Fejohet Lil Wayne, në pritje të fëmiut?

Reperi amerikan Lil Wayne kishte dy arsye për të festuar Shën Valentinin, ai besohet t’ia ketë propozuar fejesën të dashurës së tij, e cila po ashtu është në pritje të fëmiut të parë të çiftit.
Krijuesi i hitit “Mirror” ia ka bërë propozimin kamarieres Dhea të martën dhe reperi nuk ka hezituar që lajmin ta bëj të ditur në Twitter. “Ajo tha Po”, shkroi Weezy në rrjetin social.
Ende nuk është konfirmuar zyrtarisht, por burimet e mediave amerikane besojnë se Dhea është shtatzënë. Lil Wayne tashmë ka katër fëmijë me dy të dashura tjera.

Conte i frustruar pas barazimit ndaj Parmës

Trajneri i Juventusit, Antonio Conte, është i zhgënjyer me barazimin pa gola ndaj Parmës.
Juventusi kishte dy ankesa për penalti, të cilat nuk u akorduan nga gjyqtarët dhe të cilat nuk kanë kaluar pa u përmendur nga Conte.
“Ne dominuam ndeshjen për një periudhë të gjatë dhe kishim nevojë të fitojmë në këto situata, andaj është për të ardhur keq që nuk nxorëm tre pikë”.
“Edhe njëherë, do të doja t’i shihja disa përsëritje. Nuk kishte asgjë në ankesën e Parmës, pasi Sebastian Giovinco aktroi. Sa na takon neve, pamjet flasin vetë. Mendoj se në këtë shkallë, gjyqtarët kanë frikë t’i japin penalti Juventusit. Ne kemi fituar vetëm një penalti këtë sezon”, ka thënë Conte.

Robinho i ngazëllyer pas fitores ndaj Arsenali

Robinho është i ngazëllyer me fitoren 4-0 të Milanit ndaj Arsenalit në kuadër të Ligës së Kampionëve.
Brazialin shënoi dy gola, derisa nga një shënuan Kevin Prince-Boateng dhe Zlatan Ibrahimovic, derisa Rossonerët tashmë me një këmbë janë në çerekfinale të garës evropiane.
“Sigurisht gjërat duken mirë, por ne kemi nevojë për të njëjtën kurajë edhe për ndeshjen e kthimit. Ne nuk mund të lejojmë kundërshtarët tonë për asgjë”.
“Zlatan Ibrahimovic është një lojtar i jashtëzakonshëm me asistimet dhe dredhitë e tij, andaj jam i kënaqur për të. Ne e dimë se kemi kualitet për të luftuar në të gjitha frontet dhe do të japim më të mirën”, ka deklaruar Robinho.

Szczesny: Nuk ishte nata jonë

Portieri i Arsenalit, Wojciech Szczesny, thotë se Milani ishte thjesht më i mirë se ata në ndeshjen e mbrëmshme të Ligës së Kampionëve.
Szczesny nxori topin nga rrjeta katër herë, gjatë një mbrëmje që ishte për t’u harruar për skuadrën angleze.
“Ne nuk ishim në lojën tonë më të mirë, por ju duhet t’i jepni meritat Milanit. Ata na ndëshkuan në çdo rast dhe shënuan disa gola të mirë. Ata merituan të fitojnë”.
“Është një ditë zhgënjyese për ne dhe shpresojmë se ne do të mund ta marrim veten dhe t’i sfidojmë ata në ndeshjen e dytë”, ka thënë Szczesny.

Wenger: Kjo është tmerr

Arsene Wenger e ka quajtur “tmerrues” rezultatin e mbrëmshëm, pasi Arsenali i mposht 4-0 nga Milani në Ligën e Kampionëve.
“Ishte një rezultat tronditës dhe një paraqitje tronditëse. Ishte një nga ato net të cilat kurrë nuk i harroni. Është nata jonë më e keqe në Evropë. Ne u ndëshkuam dhe me meritë”.
“Rezultati është tmerr. Në asnjë ndeshje tjetër ne nuk kemi qenë aq të dobët në sulm dhe në mbrojtje. Nuk kishte asnjë moment gjatë 90 minuta ku ne vërtet ishim në lojë, dhe gjithmonë ishte i njëjti problem, topat nga lart dhe ne u dërmuam”.
“Është vështirë ta analizosh, andaj është më mirë të mos flas shumë, të analizoj me kokë të qetë dhe të rigrupohemi për ndeshjen e ardhshme”, ka thënë Wenger.

