Prandelli: Italia mund ta fitojë Euron

Trajneri i Italisë, Cesare Prandelli, është i bindur se skuadra e tij do të udhëtojë kampionatin evropian Euro 2012 gjatë kësaj vere me synimin për ta fituar atë.
Azzurët janë caktuar në një grup jo aq të lehtë së bashku me kampionin në fuqi të Botës dhe Evropës, Spanjën, pastaj Kroacinë dhe Republikën e Irlandës.
“Mendoj se të gjithë trajnerët në cilindo nivel, para fillimit të një ndeshje mendojnë se mund ta fitojnë atë. Ne kemi përvojë për t’u përballur me skuadrat e mëdha dhe sigurisht se e kemi bindjen, të cilën e krijojmë brenda grupit”.
“Kjo do të thotë se në momente të vështira ne e dimë se jemi të bashkuar, kur është e nevojshme ne kemi vullnetin për t’i ndihmuar njëri-tjetrit dhe po ashtu jam i bindur se ne mund të luajmë një futboll të mirë. Ne nisemi për kampionatin evropian për ta fituar atë”, ka thënë Prandelli.
Italia e fillon kampanjën e tyre në Euro 2012 më 10 qershor kundër Spanjës në Gdansk të Polonisë.

Di Maria dëshiron Ligën e Kampionëve

Angel Di Maria u ka premtuar tifozëve të Real Madridi se titulli i këtij viti në La Liga do të ndiqet nga më shumë trofe në vitet e ardhshme.
Los Blancos mposhtëm Athletic Bilbaon me rezultat 3-0 të mërkurën për të siguruar titullin e kampionit të Spanjës edhe matematikisht, dhe argjentinasi tash ka hedhur shikimin kah një trofe tjetër, ai i Ligës së Kampionëve.
“Jam shumë krenar me titullin tim të parë në ligën e Spanjës, por nga ne pritet ende. Shpresoj ne të fitojmë më shumë tituj çdo vit dhe shpresoj një prej tyre të jetë Liga e Kampionëve”.
“Dua tifozët ta shijojnë këtë siç e shijojmë edhe ne. Jam i sigurt se ne do t’i bëjmë ata edhe më të lumtur në të ardhmen”, ka thënë Di Maria.
Real Madridi u eliminua në gjysmëfinale të Ligës së Kampionëve nga Bayerni i Munichut. 

Van Persie, më i miri i vitit sipas gazetarëve

Kapiteni i Arsenalit, Robin van Persie, është i befasuar por edhe krenar që është emëruar Futbollisti i Vitit në Ligën Premier nga gazetarët e futbollit.
Holandezi kryesoi në sondazhin e Asociacionit të Shkrimtarëve të Futbollit, duke përfunduar para sulmuesit të Manchester United, Wayne Rooney, dhe mesfushorit tjetër të United, Paul Scholes.
“Jam shumë krenar që jam këtu, e kam parë listën [e fituesve të mëhershëm], dhe për mua, unë kurrë vërtet nuk kam menduar se do të qëndroj këtu duke e fituar trofeun”.
“Por as edhe këtë sezon nuk kam menduar për ta fituar trofeun për veten, thjesht kam luajtur sepse e dua dhe që Arsenali të përfundojë sa më lart në ligë”.
“Kur kuptova se në të vërtetë e kam fituar, isha i befasuar dhe mendova, ‘çfarë, unë? Vërtet? Jam krenar që jam pjesë e kësaj historie”, ka thënë Van Persie.

GaGa sërish e vetmuar

Krijuesja e hitit “Poker Face”, Lady GaGa, raportohet se është sërish e vetmuar.
Burime të afërta me këngëtaren kanë thënë për US Weekly se 26-vjeçarja është ndarë nga i dashuri i saj, aktori Taylor Kinney.
“Ajo do të jetë në turne non-stop deri në vitin e ardhshëm dhe ka kuptuar se nuk mund të jetë edhe në lidhje në të njëjtën kohë”.
“Thjesht nuk ka hapësirë për diçka tjetër. Puna e saj është konsumuese. Taylor ishte më shumë për veten, një aktor tipik, dhe nuk ishte krejtësisht i dhënë Gagas”.
“Asaj i pëlqente që e kishte këtë djalosh për të cilin gjithkush mendonte se është i nxehtë. Por kjo lidhje kurrë nuk do të zgjaste”, ka thënë burimi.

Arta Bajrami me ‘look’ të veçantë

Arta Bajrami është duke u përgatitur të sjellë projekte të reja muzikore.
Këngëtarja kosovare ka bërë të ditur se ka nisur përgatitjet për dy këngë të reja të cilat do t’i lansojë gjatë muajve të ardhshëm.
“Sapo kam realizuar një këngë të re, të cilën do ta lansoj gjatë këtij muaji, ndërsa më pas do të pësoj edhe kënga tjetër. Në të dy klipet do të paraqitem me një ‘look’ të veçantë dhe të ndryshëm”, ka thënë ajo për “Zëri”.
Arta në këto dy projekte ka punuar me vëllain e saj Don Arbas, ndërsa thotë se ai ka bërë një punë të madhe në këto këngë të cilat do të lansohen bashkë me videoklipe.

