Kroatët të zhytur në borxhe

Borxhi i përgjithshëm i qytetarëve në Kroaci, në fund të muajit janar ka qenë 140 milionë euro më i lartë se e njëjta periudhë e vitit 2010.
Shifrat janë bërë publike nga Banka Qendrore e Kroacisë. Kreditë për shtëpi janë rritur në mënyrë të ndjeshme, ndërsa, ato për makina kanë rënë me 280 milionë euro.
Shpenzimet nëpërmjet kartave të kreditit regjistruan një rënie përgjatë vitit të kaluar. Sipas përllogaritjeve, kroatët kanë shpenzuar 40 milionë euro më pak nëpërmjet kartave, në krahasim me një vit më parë. 

Greqi, deficiti tregtar në janar u ulë me 29.1 %

Deficiti tregtar i Greqisë për muajin janar ka rënë me 29.1 për qind, pasi, konsumi i brendshëm është zbehur.
Sipas të dhënave paraprake të Institutit të Statistikave në Greqi, vlera e përgjithshme e importeve për Janarin, duke përjashtuar produktet e naftës arriti në 2.23 miliardë euro.
Në krahasim me një vit më parë, kjo vlerë ka rënë me 15.6 për qind. Në të njëjtin muaj, vlera e përgjithshme e importeve ka arritur në 1.2 miliardë euro. Eksportet kanë shënuar një rritje të lehtë, me 1 për qind në kundrejt janarit të vitit 2011.

Lloyd’s ka humbur 824 milionë dollarë

Grupi i sigurimeve Lloyd’s në Londër ka shpallur humbje masive për vitin 2011, duke thënë se ishte vit rekord i kërkesave për shkak të katastrofave. Kompania tha se ka shënuar humbje prej 824 milionë dollarësh, vitin e kaluar. Lloyd’s tha se në vitin 2011 u bënë kërkesat më të mëdha gjatë një viti në historinë 324 vjeçare të kompanisë.
Në vitin 2010 ky grup i sigurimeve kishte paraqitur fitim prej 2.2 miliardë dollarëve.
Lloyd’s tha se kërkesat kryesore për pagesa të dëmeve ishin bërë pas vërshimeve në Australi në muajin janar, pas tërmetit në Zelandën e Re në muajin shkurt, pas tërmetit dhe cunamit në Japoni, në muajin mars dhe pas vërshimeve në Tajlandë nga korriku.
Lloyd’s është shoqëri e korporatave e sigurimeve dhe e individëve të pasur, që bënë transaksione të sigurimeve nëpërmjet të 88 kompanive.

Nafta me rënie

Kontratat e naftës ranë për të dytin sesion me radhë të presuara nga pritshmëria që administrata Obama të hedhë në treg rezervën strategjike për të reduktuar çmimin e naftës në pikat e karburantit dhe pavarësisht statistikës që tregoi rritje të stokut të hidrokarbureve në javën e kaluar.
Nafta bruto Brent e Londrës për majin ra 71 cent në 124.83 dollarë për fuçi. Për deri sa nafta bruto amerikane për muajin maj ra 60 cent në 106.73 dollarë për fuçi.

Lahm, Badstuber dhe Kroos nuk janë në shitje

Toni Kroos, Holger Badstuber dhe Philipp Lahm do të jenë pjesë e skuadrës së Bayern Munichut në sezonin e ardhshëm.
Tre lojtarët gjermanë kanë tërhequr vëmendjen e top-klubeve evropiane, mirëpo bavarezët kanë reaguar shpejtë për të mohuar mundësinë e largimit.
Goal.com raporton se Lahm është në planet e Barcelonës, Badstuber kërkohet nga Chelsea, ndërsa Interi përcjell situatën e Kroos.
Sidoqoftë, vendimi i drejtuesve të Bayernit është se asnjë nga lojtarët kyçë nuk do të largohet dhe se të gjitha ofertat do të refuzohen. 

