Thaçi ‘konfrontohet’ me opozitën

Kryeministri, Hashim Thaçi në seancën e Kuvendit të Kosovës i është drejtuar deputetëve lidhur me situatën e tensionuar në veri, duke theksuar se nuk mund të pajtohet me thirrjet e disa deputetëve për përdorimin e forcës shtetërore për veriun e vendit, ndërsa gjatë seancës Thaçi është ‘konfrontuar’ ashpër me qëndrimet e opozitës.
Ai para deputetëve të Kuvendit theksoi se i kupton emocionet e qytetarëve dhe reagimet e deputetëve të emocionuar në lidhje me veriun, mirëpo theksoi se nuk mund të pajtohet me thirrjet e disa deputetëve për përdorimin e forcës në veri.
Kjo deklaratë e Thaçit vjen pas prononcimeve të ndërkombëtarëve të cilët kundërshtojnë ashpër përdorimin e forcës në veri dhe përsëritjen e 25 korrikut për kthimin e sundimit të ligjit.
Për kreun e ekzekutivit kosovar integriteti territorial i Kosovës është i pacenueshëm, i njohur dhe i pranuar ndërkombëtarisht. “Kosova është një dhe e pandarë”, tha Thaçi.
Ai tha është zhgënjyese kur deputetët, duke iu referuar atyre të opozitës i kërkojnë kryeministrit të jetë në kuvend për gjendjen në veri, ndërkaq kur kryeministri del në foltore ata lëshojnë seancën dhe kjo, sipas tij, tregon se e tërë kjo nga opozita ka qenë me motive elektorale dhe nuk ka qenë interesi për gjendjen e sigurisë në vend.
Thaçi ka folur edhe për vrasjen e qytetarit Selver Haradinaj, të cilën e ka quajtur akt kriminal, ndërsa theksoi se janë duke u zhvilluar hetimet.
Kryeministri ka përmendur edhe arrestimin e policëve të Kosovës nga xhandarmëria serbe, duke thënë se nuk është e drejtë që përgjegjësia t’i adresohet qeverisë, pasi sipas tij, ata kanë qenë me uniformë zyrtare, të armatosur dhe janë kidnapuar në territorin e Kosovës dhe si rrjedhojë është dashur ta mbrojnë Kushtetutën dhe territorin e Kosovës.
Lidhur me akuzat për takimet e zyrtarëve kosovarë me atë serbë, Thaçi tha se të gjithë, edhe ata nga opozita janë takuar me zyrtarë serbë, prandaj tha se është mirë që takimet e tilla opozita të paktën t’i bëjë publike.
Deklaratat e Thaçit për gjendjen në veri dhe për çështje tjera vijnë pasi, të mërkurën në seancën e jashtëzakonshme për veriun opozita ka lëshuar seancën kur Thaçi ka filluar të flasë për veriun.
Deputetë opozitar kanë kritikuar ashpër Qeverinë e Kosovës se nuk po bën asgjë për veriun e Kosovës, madje sipas tyre gjendja është përkeqësuar krahasuar me vitet e mëhershme. Deputetët opozitarë po ashtu theksuan se zyrtarët qeveritar po harrojnë çfarë po deklarojnë, duke thënë fillimisht se do të mund të përsëritet 25 korriku për veriun, ndërsa tani thonë se nuk do të përdorin forcën.
Ndryshe, seanca po vazhdon me kritika të ashpra pozitë-opozitë, duke shkuar madje deri në atë masë, sa sipas tij opozita nuk do ta ketë rastin më të “shesë patriotizëm”.

Petrovic, vizitë në Monako

Zëvendëskryeministri i Kosovës, njëherësh ministër i Administrimit të Pushtetit Lokal, Slobodan Petrovic po qëndron për vizitë zyrtare në Monako ku ka pasur takime të rëndësishme zyrtarë dhe drejtues të lartë atje. Ai ka takuar Marie-Pierre Gramaglia - ministre për Zhvillim dhe Urbanizëm dhe Jose Badia - ministër i Punëve të Jashtme.
Gjatë takimeve me ministrat e Petrovic i ka informuar nikoqirët lidhur me progresin e arritur në Kosovë dhe aspekte të ndryshme të qeverisjes, zhvillimit ekonomik dhe kulturor dhe për mundësitë e investimeve në Kosovë. Ka pasur një mirëkuptim të plotë për zhvillimet pozitive të shënuara dhe për mundësitë konkrete të bashkëpunimit në të ardhmen, thuhet në kumtesën e lëshuar nga zyra për informim e MAPL.

Kjo është vizita e parë zyrtare, që një zyrtar i lartë i Qeverisë së Kosovës, takon strukturat drejtuese në Monako. Gjatë qëndrimit në Monako, zv.kryeministri Petrovic pritet të takohet edhe me Kryeministrin e Monakos. 