Ferguson admirues i futbollit holandez

Menaxheri i Manchester United, Sir Alex Ferguson, thotë se ai është admirues i futbollit holandez.
Këto komente skocezi i ka bërë në prag të ndeshjes së sotme të Europa League, të cilën Manchester United e zhvillon kundër Ajaxit.
“Unë nuk kam ndonjë histori të madhe kundër ekipeve holandeze, por standardi është gjithmonë i mirë”.
“Njerëzit në futbollin holandez do t’ju tregojnë se problemi është se të gjithë lojtarët më të mirë duan të largohen. Fatkeqësisht kjo është mënyra me ekipet holandeze. Por ata ende vazhdojnë të nxjerrin lojtarë dhe kjo është meritë e tyre”, ka thënë Ferguson.

Ekonomia gjermane shënoi rënie

Ekonomia gjermane ka shënuar rënie prej 0.2 për qind në tremujorin e fundit të vitit të kaluar. Këto të dhëna i kumtoi Zyra Federale për Statistika me seli në Wiesbaden. Kjo është hera e parë që ekonomia gjermane shënon rënie në dy vitet e fundit. Mirëpo kjo rënie ishte më e vogël se pritej. Shkaku për këtë minus është mungesa e impulseve në tregti me vendet tjera si dhe kriza e borxheve, që ka kapluar disa vende të Bashkimit Evropian, thonë ekspertët.
"Rezultatet pak më të dobëta në fund të vitit 2011 nuk janë kurrfarë shkasi për ndonjë brengosje të thellë për recesionin e mundshëm. Ekonomia gjermane është një prej më të fuqishmëve dhe e vendosur në këmbë të shëndosha. Jam i bindur se Gjermania do të përballet me sukses me të gjitha sfidat", deklaroi Anton F. Börner, kryetar i Shoqatës Federale për Tregtinë Grosiste, Tregtinë e Jashtme dhe Shërbimet me vendet e tjera.
Me gjithë rezultatet më të dobëta në tremujorin e fundit, ekonomia gjermane ka shënuar një rritje gjatë vitit të kaluar. Madje edhe në tre muajt e fundit të vitit 2011 ekonomia gjermane ka shënuar madje rritje në eksport dhe shërbime për 1.5 për qind krahasuar me një vit më parë.

Parashikime të errëta

Kosovarët do të paguajnë trefish më shtrenjtë për energjinë elektrike, pas ndërtimit të termocentralit Kosova e Re. Sipas vlerësimeve të Bankës Botërore, një megavat i prodhuar nga linjiti me teknologji të lartë në këtë termocentral do të kushtojë mbi 80 euro - pa përfshirë distribuimin, ndërsa aktualisht KEK-u një megavat e prodhon me afro 30 euro. Ekonomistët thonë se ky çmim mund të jetë edhe më i lartë.
Për ta hequr qafe terrin energjetik, kosovarët do ta paguajnë shtrenjtë. Tarifat e energjisë elektrike mund të trefishohen me ndërtimin e termocentralit Kosova e Re, projekt ky që vlerësohet se do ta zgjidhë problemin e energjisë në Kosovë.
Në bazë të vlerësimeve të ekspertëve të angazhuar nga Banka Botërore për projektin Kosova e Re, një megavat energji i prodhuar nga ky termocentral do të kushtojë rreth 80 euro. Ndërkaq, çmimi aktual për një megavat të prodhuar nga Korporata Energjetike e Kosovës sillet nga 25 deri në 30 euro, shkruan Express.
Megjithëse për konsumatorët duket të jetë kosto e lartë, studimi i këtyre ekspertëve që ka marrë edhe pëlqimin e Qeverisë, këtë e sheh si alternativën më të lirë për prodhimin e energjisë. 

Serbët i thonë “jo” Prishtinës

Në veri të Kosovës ka përfunduar referendumi i organizuar nga serbët lokalë. Sipas rezultateve preliminare, të raportuara nga mediat serbe, 99.74 për qind e qytetarëve serbë u kanë thënë “jo” institucioneve të Prishtinës në pjesën veriore të vendit.
Shtrirjen e autoritetit të Kosovës në veri të lumit Ibër thuhet ta kenë përkrahur 69 votues, përkatësisht 0.26 për qind e tyre, transmeton Rel.
Në 82 vendvotime raportohet të kenë votuar 75.28 për qind e qytetarëve, ndërsa rezultatet përfundimtare pritet të bëhen publike të dielën.
Me organizimin e referendumit në Mitrovicë, Zubin Potok, Zveçan dhe Leposaviq, serbët lokalë kanë thënë se duan të qartësojnë “vullnetin e komunitetit të tyre për lejimin apo moslejimin e shtrirjes së autoritetit shtetëror të Kosovës në veri të vendit”.
Ky organizim është kundërshtuar si nga autoritetet kosovare, ashtu edhe ato ndërkombëtare. Një ditë më parë, Kuvendi i Kosovës ka miratuar deklaratën që e shpall të paligjshëm dhe jokushtetues referendumin e ashtuquajtur të veriut.
Megjithatë, serbët lokalë kanë shfaqur shpresën se komuniteti ndërkombëtar do të respektojë qëndrimin e tyre.
Kundër referendumit është shprehur zyrtarisht edhe Qeveria e Serbisë. Ajo u ka bërë disa herë thirrje përfaqësuesve serbë të veriut që të heqin dorë nga ky organizim.
Në anën tjetër, analistët kosovarë kanë shprehur bindjen se referendumi i veriut e gëzon mbështetjen e plotë të ekzekutivit të Serbisë. 

