Ronaldo thyen rekordin e tij

Sulmuesi i Real Madridit, Cristiano Ronaldo, ka thyer rekordin e tij të golave në një sezon në La Liga, pasi shënoi golin e 41-të në sfidën e zhvilluar në Bernabeu ndaj Sporting Gijonit.
Ronaldo e barazoi rekordin e tij në ndeshjen ndaj Atletico Madridit me një hettrik, kurse ndaj Sporting Gijonit me një gol me kokë theu rekordin e tij duke shënuar golin e 41-të këtë sezon. Sidoqoftë, Ronaldo është golashënuesi më i mirë në La Liga së bashku me Lionel Messin, që ka numër të njëjtë golash pas dygolëshit ndaj Levantes.
Vlen të përmendet se Ronaldo shëoni ndaj Sportingut edhe golin e tij të 53-të në të gjitha garat këtë sezon, por është ende edhe 11-të gola prapa Lionel Messit.

Dalglish krenar me Liverpoolin

Menaxheri i Liverpoolit, Kenny Dalglish, është krenar me karakterin e treguar nga ekipi i tij, pasi The Reds arritën të përmbysin disavantazhin prej një goli ndaj rivalit lokal, Evertonit.
“Ne jemi shumë krenarë. Është në rregull për ne që të jemi të kënaqur, sepse kemi fituar dhe jemi kualifikuar në finale, por mendoj se në vitet e shkuara tifozët tanë dhe të Evertonit janë sjellë shumë mirë dhe për këtë po ashtu jemi të ngazëllyler”.
“Ne kemi fituar me rezultat 2-1 ndaj një Evertoni të përkryer. Ishte vërtet ndeshje e vështirë, por jam i sigurtë se të gjithë që e shikuan në pozitë neutrale janë kënaqur me lojën”, ka thënë Dalglish.

Heynckes ia uron titullin Dortmundit

Trajneri i Bayernit të Munichut, Jupp Heynckes, ia ka uruar para kohe titullin rivalit Borussia Dortmund, pasi njerëzit e Jurgen Klopp mposhtën Schalken dhe ekipi i tij dështoi të fitojë ndaj Mainzit.
“Kam thënë në konferencë për shtyp të premtën se Dortmundi nuk do ta humbë titullin. E shtuna e konfirmoi këtë dhe ata janë kampionë”.
“Më duhet të them se ata janë fitues meritorë të titullit sepse kanë qenë të qëndrueshëm dhe janë fokusuar në ndeshjet e tyre. Ekipi luajti mirë dhe meriton të jetë kampionë. I përgëzoj”, ka deklaruar Heynckes.

Pas prostitutës, Balotelli flirt me kushërirën e Rooneyt

Edhe pse janë rivalë në fushë, gjërat e përbashkëta mes tyre nuk kanë të ndalur së zbuluari. Vetëm pak ditë pasi u publikua nëpër mediat britanike se prostituta e Wayne Rooneyt, futbollistit të Manchester United, ishte argëtuar edhe me Mario Balotellin, futbollistin e Manchester Cityt, tani duket se lidhjet mes dy sulmuesve janë zgjeruar.
Balotelli dhe Rooney janë rivalë të përbetuar në fushën e lojës, me sulmuesin anglez që ka formën më të mirë nga ana profesionale, por që jashtë fushë po mposhtet ne italiani Balotelli.
Modelja Holly Henderson ka folur për romancën e saj me Balotellin, me të cilin thotë se është takuar në nëntor dhe pasi u njoftuan u takuan edhe disa herë të tjera.
Nuk është hera e parë që Balotelli është pjesë e thashethemeve nëpër mediat britanike, pasi edhe në të kaluarën dogji shtëpinë e tij, ka ditur të pësojë aksidente që për pak sa nuk i morën jetën dhe nuk ka ditë që nuk dënohet me gjoba për parking. 

BBA: Largohet Meti

Personazhi më atraktiv dhe më i dashur nga femrat shqiptare, Meti, është larguar nga reality shou Big Brother Albania, pasi nuk ka arritur të sigurojë votat e mjaftueshme për të qëndruar në shtëpinë më të madhe në shqipëri.
Kështu merr fund aventura e modelit nga Vushtrria, që arriti me sharmin e tij të fitojë zemrat e femrave shqiptare. Pas daljes nga Big Brother, Meti nuk shprehu pakënaqësinë ndaj asnjë prej banorëve, por as ndaj publikut, duke u shprehur mjaft i ngazëllyer me atë që ai tregoi në këtë reality shou.
Në nominim për këtë javë janë Edgari, Tani dhe djaloshi fantastik nga Prishtina, Arbri, i cili llogaritet si një prej favoritëve së bashku me Liamin për ta fituar çmimin e madh.

100 vjetori i fundosjes së Titanicut (Video)

