Mbretërit sundojnë Spanjën!

Me fitoren prej 3-0 kundër Athletic Bilbaos në Estadio San Mames, Real Madridi është shpallur edhe matematikisht kampion i Spanjës për sezonin 2011/2012, dy javë pa përfunduar La Liga.
Javi Martinez e preku topin me dorë në zonë, ndërsa arbitri akordoi penalti në favor të mysafirëve, mirëpo goditjen e Cristiano Ronaldos e ndali portieri Iraizoz (12’).
Pas një aksioni të Los Blancos, Gonzalo Higuain e shënoi golin e parë në ndeshje, ndërsa asistues ishte Mesut Oezil (16’).
Numri dhjetë ishte realizues i golit të dytë pas një kundërsulmi të Mbretërve (20’), ndërsa meritorë për këtë gol ishin Alonso dhe Ronaldo, i cili e bëri asistin.
Pesë minuta brenda pjesës së dytë, Xabi Alonso dërgoi një harkim nga këndi dhe Cristiano Ronaldo e nguliti me kokë topin në rrjet (50’).
Në vazhdim të ndeshjes, baskët tentuan të bënin diçka dhe të shënonin së paku golin e nderit për tifozët e pranishëm në stadium, por nuk arritën ta bëjnë as këtë.
Pas kësaj fitoreje, Real Madridi ka 94 pikë, shtatë më shumë se Barcelona kur kanë mbetur edhe dy xhiro për t’u zhvilluar. Kjo do të thotë se Los Merengues shpallen kampionë të Spanjës për të 32-tën herë në histori të La Ligas.
Ndërkaq, Jose Mourinho bëhet trajneri i parë në histori që i ka fituar katër kampionate të ndryshme elitare në Evropë (Portugali, Angli, Itali dhe Spanjë).

Interi nuk luan në LK

Me rezultat prej 3-1, Interi është mposhtur nga Parma edhe pse ishin zikaltrit ata që shënuan të parët.
Wesley Sneijder shënoi (13’) dhe vendosi rezultatin e pjesës së parë, mirëpo vendasit shënuan tri herë në gjysmën e dytë.
Fernando Marques (53’), Sebastian Giovinco (55’) dhe Jonathan Biabiany (83’) ia siguruan Parmës tri pikë nga ky takim.
Pas fitoreve të Napolit dhe Udineses, Interi mbetet tri pikë prapa pozitës që dërgon në Ligën e Kampionëve.
Kur kihet parasysh se Nerazzurrët nga dy ndeshjet e mbetura, në njërën luajnë ndaj rivalit Milan (që po lufton për titull), atëherë mund të thuhet se e kanë të pamundur kualifikimin në Ligën e Kampionëve.

Chelsea jashtë zonës së LK-së

Newcastle United ka shënuar fitore prej 2-0 si mysafir i Chelseat për të mbetur në garë për pozitën e katërt që çon në Ligën e Kampionëve, ndërkohë që Blutë kanë mbetur prapa me pikë.
Heroi i mbrëmjes në takimin e zhvilluar në Stamford Bridge ishte Papiss Cisse, i cili shënoi të dy golat e mysafirëve (19’ dhe 90’+3).
Pas këtij takimi, Newcastle ka pikë të barabarta me Tottenhamin (nga 65) në garën për pozitën e katërt.
Ndërkaq, Chelsea gjendet katër pikë prapa dhe me vetëm dy xhiro të mbetura thuajse e ka të pamundur ta zë këtë pozitë. 

Juve i jep shpresa Milanit

Juventusi ka barazuar me rezultat 1-1 përballë Lecces duke e lejuar Milanin që ta ngushtojë diferencën e pikëve në minus një.
Andrea Pirlo e mori topin në mesfushë dhe e dërgoi në zonë, ndërsa aty ishte Claudio Marchisio për ta shënuar golin e avantazhit (8’).
Në gjysmën e dytë, gjërat u lehtësuan më shumë për Bianconerët, pasi Juan Cuadrado u përjashtua me kartonin e dytë të verdhë (54’), megjithatë ata nuk e shfrytëzuan epërsinë numerike në fushë.
Ishte skuadra mysafire ajo që shënoi. Një gabim amator të portierit Buffon e shfrytëzoi Luis Fernando, i cili e barazoi rezultatin (85’).
Nga ana tjetër, Milani ka shënuar fitore prej 2-0 kundër Atalantas.
Ibrahimovic pasoi te Boateng, i cili krosoi drejt Sulley Muntarit dhe ky i fundit shënoi golin e epërsisë (9’).
Në minutat shtesë (90’+2), Robinho e shënoi edhe golin e dytë për Rossonerët.
Kur kanë mbetur edhe dy xhiro për t’u zhvilluar gara për titull është bërë më e nxehtë se kurrë, pasi që Juventusi ka vetëm një pikë më shumë se Milani. 

