe për çështjen e zgjedhjeve parlamentare të Serbisë edhe në Kosovë, të cilat do të mbaheshin nën mbikëqyrjen e OSBE-së.
Ndërsa kryekuvendari Krasniqi, përsëriti qëndrimin e tij se “zgjedhjet serbe çfarëdo qofshin ato, lokale ose parlamentare, janë të papranueshme për Kosovën”, thuhet në kumtesën e lëshuar nga takimi.
Anëtarët e delegacionit treguan interesim që marrëdhëniet ndërmjet Parlamentit të Italisë dhe Kuvendit të Kosovës të intensifikohen, duke u angazhuar edhe për formimin e grupit të miqësisë në mes dy parlamenteve.
Delegacioni italian theksoi se është duke shqyrtuar modalitetet që Kosova të jetë pjesë e Asamblesë Parlamentare të OSBE-së.
Në këtë frymë u shtrua nevoja që Komisioni për Punë të Jashtme i Kuvendit të Kosovës të krijojë një grup pune për vendosjen e marrëdhënieve të vazhdueshme me OSBE-në, me qëllim të intensifikimit të marrëdhënieve ndërmjet OSBE-së dhe Kuvendit të Kosovës.
Krasniqi theksoi se Kosova vazhdimisht ka bërë kompromise që nga Rambujeja e deri në bisedimet e Brukselit, ndërkaq, Serbia nuk ka treguar gatishmëri për implementimin e marrëveshjeve të arritura.
Kreu i legjislativit të vendit ngriti pastaj çështjen e të zhdukurve, e cila ende është e pazgjidhur, pasi
Serbia nuk po bën asgjë në këtë drejtim.
Ai tha se shumë shpejt do të formohet Grupi i Miqësisë Kosovë-Itali.

Daka pranon “gabimin për shtëpinë e Mustafës”

Ish-kreu i LDK-së për degën e SHBA-ve, Musa Daka përmes një kumtese për media ka reaguar lidhur me deklaratat për fondin e tre përqindëshit, duke thënë se në përpjekjet e tij që të kontribuoj në zbardhjen e këtyre fakteve mund të ketë pasaktësi eventuale, por shprehet i bindur se kanë ekzistuar apo ekzistojnë pasuri për të cilat duhet të ketë hetim institucional se kush është titullar i tyre.
Ai ka thënë se pas deklarimeve të tij më në fund është konfirmuar se mjetet e Fondit të tre përqindëshit, pavarësisht se si quhen sot, ekzistojnë ende dhe ky fond është aktiv edhe më tej.
“ Kjo është konfirmuar nga deklarimet e njërit nga të apostrofuarit për menaxhimin e këtyre Fondeve, zotit Naser Osmani, deputet i Kuvendit të Kosovës nga radhët e LDK-së. Unë do të vazhdoj të insistoj që të zbardhen të gjitha të dhënat lidhur me këtë Fond, shfrytëzimin dhe menaxhimin e tij, përfshirë edhe objektet në çfarëdo cilësie qofshin ato, të cilat kanë qenë apo janë në pronësi të ish-qeverisë në ekzil të drejtuar nga zoti Bujar Bukoshi”, thotë Daka në deklaratë.
Sipas tij, ka pasuri të tilla për të cilat duhet të dihet se ku janë, kush i menaxhon, sikur që duhet të sqarohet se çfarë ka ndodhur me mjetet e objekteve dhe institucioneve të shitura siç është p.sh Dardania Bank.
“Në përpjekjet e mia që të kontribuoj në zbardhjen e këtyre fakteve mund të ketë pasaktësi eventuale, por jam i bindur se kanë ekzistuar apo ekzistojnë pasuri për të cilat duhet të ketë hetim institucional se kush është titullar i tyre. Dhe për këtë jam i bindur se përgjegjësit kryesor të menaxhimit të Fondit të tre përqindëshit e dinë më së miri dhe kanë përgjegjësi dhe obligim që të sqarohen para qytetarëve dhe institucioneve të Republikës së Kosovës”, shprehet Daka. 

