Një burim brenda GP të PDK-së ka treguar për Kohën Ditore skenarin e vazhdimit të seancës.
“Numri i deputetëve të partive të koalicionit qeverisës do të jetë i mjaftueshëm për të bërë kuorumin në seancë. Kanë qenë 11 deputetë jashtë vendit dhe ata janë kthyer. Po ashtu, prezentë do të jenë edhe deputetët e GP ‘6 +’, që kishin munguar. Pritet të ketë edhe deputetë të opozitës. Pasi të hapen punimet e seancës që është ndërprerë të premten, shefi i GP të PDK-së do të dalë për ta përsëritur kërkesën për harmonizimin e dy rekomandimeve që kanë dalë gjatë interpelancës për të pagjeturit”, ka thënë burimi.
“Nëse opozita e lëshon seancën, çka edhe pritet të ndodhë, punimet do të vazhdojnë, do të zhvlerësohet votimi paraprak dhe drafti që do të jetë gati deri të martën do të votohet”.
Gazeta nuk ka mundur të marrë një qëndrim zyrtar në PDK. Telefonatave nuk u janë përgjigjur gjatë ditës kryeparlamentari Jakup Krasniqi, shefi i GP të PDK-së, Adem Grabovci, si dhe nënkryetari i Kuvendit, Xhavit Haliti.
