Mustafa: Nuk kam shtëpi në Stuttgard, paralajmëron padi

Kryetari i Lidhjes Demokratike të Kosovës, Isa Mustafa përmes një deklarate për media ka mohuar se ka shtëpi në Stuttgard të Gjermanisë. Ai ka thënë se nuk pa pasur dhe nuk ka blerë kurrë shtëpi private në Stuttgard, as me para të tij, e as me ato të Fondit të Republikës së Kosovës.
Ai përmes një deklarate i ka ftuar mediat që kanë shkruar se ka blerë shtëpi me parat e trepërqindshit në Stuttgard të shkojnë ta verifikojnë rastin para organeve gjermane dhe ta informojnë realisht opinionin.
Mustafa ka thënë se nga mediat ka kuptuar se “paska një shtëpi në Stuttgard të Gjermanisë”.
“’Gazeta, duke u thirrur në Musa Dakën, thotë se pallati i trepërqindëshit, i dhënë në fotografi, është pronë e imja, Isa Mustafës, kryetar aktual i LDK-së, e blerë me para të trepërqindëshit’. Unë, Isa Jakup Mustafa nuk kam pasur dhe nuk kam blerë kurrë shtëpi private në Stuttgard, as me para të miat, as me ato të Fondit të Republikës së Kosovës”, thotë Mustafa.
Ai më tej shprehet “Shtëpia që pashë në fotografinë e botuar nga Express-i dukej e madhe për modestinë time dhe aspak sipas shijes time, por meqë gazeta Express, gazeta Kosova sot, Musa Daka dhe KTV-ja e deklaruan pronë timen, unë këtë shtëpi do ta kërkoj me gjyq nga Express-i, nga Kosova sot, nga Musa Daka dhe nga KTV-ja”.
Mustafa ka deklaruar se ta mbroj personalitetin e tij, prandaj tha se do ta inicioj procedurën para organeve të drejtësisë dhe do të kërkoj dëmshpërblim në vlerë të asaj shtëpie nga ana Express-it, Kosova sot, Musa Dakës dhe KTV-së.

BE: Respektoni marrëveshjet

Është në interes të të gjitha palëve që marrëveshjet nga Brukseli të respektohen dhe të zbatohen.
Bashkimi Evropian i ka dërguar një mesazh Beogradit, Prishtinës dhe vendet tjera të Ballkanit Perëndimor me të cilin theksohet nevoja për të respektuar plotësisht marrëveshjen mes Prishtinës dhe Beogradit për përfaqësimin rajonal të Kosovës, thotë për Beta një zyrtar i lartë BE-së.
I pyetur nëse fakti se ditëve të fundit përfaqësuesit e Serbisë i kanë lëshuar dy herë takimet rajonale, ndërsa ata të Kosovës një herë, është dëshmi se po anashkalohet marrëveshja për përfaqësimin rajonal, ai tha se është në interesin e të gjitha palëve dhe të shteteve të Ballkanit Perëndimor që marrëveshjet e arritura në Bruksel të respektohen dhe të zbatohen.

Stavileci kandidat i PDK-së për kryetar të Prishtinës

Partia Demokratike e Kosovës ka filluar të trajnojë stafin e saj për zgjedhjet e ardhshme lokale. Synimi i kryeministrit Hashim Thaçi është që në zgjedhjet e ardhshme ta fi tojë me çdo kusht Komunën e Prishtinës, të cilën e ka humbur që nga paslufta.
Kësaj here partia e Thaçit po e “trajnon” ministrin aktual të Bujqësisë, Blerand Stavilecin, që në zgjedhjet lokale ta sfidojë kundërkandiatin e Lidhjes Demokratike të Kosovës.
Burime të afërta me PDK-në i kanë thënë “Zërit” se kryesia e PDK-së është duke punuar vazhdimisht që ta promovojë Stavilecin, si kandidat për Prishtinën. Kështu, me ministrin aktual të Bujqësisë, partia e Hashim Thaçit, sipas këtij burimi, pretendon që ta rrëzojë cilindo kandidat të LDK-së.
“PDK-ja po pretendon që kandidati i ardhshëm për kryetar të Prishtinës të jetë ministri Blerand Stavileci. Ai është lindur në Prishtinë, nuk është shumë i përfolur për afera korruptive edhe gjithashtu ekziston një simpati për të”, ka thënë burimi i gazetës. 