Kaka bën tifo për Milanin

Mesfushori ofensiv i Real Madridit, Ricardo Kaka, është i bindur se Milani do të dijë të nxjerrë rezultat pozitiv kundër Barcelonës në San Siro.
“Do ta shikoj ndeshjen dhe, si gjithmonë, do të bëj tifo për Milanin”.
“Asnjëri nga ish-bashkëlojtarët e mi nuk më ka thirrur deri më tani, por Milani e di si t’i dalë në krye Barcelonës”.
“Shpresoj që Rossonerët do të bëjnë një paraqitje të mirë dhe do të marrin një rezultat të mirë”, ka thënë Kaka.

Drogba i kënaqur me rezultatin

Sulmuesi i Chelseat, Didier Drogba, mendon se goli i shënuar si mysafir kundër Benficas mund të rezultojë kyç për kualifikimin e ekipit të tij në gjysmëfinale të Ligës së Kampionëve.
Blutë fituan me rezultat 1-0 në udhëtim te klubi portugez që konsiderohet si avantazh i madh për ndeshjen kthyese që zhvillohet në Stamford Bridge.
“Është një rezultat i shkëlqyer. Gjëja më e rëndësishme është se kemi shënuar gol si mysafirë”.
“Mirëpo, ne kemi shumë respekt për Benfican. (Prandaj) do ta marrim me shumë seriozitet ndeshjen e kthimit”, ka deklaruar sulmuesi nga Bregu i Fildishtë për L'Equipe.
Nëse Chelsea kualifikohet tutje, atëherë do të luajë kundër Barcelonës ose Milanit për një vend në finalen e Munihut. 

City do të luftojë deri në fund për titull

Sulmuesi i Manchester Cityt, Sergio Aguero, ka deklaruar se skuadra e tij do të luftojë deri në fund të sezonit për ta fituar titullin e parë të Ligës Premier.
“Pse të presim deri në sezonin e ardhshëm kur mund ta fitojmë tash?”.
“Fitimi i titujve ka të bëjë me mosdorëzim dhe ne nuk do të dorëzohemi. Unë dua ta fitoj këtë sezon dhe pastaj edhe shumë herë pas këtij”.
“Mund t’ju premtoj se do të luftojmë deri në fund”, ka thënë argjentinasi për faqen zyrtare të klubit.

Thiago Silva nuk është në shitje!

Shefi ekzekutiv i Milanit, Adriano Galliani, e ka njoftuar presidentin e Barcelonës, Sandro Rosell, që të mos humbë kohë duke kërkuar Thiago Silvan.
“Nëse Sandro Rosell më pyet për Thiago Silvan, përgjigja ime do të jetë e sjellshme, por e fuqishme: Ai nuk është në shitje”, ka deklaruar Galliani për Tuttosport.
Sa u përket sfidave çerekfinale mes dy skuadrave në kuadër të Ligës së Kampionëve, shefi i Rossonerëve ka thënë se shpreson që Milani t’u shkaktojë telashe Blaugranëve.

Ozil: Refuzova Interin për Realin

Mesfushori i Real Madridit, Mesut Ozil, ka zbuluar se ai ka pasur shansin t’i bashkohet Interit pas Kupës Botërore 2010, por kishte zgjedhur të transferohet në Santiago Bernabeu.
“Është e vërtetë se në vitin 2010 kisha oferta nga disa top klube evropiane. Këtu përfshihet Interi. Por vendimi për të shkuar te Reali ishte absolutisht i qëlluari. Është klubi më i mirë në botë dhe do të doja t’i jap fund karrierës këtu”.
“Jam vetëm 23-vjeçar, nuk do ta arrij kulmin tim edhe për shumë kohë. Do të bëhem vetëm më i mirë. Jam i përqendruar plotësisht te Madrid dhe te skuadra kombëtare, pasi ne mund të bëjmë histori këtë vit”.
“Ne mund ta fitojmë La Ligën edhe Ligën e Kampionëve, dhe gjatë verës edhe Kampionatin Evropian me Gjermaninë”, ka thënë Ozil për Sport Bild.