Thaçi: Ata që bëjnë zhurmë patriotike, kanë deficite serioze patriotike

“Opozita ka të drejtën qytetare dhe kushtetuese t’i kritikojë politikat qeverisëse, por më duket e paarsyeshme që tërë kohën t’u bijë sirenave të alarmit”, ka thënë kryeministri i Kosovës, Hashim Thaçi.
Sipas tij, brenda një harku kohor shkumë të shkurtër, Kosova ka hedhur hapa të rëndësishëm në të gjitha aspektet e fuqizimit të shtetësisë.
“Natyrisht ende ka shumë punë për t’u bërë. Ka gjëra që duhet përmirësuar, por realiteti historik i popujve të tjerë na ka treguar se shtetet demokratike nuk bëhen brenda natës”, ka thënë Thaçi për “Epoka e Re”.
Kreu i Qeverisë thotë se marrëveshja për bashkëpunimet rajonale, për të cilën po bisedohet këto ditë, nuk do ta dëmtojë shtetin e Kosovës.
“Më asnjë mënyrë nuk do të ndodhë diçka e tillë. E përsërisë, në asnjë mënyrë”, shton ai.
Thaçi në këtë intervistë ka folur edhe për “patriotët e vonuar” të skenës politike të Kosovës.
“Është një fakt i mirënjohur se ata që bëjnë zhurmë patriotike rëndom kanë deficite serioze patriotike në jetën e tyre. Shpeshherë kjo i komplekson, por politika nuk është vend ku shërohen komplekset”.
Ditë më parë, derisa kryenegociatorja Edita Tahiri po takohej me ndërmjetësin e bisedimeve Robert Cooper, aktivistët e Lëvizjes Vetëvendosje shkruan parullën “Kosova Republikë”, në ndërtesën e Qeverisë së Republikës së Kosovës. Aksioni, sipas lëvizjes, kundërshtonte bisedimet “për të hequr dorë nga Republika”.
Thaçi thotë se të shkruash nëpër mure parulla politike në vitin 1981, ka qenë domosdoshmëri e luftës për liri brenda një regjimi diktatorial.
“Të bësh një punë të tillë parullash në Kosovën demokratike të vitit 2012 është komike, foshnjore dhe jokreative”. 

Misioni i vështirë i Berishës

Merak i ka mbetur të lobojë edhe në Egjipt e Libi. Pas vizitës në 95 shtete të botës, beson se e ka ndihmuar shumë Kosovën. Thotë se burgun afrikan askush nuk mund ta imagjinojë pa e parë si është. Pasaporta e Kosovës i doli të jetë më e vlefshme sesa ajo amerikane.
Pas tri vjet fluturimi rreth e qark botës, e me 300 mijë euro të shpenzuara, James Berisha shprehet për “Express” se me misionin nuk ndjehet fare i zhgënjyer.
“Misioni në tërësi ka vuajtur shumë... Sa herë kemi mbetur pa ushqim, nuk mund ta imagjinoni. Sa herë kemi mbetur pa asnjë cent, vetëm këta të grupit e dinë. Si mision kemi vuajtur ditë e natë, por me siguri, sikur të ishte mision shumë më i lehtë i botës moderne, ndoshta nuk kishte pasur aq shumë respekt”, ka thënë ai.
Ndryshe, James Berisha në KTV ka thënë se në Eritre është arrestuar si shtetas amerikani agjent i CIA-së, praktikë kjo e ndjekur nga Eritrea për çfarëdo shtetasi amerikan.
"Kam qenë i arrestuar nga shërbimi sekret. Nuk më është lejuar as komunikimi me familjen, që dëshiroja t'ju tregoj se jam mirë, në këtë planet. Kushtet në burg kanë qenë katastrofale dhe shumë të këqija. Në fillim nuk më kanë lejuar të dal fare jashtë qelisë së burgut. 30 për qind e kam ditë që jam gjallë, kurse 70 për qind kam menduar se jam i vdekur. Kjo përqindje e trupit tim po vdiste", ka thënë Berisha. 