Sot shënohet dita kur u fundos anija më e madhe dhe më e fuqishme e fillimit të shekullit XX. Në mesin e të mbijetuarve ishte edhe një shqiptar nga Korça.
Anija e quajtur Titanic u fundos në natën 14 dhe 15 prillit 1912, pasi goditi një ajsberg në udhëtimin e saj të parë. Përvjetori shënohet në shumë vende të botës.
Në Belfast të Irlandës së Veriut, ku anija është ndërtuar, hapet Kopshti Memorial Titanic, me emrat e gravuar të 1.512 viktimave, në pesë panele prej bronzi. Ceremonia e dytë mbahet në portin anglez Southampton, nga ku anija u nisë drejtë Oqeanit Atlantik.
Në vendin ku është fundosur Titanic, në pjesën veriore të Atlantikut, përvjetori shënohet me një udhëtim përkujtimor me anijen Balmor.
Anija arriti sot në vendin e tragjedisë, ndërsa pasagjerët dhe ekuipazhi kanë mbajtur një komemoracion. Nga New Yorku - destinacioni tek i cili nuk arriti kurrë Titanicu - drejtë vendit të tragjedisë është nisur edhe anija Azama Journey.
Në mesin e pasagjerët të anijeve do të jenë edhe pasardhësit e viktimave të cilët me një minutë heshtje dhe me hedhjen e kurorave do ta shënojnë këtë përvjetor.
Ekspozitat për Titanicun janë organizuar në Las Vegas, San Diego, Houston dhe Singapor. Kjo ditë do të kujtohet në të gjitha shtetet banorët e të cilëve kanë humbur jetën në këtë anije.
Në bordin e anijes, në çastin e nisjes më 10 prill 1912, ishin 2.224 vetë. Më shumë se gjysma udhëtonin në klasin e tretë me shpresën të emigronin në Amerikë. Në listën e pasanikëve të klasit të parë, spikasnin emra si ai i biznesmenit të njohur amerikan John Astor dhe Benjamin Guggenheim, bashkëpronari i rrjetit të dyqaneve “Macy`s Isidor Straus” dhe manaxheri i linjës “White Star Line”, J.Bruce Ismay.
Katër ditë pas nisjes, në orët e vona të mbrëmjes së 14 prillit, anija luksoze goditi një ajsberg. Mëngjesin e 15 prillit, “Titanic” ishte përpirë nga uji duke marrë me vete 1.512 jetë. Më të prekurit, kuptohet, ishin pasagjerët e klasës së tretë. Nga 710 që ishin gjithsej, mbijetuan vetëm 174 prej tyre. 76 për qind e anëtarëve të ekuipazhit vdiqën gjithashtu.
“Anija që nuk mund të mbytej”, siç u quajt për kohën, u fundos që në udhëtimin e parë. Për më shumë se 70 vjet, “Titanic” pushoi i patrazuar në fund të oqeanit. Pastaj, më 1985, teknologjia e avancuar nënujore ndihmoi ekspeditën franko-amerikane të zbulonte vendndodhjen e tij.
Përpos subjekt i një numri të madh librash, anija fatkeqe ka frymëzuar edhe mjaft filma, përfshirë atë të James Cameron, një sukses i kurorëzuar me disa çmime Oscar.
Por interesi për tragjedinë e 15 prillit 1912 ka vazhduar të rritet dhe sende nga anija që shfaqen rregullisht nëpër ankande ku shiten me çmime rekord.
Në vazhdim do t’ju japim 10 faktet kryesore të Titanicut.
10. Pasditen e 14 prillit, udhëtarët e klasit të parë shijuan një vakt me dhjetë lloje gjellësh (midhje, salmon të zier, fileto lope, mish qengji me salcë mendre, çokollatë, puding etj.). Pas çdo pjate u shërbye një lloj i ndryshëm vere, ndërsa në fund u shoqëruan me kafe dhe puro të shtrenjta.
9. Titanic kishte gazetën e vet. Sipas Qendrës Shkencore Natyrore të Grinsboros, “The Atlantic Daily Bulletin” shtypej përditë dhe kishte lajme, çmimet e fundit të aksioneve në bursa, rezultatet e garave me kuaj, thashetheme të shoqërisë së lartë dhe një meny të përditshme.
8. Si më modernia për kohën, anija gjigante kishte një sërë kushtesh luksoze: banja turke, biblioteka, fusha skuoshi dhe pishinë me ngrohje. Gjithashtu, transoqeaniku kishte në bord edhe një qendër shëndetësore me sallë operacioni.
7. Ndërkohë që Titanicu kishte në bord disa nga njerëzit më të pasur në botë, dy persona të famshëm për kohën nuk e bënë udhëtimin fatkeq. Sipas discovery.com, financieri J.P. Morgan dhe prodhuesi i çokollatave Milton S. Hershey kishin planifikuar të udhëtonin me anijen, por e anuluan në çastin e fundit.
6. Më pak se një muaj pas tragjedisë, aktorja e filmave pa zë, Dorothy Gibson, e mbijetuar e Titanicut luajti në filmin “E shpëtuar nga Titanicu”. Ajo solli në film historinë e vet nga tragjedia, së bashku me fustanin e bardhë prej mëndafshi që mbante veshur mbrëmjen e fundosjes së tragetit. Filmi pati sukses të jashtëzakonshëm në Amerikë dhe Angli, por gjurmët e tij u dogjën aksidentalisht vetëm dy vite më pas.
5. Shumë artefakte nga Titanicu arritën të shpëtojnë. Muzeu i Titanikut në Massachusetts, më i madhi dedikuar tragjedisë, ka disa sende nga anija e mbytur: jelekë dhe varka shpëtimi, meny dreke dhe darke, një qilim katror nga mjediset e klasës së parë, letra e kartolina të shkruara në bord, porcelane luksoze dhe një kambanë që vendosej në urën e anijes.
4. Sipas ditores Mirror, së fundi është zbuluar një violinë që mendohet se ishte e udhëheqësit të orkestrës së Titanicut, Wallace Hartley. Ndërkohë që një sërë testesh janë bërë për të vërtetuar autenticitetin e violinës, nëse shitet ajo pritet të thyejë rekordin e një artefakti të Titanicut. Aktualisht ky rekord mbahet nga çelësat e postës së tragetit, që u shitën më 2007 në Angli për shumën e 101 mijë funtave.
3. Ish-shtëpia e një prej të mbijetuarve më të famshëm të anijes është aktualisht muze në Denver. Shtëpia që në vitin 1910 ishte e Margaret Brown, aktiviste dhe filantrope e njohur (më pas mori nofkën “e pambytshmja Moli Braun”), tani është e hapur për vizita dhe punëtori.
