Pse janë femrat më seksi pasi të lindin fëmijë

Edhe pse shumë nëna të reja nuk kanë kohë që menjëherë t’i kushtojnë vëmendje rikthimit në formë pas lindjes së fëmijës, ato nuk kanë arsye për t’u shqetësuar. Është treguar se pikërisht kjo gjendje i bën ato më seksipile.
Sipas psikologëve, ka shumë arsye pse nënat e reja janë më joshëse. “Më lehtë është që këtë ta shpjegosh me anë të kualitetit si nënë. Nënat e plotësojnë rolin e tyre të kujdesit, ndërsa disa prej tyre tregojnë dashuri të jashtëzakonshme ndaj fëmijës. Këto janë kualitetet që i bëjnë ato më atraktive”, thonë psikologët australianë.
Kur kjo kombinohet me aspektet seksuale të të qenit nënë, gjinjtë rrethorë dhe fytyra e plotë, u jep nënave të reja një kombinim të veçantë të seksualitetit dhe butësisë që nga pala e kundërt konsiderohet shumë e dëshiruar.

Kërcitja e dhëmbëve në gjumë

Kërcitja e dhëmbëve ndodh kur njerëzit janë të stresuar, të zemëruar apo të shqetësuar. Është mirë që para se të bini në gjumë, të kafshoni një mollë.
Shpesh, telashet ditore tendosin, për ç’arsye natën, në gjumë shtrëngojmë fuqishëm nofullat. Kjo mund t'i dëmtojë dhëmbët dhe të shkaktojë kokëdhembje e dhembje të muskujve të fytyrës.
Prandaj, para se të bini në gjumë, ‘relaksoni’ nofullat me përtypjen e një molle të thartë.
Gjatë periudhës së gjumit, nëse dikush në mënyrë të pandërgjegjshme i shtrëngon dhe kërcet dhembet e tij quhet bruksizëm.
Bruksizmi është një lloj veprimi pa ndjenja. Pacienti nuk është i vetëdijshëm për këtë.

Flipboard vjen edhe në Android

Flipboard ka qenë një aplikacion i jashtëzakonshëm për platformën mobile të Apple, iOS, ndërsa tani i njëjti vjen edhe në Android, dhe është kompatibil për të gjitha pajisjet e këtij sistemi operativ të cilat mbështeten në Android 2.2 Froyo dhe versionet më të reja.
Flipboard për Android vjen me disa funksione të reja të cilat përfshijnë edhe mbështetjen për rrjetin social, Google+, si dhe rrjetet tjera sociale si Facebook dhe Twitter.
“Aplikacioni i famshëm i iOS u mundëson njerëzve të shohin gjithçka në një vend të vetëm. Prej momenteve më të mira, e deri tek gjërat që kanë më shumë rëndësi. Shfletoni nga postimet e Twitter, e deri tek mediat si BBC, USA Today apo The Verge. Nga fotografitë e Instagram e deri tek revistat e famshme të Rolling Stone” thuhet në njoftimin e Flipboard.
Flipboard tani është në dispozicion për shkarkim në Google Play, ndërsa më shumë detaje mund të gjenden pikërisht në këtë dyqan të aplikacioneve. 

Shpëtimi i leopardit (Video)

Një leopard, i cili kishte rënë në një rezervuar uji në regjionin indian Haskhowa, është shpëtuar pas disa orë përpjekjesh të banorëve lokalë dhe rojeve.
Derisa po bënte gjueti në pyll, leopardi ka rënë në ujë, ndërsa shpëtimtarët i kanë ndihmuar me anë të një rrjeti dhe ai më pas është kthyer në pyll... 

