Riformulimi i neneve të Kodit në dorën e Kuvendit

Presidentja Atifete Jahjaga ia ka lënë Kuvendit të Kosovës që të dalë me propozime për formulimin e neneve të diskutueshme në Kodin Penal, të cilin një ditë më parë presidentja Atifete Jahjaga e ka kthyer mbrapsht, pa dhënë asnjë propozim se çfarë duhet të bëhet.
Zëdhënësi i Presidencës së Kosovës, Arbër Vllahiu, ka thënë se presidentja e Kosovës e ka kryer punën e saj dhe se tashmë i mbetet Kuvendit që të merret me Kodin, transmeton Koha.net.
Sipas tij, presidentja ka vepruar konform nenit 84 pika 6 të Kushtetutës së Republikës së Kosovës.
“I mbetet Kuvendit tash të japë propozimin e vet për pjesën e cila është e debatueshme”, ka thënë ai.

“Reporterët pa Kufij” mirëpresin kthimin e Kodit në Kuvend

Reporterët pa Kufij kanë përshëndetur kthimin në Kuvend të Kodit të ri Penal të Kosovës nga ana e presidentes Atifete Jahjaga, e cila ka kërkuar rishqyrtimin e neneve që kërcënojnë lirinë e shtypit.
“Ne përshëndesim këtë vendim nga presidentja, e cila ka treguar se është e vëmendshme ndaj shqetësimeve të gazetarëve vendas dhe komunitetit ndërkombëtar," ka thënë organizata për lirinë e shtypit.
“Është jetike që gazetarët të gëzojnë mbrojtje ligjore dhe të mos jenë subjekt i dënimeve penale pse po e kryejnë punën e tyre. Presidentja duhet të ndjekë të gjitha mjetet brenda mandatit të saj për të mbrojtur organizatat mediatike nga presionet ligjore, që nuk bëjnë gjë tjetër, pos që forocojnë vetë-censurën”, vlerësoi grupi “Reporterët pa Kufij”, njofton Rel.
Dy nenet e kontestueshme nga asociacionet vendore dhe ndërkombëtare të mediave, neni 37 dhe 38, janë cilësuar si “përpjekje për të heshtur gazetarinë hulumtuese”.
Nenet në fjalë kanë të bëjnë me sanksionimin e shpifjes dhe zbulimin e burimit të informacionit në rastet kur bëhet fjalë për procedime kriminale.

Verbani: Jam viktimë e vehabistëve

Bashkësia Islame e Kosovës (BIK)nuk i lufton vehabistët dhe rrymat ekstreme që veprojnë në Kosovë. Kështu thotë Musli Verbani, imam dhe kryetar i Këshillit të BIK-ut në Kaçanik. Për shkak se i ka luftuar këto grupe, beson se është shkarkuar nga detyra që kishte si imam. Thotë se askush nuk e di se çfarë bëhet me milionat e BIK-ut.
Musli Vërbani , imam në xhaminë Gazi Sinan Pasha, njëherësh kryetar i BIK-ut në Kaçanik, thotë se “në Këshillin e BIK-ut në Kaçanik, jo që ka pasur zgjedhje të mirëfillta, por në esencë nuk ka ekzistuar kurrfarë Kuvendi Zgjedhor, nga shkaku se imamët nëpër xhamitë e tyre nuk kanë mbajtur zgjedhje më 13 janar dhe nuk i kanë zgjedhur delegatët e tyre”.
“Disa huliganë kanë ardhur me imamët e tyre dhe kanë mbajtur zgjedhje, kuptohet me miratimin e Sabri Bajgorës dhe nën menaxhimin e Bashkësisë Islame të Kosovës. Këto nuk janë zgjedhje, por instalim i zgjedhjeve. Zgjedhje diktatoriale – komuniste, të cilat janë të parapara me Kushtetutën e BIK-ut, e cila vetëm është përkthyer prej Kushtetutës të Bashkësisë Islame të Jugosllavisë të vitit 1989”, thotë ai në një intervistë për Express.
Ndërsa, për konfliktin e tij me kryetarin e Këshillit të BIK-ut, Sabri Bajgoren thotë se ai ka ndodhur për shkak të mospranimit të zgjedhjeve, “sepse në të njëjtën ditë ka qenë një delegacion prej shtatë anëtarëve të xhematit të xhamisë që kanë shkuar të bisedojnë për gjendje e tensionuar në Kaçanik”.
“Unë rastësisht kam zbritur nga vetura, e kam pyetur për gjendjen në Kaçanik. Ai nuk ka dashur të flasë duke më injoruar tërësisht dhe me një fjalë deshi të thotë se “nuk i intereson gjendja për Kaçanik” dhe aty ka ndodhur një konflikt verbal me të”, thotë Verbani. 