FSK trajnohet nga Ushtria e Turqisë

Një grup prej 33 pjesëtarëve është nisur për në Turqi për tu trajnuar në Operacionet mbështetëse të paqes.
Agim Çeku, ministër i FSK-së, tha se ndjehet tejet i lumtur që Ministria e Mbrojtjes së Republikës së Turqisë dhe Shtabi i Përgjithshëm i Ushtrisë së Turqisë, kanë ofruar mundësi trajnimi për FSK-në për pjesëmarrje në operacionet paqësore kudo nëpër botë.
Në ceremoninë e përcjelljes së Togut të FSK-së për në Republikën e Turqisë, mori pjesë edhe kolonel Yucel Keles, përfaqësues i Ushtrisë Turke në Kosovë, i cili shprehu kënaqësinë që ky projekt që buron nga Marrëveshja bashkëpunimit ndërmjet FSK-së dhe Ushtrisë Turke po realizohet dhe se trajnimi i FSK-së për Operacione Mbështetëse të Paqes është njëra prej formave të mbështetjes që Ushtria e Republikës së Turqisë ka ofruar për FSK-në.
Togu i Forcës së Sigurisë të Kosovës, (33 pjesëtarë), të cilët udhëtuan për në Turqi, do të zhvillojë një trajnim (22 mars-26 prill), në Brigadën e 28 të Korpusit të Tretë të Forcave të Armatosura të Ushtrisë së Turqisë dhe në Qendrën e Partneritetit për Paqe, në Ankara.
Qëllimi i këtij trajnimi është përgatitja e pjesëtarëve të FSK-së, për Operacione Mbështetëse të Paqes. 

Lipjani e Shtimja me qendra për regjistrim të bizneseve

Ministrja e Tregtisë dhe Industrisë (MTI), Mimoza Kusari – Lila nënshkroi memorandum mirëkuptimi për hapjen e dy qendrave për regjistrim të biznesit të njohura si “One-Stop Shop” me komunën e Shtimes dhe Lipjanit.
Me këtë memorandum përcaktohen masat për bashkëpunim në mes të palëve në lidhje me themelimin, menaxhimin dhe funksionimin e një "One-Stop Shop-i", që do të sigurojë shërbim për të gjithë klientët e mundshëm ose klientët e bizneseve ekzistuese.
Ministrja Kusari-Lila, tha se pas një punë të palodhshme, përfundimisht sot arritëm të nënshkruajmë memorandumin e mirëkuptimit me dy komuna. “Shpresoj që këto dy qendra të jenë sa më funksionale, t’i ofrojë bizneseve mundësi të shpejt të regjistrimit dhe të shërbejë si qendër informuese për investitorët e interesuar”, u shpreh ajo.
Këto qendra do të ndihmojnë në kompletimin e të gjitha procedurave, që zyrtarisht janë të nevojshme për klientë për të filluar dhe operuar në aktivitetet të ligjshme industriale dhe komerciale në komunë. Sipas rregullave të Agjencisë për Regjistrimin e Bizneseve Kosovare, në këto qendra do të bëhet regjistrimi, ruajtja, procedimi dhe lëshimi i të gjitha dokumenteve: regjistrimi i numrit fiskal, regjistrimi i TVSH-së, si dhe dhënia e këshillave dhe udhëzimeve për klientët afaristë.
Deri më tani në Kosovë janë hapur 22 “One Stop Shop-e” për t’u ofruar bizneseve qasje më të lehtë dhe më të afërt për të regjistruar biznesin e tyre. Kurse në gjashtëmujorin e parë të këtij viti janë paraparë të hapen edhe gjashtë qendra tjera. 