Barca fiton – Messi shkruan historinë

Barcelona ishte e pandalshme në fitoren prej 4-1 kundër Malagas, në takimin në të cilin Lionel Messi realizoi het-trik.
Carles Puyol kaloi vendasit në epërsi pas asistimit të Andres Iniestas (13’), ndërsa Rondon e barazoi rezultatin (26’).
Iniesta u ndal në mënyrë të parregullt në zonë dhe penaltinë e akorduar e shndërroi në gol Lionel Messi (35’), duke kthyer avantazhin e ekipit vendas dhe me këtë rezultat skuadrat shkuan në pushim.
Në gjysmën e dytë, Leo Messi nxori një penalti dhe konvertoi në gol (59’), duke barazuar kështu rekordin e Gerd Mueller me 67 gola të shënuar në një sezon.
Superylli argjentinas pranoi një top nga Andres Iniesta për ta kompletuar het-trikun e tij (64’) dhe për ta shënuar golin historik që thyen rekordin shumëvjeçar të legjendës gjermane (në sezonin 1972/1973, Mueller shënoi 67 gola me fanellën e Bayern Munichut në të gjitha garat; ndërsa në sezonin 2011/2012 Leo Messi deri më tash ka shënuar 68 gola në të gjitha garat me Barcelonën).
Pas kësaj fitoreje, Barcelona gjendet katër pikë prapa Real Madridit, që do të thotë se Los Blancos duhet të fitojnë ndaj Athletic Bilbaos nëse duan të shpallen kampionë këtë javë, përndryshe duhet ta shtyjnë festën e tyre

Ndalohet seksi në teleferik!

Autoritet lokale në provincën kineze Henan kanë sjellë një ligj, i cili i ndalon marrëdhëniet seksuale në teleferikë.
Ligji ka ardhur në fuqi pasi operatorët e teleferikëve janë ankuar se gjithnjë e më shumë çifte janë kapur duke kryer marrëdhënie seksuale në teleferikë.
“Pas ankesave të shumta, autoritetet kanë qenë të detyruara që të ndërpresin sjelljen e tillë të të rinjve”, raportojnë mediat kineze.
Në të gjitha kabinat është vendosur shenja e ndalimit të marrëdhënieve seksuale gjatë kohës së vozitjes. Ndërsa është interesante se ndalesa vlen vetëm për çiftet që kanë lindur në vitet e nëntëdhjeta. 

Tualeti më i shpejtë në botë (Video)

Kanadezja Jolene van Vugt ka vënë një rekord të ri në vozitjen me “guacën e motorizuar të tualetit”.
Jolene suksesin e saj e ka arritur në Sydney të Australisë, ndërsa rekordin e mëparshëm e ka thyer për shtatë kilometra në orë më shumë.
Gjatë kohës së thyerjes së rekordit, ajo e ka pasur të ndaluar të shkojë në WC. 

Fergie e dëshiron sërish Piquen

Sir Alex Ferguson dëshiron që ta sjellë sërish Gerard Piquen te Manchester Unitedi – raporton Daily Star.
Mbrojtësi i Barcelonës ka qenë te Djajtë e Kuq gjatë viteve 2004-2008, ndërsa njoftohet se Fergie do të përpiqet që ta transferojë gjatë afatit të ardhshëm kalimtar.
Nga ana tjetër, thuhet se pas marrjes së lajmit që Pep Guardiola po largohet nga Barca, edhe Pique do të kërkojë një sfidë të re. 

Reali të enjten feston titullin

Real Madridi nesër (e enjte) do ta festojë titullin e kampionit të Spanjës nga ora 19:00 në Plaza de Cibeles nëse fiton sonte (e mërkurë) ndaj Athletic Bilbaos.
Me fitore në San Mames, Los Blancos do ta sigurojnë edhe matematikisht titullin, pasi do të jenë shtatë pikë përpara Barcelonës (nëse Blaugranët triumfojnë ndaj Malagas), ndërsa do të mbesin edhe dy xhiro për t’u zhvilluar (gjashtë pikë).
Nga klubi mbretëror tashmë është njoftuar policia rreth kësaj feste, në mënyrë që kremtimi të shkojë në mënyrë sa më të mirë dhe të sigurt, dhe pa incidente.
Lojtarët e Realit do të kthehen nga Bilbao herët në mëngjes dhe do t’u bashkohen tifozëve në qendrën e njohur të kryeqytetit spanjoll. 