Gradualisht te njohja

Dimitris Moschopoulos, shef i Zyrës ndërlidhëse të Greqisë në Kosovë ka thënë se njohja e Kosovës nga Greqia do të vijë natyrshëm dhe në kuadër të perspektivës evropiane.
Në një bisedë për gazetën “Express”, Moschopoulos ka thënë se marrëdhëniet tradicionale me Serbinë kanë ndikuar në pozicionin grek, por ai theksoi se duan marrëdhënie të mira edhe me shqiptarët.
“Gjithçka është graduale në këtë jetë. Jam i lumtur që vota greke do të jetë vendimtare për anëtarësimin e Kosovës në BERZH”, ka thënë shefi i Zyrës Ndërlidhëse të Greqisë në Kosovë.
Pse Greqia ende është njëra nga pesë shtetet e BE-së që nuk e njohin pavarësinë e Kosovës, Moschopoulos ka thënë se ekzistojnë disa arsye.
“Ajo që është më e rëndësishmja është se ne veprojmë si shtet i rajonit, si fqinjë. Ne e shohim se duhet të mbajmë një lloj balanci mes fqinjëve tanë, dhe në këtë logjikë ne kemi një qasje shumë konstruktive karshi Kosovës. Po, ne ende nuk e kemi njohur Kosovën, por në të njëjtën kohë, ne plotësisht e mbështesim perspektivën evropiane të Kosovës, dhe ne plotësisht e mbështesim zhvillimin e saj ekonomik. Ne besojmë se zhvillimi ekonomik do të ishte në të mirë të popullit të saj, dhe në të mirën e paqes dhe stabilitetit në rajon, dhe në këtë logjikë për të gjithë ne. Ne dëshirojmë të shihemi si fqinjë miqësorë. Ky është mesazhi që unë kam, dhe ne ju shohim ju si fqinjë miqësorë, gjithmonë ju shohim si fqinjë miqësor”, tha ai.
Mirëpo, se a ka ndonjë arsye specifike për mosnjohjen, p.sh. shtete të caktuara thonë se pavarësia e Kosovës përbën precedent ose arsyetime të tjera, cili është arsyetimi i Athinës, Moschopoulos vlerësoi se në raste të tilla, nuk mund të gjesh vetëm një arsye dhe të thuash se kjo është arsyeja kryesore.
“Sa i përket pyetjes nëse Kosova përbën precedent, ajo është e qartë, dhe ne pajtohemi me partnerët dhe aleatët tanë, se Kosova nuk përbën precedent, ajo është rast unik. Kjo është pozita jonë, ne e kemi pranuar këtë, e kemi adoptuar këtë brenda Bashkimit Evropian, dhe për këtë arsye iu referohem partnerëve tanë, dhe brenda NATO-s, dhe për këtë arsye përmenda aleatët tanë. Pra po, ne nuk mendojmë se Kosova paraqet precedent. Ekzistojnë shtete të cilat janë frikësuara për këtë, ne nuk jemi mes atyre shteteve. Tani, ne duhet të respektojmë qasjen e secilit shtet, dhe ndjeshmërinë e secilit shtet. Ajo që ka më së shumti rëndësi është se si veprojmë në fund. Dhe, çdo çështje që është e rëndësishme për Kosovën brenda Bashkimit Evropian, ne kemi adoptuar një qasje shumë konstruktive. Pra, çështja e njohjes është diçka që do të vijë natyrshëm”, tha ai.

Mbrojtja e Xhemajlit do të kërkojë rigjykim

Katër muaj nga vendimi i shkallës së parë, sipas të cilit, kryetari i Komunës së Ferizajt, Bajrush Xhemajli, është dënuar me dy vjet e gjysmë burgim, Gjykata Supreme e Kosovës si shkallë e dytë, e ka vërtetuar si të plotë dënimin, me ç’gjë vendimi ndaj Xhemajlit ka marrë formën e prerë.
Me vendimin e Shkallës së Dytë, Bajrush Xhemajlit i mbetet që të shkojë në vuajtje të dënimit, ndonëse ende nuk dihet dita se kur ai do të dërgohet në burg, pasi që është gjetur fajtor për kryerjen e veprës penale rrezikim i trafikut publikm shkruan “Zëri”.
I pari i Komunës së Ferizajt nga radhët e Partisë Demokratike të Kosovës, i cili ka dhënë dorëheqje të martën, do të vuajë dënimin për shkak se paraditen e 21 majit të vitit 2009, teksa po udhëtonte nga Ferizaj për në Prishtinë, në lagjen “Vetërnik” në hyrje të kryeqytetit kishte shkaktuar një aksident komunikacioni, ku për pasojë kishte humbur jetën Labinot Rrustemi, 21-vjeçar nga Banulla e Lipjanit.
Mbrojtja e Xhemajlit paralajmëron se do të përdorë mjetet e jashtëzakonshme për të kontestuar vendimin, i cili tashmë ka marrë formën e prerë.
“Mendojmë se Gjykata Supreme nuk ka vendosur në mënyrë të drejtë. Ne kemi të drejtë që të përdorim mjetet e jashtëzakonshme, ku rasti mund edhe të vijë në rigjykim”, ka paralajmëruar mbrojtësi i Bajrush Xhemajlit, avokati Mexhid Syla.
Por, sipas ligjeve në fuqi, mjetet e jashtëzakonshme që tashmë janë paralajmëruar nga mbrojtja nuk e pengojnë ekzekutimin e vendimit të formës së prerë.
Mjetet e jashtëzakonshme mund të kërkohen në afat prej tre muajsh, mirëpo, sipas ligjit, dënimi mund të nisë së ekzekutuari.
Ndërsa nëse janë konstatuar shkelje ligjore gjatë procedurës i njëjti, sipas ligjeve në fuqi, mund të ndërpritet dhe lënda të kthehet në rigjykim.