Fitou: Heqja e vizave merr vite

Nëse ndokush në Kosovë mendon se dialogu për liberalizimin e vizave do të jetë i lehtë, atëherë ai gabon, ka thënë ambasadori francez në Kosovë, Jean François Fitou.
“Nëse mendon se ky dialog do të jetë i shkurtër, atëherë përsëri gabon. Po ashtu, nëse ndokush mendon se ai dialog do të bëhet sivjet, përsëri e ka gabim”, ka thënë ai në një intervistë për “Kosova Sot”.
“Për ta arritur një regjim të plotë pa viza me BE-në do të duhet që të kalojnë vite të tëra”.

Kreu i veteranëve të UÇK-së akuzohet se votoi 150 herë

Kryetari i OVL të UÇK-së, Muharrem Xhemajli, akuzohet se ka votuar 150 herë në një fshat të Drenasit, në zgjedhjet e dhjetorit 2010.
Një prokuror i EULEX-it, bazuar në dëshmi të një vëzhguesi të “Vetëvendosjes” dhe në materialin zgjedhor të Komisionit Qendror të Zgjedhjeve, ka ngritur aktakuzë për vepër penale të mashtrimit në votime dhe për dëmtim të buxhetit të Kosovës.
Siç shkruan “Koha Ditore”. Xhemajli për këtë vepër penale mund të dënohet deri në 5 vjet burgim.
Sipas Xhemajlit, këto janë shpifje dhe akuza të pabaza të Lëvizjes Vetëvendosje, për shkak të qëndrimeve të tij karshi kësaj lëvizjeje politike dhe liderit të saj, Albin Kurti.

Wenger: Kam dashur të nënshkruaj me Ibran

Arsene Wenger ka zbuluar se ai ishte përpjekur të nënshkruajë me sulmuesin e Milanit, Zlatan Ibrahimovic, kur ai ishte lojtar junior.
“Ai është një lojtar i shkëlqyeshëm. Nëse ju shikoni në rekordin e tij, në atë çfarë ai ka fituar, ai e ka personalitetin e tij të bazuar në një besim të fuqishëm në veten”.
“Kjo është një kualitet i një niveli të lartë që ndonjëherë mund të shihet si vetëbesim i tepruar, por nuk mendoj se ai është kështu, pasi ai shpërthen me paraqitjet e tij në ndeshjet e mëdha”.
“Kjo është arseja se pse besoj se ai ishte në fushën stërvitore të Arsenalit para fillimit të karrierës së tij. Para se të kalonte te Ajaxi, ne ishim të interesuar në të dhe ai arriti të ndërtojë një karrierë të shkëlqyeshme”, ka thënë Wenger.

Fabregas: Bëmë një lojë të mërzitshme

Mesfushori i Barcelonës, Cesc Fabregas, thotë se loja e Blaugranëve në ndeshjen e mbrëmshme të Ligës së Kampionëve kundër Bayern Leverkusen ishte ca e mërzitshme.
Kampioni në fuqi i Evropës shënoi fitore 3-1 në BayArena në ndeshjen e parë të 1/8-tës së finales, dhe Fabregas është i kënaqur me rezultatin, por jo edhe me lojën.
“Mbase kjo lloj loje është ca e mërzitshme, por ne kishim nevojë për një paraqitje të tillë për të na hyrë në punë”.
“Kishte arsye se pse luajtëm kështu në pjesën e parë: ata janë një skuadër shumë fizike. Ata mund ta komplikojnë të gjithë ndeshjen me një kundërsulm, por ne e dominuam situatën. Ne jemi shumë të kënaqur”, ka deklaruar Fabregas për faqen zyrtare të Barcës.

Zubizarreta: Reali mund të rrëshqasë

Drejtori sportiv i Barcelonës, Andoni Zubizarreta, thotë se ata nuk do të heqin dorë nga Liga, pavarësisht se janë dhjetë pikë prapa Real Madridit.
“Kjo nuk varet nga ne, por ne nuk do të ndalojmë duke luftuar. Ne do ta ruajmë fokusin pasi nëse diçka i ndodhë Madridit, ne duhet të jemi të gatshëm ta shfrytëzojmë këtë avantazh”.
“Real Madridi është një skuadër e fuqishme dhe është e aftë ta ruajë formën e nevojshme për të mbledhur pikët për ta fituar ligën”, ka thënë Zubizarreta.

Seedorf ende shpreson të luajë në Angli

Veterani i Milanit, Clarence Seedorf, thotë se ai dëshiron të luajë në Angli para se të pensionohet.
“Gjithmonë jam i hapur për aventura të reja. Gjithmonë kam dashur të luaj në Angli dhe nuk e di se pse kjo kurrë nuk ndodhi, por gjithçka mund të ndodhë të në ardhmen”, ka thënë Seedorf për MilanNews.
Holandezi pritet të jetë titullar në ndeshjen e sotme të Ligës së Kampionëve, kur Milani pret Arsenalin në San Siro.