Pensionohet Sol Campbell

Mbrojtësi anglez, Sol Campbell, është tërhequr nga futbolli aktiv në moshë 37-vjeçare, ndërsa ka bërë të ditur se ky ishte një vendim shumë i vështirë.
Campbell ka luajtur për shtatë klube të ndryshme, duke përfshirë edhe Tottenhamin dhe Arsenalin, ndërsa është paraqitur në shtatë kompeticione të rëndësishme gjatë karrierës së tij.
“Ishte një vendim shumë, shumë i vështirë, sepse nuk është lehtë të heqësh dorë kur ke qenë një top-sportist për një kohë shumë, shumë të gjatë”.
“U ndodh të gjithë sportistëve në botë që arrijnë moshën kur mendja, trupi dhe shpirti thonë tashmë është mjaft. Duhet t’i varësh këpucët dhe t’i japish fund”, ka deklaruar Campbell.
Lojtari nga Londra ka debutuar në nivel profesional në moshën 18-vjeçare te Tottenhami ku qëndroi për dhjetë vite, ndërsa më pas iu bashkua rivalit Arsenal.
Me Topçinjtë ai përjetoi suksesin më të madh në karrierë, duke fituar dy tituj të Ligës Premier dhe dy trofe të Kupës FA.

Muller: Do të ishte nder t’ia uroj Messit thyerjen e rekordit

Legjenda gjermane e Bayern Munichut, Gerd Mueller, nuk shqetësohet që Lionel Messi mund t’ia thyejë rekordin prej 67 golash të shënuar brenda një sezoni.
Në sezonin 1972/1973, Mueller e arriti rekordin historik, i cili mund të thyhet këtë edicion nga futbollisti më i mirë në botë aktualisht, Leo Messi, i cili veçmë ka shënuar 65 gola me Barcelonën.
“Teknikisht, Messi është i jashtëzakonshëm. Golat e tij janë brilantë. Dhe përkundër faktit se është gjeni, ai nuk është lojtar egoist”.
“Ka pasur shumë golashënues të mëdhenj. Ka shumë rëndësi që rekordi im qëndroi për 40 vite”.
“Rekordet vihen për t’u thyer. Unë do të jem i pari që do ta uroj nëse Messi shënon 68 gola këtë sezon, do të ishte një nder për mua”, ka thënë Mueller për Mundo Deportivo. 

Podolski: Te Arsenali për tituj

Sulmuesi gjerman, Lukas Podolski, planifikon të fitojë trofe me klubin e tij të ri, Arsenal.
“Arsenali është një klub i madh futbollistik dhe objektivi duhet të jetë fitimi i titujve në vitet e ardhshme”.
“Unë kam mundur të vazhdoj te Koelni ose të shkoja te ndonjë klub më i madh. Kam pasur oferta, mirëpo e kisha të qartë se do të shkoja te Arsenali”.
“Ata kanë një trajner të shkëlqyer, stadium të shkëlqyer dhe tifozë të shkëlqyer. Dhe ata i kanë ngjyrat e njëjta si Koelni”, ka thënë 26-vjeçari në një konferencë për media.

Tom Cruise në rolin e Van Helsing

I famshmi Tom Cruise do të zë vendin e Hugh Jackman në filmin e ri për Van Helsing.
Në hit filmin e vitit 2004, rolin e gjuetarit të përbindëshave, Gabriel Van Helsing, e luajti australiani Jackman, mirëpo raportohet se ai rol tash do t’i takojë yllit të filmit “Mission Impossible”.
Star Pulse bën të ditur se shtëpia filmike Universal Studios ka nënshkruar kontratë me skenaristët e “Transformers”, Alex Kurtzman dhe Roberto Orci, të cilët duhet ta shkruajnë skenarin për vazhdimin e radhës.
Në filmin e mëparshëm ka luajtur edhe aktorja Kate Beckinsale, ndërsa nuk dihet nëse ajo do ta përsërisë rolin ose në vend të saj do të luajë dikush tjetër. 

Meshkujt po bëhen gjithnjë e më të bukur?

