Ferguson: Dështimet kritikohen nga tifozët

Bosi i Manchester United, Sir Alex Ferguson, ndjen se tifozët do ta kritikonin dhe ndoshta do të kërkonin largimin e tij në rast të rezultateve të dobëta të ekipit.
“Mendoj se po. Ata do të kërkonin përgjegjësi. Është një ndryshim i shoqërisë në ditët e sotme. Unë kam folur disa herë për fotografinë kontraverse në fushë kur u luajt United - Leeds dhe në prapavijë tifozët ishin pasivë. Kjo sot nuk do të ndodhte”.
“Ne bëmë mirë që pushuam Scholesin të mërkurën. Nuk është dukur e mirë kjo për tifozët pas disfatës, por pasi kemi ndeshje tjetër tri ditë më vonë, mendoj se kemi bërë gjënë më të mirë duke pushuar Scholesin”, ka potencuar Ferguson. 

Maradona: Bayerni do ta mposhtë Realin

Legjenda argjentinase, Diego Maradona, ka kritikuar klubet evropiane dhe ka parashikuar që Bayerni i Munichut do ta tejkalojë Real Madridin në gjysmëfinale të Ligës së Kampioniëve.
Argjentinasi i cili është dhe mik i ngushtë i Jose Mourinhos, trajnerit të Realit, e sheh Bayernin e Munichut në finale pas dy ndeshjeve që do të zhvillohet në dy javët e ardhshme.
“Në rastin e Bayernit, klubi është 9% në pronë nga Adidas, 9% nga Audi, 82% nga partnerët dhe aksionerët e tjerë. Bayerni është një kompani aksionare private, ku tifozët janë bosat e vërtetë. Për këtë arsye klubi mund të shpenzojë aq sa fiton dhe sukseset vijnë në fushë dhe në fushën e marketingut”.
“Finalja në mënyrë aksidentale do të luhet në Allianz Arena, shtëpinë e Bayernit të Munichut, e ku bavarezët janë favoritë për të fituar ndaj Barcelonës”, ka deklaruar Maradona.

Forlan: Ende s’keni parë Forlanin e vërtetë

Sulmuesi i Interit, Diego Forlan, ka deklaruar se ai ende nuk ka arritur të adaptohet te gjiganti italian, por thotë se së shpejti të gjithë do të shohin se kush është ai.
“Njerëzit nuk e kanë parë ende Forlanin e vërtetë që prej ardhjes time te Interi. Unë mezi pres të bëj më mirë, kështu edhe tifozët. Unë jam i lumtur në klub, më pëlqen qyteti dhe tifozët kanë qenë të mirë me mua”.
“Ky ka qenë sezon i vështirë për shkak të lëndimeve të mia dhe rezultateve të klubit. Nuk dua të largohem nga Interi në këtë moment, më pëlqen sfida. Unë gjithmonë e kam dashur Interin dhe tani kam rastin për të bërë mirë. Dua të qëndroj dhe të luaj mirë”, ka thënë Forlan. 

Beyonce i shkruan letër respekti Michelle Obamës

Pop ylli, Beyonce, e cila konsiderohet si “Zonja e Parë e Pop muzikës” i ka shkruar një letër të hapur Zonjës së Parë të SHBA-ve, Michelle Obamës, ku ka shprehur admirimin dhe respektin për të.
Letra e cila ishte skanuar dhe postuar në web faqen e Beyonces, e përshkruan zonjën Obama si shembull ultimativ të një femre të fortë amerikane.
Më tej Beyonce e përshkroi zonjën Obama si një nënë të mirë, një grua e dashur dhe në të njëjtën kohë një zonjë e parë e jashtëzakonshme.
Nuk është e rastësishme që Beyonce ka shfaqur admirim të tillë ndaj Michelle Obamës.
I pyetur së fundmi edhe presidenti i SHBA-ve, Barack Obama, se cili reper i pëlqen më shumë, Jay-Z apo Kanye West, Obama pa problem u përgjigj se Jay-Z atij i pëlqen më shumë sepse Kanye West ka sjelljet e gomarit.

20 vite nga Windows 3.1

Edhe pse Windows 3.1 jo vetëm se nuk ishte SO i parë me ndërfaqe grafike në PC dhe në botën kompjuterike në përgjithësi, ai nisi erën e cila po zgjat ende dhe është më meritori për rritjen e rrufeshme të Microsoftit si gjigant softuerik.
E vërtetë është se këtë rritje në kohë të fundit ka kompani që e tejkalojnë, pikësëpari Apple, por kjo nuk e minimizon rëndësinë e Windows 3.1 – që ishte Windowsi i parë që gjeti përdorimin në shkallë të gjerë dhe i pari me popullaritet të lartë.
Ishte ky sistemi i parë operativ i Microsoftit për kompjuterët PC i cili kishte shfuqizuar kompatibilitetin me “real mode” të procesorëve (8086/8088), të cilin e përkrahnin Windowsët e mëhershëm. Në vend të kësaj, ata punon në mënyrën e ashtuquajtur “standarde”, që ishte kompatibile me Intel 80286, respektivisht me 386-mode që përkrahej nga procesorët e klasës 80386 dhe ata kompatibil me atë.
Në PC ai solli edhe fontet TrueType të cilat vetëm një vit më herët kishte prezantuar Apple, pastaj Control Panelin, Regjistrin, OLE dhe shumë teknologji të tjera që edhe sot e kësaj dite janë pjesë e Windowsit. 