Ramush Haradinaj të enjten në mesditë në Prishtinë

Ramush Haradinaj do të kthehet të enjten në mesditë në Prishtinë, pas gati dy vitesh që ndodhet në burgun e Hagës. Ish-komandantit të UÇK-së iu mundësua mbrojtja në liri, pak kohë përpara se Tribunali ta thotë fjalën përfundimtare në këtë proces gjyqësor.
Pas shumë kohe qëndrimi në paraburgim nga Tribunali i Hagës, ai do t’i bashkohet familjes së tij, njofton “Express”.
Ish-komandanti i UÇK-së nga Rrafshi i Dukagjinit dhe më vonë kryeministër i vendit vetëm për njëqind ditë, është liruar të martën nga paraburgimi.
Deri në marrjen e një vendimi përfundimtar ndaj tij, ai do të mbrohet në liri. Ky ishte vendimi i Tribunalit, të cilin as Prokuroria nuk e kundërshtoi.
Ndonëse gjatë ditës së mërkurë nga Tribunali i Hagës, nuk është konfirmuar lajmi në mënyrë zyrtare për lirimin e Haradinajt, në familjen e tij në Gllogjan të Deçanit, këtë e kanë kuptuar të martën.
Këtë e konfirmon për Express, Vetoni, njëri nga vëllezërit e Ramush Haradinajt.
Sipas tij, lajmi për lirimin e të vëllait nga Tribunali i Hagës u ka shkuar të martën, ndonëse detajet e tjera nuk i di.
Megjithëkëtë, edhe pse nuk di për shumë të tregojë se çfarë do të ndodhë në orët në vazhdim, Vetoni konfirmon se Ramush Haradinaj pritet të zbresë me aeroplan në Aeroportin Ndërkombëtar “Adem Jashari” në Prishtinë.
Ardhja e tij pritet ndodhë të enjten, rreth orës 11. E, familja e tij në Gllogjan të Deçanit, lajmin për lirimin e djalit të tyre e kanë pritur me gëzim të madh.
Hilmi Haradinaj, babai i ish-kryeministrit, ka deklaruar se nuk është gëzuar vetëm ai, por e gjithë Kosova.
“Nuk jemi gëzuar vetëm ne, por edhe Deçani e krejt Kosova, sepse Ramushi nuk është veç i familjes Haradinaj, po është i krejt Kosovës. E, unë e shoh shumë ditë të madhe dhe shumë gëzim të madh këtë ditë”, është shprehur Hilmi Haradinaj.
Ai beson shumë në drejtësi dhe thotë se sikurse herën e parë, edhe kësaj radhe, djali i tij do të dalë i pafajshëm.
“Gjithnjë e kam ditë se Ramushi do të del i pafajshëm, sepse Ushtria Çlirimtare e Kosovës e ka bërë një luftë mbrojtëse, e lufta e drejtë dhe drejtësia gjithmonë triumfon”, ka thënë Hilmi Haradinaj.
Pas vendimit të Tribunalit për lirim me kusht të Haradinajt, Prokuroria ka pasur kohë deri të mërkurën në orën 12 të bëjë ankesë, por një veprim të tillë nuk e ka bërë.
Procesi i rigjykimit ndaj ish-eprorit të UÇK-së dhe dy bashkëluftëtarëve të tij, Idriz Balaj dhe Lahi Brahimaj, pritet të përfundojë diku nga mesi i këtij viti.
Gjykata Ndërkombëtare për Krime Lufte në ish-Jugosllavi, ka vendosur që më 25 dhe 26 qershor të këtij viti, të mbahen seancat përmbyllëse të procesit gjyqësor kundër ish-kryeministrit të Kosovës, Ramush Haradinaj dhe dy ish-bashkëluftëtarëve të tij, Idriz Balaj dhe Lah Brahimaj.
Gjykata ka kërkuar që deklaratat përfundimtare të prokurorisë dhe të mbrojtjes të paraqiten me shkrim deri më 11 qershor.
Ish-kryeministri i Kosovës, Ramush Haradinaj dhe dy të akuzuarit e tjerë, Idriz Balaj dhe Lah Brahimaj, ngarkohen me “krime të kryera gjatë luftës në Kosovë”.
Rigjykimi i pjesshëm i ish-komandantëve të Ushtrisë Çlirimtare të Kosovës ka nisur në muajin gusht të viti 2011.
Ramush Haradinaj ishte shpallur të pafajshëm më 3 prill të vitit 2008 nga akuzat për krime kundër njerëzimit, ndërsa një rigjykim i pjesshëm kishte filluar vitin që shkoi për shkak të paraqitjes së dëshmive shtesë në procesin kundër tyre.

Punëtorët e Rexhepit hetohen për falsifikime

Zyrtarët e Ministrisë së Punëve të Brendshme (MPB) duket se kanë aftësi të “jashtëzakonshme” pune. Në të njëjtën kohë kur ata ndodhen jashtë Kosovës, në zyrat e tyre në Prishtinë “nënshkruhen” dokumente të rëndësishme nga ta.
Kështu të paktën figuron në dokumentet zyrtare, të cilat i ka siguruar “Zëri”, ku vërehet qartazi se si Komisioni për Shtetësi, i përbërë nga zyrtarët, Islam Caka, Dukagjin Dinaj, Blerim Camaj dhe Drenusha Zeneli, ka nënshkruar vendime për lirim dhe dhënie të nënshtetësisë në kohën kur nuk kanë qenë fare në Kosovë.
Janë pikërisht këto dyshime që kanë shtyrë Departamentin Special Antikorrupsion të Policisë së Kosovës, që me autorizim të Prokurorisë Speciale t’i fillojnë hetimet për keqpërdorim të detyrës zyrtare.
Ditë më parë “Zëri” ka raportuar se si hetuesit policorë kanë kërkuar nga Ministria e Punëve të Brendshme që t’ua dërgojë komplet dosjen me të gjitha udhëtimet që katër zyrtarët e këtij dikasteri i kanë bërë gjatë periudhës 2010-2011 dhe gjithashtu, siç shkruan në kërkesën e policisë, “të gjitha lëndët e gjetura nga auditori i brendshëm ku janë gjetur shkeljet, auditori i datës 25.10.2011”. 