BE (nuk) e dënon dhunën ndaj shqiptarëve në Veri

Maja Kocijancic, zëdhënëse e përfaqësueses së Lartë të BE-së, Catherine Ashton, thotë se organi që ajo përfaqëson, i merr me shumë seriozitet ngjarjet e fundit të ndodhura në veriun e Kosovës.
E pyetur nga TCH se si shpjegohet mungesa e deklaratave dhe qëndrimeve të Brukselit në lidhje me vrasjen dhe incidentet e javëve të fundit në veriun e Kosovës, Maja Kocijancic, zëdhënësja e Përfaqësueses së Lartë Catherine Ashton u përgjigj se ka pasur disa qëndrime, para se të shpaloste atë të radhës për zhvillimet në vend.
“Ne kemi komentuar dhe e kemi bërë këtë nga disa nivele të ndryshme, nga këtu e deri në terren. Ju e dini se ne kemi të dërguarin e posaçëm, njëkohësisht kreu i Misionit të BE-së, si dhe EULEX-in atje dhe të gjithë kanë qenë shumë aktivë dhe e kanë bërë shumë të qartë se cili është qëndrimi ynë. Ne po i marrim shumë seriozisht zhvillimet e fundit dhe po i ndjekim nga shumë pranë. Ju përmendët humbjen e jetës, dhe ne shprehim keqardhje për humbjen e jetës në veri të Kosovës”, ka thënë Kocijancic për Top Channel.
Ajo tha gjithashtu se BE dënon të gjitha incidentet e kësaj natyre dhe “ajo që e kemi thënë me këmbëngulje është se të dyja palët duhet të tregojnë vetëpërmbajtje, të sillen me përgjegjësi dhe të vazhdojnë të punojnë me bashkësinë ndërkombëtare”.
“Ne besojmë se tensionet dhe provokimet që ne po shohim nuk i përputhen frymës së procesit të dialogut, por as frymës së integrimit evropian që kanë zgjedhur të dyja palët. Zotimi i të dyja palëve për t’u angazhuar në dialog tregon gjithashtu se ata dëshirojnë të përpiqen të zbusin dallimet në terren, në interes dhe për të mirën e qytetarëve. Dhe ne vazhdojmë të punojmë me të dyja palët për t’i parë të zbatuara të gjitha marrëveshjet e arritura në dialog”, ka theksuar zëdhënësja e Ashton-it.
Në faqen zyrtare të Përfaqësueses së lartë Catherine Ashton deklarata e fundit nga Brukseli për Kosovën është ajo e ndërmjetësuesit Robert Cooper, i cili dënonte më 5 prill gjuajtjen me gurë të një delegacioni serb që ndodhej në Prishtinë në kuadër të procesit të dialogut. 

Mposhtet Barca

Me rezultat 1-0 në favor të Bluve, ka përfunduar sfida e parë gjysmëfinale e Ligës së Kampionëve, mes Chelseat dhe Barcelonës, që u zhvillua të mërkurën mbrëma në Stamford Bridge.
Ashtu siç bëjnë gjithmonë, Blaugranët e dominuan ndeshjen që nga minuta e parë, megjithatë ishin Blutë ata që u treguan paksa më të rrezikshëm në fillim të takimit.
Rastin e parë të vërtetë e pati Alexis Sanchez, i cili e paraboloi portierin Cech, por topin e goditi transversalen. Menjëherë pas, John Terry ka mundur t’i dënojë mysafirët, mirëpo nuk u tregua i efektshëm në zonë. Pasiguria në mbrojtje ka mundur t’u kushtojë katalunasve, megjithatë ishte Dani Alves ai që disa herë i shpëtoi dy qendërmbrojtësit, Puyol e Mascherano.
Nga ana tjetër, faza ofensive e mysafirëve vazhdonte të jetë e jashtëzakonshme. Përmendim një rast të mirë të Cesc Fabregas dhe goditjen me kokë të Lionel Messit. Ishte po Fabregas që mundi ta kalojë Barcelonën në epërsi kah fundi i pjesës së parë, mirëpo Ashley Cole shpëtoi gol të sigurt.
Përkundër lojës më të mirë të Barcelonës, suksesi në 45 minutat e para ishte në favor të Chelseat. Pas një kundërsulmi të shpejtë të Bluve, Didier Drogba pranoi një top nga Ramires për t’i çuar në ekstazë tifozët vendas (45’+2).
Në gjysmën e dytë skuadra mysafire vazhdoi ta administronte lojën në tentativë për të realizuar, mirëpo mbrojtja vendase ishte shumë e sigurt.
Leo Messi tentoi disa herë që të bënte diçka, por pa sukses. Mbrojtësi i krahut Adriano provoi depërtimin dhe goditjen, ndërsa në vend ishte Cech.
Nga rastet më të mira të kësaj pjese ishte ai i Alexis Sanchez, kur Fabregas i dërgoi një top të mrekullueshëm, por kiliani u vonua më shumë sa që duhej.
Salomon Kalou ka mundur shumë lehtë ta dyfishojë epërsinë e vendasve, megjithatë e dërgoi topin përmbi portë. Nga ana tjetër, Cech bëri një intervenim vendimtar kur pas një goditjeje të lirë të Messit, Puyol pati rast ta barazonte rezultatin. Një rast të bukur për të shënuar e pati edhe Pedro në minutat shtesë, por topi e goditi vetëm shtyllën.
Ndeshja kthyese që zhvillohet në Camp Nou do të vendosë se kush do të luajë në finale. Kjo nuk është një epërsi që nuk mund ta përmbysë Barcelona, ndërsa pozitive për Chelsean është mospranimi i golit në terren të vet.

Robben i kënaqur për interesimin e Juves

Anësori i Bayern Munichut, Arjen Robben, është i entuziazmuar që po lidhet me një kalim te Juventusi.
Klubi nga Torino konsiderohet si destinacion i mundshëm i holandezit nëse ai vendos të largohet nga Allianz Arena, ndërsa 28-vjeçari është i kënaqur që Bianconerët interesohen për të.
“Jam i lumtur te ky klub, por ende nuk kam nënshkruar kontratë të re dhe në futboll gjithçka mund të ndodhë”.
“Juventusi po kalon një sezon të shkëlqyer. Ata kanë ndërtuar një skuadër të re, që është shumë e fortë dhe janë përmirësuar shumë”.
“Jam i kënaqur që një klub si ky po interesohet për mua”, ka thënë Robben për Sky Sport Italia.