Bisedime për veriun do të ketë herët a vonë

Incidentet në Kosovë janë më të shpeshta. Serbët në veri të Kosovës e fajësojnë Prishtinën se kërkon një shtet brenda Serbisë, analistët thonë se Beogradi dëshiron të tregojë se veriut duhet t’i jepet status i veçantë.
Zyrtarët e Kosovës kanë paralajmëruar për mundësinë që Prishtina të ndërmarrë veprime në veri, të ngjashme me atë të 25 korrik të vitit të kaluar, kur është kryer aksioni për vendosjen nën kontroll të kalimit kufitar Bërnjak. Për Marko Jaksicin, një prej udhëheqësve politik të serbëve në veri të Kosovës, deklaratat e tilla janë luftënxitëse.
Jaksici thotë për DW se serbët duan të hetohet saktësisht se si ka ndodhur vrasja e Selver Haradinajt në pjesën veriore të Mitrovicës.
“Ne jemi kundër të gjitha ekseseve dhe incidenteve. Ajo çfarë ka ndodhur tek ‘Tre Rrokaqiejt’ është për keqardhje, prandaj ne kërkojmë, dhe shumica e serbëve e kërkojnë këtë, që të zhvillohet një hetim i paanshëm. Përveç kësaj të shihet gjithashtu ajo çfarë po ndodh me serbët pikërisht për shkak të zgjedhjeve të ardhshme lokale, e kam fjalën për numrin e incidenteve që ndodhën në Deçan, në Prishtinë, pastaj arrestimi i serbëve në Viti. Të gjitha këto flasin thjesht për atë se autoritetet në Prishtinë dëshirojnë t’i kthejnë serbët në qytetarë të klasës së dytë dhe të krijojnë shtet aty ku nuk ka pasur”, thotë Jaksic.
Nga ana tjetër, analisti politik Nexhmedin Spahiu vlerëson për DW-në se incidentet e fundit në veri ndodhin sepse Beogradi dëshiron të tregojë se veriut duhet t'i jepet një status i veçantë. Ai megjithatë është kundër aksioneve të reja të autoriteteve në Prishtinë, të cilat do të ishin të rrezikshme për jetën e njerëzve.
“Në veri është e nevojshme që të vendoset rendi dhe ligji, d.m.th. të kapen kriminelët dhe të dërgohen para drejtësisë, por në asnjë mënyrë ndonjë aventurë e llojit të 25 korrikut, e cila solli vetëm viktima dhe përkeqësoi situatën, e asgjë të mirë. Unë mendoj se veprimi i 25 korrikut ka qenë si i porositur nga Beogradi dhe gjë më të mirë ata nuk do të mund të bënin për politikën që luan Beogradi në lidhje me Kosovën dhe veriun e Kosovës”.
Situata në veri, sipas mendimit të Jaksicit nuk mund të zgjidhet pa pjesëmarrjen e Beogradit e as ndaras nga pjesët e tjera të Kosovës.
“Qëndrimi ynë është se bisedimet duhet të zhvillohen nën patronazhin e Këshillit të Sigurimit të OKB-së dhe në asnjë mënyrë në kuadër të Washingtonit dhe Brukselit”.
Analisti Spahiu vlerëson se për Veriun e Kosovës do të negociohet herët a vonë, por qeveria aktuale në Prishtinë nuk mund të jetë e suksesshme në zgjidhjen e situatës në veri. Spahiu shton gjithashtu se as të gjithë serbët nga veriu nuk mendojnë njëjtë.
“Kundër janë më shumë disa faktorë politikë, të cilët nuk lejojnë të arrihet një marrëveshje, përkatësisht tek një bashkëjetesë paqësore ndërmjet të gjitha bashkësive etnike në këtë rajon”, thotë Spahiu.

Robinho dëshiron të kthehet te Santosi

Presidenti i Santosit, Luis Alvaro Ribeiro, ka thënë se sulmuesi i Milanit, Robinho, mezi pret që të rikthehet te klubi brazilian.
28 vjeçari ka pasur një sezon frustrues te Milani duke shënuar vetëm nëntë gola në të gjitha garat këtë sezon. Rikthimi i tij te Santosi gjithmonë ka qenë i hapur, por tani presidenti i klubit brazilian vetëm sa ka shtuar spekulimet për një transfer.
“Mendoj se ekziston mudnësia që ai të mund të thotë ‘po’. Santosi dëshiron që kjo të ndodhë dhe kështu dëshiron edhe Robinho. Tani është në dorën e Milanit. Ne do të flasim me ta”, ka theksuar Ribeiro. 

Ronaldo të rinovojë kontratën?