Gold AG duet me Zajmina Vasjarin

Gold AG është duke u përgatitur për projektin e tij të ardhshëm. Ai kësaj radhe do të vijë në bashkëpunim.
Reperi ka realizuar një bashkëpunim me këngëtaren Zajmina Vasjari, me të cilin duet do të marrin pjesë në festivalin “Çelësi Muzikor 6”.
Kënga mban titullin “Forever” me muzikë nga Chipsi dhe orkestrim nga Gramoz Kozeli dhe është një këngë shumë ritmike. 

Rita Ora më 26 maj në ‘Rinora 4’

Këngëtarja kosovare Rita Ora, e cila pushtoi top listat botërore me hitet e saj si “Hot right now” e “R.I.P”, më 26 maj do të përformojë në Rinora 4.
Rita Ora është ftuar të mbajë koncert më 26 maj në diskotekën Rinora 4 në Zvicër, shkruajnë mediat zvicerane.
Përveç përformancës së saj në ‘Rinora 4’, këngëtarja po më 26 maj do të jetë e ftuar edhe në koncertin e grupit Coldplay, i cili do të mbahet në Cyrih të Zvicrës.
Rita Ora së fundmi realizoi këngën “Party and bullshit”, e cila është pritur mjaft mirë. 

Me mikeshat në telefon

Të rrëfehesh ka të bëjë me një sforcim emotiv nga të dyja anët dhe jo gjithmonë jep rezultatet e dëshiruara.
 Keni dëshirë të bisedoni, të shfryheni në momentin kur jeni duke shkuar në punë ose gjendeni në mes të trafikut kaotik dhe ndiheni vetëm?
Ky tip gruaje e fillon ditën duke i telefonuar mikeshave për t'i thënë të rejat e fundit, këtë mund ta bëj edhe kur është ulur në divanin e preferuar ose është zhytur në vaskën e banjës për t'u relaksuar.
Pak rëndësi ka kush është në linjën tjetër. E rëndësishme është që të flisni ju sa më shumë (e ngjashme me një monolog); këto biseda kanë të njëjtin funksion si të jesh tek psikologu.
Çdo herë që duhet të marrë një vendim, kjo femër ka frikë se mos gabon dhe nuk di çfarë të bëjë. Për atë është e domosdoshme t’i tregojë pasiguritë kujtdo që është e gatshme ta dëgjojë.
Kush flet shumë shpesh mund të zbulojë gjëra personale, të cilat do të ishte më mirë t'i mbaj për vete. Sepse, nëse tregoni më shumë seç duhet, mund ta komprometojë përgjithmonë një raport ose mund të marrësh reagime të paparashikueshme. 

Gjalpi apo margarina?

Kur është fjala për zgjedhje midis margarinës dhe gjalpit, është çështje e preferencave individuale. Mirëpo, tani ka informacione të bollshme, andaj edhe mund të merrni vetë vendimin.
 Pyetjes se a është më i shëndetshëm gjalpi apo margarina shpesh nuk mund t’i përgjigjemi me saktësi. Mënyra më e mirë për kontrollimin e nivelit të kolesterolit është që të hahet me maturi.
Sot mund të blihet margarina me pothuajse zero trans-yndyrë. Ekspertët e rekomandojnë këtë lloj margarine më parë se gjalpin. Mirëpo, në qoftë se ju pëlqen gjalpi, nuk do të thotë se duhet hequr dorë në tërësi.

Samsung Galaxy S III kushton 677.5 euro?

Telefoni më i ri i mençur në Android, Samsung Galaxy S III do të fillojë të shitet në Mbretërinë e Bashkuar pas disa javësh tek operatorë të ndryshëm mobil, ndërsa tani janë zbuluar çmimet e këtij telefoni pa kontratë.
Sipas Unlock Mobiles, çmimi i Samsung Galaxy S III pa kontratë dhe me 16GB hapësirë do të fillojë prej 549.98 funta, duke përfshirë edhe taksat.
Siç është thënë edhe më herët, Samsung Galaxy S III do të vijë me ekran të ndjeshëm në prekje me 4.8 inç në teknologjinë HD Super AMOLED, 1280 x 720 piksel, procesor Exynos quad-core me 1.4GHz, kamerën e pasme me 8MP, atë frontale me 1.9MP, si dhe mbështetje për rrjetet NFC, WiFi, GPS, Bluetooth 4.0. 