Beogradi s’do të mund t’i mbajë zgjedhjet në Kosovë

Shefja e delegacionit të Republikës së Kosovës për dialogun teknik në mes të Prishtinës dhe Beogradit, Edita Tahiri, e ka thyer heshtjen disajavore.
Në këtë intervistë për “Epokën e Re”, Tahiri Tahiri ka deklaruar bindshëm se Serbia s’do të mund t’i mbajë zgjedhjet lokale në Kosovë, as nuk do të ketë status special për serbët e veriut.
“Beogradi nuk do të mund t’i mbajë zgjedhjet në Kosovë. Në bazë të të gjitha bisedave që i kam zhvilluar deri më tash, kam parë një seriozitet dhe vendosmëri të diplomatëve perëndimorë, që t’ia bëjnë me dije Serbisë se nuk mund të ketë standarde të dyfishta të politikës së jashtme, në një anë proevropiane karshi Evropës, në anën tjetër antievropiane karshi rajonit, veçanërisht Kosovës”, theksoi Tahiri.
Kryenegociatorja u shpreh se sa i përket zgjedhjeve serbe, por edhe temave të tjera nga Cooper dhe diplomatë të tjerë me të cilët është takuar pas përfundimit të raundit të fundit, ka kërkuar mosmbajtjen e tyre, përkatësisht pengimin e Serbisë për t’i mbajtur në Kosovë.
“Tani është koha kur BE-ja duhet të flasë, t’i mbrojë vlerat evropiane si dhe t’i obligojë shtetet që të jenë të vetëdijshme se rruga për BE është rrugë me obligime për respektim të standardeve. Pika e dytë: ua kam bërë të qartë se zhbërja e strukturave paralele është e domosdoshme dhe është në funksion të stabilitetit rajonal. Kurse, pika e tretë: kam theksuar se vendet mosnjohëse të cilat po vazhdojnë të mos e njohin Kosovën duhet të kenë parasysh se çdo vonesë në këtë drejtim ndërlidhet me brishtësinë e mundshme apo në rrjedhat jo të dëshirueshme për stabilitetin rajonal”, ka thënë Tahiri.
Se a e paraqet fusnota ndryshe Kosovën, nuk e paragjykon statusin e Kosovës, Tahiri theksoi se të gjithë do të dëshironim që Kosova sot të ishte shtet i njohur nga të gjitha vendet e botës dhe BE-së, por, realiteti është ky që është dhe ende pesë vendet e BE-së nuk na kanë njohur si shtet.
“Pra, meqenëse jemi në një proces të tranzicionit drejt njohjes globale për të cilën ne kemi forcuar të gjitha dinamikat e lobizimit, atëherë formulat e tilla kalimtare, por që kontribuojnë në përfaqësimin e barabartë dhe të plotë të Kosovës në të gjitha organizatat dhe iniciativat rajonale, janë një mundësi që ne si shtet t’i plotësojmë standardet evropiane”, shprehet Tahiri.
Tahiri nuk i ka komentuar direkt deklaratat e kryetari të Kuvendit të Kosovës, Jakup Krasniqi, i cili ka deklaruar se delegacioni i Kosovës nuk i ka njohur teknikat e dialogimit.
Kryenegociatorja Tahiri me këtë rast ka thënë “Unë mendoj se dialogu teknik dhe rezultatet duhet të analizohen me një qasje vizionare dhe strategjike. Pikërisht kjo analizë u takon politikanëve që kanë përvojë në negociata. Negociatat apo bisedimet janë të suksesshme vetëm kur të mbrohen qëllimet strategjike. Të gjitha marrëveshjet e arritura në Bruksel kanë mbrojtur dhe avancuar interesat nacionale të Kosovës. Kanë respektuar vijat e kuqe, Rezolutën e Kuvendit të Kosovës dhe platformën e Qeverisë”. 

Mazzarri kërkon fitore ndaj Sienës

Trajneri i Napolit, Walter Mazzarri, thotë se ndeshja e sotme gjysmëfinale e Kupës së Italisë përballë Sienës duhet fituar patjetër.
Napolitanët kanë nevojë për fitore për të arritur në finale, pasi humbën me rezultat 2-1 në ndeshjen e parë në stadiumin Artemio Franchi.
“Na pret një ndeshje shumë e vështirë dhe ne duhet ta fitojmë atë patjetër. Tifozët duhet ta ndihmojnë skuadrën dhe unë shpresoj se ne do të kemi një shtëpi të mbushur që na brohoret, veçanërisht pasi ne kemi nevojë ta përmbysim rezultatin”, ka thënë Mazzarri.

Shkëmbim Sneijder – Pato?

Milani ka marrë dritë jeshile për transferimin e Wesley Sneijder, raportojnë mediat italiane.
Rossonerët raportohet se kanë punuar aktivisht për të bindur njëshin e Interit të bëjë një transferim nga njëri te klubi tjetër rival.
Milani, që tashmë e ka humbur Andrea Pirlon dhe pritet të jetë edhe pa Clarence Seedorf sezonin e ardhshëm, ka probleme me kreativitetin në mesfushë dhe e ka identifikuar Sneijderin si një zgjidhje ideale.
Edhe presidenti i Interit, Massimo Moratti, tashmë ka shqyrtuar mundësinë e largimit të holandezit tek rivalët lokal, por ai ka propozuar një marrëveshje shkëmbimi që përfshin Alexandre Paton.
Sipas mediave italiane, për momentin gjithçka është e mundshme dhe negociatat pritet të vazhdojnë javën e ardhshme. 

Del Piero: Do ta ndjekim Milanin deri në fund

Kapiteni i Juventusit, Alessandro del Piero, thotë se ata do ta ndjekin Milanin edhe në ligë, pas trifumit në gjysmëfinale të Kupës së Italisë.
Del Piero ishte në listën e shënuesve në ndeshjen e mbrëmshme, e cila pas vazhdimeve përfundoi me rezultat 2-2, e që ndihmoi Biankonerët të eliminojnë Rossonerët me rezultat të përgjithshëm 4-3 nga të dyja ndeshjet.
“Ne jemi të kënaqur që shkojmë në rundin e ardhshëm. Milani dhe Juventusi gjithmonë kanë bërë dhe do të bëjmë ndeshje të mira pasi janë dy klube të shkëlqyeshme. Ne do të luftojmë në të dy frontet deri në fund”.
“Në kampionat ne do t’i japim Milanit kohë të vështirë deri në ndeshjen e fundit. Fatmirësisht, sonte ne ishim në gjendje të shënojmë golin vendimtar”, ka thënë Del Piero. 