Përfundojnë mbjelljet pranverore, 8 mijë hektarë më shumë

Kanë përfunduar mbjelljet pranverore të kulturave bujqësore levërtare në tërë territorin e Kosovës. Rezultatet e para të këtyre mbjelljeve tregojnë se, krahasuar me një vit më parë, fermerët kosovarë i kanë shtuar sipërfaqet e mbjella me kulturat pranverore.
Ministria e Bujqësisë Pylltarisë dhe Zhvillimit Rural (MBPZHR), ka njoftuar se në bazë të të dhënave të raporteve të 32 drejtorive komunale bujqësore, gjithsej sipërfaqe të mbjella në këtë vit janë rreth 112 mijë hektarë me kultura pranverore, nga mbi 114 mijë hektarë sa ishin planifikuar, që tregon se këto të mbjella janë realizuar në masën prej 98 për qind.
Prej këtyre, 64340 hektarë janë mbjellë me misër, 14699 me perime, 6750 me patate, 1562 hektarë me elb pranveror, 567,5 fasule monokulturë, 2366 jonxhë, 963 bimë industriale, 4059 bimë foragjere, etj.
Ndërsa, bazuar në të dhënat e drejtorive komunale për bujqësi, vitin e kaluar kanë qenë të mbjella rreth 104 mijë hektarë me kultura pranverore, nga rreth 110 mijë sa kanë qenë të planifikuara.
Për të shtuar prodhimtarinë vendore, Ministria e Bujqësisë, Pylltarisë dhe Zhvillimit Rural, këtë vit për herë të parë është duke i mbështetur fermerët edhe në mbjelljet pranverore të kulturës bujqësore të misrit, kolzës dhe sojës me nga 100 euro për sipërfaqet që janë në përputhje me kriteret e përcaktuara në shpalljen publike

Arian Zeka Drejtor i Odës Amerikane

Bordi i Drejtorëve të Odës Ekonomike Amerikane në Kosovë, ka emëruar për drejtor ekzekutiv të kësaj Ode Arian Zekën.
Në një komunikatë të OEAK-së theksohet se emërimi i Zekës është bërë në pajtim me Statutin e Odës Ekonomike Amerikane në Kosovë.
Zeka i është bashkuar Odës Amerikane në nëntor të vitit 2009, si udhëheqës i Departamentit të Politikave e më vonë si zëvendësdrejtor i Odës Amerikane.
Përvoja e tij e mëparshme e punës përfshin angazhimin në Shoqatën e Kontabilistëve të Çertifikuar dhe Auditorëve të Kosovës, Projektin e USAID-it për stabilitet dhe rritje ekonomike, Projektin e Bankës Botërore për Zhvillimin e Rinisë, Agjencinë e Lajmeve Kosova Live dhe Programin e Trajnimit të Trupave të Mbrojtjes të Kosovës. 