Alkooli që ju dehë dhe kthjellë brenda pak çasteve

Në shitje ka dal shishja spërkatëse që ju deh menjëherë. Por, ju po ashtu do të kthjelleni shpejtë.
Shkencëtarët amerikanë e kanë zhvilluar një pajisje që do t'ju japë ndjenjën se jeni i dehur pas një spërkatjeje të vetme në gojën tuaj, ndërsa ky efekt mbaron për disa sekonda.
Spërkatësi ka 0.075 mililitra të alkoolit, ndërsa në pijet “standarde” janë 60 mililitra. Kështu, duhen pra afro njëmijë spërkatës të tillë që ta fusni brenda sasinë e njëjtë të alkoolit - si në rastin e dehjes “normale”.
Përparësia në këtë është kënaqësia në dehje, pa efekte të dëmshme të alkoolit në organizëm. Megjithatë, ky produkt mund të shkaktojë aksidente trafiku, prandaj duhet të jeni të kujdesshëm me të.
Alkooli me spërkatës në Evropë do të kushtojnë 20 euro, ndërsa shishja ka sasi për 21 “spërkatje” apo dehje të shkurta!

Ateistët janë më të ndjeshëm dhe më humanë!?

Sipas hulumtimit të botuar në revistën profesionale amerikane ”Social Psychological and Personality Science”, shkencëtarët kanë ardhur në përfundim se ateistët, agnostikët dhe njerëzit më pak fetarë, janë më të mëshirshëm se besimtarët.
Shkencëtarja Laura Saslow – nga Universiteti i Kalifornisë – idenë për këtë hulumtim e gjeti pasi shoku i saj ateist i ishte rrëfyer se si ka vendosur të dhurojë të holla për Haitin, pasi ka parë një video emocionale të shpëtimit të një gruaje.
"Gjatë hulumtimit kemi gjetur edhe ndërlidhjen se si njerëzit më pak fetarë krijojnë raporte emocionale dhe shoqërore në bazë të asaj se a mund të ndihmojnë ose jo. Njerëzit religjiozë, në anën tjetër, ndjeshmërinë e tyre e shohin më pak përmes zemërgjerësisë, e më shumë përmes faktorëve tjerë si doktrina, faktorët shoqërorë apo shqetësimet për reputacionin”, thotë shkencëtarja.
Një studim i ngjashëm në SHBA është bërë në vitin 2004, me 1.300 të anketuar, ndërsa rezultatet kanë treguar se jobesimtarët më shpesh ndihmojnë shoqërinë, japin para për të pastrehët, marrin pjesë në aktivitete humanitare dhe bëjnë akte të bamirësisë.
"Mbi të gjitha, ky hulumtim tregon se edhe pse në Shtetet e Bashkuara njerëzit më pak fetarë konsiderohen si më pak të besueshëm kur është fjala te dhembshuria, ata ndihmojnë më shumë se besimtarët", thotë Saslow.

Binjaket “huazojnë” biberonin (Video)

Këto foshnja binjake janë bërë të famshme në internet, pasi nëna e tyre ka vendosur incizimin në të cilin shihen ato duke ia “huazuar” njëra-tjetrës biberonin.
Binjaket identike nëntëmuajshe, Lilly dhe Diana, kënaqen duke ndarë gjërat me njëra-tjetrën, kështu që nuk e kanë problem ta bëjnë të njëjtën edhe me biberon.
Vajzat - aq sa janë të ngjashme në pamje - ngjasojnë edhe në sjellje. Rrinë urtë të ulura dhe ndonëse shtyhen se cila do ta mbajë biberonin më gjatë, megjithatë këtë “luftë” e kalojnë pa incidente! 

Luanesha donte ta hante fëmijën! (Video)

Vizitat në Kopshtin Zoologjik janë zbavitëse. Këto vizita janë shans i mirë për fëmijët për t’u njohur me botën shtazore. Por, gjëja kryesore që duhet të respektoni janë vërejtjet për kujdes. Ky rast dëshmon se pse këto vërejtje janë të rëndësishme.
Derisa familja i është afruar kafazit me luanesha, dhe derisa prindërit xhironin shtazët, një luaneshë përmes rrethojës plastike ka shikuar një fëmijë në afërsi. Luanesha është afruar dhe ka tentuar ta kapë fëmijën, duke menduar se është vakti i saj.
Fatmirësisht, gjithçka përfundoi mirë. Ndërsa, nga ky rast mund ta nxjerrim një mësim: prindërit nuk duhet të zbaviten shumë në Kopshtin Zoologjik.

Ronaldo: Jemi më të mirë se Barça

Sulmuesi i Real Madridit, Cristiano Ronaldo, ndjen se triumfi i Los Blancos në La Liga është plotësisht i merituar, teksa nuk ngurron të pohojë se ekipi i tij ka qenë shumë më i mirë se sa Barcelona gjatë këtij sezoni.
Los Blancos mposhtën Athletic Bilbaon me rezultat 3-0 në San Mames të mërkurën, me ç’rast siguruan titullin e 32-të në histori të klubit, ndërsa Ronaldo ka pranuar se është i ngazëllyer që në koleksionin e tij tani mund të shtojë dhe titullin e kampionit të Spanjës.
“Unë tej mase i kënaqur. Ky është titulli im i parë në Spanjë dhe jam i ngazëllyer. Ne kemi arritur objektivat tanë dhe jemi të kënaqur që fituam La Ligën”.
“Kampionati është edhe më i vështirë kur luftoni me një klub si Barcelona, por ne ndjejmë se jemi më të mirë se të gjithë. Ne ishim më të mirë se Barcelona. Titulli i La Ligas është ajo që dëshirova më shumë. Unë kam tashmë dy Këpuca të Arta në shtëpi. Do të ishte mirë nëse e fitoj përsëri, por nuk është problem edhe nëse nuk e fitoj”, është shprehur Ronaldo.
Real Madridi për herë të fundit titullin e kampionit të Spanjës e fitoi në sezonin 2007/2008.

