Di Matteo: Nuk ka më lëshime

Bosi i Chelseat, Roberto Di Matteo, ka pranuar se ekipi i tij nuk guxon të humbasë të dielën në derbin londinez ndaj Tottenhamit, nëse Blutë dëshirojnë të mbajnë gjallë shpresat për kualifikim në Ligën e Kampionëve.
“Faktori i përvojës do të luajë rol shumë të madh sepse ne kemi lojtarë të cilët janë mësuar të luajnë nën presion”.
“Ekipet po luftojnë për pozitën e katërt dhe ne e kuptojmë rëndësinë e kësaj. Ne duam që të përfitojmë në shtëpi dhe të fitojmë, kështu do të fillonim ringritjen, por edhe nëse ne arrijmë vetëm një barazim, atëherë jemi ende në lojë. Nëse pësojmë humbje, do të jetë e vështirë. Nuk guxojmë të pësojmë humbje”, ka deklaruar Di Matteo.

Wenger premton transfere të mëdha

Menaxheri i Arsenalit, Arsene Wenger, ka premtuar se do të bëjë tranfserime kualitative gjatë verës, por vetëm nëse sheh lojtarë të denjë.
Wenger thotë se ai do të ketë skuadër tepër të fortë për sezonin e ardhshëm, duke parë rikthimet e Jack Wilshere dhe Abou Diaby, e pa harruar as transferimet e mëdha që Wenger ka premtuar se do t’i bëjë.
“Në numër transferimesh, ne bëjmë pak. Por, në aspektin e cilësisë, sigurisht se do të rrezikonim, nëse gjejmë lojtarë top, top cilësorë. Numri i lojtarëve është 25. Ne kemi shumë lojtarë të cilët janë në huazim dhe të cilët janë lënduar. Këta lojtarë do të kthehen kështu që ne kemi shumë lojtarë, por ajo që na duhet janë nga një lojtar super kualitativ në çdo pozitë”, është shprehur francezi.

Coentrao: Jam profesionist

Mbrojtësi i Real Madridit, Fabio Coentrao, u është përgjigjur kritikave për sjelljet e tij jo profesionale.
“Ishte ditëlindja ime dhe ishte gjë e rastësishme. Unë jam shumë i zhgënjyer me atë që është shkruar në shtyp, sepse askush nuk mund të thotë diçka keq për mua”.
“Unë jam profesionist i shkëlqyer, unë gjithmonë kam dhënë gjithçka për klubet për të cilat kam luajtur dhe nuk është e drejtë që të vë në dyshim gjithçka për një akt të izoluar. Përpos kësaj, është raportuar se po atë natë unë kam bërë shumë zhurmë në shtëpinë time dhe kjo është gënjeshtër totale”, ka thënë Coentrao.

Chelsea, 10 mil. në vit për Guardiolën

Pronari i Chelseat, Roman Abramovich, është i gatshëm që të sakrifikojë shumë para për të joshur në Stamford Bridge strategun e Barcelonës, Pep Guardiola.
The Sun shkruan se Abramovich është në gjendje që t’i ofrojë super Guardiolës një super kontratë prej 40 milionë funtesh për katër vjet dhe atë pa taksa.
Kjo do ta bënte Guardiolën trajnerin më të paguar në botë, me një pagë prej 10 milionë funtesh neto. Te Barcelona, Pep fiton 8 milionë funte neto.

Konfirmohet edhe lidhja e re e Russell Brand

E dashura e re e Russell Brand ka thyer heshtjen për romancën e saj me komikun britanik, duke e quajtur atë fantastik.
Brand së fundmi është thënë se është në lidhje me Sarah Marshall, por në fakt kjo nuk është e vërtetë, pasi Brand është parë disa herë me modelen hungareze Nikolett Barabas. Aktori e njoftoi modelen me nënën e tij dhe tani Barabas është hapur për lidhjen e tyre në revistën Life & Style.
“Ai është fantastik, aq qesharak. Ai është i bukur. Më pëlqen të jem me të. Ai është fantastik, aq fantastik. Ai është njeri i mirë”, ka theksuar Barabas.
Russell Brand ishte ndarë në nëntorin e vitit të kaluar nga Katy Perry me të cilën kishte një martesë 14 muajshe. Tani Perry është duke u takuar me modelin francez Baptiste Giabiconi. 

Rihanna, lidhje prej dy muajsh me Kutcher?

Rihanna ka dalë nëpër takime sekrete në tetë javët e fundit me ish-bashkëshortin e Demi Moore, aktorin Ashton Kutcher.
24 vjeçarja është parë duke u larguar nga shtëpia e aktorit të mërkurën në mëngjes, teksa takimet e para besohen të kenë qenë në dhjetor, pikërisht kur dhe Kutcher ishte ndarë nga bashkëshortja e tij.
Rihanna qëndroi për katër orë në shtëpinë e Kutcher para se të largohej me veturën e saj të zezë dhe pas spekulimeve për statusin, është The Sun që me anë të një burimi konfirmon gjithçka.
“Gjithçka filloi kur Rihanna dhe Kutcher u takuan dhe shkëmbyen numrat. Më pas ata dërgonin sms dhe aranzhonin takime. Ata madje qëndruan në hotelin Santa Monica disa javë më parë. Ata janë dy njerëz single që po përjetojnë një aferë, kështu që ata po takohen në mënyrë sekrete. Rihanna u ka thënë miqve se ai është qesharak dhe i lezetshëm. Që të dy po kalojnë mirë”, ka thënë një burim.