Messi: Liga VËSHTIRË të fitohet

Ylli i Barcelonës, Lionel Messi, është i kënaqur me fitoren e Ligës së Kampionëve ndaj Bayer Leverkusen, por pranon se La Liga është jashtë duarve të tyre.
Barcelona pësoi disfatë nga Osasuna të dielën në kuadër të La Ligës, por u rikthye kah fitoret mbrëmë duke mposhtur Bayer Leverkusen në Ligën e Kampionëve.
“Ne duhej ta ndryshonim qasjen tonë. Kjo është Liga e Kampionëve dhe ne e dinim se do të ishte një ndeshje e vështirë kundër një rivali gjerman. Ishte e rëndësishme ta ndryshojmë qasjen pas asaj çfarë ndodhi në ligë”.
“Liga është bërë shumë e vështirë për ne, por ne do të vazhdojmë deri në fund”, ka deklaruar Messi pas fitores ndaj Leverkusen. 

Ancelotti: Milani superior ndaj Arsenali

Trajneri i Paris Saint Germain, Carlo Ancelotti, mendon se Milani do ta mposhtë Arsenalin në ndeshjen e sotme të Ligës së Kampionëve.
“Futbolli italian ka bërë hapa përpara dhe futbolli anglez nuk është në formë të mirë, që tregon edhe eliminimi i Manchester Cityt dhe Manchester United”.
“Napoli tashmë ka arritur diçka të shënuar duke mposhtur skuadrën e Cityt që është dominuese në Ligën Premier, andaj nuk shoh arsye se përse ata nuk mund ta përsërisin. Mendoj se Milani është superior ndaj Arsenalit”, ka thënë Ancelotti.

Bora vonon tridhjetë kilometrat e reja të autostradës

Tridhjetë kilometrat e reja të Autostradës Vermicë Merdare, të cilat janë parashikuar të kryhen në prag të njëqindvjetorit të shtetit shqiptar, më 27 nëntor, mund të mos jenë gati në kohën e paraparë, për shkak të dimrit të madh.
Ka dy muaj në autostradë punohet me kapacitete minimale, ndërsa gjatë dimrit të kaluar puna nuk ishte ndërprerë fare.
Ministri i Infrastrukturës, Fehmi Mujota, ka thënë për Koha Ditore, se beson që gjithçka do të shkojë sipas planit, përderisa e ka quajtur vendim të drejtë të ndërtuesit, ndërprerjen e punëve për shkak të motit të lig.
Jemi në gjendje të dorëzojmë punën brenda afateve të premtuara, por do të japim një vlerësim kur koha të përmirësohet, ka shpjeguar zëdhënësja e “Bechtel & Enka”, Ela Ruçi.
Kosovarët e presin me padurim përfundimin e kësaj autostrade, për ta parë një rrugë evropiane në vendin e tyre. 

Qeveria subvencionon me dy milionë euro Termokosin

Pas vështirësive në furnizim me ngrohje, për shkak të mungesë së mazutit dhe kërkesës së Termokosit për të ndihmuar financiarisht nga Qeveria e kovës, kjome fundit ka marrë vendim që ti ndaj dy milionë euro Termokosit.
Ministria e Zhvillimit Ekonomi (MZHE), kaq njoftuar nëpërmjet një njoftimi për media se ngrohtorja e qytetit do të subvencionohet me dy milionë euro, për deri sa Qeveria përmes MZHE-së gjatë këtij viti do të subvencionojë Termokos-in me tre milionë euro. Shumën prej një milion eurove do të paguhet në xhirollogarinë e Termokosit në vjeshtën e këtij viti.
“Nga mjetet e ndara për vitin 2012 me 13 shkurt në llogarinë e Termokos-it janë bartur 1.463,000 euro, ndërsa deri në fund të këtij muaji do të paguhen 540.000 euro, do të thotë se subvencionet vetëm në këtë muaj arrijnë shumën prej 2 milionë eurosh”, thuhet në njoftimit e MZHE-së për media.
Në komunikatë theksohet se edhe pse bëhet fjalë për ndërmarrje publike në pronësi të Komunës së Prishtinës, Termokos edhe gjatë vitit të kaluar nga Qeveria e Kosovës ka marrë subvencione në vlerë prej 1.525.000 euro, prej të cilave, para vitit të ri, në kohën kur kanë filluar ngricat janë paguar 904.000 euro.