Klinsmann: Dua që Gjermania ta fitojë Euro 2012

Përzgjedhësi i SHBA-ve, Jurgen Klinsmann, shpreson që Gjermania të triumfojë në Euro 2012 dhe ndjen se njerëzit e Joachim Loeë janë më shumë se kurrë të gatshëm për ta fituar trofeun e madh.
 “Shpresoj që Gjermania të fitojë këtë herë. Besoj se tani ne kemi ekipin të fuqishëm në çdo repart, një ekip që mund të lë gjurmë në Euro dhe të fitojë shumë”.
“Mendoj se ne jemi të përkushtuar, kemi forcën e brendshme dhe pa marrë parasysh se çka del përpara, ne jemi në gjendje të fitojmë. Edhe nëse Spanja është kundërshtare”, ka deklaruar Klinsmann. 

Robben rinovon kontratën

Bayerni i Munichut ka bërë të ditur se Arjen Robben ka nënshkruar një kontratë të re që do ta mbajë atë në Allianz Arena deri në verën e vitit 2015.
 Kontrata e holandezit skadonte verën e vitit 2013 dhe pas shumë polemikave e grushtimeve me bashkëlojtarin e tij, Franck Ribery, Robben më në fund ka vendosur që të nënshkruajë rinovimin.
“Unë gjithmonë kam thënë se jam i lumtur te Bayerni. Për këtë arsye, më pëlqeu ideja që ta rinovoj kontratën më herët. Bayerni është sikur familje për mua. Dy prej fëmijëve të mi janë lindur në Munich dhe familja ime ndihet këtu sikur në shtëpi”
“Po ashtu, në sensin sportiv ky rinovim është vendim i drejtë për mua. Ne kemi ekip të mrekullueshëm dhe jam i sigurtë se ne do të kënaqemi me sezone tjera të mira në vijim”, është shprehur Robben në faqen zyrtare të klubit. 

“Interi mund të kualifikohet në LK”

Pasi përjetoi humbjen e parë nga Parma, trajneri i Interit, Andrea Stramaccioni, është shprehur edhe më tej optimist për gjasat e ekipit të tij për Ligën e Kampionëve.
 “Unë nuk mendoj se mund të vijmë në një përfundim për vendin e tretë edhe pas kësaj xhiroje”.
“Ne nuk mund të presim për të rikthyer ciklin fitues, ne duam të fitojmë tani, menjëherë, duke filluar nga e diela në derbi me Milanin. Është ndeshje e madhe për ne. Gjithë ajo që mund të bëjmë është të tentojmë t’i fitojmë tri ndeshjet e mbetura dhe më pas të shohim se ku do të përfundojmë”, ka potencuar Stramaccioni. 

Gullit: Anglia dhe Gjermania të sfidojnë Spanjën

Futbollisti legjendar holandez, Ruud Gullit, beson se Gjermania dhe Anglia mund të ekspozojnë rrezik të madh për Spanjën, që është dominuese e futbollit evropian.
 “Nëse bëjmë ndonjë sondazh anë e mbanë globit për fituesin e Euro 2012, atëherë sigurisht se Spanja do të llogaritet si favorite, kjo për shkak të dominimit ndaj kundërshtarëve dhe lojës me pasimet e shkurtra”.
“Por dy ekipe, një ekip anglez dhe një gjerman kanë treguar se spanjollët mund të mposhten përkundër lojës së mirë, ndërsa kjo mund të arrihet vetëm me anë të organizimit strategjik. Unë dua të them se pos atyre dy klubeve, janë edhe kombëtaret nga vendet përkatëse që mund të rrezikojnë seriozisht Spanjën në Euro këtë vit”, ka thënë Gullit.

“Messi meriton çdo çmim”

Ish-trajneri i Real Madridit, Manuel Pellegrini, beson se Lionel Messi meriton të fitojë çdo çmim individual pasi theu rekordin e Gerd Muller për numrin e golave të shënuar brenda një sezoni.
 “Unë nuk i di parametrat e Topit të Artë. Unë vetëm e di se Lionel Messi meriton ta fitojë çdo trofe”.
“Kontributi i Guardiolës për futbollin ka qenë i madh, jo vetëm për titujt që ka fituar, por edhe për filozofinë që ka reflektuar. Guardiola e mori vendimin që ishte më i miri për të, por mendoj se ky pushim do të jetë i shkurtër. Ai do të kthehet më i motivuar se kurrë”, ka thënë Pellegrini.