Kim qesh me incidentin

Kim Kardashian nuk është ndjerë e përulur pas sulmit ndaj saj me miell, në një ngjarje të organizuar në Hollyëood, ndërsa ylli televiziv amerikan madje ka qeshur me atë që ndodhi.
31 vjeçarja ishte ‘pre’ e një sulmi me pluhur të bardhë, e që më vonë është zbuluar të jetë miell, ndërsa e gjithë kjo ndodhi në ngjarjen ku bukuroshja është dashur të promovonte parfumin e saj të ri.
“Jam mirë. Vërtet kam qeshur. U pastrova dhe më pas vazhdova me rrjedhën”, ka theksuar Kim pas incidentit duke shtuar se nuk do të bëjë ndonjë padi për atë që ndodhi.

Të rriturit konsumojnë më shumë pemë dhe perime

Në raport me të rinjtë, të rriturit konsumojnë sasi më të mëdha të karotenoideve, flavonoideve dhe fitonutricientëve të tjerë, të cilët janë të pranishëm në pemë dhe në perime.
Nëse bëhet krahasimi në ushqimin e të rriturve dhe të rinjve, prania e karotenoideve në ushqimin e të rriturve është 20 për qind më e lartë sesa tek të rinjtë. Po ashtu, konsumimi i flavonoideve për 40 për qind është më i lartë, ndërsa marrja e acidit ellagjik është për 80 për qind më e lartë tek të rriturit.
Fitonutricientët janë komponentë bimorë që kanë efekt mbrojtës në shëndet.
Kështu, karotenoidet, sikurse beta-karoteni ose glikopeni, mund të ofrojnë mbrojtje nga kanceri i gjirit, ovariumeve dhe prostatës; flavonoidet, si kvercetina dhe antocianidi, mund ta mbrojnë trurin; ndërsa acidi ellagjik, që gjendet në dredhëza dhe në arra, mund të ndihmojë në luftën kundër disa formave të karcinomës, duke përfshirë edhe karcinomën e prostatës dhe të gjirit.

Foshnjat mësojnë të flasin që në muajin e katërt

Deri më tash linguistët kanë menduar se aftësia e të folurit te fëmijët fillon të zhvillohet nga muaji i 18-të i jetës. Mirëpo një hulumtim më i ri i Institutit “Max Planck” nga Leipzigu ka treguar se foshnjat shumë më herët fillojnë të përvetësojnë rregullat e ndonjë gjuhe.
Shkencëtarët i kanë lëshuar fjalë italiane fëmijës katërmujor gjerman, ndërsa me anë të EEG-së është vërejtur se foshnja pas 15 minutash ka mbajtur mend fjalinë dhe ka filluar të reagojë.
Deri më tani linguistët kanë pohuar se aftësitë njohëse te fëmijët zhvillohen pas muajit të 18-të, mirëpo ky hulumtim ka treguar se diçka e tillë ndodh dukshëm më herët.
Autorët e studimit thonë se në moshën katërmujore nuk mund të regjistrohen gabimet në përmbajtje, mirëpo është vërtetuar se fëmija reagon në raste të gabimit në shqiptim. 

Torvalds refuzoi Apple

Krijuesi i Linuxit mund të punonte në Apple, por nuk dëshironte diçka të këtillë. Këtë e zbuloi vetë Torvalds në një intervistë që dha për Wired.
Në të vërtetë, diku rreth vitit 2000, Torvaldsit vetë Steve Jobs ia pati ofruar një vend në Apple. Në kompani Torvalds do të punonte në zhvillimin e Mac OS, por po ta kishte pranuar ofertën do të ishte i detyruar që ta ndërpriste punën në Linux. Jobsit kështu ai i tha “jo, faleminderit”, dhe vazhdoi të punoi në platformën open-source.
Torvalds nuk pëlqeu asnjëherë Mac OS-in, më së shumti për shkak të kernelit. Edhe pse çmonte Steve Jobsin, më së shumti për shkak të udhëheqjes së kompanisë gjatë kohërave të këqija, Torvalds mendonte se Apple është nisur në drejtim të gabuar. Në pikëpamje të kontrollimit nga ana kompanisë, ai më herët ka deklaruar se Apple po bën gjëra më të këqija se që do të mund të bënte Microsoft ndonjëherë.
Përkundër faktit se Apple është bërë kompani qendrore në botën e teknologjisë, e Steve Jobs një yll mediatik, Torvalds beson se ka bërë gjënë e duhur. 

Shtiret si femër për 13 vite

Një i pastrehë nga Kalifornia, i cili ia kishte vjedhur identitetin një gruaje, është arrestuar pas 13 vitesh prezantimi të rrejshëm.
I arrestuari me vite të tëra është paraqitur si Perla Serrano, ndërsa është arrestuar pasi i kishte shndërruar jetën në ferr “viktimës” së tij dhe kishte shpenzuar rreth 100.000 dollarë për mjekim.
Arrestimi i 51-vjeçarit ka qenë i rastësishëm kur një polic e kishte parë duke fjetur në një ulëse.
Polici ishte i bindur se bëhej fjalë për një grua, mirëpo kishte filluar të dyshojë kur e ka vërejtur byzylykun e spitalit me emër tjetër. 