Mourinho: Mund të kthehem te Interi

Trajneri i Real Madridit, Jose Mourinho, ka zbuluar se ai kurrë nuk do të përjashtonte një rikthim në “shtëpinë e tij”, Inter.
Portugezi udhëhoqi Nerazzurët drejt tre titujve në vitin 2010, para se të transferohet në Santiago Bernabeu.
Megjithatë së fundi është folur për një largim të Mourinhos nga Bernabeu gjatë verës dhe është përfolur edhe për një rikthim të tij në Giuseppe Meazza. Gjatë një prononcimi për këtë çështje, Mourinho nuk e ka mohuar mundësinë e rikthimit, edhe pse ka propozuar që klubi italian të rikthejë edhe drejtorin teknik Gabriele Oriali.
“Interi është shtëpia ime; një rikthim në shtëpi është gjithmonë i mundshëm. E njëjta është edhe me ‘Lele’ – ai duhet të shkojë në shtëpi”, ka thënë portugezi për Sky Sport Italia.

Owen shpreson edhe në dy sezone lojë aktive

Sulmuesi i Manchester United, Michael Owen, mendon se ai ka edhe dy vite të mbetura në top formë.
“Duhet të pranoj, nuk mendoj se do të jem një prej lojtarëve i cili do të luajë edhe kur ka 37 ose 38 vjet, si Ryan (Giggs). Por sigurisht mendoj se ka edhe dy ose tre vite të mbetura në mua”, ka thënë Owen.
“I dëgjoj lojtarët në dhomën e zhveshjeve; disa lojtar mezi zgjohen nga krevati dhe ankohen për nyjat dhe tendat e Akilit. Sinqerisht nuk jam në atë grup. Kurrë nuk ankohem në atë mënyrë”.
“Mund të jetë e çuditshme që njerëzit e dëgjojnë këtë pasi ata e dinë se jam i lënduar, por në nyja ndjehem shkëlqyeshëm. Mendoj se mund të luaj, vetëm se kur lëndohem duket se ato janë lëndime të rënda”.
“Trupi im më thotë se mund të vazhdoj të luaj dhe mendja ime po ashtu dëshiron dhe synimi im është të vazhdoj të luaj për së paku edhe disa vite”, ka shtuar sulmuesi anglez.

Beckenbauer dëshiron Barcën në finale

Presidenti i Bayern Munich, Franz Beckenbauer, dëshiron të përballet me Barcelonën në finalen e Ligës së Kampionëve në Fußball Arena të Munichut.
Real Madrid ose APOEL Nicosia do të ishin rivalët e Bayernit në rast se gjermanët do të kualifikohen në gjysmëfinale, derisa Barcelona do të përballej me Benfican ose Chelsean nëse eliminon Milanin në çerekfinale.
“Kjo sigurisht është diçka të cilën të gjithë e ëndërrojnë, jo vetëm tifozët e Bayernit. Disi besoj në këtë finale, por ka ende shumë deri në fund”.
“Ende ëndërroj për këtë. Real Madridi dhe Barcelona aktualisht janë skuadrat më të mira në Evropë dhe ju duhet të luani kundër tyre në ndonjë moment nëse dëshironi ta fitoni Ligën e Kampionëve”, ka thënë Beckenbauer.

Pique: Ishte një sezon i vështirë

Mbrojtësi i Barcelonës, Gerard Pique, thotë se ai ka kaluar një sezon të vështirë me klubin spanjoll.
“Më shumë se gjithçka tjetër, më shumë më intereson loja ime e përgjithshme se sa goli. Pjesa më vendimtare e sezonit është tash dhe shpresoj të mund ta ndihmoj skuadrën”.
“Ka qenë një vit i komplikuar. Kam filluar me një lëndim dhe ishte vështirë të kyçem në dinamikën e skuadrës. Kur isha në karrige, ishte sepse bashkëlojtarët e mi luanin më mirë se unë”, ka thënë Pique. 