2. I mbijetuari i fundit vdiq në vitin 2009. Millvina Dean ishte vetëm 9-javëshe dhe udhëtarja më e re në anije. Ajo u mor në një nga varkat e shpëtimit dhe mbijetoi. Sipas ditores “The Guardian”, vdekja e saj në moshën 97-vjeçare erdhi vetëm një muaj pasi Leonardo DiCaprio dhe Kate Winslet, aktorët e filmit “Titanik”, e ndihmuan të moshuarën duke i paguar shpenzimet e kujdesit mjekësor në shtëpi.
1. Nga shumë burime del që kënga e fundit e luajtur nga orkestra e anijes është “Nearer My God To Me” (Afrohu o Zot tek unë). Por, në një intervistë të vitit 1912 në New York Times, Harold Sydney Bride, një nga pjesëtarët e mbijetuar të ekuipazhit, tha që orkestra luajti marshin “Vjeshta” ndërkohë që anija fundosej.
Por, te Titanicu ka qenë edhe një shqiptar, historia e të cilit është bërë publik përmes një emisioni në ABC News. Për të kanë shkruar edhe mediat shqiptare.
Ilo Deti, një emigrant nga Vithkuqi i Korçës, në Boston të Amerikës - që në vitin 1909 - arriti t’i shpëtojë tragjedisë duke u kapur pas një barke.
"Ilua u kap pas një varke të mbushur vetëm me gra, që fatkeqësisht nuk kishte lopata. Askush nuk do të kishte mbijetuar, nëse ai nuk do përpiqej. Vorbulla e shkaktuar nga mbytja e anijes do të thithte, duke marrë pas vetes atë varkë pa drejtim. Ilua ishte i ri dhe i fuqishëm. Duke përdorur këmbët si lopata ai arriti ta largonte varkën nga Titaniku që fundosej. Më pas këmbët, për shkak të ujit të akullt, iu gangrenizuan dhe doktorët ia prenë njëra pas tjetrës”, është një pjesë e rrëfimeve për Ilo Detin, shqiptarin e vetëm që udhëtoi në anijen "Titanik" dhe që i mbijetoi tragjedisë.
"Ndërsa i kishte këmbët të prera, ai e kishte zakon të ulej në shesh pranë lëmenjve të grurit para shtëpisë së vet, që gjendej në lagjen 'Grekas' të Vithkuqit, ku qarkohej nga kureshtarët që e lusnin t'u rrëfente për Titanicun”.
Historinë tij e ka treguar para disa vitesh për Gezetën Shqiptare, i biri i tij Dhimitër Deti.
"Në listën e të mbijetuarve të 'Titanikut' nuk ka ndonjë person të quajtur Ilo Deti. Im atë quhej Ilo Kovi, pasi i ati i tij, pra gjyshi im, quhej Kovi".
Ilon në Amerikë e thërrisnin 'Lui'. Ishte vetëm 22 vjeçar. Gjendej në kurbet, në Boston, dhe me të dëgjuar për anijen gjigante, u nis për në Angli mbase kureshtar të shihte anijen e famshme. Dikush përmend një variant sipas të cilit u nis me dy miq të vet nga Anglia, që të merrte pjesë si i ftuar në dasmën e njërit prej tyre.
Në momentet që anija gjigante, pas përplasjes me ajsbergun kishte filluar të mbushej me ujë e marinarët po zbrisnin barkat e para me gra dhe fëmijë, kryesisht të klasit të parë, Ilua kishte ndihmuar të sistemohej në varkë një familje. Në çastin që varka po ulej, Ilua ishte kapur pas njërit prej litarëve të saj të lëshimit. Në këtë kohë ai është qëlluar me lopata e sende të tjera të forta nga marinarët, duke rënë në det. Me të rënë në kontakt me ujin e ftohtë, ai arrin të kapet pas barkës së sapo lëshuar. Pak çaste më vonë tenton të hipë në varkë, por marinarët e qëllojnë me lopata ku të munden. Ata kishin urdhër që të mos rrezikohej mbytja e varkave, qoftë nga mbipesha, qoftë nga shkaqe të tjera. Ilon e kanë goditur disa herë me lopatat e drunjta pa mëshirë në këmbë, në momentet kur kapej dhe tentonte të shalonte anën e varkës për t'u futur në brendësi të saj.
Porse, në çastet që marinarët arrinin ta prapsnin duke e hedhur sërish në det, barka anohej dhe tronditej. Babai ka rrëfyer se e kishin gjakosur duke e goditur, pasi ai ishte përpjekur disa herë radhazi të hipte, pa i shkëputur duart nga varka. Dikur njëra nga gratë, pikërisht ajo që Ilua e ndihmoi të sistemohej në barkë, këmbëngul ta merrnin edhe atë, duke protestuar e thënë se ai kishte rrezik t'i mbyste të gjithë.
Dy studiues amerikanë, që kanë studiuar mirë tragjedinë e njohur të fundosjes së anies, kohë më parë arritën të zbulojnë fakte të reja të cilat i publikuan në “Sunday Telegraph”.
Sipas tyre, shkak i fundosjes së anijes nuk ishte ajsbergu, por pavendosshmëria e timonierit, i cili priti shumë për të marrë vendimin e duhur që në fakt rezultoi fatal. Pavendosmëria, sipas studiuesve, zgjati 30 sekonda dhe sipas tyre nëse nuk do kishte zgjatur kaq shumë atëherë gjërat do kishin shkuar ndryshe.
Studimi është publikuar në 'Sunday Telegraph 'dhe është në kontrast me konkluzionet hetimore të 'Wreck Inquiry', ku këmbëngulet se timonieri ka ndryshuar menjëherë drejtimin e anijes sapo ka parë copëzën e madhe të akullit të afrohej. Studim i ri bazohet mbi dëshmitë e marinarit Fredrick Fleeti, i cili ka dhënë i pari njoftimin për afrimin e ajsbergut.
Studimi thekson se është pavendosmëria e timonierit, William Murdoch, marinari i parë i anijes Titanik, që në mbrëmjen e 14 prillit të 1912, kur ishte në turn në kabinën e drejtimit pasi është lajmëruar për masën bardhë prej akulli gjigant, nuk pati gjak ftohtësinë për të marrë vendimin e duhur menjëherë. Ai që kontribuoi në përmasat e përplasjes, sipas studiuesve, ishte edhe kapiteni Edward Smith, faji i të cilit ishte që nuk ndali në kohë anijen pas përplasjes me ajsbergun, duke ndjekur këmbënguljen e presidentit të “White Star”, Bruce Ismay, i cili nuk dëshironte të shkatërronte imazhin e shoqërisë lundruese. /Telegrafi/