Keqinterpretim, s’ka udhërrëfyes as javën tjetër!

Ministri i Zhvillimit Ekonomik, Besim Beqaj, në një deklaratë të dhënë Radio Kosovës nga Brukseli, ku po qëndron për një vizitë zyrtare, është keqinterpretuar nga ky medium të ketë thënë se “javën e ardhshme Kosova do të merr udhërrëfyesin për liberalizim të vizave dhe konfirmimin për studimin e fizibilitetit”.
Ministri Beqaj ka deklaruar saktësisht se “gjatë vizitës që drejtues të Komisionit Evropian do t’i bëjnë Prishtinës javën e ardhshme, do të bisedohet për studimin e fizibilitetit dhe hapjen e perspektives evropiane”, raporton Koha.
Kështu që javën tjetër, komisioneri për Zgjerim i Bashkimit Evropian, Stefan Fule do të vije në Prishtinë pa udhërrëfyesin për liberalizimin vizave për shtetasit e Kosovës, të cilët përveç Shqipërisë, Malit të Zi, Maqedonisë dhe Turqisë, nuk mund të udëhtojnë askund tjetër pa viza. 

Edhe 11 gjymëtarë të rinj betohen para Presidentes

Njëmbëdhjetë gjyqtarë të propozuar nga Këshilli Gjyqësori i Kosovës janë emëruar të premten nga presidentja e republikës, Atifeta Jahjaga.
Njëmbëdhjetë gjymëtarët që e kanë dhënë betimin para presidentes janë:
1. Hasan Sadiku, gjyqtar në Gjykatën e Qarkut në Gjilan,
2. Mursel Ahmeti, gjyqtar në Gjykatën e Qarkut në Gjilan,
3. Zehra Vërbovci, gjyqtare në Gjykatën e Qarkut në Mitrovicë,
4. Hashim Qollaku, gjyqtar në Gjykatën e Qarkut në Prizren,
5. Naim Kurtishi, gjyqtar në Gjykatën e Qarkut në Prizren,
6. Rasim Behluli, gjyqtar në Gjykatën e Qarkut në Prizren,
7. Vahid Halili, gjyqtar në Gjykatën e Qarkut në Prishtinë,
8. Driton Muharremi, gjyqtar në Gjykatën e Qarkut në Prishtinë,
9. Hava Haliti, gjyqtare në Gjykatën e Qarkut në Prishtinë,
10. Nenad Lazic, gjyqtar në Gjykatën e Qarkut në Prishtinë dhe
11. Nexhmedin Sejdiu, gjyqtar në Gjykatën e Qarkut në Prishtinë.
Pas kësaj faze të emërimit të gjyqtarëve të Gjykatave të Qarkut, procesi do të vazhdojë me emërimin e gjyqtarëve për Gjykatat Komunale.

Jim Yong Kim emërohet president i Bankës Botërore

Presidenti Barack Obama ka emëruar akademikun amerikan me origjinë koreane Jim Yong Kim për presidentin e ardhshëm të Bankës Botërore. Emërimi i presidentit të Dartmouth College, doktor dhe ish-drejtor i departamentit të HIV/Aids në Organizatën Botërore të Shëndetësisë, përbën një surprizë të vërtetë.
Tre vende afrikane kanë miratuar ndërkohë emërimin e ministrit nigerian të Financave, Ngozi Okonjo Iweala për këtë post.
Një shtetas amerikan ka drejtuar Bankën Botërore që nga themelimi i saj në vitin 1944, por vendet në zhvillim deklarojnë se është koha për ndryshim.
Pavarësisht presioneve në rritje, presidenti Obama e vuri theksin tek eksperienca ndërkombëtare e zotit Kim në deklaratën për shtyp ku njoftonte emërimin e tij. “Është koha për një zhvillim profesional për të drejtuar agjencinë lider të zhvillimit botëror”, tha Obama në deklaratë.
“Historia personale e Jim është një shembull për diversitetin e madh të vendit tonë dhe eksperienca e tij globale e bën atë një person të përshtatshëm për të gjitha vendet e botës”, thuhet më tej në deklaratë.
Afati për emërimet për të zëvendësuar presidentin aktual të Bankës Botërore, Robert Zoellick është në orën 18:00 me orën e Uashingtonit dhe 22:00 me orën evropiane të së premtes.

AKP-së nuk po i ec mirë me valën e 54

Agjencisë Kosovare të Privatizimit (AKP) kurrë qysh nuk është ka i ec me Valën e 54 të privatizimit pasi që gati për çdo ditë është duke tërhequr ndërmarrje nga tenderimi.
Të premten AKP-ja ka njoftuar se nga kjo valë e privatizimit ka tërhequr Ndërmarrjen e Re “Ndërtesa e Administratës dhe Depo” Sh.P.K.
Lista e ndërmarrjeve që do të privatizohen përmes Valës 54 tani përmban 29 ndërmarrje të reja, dhe të gjitha këto Ndërmarrje të Reja do të privatizohen përmes Spin off-it të Rregullt.