Mourinho lavdëron Guardiolën

Trajneri i Real Madridit, Jose Mourinho, e ka përshkruar rivalin e Barcelonës, Pep Guardiola, si një “djalosh të mençur”.
Pas disfatës nga Bayern Munich në takimin e mbrëmshëm, Mourinho është pyetur për të dhënë mendimin e tij për trajnerin e Barcelonës.
“Ai është një djalosh i mençur dhe e di se si t’i fitojë ndeshjet në ligë si edhe në Ligën e Kampionëve. Ai e di saktësisht si duhet bërë kjo”, ka thënë Mourinho. 

Cech: Edhe Messi është njeri

Portieri i Chelseat, Petr Cech, është i bindur se skuadra e tij do të mund të përballet me rrezikun që do të paraqesë Lionel Messi në gjysmëfinalen e Ligës së Kampionëve.
“Nuk jam i shqetësuar për Xavin ose Iniestan... Për mua, Busquets dhe Messi janë ata që Chelsea duhet t’i ndalë”.
“Messi me formën e tij aktuale është rrezik i madh. Ai është padyshim njëri nga lojtarët më të mirë në botë, por kam thënë edhe më parë se nuk ka skuadër të pamposhtur”.
“Teknika e tij me top është e jashtëzakonshme, por më e rëndësishmja, ai mund të reagojë ashtu si të zhvillohet ndeshja. Edhe në momentin e fundit të mundshëm në çdo situatë, ai mund ta gjejë zgjidhjen ideale. Ka shumë mënyra se si Messi mund ta përfundojë një sulm”.
“Mirëpo, nga ana tjetër, edhe ai është njeri dhe nëse luajmë me 100 për qind, do të jemi në gjendje të mbrohemi nga ai”, ka thënë çeku për faqen zyrtare të tij.

Materazzi rreth Del Pieros: Nuk ka respekt në futboll!

Ish-mbrojtësi i Interit dhe Italisë, Marco Materazzi, e ka akuzuar Juventusin rreth trajtimit që po i bën kapitenit, Alessandro Del Piero, duke thënë se Bianconerët duhet t’ia mundësojnë legjendarit që t’i kompletojë 20 vite me fanellën bardhezi.
Drejtuesit e Zonjës së Vjetër kanë deklaruar se nuk kanë më nevojë për lojtarin që ia fali karrierën këtij klubi, madje duke luajtur edhe në Serie B, ndërsa Materazzi ka reaguar për të thënë se ikona bardhezi meriton më shumë respekt.
“Kjo nuk më befason. Mirënjohja në futboll ka vdekur për vite të tëra”.
“Mendoj se Alex mund t’i kalonte 20 vite te klubi i njëjtë, gjë që do të ishte një arritje historike, mirëpo drejtuesit e Juves ishin të qartë dhe Del Piero nuk është i marrë”, ka deklaruar Materazzi përSky Sport Italia.
Del Piero iu bashkua Juventusit në vitin 1993 nga Padova, ndërsa në ndeshjen ndaj Lazios arriti shifrën prej 700 paraqitjesh me këtë fanellë.

Nesta: Nuk shkoj te Juventusi

Qendërmbrojtësi i Milanit, Alessandro Nesta, ka heshtur spekulimet që e lidhin atë me një kalim te Juventusi.
“Do të shohim, se çfarë do të bëj për të ardhmen time do të vendos në fund të sezonit”.
“Me siguri se nuk do të shkoj te Juve, kjo është e qartë. Gjithçka që është shkruar, nuk është e vërtetë. Unë nuk kam agjent, prandaj nëse dikush më dëshiron, duhet të flasë drejtpërdrejtë me mua”.
“Askush nuk më ka kontaktuar, nuk kam nevojë të shkoj te Juve dhe ata nuk kanë nevojë për mua. Nuk ka kurrfarë problemi për këtë”, ka thënë Nesta për Milan Channel.

Puna e prokurorisë vlerësohet e shkëlqyeshme!