Konfirmohet pjesërisht aktakuza në ‘rastin Xharra’

Gjykata Komunale në Prishtinë e ka konfirmuar pjesërisht aktakuzën kundër Sami Lushtakut, Rexhep Hotit, Arizona Dibrës, Avni Azemit, Rizah Hajdarit dhe Qani Mehmedit. Të akuzuarit akuzohen për veprat penale Shkelje e statusit të barabartë të qytetarëve të Kosovës, Kërcënim dhe Shpifje.
Pika e akuzës për veprën penale të Kërcënimit është konfirmuar për Sami Lushtakun, Rizah Hajdarin, Qani Mehmedin dhe Avni Azemin, kurse është hedhur poshtë për Rexhep Hotin dhe Arizona Dibrën, njofton EULEX-i.
Pika e akuzës për veprën penale të Shpifjes është hedhur poshtë nga aktakuza kurse procedura është ndërprerë ashtu që pala e dëmtuar ta ndjekë rastin me padi civile.
Pika e akuzës për veprën penale të Shkeljes së statusit të barabartë të qytetarëve të Kosovës është hedhur poshtë për të gjithë të akuzuarit.
Aktakuzën e kishte ngritur një prokuror i EULEX-it nga Prokuroria Speciale e Kosovës.
Rasti ka të bëjë me një fushatë të pretenduar të kërcënimeve kundër gazetares Jeta Xharra dhe një pjesëtari të personelit të saj në Balkan Investigative Reporting Network (BIRN) nga ana e gazetës Infopress në qershor 2009, pas transmetimit të një programi televiziv (të drejtuar nga Jeta Xharra) gjatë të cilit thuhet se ishte raportuar në mënyrë kritike për kryetarin e komunës së Skenderajt dhe për rajonin e Drenicës.
Prokurori Special dhe pala e dëmtuar kanë të drejtë ankese kundër këtij vendimi në afat prej tri ditësh pasi t’u jetë dorëzuar ai.

Një “modus vivendi” për veriun

Kryetari i grupit parlamentar për Evropën Juglindore në Bundestagun gjerman, Peter Weiss, ka thënë se Prishtina dhe Beogradi duhet të bien dakord për një ‘modus vivendi’ për veriun e Kosovës.
Duke folur për zhvillimet e fundit në Kosovë, ai tha se përshkallëzimi i ditëve të fundit ndoshta do të kenë ngritje deri në ditën e zgjedhjeve në Serbi, për faktin se sipas tij, statusi i veriut të Kosovës është ende i diskutueshëm në mes të Kosovës dhe Serbisë.
“Fatkeqësisht as në bisedimet teknike në mes të Kosovës dhe Serbisë nuk janë arritur ende rezultate të kënaqshme dhe kjo tregon se është urgjentisht e nevojshme që qeveritë në Prishtinë dhe Beograd të bien dakord për një modus vivendi për veriun e Kosovës”, tha Weiss në një intervistë për Deutsche Welle.
“Përndryshe sa herë që të ketë zgjedhje në Serbi apo sa herë që të ketë zhvillime të reja do të paraqiten edhe vështirësi të reja dhe situatat e tilla para së gjithash do të shfrytëzohen nga përkrahësit e nacionalizmit nga të dyja palët”. 

OSBE - BE: Qeveritë të sigurojnë lirinë e shtypit!

Në Ditën Botërore të Lirisë së Shtypit, Organizata për Siguri dhe Bashkëpunim në Evropë (OSBE), kërkon nga 56 qeveritë e shteteve anëtare, që të ndërmarrin hapa realë në sigurimin e lirisë së fjalës. Ndërsa, shefja për politikë të jashtme të BE-së, Catherine Ashton, ka thënë se Censurimi dhe kërcënimi i redaktorëve, shkrimtarëve, gazetarëve ose kolumnistëve është i papranueshëm, ashtu siç është i papranueshëm përdorimi i dhunës dhe arrestimi tyre.
“Të gjitha shtetet pjesëmarrëse në OSBE duhet të tregojnë përkushtim për vlerat e tyre demokratike duke vepruar e jo vetëm me fjalë”, tha Dunja Mijatovic, përfaqësuese e OSBE-së për Liri të Mediave, në Tunizi, në një konferencë ndërkombëtare, ku shënohet Dita Botërore e Lirisë së Shtypit.
Më tutje ajo theksoi se “autoritetet duhet ta bëjnë të qartë se sulmet dhe presionet psikike ndaj reporterëve, vrasjet e pazgjidhura, arrestimet arbitrare dhe burgosjet dhe ligjet drakoniane për shtyp, që e instalojnë censurën në Internet dhe jashtë tij, nuk kanë vend në shoqëritë moderne, që synojnë progres dhe prosperitet”.
Mijatovic ka theksuar se “të 56 shtetet pjesëmarrëse duhet ta mbrojnë lirinë e mediave si element vital, jo vetëm më 3 maj”.
Censurimi dhe kërcënimi i redaktorëve, shkrimtarëve, gazetarëve ose kolumnistëve është i papranueshëm, ashtu siç është edhe përdorimi i dhunës dhe arrestimeve të nxitura nga shteti që u bëhen atyre. Kështu thuhet në deklaratën e përfaqësueses së lartë për politikë të jashtme të BE-së, Catherine Ashton në ditën botërore të lirisë së shtypit.
Ashton e vlerëson lartë punën e guximshme të gazetarëve, të cilët, shpesh në kushte shumë të rrezikshme, vazhdojnë të japin informacione të pavarura.