Ndryshohet funksionimi i inspektoratit të tregut

Me qëllim të koordinimit dhe bashkëpunimit më të afërt, ministrja e Tregtisë dhe Industrisë (MTI) Mimoza Kusari – Lila ka takuar kryetarët e komunave, me të cilët ka diskutua për dy ligje shumë të rëndësishme atë për Inspektoratin dhe Mbikëqyrjen e Tregut si dhe ligji për Tregun e Brendshëm.
Ministrja Mimoza Kusari-Lila tha se deri më tani inspektorati i tregut ka funksionuar në dy shkallë, në atë qendror dhe lokal. “ Me ligjin e ri të inspektoratit të tregut, është bërë unifikimi i këtyre dy organeve duke bërë integrimin e plotë të inspektorateve komunale të tregut dhe inspektoratit qendror në një ombrellë të vetme dhe funksionimin në mënyrë vertikale si alternativë e vetme për mbikëqyrje efikase dhe unike në kushtet e Kosovës”, u shpreh ajo.
Gjatë takimeve që zëvendëskryeministrja Mimoza Kusari – Lila ka mbajtur me kryetarë të komunave, është vërejtur një hezitim për implementimin e këtij ligji. “Me ndryshimin e formës së organizimit dhe funksionimit të inspektoratit të tregut, nuk janë marrë kompetencat e Komunave , por është bërë vetëm reformimi i mbikëqyrjes së tregut në Kosovë”, tha ajo.
Çështja e dytë e rëndësishme e këtij takimi ishte implementimi i Ligjit për Tregun e Brendshëm.
Po ashtu është diskutuar edhe për zonat ekonomike , për të cilat ligji do të bëhet sipas zyrtarëve qeveritarë deri në fund të prillit.
Në takim kanë marrë pjesë e dhe ministrat Slobodan Petrovic dhe Bajram Rexhepi.

Çmimet e importit u rritën për 6.9 %

Agjencia e Statistikave të Kosovës (ASK) gjegjësisht Departamenti i Statistikave Ekonomike dhe Llogarive Kombëtare publikoj Indeksin e Çmimeve të Importit, për tremujorin e katërt 2011. Indeksi i çmimeve të importit në Kosovë u ngrit për 1.0 për qind mes tre mujorit të tretë 2011 dhe tremujorit të katërtë 2011. Krahasuar me tremujorin e katërt 2010 çmimet e importit u ngritën në një mesatare prej 6.9 për qind.
Çmimet e Importit në Kosovë u ngritën në një mesatare prej 1.0 për qind mes tremujorin e tretë 2011 dhe tremujorin e katërtë 2011. Ngritje më të mëdha sipas sektorëve ishin te tekstili dhe artikujt e tekstilit (11.9 për qind), vajrat ushqyese (5.3 për qind), artikujt ushqimor të përgatitur, pijet dhe duhani (2.5 për qind), produktet minerale (2.0 për qind), produktet e industrive kimike (1.9 për qind), shtazët e gjalla; produktet e shtazëve (1.5 për qind),instrumentet optike, fotografik, matës, medicinal dhe muzikorë dhe mekanizmat e orës (1.3 për qind),artikujt e ndryshëm të prodhuar (0.9 për qind) dhe artikujt e gurit, llaçit,produktet e keramikës dhe të qelqit (0.6 për qind). Ngritja u neutralizua kryesisht nga rënia e çmimeve te sektorët letrat dhe artikujt e saj (-2.2 për qind), plastika,kauçuku dhe artikujt e tyre (-1.7 për qind), mjetet e transportit (-1.4 për qind). këpucet (-1.1 për qind), druri dhe artikujt e tij (-0.4 për qind), produktet bimore dhe metalet bazë dhe artikujt e metaleve bazë (-0.2 për qind).
Çmimet e Importit në Kosovë janë ngritur në një mesatare prej 6.9 për qind mes tremujorit të katërtë 2010 dhe tremujorit të katërtë 2011. Ngritje më të mëdha sipas sektorëve ishin te produktet minerale (18.0 për qind), te këpucët (17.5 për qind), vajrat ushqyese (14.7 për qind), te tekstili dhe artikujt e tekstilit (12.5 për qind), produktet bimore (11.1 për qind),plastika, kauçuku dhe artikujt e tyre (9.6 për qind), shtazët e gjalla, produktet e shtazëve (6.1 për qind), letrat dhe artikujt e saj (5.0 për qind),mjetet e transportit (4.6 për qind) etje.
Ngritja u neutralizua kryesisht nga rënia te sektori metalet bazë dhe artikujt e metaleve bazë (-0.4 për qind

Moratti: Dua fitore ndaj Juventusit

Presidenti i Interit, Massimo Moratti, ka deklaruar se ndeshja ndaj Juventusit është ende e një rëndësie shumë të madhe, përkundër faktit se Nerazzurët janë jashtë luftës për titull të kampionit në Serie A.
Interi është në vendin e shtatë në tabelë dhe ka 15 pikë më pak se sa Juventusi, ndërsa përkundër kësaj Moratti këmbëngul se ndeshja është ekstrem e rëndësishme për Interin për shkak të faktorëve tjerë.
“Pa marrë parasysh tabelën, ndeshja ndaj Juventusit mbetet ndeshja më e rëndësishme për ne këtë sezon. Kështu ndihem unë, dhe kështu është edhe për të tjerët. Dhe të gjithë e dimë se ndeshja është e rëndësishme për arsye politike dhe për faktorë të tjerë po ashtu. Është koha për të ringritur krenarinë e Interit. Unë pres fitore ndaj Juventusit. Ne duhet të fitojmë dhjetë ndeshjet e mbetura. Ndeshja ndaj Juventusit është fillimi i ringritjes tonë”, ka deklaruar Moratti.