Shqiptarë e serbë nuk presin aksion policor në veri

Formula e Qeverisë së Kosovës për dialogun që do të prodhonte zgjidhjen e çështjes së veriut është vlerësuar nga serbët të jetë e parealizueshme dhe që nuk do të prodhonte rezultate pozitive.
Të kundërtën e besojnë shqiptarët, por druajnë se Qeveria nuk e ka përnjëmend atë që e ka deklaruar, shkruan Koha Ditore.
Një ditë më parë zyrtarë të lartë të Qeverisë e kanë shprehur qëndrimin për të mos dialoguar për çështjen e veriut as me serbët vendës, për aq kohë sa kjo pjesë mbahet e zaptuar nga kriminelët. Zëvendëskryeministri Hajredin Kuçi ka kumtuar se dialogut do t’i paraprijë përballja me ligjin e këtyre njerëzve. Kjo për shkak të frikës se serbët e veriut që do të pranonin të dialogonin, do të mund të kërcënoheshin nga grupet joformale të kësaj pjese.
Nexhmedin Spahiu, analist, ka shprehur bindjen se plani i bisedimeve nuk është vështirë i realizueshëm.
“Problemi është që Qeveria nuk po shoh se është përgatitur për ta futur nën kontroll veriun. Futja nën kontroll nënkupton një aksion ushtarako-policor, i cili elementet e rrezikshëm për sigurinë e vendit i shmang dhe pastaj bisedimet dhe proceset e tjera janë krejt të mundshme dhe të arritshme”, ka thënë Spahiu. “Unë nuk po e shoh as njërën dhe as tjetrën që Qeveria është e përgatitur për ta bërë”.
Oliver Ivanovic, sekretar shtetëror në Ministrinë për Kosovën në Qeverinë e Serbisë, ka thënë se serbët e veriut kanë problem për t’u besuar institucioneve të Kosovës. Prandaj, ka thënë se vetëm kthimi i besimit do të mund të kryente punë. Mirëpo, këtë rezultat ai nuk e sheh pa pasur një proces dialogu ndërmjet Kosovës dhe Serbisë, pjesë e të cilit do të ishin edhe serbët e veriut.

Lëvizjet e AAK-së

Asnjë deputet i partive opozitare nuk e kishte nënshkruar nismën e Lëvizjes Vetëvendosje për të thirrur një seancë të jashtëzakonshme për zhvillimet e fundit në Veriun. Por, ndryshe ndodhi kur këtë iniciativë e mori Partia Demokratike e Kosovës.
Shefi i Grupit Parlamentar të PDK-së, Adem Grabovci, tha se disa deputetë të Aleancës për Ardhmërinë e Kosovës i kanë bashkuar nënshkrimet me deputetët e dy partive në pushtet, PDK-së dhe AKR-së.
“Ka edhe deputetët të AAK-së”, ka thënë Grabovci, në një prononcim për Express. Por, ai nuk ka treguar se sa deputetë të partisë së Ramush Haradinajt, e nënshkruan nismën për një seancë të jashtëzakonshme.
“Nuk e kam listën me vete”, është arsyetuar Grabovci.
Express ka arritur të konfirmojë se nismën e partisë në pushtet për të thirrur një seancë të jashtëzakonshme e ka dhënë deputeti i AAK-së, Ramiz Kelmendi.
“Po e kam nënshkruar nismën e PDK-së. Nënshkrimin e kam dhënë vetëm se me u mbajtë sa më shpejt një seancë e jashtëzakonshme”, ka thënë deputeti Kelmendi, i cili mohon se po afrohen AAK-ja dhe PDK-ja.
Deputetët tjerë të AAK-së, të kontaktuar nga Express – Daut Haradinaj, Ardian Gjini e Burim Ramadani – kanë thënë se nuk e kanë nënshkruar nismën e PDK-së.
Ramadani mohon afrimin me PDK-në. Ai përsëritë kërkesën e AAK-së për largimin e kësaj qeverie, por “nuk do të nënshkruajnë ndonjë mocion për mosbesimin e Qeverisë pa u parë përfundimi i reformave zgjedhore”.

Deputetë me “dy fytyra”

Dhjetëra deputetë të Kuvendit të Kosovës tregohen “patriot të flaktë” në kafenetë e këtij institucioni teksa pinë kafe me kolegët e tyre, por sapo fillojnë të ngjiten shkallëve për t’u “parkuar” në sallën e Kuvendit, e ndryshojnë krejtësisht qëndrimin.
Fjalori i ashpër në raport me problemet e mëdha të vendit, në veçanti me rastet kur është në pyetje shteti serb dhe shprehja e nuancave “nacionaliste” duket se nga ligjvënësit kosovarë cilësohen si tejet të rrezikshme për të ardhmen e tyre politike, duke e ndërlidhur secilin veprim me ndikimin që ai mund të ketë te faktori ndërkombëtar, shkruan “Zëri”.
Për më tepër, në situata të tilla kontribut të madh janë duke dhënë edhe liderët e partive të ndryshme që përfaqësohen në Kuvendin e Kosovës, të cilët për të mos u futur në “listën e zezë” të ndërkombëtarëve parapëlqejnë që deputetët e tyre t’i mbyllin sytë karshi shumë proceseve.
Madje, një gjë të tillën e konfirmojnë edhe vetë deputetët e legjislacionit aktualë, të cilët thonë se në zgjedhjet e fundit shumëkush është bërë deputet falë vjedhjes së votës dhe ndikimit të liderit, ndërsa sot, siç thonë ata, janë “steril” në Kuvend.
Nait Hasani, nga PDK, thotë se ikja e deputetëve nga “temat e nxehta” ka të bëjë me faktin se “ata nuk janë vetvetja por e përfaqësojnë mendimin e partisë dhe të liderit”. 

Rexhepi: Edhe një arrestim politik

Ministri i Punëve të Brendshme të Kosovës, Bajram Rexhepi, e ka quajtur politik arrestimin e ish-ushtarit të UÇK-së, të arrestuar nga pjesëtarët e MUP-it serb të shtunën në pikën kufitare në Merdar, gjatë kontrollit në anën serbe.
Rexhepi ka qenë shumë i shkurt në reagimin e tij, rreth këtij arrestimi. “Tash e mora vesh (për arrestimin e Mark Koshnjetit) dhe reagimet janë të njëjta sikur edhe për rastet tjera që kanë ndodhur dhe këtë ne e bëjmë në INTERPOL nëpërmjet EULEX-it. Këto janë arrestime edhe politike”, ka thënë ministri Rexhepi, raporton Koha.net. 