Sulmuesi i Real Madridit, Cristiano Ronaldo, do të përballet me një zgjedhje të vështirë për të ardhmen e tij, pasi klubi mbretëror besohet t’i ketë ofruar superyllit portugez një super kontratë të re.
Mediat spanjolle raportojnë se Real Madridi ka në tavolinë ofertën për Ronaldon – një rinovim deri në vitin 2018 me përfitime prej 13 deri 15 milionë euro në sezon.
Cristiano Ronaldo vazhdimisht është lidhur me një rikthim te Manchester United dhe në asnjë moment nuk ka deklaruar se do ta rinovojë kontratën.
Superylli portugez ka shënuar 52 gola në të gjitha garat këtë sezon për Real Madridin dhe është në rrugë të mirë që të shpallet golashënuesi më i mirë në La Liga. 

Marotta: Del Piero do të largohet

Drejtori i Juventusit, Giuseppe Marotta, thotë se nuk ka gjasa që Alessandro Del Piero të qëndrojë te Zonja e Vjetër edhe një sezon.
“Del Piero është shembull. Nuk ka fjalë për të përshkruar atë që ai mund të bëjë në aspektin e emocioneve dhe paraqitjeve. Kampionët si Del Piero janë të rallë dhe është e pamundur që përnjëherë të gjejmë një futbollist sikurse ai. Na merr kohë për t’u bërë kampionë”.
“Kontratë e re? Ne nuk jemi të fokusuar në dinamikat e të ardhmes, ne jemi duke u përkushtuar për të tashmen. Tani për tani duam që të shndërrojmë ëndrrat në realitet”, ka deklaruar Marotta.

“Nuk kam menduar se ky Real do të ma thyejë rekordin”

Ish-trajneri i Real Madridit, John Toshack, ka thënë se ai ka menduar se rekordi i ekipit të tij mbretëror prej 107 golave në një sezon në La Liga në vitin 1990 nuk do të mund të thyhej kurrë.
Uellsiani udhëhoqi Los Blancos drejt titullit të La Ligas dhe atë me rekord të golave që mbetet i pa prekur edhe sot. Sidoqoftë, Real Madridi deri tani ka shënuar 104 gola në 32 ndeshje, ndërsa ekipi i Jose Mourinhos është shumë pranë rekordit të madh.
“Vite më parë unë u thosha miqve të mi dhe ish-kolegëve se rekordi prej 107 golave kurrë nuk do të thyhej, por ky është një ekip që ka gjithçka në duar të veta. Është e lehtë të thuash, por nuk është e lehtë ta arrish. Këto janë pothuajse 3 gola për ndeshje dhe Real Madridi e Barcelona janë ekipe mbi të gjitha të tjerat”.
“Atë vit kur thyem rekordin në La Liga ishim eliminuar në Ligën e Kampionëve nga Milani në tetor, kështu që kemi pasur më pak ndeshje. .Ne fituam kampionatin dhe mendoj se shënuam 16 gola në katër ndeshjet e fundit”, ka deklaruar Toshack.

‘Ringjallen’ Tupac dhe Nate Dogg

Sonte mbahet festivali Coachella, një prej festivaleve më të mëdha në botë, ndërsa ka pasur shumë fjalë për atë që kanë mundur të përgatisin dy prej reperëve elitarë, Snoop Dogg dhe Dr. Dre.
Reperët e lartpërmendur do të sjellin në skenë nga ‘varri’ dy reperët e ndjerë, legjendarin Tupac dhe Nate Dogg. Që të dy këta do të performojnë në skenën e festivalit si holograme, në atë që konsiderohet ribashkimi i gjithë krahut perëndimor të hip-hopit ‘West Coast’.
Nate Dogg vdiq vitin e kaluar pas një sëmundje, teksa Tupac është vrarë në Las Vegas në vitin 1996.
Besohet se edhe Eminem dhe Warren G do të jenë të pranishëm dhe do të performojnë në koncertin më të madh të repit të parë ndonjëherë. Artistët ishin të gjithë pjesë e ‘West Coast’, krah i hip-hopit ky i përfshirë në një luftë me rivalët e lindor ‘East Coast’ në vitet e 90-ta.
“Snoop Dogg dhe Dr. Dre duan që ky të jetë koncerti më i madh i hip hopit në histori. Teknologjia e hologramëve është shumë e përsosur. Mariah Carey e kishte përdorur këtë në një prej koncerteve të saj, por kurrë nuk është përdorur ashtu siç do të përdoret tani. Do të jetë fantastike, një prej festivaleve më të mira të të gjitha kohërave që do të mbahet mend një kohë të gjatë”, ka theksuar një burim.

2014 – mbi një miliard smartphone

Raporti i cili vjen nga analistët e një kompanie mjaftë të besueshme Credit Suisse, të cilët manipulojnë para dh të cilët nuk kanë zakon të gabojnë shumë kur ato janë në pyetje, thotë se këtë vit tregu i smartphoneve do të rritet për 46% në krahasim me vitin e kaluar dhe se do të shiten deri 690 milion sosh.
Nëse kjo ju duket shumë, ju themi se këto shifra janë të vogla në krahasim me parashikimin për vitin 2014 – atëherë sipas të njëjtit burim pritet të shiten 1.05 miliard copë.
Duhet cekur se përmbushja e këtij parashikimi varet nga tregu kinez i cili pritet të vazhdoj të rritet dhe deri më 2015 të përbëj 22% të tregut të smartphoneve.
Në raundin e njëjtë të parashikimeve Credit Suisse, për ndryshim nga shumë të tjerë, mendon se Nokia do të arrij të kthej lavdinë që e kishte dikur, dhe se vitin e ardhshëm do të filloj të kthehet në pozitat e mëhershme dhe se do të pushtoj krejtësisht 11% të mbarë tregut.
Parashikime të mira kanë dhënë edhe për Samsung dhe Huawei, ndërsa Motorola, HTC, Sony dhe RIM do të humbasin treg.