Kërkohet trajtim më i mirë për gazetarët dhe mediet

Unioni i Gazetarëve të Kosovës (UGK), me rastin e 3 majit, Ditës Botërore të Lirisë së shtypit, ka organizuar tryezë diskutimi me temën: “Sfidat e tanishme të gazetarisë në Kosovë”, në të cilën u tha se neni 37 dhe 38 i Kodit të ri penal dëshmojnë se ka mangësi në perceptimin e demokracisë.
Profesori i gazetarisë, Milazim Krasniqi, ka thënë se mediumet elektronike e të shtypura në Kosovë nuk kanë arritur standardet e dëshiruara të pavarësisë financiare.
Krasniqi ka thënë se nenet e Kodit Penal të miratuar së fundmi në Kuvendin e Kosovës, duhet të ndryshohen duke bartur përgjegjësinë tek vendimmarrësit brenda medies e jo që gazetarët të kenë përgjegjësi për produktin final të medies.
“Unë jam kundër adresimit të përgjegjësisë te gazetarët, po adresimi do të duhet të jetë te pronarët e medies eventualisht te redaktorët përgjegjës, sepse ata i bëjnë politikat editoriale dhe e finalizojnë produktin media”, ka thënë Krasniqi.
Ndërsa, redaktori përgjegjës i informacionit në Radio Televizionin e Kosovës, Donat Syla, ka thënë se në mungesë të zhvillimit të mirëfilltë ekonomik, mediet në Kosovë janë në një gjendje të mjerueshme financiare.
“Duke parë si qenësor rolin e medies në Kosovë, konsideroj se shteti përmes mekanizmave të tij, duhet që të krijoj mundësi për zhvillimin e medies së lirë dhe të pavarur. Pra, përpos mediumit publik, trajtimi për të cilin nga ana e politikës lë për të dëshiruar, shteti duhet të krijoj burime financiare për të përkrahur edhe mediet private, duhet gjetur metoda në këtë drejtim që do të ndihmonin medien e lirë, por që nuk do ta cenonin pavarësinë editorale të tyre”, ka thënë Syla.
Ndërkaq, redaktori përgjegjës i informacionit në Radio Televizionin 21, Eugen Saraqini ka kërkuar që nenet 37 dhe 38 të hiqen nga Kodi Penal për të ndihmuar lirinë e medieve.
Edhe kryeredaktorja e gazetës “Kosova Sot”, Margarita Kadriu, po ashtu ka theksuar se nenet 37, 38 dhe 39 të Kodit Penal e ngufasin lirinë e medies.
Në vazhdim të debatit qëndrimin e Unioni të Gazetarëve të Kosovës (UGK), në lidhje me situatën e medies dhe gazetarëve në Kosovë e ka paraqitur, Alban Zeneli, duke thënë se Kodi Penal duhet të rikthehet në Kuvendin e Kosovës për modifikim. Sipas tij, UGK përveç kërcënimeve dhe shantazhe nga grupe të ndryshme të politikës e biznesit që u bëhen gazetarëve, problem kryesor është statusi social i punëtorëve të medieve”, ka deklaruar Zeneli.
Në anën tjetër, studiuesja e medieve, Sahadete Limani- Beqaj, ka theksuar se prodhimi medial që i ofrohet publikut mund të varfërohet edhe më shumë me hyrjen në fuqi të neneve 37 dhe 38 të Kodit të ri Penal.
“Përmbajtja mediale që na servohet neve si publikë, mundëson që edhe sa i përket diversitetit, pluralitetit, reflekton shumë pak në pluralitet, shumë pak në diversitet. Mirëpo edhe sa i përket cilësisë jemi dëshmitarë që shpesh herë na servohet përmbajtje mediale që më të vërtetë mendohemi se nga kush dhe pse”, ka thënë Limani-Beqaj.
Edhe Këshilli i Mediave të Shkruara të Kosovës organizoi njëtryezë me temën ‘Respektimi i Kodit të Etikës në Kosovë-Garanci për shtypin e lirë”, të organizuar nga Këshilli i Mediave të Shkruara të Kosovës.
Lëndët që ka të bëjnë me shpifjet nuk mund të gjykohen si penale, si dhe nuk ekziston liri e tepruar e shtypit, por vetëm liri apo kufizim i saj, u tha në tryezë.
Kryeredaktorët e shumë mediave në vend thanë se Kodi duhet të jetë udhërrëfyes për gazetarët dhe gazetarinë, dhe se duhet të shërbejë për të gjithë pa asnjë dallim. 