KMDLNJ: Koshnjeti nuk ka qenë pjesëtar i UÇK-së

Pas arrestimit nga policia e Serbisë të Mark Koshnjetit ka reaguar Qendra Rajonale e KMDLNJ-së në Prizren, duke kërkuar nga mekanizmat vendorë dhe sidomos ata ndërkombëtarë që të ndërhyjnë për lirimin e tij.
Në reagimin e KMDLNJ-së thuhet se të shtunën (sot) rreth orës 22.00, familjarët e të arrestuarit Mark Koshnjeti nga autoritetet serbe në Merdar, kanë njoftuar Qendrën Rajonale të KMDLNJ-së në Prizren se Mark (Mihill) Koshnjeti (1955), i lindur në Prizren dhe banor i këtij qytetit, Rr.’Pal Paluca’, p.n. është arrestuar në pikën kufitare në Merdare, derisa po shkonte për vizitë tek motra e vet në Beograd, kua ajo jeton prej kohësh.
”Babai im ka udhëtuar tek motra e vetë (motra e Markut) për vizitë, sepse vajza e motrës së tij këto ditë do të martohet. Ai asnjëherë nuk ka qenë pjesëtar i Ushtrisë Çlirimtare të Kosovës dhe është arrestuar pa asnjë të drejtë lidhur me këtë dyshim”, ka thënë Valentina, e bija e Markut, e cila njoftoi se janë në dijeni se ai tashmë është në Burgun e Beogradit.
Edhe burime tjera të Qendrës Rajonale të KMDLNJ-së, bëjnë të ditur se Mark Koshnjeti nuk ka qenë pjesëtar i UÇK-së.
Qendra Rajonale e KMDLNJ-së në Prizren, kërkon nga mekanizmat vendorë dhe sidomos atyre ndërkombëtar që të ndërhyjnë dhe të njëjtin ta lirojnë.

Studentët paralajmërojnë protesta masive

Zhvillimet e fundit në pjesën veriore të vendit kanë shqetësuar edhe studentët e Universitetit të Prishtinës. Përfaqësues të tyre, theksojnë se nëse institucionet përgjegjëse nuk ndërmarrin veprime konkrete, studentët nuk do të heshtin, duke paralajmëruar protesta masive.
Studentët e Universitetit të Prishtinës nuk e kanë ndërmend të rrinë duarkryq, pas zhvillimeve të fundit në vend.
Synojnë të përsërisin veprimin e kolegëve të tyre gjatë viteve 80- të, të cilët patën demonstruar për lirinë e vendit, raporton KTV.
Të indinjuar me institucionet përgjegjëse të vendit, të cilat sipas tyre nuk janë duke bërë asgjë në përmirësimin e situatës në veri, përfaqësues të studentëve u bëjnë thirrje atyre të ndërmarrin veprime konkrete.
Ndryshe masat e tyre të veprimit do të jenë më radikale.
E në një konferencë tjetër, të ndarë, nga kjo e organizatave studentore e ka mbajtur edhe Parlamenti Studentor, lidhur me situatën e krijuar në veri.
Përfaqësues të studentëve, gjithashtu u bëjnë thirrje edhe mekanizmave ndërkombëtarë, KFOR- it dhe EULEX-it që në bashkëpunim me Policinë e Kosovës, të mundësojnë qarkullimin e lirë të qytetarëve dhe të mallrave, duke liruar rrugët nga barrikadat e ngritura.

Barça, - 4 para El Clasicos

Lionel Messi ka arritur të shënojë fitore ndaj Levantes me rezultat 2-1, duke mbajtur klubin e tij Barcelonën në luftë për titull të kampionit në La Liga pasi arriti që të kthejë disavantazhin nga pjesa e parë në një sfidë të vështirë të zhvilluar në Stadiumin e Qytetit të Valencias.
Sfida filloi me dominim të Barcelonës, e cila me anë të kombinimeve tentoi të gjente portën kundërshtare. Sidoqoftë, rezistuan mirë vendasit, të cilët arritën të fitojnë dhe një penalti, të cilën me sukses e konkretizoi Barkero pas 23 minutash lojë.
Nuk ishte e vështirë që t’i vëresh fytyrat e ngrysura të katalanasve pas këtij goli edhe pse ata mund të kenë harruar se e kanë në skuadër futbollistin më të mirë të të gjitha kohërave.
Në pjesën e dytë ringjallet Lionel Messi. Pas një aksioni të mirë, Lionel Messi në mënyrë fantastike me një goditje të bukur shënoi për 1-1 (64’).
Që nga ky moment Barcelona nuk u ndal së kërkuari portën e vendasve për golin e fitores. Ky gol vjen pas një ndërhyrje në zonë, teksa nga pika e bardhë e akorduar në mënyrë mjaft diskutabile nuk dështoi argjentinasi Lionel Messi, i cili realizoi për 2-1 dhe fitoren e Barcelonës në këtë takim.
Lionel Messi me këtë dygolësh arrin në kuotën e 41 golave në La Liga këtë sezon, duke ia prishur natën kështu Cristiano Ronaldos, i cili theu rekordin e tij personal prej 41 golave në një sezon në La Liga, por s’arriti ta mbajë prapa Lionel Messin, i cili pos tjerash ka 63 gola në të gjitha garat këtë sezon me edhe shumë ndeshje të mbetura deri në fund.
Me këtë fitore Barcelona mban diferencën prej katër pikësh me liderin Real Madrid para El Clasicos që zhvillohet të shtunën e ardhshme në Camp Nou.

Serie A, ndeshjet e anuluara zhvillohen më 25 prill

Federata Italiane e futbollit ka caktuar datën 25 prill për zhvillimin e xhiros së 33-të në Serie A.
Si pasojë e vdekjes së mesfushorit të Livornos, Piermario Morosini, FIGC anuloi të gjitha ndeshjet në Itali, ndërsa Sky Sport 24 raporton se tashmë është vendosur dita e zhvillimit tyre.
Pritet që të gjitha ndeshjet të zhvillohen pasdite në orë të njëjtë, megjithatë ende nuk është caktuar ora e saktë. 