Fule: Kosova mbetet kusht për Serbinë

Komisionari për zgjerim i Bashkimit Evropian, Stefan Fule, ka thënë se normalizimi i mëtejshëm i marrëdhënieve të Beogradit me Prishtinën, mbetet kusht politik për Serbinë që të vazhdojë rrugën e integrimeve evropiane.
I pyetur nga Shërbimi i Ballkanit i Radios Evropa e Lirë se cilat janë shanset që Serbia deri në fund të vitit të marrë datën e negociatave për anëtarësim në BE, Fule ka thënë se ky proces “mund të zgjasë një muaj, por edhe katër vjet”.
Diplomati evropian ka thënë se nuk është e precizuar saktë nëse fusnota për përfaqësimin e Kosovës në nismat rajonale duhet të vihet para delegacionit të Prishtinës apo në dokumentet zyrtare të takimit të caktuar.
“Tani, gjatë fushatës zgjedhore në Serbi, ndoshta nuk është momenti i duhur që një gjë e tillë të precizohet, por menjëherë pas zgjedhjeve do t’i përkujtoj të dyja palët se çfarë saktësisht janë dakorduar – e jo secila nga to ta interpretojë marrëveshjen në mënyrën e vet”, ka thënë Fule.

SHBA: Inflacioni u ul gjatë marsit

Në Shtetet e Bashkuara të Amerikës (SHBA), inflacioni u ul pak gjatë muajit të marsit. Raporti i sotëm nga Departamenti i Punës thotë se çmimet u rritën 0.3 për qind në mars, një shifër pak më e ulët sesa ajo e muajit të kaluar.
Përveç sektorëve të paqëndrueshëm si ai i artikujve ushqimorë dhe energjia, çmimet në përgjithësi u rritën vetëm 0.2 për qind. Inflacioni i ulët i shton shanset që banka qendrore amerikane t’i mbajë përqindjet e interesave të ulëta siç janë aktualisht.
Interesat e ulëta kanë si synim të stimulojnë ekonominë duke ua bërë më të thjeshtë bizneseve që të marrin hua për të blerë pajisje, të ndërtojnë fabrika dhe të punësojnë.

Ju i lejuat

Zyrtarë ndërkombëtar të afërta me zhvillimet e fundit për ligjin e bankave, thonë se problemi nuk është të Ligji dhe Institucionet Mikrofinanciare, por të fakti se pse këto organizata u lejuan gjithë këto vite të realizojnë profit në mënyrë të paligjshme. Për këtë fajësojnë institucionet vendore. Ministri i Financave, Bedri Hamza, mohon që kjo ka qenë përgjegjësi e tyre.
 “Nuk është problemi të Ligji i ri për Bankat dhe Institucionet Mikrofinanciare. Por, te ajo se pse u lejuan gjithë këto vite OJQ’të të realizojnë profit nën statutin e institucioneve mikrofinanciare”.
Kështu i ka komentuar reagimet dhe kritikat rreth Ligjit për Bankat dhe Institucionet Mikrofinanciare një zyrtar i lartë ndërkombëtar në Kosovë, i cili është shumë i afërt me zhvillimet ekonomike në vend. Ai, në një bisedë për Express, ka thënë se si duket grupeve të caktuara po u konvenon që të çohet pluhur lidhur me këtë ligj, me qëllimin që të shmanget vëmendja nga esenca e këtij problemi.
“Nuk është problemi të ligji aktual, i cili e rregullon se si duhet të veprojnë institucionet mikrofinanciare në Kosovë. Problemi më i madh është nëse këto institucione deri tash e kanë respektuar ligjin në bazë të cilit kanë vepruar”, ka thënë ky zyrtar i lartë në kushte anonimiteti.
Edhe pse sponsorizues i Ligjit për Bankat dhe Institucionet Mikrofinanciare është Ministria e Financave, numri një në këtë ministri, Bedri Hamza, mohon që puna e institucioneve mikrofinanciare deri tash të ketë qenë përgjegjësi e dikasterit që ai drejton. Kjo më shumë ka qenë punë e Bankës Qendrore të Kosovës, e cila edhe e mbikëqyr sistemin financiar në Kosovë.