Prokuroritë e Republikës së Kosovës, në vitin 2011 kanë ngritur dhe avancuar punën e tyre në të gjitha aspektet, atë të efikasitetit, azhuri tetit dhe kualitetit. Ato kanë punuar me 61% të kapaciteteve të prokurorëve dhe me mungesë të theksuar dhe adekuat të stafit mbështetës.
 Kështu tha të mërkurën kryeprokurori i Shtetit, njëherësh kryetar i Këshillit Prokurorial të Kosovës, Ismet Kabashi, në ceremoninë e prezantimit të raportit të punës së prokurorive të Republikës së Kosovës për vitin 2011.
“Rezultatet sa i përket efikasitetit të punës janë të shkëlqyera. Çdo prokuror komunal mesatarisht ka zgjidhur 647 kallëzime penale, ndërsa ata të qarkut mesatarisht nga 119 kallëzime penale. Duhet të veçoj se prokuroritë me efikase të shkallës së parë janë ajo komunale e Gjilanit me 997 kallëzime mesatarisht për një prokuror dhe ajo e qarkut në Prishtinë me 175 kallëzime për një prokuror”, ka thënë Kabashi duke shtuar se Prokurorët në Zyrën e Prokurorit të Shtetit kanë kryer 99% të lëndëve të pranuara në punë.
“Rezultatet e punës sa i përket kualitetit janë po ashtu të shkëlqyera. Gjatë vitit raportues prokuroritë kanë akuzuar 25.865 persona. Lidhur me këto dhe akuzat nga vitet e më parme gjykatat kanë marrë vendime të shkallës së parë kundër 20.705 personave prej të cilave vetëm 286 persona apo 1,6% të personave ndaj së cilëve kanë marrë vendime të shkallës së parë, kanë liruar nga aktakuza”.
Kabashi tha se për kualitetin e shkëlqyer të akuzimeve tregon edhe procedura që zbatohet pran gjykatës për konfirmimin e akuzues. Ai tha se nga të gjitha akuzuat e parashtruara, që i nënshtrohen procedurës së konfirmimit, nuk janë konfirmuar vetëm akuzuat kundër 83 personave, që është vetëm 1.5%, nga numri i personave të akuzuar me akte të tilla akuzuese.
Gjatë prezantimit të Raportit Vjetor të Prokurorive të Kosovës, kryeprokurorja e EULEX-it, Jaroslava Novotna, theksoi se puna prokuroriale në Kosovë ka shënuar progres të dukshëm, siç edhe është thënë në raportin vjetor. Ajo, gjithashtu, shtoi se EULEX-i është këtu për të kontribuar në avancimin e mëtejmë të këtij progresi. “Prokurorët e EULEX-it do të japin ndihmën e tyre edhe për dy vite të tjera dhe do të punojnë me juve në realizimin e objektivave të reja të misionit përmes mentorimit, monitorimit dhe këshillimit, si dhe mandatit tonë ekzekutiv”, tha Novotna.

Ambasadori Ismajli do të pritet nga presidenti Obama

Presidentja e Republikës e Kosovës, Atifete Jahjaga, ka zhvilluar të mërkurën një takim me ministrin e Punëve të jashtme të Republikës së Kosovës, Enver Hoxhaj dhe ambasadorin e ri të Kosovës në SHBA, Akan Ismajli.
 Presidentja Jahjaga dhe ministri i Jashtëm Hoxhaj diskutuan për marrëdhëniet e shkëlqyeshme në mes të Shteteve të Bashkuara të Amerikës dhe Republikës së Kosovës dhe i dhanë mbështetje në misionin e tij, ambasadorit të ri në SHBA, Akan Ismjali.
Me këtë rast, ambasadori Ismajli ka marr letrat kredenciale nga presidentja e Republikës së Kosovës, Atifete Jahjaga. Kjo e fundit e udhëzoi ambasadorin Ismajli që t’ia përcjell dëshirat e saj më të mira presidentit Barack Obama për popullin e Shteteve të Bashkuara të Amerikës dhe përkushtimin e Republikës së Kosovës për të avancuar dhe dinamizuar marrëdhëniet speciale ndërmjet dy vendeve.
Ambasadori Ismajli pritet që me 2 maj 2012 t’ia dorëzoi letrat kredenciale presidentit të Shteteve të Bashkuara të Amerikës, Barack Obama. Para nisjes për në Shtetete e Bashkuara, Ismajli do të ketë takime edhe me kryeministrin e Republikës së Kosovës, Hashim Thaçi, me kryeparlamentarin Jakup Krasniqi dhe ministrin e Punëve të Jashtme, Enver Hoxhaj.

Drews: Jo aksion si më 25 korrik 2011

Komandanti i KFOR-it, Erhard Drews, vlerëson se situata në veriun e Kosovës është tensionuar në prag të zgjedhjeve të Serbisë, ndërsa ka porositur të gjitha palët që ta ruajnë qetësinë.
Shefi i Trupave paqeruajtëse të NATO-së në Kosovë, gjenerali Drews, vlerësoi se situata në veri të vendit mbetet e tensionuar, ndërsa trupat e KFOR-it po e kryejnë punën e vet për t’i ofruar siguri popullatës në këtë pjesë të territorit të Kosovës.
“Kam ardhur këtu që t’i vizitoj ushtarët e KFOR-it që janë të vendosur te lagjja ‘Tre rrokaqiejt’. Pas shpërthimeve gjendja është qetësuar dhe u jam shumë mirënjohës ushtarëve të mi që me prezencën e tyre kanë krijuar një mjedis të sigurt. Do të ketë ushtarë aq sa unë e shoh të nevojshme. Nuk do të kisha thënë që pas ngjarjeve të fundit gjendja është përkeqësuar, por ne duhet të theksojmë se gjendja vërtetë është e tensionuar dhe secili për vete është pak sa i nevrikosur dhe secili qytetar po tensionohet më shumë aq sa po afrohen zgjedhjet serbe”, tha gjenerali Erhard Drews, për RTV21.
Gjenerali i KFOR-it, Erhard Drews kërkoi nga Qeveria e Kosovës që të jetë e përmbajtur dhe të mos ndërmarrë ndonjë aksion si ai i 25 korrikut të vitit të kaluar, duke marrë parasysh pasojat e këtij operacioni.
“Ne të gjithë i dimë pasojat e 25 korrikut të vitit të kaluar dhe nuk besoj që njëri prej nesh e dëshiron një rezultat të tillë. Dhe, unë kam besim të madh në maturinë e qeverisë së Kosovës dhe besoj që me këtë maturi duhet të veprojmë”, shton Drews. “Pra, unë kam besim të plotë në qeveri. Ata në mënyrë të pjekur duhet t’i shfrytëzojnë mundësitë për të parandaluar zgjedhjet e Serbisë në pjesën veriore dhe natyrisht të sillen në mënyrë të duhur dhe në koordinim me faktorin ndërkombëtarë”, ka shtuar ai.
Këto komente komandanti i KFOR-it i ka bërë pas vizitës në veriun e vendit, me ç’rast u takua edhe me serbët të cilët po qëndrojnë në tendat pranë barrikadës tek ura e Ibrit. 