Reali i sigurt

Me rezultat prej 3-1, Real Madridi e ka mposhtur Sporting Gijonin për të mbajtur diferencën me Barcelonën në garën për titull.
Pas gjysmë ore lojë u akordua penalti në favor të skuadrës mysafire, të cilën e shndërroi në gol De las Cuevas.
Pas një krosimi të Sergio Ramos, Gonzalo Higuain i barazoi shifrat dhe me këtë rezultat skuadrat shkuan në pushim.
Në gjysmën e dytë, u desh të zhvillohej minuta e 74 që vendasit të kalonin për herë të parë në epërsi këtë mbrëmje.
Një harkim të Angel Di Marias e pranoi Cristiano Ronaldo për ta shënuar golin e 41-të këtë edicion në La Liga.
Rezultatin përfundimtar të takimit e vendosi Karim Benzema (82’), ndërsa asistues ishte Mesut Oezil.
Real Madridi kryeson Kampionatin spanjoll me shtatë pikë më shumë se Barcelona që ndeshjen e kësaj xhiroje e zhvillon si mysafir i Levantes.

Sulmohet një shqiptar në “Lagjen e boshnjakëve”

Një grup personash të panjohur të shtunën pasdite (sot) kanë sulmuar të riun shqiptar, 15 vjeçarin F.K., banor i Mitrovicës.
Ngjarja ka ndodhur në “Lagjen e boshnjakëve” në veri të Mitrovicës, ndërsa viktima pas kërkimit të ndihmës në Qendrën e Emergjencës në Mitrovicë, është lëshuar në shtëpi.
“Kam shkuar t’i ndihmoj babait, i cili punon në lagjen e lartpërmendur, dhe duke ecur papritmas njëri nga shtatë personat që ishin afër furrës ‘Moni’ më ka thirr në shqip që të shkoj tek ata. Unë nuk e kam dëgjuar dhe kam vazhduar rrugën, ndërsa përnjëherë të shtatë personat kanë filluar të më sulmojnë me grushte dhe shqelma nëpër pjesë të ndryshme të trupit”, ka thënë viktima F.K. për Kosovapress.
Sipas tij, sulmuesi është i nacionalitetit boshnjak, dhe është në raporte të mira me grupe kriminale serbe në veri.
Ai dyshon se incidenti ka mundur të ndodhë për shkak të pjesëmarrjes së tij në protestën e organizuar nga Këshilli i Rinisë të Mitrovicës një ditë më parë kundër EULEX-it.

Haxhinasto: Të flitet qartë për veriun

Ministri i Jashtëm i Shqipërisë, Edmond Haxhinasto, ka theksuar se për veriun e Mitrovicës, ndërkombëtarët duhet të flasin qartë dhe me gjuhë të përbashkët.
Haxhinasto ka kërkuar nga Serbia plotësimin e angazhimeve të marra në marrëveshjet me Republikën e Kosovës, përfshirë pjesëmarrjen aktive të Kosovës në nismat dhe forumet rajonale.
Ai këto komente i ka bërë gjatë takimit me Ministri i Jashtëm të Sllovakisë, Miroslav Lajcak, në Bratisllavë.

Bieber: Pa strategji për veriun

Eksperti i njohur i çështjeve politike të Evropës Juglindore, Florian Bieber, tha se faktorët ndërkombëtarë nuk kanë strategji të qarta për veriun e Kosovës.
Në momente të krizave, gjëja më e mirë që bëjnë KFOR-i dhe EULEX-i, është parandalimi i eskalimit, por ata nuk kanë qëllime strategjike”, tha Bieber, në intervistën për Radio Kosovën.
Sipas tij, Prishtina dhe Beogradi mund të flasin për veriun pas finalizimit të procesit elektoral në Serbi. 

I jep llogari vetëm Kryeministrit

Ministrit të Brendshëm, Bajram Rexhepi, nuk i ka bërë shumë përshtypje afati prej dy javësh i dhënë nga Komisioni i punëve të brendshme për shtrirje të rendit dhe ligjin në veri. Ai thotë se nuk e ka obligim t’i japë llogari këtij komisioni derisa pohon se nëse ka rekomandime të zbatueshme do t’i marrë parasysh. Ai e pranon se nuk kanë pasur bashkëpunim të mirë me KFOR-in dhe EULEX-in të cilat sipas tij kanë dështuar në disa raste.
Bajram Rexhepi, ministër i Brendshëm e ka marrë me qetësi afatin kohor që ia ka dhënë Komisioni i punëve të brendshme, për vendosjen e rendit dhe ligjit në veri të Kosovës.
Në një intervistë dhënë KTV-së, Rexhepi ka deklaruar se nuk është komisioni në fjalë ai që i cakton atij afate dhe atij, thotë se nuk e ka obligim t’i japë përgjegjësi.
I shumëkritikuari i kohës së fundit thotë se ende nuk ka asgjë zyrtare nga Komisioni..., por nëse ka rekomandime të zbatueshme do t’i marrë parasysh ato, kurse llogari thotë se i jep vetëm kryeministrit.
Rexhepi ka pranuar se kohët e fundit nuk kanë pasur bashkëpunim aq të mirë me KFOR-in dhe EULEX-in, të cilat sipas tij kanë dështuar në disa raste.
Ai ka një shpjegim edhe për atë se pse nuk ka pika statike të policisë në veri.
Rexhepi thekson se policia patrullon në atë pjesë, derisa vendosjen e kontejnerëve e ka quajtur punë teknike.
Ndërkohë të shtunën në lagjen “Tre rrokaqiejt” në veri janë vënë re masa të shtuara të KFOR-it, të cilët kanë patrulluar në të pjesë të vendit.
Aty shihet se janë vendosur autoblinda të paqeruajtësve, gjë të cilën e kishin kërkuar edhe banorët e kësaj pjese.