KEK, blloku A5 më pak pluhur

Korporata Energjetike e Kosovës (KEK) ka nisur ndërrimin e elektrofiltrit të njësisë A5 të Termocentralit “Kosova A”. Punët po kryhen sipas dinamikës së paraparë dhe pas katër muaj e gjysmë blloku do të ketë emetimin brenda standardeve më të reja të Bashkimit Evropian. Emisionet e gazrave nga ky bllok do të jenë të njëjta si ato në BE. .
Menaxhmenti i lartë i KEK-ut ka inspektuar punimet dhe ka verifikuar se punët po kryhen brenda kontratës. Punët është duke i implementuar kompania me nam botëror nga Gjermania, Hamon Envoirmental në konzorcium me kompaninë Intering, e cila kishte fituar tenderin për vendosjen e elektrofiltrave të rinj.
“Nga ky projekt ambiental përfitojnë shumë qytetarët përreth termocentralit si ata të Obiliqit, Fushë Kosovës dhe Prishtinës. Ambienti do të jetë shumë më i pastër, që është një tregues i qartë se KEK-u i sotëm është kompani e orientuar të jetë sa më miqësore ndaj ambientit”, tha Arben Gjukaj, Drejtor Menaxhues i KEK-ut.
Përfaqësuesit e kompanisë që po e implementon projektin janë shprehur të përkushtuar t’i kryejnë punimet pikë për pikë me kontratën.
Vendosja e elektrofiltrit të ri është pjesë e projektit më madhor ambiental të KEK-ut. Në bazë të projektit do të ndërrohen elektrofiltrat e njësive aktive të TC “Kosova A”, përkatësisht A3, A4 dhe A5. Pas elektrofiltrit të njësisë A5, do të nisë menjëherë ndërrimi i njësisë A3 dhe do të zgjasë deri në tremujorin e tretë, kur nisë ndërrimi i elektrofiltrit të njësisë A4. Ndërrimi nuk po bëhet të njëjtën kohë sepse duhet ndalur blloku deri në momentin e ndërrimit të plotë të elektrofiltrit. Projekti do të përfundojë në tremujorin e parë të vitit 2013 dhe ka koston prej mbi 25 milionë eurosh, investim vetanak i KEK-ut.
Ndërrimi i elektrofiltrave është një nga 4 faktorët që si pasoje e degradimit te mehereshem dhe teknologjisë se trashëguar ishin identifikuar si ndotës nga ekspertët e ambientit.. KEK është duke punuar në eliminimin e të katër ndotësve dhe në vitin 2013 ambienti ku operon KEK-u do të jetë shumë më i pastër dhe jeta e qytetarëve shumë më kualitative.
Pos elektrofiltrave, KEK ka në përfundim e sipër edhe projektin për mbulimin e kodrës së hirit pranë TC “Kosova A”, ndërtimin e sistemit hidraulik të bartjes së hirit dhe asgjësimin e mbi 20 mijë tonë substanca të rrezikshme. Të gjitha këto projekte do të përfundojnë brenda këtij viti.

Draghi: Eurozona kaloi krizën e vështir

Presidenti i Bankës Qendrore Europiane (BQE), Mario Draghi, në një intervistë për mediat gjermane, tha se Eurozona, ka kaluar pjesën më të vështirë dhe më të rrezikshme të krizës së borxheve. Ai theksoi se paralelisht nuk ka asnjë kërcënim për inflacion në terma afatgjatë të krijuar nga programi i injektimit të likuiditetit në sistem që u krye në 2 faza dhe që dha pothuajse 1.2 trilionë euro për financat europaine.
Mario Draghi tha se tashmë ka ardhur koha që 17 qeveritë e Eurozonës të marrin përsipër përgjegjësitë e tyre dhe të mbrojnë bllokun e monedhës së përbashkët nga krizat. "Në rast të përkeqësimit të parashikimit për inflacionin në do të marrin masat e nevojshme parandaluese”, i tha Draghi Gazetës Bild, ku ka shtuar se, “nëse do të përjashtojnë çmimin e naftës dhe rritjen e fundit të taksave nga qeveritë në Eurozonë atëherë inflacioni llogaritet i qëndrueshëm në 1.5 për qind për disa muaj në radhë”.
Çmimi i energjisë rriti koston e jetesës në Eurozonë përgjatë shkurtit pasi inflacioni u rrit në 2.7 për qind dhe qytetarët e Gjermanisë janë të shqetësuar se çmimet e energjisë së bashku me injektimin e likuiditetit nga Banka e Europës do të shtojnë presionin e inflacionit.

Conte: Ende nuk kemi fituar asgjë

Trajneri i Juventusit, Antonio Conte, ka porositur lojtarët e tij të mos shpërqendrohen pasi kanë arritur në finale të Kupës së Italisë duke eliminuar Milanin, dhe ka thënë se Bianconerët nuk kanë arritur ende asgjë.
“Nuk dua të shoh fytyra të qeshura. Dua të shoh vendosmëri në fytyrat e lojtarëve”.
“Ne ende nuk kemi arritur asgjë. Ne ende nuk kemi arritur asnjë nga objektivat tona. Kjo është arsyeja se pse duhet të vazhdojmë të punojmë fuqishëm”.
“Ajo çfarë është e rëndësishme, është të kemi buzëqeshje në fytyrat tona në fund të sezonit”, ka thënë Conte për Tuttosport. 

Demba Ba pasardhësi i Drogbas te Chelsea?