Zvogëlohen investimet kapitale, rriten shpenzimet

Pagat e Zyrës së Kryeministrit do t’i kushtojnë 48 mijë euro më shtrenjtë buxhetit të vendit. Nga 614 punëtorë sa kishte në fillim të vitit, kjo zyrë tanimë ka të punësuar 622 veta. Rishikimi i buxhetit i solli në shfrytëzim 181 mijë euro dhe 8 punëtorë më shumë vetëm zyrës që udhëhiqet nga Hashim Thaçi. Kryeministri ka firmosur dokumentin në të cilin figurojnë edhe 91 mijë euro më shumë shpenzime të luksit për zyrën e tij. Nga 763 mijë euro, sa ishte planifikuar, pas rishikimit të buxhetit shpenzimet për mallra dhe shërbime të Zyrës së Kryeministrit janë rritur në 854 mijë euro.
Më shumë në paga, mallra e shërbime do të shpenzojnë edhe deputetët. Kuvendit do t’i takojnë 252 mijë euro më shumë buxhet. Nga këto mjete parlamentarëve u është dhënë e drejta që t’i rrisin shpenzime në paga nga 5 milionë e 272 mijë euro, në 5 milionë e 382 mijë euro.
Ministrisë së Financave i është zvogëluar për 4 milionë euro buxheti. Nga 43 milionë euro sa parashihej në buxhetin primar, kësaj ministrie për këtë vit në total do t’i takojnë 39 milionë euro pas rishikimit. Por, pas të njëjtit proces, Ministria e Tregtisë dhe Industrisë ka përfituar 1 milion e 289 mijë euro më shumë buxhet. Kryesisht, këto mjete do të shpenzohet për njësinë e zhvillimit ekonomik. Ani pse për këtë resor ekziston ministri e veçantë, për zhvillimin ekonomik pas rishikimit të buxhetit Ministria e Tregtisë do të shpenzojë 7 milionë e 49 mijë euro, nga 5 milionë e 927 mijë euro. Njësoj, Ministrisë për Zhvillimin Ekonomik do t’i ndahen rreth 3 milionë euro më shumë buxhet pas rishikimit. Nga 39 milionë euro, sa ishin planifikuar në dokumentin primar, rishikimi do t’i sjellë në arkë Ministrisë së Zhvillimit 42 milionë euro, shkruan Koha Ditore.
Me shifra të përafërta me ato të Ministrisë së Tregtisë, është rritur edhe buxheti dedikuar Ministrisë së Infrastrukturës. Kjo ministri do të ketë në dispozicion 280 milionë e 471 mijë euro pas rishikimit të buxhetit. Nga ndërtimi i autostradës Morinë-Merdar Qeveria ka planifikuar të kursejë 400 mijë euro, porse ende mbetet projekti më i shtrenjtë i financuar nga buxheti në vlerë prej 239 milionë e 200 mijë eurove. Ministrisë së Arsimit i është rritur buxheti për rreth 2 milionë euro, për aq sa është zvogëluar buxheti i Ministrisë së Punës dhe Mirëqenies Sociale.
Në tabelën e përgjithshme, investimet kapitale janë zvogëluar për 2 milionë euro duke rënë në 615 milionë euro. Rishikimi i buxhetit tregon se Qeveria ka rritur shpenzimet për mallra dhe shërbime, nga 198 milionë, sa pati ndarë në buxhetin primar, në 204 milionë euro. Në këtë dokument, është paraqitur vlerë e njëjtë e madhe e shpenzimeve për subvencione dhe transfere, përderisa vlera e subvencioneve për ndërmarrjeve publike është për 6 milionë euro më e vogël. Nga 37 milionë euro, sa u pati premtuar në buxhetin vjetor, Qeveria planifikon që t’u ndajë në total 31 milionë euro këtyre ndërmarrjeve

James Berisha: Me Egjiptin dhe Libinë përfundon misioni

“Misioni ‘Flying for Kosovo’ nuk do të mbetet në rrugë”. Kështu ka deklaruar piloti shqiptaro-amerikan, James Berisha, i cili që një kohë të gjatë e ka nisur këtë mision me qëllim lobimin nëpër shtetet që ende nuk e kanë njohur pavarësinë e Kosovës, me theks të veçantë në shtetet e kontinentit Afrikan.
Ai ka thënë para mediave se pas lirimit të tij nga burgimi në njërin prej shteteve të Afrikës, është rehabilituar dhe ka filluar me mbledhjen e fondeve tjera për ta përfunduar edhe pjesën e mbetur të këtij misioni.
Berisha ka thënë se janë bërë të gjitha përgatitjet që ta vazhdojnë këtë mision, duke lobuar në Libi dhe Egjipt, me të cilat shtete sipas tij, përfundon edhe ky mision.
“Ne jemi gati për t’u nisur, unë po nisem për në Sudan për ta rregulluar aeroplanin, për ta përfunduar Egjiptin edhe Libinë dhe me aq misioni po përfundon ‘Flying for Kosovo’, ka thënë ai, njofton “KosovaPress”.
Mirëpo, sipas pilotit Berisha, në vazhdimin e këtij rrugëtimi, ka thënë se ka premtime që zyrtarisht do t’i përcjellë Qeveria e Shqipërisë, kurse mbështetjen morale ia ka lënë Qeverisë së Kosovës.
“Qeveria e Shqipërisë ka qenë e mrekullueshme, ka thënë se në këto dy shtete që kanë mbet, ne do t’ju përcjellim zyrtarisht, që është një gjë shumë e rëndësishme. Para se me fillu fluturimi i parë unë do të jem në komunikim me Qeverinë e Shqipërisë, kështu që, të shkojmë në mënyrë ma të organizuar, ma zyrtare, vetëm kanë premtuar që ata do të jenë me neve gjatë tërë kohës. Me siguri që edhe këta e ndiejnë obligim moral me na përcjellë tash e tutje”, ka thënë ai.
Sa i përket ndihmave financiare për këtë mision, Berisha ka thënë se Qeveria e Kosovës në fillim të misionit ka ndihmuar, kurse kohëve të fundit, sipas tij, nuk kanë marrë ndonjë ndihmë financiare prej saj.