Tkurret ekonomia e Eurozonës

Statistikat zyrtare tregojnë se ekonomia e Eurozonës është tkurrur për 0.3 për qind gjatë tremujorit të katërt të vitit 2011, çfarë është rënia e parë e tillë në zonën 17 anëtarësh, në më shumë se dy vjet.
Shifrat tregojnë se Holanda dhe Italia kanë hyrë zyrtarisht në recesion, ndërkohë që Franca ka treguar një rritje të papritur në prodhimin ekonomik.
Gjermania, ekonomia më e madhe e Evropës, ka njoftuar po ashtu për një tkurrje të vogël. Këto njoftime vijnë në kohën kur huadhënësit ndërkombëtarë nuk kanë përfunduar ende programin e ndihmës për Greqinë, e cila mund të përballet me falimentim në muajin mars.
Ministrat e Eurozonës kërkojnë më shumë shkurtime dhe garanci nga pala greke.

Jahjaga në “luftë” me korrupsionin

Presidentja e Kosovës, Atifete Jahjaga, ka mbledhur sot atë që tash e tutje do të njihet si Këshilli Kombëtar Kundër Korrupcionit.
Jahjahga tha se ky trup - që në përbërjen vetë do të ketë krerët e të gjitha institucioneve të pavarura, që në një mënyrë apo tjetër e kanë detyrë luftën ndaj kësaj dukurie - do të ketë qellim të hartoj politika dhe koordinoj veprimet në këtë drejtim.
“Nuk do të lejojmë që krimi të jetë më i organizuar”, tha presidentja në fjalën e vet inauguruese.
Më tutje, e para e vendit është shprehur e vendosur që luftën ta vazhdoj deri në çrrënjosjen e plotë të korrupsionit.
Në takimin inaugurues ishin të pranishëm edhe kryeparlamentari Jakup Krasniqi, kryeministri Hashitm Thaqi dhe përfaqësues të misioneve diplomatike në Kosovë.
Këshilli do të mblidhet një herë në muaj dhe do të dal me raporte për punën e vet ç do tre muaj.

Kuvendi, me deklaratë kundër referendumit në veri

Në seancën e Kuvendit të Kosovës, Grupi Parlamentar i Partisë Demokratike të Kosovës, në harmoni me grupet e tjera parlamentare, pritet të nxjerrë një deklaratë të përbashkët për të kundërshtuar mbajtjen e referendumit në veri të Kosovës.
Shefi i Grupit Parlamentar i PDK-së, Adem Grabovci ka thënë se ky referendum është kundërshtuar nga të gjithë, si nga institucionet e vendit ashtu edhe nga faktori ndërkombëtar.
“Ne jemi dëshmitar që dje ka ndodhur një ngjarje në veri të vendit: mbajtja e një referendumi ilegal, siç është vlerësuar dhe siç është realitet edhe i kundërshtuar nga gjithë faktori ndërkombëtar, por edhe nga Qeveria e Republikës së Kosovës”, ka thënë Grabovci, transmeton “Kosovapress”.
“Ne sot ishim në konsulta me gjithë shefat e grupeve parlamentare, prandaj unë këtu, në emër të gjithë grupeve parlamentare, i propozoj kuvendit që të lëshojmë një deklaratë. Ne do të harmonizojmë tekstin dhe do të prezantojmë për të votuar”.
Kjo kërkesë, me votim formal, ka hyrë në pikën e katërt të rendit të ditës.
Seanca është duke vazhduar me deklarime jashtë rendit të ditës, ndërsa më pastaj do të vazhdojë me pyetjet parlamentare. 

BE do të ndihmoj në integrimin e veriut

Përfaqësuesi Special i Bashkimit Evropian në Kosovë, Samuel Zbogar, ka thënë se misioni i BE-së përkrahë Kosovën në rrugën evropiane.
“Për këtë qëllim është vendosur që zyra e Komisionit Evropian në Kosovë të jetë edhe ajo e përfaqësuesit të BE-së për Kosovë”, ka thënë Zbogar gjatë takimit me kryetari e Lidhjes Demokratike të Kosovës, Isa Mustafa.
Sipas tij, gjatë dhjetorit të vitit të kaluar BE-ja ka ndërmarrë vendime të rëndësishme për Kosovën, përfshirë fillimin e procesit për liberalizimin e vizave, marrëdhëniet kontraktuale tregtare si dhe proceset tjera që do të vazhdojnë.
Ai e cilësoi të rëndësishme procesin e dialogut Kosovë-Serbi dhe ndihmën që BE-ja është e gatshme ta ofroj në këtë aspekt e që nënkupton integrimin e veriut, përfaqësimin rajonal të Kosovës etj.
Në anën tjetër, Mustafa ka thënë se LDK-ja ka pasur vërejtjet e saja rreth fillimit të procesit të dialogut Kosovë -Serbi, veçmas ndaj aspektit të përgatitjes jo të duhur, agjendës jo të qartë, dhe qasjes jotransparente ndaj Parlamentit dhe opinionit publik. 