Sparkes: Veriu drejt përshkallëzimit

Zëvendësshefi i EULEX-it, Andy Sparkes ka deklaruar se situata në veriun e vendit po shkon drejt përshkallëzimit. Ai ka kërkuar që banorët atje ta mbajnë qetësinë dhe t’u besojnë autoriteteve të Kosovës dhe atyre ndërkombëtare, duke thënë se po vazhdojnë hetimet për ta ndriçuar rastin e vrasjes së Selver Haradinajt.
Ish- ambasadori britanik, tani zëvendësshef në EULEX, Andy Sparkes, në një intervistë për RTV21, ka mohuar që EULEX-i të ketë kontakte me strukturat ilegale, ndërkaq ka thënë që MUP-i i Serbisë nuk guxon të jetë i pranishëm në atë territor.
Ai vlerëson se situata në veriun e vendit vazhdon të jetë e tensionuar, me mundësi të përshkallëzimit, marrë parasysh incidentet e fundit. Ai deklaroi se çdo akt edhe më i vogli mund të provokojë situatën edhe ashtu të brishtë.
“Është e qartë se situata është shumë e tensionuar dhe të dyja palët janë nervoze dhe të brengosura për qëllimet e njëra tjetrës. Çdo akt edhe më i vogli mund të provokojë situatën, ndërkohë ka shumë spekulime dhe atmosfera është shumë e rëndë. Unë apeloi tek njerëzit që të mbajnë qetësinë dhe t’i besojnë autoriteteve përgjegjëse kosovare apo ndërkombëtare dhe të lejojnë që situata të qetësohet”, tha ai.
Situata, sipas tij, është duke u përshkallëzuar për shkak që njerëzit janë gjithnjë e më të brengosur dhe kjo mund të shpie tek ndonjë reagim i tepruar për shkak të incidenteve, gjë që mund të provokoi dhunë.
“Situatën duhet ta mbajmë të qetë dhe nën kontroll, shembull unë dëgjova thashetheme për një incident në Suhodoll dhe nëse kjo është e vërtetë nevojitet që sa më shpejt të hetohet rasti, kurse popullata duhet të mbajë qetësinë, ndryshe këto incidente mund të provokojnë ngjarje më serioze”, ka thënë Sparkes. /Telegrafi/
 

Kushtetuesja shqyrton ndryshimet kushtetuese

Gjykata Kushtetuese e Kosovës po i shqyrton ndryshimet kushtetuese të bëra nga Komisioni Parlamentar, i cili ka propozuar ndryshimet për mënyrën e zgjedhjes së presidentit. Kryetari Enver Hasani, tha se duhet të shikohet nëse ndryshimet janë në përputhje me të drejtat e njeriut. Sipas tij, parlamentit do t’i kthehet përgjigjja brenda afatit ligjor prej 60 ditësh.
Kryetari i Gjykatës Kushtetuese, Enver Hasani tha se duhet të shikohet nëse ndryshimet e propozuara nga Komisioni Parlamentar, për zgjedhjen e presidentit janë në përputhje me të drejtat e njeriut.
“Është në procedurë kërkesa e Kuvendit dhe ju e dini që me ligj ne kemi 60 ditë. Ajo çka mund të them është që është në procedim e sipër dhe brenda afatit kohorë do të vendosim”, theksoi ai, raporton RTK.
Hasani i bëri këto komente pas një takimi me kryetarin e Gjykatës Kushtetuese të Sllovenisë, Ernest Petric.
Takime të tilla kryetari Hasani ka zhvilluar kohëve të fundit edhe jashtë Kosovës dhe bëhen pak muaj para se të merret vendim për pranimin e Gjykatës Kushtetuese të Kosovës në Gjykatën Evropiane.
Kosova nuk njihet ende nga 5 shtetet e Bashkimit Evropian, por Hasani thotë që deri në shtator do të krijohet një situatë e favorshme politike për Kosovën dhe anëtarësimi në këtë institucion pritet të ndodhë.
“Këto anëtarësime dhe jo vetëm i Gjykatës Kushtetuese, por i çdo organizmi të Kosovës në rajon është çështje që nuk lidhet me juridiksionet tona, por me proceset politike që zhvillohen përreth dhe rreth Kosovës. Besoj që do të jetë më e lehtë deri në shtator, do të ketë më pak paragjykime rreth statusit tonë atje dhe unë shpresoj për të mirë”, theksoi ai.
Kryetari i Gjykatës Kushtetuese të Sllovenisë, Ernest Petric, tha se vizita e tij gjatë së shtunës në Kosovë flet për marrëdhëniet e mira ndërmjet Sllovenisë dhe Kosovës, respektivisht këtyre dy Gjykatave.

Serbia arrestoi edhe një shqiptar në Merdar

Në vend kalimin kufitar në Merdar policia e Serbisë sot ka arrestuar Mark Kasnetin, i cili, sipas palës serbe, dyshohet se si pjesëtar i Ushtrisë Çlirimtare të Kosovës ka kryer krime mbi civilët serbë.
Ministri i Punëve të Brendshme të Serbisë, Ivica Daçiq i tha Tanjugut se Kasneti është përgjegjës për krime lufte ndaj serbëve në Kosovë në vitet ’90.
“Ky nuk është nj arrestim mbi baza nacionale. Bëhet fjalë për një të dyshuar për krime lufte ndaj civilëve, për fajësinë e tij do të tregojë procesi i mëtejmë”, ka thënë Dacic, transmeton Tanjugu.
Sipas ministrit serb, policia e ka arrestuar Kasnetin në autobus.

Ndërsa zëvendësi i prokurorit për krime lufte, Bruno Vekaric, ka konfirmuar se Kasneti është arrestuar në Merdar dhe “ai dyshohet se si pjesëtar i UÇK-së, gjatë viteve ’90 ka kryer krime lufte ndaj civilëve serbë në Kosovë”.
Sipas tij Kasneti gjatë ditës do të dërgohet në Gjykatën Speciale në Beograd, ku do të merret në pyetje nga prokurori, kurse gjykatësi i procedurës paraprake do të vendos për masën e arrestit.

“Lëndën kundër Kasnetit e kemi formuar në bazë të fotografive që kemi marrë ndaj të dëmtuarve dhe në atë mënyrë kemi konstatuar përgjegjësinë e tij potenciale”, tha Vekaric.

Dorëzohet Bayerni

Bayern Munichu ka luajtur pa gola përballë Mainzit në Allianz Arena.
Bavarezët luajtën më mirë gjatë gjithë ndeshjes, megjithatë nuk arritën ta thyejnë mbrojtjen mysafire.
Pas kësaj ndeshjeje, Bayerni mbetet tetë pikë prapa Borussia Dortmundit, që me fitore në xhiron e ardhshme do të shpallet kampion edhe matematikisht.