Shkencëtarët thonë se njerëzit akoma vazhdojnë të evoluojnë – meshkujt bëhen gjithnjë e më të bukur dhe më inteligjentë, ndërsa këto karakteristika nuk kanë efekt të ngjashëm të femrat.
Sipas hulumtuesve, edhe në kohën moderne njerëzit i nënshtrohen seleksionimit dhe kjo ka bërë që meshkujt të duken gjithnjë e më mirë.
Ata po zhvillohen dhe po bëhen më atraktivë, më të bukur dhe më inteligjentë, në mënyrë që të jenë më të suksesshëm në riprodhim.
Studimi i realizuar nga shkencëtarët finlandezë pohon se seksi me më shumë partnerë rrit suksesin reproduktiv te meshkujt shumë më tepër sesa te femrat. 

Vuri kurorë kur ishte një vjeçe – u shkurorëzua para se të shkonte te burri

Laxmi Sargaran, e cila jeton në shtetin verior të Indisë, Rajasthan, prindërit e kishin dhënë kur ajo ishte njëvjeçare për asokohe trevjeçarin Rakesh. Tash kur ajo është 18-vjeçare është arritur që kjo martesë (për të cilën ka shumë pak kohë që vajza ka marrë vesh) të shfuqizohet në gjykatë.
Kjo është hera e parë që një çift i martuar në fëmijëri kërkon shkurorëzimin, prandaj ky është një akt mjaft inkurajues në Indi, kur kihet parasysh se është shumë i madh numri i kurorëzimeve kur “të porsamartuarit” janë në moshë fëmijërore, dhe se kë do ta marrin vendosin prindërit e tyre.
Edhe pse martesat e tilla janë zyrtarisht të ndaluara në Indi që nga viti 1929, megjithatë në shumë pjesë vazhdon kjo traditë.
Sipas traditës, vajzat e dhëna jetojnë me prindërit deri në pubertet dhe më pas shkojnë të jetojnë në familjen e burrit.
Të dhënat e UNICEF-it tregojnë se 47 për qind e femrave në indi martohen para moshës 18 vjeçare, ndërsa 40 për qind e të gjitha martesave fëmijërore në botë ndodhin pikërisht në këtë vend. 

Vidhet ura e rëndë 10 tonelata

Hajnat e kanë çmontuar dhe vjedhur një urë të vjetër të trenit me peshë prej 10 tonelatash edhe atë në mes të ditës në Republikën Çeke.
Ura metalike, e cila është ndërtuar në vitin 1901 mbi lumin në qytetin Slavkov në provincën Karlovy Vary, është vjedhur nga një grup hajnash të organizuar mirë, të cilët kanë përdorur vinça dhe kamionë.
Autoritetet çeke kanë njoftuar se hajnat kanë vjedhur edhe rreth 200 metra hekurudhë.
Gjatë kryerjes së ‘punës’ së tyre, policia i kishte ndalur hajnat, megjithatë ata kanë treguar dokumente false, sipas të cilave, ata kishin marrëveshje me autoritetet hekurudhore për çmontimin e urës

Një plan për veriun që kënaqë të gjitha palët!

Ambasadori i Francës në Kosovë, Jean Francois Fitou, e vlerësoi të rëndësishme marrëveshjen për mbajtjen e zgjedhjeve parlamentare dhe presidenciale serbe edhe në Kosovë.
Duke folur në një tubim me qytetarë në Prizren, ambasadori Fitou tha se Qeveria e Kosovës në këtë rast ka treguar zemërgjerësi dhe inteligjencë. Ndryshe, ai tha se Qeveria e Kosovës duhet të propozojë një plan për veriun i cili do i kënaqte të gjitha palët.
”Qeveria e Kosovës nuk ka dashur që kompleksiteti i marrëdhënieve Kosovë-Serbi mos t’i lejojë serbët që kanë të drejtë vote ta shfrytëzojnë atë. Kjo është mendje e hapur e Qeverisë e cila duhet të falënderohet publikisht, edhe përkundër faktit se zgjedhjet janë të komplikuara, marrë parasysh marrëdhëniet që i kanë këto dy shtete”, ka thënë ai, transmeton RTK.
“Qeveria e Kosovës me këtë vendim e ka falur Serbinë dhe ky është një akt i mirë dhe vullnet që serbët dhe shqiptarët të jetojnë së bashku ose afër njeri tjetrit për një të ardhme. Pra thjeshtë kjo është dalja nga një hakmarrje, por edhe gjest human”.
Duke folur për planin ndërkombëtar për veriun ambasadori francez theksoi se “qëndrimi im është që vizioni të jetë i përgjithshëm për të gjithë qytetarët e pse jo edhe të veriut që ata të jetojnë lirshëm në Kosovë sikurse çdo qytetarë tjetër”.
”Duhet që Qeveria e Kosovës të propozojë një plan për veriun, i cili do i kënaqte kërkesat e të gjithëve përfshirë edhe serbët e pjesës veriore”, deklaroi Fitou. “Mirëpo, a duhet që vizioni të bazohet në planin e Ahtisaarit dhe decentralizimin, përgjigjja e Qeverisë është po? duhet të fillojnë me atë që dimë dhe njohim për të biseduar me serbët e veriut, sepse këtu është rrethi përmbyllës i veriut”. 