Mourinho: Pep e di si ka fituar

Trajneri i Real Madridit, Jose Mourinho, ka përsëritur edhe një herë se Barcelona favorizohet nga gjyqtarët, si në La Liga, ashtu edhe në Ligën e Kampionëve.
“Guardiola është një djalosh i mençur dhe e di se si ka fituar aq shumë ndeshje në gara të ndryshme”.
“Ai e di me saktësi si ka arritur ta bëjë atë”, citon Sky Italia fjalët e portugezit. 

‘Po të mos ishte Messi – Ronaldo do të ishte më i miri’

Trajneri i Palmeiras, Luiz Felipe Scolari, ka thënë se Cristiano Ronaldo do të ishte futbollisti më i mirë në botë po të mos ekzistonte Lionel Messi.
Scolari, i cili e ka drejtuar Portugalinë gjatë viteve 2003-2008, ka thënë fjalë të mëdha për superyllin e Real Madridit.
“Disa njerëz nuk e duan, sepse është lojtar i shkëlqyer, është i bukur dhe ka bërë seks me shumë femra. Njerëzit bëhen xhelozë”.
“Gjëja e vetme e keqe për jetën e Ronaldos është Messi. Po të mos ishte ai, Ronaldo do të ishte lojtari më i mirë në botë për pesë vite rresht”.
“Ai është një person dhe një mik i shkëlqyer. Atij i pëlqen të bëjë shaka, mirëpo është një profesionist i jashtëzakonshëm”, ka thënë Scolari për Arena SporTV.

Torres: Ëndërron trofeun e LK

Sulmuesi i Chelseat, Fernando Torres, ka deklaruar se do të ishte një realizmi ëndrre sikur skuadra e tij të triumfonte në Ligën e Kampionëve.
Për të arritur në finalen e Munihut, Blutë fillimisht kanë punë me Barcelonën në kuadër të gjysmëfinales, ndërsa ndeshja e parë zhvillohet të mërkurën mbrëma në Stamford Bridge.
“I di ambiciet që ka ky klub në kuptimin e fitimit të Ligës së Kampionëve, por janë po të njëjtat ambicie që i kam edhe unë. Është diçka për të cilën kam ëndërruar si fëmijë”.
“Asnjëherë nuk kam menduar për fitimin e Kupës së Botës (me Spanjën), sepse mendoja se është e pamundur. Por tash e kam arritur atë dhe e di çfarë ndjenje është, prandaj fitimi i Ligës së Kampionëve do të ishte një realizim i ëndrrës”, ka thënë 28-vjeçari.

Brazil: Facebook e kalon Google

Gjatë muajit janar, Facebook e ka tejkaluar rivalin e saj, rrjetin social të Google, Orkut, në tregun Brazilian.
Mirëpo, gjatë këtij muaji, rrjeti më i madh social në botë – Facebook e ka tejkaluar në përgjithësi rivalin e saj Google në Brazil.
Të dhënat e Experian Hitwise tregojnë se Facebook ka pasur një rritje dramatike gjatë vitit të kaluar, ndërsa shërbimet e Google, siç është rrjeti social Orkut, tashmë është duke rënë në vizita, pasi që tani faqja rangohet si e treta në Brazil.
Megjithatë, statistikat thonë se rënia e Google në Brazil duket se ka ndodhur më ngadalë sesa rritja e shpejtë e Facebook. 

Thaçi: Kurrfarë zgjedhjesh serbe në Kosovë!

Nën drejtimin e kryeministrit Hashim Thaçi është mbajtur sot mbledhja e 70-të e Qeverisë së Republikës së Kosovës. Në hapje të mbledhjes, Thaçi ka thënë se nuk do të ndodh pretendimi i Serbisë për të mbajtur zgjedhje në Kosovë.
“Qëndrimi i Qeverisë së Republikës së Kosovës ka qenë është dhe do të mbetet shumë i qartë, Serbia me pretendimin e vet për të organizuar zgjedhje në Kosovë, nuk do t’ia arrij qëllimit”, pohoi Thaçi duke shtuar se Qeveria e Republikës së Kosovës do të përdorë gjithë mekanizmin e vet kushtetues dhe ligjor që diçka e tillë të mos ndodh.
“Kur flas se nuk do të mund të organizoj Serbia zgjedhje në Kosovë, flas edhe për zgjedhje lokale, edhe për zgjedhje të përgjithshme edhe presidenciale”.
Më pas Qeveria sipas rendit të ditës ka miratuar Projektligjin për Taksën Rrugore dhe Ekologjike të Automjeteve.