Adebayor e dëshiron Kupën FA

Sulmuesi i Tottenhamit, Emmanuel Adebayor, dëshiron ta eliminojë Chelsean nga gjysmëfinalja e Kupës FA.
Togolezi mban mend eliminimin nga Blutë, pikërisht në gjysmëfinale kur luante për Arsenalin (2009), ndërsa tani shpreson në sukses.
“Paraqitja ime e vetme në Wembley deri më tani është ajo humbja 2-1, prandaj kujtimet e mia nuk janë të mira. Por kjo është një ndeshje e re dhe ne duam ta fitojmë”.
“Futbolli ka të bëjë me fitimin e trofeve dhe ato janë momente në jetë të cilat mund t’i kujtosh me krenari”, ka deklaruar Adebayor. 

Branca: Interi nuk do të kualifikohet në LK

Drejtori teknik i Interit, Marco Branca, mendon se Nerazzurrët nuk do të arrijnë të zënë një vend që çon në Ligën e Kampionëve.
“Me gjithë sinqeritetin, nuk mendoj se jemi në garë për Ligën e Kampionëve”.
“Krejt çfarë mund të them është se do të bëjmë më të mirën deri në fundin e hidhur”, ka thënë Branca për Udinese Channel.
Zikaltrit aktualisht janë gjashtë pikë prapa pozitës së tretë, të cilën e mban Lazio.

Ora e mençur e Sonyt

Sony zyrtarisht paraqiti orën e vet “të mençur” të dorës e cila shfrytëzuesve do të duhej të ia mundësoj komunikimin me telefonin e bazuar në Android.
Sony SmartWatch ia mundëson shfrytëzuesve marrjen e informatave më të fundit në rrjetat shoqërore si dhe të mesazheve tekstuale, dhe manipulimin me muzikën dhe thirrjet drejtpërdrejtë nga ora. SmartWatch lidhet me telefonin mobil përmes Bluetoothit për të mundësuar komunikimin dhe menaxhimin me funksionet e telefonit mobil.
Ora është e pajisur me ekranin OLED të ndjeshëm në prekje me diagonale prej 1.3 inç, ndërsa do të shitet me rripin e zi nga goma, por janë në dispozicion edhe ngjyrat tjera, duke përfshirë të bardhën, vjollce, mint dhe të kaltër. Për të ia komunikuar shfrytëzuesin për një thirrje ose ndonjë gjë tjetër, ora vibron, e një mbushje e baterisë do të duhej të mjaftoj për katër orë punë. Gjithashtu theksohet se është e qëndrueshme ndaj pluhurit dhe lagështisë.
Çmimi i SmartWatch në SHBA është 150 dollarë. 

Polici punëtor (Video)

Një polic i përkushtuar vietnamez ka refuzuar ta lejojë largimin e autobusit, vozitësi i të cilit vendosi të largohej dhe të mos paguante dënim për parkim të gabuar.
Ai është kapur për fshirëset e xhamave dhe me këmbë ka hipur në parakolpin e autobusit, i cili ishte në lëvizje.
Polici Nguyen Manh Phan është xhiruar i ngjitur në autobus, ndërsa ka kërkuar nga udhëtarët që ta thërrasin policinë.
Vozitësi i autobusit është arrestuar për mosrespektim të ligjit dhe mund të dënohet me tre vite burg. I njëjti, më herët ka vuajtur katër vjet burg, pasi ishte shpallur fajtor për një aksident trafiku me pasojë vdekjen.

Nuk ka ndeshje në Itali

Pas vdekjes tragjike të Piermario Morosinit, të gjitha ndeshjet e kësaj fundjave në Itali (duke përfshirë edhe ato në Serie A) janë anuluar.
Federata Italiane e futbollit ka marrë vendim që të gjitha ndeshjet të caktohen për një datë tjerë, për të nderuar jetën e lojtarit të Livornos, i cili ndërroi jetë si pasojë e arrestit kardiak.
Fillimisht u mendua se ndeshjet do të zhvilloheshin me një minutë heshtje, mirëpo drejtori gjeneral i FIGC, Antonello Valentini, ka konfirmuar se nuk do të ketë futboll në Itali këtë vikend. 

Qeveria: Nuk kemi trajnuar shërbyes civilë në Dubai

Qeveria e Kosovës ka përgënjeshtruar lajmin e publikuar në disa media në Prishtinë, se "kinse Qeveria ka ndarë mjete nga buxheti i vendit për trajnimin e shërbyesve civilë të Kosovës në Dubai".
"Një ofertë e një kompanie, që është dërguar në imejllat zyrtarë të qeverisë, është refuzuar nga Qeveria e Republikës së Kosovës dhe si e tillë është e papranueshme dhe në kundërshtim të plotë me qasjen dhe politikat e qeverisë për ngritjen e mëtejme të kapaciteteve profesionale të shërbimit civil të Kosovës", thuhet në komunikatën e ekzekutivit.
Përmes saj, Qeveria ka vlerësuar se "misioni i informimit të opinionit publik është një mision jashtëzakonisht i rëndësishëm për zhvillimin e gjithmbarshëm demokratik të vendit.
"Në këtë kuadër, çdo lajm i pavërtetë dhe si rrjedhojë çdo keqinformim i qytetarëve të Kosovës e dëmton seriozisht besueshmërinë e mediave dhe rolin e tyre në shërbim të avancimit të punës së institucioneve të vendit", thuhet në komunikatën e lëshuar në faqen zyrtare të Kryeminisitrit të Kosovës.

Vdes në fushë futbollisti i Livornos (VIDEO)

Mesfushori i Livornos, Piermario Morosini, ka pësuar një atak kardiak dhe ka vedkur gjatë ndeshjes së ekipit të tij ndaj Pescaras në kuadër të Serie B në stadiumin Stadio Adriatico.

25 vjeçari u rrëzua në fushë në minutën e 33-të dhe stafi mjekësor menjëherë ndërhyri për t’i bërë masazh kardiak tashmë të ndjerit.

Ndeshja është ndërprerë dhe Morosini u largua nga stadiumi me ambulancë në gjendje të komas, para se të ndërronte jetë.

Besohet se vdekjen e Morosinit mund ta ketë shkaktuar një vonesë e dërgimit të tij në spital, si shkak i ngarkesës në komunikacion, një lajm i pakonfirmuar ky ende nga mediat italiane.