Azem Syla lëshon Zvicrën, përmbush obligimet

Deputeti i Kuvendit të Kosovës, Azem Syla, i cili përmes bazës së invaliditetit ka përfituar mbështetje materiale prej 426 mijë frangash dhe krahas kësaj ka ndërtuar karrierë politike në Kosovë, duhet ta braktisë Zvicrën. Këtë e ka vërtetuar edhe Gjykata Federale, e cila nuk e ka marrë fare në shqyrtim ankesën e Sylës kundër vendimit për dëbim.
Siç bën të ditur zyra e avokatëve, deputeti Azem Syla do të zbatojë vendimin e institucioneve dhe deri më 15 maj do të jetë jashtë Zvicrës.
“Ai, deri më 15 maj do të jetë jashtë Zvicrës”, i është thënë gazetës “Solothurner Zeitung” nga kjo zyrë, transmeton albinfo.
Sipas gazetës, Syla aktualisht gjendet ende në Zvicër ku po i nënshtrohet marrjes në pyetje nga Prokuroria e Përgjithshme.
Ndërkaq, kundër tij është duke rrjedhur procedura për shkelje të të drejtës së të huajve dhe për abuzim me ndihmat sociale dhe ajo do të vazhdojë edhe pas kthimit të Sylës në Kosovë.
Ndërkohë që ana juridike e çështjes po kristalizohet, problemi ka shkaktuar shumë kokëçarje në strukturat politike e institucionale të komunës Biberist ku ka jetuar Azem Syla dhe në Kantonin e Solothurnit.
Institucionet përgjegjëse i hedhin fajin njëri tjetrit për neglizhencën në rastin e dhënies, siç thuhet, pa të drejtë të ndihmave politikanit kosovar.
Në këtë shkëmbim akuzash nuk mbetet i paprekur as niveli federal, i cili, sipas gazetës, duhej të mbante në dijeni institucionet kantonale mbi veprimtarinë politike të Sylës jashtë vend. 

Thaçi i dëshiron Limajt “rikthim në angazhimet shtetërore”

Kryeministri i vendit, Hashim Thaçi, ka mirëpritur vendimin e Gjykatës së Qarkut të Prishtinës për lirimin e deputetit Fatmir Limaj dhe bashkëluftëtarëve të tij. Ai iu ka dëshiruar atyre rikthimin në angazhimet shtetërore dhe familjare.
Thaçi në mbledhjen e Qeverisë së Kosovës ka thënë se gjithmonë ka besuar në pafajësinë e komandantëve të UÇK-së.
“Ne gjithmonë i kemi edhe mbështetje të plotë drejtësisë sepse edhe kemi besuar plotësisht dhe kemi qenë të bindur në pafajësinë e komandantëve dhe luftëtarëve, prandaj sot Qeveria institucionet dhe qytetarët e mirëpresim ngadhënjimin e drejtësisë mbi paragjykimet dhe pretendimet e tjera të pajustifikueshme. Në anën tjetër, dëshiroj t’iu uroj rikthim në angazhimet e tyre shtetërore dhe familjare”, ka theksuar Thaçi, njofton KosovaPress.
Në të njëjtën kohë, Thaçi ka shprehur besimin e plotë në lirimin e shpejtë edhe të Ramush Haradinaj dhe bashkëluftëtarëve të tij.
Gjithashtu, ai ka folur për mbajtjen e zgjedhjeve në Ferizaj, duke falënderuar qytetarët e Ferizajt për kulturën e treguar në këto zgjedhje.
Shefi i ekzekutivit të vendit ka mirëpritur marrëveshjen e arritur për mbajtjen e zgjedhjeve serbe në Kosovë. Sipas tij, Qeveria e Kosovës ka mirëpritur vendimin e OSCE për lehtësimin e mbajtjes së këtyre zgjedhjeve. “Qeveria e ka mirëpritur rolin lehtësues të OSCE-së që është në përputhshmëri me standardet dhe modelet evropiane, dokumentin e Ahtisarit dhe kushtetutën që do të interpretohet. Ky është hapi i parë dhe veprimi i parë i Serbisë që pranon të mos organizojë zgjedhje në Kosovë. Prandaj angazhimet tona do të jenë të koordinuara me shtetet e Kuintit”, ka thënë ai.
Po ashtu, ai ka përshëndetur edhe opinionin e Freedom House për mediat e lira në botë. Sipas tij, ky është hap inkurajues për progresin që ka arritur Republika e Kosovës.
“Kosova ka shënuar një hap përpara shumë të rëndësishëm, prandaj edhe unë dhe Qeveria do të jemi të përkushtuar në krijimin e kushteve dhe krijimin e një ambienti medial të lirë dhe pa ndikim dhe në asnjë rrethanë dhe presion politik”, ka theksuar Thaçi. 