Të privilegjuarit e PTK-së

Derisa Bordi i Drejtorëve të Postës dhe Telekomit të Kosovës thonë se kanë të drejtë legjitime që të shfrytëzojnë veturat zyrtare dhe të marrin benificione nga kjo kompani publike të tjerat duket që nuk e kanë këtë privilegj. Zëdhënësi i Korporatës Energjetike të Kosovës, Viktor Buzhala thotë se kjo korporatë nuk ka përfitime të tilla.
 “Kompensimi bëhet në përputhje të plotë me Ligjin për Ndërmarrje Publike dhe vendimet e Qeverise. Nuk ka përfitime tjera”, është përgjigjur shkurt Buzhala.
Mirëpo, disa ditë më parë një kërkesë e Njësisë për Monitorim të Ndërmarrjeve Publike (NJPMNP), e cila funksionon në kuadër të Ministrisë së Zhvillimit Ekonomik, kishte dërguar një kërkesë në adresë të drejtorit të bordit të PTK-së, Rexhë Gjonbalaj, në të cilën kërkohet kthimi i 320 mijë euro shpenzime që i ka bërë bordi për 3 vjet dhe që nuk ka qenë të parapara me ligj.
Kreu dhe anëtarët e Bordit çdo vit kishin marrë dhjetëra mijëra euro bonuse nga kompania publike, kishin shfrytëzuar vetura zyrtare dhe benificione të tjera, të cilat nuk parashihen me ligjin mbi ndërmarrjet publike. Kjo kërkesë nuk i kishte pëlqyer Gjonbalajt, e as shkrimi me titull “Rexhë, kthej 320 mijë euro” në gazetën “Zëri”.
Me këtë rast Bordi i Drejtorëve të PTK-së ka reaguar ndaj këtij shkrimi duke e quajtur shkrim tendencioz dhe të porositur. Ndërsa ka paralajmëruar padi ndaj gazetarit. “Thirrja publike e bërë nga gazetari për kthimin e 320 mijë eurove të imagjinuara nga vetë gazetari, sepse në realitet as që ka ndodhur ndonjëherë, gazetari ka bërë lajmërim të rrejshëm kinse për marrjen e tyre. Me këtë i njëjti ka shkaktuar huti tek opinioni publik dhe tek aksionari. Konsiderojmë që me këtë shkrim është bërë një përpjekje e radhës nga po i njëjti gazetar dhe e njëjta gazetë që të denigrohet personaliteti i kryetarit të Bordit dhe i gjithë anëtarëve të tjerë pa pasur fakte dhe jashtë etikës gazetareske”, thuhet në reagim.
Po ashtu thuhet se shfrytëzimi i veturës zyrtare është e lejuar nga Bordi i Drejtorëve të kësaj kompanie. “Është hera e gjashtë që gazetari Lavdim Hamidi dhe gazeta “Zėri” shkruajnë-dezinformojnë rreth punës së bordit e posaçërisht kryesuesit të bordit si dhe për shfrytëzim të veturës zyrtare nga ana e kryesuesit të bordit, i cili shfrytëzon atë me një vendim legjitim të Bordit të Drejtorëve.
Ai shfrytëzon një nga 557 automjete të PTK-së për nevoja zyrtare dhe me qëllim të efikasitetit sa më të madh në punë në kohën kur qarkullimi vjetor i korporatës është mbi 160 milionë euro. Bordi njofton gjithashtu se do të përgatisë padi ndaj Hamidi për shpifje dhe denigrim të Bordit të Drejtorëve të PTK, e posaçërisht ndaj kryesuesit Rexhë Gjonbalaj”, shtohet ndër të tjera në reagim.
Ne reagim thuhet se shfrytëzimin e veturës ia ka lejuar bordi, ndërsa Gjonbalaj është në krye të këtij bordi me shumë se 3 vjet që i bie se këtë privilegj ia ka lejuar vetes. Rexhë Gjonbalaj është nën hetime të EULEX-it, bashkë me ish-drejtorin e PTK-së, Shyqyri Haxha, për kontratën e PTKsë me operatorin mobil virtual “Dardaphone”.
Zëdhënësi i Korporatës Energjetike të Kosovës, Viktor Buzhala thotë se kjo korporatë nuk ka përfitime të tilla. “Kompensimi bëhet në përputhje të plotë me Ligjin për Ndërmarrje Publike dhe Vendimet e Qeverise. Nuk ka përfitime tjera”, është përgjigjur shkurt Buzhala.
Mirëpo, disa ditë më parë një kërkesë e Njësisë për Monitorim të Ndërmarrjeve Publike (NJPMNP), e cila funksionon në kuadër të Ministrisë së Zhvillimit Ekonomik, kishte dërguar një kërkesë në adresë të drejtorit të bordit të PTK-së, Rexhë Gjonbalaj, në të cilën kërkohet kthimi i 320 mijë euro shpenzime që i ka bërë bordi për 3 vjet dhe që nuk ka qenë të parapara me ligj. 

Të ardhurat e familjes Obama më 2011 790 mijë dollarë

Presidenti Barack Obama dhe Zonja e Parë Michelle paguan mbi 162 mijë dollarë taksa vitin e kaluar, 20.5 për qind nga të ardhurat e tyre prej 790 mijë dollarësh. Shtëpia e Bardhë bëri publike dokumentat për taksat që ka paguar presidenti dhe familja e tij, në një moment kur përqindja e taksave që paguajnë qytetarët është bërë një çështje kyçe në garën presidenciale të këtij viti.
Presidenti Obama dhe nënpresidenti Joe Biden kanë bërë thirrje këtë javë që milionerët të paguajnë një minimum prej 30 për qind të të ardhurave, që e kanë quajtur “rregulli Buffett” falë investitorit miliarder Warren Buffett që ka thënë se nuk është e drejtë që ai paguan një përqindje më të vogël taksash sesa sekretarja e tij. Plani do të rriste përqindjen e taksave për ata që fitojnë të paktën 1 milionë dollarë.
Rivali i mundshëm republikan i presidentit Obama në zgjedhjet e nëntorit, milioneri Mitt Romney pagoi 13.9 për qind taksa për vitin 2010. Shtëpia e Bardhë tha se Obamat e fituan rreth gjysmën e të ardhurave të tyre nga rroga presidenciale prej 400 mijë dollarësh e Presidentit, ndërsa pjesën tjetër nga shitja e kopjeve të librave të tij.
Obamat njoftuan gjithashtu se u kanë dhuruar mbi 172 mijë dollarë vitin e kaluar për 39 shoqatave të ndryshme bamirëse. 