Kosovën e pret rrugë e gjatë për të realizuar reformat

Anëtarë të delegacionit të Komisionit për integrime evropiane i Kuvendit të Kosovës kanë theksuar se populli i Kosovës është i diskriminuar dhe i izoluar për shkak të mos heqjes së vizave, megjithëse BE-ja ka shënuar lëvizje lidhur me Kosovën.
Kështu kanë deklaruar anëtarët e Komisionit.... në takimin punues ndërparlamentar në Mal të Zi, me temë “Roli i parlamentit në procesin e negociatave të pranimit në BE”.
Delegacioni i Kosovës i prirë nga Lutfi Haziri, gjatë diskutimit të tyre në këtë samit foli për rolin e Parlamentit të Kosovës, duke theksuar faktin se ekziston një konsensus i të gjitha partive politike për të çuar përpara agjendën evropiane.
“Komisioni parlamentar për Integrime Evropiane brenda këtij viti ka rekomanduar për seancë 34 ligje, ndërsa 26 ligje janë kërkuar nga Raporti i Progresit të KE-së që të miratohen gjate vitit 2012. Shumica nga këto ligje tashmë janë miratuar”, sqaroi Haziri.
U tha se aktualisht, Kosovën e pret një rrugë e gjatë dhe e mundimshme me reformat, të cilave u paraprijnë krijimi i ligjeve, por edhe forcimi i institucioneve që të zbatojnë ligjin.
“Kriteret për liberalizim të vizave të cilat ne duhet t’i përmbushim janë: siguria e dokumenteve, migracioni dhe menaxhimi i integruar i kufirit”, tha Haziri, duke sqaruar më tej se këto ditë në Kuvend do të jetë edhe Projektligji për Letërnjoftime Biometrike.
Në këtë samit u diskutua edhe për skepticizmin që ekziston lidhur me zgjerimin e BE-së, si dhe për sfidat ekonomike financiare me të cilat përballet BE-ja.

FBI ndihmon në rastin Asanaj

Ambasada Amerikane në Prishtinë ka njoftuar se SHBA-të janë pajtuar që t’i ofrojnë ndihmë autoriteteve kosovare për të hetuar vdekjen e Dino Asanaj, ish-drejtor i Agjencisë Kosovare të Privatizimit, i cili është edhe shtetas amerikan.
Kryeministri i vendit, Hashim Thaçi në një mbledhje të Qeverisë i pati bërë thirrje mekanizmave përgjegjës vendorë e ndërkombëtarë për t'i hetuar të gjitha rrethanat e vdekjes së Asanajt.
Ai pati thënë se nuk do të lejojë që "shantazhi, krimi dhe dhuna" të pengojnë ekonominë e lirë të tregut në Kosovë, si dhe ka shfaqur gatishmërinë për të vepruar po ashtu kundër, siç i ka quajtur ai, grupeve mafioze që “nuk e kuptojnë” këtë lloj të ekonomisë.
“Qeveria e Kosovës ka kërkuar ndihmë nga Shtetet e Bashkuara të Amerikës për të hetuar vdekjen e z. Dino Asanaj, ish-Drejtor i Agjencionit Kosovarë të Privatizimit dhe njëherit shtetas Amerikan. Pasi që e konsideron si të duhur Qeveria Amerikane është pajtuar të ofroj ndihmë, kështu që Byroja Federale e Hetuesisë (FBI) pran Departamentit Gjyqësorë të Shteteve të Bashkuara ka komunikuar me Policinë e Kosovës për hapat e mëtutjeshëm”, thuhet në kumtesën e Ambasadës amerikane në Prishtinë.
Megjithëse fillimisht vdekja e Asanajt ishte cilësuar si vrasje, mjekët ligjorë në Kosovë kanë thënë se në bazë të autopsisë, Asanaj ka bërë vetëvrasje, duke i shkaktuar vetes 11 prerje dhe therje me thikë.
Rezultatet e autopsisë i ka konfirmuar edhe misioni evropian për sundimin e ligjit, EULEX. 