OSBE tërhiqet nëse serbët mbajnë zgjedhje lokale

Rreth 500 anëtarë të misionit të Organizatës për Siguri dhe Bashkëpunim Evropian (OSBE) do të jenë të angazhuar në lehtësimin e procesit zgjedhor më 6 maj, gjatë të cilit për presidentin dhe parlamentin e Serbisë do të kenë të drejtë vote mbi 109 mijë qytetarë serbë të Kosovës, bënë të ditur përfaqësues të OSBE-së. Nëse serbët përpiqen të organizojnë zgjedhje lokale, Shefi i misionit të OSBE-së, Werner Almhofer , ka thënë se “OSBE-ja ia ka rezervuar vetës të drejtën që të tërhiqet nga roli i lehtësuesit”.
Në një konferencë për media, ata njoftuan se këtë mëngjes kanë arritur në vend të gjitha fletëvotimet dhe materiali tjetër zgjedhor, ndërsa sqaruan mënyrën se si do të votohet këtë të diel në 28 lokacione dhe 90 vendvotime në tërë territorin e Kosovës.
Shefi i misionit të OSBE-së në Kosovë, ambasadori Werner Almhofer, hodhi poshtë mundësinë që në vendvotime të jenë të pranishëm zyrtarë të shtetit serb, duke thënë se në secilin vendvotim do të ketë vetëm pjesëtarë të stafit të OSBE-së.
“Ne do t’i vendosim diku pesë njerëz në dhomë-tre janë qytetarë vendas. Të gjithë janë të angazhuar nga OSBE-ja; kjo është çështje që i takon ekskluzivisht OSBE-së. Në përbërjen tonë, tre do të duhej të ishin serbë lokalë dhe ne do t’i sjellim dhe nga dy ndërkombëtarë si koordinues dhe përkthyes”, tha ai, transmeton REL.
Marrëveshja e arritur për lehtësimin e zgjedhjeve parlamentare dhe presidenciale të Serbisë në Kosovë ishte arritur më në fund të muajit të kaluar-marrëveshje kjo që nuk vlen dhe për zgjedhjet lokale të kundërshtuara nga Prishtina zyrtare dhe bashkësia ndërkombëtare.
Mirëpo, serbët e pjesës veriore të Kosovës janë zotuar për mbajtjen e zgjedhjeve lokale pavarësisht mungesës së mbështetjes nga qeveria serbe.
Almhofer foli për reagimin e parashikuar të OSBE-së në rast të zbatimit të një skenari të tillë në ditën e zgjedhjeve.
“Është esenciale që zgjedhjet të mbahen në përputhje me marrëveshjet e arritura dhe duke respektuar plotësisht rolin e OSBE-së. Nëse nuk ndodh kjo, OSBE-ja ia ka rezervuar vetës të drejtën që të tërhiqet nga roli i tij lehtësues”, u shpreh ai.
Në ndërkohë, u ritheksua se për të pasur mundësi për pjesëmarrje në votime, serbëve kosovarë do t’u duhet vetëm një dokument i vlefshëm i Serbisë dhe që emri i votuesit të figurojë në listat e votuesve.
OSBE-ja është zotuar se rolin lehtësues për zhvillimin e zgjedhjeve presidenciale e parlamentare serbe në Kosovë do ta zbatojë në përputhje me rolin e saj me rezolutën 12 44 të Këshillit të Sigurimit të Kombeve të Bashkuara.

Të vendosur për rikthimin e A2-shit

Drejtuesit e Korporatës Energjetike të Kosovës (KEK), janë të vendosur për të vazhduar me punët për ta rikthyer në punë bllokun A2 të Termocentralit “Kosova A”, i cili kishte dalë jashtë prodhimit para dhjetëvjetëve.
Ata kanë thënë se djegia e shiritave transportues në bllokun A 3 të Termocentralit “Kosova A” nuk do të ndikoj në vazhdimin e punëve për të rikthyer njësinë A 2 në prodhim, e cila sipas tyre do të ndikonte në përmirësimin e furnizimit të konsumatorëve me rrymë.
Zëdhënësi i KEK-ut tha për Telegrafin se shumë shpejtë do të zëvendësohen shiritat e djegur të blloku A3 pasi kësi lloj të shiritave ka KEK-u. “Shiritat zëvendësohen edhe dy tri ditë, pasi që KEK-u ka kësi lloj të shiritave në depot e veta”, theksoi Buzhala.
Ai ka bërë të ditur se së shpejtë do të mblidhet komisioni profesional për vlerësimin e këtyre dëmeve nga zjarri, që të cilat janë minimale. 