Gjini, Kuçit: Mos ke probleme me harresë

Në seancën e Kuvendit të Kosovës për gjendjen në veri, zëvendëskryeministri Hajredin Kuçi dhe shefi i Grupit parlamentar të AAK-së, Ardian Gjini kanë pasur një debat të ashpër.
E plotësuar: Pas deklaratave të Kuçit se Qeveria është kujdesshme për të mos i frikësuar qytetarët në veri, Gjini iu drejtua Kuçit, duke thënë se mos “ke probleme me amnezi”, pas sipas tij ditë më parë ka folur edhe për mundësinë e intervenimit në veri, ndërsa tash për kujdes që të mos i frikësojnë qytetarët atje.
Pas kësaj, ishte reagimi i Kuçit i cili theksoi “di edhe unë të flas si në rrugë po nuk ma lejon kultura”.
Kuçi u shpreh se memorien e ka të zhvilluar shumë mirë, por tha se nuk do ta përdorin logjikën e frikësimit të qytetarëve, por të shkelësve të ligjit.
Duke folur për veriun, Kuçi iu drejtuar Gjinit “Pse se kryjshi çështjen e veriut sa ishit në pushtet...”.
Kuçi në këtë seancë duke folur për veprimet atje, tha se nuk janë institucionet e Kosovës që i dhënë urdhër EULEX-it e KFOR-it, por kanë bashkëpunim me këto institucione.
Ai deklaroi se çelësi i problemit është në Beograd.
E plotësuar: Partitë opozitare në seancën e jashtëzakonshme të Kuvendit të Kosovës për veriun theksuan se gjendja atje është më e keqe se disa vite më parë, ndërsa theksuan se shpëtimi i vetëm i vendit është dorëheqja e kësaj qeverie që sipas tyre ka përkeqësuar çdo çështje.
Shefi i Grupit parlamentar të Lidhjes Demokratike të Kosovës, Ismet Beqiri theksoi se gjendja në veri të Mitrovicës është e rëndë. Ai deklaroi se atje vazhdon të mos funksionojnë institucionet e shtetit, ndërsa qytetarët po terrorizohen dhe kjo sipas tij ka një adresë, Beogradin që është financues.
Ai kërkoi disa veprime urgjente, si funksionimin e gjykatave, mbrojtjen e jetës së qytetarëve dhe qarkullimin e lirë në veri, presion për lirimin e shqiptarëve të arrestuar në Serbi, të nxirren para ligjit bashkëpunëtorët ekomomik me kriminelët e veriut, EULEX-i e KFOR-i t’i ushtrojnë detyrat sipas mandatit, etj.
Edhe Visar Ymeri, shef i Grupit parlamentar të Vetëvendosjes tha se po të kishin qenë këta deputetë të sinqertë dhe po ta kishin menduar vërtetë se situata në veri është e jashtëzakonshme atëherë do ta nënshkruanin kërkesën e tyre për seancë të jashtëzakonshme javën e kaluar.
“Po na thuhet se veriu në njëfarë forme funksionon kështu siç është që prej vitit 1999. Por kur kthehemi pak në histori do ta shohim se tërheqja e institucioneve të Kosovës nga atje është bërë gradualisht dhe me hapa. Sikur të ketë qenë e planifikuar...”, u shpreh Ymeri.
“Një pjesë e konsiderueshme e tyre ka ndodhur në Kosovën me të njëjtin kryeministër, Hashim Thaçin. Tash e katër vite e gjysmë të drejtimit të qeverisë nga ai strukturat ilegale të Serbisë janë toleruar vazhdimisht të veprojnë, terrorizojnë, vrasin, dhunojnë e plaçkitin çdo gjë shtetërore, publike e private në atë pjesë të vendit. Njëlloj sikur në kohën e qeverive të mëparshme. Tash e katër vite e gjysmë kjo qeveri e ka përkeqësuar çdo gjë në të cilën ka prekur, por edhe ato aspekte ku ajo nuk ka vepruar. E tash deputetët e saj na thërrasin në seancë, për ta zëvendësuar mungesën e veprimit qeveritar e institucional atje”, tha ai, duke shtuar se kjo qeveri e ka vetëm një mënyrë për ta shpëtuar Kosovën, e kjo sipas tij, është dorëheqja e saj.
Ndërkaq, shefi i Grupit parlamentar të Aleancës për Ardhmërinë e Kosovës, Ardian Gjini se veriu i Kosovës është reflektim i qeverisë. Ai tha se qeveria çdo gjë që e ka bërë ka qenë false, duke u zhveshur kështu Kosovën prej mundësisë për t’u marrë me veten.
Duke iu referuar raportit të ministrit Rexhepi, shefi i GP-së së AAK-së tha se Qeveria e Kosovës tërë kohën e shfrytëzon për të kamufluar, për t’i hedhur hi syve qytetarëve të vendit dhe për Qeverinë tha Gjini për çdo gjë të gjithë kanë faj përveç atyre.
Sipas tij, akuzimi i Serbisë për çështjet në veri është paaftësi e institucioneve për t’u marrë me problemet.
Duke shprehur qëndrimin se siguria në veri është më e keqe, veriu më pak i integruar, strukturat ilegale më të sigurta, më pak shqiptarë në veri se në vitin 2008, Gjini tha se me këtë qeveri në pushtet Kosova po shkon drejt zhbërjes, për atë që është munduar me shekuj. 

Loja e rrezikshme me tela gjemborë

Grupe serbësh, në orët e vona të së martës kanë vendosur tela gjemborë te barrikada në hyrje të fshatit Rudar të Zveçanit. Në këtë mënyrë nga ana jugore pengohej qarkullimi i banorëve shqiptarë të tri fshatrave të Zveçanit: Zhazhë, Boletin dhe Kelmend.
Banorët e këtyre fshatrave kanë larguar telat nga aty. Fatmir Kelmendi, përfaqësues i fshatit Kelmend, thotë se këto veprime të strukturave ilegale serbe e kanë tensionuar shumë situatën.
Banorët i kanë vërejtur serbët rreth orës 19:30 duke vendosur telat gjemborë në hyrje të rrugës, që shpie për këto tri fshatra.
“Kjo ka ndikuar në tensionimin e situatës, meqë banorët e këtyre tri fshatrave e kanë rrugën kryesore atë, e cila para dy vjetësh ishte asfaltuar me mbështetje të Qeverisë së Kosovës”, ka sqaruar ai, transmeton koha.net.
Serbët janë vendosur matanë barrikadës, ka thënë Kelmendi, i cili më tej ka shtuar se për këtë rast ka lajmëruar edhe Policinë e Kosovës, e cila ka dalë në vendin e ngjarjes.
Disa orë pas largimit të telave, serbët prapë i kanë rivendosur ato, për t’u larguar sërish nga shqiptarët. Kjo ka ndodhur disa herë gjatë natës.
Kelmendi shtoi se pos Policisë së Kosovës, KFOR-i dhe EULEX-i nuk kanë dalë fare në terren.

