Nga 12 që i janë shtuar sot, Parkut të biznesit në Drenas, 1 është biznes i huaj, 3 bashkëpunim mes kosovarëve dhe të huajve, ndërsa 8 të tjera janë biznese vendore.
Ministrja e Tregtisë dhe Industrisë, Mimoza Kusari-Lila ka pohuar se tani për tani pas këtij nënshkrimi do të kenë titullarët e tyre. “Në total Parku i Biznesit në Drenas, gjegjësit parku industrial ka gjithsej 33 biznese që synimi i tyre është që brenda periudhës 24 muajsh të arrijnë vlerën e investimeve në 30 milionë euro dhe numrin e të punësuarve afro një mijë. Dhe më këtë përkushtim dhe këtë angazhim, edhe të sektorit privat edhe atij publik sinqerisht shpresojë dhe inkurajojë të gjithë që të vazhdojnë që modelet e tilla të suksesit ti shfrytëzojnë edhe në pjesët e tjera të Kosovë”, ka thënë ajo.
Ndërsa kryetari i Komunës së Drenasit, Nexhat Demaku ka thënë se zhvillimi i këtij parku është bërë shumë ngadalë duke pasur faktin kur ka filluar të ndërtohet, por ka shprehur besimin e tij, se tashmë po merr gjallërinë e duhur, veçanërisht me këtë shtimin e fundit të numrit të bizneseve.
“Doja që Parku i Biznesit në Drenas të jetë në një gjendje më të mirë se që është sot, për shkak se jemi dëshmitarë të një periudhe bukur të gjatë kur kemi filluar të punojmë në këtë drejtim, por sigurisht ne prapë jemi dëshmitarë të vështirësive që i kemi pasur, duke marrë parasysh nga momenti kur është caktuar lokacioni dhe edhe pse është një sipërfaqe bukur në interes, duke marrë parasysh disa favore që ofron, por mungesa e infrastrukturës e cila kalon shumë larg parkut ka ndikuar që të ketë disa vonesa”, ka thënë ai.