Ndihma nga ajri për barinjtë e Restelicës

Pas njoftimit nga banorët lokalë të Restelicës dhe të fshatrave përreth, për pesë barinj të izoluar në vendin e quajtur ”Zlli Potok”, KFOR-i dje ka shpërndarë ndihma nga helikopterët.
 Sipas një njoftimi, Qendra e Situatave e Ministrisë së FSK-së, në bashkërendim me Qendrën e Situatave të Qeverisë, me KFOR-in, banorët lokalë dhe shoqatën ”Nëna Terezë”, arriti të koordinojë gjitha aktivitetet që ky operacion humanitar dhe emergjent të përfundojë me sukses.
Banorët nuk janë më në rrezik, pasi ndihmat e hedhura nga ajri - artikuj ushqimorë dhe gjëra tjera të nevojshme - do t’ua mundësojnë atyre një qëndrim më të gjatë në lokalitetin ku thuhet se janë duke u kujdesur për bagëtitë.
Banorët shprehen mirënjohës për të gjitha institucionet qeveritare dhe joqeveritare të Republikës së Kosovës, për KFOR-in dhe gjithë të tjerët që kontribuuan në këto momente të rënda për ta. 

Kosova si mësim për Sirinë

Bill Clinton, duke reflektuar mbi vendimin e tij për të ndërhyrë në Kosovë, ka shkruar: “Djegia e fshatrave dhe vrasja e të pafajshmëve i takon së kaluarës. E dija se ishte çështje kohe kur vet Miloshevici do t’i takonte, po ashtu, të kaluarës”. Në Siri ne sot shohim se si historia përsëritet. Ngurrimi i bashkësisë ndërkombëtare për të vepruar, po zgjatë mizoritë kundër civilëve sirian, shkruan për “Financial Times”, Radwan Ziadeh, analist i Institut amerikan të Paqes dhe anëtar i opozitës siriane.
Por, situata e Sirisë nuk është shumë e ndryshme nga ajo e Kosovës në fillim të vitit 1998, kur liderët perëndimorë bënin thirrje për përfundimin e dhunës, mirëpo goditja brutale e regjimit serb vazhdonte tutje. Numri i të vdekurve në mesin e shqiptarëve të Kosovës rritej, ndërsa me qindra-mijëra u detyruan të braktisnin shtëpitë e tyre.
Regjimi i Assadit ka adaptuar një politikë të ngjashme me atë të Slobodan Miloshevicit, duke shënjuar popullatën civile në vendet si Homsi dhe Hama. Në këtë moment kritik, kur është e qartë se Bashar al-Assadi nuk do të ndalë vrasjet dhe masakrat, anëtarët e bashkësisë ndërkombëtare, në kërkimin për të shpëtuar popullsinë siriane, mund të nxjerrin mësime të vlefshme nga Kosova: se çfarë duhet bërë, dhe çfarë nuk duhet bërë.
Përkundër vetos ruse dhe kineze ndaj Rezolutës së Ligës Arabe në KS të OKB-së, ka ende shpresë se diçka mund të bëhet për Sirinë. SHBA ishte në gjendje të ndihmoj në krijimin e një Kosovë të pavarur jashtë Këshillit të Sigurimit të OKB-së, pa humbur asnjë nga ushtar amerikan.
Bashkimi Evropian po debaton për një raund të ri të sanksioneve kundër z Assad dhe miqve të tij. Por, sanksionet, siç e di shumica, janë thikë me dy tehe. Derisa trupat, si BE, kanë punuar për sanksione kundër regjimit, për të kursyer civilët dhe infrastrukturën, regjimi Assad e ka ndërtuar një ekzistencë të izoluar, të ngjashme me atë të Koresë së Veriut. Prandaj, qeveria në Damask ka të ngjarë t’i tejkaloj sanksionet dhe këtë barrë. Gjëja e fundit për të cilën ka nevojë populli sirian - tashmë viktimë e terrorit dhe të shkatërrimit humanitar - është kampanja ndërkombëtare që dobëson më tej ekonominë dhe rindërtimin e bën më të vështirë.
Është e rëndësishme, megjithatë, që komuniteti ndërkombëtar të filloj të gjitha përpjekjet e mundshme për të bërë presion ndaj regjimit të Assadit dhe për të minuar mbështetjen për një status quo. Një strategji e harmonizuar e ndërhyrjes do të dukej si në vijim: Së pari, si në Kosovë, bashkësia ndërkombëtare - qoftë kjo e misionit të OKB-së dhe Ligës Arabe apo e “Miqve të Sirisë” - duhet të caktoj zona të sigurta që do të mbrohen nga ajri. Një fushatë ajrore do të zvogëlonte rrezikun për akterët e ndërhyrjes. Bashkësia ndërkombëtare, megjithatë, duhet të ndihmojë të përforcojë këto streha, përndryshe i rrezikojnë bombardimet e tyre nga një Assad i pacipë dhe i trimëruar. Mbrojtja ajrore nga një koalicion i tillë mund të përdoret gjithashtu për të mbrojtur korridoret humanitare.
Kritikët e ndërhyrjes shqetësohen se një fushatë e tillë mund të nxisë terrorizmin dhe tensionet sektare në të gjithë rajonin. Opozita siriane, megjithatë, ka pasur pothuajse një vit kohë për ta planifikuar një Siri post-Assade, dhe Këshilli Kombëtar Sirian e ka organizuar veten në një mënyrë të tillë sa për t'iu përgjigjur frikës për grindjet sektare. Së pari, udhëheqja e KKS-së përfshinë anëtarë të çdo grupi etnik dhe fetar në Siri. Ajo ka edhe nga një plan për drejtësi kalimtare. Sekularistët dhe islamikët janë të bashkuar, në emër të krijimit të ardhmes paqësore dhe demokratike për Sirinë.
Frika e tensioneve sektare përhapet në gjithë rajonin, sepse po gabohet në lidhje me ndërhyrjet. Është mosveprimi i bashkësisë ndërkombëtare që kërcënon ta shtyjë Sirinë në luftë të plotë civile, gjë që do të nxiste, ndër të tjera, ndarje në Irak, Liban dhe Jordani. Nëse Siria bie në luftë civile, ashtu do të bie edhe rajoni.
SHBA-të mund të jenë të lodhur nga lufta, por ajo ende mund të bashkohet me anën e drejtë të historisë, duke mbështetur një koalicion ndërkombëtar për të ndihmuar e shpëtuar popullin sirian. Deri tash, civilët sirianë kanë qenë viktima të politikës ndërkombëtare. Tash, vetëm një ndërhyrje ndërkombëtare mund të ndalë mizoritë.