Trofeu i EL shkon në Madrid

Atletico Madridi ka triumfuar në finale të Europa League duke e mposhtur Athletic Bilbaon me rezultat 3-1 në ndeshjen e zhvilluar në Arena Nationala në Bukuresht.
Ekipi kryeqytetas luajti më mirë në fraksionin e parë të lojës duke arritur të realizojë dy gola.
Ishte minuta e shtatë kur Radamel Falcao pranoi një top nga Diego për ta kaluar Atleticon në epërsi.
Kolumbiani Falcao e dyfishoi epërsinë (34’) pas asistimit të Arda Turan dhe me këtë rezultat skuadrat shkuan në pushim.
Në gjysmën e dytë, më të mirë në fushë ishin baskët, të cilët u përpoqën ta përmbysnin rezultatin duke krijuar raste, mirëpo nuk mundën ta thyenin mbrojtjen madrilene.
Ndërkohë që Bilbao nuk mund të shënonte, këtë e bëri Atletico me anë të Diegos, i cili fundosi çdo shpresë të baskëve në minutën e 85-të.
Atletico Madridi është fitues i Europa League për edicionin 2011/2012, ndërsa Athletic Bilbao do ta kërkojë një trofe këtë sezon në finale të Kupës së Mbretit kundër Barcelonës.

Maska e Bryant shitet për 67.100 dollarë

Basketbollisti i L.A. Lakers, Kobe Bryant, e ka shitur për 67.100 dollarë maskën për mbrojtjen e fytyrës, të cilën e ka mbajtur në 11 përballje të këtij sezoni.
Gjatë ndeshjes All Star në muajin shkurt, Dwyane Wade pa dashje ia theu hundën 33-vjeçarit, ndërsa mënyra e vetme që basketbollisti më i mirë i të sotmes të luante, ishte mbajtja e maskës mbrojtëse për fytyrë.
Pasi mori leje nga mjekët që ta hiqte, Bryant e nxori në ankand në eBay me çmim fillestar prej 250 dollarësh, mirëpo në fund maska u shti për 67.100 dollarë.
Paratë do t’i jepen fondacionit bamirës “Kobe and Vanessa Bryant Family Foundation”.

Enrique drejt largimit?

Trajneri i Romës, Luis Enrique, do të largohet nga Olimpico pas ndeshjes së fundit sezonale kundër Cesenas – shkruan Corriere dello Sport.
Strategu spanjoll mori drejtimin e Giallorossëve në verën e kaluar, mirëpo ka dështuar të tregohet i suksesshëm.
Sipas Corriere dello Sport, Enrique tashmë i ka njoftuar drejtuesit e klubit rreth largimit të tij, ndërsa zyrtarizimi pritet të bëhet të dielën ose të hënën.
Nëse kjo ndodh, atëherë kandidat kryesor është Vincenzo Montella, i cili ia lëshoi pikërisht Luis Enriques vendin për të shkuar te Catania.

Traore: Kam nënshkruar me Milanin

Mesfushori i Nancyt, Bakaye Traore, ka njoftuar se është pajtuar që t’i bashkohet Milanit në fund të sezonit.
27-vjeçari nuk i ka bërë publike detajet e marrëveshjes, ndërsa kalimi i tij në San Siro do të bëhet me parametrat zero, duke qenë se i përfundon kontrata me klubin francez.
“Jam krenar që kam nënshkruar për një klub të madh, i cili ka disa nga lojtarët më të mirë në botë”.
“Shpresoj që gjithçka të shkojë mirë dhe ky të jetë një hap përpara. Nuk i frikësohem konkurrencës”, ka thënë lojtari nga Mali për RMC.

Tre yje në fanellë, kërkon Camoranesi

Ish-anësori i Juventusit, Mauro Camoranesi, është shprehur i entuziazmuar me triumfin e Zonjës së Vjetër në Serie A.
35-vjeçari, i cili aktualisht mbron ngjyrat e ekipit argjentinas Lanus, kaloi tetë vite te Bianconerët (2002-2010) dhe ishte pjesë e skuadrës që iu morën dy Scudetto dhe që luajti në Serie B.
“Tashmë e kam uruar Alessandro Del Pieron për fitimin e Scudettos. Ishin gjashtë vjet pritje, mendoj se të gjithë janë të lumtur”.
“Nuk ka se çfarë të thuhet për triumfin, Juve nuk humbi asnjë ndeshje”, ka deklaruar Camoranesi për Sky Sport Italia.
I pyetur rreth çështjes së tre yjeve në fanellë (Juventusi ka fituar 30 tituj, ndërsa zyrtarisht ka 28, sepse pas skandalit Calciopoli iu morën dy), mesfushori është përgjigjur: “Për Bianconerët, janë tre yje”.