Suarez: Unë dhe Carroll do të shënojmë

Sulmuesi i Liverpoolit, Luis Suarez, këmbëngul se Andy Carrol dhe ai mund të jenë të suksesshëm dhe të shënojnë ndaj Evertonit në gjysmëfinale të FA Cup.
“Menaxheri nuk ka vendosur ende për ekipin, por besoj se do të luaj përkrah Carrollit dhe do të bëjmë rrezik për portën kundërshtare. Ne nuk kemi funksionuar 100 përqind mirë së bashku, por është momenti për të ndryshuar situatën”.
“Andy shënoi golin e fitores te Blackburni të martën dhe është i lumtur për këtë. Dhe ajo fitore na ka rritur moralin para derbit”, ka thënë Suarez.

Heynckes kërkon fitore ndaj Mainzit

Trajneri i Bayernit të Munichut, Jupp Heynckes, thotë se ekipi i tij duhet ta mposhtë Mainzin për të rifituar besimin të shtunën në sfidën që zhvillohet në Giuseppe Meazza.
“Ne duhet të jemi realistë, por unë kurrë nuk kam bërë deklarata të pa matura. Unë do ta shfrytëzoj dhe atë shpresën e fundit që ka mbetur. Ne kemi synime tjera të mëdha”.
“Është gjëja e vetme që mund të bëjmë. Duhet të vazhdojmë luftën, kemi potencial enorm, kështu që duhet të bëjmë më të mirën. Ne duhet të tregojmë karakter dhe të ndezim motorët. Lojtarët e mi mund ta bëjnë këtë, sepse të gjithë janë top lojtarë. Duhet të mësoni t’ia dilni me disfatat, është pjesë e lojës”, është shprehur Heynckes.

Të martën klipi i ri i Rita Orës

Ajo nuk di të ndalet. Rruga e saj drejt kulminacionit të famës dhe të karrierës prej një pop ylli vetëm e sa po shkurtohet. Është përsëri ajo, që me gjithë vështirësitë ka arritur të futet në mesin e artistëve si Nicki Minaj dhe David Guetta në top videot e javës që vjen.
VEVO ka publikuar videoklipet që priten më me padurim për t’u lansuar gjatë javës, ndërsa në videon që shihni më poshtë, ku janë të përfshirë Jessie J, Niki Minaj dhe David Guetta, një hapësirë e njëjtë sikur të lartpërmendurve i është dhënë edhe këngëtares kosovare, për dallim prej herës së kaluar ku ajo ishte përfshirë vetëm në kuadër të fushatës “VEVO Lift UK artist”.
Kënga e re me klip e Rita Orës e cila do të lansohet të martën titullohet “How We Do (Party)”, një këngë dinamike kjo e përshtatshme për atmosferë të festive.
Projekti i ri i Ritës vjen pak kohë pas lansimit super të suksesshëm të videoklipit me reperin britanik, Tinie Tempah, “R.I.P”.

Bllaca: Armën për vrasje e kam marrë nga Azem Syla

Nazim Bllaca ka thënë se kishte ngrënë një darkë të mirë në një restorant në Prishtinë, natën e 6 gushtit 1999. Pak minuta më parë kishte vrarë një njeri. Për këtë vrasje kishin festuar...
Nazim Bllaca thotë se kishte vrarë Ibush Kllokoqin me një armë që e kishte marrë nga Azem Syla, deputet në Kuvendin e Kosovës, shkruan Koha Ditore.
Dëshmitari bashkëpunues, që po pretendon se ka qenë pjesë e një skuadre ekzekutimesh të Shërbimit Informativ të Kosovës, ka treguar të premten para një trupi gjykues në Gjykatën e Qarkut në Prishtinë për motivin e kësaj vrasjeje dhe misionin që kishte ky shërbim: kërcënime, rrahje dhe vrasje. Pikërisht për vrasje ka folur më së shumti.
“Te hotel ‘Victory’ nga vetura ka zbrit Faruku (Fahredin Gashi v.j.) dhe e ka marrë armën ‘Shkorpion’ nga një veturë tjetër xhip, ku ka qenë Azem Syla dhe shoferi i tij. Xhipi ka qenë 10 metra larg nesh”, ka thënë Nazim Bllaca, gjatë dëshmisë kundër Sadik Abazit, Fahredin Gashit, Shpresim Ukës, Shaban Sylës, Bekim Sylës, e Driton Hajdarit.

EULEX-i nuk i paralajmëron arrestimet!