Benitez: Te Liverpooli kërkova Alves dhe Jovetic

Ish-menaxheri i Liverpoolit, Rafa Benitez, ka zbuluar se ai ishte bllokuar nga klubi anglez që të transferonte mbrojtësin Daniel Alves dhe sulmuesin Stevan Jovetic, sa ishte në krye të klubit nga Anfield.
“Daniel Alves ishte opsioni jonë i parë për krahun e djathtë. Problemi ishte se unë është dashur të vendos për Alves më shumë si anësor se sa si mbrojtës. Ishin vendime të vështira këto, por edhe Kuyt ka qenë fantastik”
“Jovetic po ashtu ishte në listën time, por nuk kam pasur të holla. Ideja ime ishte që të luaj me Macheranon, Lucas, Gerrard dhe Aquilanin, që të katër në mesfushë dhe Jovetic në mes të vijës sulmuese dhe të mesfushës. Sidoqoftë, nuk kisha para për të realizuar këtë plan fantastik dhe kështu edhe dështova e sot jam këtu ku jam”, ka deklaruar Bentiez.

Barcelona, 35 mil. për David Luiz

Barcelona është duke planifikuar që të bëjë një ofertë të jashtëzakonshme për mbrojtësin e Chelseat, David Luiz.
Daily Mail shkruan se Barcelona është duke përgatitur një ofertë prej 35 milionë eurosh për asin brazilian të Chelseat, në tentim për të përforcuar mbrojtjen para sezonit të ri.
Klubi katalanas që një kohë të gjatë ka qenë në përcjellje të Luiz dhe në rast të dëshirës së vet brazilianit, ai pa problem të madh mund të shndërrohet në zëvëndësues të ikonës së Barcelonës, Carles Puyol. 

Pepe mungon dy ndeshje, Ozil dhe Mou një ndeshje

Komisioni disiplinor i La Ligas, ka shpërndarë dënimet për të përjashtuarit në sfidën e zhvilluar në El Madrigal të mërkurën mes Villarrealit dhe Real Madridit, ku ishin përjashtuar pesë futbollistë dhe zyrtarë të klubit mbretëror spanjoll.
Kështu, Pepe është dënuar me dy ndeshje moslojë për sjelljen jo sportive ndaj gjyqtarit Paradas, teksa dënim të njëjtë ka marrë dhe asistenti i Jose Mouirnhos, Rui Faria.
Me një ndeshje moslojë është dënuar Mesut Ozil, teksa kaloi mirë edhe Mourinho, i cili u dënua me vetëm një ndeshje suspendim.
Mbrojtësit Sergio Ramos i është hequr kartoni i dytë i verdhë dhe do të luajë ndaj Sociedadit, ndërsa klubi mbretëror do të apelojë suspendimet në ora 17:30.
Dy ndeshjet e ardhshme Real Madridi në La Liga i zhvillon në shtëpi ndaj Real Sociedadit dhe në udhëtim te Osasuna. 

Guardiola: Gjashtë pikë janë shumë

Trajneri i Barcelonës, Pep Guardiola, u shpreh i kënaqur me zvogëlimin e distancës me Real Madridin në luftën për titull në La Liga, por ka pranuar se edhe gjashtë pikë janë shumë për katalanasit që ta fitojnë titullin.
“Unë nuk e kam shikuar ndeshjen e Realit ndaj Villarrealit, kështu që nuk kam ndonjë mendim për këtë. Unë e mësova më vonë se ndeshja përfundoi me barazim dhe isha më shumë i kënaqur se sa në rast të fitores së tyre, por kam fjetur njëjtë”.
“Disa prej nesh kanë familje, gra dhe fëmijë. Unë shikova shumë ndeshje të Realit, por jo këtë. Gjashtë pikë janë më pak se sa 10, por diferenca është e madhe. Reali tani ka dy barazime radhazi, por kjo nuk do të thotë se ata do të barazojnë edhe në ndeshjet tjera. Nëse kam thënë se titulli është humbur, atëherë bazohem në diçka”, është shprehur Guardiola.

Reali në heshtje mediatike

Real Madridi ka refuzuar që mbajë një konferencë për shtyp para ndeshjes që zhvillohet të shtunën ndaj Real Sociedadit, në protestë ndaj referimit skandaloz së fundmi në ndeshjen ndaj Villarrealit.
Përpos Marcelos, asnjë lojtar i Realit nuk ka folur për mediat pas barazimit ndaj Villarrealit të mërkurën, ndeshje për të cilën Los Blancos janë shumë kritik për standardet e referimit.
Reali e ka mbajtur stërvitjen e fundit të premtën dhe këtë pa praninë e mediave dhe pa praninë e tifozëve.
Klubi nga Santiago Bernabeu nuk di për fitore në dy ndeshjet e fundit në La Liga, ecuri e erët kjo që ka afruar Barcelonën në gjashtë pikë.