Ibra të transferohet te Reali, për inati të Barcës

Sulmuesi i Milanit, Zlatan Ibrahimovic, do të dëshironte të veshë fanellën e Real Madridit, raportojnë mediat spanjolle.
El Confidencial shkruan se dështimi i Ibrahimovic te Barcelona ende i djeg suedezit dhe ai do të dëshironte një transferim hakmarrës dhe të arrijë sukses te Reali.
Trajneri i Realit, Jose Mourinho, është një tifoz i suedezit dhe ka bërë interesim te Milani verën e kaluar për mundësinë e nënshkrimit të tij.
Një marrëveshje mund të jetë në letra, veçanërisht nëse Reali vendos ta shesë Gonzalo Higuain gjatë verës. 

Ranieri të vazhdojë të jetë pjesë e Interit?

Presidenti i Interit, Massimo Moratti, thotë se Claudio Ranieri mund të ketë edhe me tej ndonjë rol në klub.
Ranieri dje u shkarkua dhe u zëvendësua nga një trajner pa përvojë, Andrea Stramaccioni.
“Ai sigurisht është pjesë e Interit për momentin dhe është i gatshëm të bashkëpunojë. Ai është një njeri i mirë dhe një trajner i shkëlqyeshëm, sipas meje. Thjesht shkoi keq për të”.
“Sa i takon Gasperinit, le të themi se ne startuam sezonin shumë keq sa ishte vështirë të kthehemi në rrugë të duhur pas saj. Them se ai mund të jetë trajner i mirë, por me Interin nuk shkoi ashtu”, ka thënë Moratti. 

Benzema: APOEL na i vështirësoi gjërat

Sulmuesi i Real Madridit, Karim Benzema, është i kënaqur me fitoren e skuadrës së tij ndaj APOEL në ndeshjen e parë çerekfinale të Ligës së Kampionëve, por thotë se fitorja nuk ishte aspak e lehtë.
Djelmoshat e Jose Mourinhos ishin të paaftë ta thyejnë mbrojtjen qipriote në 45 minutat e para, por ata shënuan me 16 minuta të mbetura, kur Kaka asistoi për Benzema, pas të cilit gol madrilenët morën forcë dhe shënuan edhe dy gola të tjerë për të fituar në fund me rezultat 3-0.
“Ishte një ndeshje shumë e vështirë, veçanërisht në pjesën e parë. Ndeshja u përmirësua pas pauzës dhe ne nxorëm një fitore shumë të rëndësishme. Ne do të vazhdojmë ta ruajmë formën edhe për ndeshjen e kthimit”.
“APOEL është një kundërshtar i vështirë dhe na i vështirësoi gjërat. Kjo është një fitore e rëndësishme, por ende nuk ka përfunduar. Ne duam të bëjmë një paraqitje të mirë para tifozëve tanë në ndeshjen e kthimit”, ka thënë Benzema.

Përsëri shtyhet turneu i DMX

E pa besueshme, por e vërtetë. Vetëm dy ditë pas konfirmimit nga menaxhmenti i reperit problematik amerikan, DMX, se ky i fundit do të mbajë turneun europian të planifikuar për muajin janar, e të shtyrë për muajin prill, tashmë po i njëjti menaxhment ka bërë të ditur se turneu është shtyrë përsëri, për një datë të pa caktuar.
Lajmi ka ardhur si një goditje e rëndë edhe për kompaninë kosovare NextLevel, e cila tashmë kishte filluar përgatitjet për koncertin, kurse zhgënjim të madh pritet të ketë edhe në mesin e fansave të reperit amerikan në Kosovë, të cilët mezi e prisnin mbajtjen e kësaj ngjarjeje të cilësuar si ngjarja më e madhe që prej performancës epike të Busta Rhymes prillin e vitit 2011.
“Është hera e dytë që po ndodh kjo gjë dhe siç thotë populli, ‘i ka dalë ngjyra kësaj pune’. Jemi totalisht të dëshpëruar për të dytën herë që po ndodh kjo gjë dhe ju kërkojmë falje të gjithë fansave, por asgjë nuk është në dorën tonë. Kemi të bëjmë me një artist më problematik se sa që kemi menduar”, ka theksuar drejtori i NextLevel, Ardin Badivuku, në një prononcim ekskluziv për lajmenews.
Në shenjë transparence ndaj publikut të gjerë, Badivuku ka zbuluar dhe email-at mjaft konfidencialë, ku së pari vërehet konfirmimi i datës 10 prill për koncertin në Prishtinë, dhe më pas edhe komunikata për anulimin e turneut europian. Telegrafi po ashtu posedon edhe kontratën e nënshkruar mes NextLevel dhe kompanisë StreetLife, ku shihet qartë se është paguar edhe shuma e parave e kërkuar nga DMX.
Emaili i konfirmimit më 26 mars