Policia me plan operativ për Vidovdanin

Lëvizja e lirë për qytetarët shqiptarë që jetojnë në veri, vazhdon të jetë problem. Kështu u tha të premten në takimin e Komitetit të Sigurisë që mbahet në kuadër të Drejtorisë për Mbrojtje dhe Shpëtim të Komunës së Mitrovicës.
Drejtori i kësaj drejtorie, Behxhet Bala, tha se banorët e fshatrave shqiptare të Leposaviqit, vazhdojnë të përballen me probleme të mëdha sa i përket qarkullimit të lirë. Ai tha se me minibusin që lëviz nëpërmjet Zveçanit nuk guxojnë të udhëtojnë të rinjtë, nga frika e ekstremistëve serbë.
Poashtu ai theksoi se edhe banorët shqiptarë që jetojnë në Kodrën e Minatorëve në veri të qytetit kanë probleme të mëdha për lëvizje të lirë. Tha se autobusi i tyre sulmohet shumë shpesh prej grupeve ekstremiste serbe që tentojnë të frikësojnë dhe dëbojnë shqiptarët nga veriu.
Drejtori Bala, kërkoi nga strukturat e sigurisë që të krijojnë kushte për liri të lëvizjes për të gjithë, meqë këto rrethana e kanë vështirësuar se tepërmi jetën e qytetarëve shqiptarë që jetojnë në veri. “Vetëm hapat konkretë dhe të vendosur do të ndryshojnë për të mirë gjendjen në veri”, tha ai.
Në këtë takim u fol edhe për përgatitjet për të menaxhuar situatën me 28 qershor apo Vidovdanin, me ç’rast pritet serbët kanë paralajmëruar marshim sikur vitet tjera në drejtim të Gazimestanit. Bala tha se ka njoftime se më atë datë drejt Kosovës nga Serbia do të marshojnë motoristë të shumtë, mandej tifozë të klubeve sportive, por edhe organizata të ndryshme nacionaliste e kriminale.
Ai tha se strukturat e sigurisë duhet të jenë të përgatitura në mënyrë që situata të menaxhohet mirë dhe të mos ketë incidente.
Lidhur me këtë, Nexhip Gashi nga drejtoria rajonale e policisë, tha se sikur vitet tjera edhe sivjet është përgatitur plani operativ për Vidovdan. Tha se do të rritet numri i policisë në mënyrë që të parandalohen problemet.