Kosova përgatitet për anëtarësim në Këshillin e Evropës

Kosova së shpejti do të hapë një konsullatë në Strasburg që zyrtarisht do të merret me punë konsullore në Francë, por misioni i vërtetë i saj do të jetë përgatitja për anëtarësim në Këshillin e Evropës, njofton Frankfurter Allgemeine Zeitung (FAZ).
Në tekstin e botuar në uebfaqen e kësaj gazete, thuhet se qëllimi i kësaj ofensive diplomatike të Republikës së Kosovës është anëtarësimi në këtë këshill deri në fund të vitit 2013.
Pranimin e Kosovës në Këshillin e Evropës, sipas FAZ, është duke e nxitur dhe mbështetur Britania e Madhe, e cila prej janarit deri në qershor udhëheqë me këtë këshill, ndërsa pas saj, udhëheqjen e radhës do ta merr Shqipëria.
Ky plan është shfaqur menjëherë pasi u refuzua plani për marrëveshje me UNMIK-un në emër të Kosovës. “Plani i refuzuar ka qenë i pranueshëm për Serbinë, sepse nënshkrimi i marrëveshjeve me UNMIK-un do të thoshte mosnjohja e Kosovës nga Këshilli i Evropës. Por në momentin kur u përzije Rusia, plani u hodh poshtë nga shumica e anëtarëve të këshillit”, shkruan FAZ.
Gazeta e njohur gjermane shkruan se kërkesa e Beogradit drejtuar Rusisë për t’i ndihmuar në bllokimin e Kosovës veç sa e ka përshpejtuar anëtarësimin e këtij shteti të ri evropian në Këshillin e Evropës.
“Ministri britanik për Evropë, David Lidington, në fillim të marrjes së mandatit gjashtëmujor, e kishte mbështetu planin e marrëveshjes me UNMIK-un, mirëpo më pas indirekt kishte paralajmëruar refuzimin e këtij plani dhe mbështetjen e pakursyer për anëtarësimin e Kosovës në Këshillin e Evropës”.
Dhe derisa Kosova po përgatitet për anëtarësim në Këshillin e Evropës, një zyrtarë i lartë i këtij këshilli, ka deklaruar për FAZ se Rusia ndonjëherë i ndihmon Serbisë më shumë se sa duhet.

Integrimi varet nga ne!

Kosova është e përkushtuar të jetojë në paqe dhe stabilitet duke ndërtuar marrëdhënie të mira fqinjësore, duke respektuar sovranitetin dhe integritetin territorial ndërmjet veti dhe duke ndihmuar njeri tjetrin në rrugën e integrimeve euroatlantike.
Kështu ka deklaruar presidentja e Republikës, Atifete Jahjaga, në ceremoninë e organizuar me rastin e 9 Majit - Ditës së Evropës, ku ishte i pranishëm kryeministri Hashim Thaçi, përfaqësuesi Special i Bashkimit Evropian, Samuel Zbogar, ministra dhe ambasadorë.
“Vlerat dhe sukseset e Bashkimit Evropian me fuqinë transformuese të tyre kanë frymëzuar shumë vende të ndërmarrin reforma në të mirë të qytetarit. Ne, shtetet e Ballkanit Perëndimor, e kemi mundësinë që me vullnet dhe krenari t’i ndjekim idealet dhe vizionin e Bashkimit Evropian, në rrugën e konsolidimit të brendshëm demokratik, përparimit të marrëdhënieve fqinjësore dhe gjatë rrugëtimit tonë të përbashkët drejt Evropës”, tha presidentja.

“E ardhmja demokratike e shtetit tonë ka bazë sistemin e qëndrueshëm juridik që garanton mbrojtjen e qytetarit të bazuar në trashëgiminë Evropiane të ideve politike dhe në praktikat më të mira të vendeve demokratike. Zbatimi i Kushtetutës së bashku me sundimin e rendit dhe ligjit siguron shtetin e së drejtës që mundëson aderimin tonë të sigurt në Bashkimin Evropian”.

“Republika e Kosovës, shtet sovran dhe i pavarur, si faktor paqeje dhe stabiliteti në rajon, është më se e domosdoshme të jetë anëtare e barabartë e të gjitha organizatave dhe mekanizmave ndërkombëtare duke dhënë kontributin e saj në të gjitha proceset bashkëkohore”.
“Jemi të përkushtuar që të përmbushim të gjitha kriteret dhe obligimet tona në rrugën e integrimit të Republikës së Kosovës në Bashkimin Evropian. Qytetarët tanë na kërkojnë, me plotë të drejtë, që me vullnet dhe përkushtim të plotë të vazhdojmë përmbushjen e kritereve politike, ekonomike dhe ligjore për t’u anëtarësuar në Bashkimin Evropian. Por, suksesi i integrimit tonë në Bashkimin Evropian varet nga të gjithë ne: institucionet, partitë politike, shoqëria civile dhe nga të gjithë qytetarët e Republikës së Kosovës”, tha ndër të tjera presidentja.

Dita e Evropës nuk do të jetë më ditë pushimi

Nga viti i ardhshëm, 9 Maji - Dita e Evropës, nuk do të jetë ditë pushimi. Ministrja e Integrimeve Evropiane, Vlora Çitaku, ka deklaruar se kjo datë gjithmonë do të jetë festë, por në Evropë nuk mund të shkohet duke pushuar.
“Unë këtë demonstrim të sotëm e kuptoj si një mundësi e jona për të dërguar sinjale të forta, në Bruksel që ne duam të jemi pjesë e familjes evropiane, por pjesë e saj do të bëhemi përfundimisht kur të përmbushim reformat dhe detyrimet”, tha Çitaku.
Në anën tjetër, Organizata Iniciativa për Progres përmes një performance para ndërtesës së qeverisë paraqiti nëntë arsye për të mos festuar në këtë datë. Sipas tyre, Kosova është ende pikë e zezë në Evropë për shkak të papunësisë, mos liberalizimit të vizave etj

