Kuçi ka thënë se për këtë projektligj Ministria e Drejtësisë ka koordinuar aktivitetet me të gjithë akterët përfshirë ata nga shoqëria civile, nga EULEX-i, nga Komisioni Evropian, Ambasada Amerikane, dhe se shumë shpejtë do të jetë gati për procedim të mëtutjeshëm.
Kuçi i ka bërë këto komente në takimin e radhës së Këshillit Ndërministrorë për Integrime Evropiane. Ai ka thënë po ashtu se Zyra e Kryeministrit ka vazhduar angazhimin edhe në hartimit të strategjisë për të drejtat pronësore, ka përcaktuar objektivat kryesore dhe ka paraparë aktivitete që dalin për administrimin e këtyre objektivave.
“Me këtë projektligj do të mundësohet që Gjykatat të kryejnë disa veprime, e para konfiskimi i pasurisë do të bëhet me vendim të Gjykatës sipas kërkesës së Prokurorit, konfiskimi i pasurisë mund të bëhet edhe ndaj pasurive të cilave nuk u është vendosur masa e sekuestrimit, ku Gjykata duhet të vendos për konfiskim brenda tre muajve nga data e paraqitjes së Prokurorit, me ndonjë përjashtim për raste komplekse”.
“Pasuria e fituar me vepër penale përcaktohet me aktgjykim me të cilin personi i autorizuar do të shpallet fajtorë dhe me qëllim të luftimit të korrupsionit dhe dukurive negative është paraparë që kapacitetet njerëzore të ngritën në institucione që merren me këtë lami dhe shuma e marrë në këtë formë 20% e pasurisë se konfiskuar, do të ndahet për financimin e ngritjes se kapaciteteve në punën e sistemit gjyqësor prokurorial dhe në Agjencinë për Sekuestrimin e Pasurisë së Konfiskuar”