Emaili me kontratën


Emaili i anulimit


Komunikata e anulimit

Jo vetëm Prishtina është prekur nga anulimi i turneut të DMX. Probleme me reperin amerikan kanë edhe kompanitë në Francë, Gjermani dhe mbarë Europën të cilat kishin rezervuar datat e madje edhe shitur biletat për ngjarjet të cilat duhej t’i organizonin.
Turneu sipas komunikatës së publikuar më lart nga menaxhmenti i DMX është shtyrë për një datë të pa caktuar. 

Madonna fton Bieberin në turne

Mbretëresha e muzikës pop, Madonna, e ka ftuar yllin e tinejxherëve, Justin Bieber, që t’i bashkohet në skenë gjatë turneut të ardhshëm botëror.
Duke iu përgjigjur fansave të saj në Twitter, këngëtarja ka thënë se mendon që Bieber është i shkëlqyer dhe se është fanse e tij.
“Eja bashkoju me mua në skenë gjatë turneut tim, nëse ndodhemi njëkohësisht në cilindo qytet”, ka shkruar mes tjerash Madonna.

Rodman falimenton dhe është i sëmurë

Ish-basketbollisti i NBA, Dennis Rodman, ka falimentuar dhe është shumë i sëmurë, saqë nuk është në gjendje që të paguajë alimentacion për fëmijët e tij- shkruan Los Angeles Times.
Në dokumentet e avokatit të tij thuhet se ylli i dikurshëm i Detroit Pistons, Chicago Bulls dhe Los Angeles Lakers, ka borxh prej 808.935 dollarësh për alimentacion për fëmijët që i ka me gruan e tretë, Michalle Rodman. Veç kësaj, ai i ka borxh personal gruas së tij prej 51.441 dollarësh.
Për të gjitha këto, Rodman, i cili e provoi veten edhe si aktor, mund të përfundojë në burg.
Në dokumentet e paraqitura në gjykatë, avokati Jack Kayajanian thekson se klienti i tij ka falimentuar dhe nuk mund të paguajë alimentacion e as shpenzimet tjera. Po ashtu thuhet se Rodman është “ekstremisht i sëmurë”.

Albana Azizi në “Top Fest”

dhe këngëtarja Albana Azizi i është bashkangjitur konkurrentëve në “Top Fest 9”.
Ajo është prezantuar me këngën “E fundit në kufi”, këngë e cila është punuar nga Xhevdet Gashi dhe me tekst të shkruar nga Arsim Bunjaku.
Kjo është hera e parë për Albanën që është paraqitur në festivalin “Top Fest”.
 