SHBA: Serbia të gjejë vrasësit e vëllezërve Bytyçi

Shtetet e Bashkuara të Amerikës janë shumë të shqetësuara që deri më sot askush nuk është dënuar për vrasjen e vëllezërve Bytyçi, shtetas amerikanë, në vitin 1999 dhe e fton qeverinë serbe që “pa vonesë t’i vërë përgjegjësit para drejtësisë”, i është thënë agjencisë Beta në Ambasadën Amerikane në Beograd pas shfajësimit të të pandehurve në këtë rast.
 “Vendimi i sotëm, në gjykimin e përsëritur kundër dy të akuzuarve se kanë dërguar vëllezërit Bytyçi në një kamp në Serbinë Lindore, ku edhe janë vrarë, tregon se ata që kanë ndihmuar dhe kryer këto vrasje, ende nuk janë arrestuar dhe s’janë sjellë para drejtësisë”, ka thënë një zyrtarë i Ambasadës amerikane në Beorgrad, raporton Radio Evropa e Lirë.
“Presim që autoritetet serbe pa vonesa tjera të sjellin para gjyqit të gjithë individët të të gjitha niveleve, që janë përgjegjës për këto vdekje. Ky mbetet prioritet i lartë në marrëdhëniet tona dypalëshe”, citohet të ketë thënë zyrtari i Ambasadës Amerikane.
Vëllezërit Agron, Ylli dhe Mehmet Bytyçi në Serbi janë kapur si robër të luftës, derisa kanë bërë përpjekje, që t’ia shpëtojnë jetën një familjeje rome nga Kosova dhe siç thuhet “janë ekzekutuar” pa gjykimin e duhur.
Dhoma për krime lufte e Gjykatës së Lartë në Beograd ka shfajësuar sërish Sreten Popovicin dhe Millos Stojanovicin, nga akuzat se kanë ndihmuar në vrasjen e vëllezërve Bytyçi, në Petrovo Sello në vitin 1999.
Duke e arsyetuar aktgjykimin, kryetari i panelit, Ratko Popovic, ka thënë se gjatë përsëritjes së procedimeve, nuk është vërtetuar se të pandehurit kanë ndihmuar personat X në vrasjen e vëllezërve Bytyçi.
Më herët, prokuroria, pat thënë se për veprën penale, për të cilën akuzoheshin pjesëtarët e ministrisë së brendshme, parashihej dënimi prej së paku pesë vitesh burg. Gjykata e Apelit në Beograd e kishte anuluar vendimin e shkallës së parë për shfajësim të Popovicit dhe Stojanovicit.

Policia serbe liron Kastratin, e arrestuan ‘gabimisht’

Haxhi Kastrati është liruar nga burgu i Krushevcit në Serbi, i cili ishte arrestuar më 3 maj.
 Vëllai i Haxhi Kastratit, Bedri Kastrati, i ka thënë të mërkurën KTV-së se Haxhiu është liruar të martën dhe i vetmi shpjegim që i është dhënë atij është se “është arrestuar gabimisht”.
Haxhi Kastrati ishte arrestuar nga forcat policore serbe gjersa vinte nga Austria për në Kosovë nëpërmjet Serbisë

OSBE përfshihet edhe në raundin e dytë të zgjedhjeve serbe

Zëdhënës i misionit të OSBE-së në Kosovë, Nikola Gaon, ka thënë se OSBE do të përfshihet edhe në raundit e dytë të zgjedhjeve presidenciale serbe, që pritet të mbahen më 20 maj në Kosovë.
Gaon ka thënë për radion serbe Kontakt Plus se marrëveshja në bazë të së cilës OSBE ka punuar për zgjedhjet për Kuvendin e Serbisë dhe ato presidenciale, parashikon që kjo organizatë ta ketë rolin e njëjtë edhe në raunde e dytë të zgjedhjeve presidenciale.
"Do të punojmë në të njëjtën mënyrë. Do të ketë numër të njëjtë të vendvotimeve dhe qendrave. Në këtë moment duhet të pritet vërtetimi i zgjedhjeve nga Komisioni zgjedhor i Serbisë. Supozoj se atëherë do të paralajmërohet edhe raundi i dytë i zgjedhjeve për president", tha Gaon.
Zgjedhjet parlamentare dhe presidenciale të Serbisë janë mbajtur në Kosovë më 6 maj, në gjithsej 90 vendvotime. 

Pacolli: I shpenzova vetëm 17.966,63 euro!

Zëvendëskryeministri i parë në Qeverinë e Republikës së Kosovës, Behgjet Pacolli, ka deklaruar për Radio “Dukagjinin” se nuk qëndrojnë dyshimet e ngritura kohëve të fundit se ai ka shpenzuar shuma të mëdha të parave nga buxheti i Kosovës.
Ai ka thënë se për një vit të aktiviteteve të tij ka shpenzuar vetëm 17.966.63 euro nga buxheti i shtetit. Ndërsa, pjesën më të madhe të aktiviteteve të tij i ka pagur nga buxheti i tij privat.
“Gjithçka që është thënë ditëve të fundit nuk janë asgjë vetëm se të pavërteta dhe spekulime të cilat janë ngritur kundër meje dhe kundër kontributit e angazhimeve të mia - në kuadër të pozitës sime si zëvendëskryeministër në Qeverinë e Republikës së Kosovës. Unë dëshiroj që t`ju them të gjithë qytetarëve se për një vit të aktivitetit tim nga buxheti i shtetit kam shpenzuar vetëm 17.966,63 euro. Ndërsa, shumë prej aktiviteteve të mia janë mbuluar nga buxheti im privat”, ka thënë Pacolli.
Sipas tij, “këto spekulime janë një kapitull i mbyllur”.
“Nuk dua të merrem më tutje me spekulimet të mediave të caktuara që po u pengon puna që kam bërë deri më tani në sjelljen e njohjeve të reja për Pavarësinë e Republikës së Kosovës”, shton Pacolli “Nëse çështja e spekulimeve është kapitull i mbyllur, çështja e njohjeve nuk do të jetë asnjëherë e mbyllur dhe unë do të angazhohem në vazhdimësi për të sjellë njohje të reja”.

Raiola përsërit: Ibra nuk largohet!