Misioni Evropian për Rend dhe Ligj, EULEX, të premten ka lëshuar një deklaratë për media përkitazi me shkrimin e publikuar në Gazetën Express për mundësinë që së paku katër zyrtarë të lartë të Qeverisë së Kosovës të arrestohen nën dyshimet për korrupsion dhe shpërdorim të detyrës zyrtare. Ky mision kundërshton artikullin, por nuk e demanton atë.
“EULEX-i dëshiron të kundërshtojë artikullin e publikuar në Express më datën 12 prill 2012, në të cilin pretendohet se një prokuror ndërkombëtar ka paralajmëruar arrestimin e disa zyrtarëve të qeverisë”, thuhet në komunikatën e lëshuar nga EULEX-i të premten.
Gazeta Express, duke u thirrur në pohimet e një prokurori ndërkombëtar, ka shkruar se pritet që së shpejti të arrestohen disa zyrtarë të lartë të Qeverisë së Kosovës. Burimi i gazetës ka thënë se cak i organeve të drejtësisë do të jenë zyrtarë të rangut të lartë, ministra, por edhe një Zëvendëskryeministër.
Në komunikatë, EULEX thotë se asnjë zyrtar i saj i përgjegjshëm nuk do të fliste me gazetarët për këto tema. Më tej, misioni evropian sqaron se “nuk i paralajmëron arrestimet e as nuk komenton rreth hetimeve që janë duke vazhduar”.
Burime të Expressit, të afërta me Prokurorinë Speciale të Kosovës, kanë thënë se ky mekanizëm që përbëhet nga prokurorë evropianë dhe kosovarë, është në përfundim e sipër të procedurave të nevojshme ligjore para lëshimit të fletarrestimeve për katër zyrtarë të Qeverisë së Kosovës.
Aktualisht, nën hetime është zëvendësministri aktual i Financave, Astrit Haraqija dhe zëvendëskryeministri Bujar Bukoshi. Nuk dihet nëse këta dy zyrtarë do të jenë në listën e njerëzve që pritet të arrestohen.

Bangladeshi premton njohjen e Kosovës

Kryeministrja e Bangladeshit, Sheikh Hasina ka bërë të ditur se qeveria e saj po e shqyrton seriozisht njohjen e pavarësisë së Kosovës.
“Ne po e monitorojmë situatën. Mund të dëgjoni lajme të mira”, ka thënë kryeministrja duke iu përgjigjur një pyetje të një studenti në Universitetin e Ankarasë, ku ka mbajtur një ligjëratë, transmeton indeksonline.
Ky shtet kishte premtuar disa herë njohjen pas sugjerimeve të vazhdueshme të ambasadorit amerikan atje. 

NATO nuk lejon trazira

KFOR-i i ka marrë udhëzimet nga NATO-ja që të përdorë të gjitha mjetet për të mos lejuar trazira në veri.
Si rezultat, trupa paqeruajtëse e NATO-s ka paralajmëruar institucionet e Kosovës që të mos i përdorin incidentet e fundit për nxitje politike, ngase KFOR-i nuk do të lejojë edhe një situatë të ngjashme me atë të marsit 2004.
“Na e ka bërë të qartë se KFOR-i do të mbrojë popullatën civile dhe se nuk do të kursehet për të ndaluar turmat e ngjashme si ato të vitit 2004”, i ka thënë Kohës Ditore një zyrtar i lartë i institucioneve të Kosovës.
Sipas gazetës, KFOR-i e vlerëson eksplodimin që mori jetën e Selver Haradinajt si të izoluar dhe pa prapavijë ndëretnike. Ndërsa, paralajmërimet janë bërë në takimet e shumta të zyrtarëve të KFOR-it me ministra, me zëvendëskryeministrin Hajredin Kuçi dhe me presidenten Atifete Jahjaga. Mesazhin, veç të tjerash, e ka sjellë në Kosovë komandanti i NATO-s në komandën e Napolit, admirali Bruce W. Clingan.
Paralajmërimet e NATO-s janë vënë në praktikë në natën mes të enjtes dhe të premtes, kur një patrullë e njësisë speciale të PK-së, ROSU, që ishte nisur nga Peja si përforcim për njësinë në Mitrovicë, është përcjellë nga KFOR-i, duke u kujdesur që të mos lejojnë nisjen eventuale të tyre për në veri.