Hamiti takon Zbogarin, kërkon liberalizimin e vizave

Nënkryetari i Kuvendit të Kosovës, Sabri Hamiti në takimin me përfaqësuesin special të BE-së në Kosovës, theksoi se është i domosdoshëm liberalizimi i vizave, në mënyrë që qytetarët e Kosovës të lëvizin të lirë në Evropë dhe të dalin nga izolimi.
Në njoftimin për media bëhet e ditur se bashkëbiseduesit kanë thënë se bisedat me Serbinë nuk do të japin rezultat derisa të mos zbatohen marrëveshjet e arritura dhe derisa Serbia të mos shpërbëjë strukturat e veta në Kosovë.
Nënkryetari i Kuvendit Sabri Hamiti ritheksoi se nuk ka bazë ligjore që lejon të mbahen zgjedhjet serbe në Kosovë dhe këtë e ka thënë Kuvendi i Republikës së Kosovës në Rezolutën e 15 marsit 2012, duke e obliguar Qeverinë e Kosovës që të zbatojë këtë vendim.
Ndërsa, Zbogar u interesua për punën e Kuvendit të Republikës së Kosovës, në mënyrë të veçantë për punën legjislative rreth procesit të përmbylljes së pavarësisë së mbikëqyrur të Kosovës. 

MASHT-i dhe DKA të përgatitura për Provimin e maturës

Drejtuesit e Ministrisë së Arsimit, Shkencës dhe Teknologjisë në takimin me Drejtoritë komunale të arsimit, kanë theksuar se janë bërë të gjitha përgatitjet për provimin e maturës shtetërore.
Zëvendësministri i Arsimit, Shkencës dhe Teknologjisë, Nehat Mustafa duke folur rreth përgatitjeve theksoi se tashmë janë publikuar edhe broshurat me informacionet bazë mbi maturën, për të gjithë maturantët e Republikës së Kosovës.
Ai ka lutur Drejtoritë komunale të arsimit, që t’i obligojnë shkollat për të mbajtur nga një test provues me maturantët nga provimet e viteve të kaluara, në mënyrë që ata të informohen më shumë rreth mbushjes së fletëpërgjigjeve dhe të bëhet një lloj njohje e maturantëve me testin e maturës.
Ndërsa, drejtori i departamentit për Zhvillimin e Arsimit Parauniversitar, Agim Bërdyna , i cili ka folur rreth planit dinamik dhe teksteve shkollore, ka kërkuar nga DKA-të që të përcjellin shkallën e dëmtimit të teksteve nga nxënësit e nivelit fillor të arsimit, si dhe të sillen me kohë shënimet e nevojshme për pajisje me tekste shkollore nga shkollat private.
Mustafa ka folur rreth përzgjedhjes së Abetares së përbashkët “Shqipëri- Kosovë”, manifestimi i së cilës do të mbahet më 8 maj në Prizren, për shkak të rëndësisë që ka ky qytet gjatë gjithë historisë dhe si një vend që lidh dy kryeqytetet, ku të dy ministrat e Arsimit, Ramë Buja dhe Myqerem Tafaj do të bëjnë publike Abetaren e përzgjedhur. 

Gjermania zgjat mandatin e forcave të saj në Kosovë

Qeveria e Gjermanisë ka marrë vendim për zgjatjen edhe për një vit të mandatit të forcave të armatosura në Kosovë, të cilat ndodhen në kuadër të KFOR-it.
Vendimin e sotëm të qeverisë, deri në fund të muajit duhet ta konfirmojë edhe parlamenti federal i Bundestagut.
Aktualisht, në mesin e 5,700 forcave ndërkombëtare në Kosovë ndodhen 900 ushtarë gjermanë, çfarë është kontingjenti më i madh kombëtar.
Ditë më parë, Bundesveri (Forca Federale Mbrojtëse) ka dërguar 550 forca shtesë në Kosovë, të cilat do të kujdesen për situatën e sigurisë në prag dhe gjatë zhvillimit të zgjedhjeve të Serbisë.
Kjo e fundit pritet të mbajë zgjedhjet parlamentare dhe presidenciale edhe në territorin e Kosovës, transmeton Rel.
Shpenzimet e zgjatjes njëvjeçare të mandatit të ushtarëve gjermanë në KFOR thuhet se kapin vlerën e 68 milionë eurove. 