Zlatan Ibrahimovic nuk planifikon të largohet nga Milani në afatin e ardhshëm kalimtar – ka deklaruara agjenti Mino Raiola.
Po flitet për një pasiguri rreth të ardhmes së suedezit, ndërkohë që mediat italiane kanë raportuar për një takim mes Adriano Gallianit dhe Ibras, me ç’rast shefi ekzekutiv e ka siguruar lojtarin për përforcimin e skuadrës.
Ibrahimovic ka thënë edhe në të kaluarën se dëshiron ta përfundojë kontratën në San Siro, mirëpo ka kërkuar nga klubi që ta sigurojë se do të ndërtojë një skuadër më konkurruese për sezonin e ardhshëm.
“Plani i tij është të qëndrojë te Milani”, ka thënë Raiola për Il Corriere dello Sport. 

Konfirmohet interesimi i Hamburgut për Kuyt

Shefi i Hamburgut, Carl-Edgar Jarchow, ka konfirmuar interesimin e klubit për anësorin e Liverpoolit, Dirk Kuyt.
Spekulohet se holandezi do ta braktisë Anfieldin në verën që vjen, ndërsa mes opsioneve është edhe kthimi te ish-skuadra e tij, Feyenoord.
“Deri më tash nuk ka pasur bisedime. Duhet të ulemi me lojtarin dhe agjentin e tij dhe të gjejmë një zgjidhje”.
“Niveli i pagave në Ligën Premier është shumë i ndryshëm nga i joni. Duhet të shohim nëse ka gjasa për transferim”, u ka thënë Jarchow gazetarëve.

Joel Obi do të qëndrojë te Interi

Mesfushori i Interit, Joel Obi, do ta vazhdojë karrierën në Giuseppe Meazza – ka thënë agjenti i tij, Renzo Contratto.
Është thënë se nigeriani është njëri nga lojtarët, të cilin Nerazzurrët do ta përfshijnë në kontratën për transferimin e yllit të Napolit, Ezequiel Lavezzi, mirëpo përfaqësuesi i 20-vjeçarit nuk mendon ashtu.
“Tash për tash nuk di asgjë rreth bisedimeve mes Napolit dhe Interit”.
“Shanset janë 99 për qind që klienti im të qëndrojë te Interi. Ata kanë shpresa të mëdha te lojtarët e rinj dhe nuk mendoj se ai do të largohet”, ka thënë Contratto për Radio Kiss Kiss. 

Finalja botërore e Red Bull Paper Wings 2012 (Foto)

Aeroplanë prej letre të ndërtuar nga konkurrentët e 83 shteteve të ndryshme të botës, pushtuan ambientet e Hangar-7, në Salzburg, Austri, për finalen botërore të Red Bull Paper Wings 2012. Finalistë nga shtete të ndryshme të botës konkurruan në disiplinat “Koha më e gjatë në ajër”, “Distanca më e gjatë e përshkuar” dhe “Fluturimi më akrobatik”. Fitorja i shkoi Republikës Çeke, Shteteve të Bashkuara të Amerikës, si dhe Polonisë dhe Libanit.
Pas suksesit të jashtëzakonshëm të këtij kampionati në 2006 dhe 2009, në Salzburg u mblodhën sërish këtë vit hedhësit më të mirë të aeroplanëve prej letre më 5 maj për të shpallur tre kampionët e botës për vitin 2012.
Në kategorinë “Distanca më e gjatë e përshkuar”, Tomas Beck nga Republika Çeke arriti të hidhte aeroplanin e tij 50.37 metër larg, duke u shpallur fitues për këtë disiplinë. Vendi i dytë shkoi në Bonje Hercegovinë, me konkurrentin Almir Kisija dhe podiumi u plotësua me kampionin e botës të vitit 2009, kroatin Jovica Kozlica.
Libanezi Elie Chemaly arriti kohën maksimale të mbajtjes së aeroplanit në ajër, me 10.68 sekonda, duke u shpallur fitues në disiplinën “Koha më e gjatë në ajër”.
Puna më e vështirë për jurinë ishte gjykimi për kategorinë “Fluturimi më akrobatik”, ku pjesë e panelit ishte tre-herë fituesi i Lojërave Olimpike, skiatori Thomas Morgenstern. Të pestë anëtarët e jurisë vendosën të vlerësonin me maksimumin e pikëve, jo një, por dy prej konkurrentëve, të cilët ishin amerikani Ryan Naccarato dhe polaku Tomasz Chodryra, duke ndarë së bashku vendin e parë në podium.
Edhe flamuri i Kosovës u valëvit në këtë konkurs botëror, duke u përfaqësuar nga: Ajet Basholli në disiplinën “Distanca më e gjatë e përshkuar”, Flakron Miftari për “Fluturimin më akrobatik” dhe Gëzim Hajrullahi për “Kohën më të gjatë në ajër”.
Rezultatet e disiplinës “Koha më e gjatë në ajër”:
1. Elie Chemaly (Liban), 2. Goekhan Emiroglu (Turqi), 3. Robi Fiser (Slloveni).
Rezultatet e disiplinës “Fluturimi më akrobatik”: 
1. Tomasz Chodryra (Poloni), 1. Ryan Naccarato (SHBA), 3. Alfredo Ramirez (Kolumbi).
Rezultatet e disiplinës “Distanca më e gjatë e përshkuar”: 
1. Tomas Beck (Republika Çeke), 2. Almir Kisija (Bosnie), 3. Jovica Kozlica (Kroaci).