BE: Të zbatohen të gjitha marrëveshjet

Bashkimi Evropian e konsideron si shumë të rëndësishëm zbatimin e të gjitha marrëveshjeve të arritura në kuadër të dialogut ndërmjet Qeverisë së Kosovës dhe asaj të Serbisë.
Maja Kocijancic, zëdhënëse e shefes për politikë të jashtme të BE-së, Catherine Ashton, tha për Radion Evropa e Lirë se grupet implementuese janë duke punuar në vazhdimësi, ngase për BE-në, zbatimi i marrëveshjeve ka një rëndësi të madhe.
“Çdo marrëveshje duhet të zbatohet dhe kjo është çështje shumë e qartë në dialog”, tha ajo.
Në anën tjetër, shefja e delegacionit të Kosovës në bisedimet me Beogradin, Edita Tahiri, shprehet mjaft e kënaqur me marrëveshjet. Duke folur për dy marrëveshje për të cilat kishte më shumë reagime në Kosovë, përkatësisht atë për përfaqësimin e Kosovës në nismat rajonale me fusnotë dhe atë të për lëvizjen e lirë, Edita Tahiri thotë se të dyja e kanë forcuar shtetësinë dhe pavarësinë e Kosovës.
Prishtina dhe Beogradi, në muajin shkurt, kanë arritur marrëveshjen për prezantimin rajonal të Kosovës me fusnotën që përmban Rezolutën 12 44 dhe mendimin e Gjykatës Ndërkombëtare të Drejtësisë në lidhje me aktin e shpalljes së pavarësisë. Kjo marrëveshje, sipas Tahirit, tashmë po zbatohet, dhe si rezultat ka sjellë përfaqësimin e Kosovës, pa pasur nevojë për praninë e UNMIK-ut, siç ka ndodhur në të kaluarën.
Kryenegociatorja Tahiri ka folur edhe për zbatimin e marrëveshjes për lëvizjen e lirë të qytetarëve në relacionet Kosovë-Serbi dhe anasjelltas. Sipas saj, udhëtimi po zhvillohet i papenguar me anë të letërnjoftimeve apo edhe pasaportave.
Bisedimet e ndërmjetësuara nga Bashkimi Evropian, kanë sjellë si rezultat shtatë marrëveshje të prezantuara në formën e konkluzioneve. Kocijancic ka paralajmëruar vazhdimin e punës së grupeve për zbatimin e marrëveshjeve, kurse për raundet e reja të bisedimeve tha se do të ketë një ngadalësim në proces, për shkak të fushatës zgjedhore në Serbi. 

Fule viziton Kosovën, javën tjetër Udhërrëfyesi për vizat

Komisioneri për Zgjerim i Bashkimit Evropian-së, Stefan Fule do të vizitojë Kosovën javën e ardhshme, ndërkaq sipas ministrit të Zhvillimit Ekonomik, Besim Beqaj javën e ardhshme vendi do të merr Udhërrëfyesin për liberalizim të vizave dhe konfirmimin për studimin e fizibilitetit.
Këtë lajm, sipas RTK-së, e konfirmoi ministri i Zhvillimit Ekonomik, Besim Beqaj, pas takimeve që kishte në Bruksel me zyrtarë të lartë të Komisionit Evropian.
Beqaj i tha Radio Kosovës se ka marrë mbështetje të fuqishme për synimet e Qeverisë së Kosovës për integrimin e vendit në strukturat evropiane.
Ai bëri të ditur se javën e ardhshme Kosova do të merr udhërrëfyesin për liberalizim të vizave dhe konfirmimin për studimin e fizibilitetit.

Jahjaga me Mustafën filloi bisedimet për Ferizajn

Presidentja Atifete Jahjaga dhe lideri i LDK-së, Isa Mustafa, janë takuar të premten për të biseduar rreth datës së mbajtjes së zgjedhjeve në Ferizaj.
Temë e bisedës, po ashtu ka qenë edhe krijimi i Këshillit për Integrime Evropiane nga presidentja. Javën tjetër Jahjaga për ketë temë do të takohet edhe me liderët tjerë, njofton Lajm.
“Takimet më kryetarin Mustafa janë të rregullta. Gati çdo muaj i mbajmë ato. Por ato takime ne i mbajmë edhe me liderë tjerë. Kemi biseduar për dy çështje konkrete. Për mbajtjen e zgjedhjeve në Ferizaj, për të cilat presidentja duhet të caktojë datën e zgjedhjeve dhe për të bërë këtë duhet të konsultohet më liderët politikë”, tha për “Lajm” këshilltari i presidentes, Ramush Tahiri.
“Deri më 30 mars duhet të shpallet data e zgjedhjeve në Ferizaj. Dhe biseda tjetër ka të bëjë me atë se presidentja është duke e krijuar Këshillin për Integrime Evropiane, ku Isa Mustafa duhet të marrë pjesë dhe duhet të thotë mendim e tij lidhur me këtë”, pohoi Tahiri.