PK do t’i ndalojë zgjedhjet lokale serbe!

Ministri i Brendshëm i Kosovës Bajram Rexhepi, tha se Policia e Kosovës nuk do të lejojë mbajtjen e zgjedhjeve lokale serbe në Kosovë.
Në një deklaratë për radion "Kontakt Plus" të Mitrovicës, ai tha se policia me ndihmën e KFOR-it dhe të EULEX-it do të bëjë gjithçka që të ndalohen këto zgjedhje dhe se gjatë intervenimit nuk do të ketë përshkallëzim të situatës.
"Nuk e besoj. Ne do të fokusohemi në konfiskimin e materialeve dhe në veprimet preventive që janë me ligj të rregulluara. Nuk duam tensione, por edhe ata që organizojnë zgjedhjet duhet të jenë më të arsyeshëm," tha ministri.
Rexhepi nuk specifikoi se kur do të kryhet aksioni i policisë, duke theksuar se kjo është pjesë e planit operativ për të cilin nuk mund të paraqes detajet. 

Zhvillimet në veri, praktika të kohës së Milosevicit

Kryeministri i Shqipërisë, Sali Berisha, duke folur për zhvillimet në veri të Kosovës, tha mbrëmë se bëhet fjalë për "rikthimin e praktikave tipike të kohës së Milosevicit - policë të shtrirë dhe të lidhur si armiq, një akt terrorist ndaj një qytetari dhe familjes së tij".
Berisha po ashtu deklaroi se megjithëse Serbia ndodhet në një periudhë elektorale, veprimet e tilla absolutisht nuk mund t'i justifikojë.
Ai tha se shpreson që marrëveshja e arritur në Bruksel, të zbatohet në interesin më të mirë të Prishtinës dhe Beogradit. "Vlerësoj faktin që Beogradi hoqi dorë nga zgjedhjet lokale në Veri të Mitrovicës", citohet të ketë thënë Berisha.
Edhe për problemet e shqiptarëve në Preshevë, Bujanovc dhe Medvegjë Berisha tha se edhe ato janë në përputhje me të gjithë dokumentet ndërkombëtare.
"Mendoj që këto komuna meritojnë dhe do të kenë një mbështetje më të madhe nga qeveria shqiptare në interes të zhvillimit të tyre dhe qëndrimi ynë ndaj kufijve është shumë i qartë. Ne jemi për respektimin e plotë të kufijve aktualë", theksoi Berisha në një konferencë me gazetarë. 

Ndeshja Juve-Roma shitet për 40 minuta

Biletat për ndeshjen në të cilën Juventusi do ta presë në fushë të vet Romën janë shitur krejtësisht.
Janë dashur më pak se 40 minuta që të gjitha biletat e dala në shitje dje për këtë ndeshje të harxhohen.
Shitjet ishin shtyrë deri dje pasdite pasi Federata Italiane nuk e kishte konfirmuar kohën dhe datën e takimit.

Ribery: Ende nuk jemi në finale

Franck Ribery ka paralajmëruar bashkëlojtarët e tij të Bayern Munich të mos gëzohen para kohe pasi ata ende nuk janë kualifikuar në finale të Ligës së Kampionëve pavarësisht fitores 2-1 ndaj Real Madridit.
“Mendoj se fitorja në shtëpi ndaj Madridit ishte e rëndësishme për vetëbesimin tonë. Ishte shumë kënaqësi, veçanërisht me publikun që na mbështeti, por ne jemi vetëm në gjysmë të rrugës. Ndeshja në Madrid do të jetë, shumë, shumë e vështirë”.
“Nuk mendoj se goli i tyre do të ndryshojë shumë sa i takon taktikave tona në ndeshjen e kthimit. Ne do të qëndrojmë kompakt, siç bëmë sonte. Madridi do të duhet të na sulmojë neve dhe kjo duhet të na japë mundësi në kundërsulme”, ka thënë francezi për UEFA.

Busquets: Do ta sulmojmë Chelsean

Sergio Busquets thotë se Barcelona nuk do ta ndryshojë stilin e zakonshëm sulmues të lojës për ndeshjen e parë gjysmëfinale të Ligës së Kampionëve ndaj Chelseat që zhvillohet sonte në Stamford Bridge.
“Sfida jonë është ta ruajmë stilin dhe sistemin tonë të lojës dhe të harrojmë në atmosferën. Ne duam të shënojmë gola, pasi kjo e bën më të lehtë të përballemi në ndeshjen e kthimit”.
“Chelsea është një klub i madh dhe gjysmëfinalja do të jetë e tillë. Asnjë skuadër nuk është favorit i pastër në këtë shkallë të garës. Njerëzit mund të na shohin neve si favoritë, por ne duhet të mbetemi të fokusuar nëse dëshirojmë të arrijmë në finale”, ka thënë Busquets për Daily Mirror. 