Farfan: Refuzova Bayernin dhe Juven

Anësori i Schalkes, Jefferson Farfan, ka bërë të ditur se ka refuzuar oferta nga Bayern Munichu dhe Juventusi për të qëndruar në Gelsenkirchen.
Peruani ka nënshkruar kontratë të re katërvjeçare me klubin gjerman, e cila do ta mbajë te Schalke deri në vitin 2016.
“Kemi folur shpesh me Bayernin. Një interesim i tillë më bëri shumë të lumtur. Kam ëndrrat e mia dhe do t’i arrij ato te Schalke”.
“Juventusi është një klub i shkëlqyer, por atje luhet tjetër futboll. Do të duhej të riinvestoja te vetvetja nëse do të kisha shkuar atje. Në përgjithësi, Schalke është më atraktive se Juventusi”, ka deklaruara Farfan për Sport Bild. 

Merr ofertë nga Playboy – po e shqyrton (Foto)

Rihanna ka marrë një ofertë milionëshe që të zhvishet për revistën Playboy, ndërsa këngëtarja është duke menduar rreth ofertës dhe pasojave.
Bosi i revistës për meshkuj, Hugh Hefner, konsideron se 24-vjeçarja mund të thyejë rekordet e shitjes për shkak të popullaritetit të madh që ka.
Emirates247 citon burimet të kenë thënë se krijuesja e hitit “We Found Love” është e interesuar, mirëpo frikësohet për ndikimin që mund të ketë te fanset e saj të reja.
Ndryshe, të hënën mbrëma Rihanna është dërguar në spital, pas një ndeje në New York, me ç’rast ishte rraskapitur dhe dehidruar. Megjithatë, pas trajtimit që ka marrë nga mjekët ajo është lëshuar në shtëpi.
Këngëtarja publikoi në Twitter një fotografi ku shihej duke marrë infuzion.

Bieber përfundon shkollën e mesme

Superylli i të rinjve, Justin Bieber, tashmë e ka mundësinë të përqendrohet vetëm në karrierën e tij muzikore, pasi që e ka përfunduar shkollën e mesme.
Edhe pse gjatë gjithë kohës së shkollimit ka udhëtuar nëpër botë, Justin ka arritur që ta përfundojë shkollën, ndërsa për këtë më meritore është nëna e tij.
Kuptohet, gjatë turneve ai ka pasur arsimtarin privat me vete, i cili e ka mësuar gjatë ditëve kur nuk ka pasur koncerte.
“E kam dhënë testin e fundit në shkollë dhe tash jam i lirë! Ka qenë vështirë të mësoja çdo ditë”, citon The Sun fjalët e këngëtarit.

Beyonce: Dua më shumë fëmijë

Pasi ka sjellë në jetë fëmijën e parë, Beyonce Knowles dëshiron të ketë edhe fëmijë të tjerë.
“Padyshim që dua të kem më shumë fëmijë. Nuk e di sa, atë e di vetëm Zoti, ndërsa unë nuk e di ende”, ka thënë Beyonce.
Këngëtarja 31-vjeçare dhe burri i saj Jay Z në janar u bënë me vajzë, të cilën e pagëzuan Blue Ivy

Samsung Galaxy S III, telefoni zyrtar i Lojërave Olimpike

Telefoni më i ri i Samsung në Android, Galaxy SIII është emëruar si telefoni zyrtar i Lojërave Olimpike 2012, ndërsa prodhuesi më i madh i telefonave në botë, Samsung ka arritur marrëveshje me Visa për të ofruar pagesat e bazuara në NFC, payWave.
Samsung dhe Visa do të lansojnë edhe edicionin e limituar të Samsung Galaxy S III Olympic, gjatë kohës kur mbahen lojërat olimpike, edhe pse ky model thuhet se do të jetë në dispozicion vetëm për atletët që marrin pjesë në këtë garë botërore.
Atletët e olimpiadës do të mund të përdorin funksionin payWave të mundësuar në Samsung Galaxy S III Olympic për të bërë pagesa, ndërsa Visa është duke planifikuar të ketë rreth 140 mijë pika terminali pa kontakt, anembanë Mbretërisë së Bashkuar

Serbia do të ketë rol në dialogun për veriun

Serbia do të ketë rol në dialogun e ardhshëm, ngase bashkëkombës e saj jetojnë në Kosovës, ka thënë përfaqësuesi special i Bashkimit Evropian në Kosovë, Samuel Zbogar. Sipas tij, duhet të ketë një plan për veriun, por që për të duhet të vendos Prishtina.
Në Ditën e Evropës, Zbogar ka thënë se Qeveria e Kosovës duhet të bëjë çdo gjë që është e mundur për t’i bindur serbët e veriut se Kosova është multietnike.
“Populli e Qeveria e Kosovës e di më së miri se si duhet t’i stimulojnë qytetarët në veri, për t’i bindur ata se Kosova është e përkushtuar për shoqëri multientike”, ka thënë ai.
Sipas tij, është herët të flitet se çfarë roli mund të ketë Serbia në dialogun e ardhshëm për veriun.
“Duke pas parasysh që ka qytetarë serbë në Kosovë, mendoj se Serbia do të ketë një rol në dialogun e ardhshëm. Esenca është që të zgjidhet çështja në veri”, ka thënë Zbogar.