Pranvera, sezon i vështirë i alergjive

Sezonet gjithnjë më të hershme të lulëzimit dhe sasitë gjithnjë më të mëdha të polenit që qarkullojnë në ajër janë trend që po përkeqësohet çdo vit, ndërsa ka gjithnjë e më shumë edhe alergjikë, shpjegojnë shkencëtarët.
Ekspertët besojnë që çdo vit do të jetë më keq për shkak të motit jashtëzakonisht të ngrohtë, lulëzimit gjithnjë më të hershëm dhe pranverës pa shumë reshje, ndërsa kjo përkeqëson simptomat e alergjisë.
Edhe pse pranvera është kohë e ftohjes dhe virozave, dallimi kryesor është që simptomat e alergjisë gjithsesi zgjasin më gjatë se 10 ditë, ndërsa janë më të lehta se tek ftohja. Besohet që sot nga ndonjë formë e alergjisë vuajnë rreth 30 për qind e njerëzve, ndërsa në dekadën e ardhshme ky numër edhe do të dyfishohet. Në pranverë reaksionet alergjike shkaktohen nga poleni i lajthisë, verrit, shelgut, pastaj mështeknës dhe panjës.
Çajet e ndryshme të pasura me antioksidantë me shtesat e vitaminave C, E, B dhe magnezit, selenit, kalciumit mund të reduktojnë reagimin e trupit në stimujt nga mjedisi dhe të lehtësojnë alergjinë. Në përgjithësi, ushqimi i shëndetshëm dhe i balancuar mesdhetar do të ndihmojë në kontrollimin e etheve të çmendura pranverore, këshillojnë imunologët. 

Nokia përgatit modele të reja në MeeGo

Sipas një raporti të fundit nga Netbook News, Nokia është duke u përgatitur të lansojë edhe dy modele të reja të telefonave të mençur, të cilët do të dallohen për nga çmimi i tyre i ulët.
Nokia do të zgjedh MeeGo si sistemin e saj operativ për telefonat e rinj, të cilët i ka dedikuar për tregjet më të varfra, dhe pasi që MeeGo ka kërkesa më të vogla sesa Windows Phone.
Me gjithë informacionin se modelet e reja të telefonave Nokia me MeeGo do të jenë më të lira, ende nuk ka asnjë detaj për çmimin e tyre me të cilin do të paraqiten në treg. 

Është më i mençur se Einsteini - ndërsa pastron dritare

Steve Borlase nga Warminster është njëri nga njerëzit më të mençur në Britani të Madhe me IQ 180, ndërsa punon si pastrues dritaresh.
Për të thonë se është më i mençur se Albert Einsteini, duke qenë se që nga mosha pesëvjeçare i ka zgjidhur detyrat e komplikuara matematikore.
“Në moshën pesëvjeçare jam rrëzuar në park dhe diçka ndryshoi tek unë. Qëkur jam rrëzuar në kokë, kam qenë në gjendje të zgjidh detyrat më të rënda aritmetike. Punoj si pastrues dritaresh, por do të më pëlqente që dikush të ma jepte rastin që të tregoj se çfarë di me numrat”, citon Metro fjalët e Borlase.
Koeficienti i tij i inteligjencës është më i lartë sesa IQ i Albert Einstein, Stephen Hawking dhe Carol Vorderman. 

Shatërvan alkooli

Gjeorgjia shpreson që të tërheqë turistë në Batumi me ndërtimin e një shatërvani, ku do të mund të provojnë një alkool të fuqishëm që do të rrjedhë rreth 15 minuta çdo javë.
Kryebashkiaku i këtij qyteti ka thënë se nga shatërvani do të rrjedhë rakia me bazë rrushi, shija e të cilës është e ngjashme me atë të rakisë italiane.
Turizmi konsiderohet si një burim i rëndësishëm i të ardhurave në këtë vend të varfër ish-sovjetik, ku vreshtaria paraqet një industri të rëndësishme.
Shatërvani i ri me lartësi prej 25 metrash, pritet që të jetë i ndërtuar kah fundi i verës që vjen.

Punët më të rënda në botë

Herën tjetër kur të ankoheni për punën e rëndë që keni, për kolegët antipatikë apo për shefin e vrazhdë, mendoni për listën e punëve që sjell National Geographic, e të cilat mund të jenë të rrezikshme për jetën.
Peshkatar i tonëve – Këta peshkatarë kanë shkallën më të lartë të vdekshmërisë në “vendin e punës”.
Rojet bregdetare – Çdo ditë rrezikojnë jetën e tyre për të shpëtuar të tjerët.
Punëtor në nxjerrjen e naftës – Nxjerrja e naftës dhe gazit në platforma në det është një nga punët më të rrezikshme dhe të rënda (punohet nga 12 orë në ditë me materiale me ndezshmëri të lartë).
Largues i minave – Secila punë që ka të bëjë me minat, shumë lehtë mund të bëhet vdekjeprurëse.
Elektricisti që nga helikopteri punon në përçues – Punën më të madhe e kryejnë pa dorëza, prandaj puna e tyre është mjaft e rrezikshme.
Pastrues dritaresh në rrokaqiej – Ky variant i pastrimit kërkon kualifikim dhe zotim të aftësive të veçanta.