Juventusi në finale të Kupës

Përkundër barazimit prej 2-2 përballë Milanit, Juventusi e ka siguruar kualifikimin në finale të Kupës së Italisë falë rezultatit më të mirë në të dy ndeshjet gjysmëfinale (4-3).
Në takimin e parë të zhvilluar në San Siro, Juventusi fitoi me rezultat 2-1, ndërsa pas barazimit në Juventus Stadium, Zonja e Vjetër kualifikohet në finale.
Vendasit zhvilluan një gjysmë të parë impresionuese dhe me meritë e përfunduan me avantazh. Alessandro Del Piero reagoi shpejtë pas krosimit të Lichtsteiner dhe çoi në ekstazë tifozët në Juventus Stadium (28’).
Në gjysmën e dytë Philippe Mexes dërgoi një top në zonë dhe Djamel Mesbah ishte aty për t’i barazuar shifrat (51’).
Në vazhdim, ndërkohë që Milani po tentonte ta shënojë golin për të siguruar vazhdimet, Juventusi përpiqej që t’i japë fund dilemës për finalistin.
Në këtë aspekt më të suksesshëm rezultuan lojtarët mysafirë, të cilët kaluan në avantazh përmes Maxi Lopez (81’), ashtu që u desh të zhvilloheshin vazhdimet për ta vendosur fituesin.
Në vazhdime, Mirko Vucinic pranoi një pasim nga Andrea Pirlo dhe në mënyrë mjeshtërore e barazoi rezultatin (96’), i cili i kualifikonte Bianconerët.
Duke qenë se Milani nuk arriti ta shënojë edhe një gol, Rossonerët u eliminuan nga Kupa.
Në finale të Coppa Italia, Juventusi do të luajë kundër fituesit të duelit mes Sienas dhe Napolit.

Presioni është mbi Realin

Me një fitore jo edhe aq të lehtë kundër Granadas, Barcelona e ka ngushtuar në pesë diferencën e pikëve me Real Madridin në tabelën e La Ligas. Blaugranët fituan me rezultat 5-3 në takimin e të martës mbrëma në Camp Nou.
Pas vetëm katër minutash lojë, Xavi Hernandez i kaloi vendasit në epërsi, ndërsa asistimi ishte i Leo Messit.
Futbollisti më i mirë në botë e dyfishoi epërsinë në minutën e 17-të dhe me këtë rezultat skuadrat shkuan në pushim.
Në gjysmën e dytë, mysafirët u kthyen në lojë. Pas një gjuajtje të lirë të Carlos Martins, Maniz e shënoi golin e parë për Granadan (55’). Ndërkaq, Guilherme Siqueira e barazoi rezultatin nga pika e bardhë (62’).
Mirëpo, Lionel Messi e ktheu lojën në favor të Barcelonës (67’) me golin e tij të 233-të me fanellën blaugrane, duke thyer kështu rekordin e Cesar Rodriguez dhe duke shkruar historinë.
Një goditje të Messit e mbrojti portieri mysafir, por aty ishte Tello për ta shënuar golin e katërt të vendasve (82’).
Magjia Messi kompletoi het-trikun e tij me golin e 34 në La Liga këtë edicion (86’).
Granada shënoi edhe një herë nga penaltia me anë të Guilherme Siqueiras (89), ndërsa Dani Alves u përjashtua me kartonin e dytë të verdhë.
Fitorja e Barcelonës shton presionin mbi Real Madridin që të mërkurën luan si mysafir i Villarrealit. 

Shkurtohet jetëgjatësia e posterëve

Vetëm dhjetë ditë pas përfundimit të fushatës zgjedhore, partitë politike dhe kandidatët e tyre janë të obliguar që t’i heqin të gjithë posterët që i vendosin gjatë fushatës. Në të kundërtën, gjobat për ta do të arrijnë deri në 2 mijë euro për subjekt dhe 1 mijë për kandidat. Kjo është risi në Ligjin e ri të zgjedhjeve të përgjithshme, për të cilin është duke vazhduar punën komisioni parlamentar për reformën zgjedhore.
Subjektet politike, kandidatët dhe mbështetësit e tyre, me Ligjin e ri të zgjedhjeve do të jenë të obliguar që në një afat prej dhjetë ditësh pas përfundimit të fushatës, t’i heqin posterët e vendosur gjatë fushatës.
Sipas kryetarit të Komisionit për reformën zgjedhore i Kuvendit të Kosovës, Haki Demolli, ndëshkimet për ata që nuk e zbatojnë këtë nuk do të jenë të vogla, raporton RTK.
“Një risi në ligjin e ardhshëm do të jetë afati dhjetë ditor për heqjen e posterave dhe materialit tjetër zgjedhor dhe komisioni u pajtua që si sanksione të parashihen për subjektet politike prej 5 deri në 2 mijë euro, kurse për individ prej 200 deri në 1 mijë euro”, tha Demolli.
Komisioni miratoi disa prej propozimeve të Komisionit Qendror të Zgjedhjeve që kanë të bëjnë me vendimet për të cilat nevojiten 2/3 e votave, e që kanë të bëjnë me certifikimin e listave zgjedhore, me certifikimin e rezultateve si me rregulloren e punës së KQZ-së.
Ndërkohë, komisioni po ashtu vendosi që zgjedhja e kryeshefit të Sekretariatit të KQZ-së të bëhet përmes dispozitave ligjore e jo siç ka propozuar KQZ-ja, përmes akteve të brendshme të këtij institucioni, ndërsa kuorumi i mbledhjeve të KQZ-së të ngritet nga 7 të ngritet në 8 anëtarë. 