Qeveria forcon kontrollin e informatave

Qeveria e Kosovës ka vendosur ta forcojë kontrollin e brendshëm të shfrytëzuesve të internetit. Nga e mërkura (sot) asnjë nëpunës qeveritar nuk do të mund të krijojë qasje në internet me llogari elektronike private. Nëse duan të shkëmbejnë ndonjë e-mail apo të shfletojnë ndonjë ueb faqe atyre u duhet të logohen me username/fjalëkalim të domainit shtetëror.
Zyrtarë brenda Qeverisë kanë bërë të ditur se ky kontroll do të ushtrohet nga Departamenti i e-Qeverisjes dhe Proceseve Administrative me qëllim të aktivizimit të rregullit të autentifikimit të shfrytëzuesit për qasje në internet.
“Aplikimi i këtij sistemi përveçse e ngrit nivelin e sigurisë të sistemit shtetëror të teknologjisë informative, e rrit edhe kontrollin e transfereve të dokumenteve nga institucionet qendrore në adresa private apo edhe në media”, ka thënë një zyrtar i lartë institucional. “Në bazë të këtij sistemi, dihet saktë se kush ku çka ka dërguar”, ka shtuar ky zyrtar, njofton Koha.
Për futjen e kësaj mase sigurie në Qeveri, tashmë janë njoftuar të gjithë punonjësit e ministrive. 

Thaçi uron qytetarët për Ditën e Evropës

Kryeministri i Kosovës, Hashim Thaçi ka uruar të gjithë qytetarët e Republikës së Kosovës, me rastin e 9 Majit, Ditës së Evropës.
Thaçi në mesazhin e urimit, shprehu bindjen e plotë që Republika e Kosovës do ta festoj këtë festë në një periudhë të afërt si shtet anëtar i Bashkimit Evropian.
“Kosova ka filluar ta përmbushë këtë ëndërr shumë shekullore me shpalljen e pavarësisë më 17 shkurt 2008. Jam i përkushtuar që në emër të Qeverisë që udhëheq dhe në emrin tim të punoj në drejtim të përmbushjes së kritereve dhe standardeve të nevojshme që Kosova ta zë vendin e vet të merituar në mesin e shteteve të familjes së madhe evropiane”, shprehet Thaçi.
Ai më tej, thekson se 9 Maji, Dita e Evropës ka një rëndësi të madhe simbolike për gjithë Evropën, por edhe për vetë Kosovën. Kjo ditë, sipas tij, shënon paqe në Evropë, themelimin e një Unioni supranacional, në shërbim të zhvillimit të gjithëmbarshëm ekonomik të Evropës dhe respektimin e diversitetit, duke e shndërruar atë në vlerë.
“Republika e Kosovës si shteti më i ri në mesin e popujve të Ballkanit po punon në drejtim të krijimit dhe forcimit të vlerave evropiane në këtë rajon. Për Kosovën kjo ditë do të shërbejë si simbolikë shumë domethënëse e zhvillimit të rajonit si tërësi në frymën evropiane, bashkëpunimit reciprok ndër-shtetëror, bazuar në parimet fundamentale të barazisë mes popujve, respektimit të sovranitetit dhe integritetit territorial, për ecjen drejt një të ardhme prosperuese për të gjithë popujt tanë”, shprehet Thaçi.
Për Thaçin, falë mbështetjes së Bashkimit Evropian Kosova ka tejkaluar me sukses fazën e rindërtimit dhe atë të tranzicionit.
“Tashmë Kosova po hyn në nja fazë të re, në fazën e zhvillimit ekonomik dhe konsolidimit të institucioneve demokratike. Me përfundimin e Studimit të Fizibilitetit dhe nënshkrimit të Marrëveshjes së Stabilizim-Asocimit këtë vit do të arrijë të kalojë nga shteti potencial në shtet kandidat për integrim në BE. Në këtë moment të rëndësishëm të shënimit të Ditës së Evropës, dëshiroj të falënderoj qytetarët e Republikës së Kosovës, të gjitha partitë politike, shoqërinë civile dhe të gjithë kontribuuesit tjerë në përkrahjen e vazhdueshme për ndërmarrjen e reformave të nevojshme të procesit të integrimit”, shprehet kryeministri, Hashim Thaçi. 

Haliti: Prokuroria të më hetoj për akuzën e Hotit

Deputeti nga radhët e Partisë Demokratike të Kosovës, Xhavit Haliti ka reaguar të mërkurën lidhur me akuzat e Agim Hotit, se Haliti e ka urdhëruar atë të kryej atentat ndaj ish –presidentit Ibrahim Rugova, duke e cilësuar si shpifje.
Ai i ka bërë thirrje publike Prokurorisë së shtetit që ta hetoj për akuzën e Hotit ndaj tij.
“Dëshiroj të sqaroj opinion publik se akuza që bën ndaj meje qytetari i panjohur për mua, Agim Hoti, në gazetën ‘Express’ të datës 9 maj, se gjoja unë e paskam urdhëruar atë të kryej atentat ndaj ish –presidentit Ibrahim Rugova, është një shpifje e radhës kundër meje. Agim Hotin, kurrë nuk e kam takuar, kurrë nuk kam pirë qoftë edhe një kafe me të, e as që ia kam dhënë dorën ndonjëherë. Jam i bindur se e Hoti i porositur nga dikush tjetër, duke shpifur ndaj meje, ka për qëllim që të më dëmtoj në opinion”, shprehet Haliti.
Agim Hoti ka thënë për gazetën “Express”, se është autor i dy tentim atentateve ndaj ish-presidentit Ibrahim Rugova. Nga burgu i Dubravës, Hoti thotë se ata që bënë pazar me të për të vrarë janë Xhavit Haliti, Artan Nimani e Agron Haradinaj. Për këto pretendime thotë se ka fakte që do t’ua tregojë edhe hetuesve.
Derisa po vuan dënimin e tij në burgun e Dubravës, për një atentat tjetër, ndaj Anton Berishës, ish-shefit të Autoritetit Rregullativ të Telekomunikacionit (ART), Hoti thotë se ka vendosur t’i hedhë në shesh të gjitha ato që ka bërë pas përfundimit të luftës në Kosovë.