Ibra i bindur se Juve do të rrëshqasë

Sulmuesi i Milanit, Zlatan Ibrahimovic, është i bindur se Juventusi do të humbë pikë para fundit të sezonit.
Juve është një pikë para Milanit në tabelën e Serie A me edhe gjashtë ndeshje të mbetura deri në fund të sezonit.
“Ka edhe gjashtë ndeshje në ligë dhe ne do të bëjmë gjithçka për të nxjerrë maksimumin e pikëve. Ne jemi këtu dhe duhet të mbetemi të fokusuar dhe të përgatitemi mirë për secilën ndeshje”.
“Ne mund të kemi një pikë më pak, por nëse përqendrohemi, mund ta kthejmë avantazhin. Ndeshjet e kaluara kundër Catanias dhe Fiorentinas ishin të tilla që duhej t’i kishim fituar”.
“Është e rëndësishme që të mos përsërisim ato gabime dhe të japim më të mirën nga vetja në ndeshjet e ardhshme. Shpresoj se ne do të kthehemi në fushë të dielën dhe se unë do të shënoj”, ka thënë suedezi. 

Cesc: Barca ishte zgjidhje e qëlluar

Ish-kapiteni i Arsenalit, Cesc Fabregas, është i ngazëllyer me vendimin për t’u rikthyer në shtëpi te Barcelona, nga ku u largua si 10-vjeçar në vitin 1997.
Fabregas, i cili iu bashkua Barcelonës verën e kaluar në një marrëveshje e cila raportohet se ka arritur shifrën e 40 milionë funteve, thotë se në Nou Camp ai po e jeton ëndrrën.
“Është më mirë se që kam pritur dhe kam luajtur shumë më shumë se që kam pritur”.
“Erdha këtu të mësoj, të bëhem lojtar dhe person më i mirë dhe po ashtu të përjetoj javë si kjo – Chelsea në gjysmëfinale të Ligës së Kampionëve, pastaj Real Madridin në një ndeshje në të cilën, nëse fitojmë, kthehemi në garën për titull, të pasuar sërish nga Chelsea”.
“Kjo e gjitha është diçka e re për mua. Bashkëlojtarët e mi janë mësuar më shumë, por për mua ta përjetoj këtë situatë është ëndërr. Kam mësuar shumë taktikisht. Tash e di pozitën time në fushë. Ndjehem më i pjekur si lojtar”, ka thënë Fabregas. 

Di Matteo: Duhet të jemi të përkryer

Menaxheri i Chelseat, Roberto di Matteo, thotë se ata duhet të jetë “të përkryer” për të pasur ndonjë shans të mposhtin rivalin e sotëm të Ligës së Kampionëve, Barcelonën.
“Është e drejtë të thuhet se ne kemi nevojë për dy ndeshje të përkryera. Por mendoj se fakti që ne kemi luajtur mirë në gjashtë javët e kaluara na jep neve besim se mund të bëjmë dy ndeshje të përkryera në këtë sfidë”.
“Është sfida më e madhe për cilido menaxher të luajë kundër skuadrës më të mirë në botë, por edhe për çdo lojtar të jetë në gjendje të garojë me një prej skuadrave më të mira në botë”, ka thënë Di Matteo.

Në Munich vidhen këpucët e lojtarëve të Realit

Dhoma e zhveshjeve e Real Madridit në Allianz Arena kishte qenë cak i vjedhësve para ndeshjes së mbrëmshme të Ligës së Kampionëve përballë Bayern Munich.
Gjashtë palë këpucë, përfshirë tre të cilat i takonin Cristiano Ronaldos ishin vjedhur në objektin e Bayernit disa minuta para fillimit të ndeshjes.
Klubi gjerman ende nuk ka dhënë deklaratë për incidentin, ku edhe Mesut Ozil dhe Karim Benzema i humbën këpucët e tyre, pavarësisht se dhoma e veshjes ishte e monitoruar përmes kamerave.

Aragona Band në bashkëpunim me Rozana Radin

Bendi kosovar Aragona Band kanë përgatitur projektin e tyre më të ri muzikorë. Kësaj radhe grupi vjen në bashkëpunim me këngëtaren nga Shqipëria, Rozana Radi.
Gjatë një prononcimi për Telegrafi, Shpend Haxhijakupaj, anëtar i Aragona Band, ka pohuar se kënga është incizuar dhe së shpejti pritet të shoqërohet edhe me videoklip.
Kënga titullohet “Tepër jemi dashtë” dhe është punuar nga Kico Beatz, ndërsa teksti është shkruar nga Rozana.
Aragona Band, së fundmi kanë realizuar këngën “Vajza anonime”, e cila është pritur mjaft mirë nga publiku.

Bieber nuk do të bëhet reper

Justin Bieber thotë se ai nuk do të lansojë karrierë të reperit pasi kjo muzikë nuk dëgjohet gjithkund.
18-vjeçari thotë se pavarësisht se e pëlqen muzikën rep, ai kurrë nuk do t’i shfrytëzojë aftësitë e tij për të realizuar incizime në këtë zhanër, pasi ka frikë se mund t’i humbasë disa nga fansat e tij.
“Shumë vende nuk e dëgjojnë muzikën rep. Kjo është shumë më e madhe në Shtetet e Bashkuara dhe Kanada por jo gjithkund tjetër”.
“Unë jam këngëtar – ky është pasioni im, të bëj rep është diçka që më pëlqen ta bëj për kënaqësi”, ka thënë Biebeer.