FSK synon institucionet ndërkombëtare

Forca e Sigurisë së Kosovës synon që gjatë këtij viti të bëjë maksimumin për të qenë pjesë e institucioneve ndërkombëtare. Zv/ministri i FSK-së, Bejtush Gashi, thotë se në këtë drejtim janë bërë hapat e parë dhe FSK-ja do të përgatis planin strategjik të zhvillimit.
Forca e Sigurisë së Kosovës në objektivat e vitit 2012 ka përcaktuar edhe përpjekjet maksimale për t''u bërë pjesë e institucioneve ndërkombëtare.
Sipas Gashit në këtë proces jo të lehtë nevojitet edhe mbështetje legjislative–juridike dhe baza aktuale ligjore duhet të pësojë ndryshime. Qeveria ka nxjerr vendimin për rishikimin e sektorit të sigurisë përfshirë edhe FSK-në dhe bazuar në këtë vendim do të procedojë edhe FSK-ja.
“Mbështetur në vendimet që do të nxirren ne do të hartojmë planin strategjik të zhvillimit të FSK-së, janë formuar edhe grupet për hartimin e këtij plani dhe ky plan pastaj do t’i ofrohet qeverisë, e cila do të procedojë me të deri te organi legjislativ. Edhe në rrafshin legjislativ ka nevojë që ligjet ekzistuese të plotësohen dhe prej të cilave do të varet strukturimi dhe misionit që do të ketë FSK, përkatësisht ushtria e Kosovës. Në këtë drejtim ne kemi marr iniciativat, hapat e parë dhe presim edhe sinjalet nga bashkësia ndërkombëtare, sepse zhvillimi i FSK-së do të jetë një rrugë nëpërmjet të cilës do të bashkëpunohet drejtpërdrejt me NATO-n”, tha ai për Radio Kosovën.
Në prag të 13 vjetorit të ndërhyrjes së NATO-s ndaj caqeve serbe, Gashi vlerëson të domosdoshme praninë e NATO-s edhe në të ardhmen në Kosovë, por edhe në rajon.
E përfshirë në procesin e ngritjes së FSK-së, sipas Gashit, prania e NATO-s në Kosovë është e domosdoshme edhe për ofrimin e përkrahjes për perspektivën e FSK-së e cila synon që të ardhmen të jetë anëtare dhe partnere në institucionet ndërkombëtare të sigurisë.

Nuk zbatohet Ligji për financimin e parive politike

Dhjetëra rekomandime sa i përket kornizës ligjore për transparencën në financimin e subjekte politike, po ashtu shumë rekomandime për vet subjektet politike, për Komisionin Qendror të Zgjedhjeve (KQZ) si dhe për shoqërinë civile dhe mediat, kanë bërë Instituti Demokratik i Kosovës (KDI) / Transparency International Kosova (TIK), e të cilat janë dhënë gjatë debatit: “Ligji për financimin e partive politike dhe zbatimi i tij në praktikë”.
Gjatë këtij debati, u tha se ky ligj nuk zbatohet dhe se që nga paslufta e deri më tani subjektet politike asnjëherë nuk kanë pasur vullnet që të deklarojnë raportet e tyre financiare.
Gjithashtu u tha se KQZ-ja nuk ka auditor të brendshëm dhe se në të gjitha aspektet duhet të përforcojë kapacitetet, raporton Kosovapress.
Safete Hadërgjonaj, nga PDK, ka thënë se në mënyrë që gjithçka të shkojë mirë edhe në aspektin e zbatimit të ligjit, KQZ-ja duhet të ketë, pos tjerash, edhe kapacitete të mjaftueshme njerëzore.
Ndërsa, sipas Ismet Beqirit, LDK, ligji i ka të caktuara disa gjëra, por partitë duhet t’i zbatojnë.
Alban Krasniqi, nga Lëvizja Vetëvendosje, ka pohuar që Ligji për financimin e partive politike lë shumë hapësira për keqpërdorime dhe ai duhet ndryshuar.
Ndër të tjera është thënë se mungon transparenca, si brenda subjekteve ashtu edhe jashtë tyre, pasi as vetë anëtarët e partisë nuk dinë për parat që disponon partia.
Raporti i Auditorit për vitin 2010, ka gjetur shumë shkelje. Aty thuhet se subjektet politike nuk kanë mbajtur kontabilitet të mirëfilltë, nuk kanë bërë kontroll të brendshëm financiar, pothuajse asnjë subjekt politik nuk ka staf profesional financiar të certifikuar për kontabilist, ndërsa të dhënat e bizneseve, që kanë dhënë donacione, nuk janë paraqitur fare.
Sipas ligjit, deri më 1 mars është dashur që financat e tyre t’i deklarojnë në KQZ, ndërsa kjo e fundit t’i publikojë në faqen zyrtare të saj.

Jahjaga: Siguria për gruan, siguri për tërë shoqërinë

Presidentja e vendit, Atfiete Jahjaga deklaroi të martën se një vend mund të përparojë nëse gruaja është e arsimuar, e edukuar, e punësuar dhe e fortë ekonomikisht. Ajo vlerësoi se e drejta e gruas për të qenë e përfaqësuar denjësisht është thelbësore për zhvillimin e shoqërisë.
Jahjaga këto komente i bëri në konferencën “Java e gruas”, të organizuar nga NDI.
Ajo u shpreh se në samitin e Grave lidere në botë të mbajtur në New York, ka insistuar se asnjë shoqëri nuk është e sigurt nëse pjesëtarët e saj, në veçanti gratë, nuk janë të sigurta. Sipas saj, siguria për gruan nënkupton siguri për fëmijën, siguri për familjen dhe siguri për tërë shoqërinë.
“Atë që ne e kemi mësuar gjatë gjithë kësaj kohe në takimet me gratë në botë është se: një vend mund të përparojë nëse gruaja është e përparuar. Një vend mund të përparojë nëse gruaja është e arsimuar, e edukuar, e punësuar dhe e fortë ekonomikisht. E drejta e gruas për të qenë e përfaqësuar denjësisht në shoqëri është thelbësore për zhvillimin e kësaj shoqërie dhe të gjithë ne edhe burrat edhe ne gratë kemi përgjegjësitë tona për ndërtimin e vizionit për familjen dhe për vendin tonë”, thekson Jahjaga.
Ajo vlerëson se gratë mund të jenë të jenë udhëheqëse dhe shembull i suksesit për të mirën e gjithëmbarshme shoqërore.
“Më lejoni t’i përmend dy shembuj nga skena ndërkombëtare - dy mike të Kosovës, sekretaren amerikane të shtetit, Hillary Clinton dhe ish-sekretaren e Shtetit, Madeleine Albright. Ato janë ndër udhëheqëset e para në botë, që me aftësitë e tyre diplomatike dhe me guximin e marrjes së vendimeve të mëdha kanë ndikuar në ndryshimin e realitetit politik në botë, duke i hapur perspektivë demokracisë në vendet me sisteme totalitare”, shprehet ndër të tjera presidentja.
Ajo më tej theksoi se në Kosovë puna dhe përgjegjësia jonë si shoqëri ndaj gruas është larg të qenit e përfunduar. Sipas saj, gruaja në Kosovë vazhdon të jetë në pozitë të vështirë dhe të pafavorshme, e goditur në vazhdimësi nga varfëria dhe dhimbjet e një jete me mungesa të mëdha.
“Për të përmirësuar gjendjen dhe ngushtuar hapësirën për diskriminimin e gruas duhet patjetër t’i japim një shtytje më të madhe emancipimit dhe arsimimit të gruas në Kosovë, si e drejtë e pamohueshme njerëzore”, potencoi Jahjaga. 