Patatet e pashitura ndotin ambientin

Mbetja e qindra tonelatave patate të pashitura, që kultivuan fermerët vushtrrias sezonin e kaluar, është shndërruar në faktor ndotës të ambientit. Ato po hidhen në breg të lumit Sitnica përskaj Vushtrrisë.
Gjendje më e rënd po mbretëron në fshatin Pestovë, si territori ku më së shumti kultivohet kjo kulturë bujqësore. Në Drejtorinë Komunale për Inspeksion të Vushtrrisë, konfirmojnë se sivjet po kanë probleme më të mëdha në fshatin Pestovë, pikërisht nga hedhja e mbeturinave, ku për këtë ata thonë të jenë lajmëruar disa herë nga ana e banorëve të këtij fshati.
Zëdhënësi i Komunës në Vushtrri, Bahri Bivolaku, tha se inspektorati komunal vazhdimisht po inspekton në këtë fshatë, por ato mbeturina (patatet e kalbura) po hidhen gjatë natës dhe parandalimi thuajse është i pamundur, raporton Koha net.
Komuna e Vushtrrisë njihet si vendi ku më së shumti kultivohet patatja. Për një sezon në tokat e kësaj komuna mbjellën rreth 70 mijë tonë patate, sa është konsumi i tërësishëm i banorëve në Kosovë. Ndërsa rreth 70 mijë tonë të tjera patate prodhohen për tregun e jashtëm, ku në pamundësi të kësaj fermerët nga Kosova këtë vit kanë shfaqur disa herë revolte e tyre në institucionet vendore.

Vilanova: Ekipet e Mourinhos luajnë keq

Tashmë jemi në dijeni se trajneri i Real Madridit, Jose Mourinho, kishte rivalitet të jashtëzakonshëm me ish-bosin Blaugran, Pep Buardiola, por ky rivalitet vetëm sa do të rritet kur Tito Vilanova të jetë në krye të klubit katalanas.
 Vilanova, të cilit Mourinho i vuri gishtin në sy në Superkupën e Spanjës, mendon se portugezi është trajner defensiv dhe se nuk mund të pritet që ekipet e tij të luajnë futboll atraktiv.
“Nuk është e mundur që një trajner të thotë gjithçka që do për dikë dhe kur dikush përgjigjet, ai të kërcejë me ofendime. Tek e fundit, Mourinho është një trajner i futbollit, i cili kurrë nuk flet për futboll dhe neve nuk na pëlqen kjo”.
“Ekipet e Mourinhos kanë nga gjashtë lojtarë defensivë, katër mbrojtës dhe dy mesfushorë defensivë, të cilët janë të kthyer shumë prapa, e të cilët janë zakonisht futbollistë me fizik të përsosur. Katër lojtarët tjerë para tyre vetëm presin. Ju nuk mund të prisni që ekipet e Jose Mourinhos të luajnë futboll atraktiv”.
“Nuk është mirë kur trajnerët tentojnë të jenë protagonistë. Unë vetëm mund të kuptoj që një trajner dëshiron vëmendje për shkak se nuk ka përvojë dhe nuk e ka përjetuar atë që lojtarët përjetojnë në fushë. Ai do të dëshironte të ishte futbollit, pasi që kurrë nuk ka qenë futbollist”.
“Reali gjithmonë ka pasur lojtarë të mëdhenj. Është normale që ata të fitojnë diçka pas gjithë atij investimi të bërë. Është investimi më i madh në histori. Ata kanë transferuar lojtarët që kanë dashur. Ata kanë shpenzuar më shumë se gjysmën e shumës që kemi shpenzuar ne. Por, nuk ka asgjë në lojën e tyre që më pëlqen mua”, ka deklaruar Vilanova.

Allegri: Juve kontrollon kreun

Trajneri i Milanit, Massimiliano Allegri, është shprehur tejet i kënaqur me rrjedhën e luftës për titull edhe pse mendon se Juventusi e ka në kontroll luftën për titull në Serie A.
 “Juventusi ka ende gjithçka në duart e veta. Ne vetëm duhet të bëjmë më të mirën dhe të mbajmë garën të hapur, ndërsa shpresojmë për ndonjë lëshim tjetër të Juves edhe pse kjo është e vështirë të ndodhë”.
“Të shohim çfarë ndodh të dielën. Futbolli për këtë është i bukur, gjithçka mund të ndodhë në një ndeshje. Kjo është dëshmia se gjëja më e pamundur për t’u arritur, nëse arrihet është gjëja më e bukur dhe më e pa besueshme”, ka thënë Allegri.
Milani i shkon Interit në derbin lokal që pritet ta vendosë titullin dhe fatin e Interit për Ligën e Kampionëve dhe gjithë kjo para 80 mijë tifozëve Nerazzurë.

Liverpooli, humbje prej 50 mil. funtesh

Menaxheri i Liverpoolit, Ian Ayre, ka këmbëngulur se The Reds janë në formë mjaft të mirë financiare, përkundër faktit se klubi nga Anfield ka regjistruar humbje prej 49.4 milionë funtesh për këtë sezon.
 “Mendoj se njerëzit do të fokusohen në humbjen prej 50 milionë funtesh dhe se nuk ka biznes këtu, por më tregoni se cili klub nuk ka humbje”.
“Pjesa më e madhe e humbjes është për shkak të projektit të ish-pronarëve për ridizajnimin e stadiumit, i cili është defunksionalizuar. Me pronarët e rinj, gjithçka ndryshoi dhe për këtë ka pasur shpenzime që në këtë rast po reflektohen me humbje. Nëse nuk do të kishin qenë këto ndërrime në pronësi dhe në pankinë, atëherë sigurisht se do të kishim qenë në profit të madh”, ka deklaruar Ayre për Liverpool Echo.