Vetëvendosje art mbi gropat e Prishtinës

Lëvizja Vetëvendosje gjendjen e rëndë të rrugëve në Prishtinë e ka vlerësuar si paaftësi dhe neglizhencë të Komunës së Prishtinës.
Në aksionin e tyre simbolik për rrugët e Prishtinës, Vetëvendosje tha se pamja e tyre i ngjan në rastin më të mirë një instalacioni grotesk.
“Është e tepërt të përshkruajmë vështirësitë e ngasësve të makinave dhe këmbësorëve në aktivitetin e tyre të përditshëm. Ne aktivistët e Qendrës së Lëvizjes VETËVENDOSJE! në Prishtinë ndërmorëm sot një aksion simbolik. Shënjuam gropat në rrugët kryesore për dy qëllime, t’i bëjmë ato të dukshme për ngasësit dhe këmbësorët, por dhe për Komunën e cila ose është “e verbër” ose e ka kthyer vështrimin dika tjetër dhe s’mund të shohë”, thuhet në kumtesë.
Sipas tyre, gjatë dimrit Prishtina u kthye në një “qendër skijimi” si pasojë e të cilës qytetarët patën dhe pasoja të rënda shëndetësore, ndërsa tani gjatë pranverës, i gjithë qyteti ka marrë prej tymi për shkak të pluhurit të ndërtimeve e të rrugëve të pashtruara.
“Secili qytetar në një mënyrë ose tjetër paguan taksa të cilat përkthehen në buxhete komunale e me të cilat pritet së pari që të jetë e mirëmbajtur infrastruktura. Me këtë veprim tonin sot ne mund të eliminojmë shëmtinë e këtyre gropave por jo dhe pasojat që ato shkaktojnë në vetura e këmbësorë. Këtë duhet ta bëjë Komuna e Prishtinës, e cila me cilësinë e dobët të punëve që po kryen në rrugë po bënë që pas vetëm një dimri prapë rrugët të kthehen në një gjendje të mjerueshme me përplot gropa”, vlerëson Vetëvendosje. 

Zambrotta dëshiron të vazhdojë me Milanin

Gianluca Zambrotta dëshiron të qëndrojë te Milani – ka thënë agjenti Giuseppe Bonetto.
Mbrojtësit italian i skadon kontrata në fund të sezonit aktual, ndërsa ende nuk i është ofruar kontratë e re.
“Është vështirë të largohesh kur je te një klub si Milani. Gjërat janë vërtet mirë këtu”.
“E ardhmja fillon pas 30 qershorit. Klubi ka të drejtë që të presë përfundimin e kontratës së lojtarit dhe pastaj t’i shqyrtojë gjërat”, ka theksuar agjenti për Milan News. 

‘Messi është i dashuruar me topin’

Superylli i Real Madridit, Lionel Messi, është më i mirë se Cristiano Ronaldo, sepse është i dashuruar me topin – ka deklaruar Johan Cruyff.
Dy lojtarët kryesorë në botë kanë nga 43 gola të shënuar në La Liga dhe konkurrojnë për trofeun e golashënuesit më të mirë dhe po ashtu pritet të jenë në garë të ngushtë edhe për çmimin FIFA Topi i Artë.
"Messi ose Cristiano? Messi, sepse është i dashuruar me topin. Ai ka teknikë të pastër dhe është një djalosh i mirë”, ka thënë Cruyff për Cadena COPE.

Bielsa: Reali e meriton titullin

Trajneri i Athletic Bilbao, Marcelo Bielsa, thotë se Real Madridi ka qenë skuadra më e mirë në La Liga këtë sezon dhe meriton të shpallet kampion.
Argjentinasi ka pasur një raport të mirë me Pep Guardiolën dhe është një admirues i madh i stilit katalanas të lojës. Por thotë se Reali është meritor për titullin që pritet ta fitojë.
“Në aspekt të vlerësimit nëse ata janë ose jo më të mirë se Barcelona, ka shumë aspekte të cilat çdo person mund t’i interpretojë ndryshe”.
“Por, sigurisht, Real Madridi do ta fitojë titullin me të gjitha merituat dhe me të drejtë”, ka thënë Bielsa.
Ndeshja e sotme në mes të Athletic Bilbao dhe Real Madridi zhvillohet në stadiumin San Mames me fillim nga ora 22:00. 