Ivanovic: Me e pa zgjedhje, i ruajmë institucionet serbe

I ashtuquajturi sekretar për Kosovën, Oliver Ivanovic, ka thënë se institucionet serbe do të ekzistojnë në Kosovë edhe nëse nuk mbahen lokale të 6 majit.
Sipas tij, në institucione, në vend të të përzgjedhurve, do të jenë organet e përkohshme të cilat do t’i emëroj Qeveria e re e Serbisë, “në pajtim me Ligjin mbi Vetëqeverisjen Lokale, si një zgjidhje e përkohshme derisa të plotësohen kushtet që organet të votohen”, ka thënë Ivanovic për “Novi Magazin”.
Sipas tij, mbajtja e zgjedhjeve pa pëlqimin e UNMIK-ut dhe me kundërshtimin e bashkësisë ndërkombëtare, do të rrezikonte vazhdimësinë e zgjedhjeve parlamentare serbe në Kosovë.
Ivanovic është i bindur se zgjedhjet presidenciale dhe ato parlamentare të Serbisë do të bëhen pa problem dhe se nuk do të ketë konfiskimin të materialeve e as bastisje të Policisë së Kosovës në qendrat e votimit. 

VV: Thaçi e Feith, presion për Hoçën e Madhe

Lëvizja Vetëvendosje ka akuzuar kryeministrin, Hashim Thaçi dhe shefin e Zyrës Civile Ndërkombëtare, Piter Feith, për presion në Komisionin për bujqësi për amendamentimin e Ligjit për Hoçën e Madhe.
Sipas deputetëve të kësaj lëvizje, argumenti i vetëm i kreut të Qeverisë dhe Përfaqësuesit Civil Ndërkombëtar ishte arroganca dhe pushteti.
Deputetët e Lëvizjes Vetëvendosje, Glauk Konjufca dhe Liburn Aliu kanë thënë se ndryshimet që janë bërë në Projektligjin për Hoçën e Madhe me presionin e kryeministrit Hashim Thaçi dhe shefit të ICO-së, Piter Feith, janë shembull i keq i parlamentarizmit dhe i demokracisë.
“Dje dhe pardje për dy ditë më radhë, Piter Feith dhe kryeministri Thaçi e kanë përdorur si presion praninë e tyre. Argumentet nuk kanë qenë në anën e tyre fare. Në anën e tyre kanë qenë vetëm arroganca dhe pushteti që kanë”, tha Konjufca.
Sipas tij, në këtë drejtim, atyre po iu ndihmojnë edhe disa deputetë. “Atyre në këtë rast po iu ndihmojnë shumë edhe disa deputetë të cilëve nuk iu punon fare koka, por iu punon vetëm dora”, theksoi Konjufca.
Ndërkaq, Liburn Aliu, duke marrë si shembull amendamentin 7 të propozuar nga Thaçi e Feith, tha se Këshilli Zbatues dhe Monitorues po merr kompetenca jo vetëm për zonat e veçanta, por për tërë fshatin Hoçë e Madhe, transmeton Rtk.
“Këshilli Zbatues dhe Monitorues ka autoritet vetëm në zonat e veçanta dhe KZM-ja tash ka kompetencë jo vetëm për zonat e veçanta, por për tërë fshatin dhe kjo është në kundërshtim me ligjin që këta e kanë përpiluar vetë”, tha Aliu.
Gjatë mbledhjes së djeshme të Komisionit për bujqësi, pylltari dhe planifikim hapësinor, për rreth pesë orës është diskutuar për Projektligjin për Hoçën e Madhe, ku të pranishëm ishin edhe kryeministri Thaçi dhe përfaqësues civil ndërkombëtar Piter Feith.
Të gjitha amendamentet e propozuara nga këta të fundit kanë kaluar, përveç amendamentit 4 që ka të bëjë me numrin e anëtarëve të këshillit.
Megjithatë, edhe për këtë amendament në seancën e kuvendit do të shkojnë dy propozime, dhe në këtë drejtim, përfaqësuesit e “Vetëvendosjes” kanë frikë se as ky amendament nuk do të kalojë në Kuvend.
Ligji për Hoçën e Madhe, është prej ligjeve të fundit që dalin si obligim nga Pakoja e Ahtisarit.