“Tripi” qeveritar në Dubai

Pluhuri i kryeqytetit nuk do t’i “prekë” dhjetëra zyrtarë të dikastereve të ndryshme qeveritare, të cilët punën e tyre në zyra do ta “zëvendësojnë” në njërin nga hotelet luksoze të Dubait.
Për të “shëtitur” pesë ditë në Dubai, ekzekutivi i vendit është treguar dorëlirë, ngase për këtë “trip” nga buxheti i vendit janë ndarë jo më pak se 2500 euro për një person, shkruan Zëri.
E tërë kjo shumë e parave do të jepet në emër të trajnimit të kandidatëve për shërbim civil, sistem të pagave dhe të drejtën e punës, trajnim ky që do ta organizojë kompania private “Ekspertiza”.
Por, trajnimi nuk përfundon vetëm brenda mureve të hotelit. Me mjetet e taksapaguesve kosovarë zyrtarët qeveritarë do të shëtisin nëpër vende të caktuara të njërit nga qytetet më të shtrenjta në botë.
“Besoj që zyrtarët nuk dërgohen atje për trajnim por për shëtitje... Atje zakonisht shkohet për shiping, e si duket kjo është arsyeja e udhëtimi”, thekson deputetja e Vetëvendosjes, Alma Lama.
Zëvendëskryeministri i Kosovës, Hajredin Kuçi, thotë se nuk e ka idenë se për çfarë trajnimesh bëhet fjalë. I pyetur se si ka mundësi që të paguhen dy mijë e pesëqind euro për një person dhe pse qeveria ka pranuar t’i dërgoj zyrtarët në Dubai, Kuçi ka thënë: “Nga ju (Zëri) po dëgjojë për këtë”.
Drejtori i Organizatës për Demokraci, Anti-korrupsion dhe Dinjitet “Çohu”, Avni Zogiani, thotë se fakti që është vendosur që të ketë trajnime në Dubai, lë për të dyshuar se do të ketë keqpërdorime të parasë publike.

Marchisio: Përjetë te Juventusi

Mesfushori i Juventusit, Claudio Marchisio, ka pranuar se ai do të dëshironte që të qëndronte tërë jetën te Juventusi, duke zbuluar se ai ndjen që është një prej liderëve brenda skuadrës së Contes.
“Sigurisht, unë do të dëshiroja të qëndroj përgjithmonë te Juventusi. Por, tani për tani po mendoj vetëm për këtë sezon”.
“Synimi im personal është që ta kthej Juventusin në rrugët fituese. Unë jam i fokusuar që të fitoj në të tashmen se sa në të ardhmen”, ka potencuar Marchisio. 

Stramaccioni: Te Interi patjetër duhet të fitosh

Trajneri i Interit, Andrea Stramaccioni, ka bërë shaka se presidenti i klubit, Massimo Moratti, e ka vënë një klauzolë në kontratën e tij e cila thotë se fitorja është opsioni i vetëm.
“Në fund të intervistës sime ai më tha: “trajner, ti duhet të fitosh. Ne duhet të fitojmë”. Është një marrëveshje e thjeshtë. Mendoj se është një klauzolë kjo që presidenti ma ka vënë për njëqind vitet e ardhshme. Ai kërkon këtë nga të gjithë trajnerët”.
“Është diçka e thjeshtë, një anekdotë, një shaka, por vërtet ndodhi. Ai kërkoi këtë nga ne: Të bëjmë mirë dhe të fitojmë. Është një klauzolë në kontratën time, pasi kur je te Interi duhet që patjetër të fitosh”, ka thënë Stramaccioni.

Wenger: Shpenzimet varen nga rezultatet

Menaxheri i Arsenalit, Arsene Wenger, ka zbuluar se shpenzimet gjatë verës varen nga pozita që klubi i tij do ta ketë në fund të sezonit në Ligën Premier.
“Ne duam ta fitojmë titullin. Varet nga vendi ku do të përfundojmë që të vendosim se sa do të blejmë. Politika jonë nuk ka ndryshuar: do të jemi ambiciozë dhe do të shpenzojmë në mënyrë racionale”.
“Ne duhet ta mbajmë momentumin dhe të tentojmë të përfundojmë mbi pozitës së sezonit të kaluar”, është shprehur Wenger.

Alvarez: I kuptoj vërshëllimat

Mesfushori i Interit, Ricky Alvarez, ka pranuar se ka qenë e vështirë të luajë nën vërshëllimat e njërit prej seksionëve të tifozëve, por ai i kupton Nerazzurët.
“Unë kuptoj tifozët dhe kuptoj vërshëllimat e tyre. Ata janë mësuar të shohin një Inter ndryshe, me lojtarë të ndryshëm të cilët kanë shkathtësi të ndryshme”.
“Gjithmonë ka njerëz që nuk ju pëlqejnë. Por, mendoj se ka mënyra të ndryshme për të parë përkushtimin tuaj në fushë dhe unë po bëj maksimumin që të mos i zhgënjej tifozët, që të fitojomë. Unë po luaj tani me më shumë besim në krahasim me kohën kur kam ardhur. Ne vazhdojmë të besojmë në vendin e tretë”, ka thënë Alvarez. 

Më në fund të martohet çifti Pitt-Jolie

Menaxherja e Brad Pitt ka konfirmuar spekulimet duke thënë se aktori i njohur i ka propozuar martesë partneres së tij afatgjate, Angelina Jolie.
Lajmi vjen vetëm dy ditë pasi Jolie shfaqi një unazë të pa parë më herët në gishtin e saj gjatë një vizite në një muze të artit kinez në Los Angeles. Vetëm disa orë pas spekulimeve të shumta mbi atë se çfarë mund të jetë kjo unazë, del në skenë menaxherja e Pitt, e cila ka pranuar për mediat se Pitt i ka propozuar martesën aktores.
“Është histori e gjatë krijimi i kësaj unaze. Brad Pittit i është dashur një vit i plotë për ta krijuar këtë unazë, me dizajn unik dhe me diamant unik. Ata i kanë dhënë premtimin njëri-tjetrit për t’u martuar. Nuk ka datë të martesës për momentin”, ka deklaruar menaxherja e Pitt, Cynthia Pett-Dante.