Zjarrfikës – Edhe pse janë të veshur dhe të përgatitur për situata të paparashikuara, rreziku nga lëndimet dhe vdekja është shumë i madh.
Minator – Çdo vit në botë vdesin nga 50 deri në 60 minatorë, duke mos llogaritur aksidentet grupore.
Sharrëxhi – Puna kryhet në terren jo të rrafshët me sharra motorike, si edhe me makina të tjera për transportimin e drunjve, që janë shumë të rrezikshme edhe në se përdoren në mënyrë të duhur.

Spanjë, prostitutat kushtëzojnë bankierët!

Prostitutat e klasit të lartë në Spanjë kanë hyrë në grevë, me ç’rast nuk do t’u ofrojnë shërbime bankierëve të pasur nëse ata nuk fillojnë t’u japin kredi shtresave më të ulëta të shoqërisë.
Damat shoqëruese nga Madridi thonë se greva e tyre do të ndërpritet në momentin kur bankierët do të “përmbushin obligimin e tyre ndaj shoqërisë” dhe do të fillojnë t’u japin kredi më të mëdha dhe më të volitshme spanjollëve, të cilët për shkak të recesionit mezi ia dalin të jetojnë.
Ndërkaq, për të marrë shërbimet e prostitutave, bankierët kanë tentuar të prezantohen si inxhinierë dhe arkitektë. Mirëpo, pa sukses!
“Greva po zgjat vetëm tri ditë dhe nuk mendojmë se do të mund të durojnë më shumë”, ka thënë njëra nga prostitutat, çmimi i të cilave fillon nga 300 euro për një orë.
Sipas mediave, bankierët janë aq të dëshpëruar sa që kanë kërkuar që të ndërhyjë shteti për të tentuar që ta ndalë grevën.

Qeni më i vogël në botë (Video)

Qeni, i cili e ka marrë emrin nga këngëtarja Beyonce Knowles, mund të thyejë rekordin si qeni më i vogël në botë.
Shpëtimtarët e kafshëve nga Kalifornia veriore thonë se ‘Beyonce’ ka qenë aq i vogël kur ka lindur saqë ka mundur të qëndrojë në një lugë.
Aktualisht ka moshë prej dy-tri javësh, ndërsa është i madh sa një kartë biznesi.
‘Beyonce’ ka lindur me arrest kardiak, por veterinarët kanë arritur që ta ngjallin. 

E presin 60 vjet burg për kontrollim të e-maileve

Hakeri nga Florida, Christopher Chaney, rrezikon dënim me 60 vite burg, pasi që është deklaruar fajtor për ‘thyerjen’ e e-maileve të personaliteteve të famshme, duke përfshirë yjet, si Scarlett Johansson dhe Mila Kunis.
Gjykatësi i rastit, James Otero, ka thënë se nuk e ka të qartë pse 35-vjeçari ka vazhduar të thyejë adresat elektronike dhe ka ndërhyrë në jetën private të njerëzve, kur ka qenë i arrestuar për të njëjtën gjë në të kaluarën.
Chaney është arrestuar pas një hetimi 11 mujor, pasi e kishin paraqitur rastin në polici Johansson, Kunis dhe Christina Aguilera.
Të përkujtojmë, se disa fotografi lakuriqe të Johansson ishin publikuar në internet pasi Chaney ia kishte hakuar telefonin.
Për veprimet e tij, hakeri mund të dënohet me 60 vite burg dhe 2.5 milionë dollarë.