Vazhdon referendumi i serbëve në veri

vazhdon referendumi i serbëve, që ka filluar dje. Në Leposaviq referendumi fillon sot.
 Në këtë referendum, që është hedhur poshtë nga institucionet e Kosovës dhe nga ndërkombëtarët, duke u cilësuar si joligjor, serbët e kësaj pjese të Kosovës deklarohen për raportin e tyre ndaj institucioneve të Republikës së Kosovës.
Thuhet se në katër komunat në pjesën veriore të Kosovës janë afro 35 mijë votues serbë. Dje në referendum kanë dalë 48 për qind e tyre.

Dacic kërcënon prapë me Rusinë

Zëvendëskryeministri dhe ministri i Brendshëm i Serbisë, Ivica Dacic, ka thënë se Evropa do të bënte gabim të madh nëse Serbia në mars nuk e merr statusin e kandidatit për anëtarësim në BE.
 Duke folur për kushtet që Serbia duhet t’i plotësoj, përkitazi me këtë, Dacic ka thënë se zgjidhja varet nga dialogu me Prishtinën.
Në një intervistë për “Vecernji Novosti”, ai shton se Serbia duhet të insistoj në Rezolutën 1244, për “përfaqësimin asimetrik të Kosovës në forumet rajonale”.
“Nëse BE dhe Amerika nuk i kuptojnë qëndrimet tona dhe vazhdojnë të jenë në anën e shqiptarëve, atëherë është normale të pritet se në pushtet vjen një opsion politik i cili ndoshta do të kthehet kah Rusia”, ka thënë ai. 

Çitaku: Punojmë për 10, për me marrë 6

Kosova është duke e paguar haraçin e krizës së euros, fluksit të refugjatëve nga Lindja e Mesme dhe Afrika Veriore dhe probleme të tera aktuale të Bashkimit Evropian, thotë ministrja e Integrimeve Evropianeve, Vlora Çitaku, duke shtuar se vendet e tjera të rajonit përfituan nga gjendja e dikurshme më e “relaksuar në shtëpinë evropiane”!
 “Ne duhet të punojmë për një 10-she, në mënyrë që të marrë një 6-she”, ka thënë Çitaku për “Tribuna Shqiptare”.
Ajo vlerëson se Kosova e meriton liberalizimin e vizave dhe integrimin, jo për hir të një detyrimi bazuar në fondamentet morale, por sepse i ka “përmbushur kriteret e kërkuara”.
Ndërsa, premton se pas marrjes së Udhërrëfyesit, brenda një afati rekord “qytetarët tanë do të mund të lëvizin pa viza”, pasi edhe pësimet e vendeve të rajonit janë shndërruar “në mësime për Kosovën”!