Chelsea mund ta zëvendësojë Didier Drogban me sulmuesin e Newcastle United, Demba Ba, shkruan Daily Mail.
Drogba, 34-vjeçar, është lidhur me një largim nga Stamford Bridge në fund të sezonit dhe Blutë raportohet se janë në kërkim të pasardhësit të tij.
Suluesi i Portos, Hulk, dhe ai i Napolit, Edinson Cavani, raportohet se janë kryesorët në listën e klubit londinez, por ata do të kushtonin shumë më shumë se sa sulmuesi i Newcastle.
Ba ka shënuar 16 gola në Ligën Premier për Newcastle këtë sezon dhe raportohet se ka një klauzolë lëshimi në kontratën e tij. 

Quagliarella të largohet nga Juve

Fabio Quagliarella do të largohet nga Juventusi gjatë afatit kalimtar të verës, shkruan ueb-faqja e futbollit Goal.com.
Sulmuesi 29-vjeçar ka qëndruar shumicën e kohës në karrige për Bianconerët, që nga arritja e trajnerit kryesor, Antonio Conte në fillim të sezonit 2011/12, dhe ka shënuar vetëm dy gola në 19 paraqitje.
Ish-ylli i Udineses ka kontratë me Juventusin deri në verën e vitit 2014, por edhe klubi edhe lojtari janë të pajtimit se e ardhmja e tij qëndron diku tjetër.
Lazio raportohet se është duke përcjellë nga afër situatën e Quagliarellas dhe e sheh sulmuesin si një partner ideal për Miroslav Klosen. Në garë për të mund të jetë edhe Fiorentina si dhe Zenit St Petersburg. 

Valdano: Maradona më artistik se Messi

Ish-lojtari i përfaqësuese së Argjentinës, Jorge Valdano, ka thënë se Diego Maradona ishte më artistik se sa ylli i Barcelonës, Lionel Messi, por mendon se ky i fundit është më efikas.
“Ne e gjykojmë Maradonën duke u bazuar në gjithë karrierën e tij, derisa Messi është vetëm 24-vjeçar. Fakti se ne tashmë i krahasojmë ata dy është lavdërim për atë që Lionel ka arritur”.
“Nëse duhet t’i dallojmë ata, mund të thoni se Maradona ishte më artistik dhe kishte një stil unik, të bukur të lojës. Messi në anën tjetër është më efikas dhe më i qëndrueshëm. Ai është i rrezikshëm secilën herë që e merr topin”.
“Nëse ai vazhdon të luajë në këtë nivel, ai sigurisht do ta tejkalojë secilin, përfshirë edhe Pelen”, ka thënë Valdano për Sport

Milito: Mourinho është më i miri

Sulmuesi Interit, Diego Milito, thotë se Jose Mourinho është trajneri më i mirë me të cilin ai ka punuar.
Ishte pikërisht Mourinho ai i cili e solli 32-vjeçarin erdhi te Interi në sezonin 2009/10 nga Genoa, dhe argjentinasi ishte pjesë kyçe e suksesit të Nerazzurrëve kur ata fituan Serie A, Kupën e Italisë dhe Ligën e Kampionëve.
“Mourinho është trajneri më i mirë me të cilin kam punuar ndonjëherë, ai më ka dhënë kujtimet më të jashtëzakonshme”, ka thënë Milito për Corriere dello Sport.
Milito ka shënuar 14 gola në 23 paraqitje në Serie A deri tash këtë sezon.

Redknapp porosit topçinjtë: Mos u relaksoni

Menaxheri i Tottenhamit, Harry Redknapp, thotë se skuadra e tij ende ka shpresa për kualifikim në Ligën e Kampionëve pas barazimit 1-1 ndaj Stoke Cityt.
Tottenham humbi pozitën e tretë të tabelës, e cila dërgon drejtpërdrejt në Ligën e Kampionëve, për të parën herë pas gati tre muajsh, por Redknapp është optimist se mund ta rikthejë atë.
“Ne ende mund të përfundojmë mbi Arsenalin. Arsenali mund të mendojë se gjithçka ka përfunduar. Nuk ka përfunduar. Ende ka shumë deri në fund”.
“Do të ketë kthesa dhe ndryshime. Ka ende për t’u luajtur. Ata nuk do ta fitojnë çdo ndeshje, apo jo? Unë nuk mendoj”, ka thënë Redknapp.