Zgjedhjet e Serbisë, sfidë e re për Kosovën

Planet e Serbisë për të përfshirë territorin në Kosovë në zgjedhjet e 6 majit, mund të përshkallëzojnë armiqësitë mes të dy vendeve.
Ministri i Brendshëm i Kosovës, Bajram Rexhepi, ka thënë se policia po përgatit një plan veprimi për ta parandaluar Serbinë nga organizimi i votimeve edhe në Kosovë. Ai tha se nëse grupet serbe përpiqen të organizojnë takime zgjedhore, forcat paqeruajtëse nuk do të rrinë duarkryq.
Gerard Gallucci, ish-administrator rajonal i OKB-së për Mitrovicën e anëtar i bordit të Transconflict, tha për SETimes se Prishtina duhet të lejojë që të zhvillohen zgjedhjet në Kosovë.
"Ajo e ka alternativën e rrëzimit të thjeshtë të ligjshmërisë e rëndësisë së tyre, duke qëndruar e tërhequr dhe duke bërë atë që duhet", tha Gallucci, sipas të cilit zgjedhjet mund të parandalohen në jug të Kosovës, por jo edhe në veri.
“Përpjekja e dështuar për të ndaluar votimin do të thellojë ndarjen e do të nënvizojë se Prishtina nuk ka asnjë ndikim real në veri”, shton ai. "Përdorimi i forcës për të ndaluar zgjedhjet në Kosovën jugore ka të ngjarë të ketë sukses. Por, mund të çojë në incidente të shëmtuara që zor se do ta bënte Kosovën të dukej evropiane”.
Gallucci tha se komuniteti ndërkombëtar nuk ka të ngjarë ta ndihmojë Prishtinën që të parandalojë zgjedhjet në veri, nga frika e shkaktimit të një krize të re atje.
Kreu i Qendrës së Kosovës për Qeverisjen e Politikën Publike, Arjeta Demiri, thotë se komuniteti ndërkombëtar ka një detyrim për ta ndihmuar Prishtinën.
"Ishte komuniteti ndërkombëtar që ka siguruar Prishtinën se zgjedhje serbe nuk do të organizohen dhe nëse vendimi merret për ta përdorur policinë, policia e Kosovës duhet të mbështetet", tha Demiri. "Për shkak të pengesave rrugore, të gjendjes së tanishme në veri, do të jetë e vështirë të parandalohen zgjedhjet. Vetëm KFOR ka aftësinë për ta bërë atë".
Zëdhënësi i Zyrës Civile Ndërkombëtare, Christian Palme, tha se megjithëse legjislacioni mbështet Serbinë për zhvillimin e zgjedhjeve parlamentare në Kosovë, vetëm Prishtina mund të zhvillojë zgjedhje lokale.
"Zgjedhjet e vetme vendore të ligjshme në Kosovë janë ato të organizuara nga qeveria e Kosovës. Grupi Drejtues Ndërkombëtar në mënyrë të qartë i kërkoi Serbisë (në janar) që zgjedhjet vendore të saj të mos shtrihen në Kosovë", tha Palme. 

Veriu kalohet tërthorazi!

Pikëkalimet kufitare në veri të Kosovës janë të hapura, por serbët lokalë vazhdojnë të përdorin rrugët anësore.
Njëra nga këto rrugë, të cilën serbët e veriut e kanë përdorur për ta shmangur Jarinjën, është bllokuar dje, ndërsa kontrollin e atij kalimi ilegal e ka marrë xhandarmëria e Serbisë.
Shumica e njerëzve që hynë në veri të Kosovës nga drejtimi i Ribariqit, përdorin po ashtu rrugë alternative, duke shmangur kështu Bërnjakun. Kontrollin në këtë rrugë e bëjnë ushtarët e KFOR-it, të cilët në makina kërkojnë armë.
Për dallim nga Bërnjaku, përmes Jarinjës dje kalojnë të gjithë ata që vijnë nga Rashka e Serbisë dhe anasjelltas, raporton Tanjug.
Rruga anësore që anashkalon Jarinjën është bllokuar, sepse aty ka sasi të dheut që pamundëson qarkullimin e makinave. Afërsisht 200 metra nga kjo bllokadë, në një kodër në anën e Serbisë janë anëtarët e xhandarmërisë serbe.
Kontrolli i trafikut në të dy pikëkalimet zyrtare kufitare në veri të Kosovës bëhet nga pjesëtarët EULEX-it, ndërsa aty ka edhe doganierë lokalë.
Por, në veri të Kosovës mund të hyhet e dilet përmes shumë rrugëve tjera alternative, sidomos në drejtim të Novi Pazarit. Në këto rrugët KFOR-i nuk e kontrollon trafikon, ndërsa kontrolli para hyrjes në Kosovë bëhet nga pjesëtarët e MUP-it të Serbisë.
I ashtuquajturi kryetar i Mitrovicës, Krstimir Pantic, ka thënë për Beta se xhandarmëria serbe e ka ndalur pranë punktit të Rudnicës, ku e ka mbajtur disa orë, duke mos e lejuar që të përdorë rrugë alternative në rrugën e tij drejt Beogradit.
“Dacici është hipokrit i cili thotë se do të mbrojnë serbët në Kosovë, ndërsa ua kufizon lirinë e qarkullimit”, ka thënë ai, sipas të cilit xhandarët nuk e kanë përfillur edhe pse ky “u ka thënë se po niset në mbledhjen e Këshillit për Kosovën të Parlamentit të Serbisë”.
Xhandarmëria e Serbisë ka vendosur pengesa në gjashtë vende, kështu që Pantici është detyruar që të qarkulloj arave.
Serbët në veri të Kosovës vazhdojnë të bojkotojnë pikëkalimet zyrtare, për faktin se aty ka doganierë dhe policë të Kosovës.
EULEX-i përmes mediave lokale vazhdon të informoj qytetarët se Bërnjaku dhe Jarinja janë funksionale për komunikacion.
Jarinja është hapur për trafik jo komercial, derisa nuk instalohet infrastruktura e duhur për këtë. Ndërsa, Bërnjaku është hapur për qarkullim të udhëtarëve, si dhe për mallra jo komerciale, të cilat nga aty drejtohen te terminali doganor në jug të Mitrovicës