Kryetari i Degës së AKR-së në Podujevë kalon në LDK

Kryetari i deritashëm i Degës së Aleancës Kosova e Re në Podujevë, Avni Ajeti, sot zyrtarisht ka kaluar në radhët e LDK-së. Ai thotë se është ndier i “thyer” kur ka parë që Kuvendi i Kosovës nuk e ka miratuar Ligjin për veteranët. Ky, thotë, se ka qenë një nga arsyet që e kanë shtyrë ta lë këtë parti, e cila në pushtetin qendror është në koalicion me PDK-në.
Tashmë ish-kryetari i Degës së AKR-së në Podujevë, ka thënë se ka edhe shumë arsye të tjera pse ka braktisur këtë subjekt politik, kurse beson se në LDK do ta gjejë hapësirën që i ka munguar në ish-partinë e tij.
Ajeti beson se me kalimin e tij në LDK këtë do ta bëjnë edhe anëtarët e tjerë të degës së AKR-së në Podujevë.
Ai njëherësh është edhe këshilltar i Kuvendit Komunal dhe prej sot i bashkohet Grupit të këshilltarëve të LDK-së.
Kryetari i degës së LDK-së në Podujevë, Agim Veliu, i ka quajtur raportet në partinë e tij shumë të mira, edhe pas asaj që ndodhi në manifestimin e 22-vjetorit të kësaj dege.
“Dega e LDK-së në Podujevë është degë unike, është degë e fuqishme. Është e vërtetë se 2-3 individë të pakënaqur gjatë procesit zgjedhor në Forumin e Rinisë kanë mbetur të pakënaqur, për arsye se dy prej tyre e kanë kaluar moshën 30-vjeçare dhe ata nuk mund të jenë më anëtarë të Forumit, kurse një prej tyre është në prag”, ka thënë Veliu gjatë prezantimit të aderimit të kryetarit të degës së AKR-së në atë të LDK-së. 

BE kërkon respektimin e marrëveshjes

Bashkimi Evropian i ka dërguar porosi Beogradit, Prishtinës dhe vendeve të Ballkanit Perëndimor, në të cilin theksoi domosdoshmërinë e respektimit në tërësi të marrëveshjes mes Prishtinës dhe Beogradit lidhur me përfaqësimin rajonal të Kosovës, kështu i ka thënë sot agjencisë së lajmeve Beta një zyrtar i lartë diplomatik i BE-së në Bruksel.
“Porosia shumë e qartë që marrëveshja duhet të respektohet, i është dërguar të gjitha palëve”, citohet të ketë thënë zyrtari i BE-së.
I pyetur nëse fakti se ditëve të fundit përfaqësuesit e Serbisë dy herë dhe njëherë ai i Kosovës u larguan nga takimet rajonale, është tregues se po anashkalohet marrëveshja për përfaqësimin rajonal të Kosovës, prapë së cilës qëndron BE-ja, ai tha se është absolutisht në interes të të gjitha palëve dhe vendeve të Ballkanit Perëndimor, që marrëveshja e Brukselit të respektohet dhe të zbatohet.
Zyrtar i lartë theksoi se marrëveshja mes Beogradit dhe Prishtinës mbi përfaqësimin rajonal të Kosovës "është plotësisht i qartë dhe zyrtarisht botuar."
Ai, megjithatë, ka shtuar se autoritetet në Beograd kanë gabuar që kanë braktisur takimet në të cilat Kosova nuk u paraqit sipas marrëveshjes.

Hoxhaj ngushëllon homologun francez

Ministri i Punëve të Jashtme i Republikës së Kosovës, Enver Hoxhaj, i ka dërguar një telegram ngushëllimi ministrit të Jashtëm dhe Çështjeve Evropiane të Republikës së Francës, Alain Juppe, me rastin e vdekjes së katër personave në sulmin kriminal të kryer në Kolegjin e Toulousit në Francë.
Në telegram, Hoxhaj, në emër të qytetarëve dhe institucioneve të Republikës së Kosovës, ka dënuar këtë krim të rëndë, duke i shprehur ngushëllime ministrit Juppe, dhe duke theksuar indinjatën dhe tronditjen e thellë të opinionit kosovar, të shkaktuar nga ky akt kriminal.
Ministri i Jashtëm i Kosovës, po ashtu, ka shprehur solidaritetin e plotë të Qeverisë dhe popullit të Kosovës me familjarët e viktimave, Qeverinë dhe popullin francez, në këto ditë të rënda. 