AKI është kudo

Në Kosovë nuk ka shërbim tjetër të inteligjencës përveç Agjencisë së Inteligjencës së Kosovës (AKI). Zyrtarët e këtij shërbimi kanë shtrirje edhe në veri të vendit dhe dinë gjithçka që ndodh në kohë reale. Periudha e konsolidimit të këtij institucioni ka përfunduar. Kështu ka thënë Bashkim Smakaj, shefi i AKI-së.
Shefi i Agjencisë së Inteligjencës së Kosovës (AKI), Bashkim Smakaj, në një intervistë për radion Evropa e Lirë, ka thënë se institucioni që ai drejton, është i vetmi që mbledh informacion dhe që kryen veprimtari të inteligjencës në Kosovë.
“Nuk them se partitë politike kanë shërbime, por nëse individë të caktuar thirren me emra të caktuar ose me emra që kanë ekzistuar me herët, është çështje kriminale që duhet të adresohet, edhe nga ne, edhe nga policia", ka thënë Smakaj.
Ai ka shtuar se AKI pothuajse ka përmbyllë të gjitha fazat e konsolidimit dhe aktualisht janë në rrjedha normale të funksionimit.
Duke folur për sfidat e krijimit, Smakaj ka thënë se ata nuk kanë trashëguar asgjë si shërbim i ri, as sa i përket arkivave dhe dosjeve të së kaluarës, as personel të trashëguar nga shërbimet më herët, as infrastrukturë përcjellëse.
Lidhur me shtrirjen, Smakaj ka deklaruar se ata e kanë bërë publike ekzistencën e tyre edhe në veri të Kosovës.
“Ne, prioritet themelor në agjenci e kemi pasur edhe mbledhjen e informacioneve për çështje të sigurisë së vendit edhe nga veriu i vendit”, është shprehur ai, duke shtuar se është bërë shtrirja edhe e oficerëve ose zyrtarëve operativ të agjencisë në veri të vendit të cilët operojnë jashtëzakonisht mire.
”Kemi arritur numër të konsiderueshëm të burimeve të informacionit në atë pjesë të vendit dhe pothuajse për të gjitha ngjarjet jemi në rrjedha të vazhdueshme, si agjenci e inteligjencës”, ka thënë Smakaj.
I pyetur për mundësinë e funksionimit të shërbimeve të huaja të zbulimit në Kosovë, bashkim Smakaj ka thënë se për ketë çështje ka raportuar edhe para komisionit parlamentar për mbikëqyrjen e AKI-së.
“Kjo ka qenë e shënuar në një rresht të vetëm në Raportin e Komisionit Evropian, në raportin prej disa faqeve që ka qenë diku 62, 63 gjithsej”, thotë ai.
Sipas tij, kjo ka zgjuar debat edhe në publik.
“E kam thënë edhe në komision se shërbime të inteligjencës përveç AKI-së, dhe kuptohet pjesa e FSK-së, e policisë dhe Doganave që i kanë strukturat e inteligjencës për nevoja të veta, nuk ka asnjë shërbim që mbledhë informacion për sfidat e sigurisë së vendit, cenimit të sovranitetit dhe integritetit të Republikës së Kosovës, informacione për luftën kundër terrorizimit, krimit të organizuar, kundër spiunazhit - nuk ka asnjë subjekt politik që ka shërbime të tilla që bëjnë konkurrencë ose bëjnë veprimtari të inteligjencës në Republikën e Kosovës”, shprehet ai.
Smakaj ka demantuar zërat se ekziston ndonjë shërbim tjetër paralel i inteligjencës në Kosovë.
”Si shërbime të inteligjencës për të cilat dëgjohet në publik, ne nuk kemi hasur asnjëherë ose nuk hasim në atë që dikush na bën konkurrencë ose që mbledh informacion për interesa të Kosovës. Të paktën ne nuk kemi ndonjë informacion të mirëfilltë që na dëshmon ne që dikush tjetër është duke bërë veprimtari të inteligjencës në Kosovë”, ka thënë shefi i AKI-së.