Silva: Titulli është i joni

David Silva thotë se skuadra e tij është e gatshme ta fitojë Ligën Premier pasi ka mposhtur rivalin lokal, Manchester United, në shtëpi dhe në udhëtim këtë sezon.
“Ne jemi gati ta fitojmë titullin. Ne nuk përqendrohemi te United. Ne nuk kemi nevojë të mendojmë për United. Ne e kemi kaluar nivelin mental”.
“Mos më keqkuptoni, United është një skuadër e madhe, fantastike. Ata e kanë fituar titullin për një kohë të gjatë. Por ne i mposhtëm ata atje [Old Trafford] dhe i mposhtëm këtu [në Etihad Stadium]. Ne besojmë se mund ta fitojmë titullin”, ka thënë Silva.
Me edhe dy ndeshje të mbetura, City është në krye të tabelës së Ligës Premier me pikë të barabarta me United por me diferencë më të mirë të golave. 

Conte: Pirlo lojtari kryesor i Juves

Menaxheri i Juventusit, Antonio Conte, ka lavdëruar mesfushorin Andrea Pirlo duke e quajtur atë lojtarin kyç të skuadrës.
Pasi përfundoi dy herë në pozitën e shtatë në Serie A, Juventusi këtë sezon është në prag të fitimit të titullit, dhe Conte ka lavdëruar lojtarët, në veçanti ish-mesfushorin e Milanit.
“Stili jonë i lojës vjen nga dëshira për ta çuar lojën kah kundërshtari dhe është shumë më lehtë ta bëjmë këtë me lojtarë si Pirlo”.
“Ne kemi punuar intensivisht në lojën tonë por është përkushtimi i lojtarëve që e ka bërë të mundshëm të bëjmë gjithçka të realizohet”, ka thënë Conte në konferencën e djeshme për shtyp. 

Barca, 100 milionë për përforcime të verës

Menaxheri i ardhshëm i Barcelonës, Tito Vilanova, raportohet se do të ketë në dispozicion plot 100 milionë euro për harxhime në lojtarë të rinj gjatë verës.
Sipas sportives Sport, Blaugranët do të fitojnë vetëm 30 milionë nga buxheti i zakonshëm prej 50 milionë eurosh. Megjithatë, gazeta shkruan se zyrtarët e klubit janë të bindur se do t’i rigjenerojnë edhe 30 milionë euro të tjera nga shitja e lojtarëve.
Mbrojtësi i djathtë Daniel Alves tashmë është lidhur me një transferim te klubi i pasur rus Anzhi Makhachkala dhe besohet se klubi spanjoll është i gatshëm ta shndërrojë në para brazilianin. Barca po ashtu besohet se dëshiron ta shesë edhe Seydou Keita.
Dështimi i Barcelonës për të fituar Ligën e Kampionëve dhe La Ligën do t’ia kursejë klubit bonuset e parapara për lojtarët dhe stafin. Po ashtu largimi i Pep Guardiolës do të zvogëlojë harxhimet shtesë.
Si rezultat, Barcelona besohet se mund të ketë plot 100 milionë për të harxhuar dhe për ta rikthyer pozitën e fuqisë dominuese në futbollin evropian.
Barca tashmë është lidhur me një transferim të sulmuesit të Athletic Bilbao, Fernando Llorente, dhe mbrojtësit të Valencias, Jordi Alba.

Rummenigge: Robben do ta vazhdojë kontratën

Drejtori ekzekutiv i Bayern Munichut, Karl-Heinz Rummenigge, ka hedhur poshtë spekulimet se Arjen Robben përgatitet të largohet nga Allianz Arena në fund të sezonit, duke thënë se holandezi është në prag të vazhdimit të kontratës.
Anësori besohet se është afër për të nënshkruar një marrëveshje deri në vitin 2015, por së fundi u tha se është duke u rimenduar edhe një herë këtë pas përplasjeve me Franck Ribery në ndeshjen gjysmëfinale të Ligës së Kampionëve kundër Real Madridit në Munich.
Dhe derisa Uli Hoeness së fundi shprehu dyshime nëse 28-vjeçari do të vazhdojë kontratën, Rummenigge ka qartësuar gjithçka duke thënë se holandezi është në prag të nënshkrimit.
“Ju garantoj se asnjë yll nuk do të largohet nga skuadra. Një marrëveshje [me Robben] është po thuajse e nënshkruar. Arjen do të qëndrojë te Bayerni për një kohë të gjatë”, ka thënë Rummenigge.