Konfirmohet, Bajrush Xhemajli në burg

Gjykata Supreme konfirmon aktvendimin për kryetarin e Ferizajt, Bajrush Xhemajli i dënuar kohë më parë me 2 vjet e gjysmë burgim.
Portali Indeksonline mëson se “aktvendimi është konfirmuar në të gjitha pikat dhe Xhemajli do të duhet të vuaj dënimin me burgim duke lënë karrigen e të parit të komunës”. Ai do të bëhet publik gjatë ditës nga Gjykata Supreme.
Xhemajli u dënua me 2 vjet e gjysmë burg nga Gjykata e Qarkut në Prishtinë, për aksidentin në të cilin vdiq një djalë i ri. Ai u gjet fajtor për thyerje të rregullave të komunikacionit që patën si pasojë vdekjen e një personi. Atij i është ndaluar ngasja e veturës për 3 vjet.
Bajrush Xhemajli akuzohej për veprën penale rrezikim i trafikut publik nga neni 297, paragrafi 5, lidhur me paragrafin 1.3 të Kodit Penal të Kosovës. Sipas ligjeve në fuqi, në Ferizaj duhet të shpallen zgjedhje të jashtëzakonshme.

Gjini: Kosova e Re mund të dështojë

Shefi i grupit parlamentar të Aleancës për Ardhmërinë e Kosovës (AAK), Ardian Gjini, tha të martën se procesi për ndërtimin e termocentralit Kosova e Re mund të dështoi për shkak të korrupsionit.
Në një konferencë për media, ai theksoi se Banka Botërore (BB) ka rrezik të tërheqë garancinë, për shkak të korrupsionit.
Nëse ndodh kjo, atëherë sipas Gjinit, do të tërhiqen dy kompanitë që kanë mbetur në garë, pas tërheqjes së dy të tjerave.
Konzorcimet t cilat janë edhen në garë për ndërtimin e Termocentralit Kosova e Re.
Konsorciumi Adani Power/PT Adani Global nga India dhe Indonezia, konsorciumi AES Electric lid/ Demir Export A.S nga SHBA-ja dhe Turqia, Park Holding nga Turqia dhe konsorciumi PPC Contour Global LLP nga Greqia dhe Britania.

Nistelrooy të pensionohet në fund të sezonit?

Ish-sulmuesi i përfaqësueses së Holandës, Ruud van Nistelrooy, ka zbuluar se ai është duke menduar t’i japë fund karrierës së tij si futbollist në fund të këtij sezoni.
Kontrata e 35-vjeçarit me Malagan skadon gjatë verës dhe ai e ka bërë të qartë se ose do të nënshkruajë vazhdimin e kontratës me skuadrën e La Ligës ose do t’i varë këpucët.
“Malaga do të jetë klubi im i fundit. Nuk është lehtë ta marr një vendim përfundimtar për të ardhmen time. Për momentin, është 50-50 nëse do të pensionohem ose do ta vazhdoj karrierën time. Do të duhet të flas me klubin”.
“Do ta marr një vendim gjatë muajit prill. Vetëm po vazhdoj ta shtyj marrjen e vendimit. Po mbush 36 vjet pas disa muajsh dhe duhet të mendoj mirë para se të vendos çfarë do të bëj”, ka thënë Van Nistelrooy për Sport1.

Juventusi ta transferojë Torresin?

Gjiganti i Serie A, Juventus, shpreson të sigurojë shërbimet e sulmuesit të Chelseat, Fernando Torres, gjatë verës, raporton ueb faqja Goal.com.
Biankonerët kërkojnë të shtojnë një emër të njohur në repartin sulmues në prag të sezonit 2012/13, dhe më herët janë lidhur me një transferim të sulmuesit të Real Madridit, Gonzalo Higuain.
Megjithatë 28-vjeçari Torres mësohet se është shndërruar në cakun kryesor të Juventusit. Drejtori sportiv i klubit italian tashmë ka kontaktuar me kampin e lojtarit për të diskutuar një transferim të mundshëm.
Torres iu bashkua Chelseat nga Liverpooli në janar të vitit të kaluar për një shumë që u raportua se kapi vlerën e 58.5 milionë eurove, por sulmuesi kurrë nuk arriti t’i plotësojë pritjet në Stamford Bridge.
Andaj, klubi londinez mund të zgjedhë ta largojë nga skuadra ish-yllin e Atletico Madrid këtë verë, nëse ai dështon të ri-gjejë formën edhe për pjesën e mbetur të sezonit dhe do të preferonte një shitje të tij jashtë Ligës Premier.

Moratti: Ranieri është i sigurt

Presidenti i Interit, Massimo Moratti, thotë se karrigia e trajnerit Claudio Ranieri është e sigurt, pavarësisht rezultateve zhgënjyese në kampanjën 2011/12.
Nerazzurrët aktualisht qëndrojnë në pozitën e shtatë në tabelën e Serie A dhe së fundi u eliminuan nga Liga e Kampionëve dhe Kupa e Italisë nga Marseille, respektivisht Napoli.
“A mund të jetë i sigurt Claudio Ranieri për punën e tij? Po, Absolutisht”, ka thënë Moratti para gazetarëve.
Pronari i Interit më pas ka thënë se morali i skuadrës është i ulët në Giuseppe Meazza, por kjo mund të ndryshojë me vetëm një fitore.
Interi do të rikthehet në fushë më 25 mars me derbin e Serie A përballë rivalit Juventusit. 

Wenger: Barca favorite për ta fituar LK-në

Menaxheri i Arsenalit, Arsene Wenger, e ka etiketuar Barcelonën si favoritin kryesor për ta fituar Ligën e Kampionëve këtë sezon.
“Sipas mendimit tim, Barcelona është favoriti i madh për ta fituar Champions League. Së pari, ata janë plot vetëbesim pasi tashmë e kanë fituar këtë garë më herët. Po ashtu ata tash po fillojnë të rikthejnë lojtarët që kanë qenë të lënduar për një kohë”.
“Madrid mund ta ketë Cristiano Ronaldon, por Barcelona e ka Messin, i cili është i aftë të shënojë dy gola edhe nëse nuk është në kulmin e formës”, ka shkruar Wenger në blogun e tij në Eurosport. 

Chelsea 30 milionë për Falcaon

Chelsea raportohet se është duke bërë gati një ofertë për sulmuesin e Atletico Madrid, Radamel Falcao.
Daily Mail shkruan se pronari i klubit londinez, Roman Abramovich, planifikon të ofrojë 30 milionë euro për uruguaianin.
Falcao ka shënuar 33 herë në 36 ndeshje për Porton, përfshirë 17 gola në 14 ndeshje të Europa League, që ishte rekord i ri sezonin e kaluar.
26-vjeçari u shit te Atletico verën e kaluar, klub i cili po kalon nëpër vështirësi financiare dhe mund të detyrohet ta shesë atë gjatë verës.

Guardiola: Ibra është lider i Milanit

Pep Guardiola mund të ketë raporte jo të mira me Zlatan Ibrahimovic, por spanjolli ka vetëm fjalë të mira për kualitetet e suedezit.
Ibrahimovic iu bashkua Barcelonës nga Interi në vitin 2009 për 69.6 milionë euro, por qëndroi në Camp Nou vetëm një sezon, pas përplasjes me Guardiolën, dhe u transferua te Milani në vitin 2010.
Ibra ka fituar titullin e Serie A me Milanin sezonin e kaluar dhe është në rrugë ta bëjë këtë gjë edhe këtë sezon, derisa është kualifkuarpër në çerekfinale të Ligës së Kampionëve ku do të përballet pikërisht me ish-skuadrën e tij.
“Ibrahimovic është një lojtar i cili luan në nivel shumë, shumë të lartë. Ai është lider te Milani”, ka thënë Guardiola në konferencën për shtyp.

Allegri: Do ta përmbysim Juven

Trajneri i Milanit, Massimiliano Allegri, është i bindur se Rossonerët sonte do të arrijnë ta përmbysin disvantazhin prej 2-1 nga ndeshja e parë ndaj Juventusit.
“Ne do të tentojmë ta përmbysim deficitin me qëllim për të arritur në finale edhe pse e dimë se do të jetë vështirë. Unë jam i qetë dhe i bindur se ne do të luajmë një ndeshje të mirë, pavarësisht mungesave të cilat do t’i kemi”.
“Philippe Mexes do të kthehet pas suspendimit, derisa Clarence Seedorf është sërish i gatshëm. Do të duhet të vlerësoj gjendjen e Kevin Prince Boateng. Megjithatë, Robinho dhe Mark Van Bommel nuk do jetë aty”.
“Boateng përfundimisht do të jetë i gatshëm për ndeshjen ndaj Romës, derisa ne po ashtu dëshirojmë që Robinho të rikthehet për atë ndeshje, edhe pse ka ende shumë punë për t’u bërë”, ka thënë Allegri.

De Rossi: Mund të kualifikohemi në LK

Daniele De Rossi beson se një pozitë e cila dërgon në Ligën e Kampionëve është e arritshme për Romën, pas fitores së mbrëmshme 1-0 ndaj Genoas.
Giallorossët qëndrojnë në pozitën e gjashtë të Serie A, por me vetëm katër pikë prapa Lazios që pushton pozitën e tretë.
“Do të jetë vështirë, por ne duhet të përpiqemi. Ne duhet t’i përmirësojmë shumë gjëra, por liga është e tillë. Askush nuk fiton me cigare në gojë. Përveç Juventusit dhe Milanit, askush nuk është bindës”.
“Ne kemi frikë nga të gjithë rivalët tanë, pasi ata janë skuadra të shkëlqyeshme dhe, nga tash, Lazio është favorit pasi është mbi të tjerët”.
“Por kanë qenë disa javë pozitive për ne dhe ka shumë ndeshje të mbetura ende”, ka thënë De Rossi. 

Celine Dion t’i rikthehet këndimit

Celine Dion ka marrë dritë të gjelbër nga mjekët për të filluar incizimin e albumit të saj të ri, pas rikuperimit nga një infeksion viral.
Superylli u sëmur më herët gjatë këtij viti dhe u detyra të ndërpresë një seri të paraqitjeve në Las Vegas pasi mjekët e këshilluan atë të marrë disa javë pushim.
Ajo fluturoi në Los Angeles të hënën e kaluar (12 mars), për të vizituar një mjek specialist, i cili i ka thënë këngëtares se ajo mund të rikthehet në studio në disa javët e ardhshme, para koncertit të saj rikthyes që është paraparë në fillim të qershorit.
Celine Dion pritet të fillojë incizimin e albumit të ri në muajin e ardhshëm (prill).

Ulipina “E diela”, një ri-takim me traditën shqiptare

Ulpiana Lama, e cila së fundi ka filluar të shfaqet në emisionin “E Diell” në Top Chanel, gjatë një prononcimi për Telegrafi, ka pohuar se në emisionin e të dielës ka shumë punë, por që shpërblehet me emocione.
Moderatorja dhe sociologia ka thënë se ky emision është inteligjent dhe që secili gjen diçka të përshtatshme për të.
“Publiku e percepton zbavitëse. E tillë është edhe për ne. Ka tepër punë, por është një punë që të shpërblen emocionalisht.Formati sjell më të mirën, në më të mirin ekran shqiptar. Është një program inteligjent, ku secili gjen diçka të përshtatshme për të”.
“Vërejmë një përgjigje jashtëzakonisht pozitive të publikut ndaj dasmave. Çdo javë, një krahinë e caktuar sheh të shpalosen përpara gjithë shqiptarisë doket e veta. Ka nostalgji ndër të moshuarit, kureshtje ndër të rinjtë, krenari ndër të gjithë. E diela është një ri-takim me traditën autoktone shqiptare”, ka thënë Ulpiana.