Cooper: Në tabelë vetëm ylli, jo edhe shpjegimi

Ndërmjetësi i Bashkimit Evropian në dialogun Kosovë-Serbi, Robert Cooper ka thënë se marrëveshja për përfaqësimin rajonal të Kosovës nuk parasheh që në tabelën para delegacioneve të Kosovës, të shkruhet edhe fusnota.
Sipas tij, në tabelë mund të qëndrojë ylli, ndërsa “diku tjetër shpjegimi se çfarë do të thotë ai”.
“Kjo është një gjë qesharake për diskutim. Qëllimi i fusnotës është që të bëhet e qartë se nuk ka paragjykime për statusin. Kjo do të thotë se kur uleni në një tryezë me dikë që ka përpara emrin Kosovë, ky nuk është akt i njohjes”, ka thënë Cooper për mediat serbe.
I pyetur se ku e ka origjinën problemi me fusnotën, Cooper ka thënë se “pala serbe disa herë ka ngritur çështjen rreth paraqitjes së fusnotës në tabelat me emrin e Kosovës, ndërsa “pala kosovare kurrë nuk ka thënë se kjo është në rregull ose plotësisht e papranueshme”.
Në muajin shkurt, në kuadër të dialogut në Bruksel, Prishtina dhe Beogradi kanë arritur marrëveshjen për përfaqësimin rajonal të Kosovës.
Marrëveshja parasheh paraqitjen e Kosovës me fusnotën e cila përmban Rezolutën 1244 të Kombeve të Bashkuara dhe mendimin këshillëdhënës të Gjykatës Ndërkombëtare të Drejtësisë për ligjshmërinë e shpalljes së pavarësisë së Kosovës.
Duke folur për vazhdimin e dialogut, Cooper ka deklaruar se “është vështirë të thuhet se si do të duket ai, derisa të mos formohet Qeveria e Serbisë dhe të dëgjohen të gjithë aktorët politikë në Beograd”, transmeton Rel.
“Tomisllav Nikolic ka thënë se si president ka përgjegjësinë për të monitoruar negociatat, porse përgjegjësinë kryesore do ta ketë kryeministri”, ka thënë Cooper për “Novosti”-n.
Prishtina dhe Beogradi kanë nisur bisedimet për çështje teknike në mars të vitit të kaluar. Në nëntë raunde negociatash, palët kanë arritur 7 marrëveshje, por zbatimi i tyre ka ngecur.
Analistët kanë paralajmëruar se formati i bisedimeve mund të ndryshojë nga ai teknik në politik. 

“Vetëvendosje” mashtroi KQZ-në

Procesi i fundit elektoral në Komunën e Kaçanikut ka mundur të ndiqej edhe nga një vëzhgues që ndodhet nën hetime, lidhur me shkeljet e pretenduara në zgjedhjet e 2010-s. Ishte vëzhgues i lëvizjes “Vetëvendosje”, subjektit më të zhurmshëm opozitar që denoncon parregullsitë.
Janë nën hetime 122 komisionerë nga Kaçaniku, për parregullsitë që kishin shoqëruar procesin e fundit elektoral, para këtij për kryetar të Komunës.
Ka gati nga të gjitha partitë parlamentare. Prej tyre, vetëm E. L. i “Vetëvendosjes” kishte mundur të akreditohej si vëzhgues, pasi subjekti politik që i përket kishte bërë një trik për t’ia fshehur identitetin, njofton “Koha Ditore”.
Ia kishte ndërruar një shifër të numrit personal, dhe kjo kishte bërë që në procesin e verifikimit në Komisionin Qendror të Zgjedhjeve (KQZ) ky vëzhgues të mos vërehej që ishte nën hetime. Ndërhyrja ishte bërë në shifrën e shtatë, dhe në vend të 0 ishte shkruar shifra 1.

Për vjedhjen e arit edhe katër policë të dyshuar

Në “grepin” e Inspektoratit Policor të Kosovës, i cili po zhvillon hetimet rreth skandalit të fundit të ndodhur në dhomën e dëshmive në Stacionin Policor të Pejës, ku u vodhën 25.3 kilogramë ari, pritet të bien edhe katër pjesëtarë policorë, që dyshohen se janë të përfshirë në këtë hajni profesionale.
IPK ndërkaq, pritet që brenda dhjetë ditësh t’i përfundojë të gjitha hetimet lidhur me vjedhjen e arit në dhomën më të “hekurt”, të policisë në rajonin e Pejës, kanë thënë zyrtarë të Inspektoratit, shkruan “Zëri”.
Sipas tyre, të gjitha hetimet e zhvilluara deri më tani çojnë se në këtë rast dyshohet se janë të përfshirë edhe tre, katër zyrtarë tjerë policorë, përveç atyre që tashmë gjenden në arrest shtëpiak.
Kryeshefi i IPK-së, Fitim Shishani nuk i ka bërë publik emrat e policëve të cilët janë nën “llupën”, e Inspektoratit, për shkak të hetimeve të brendshme që janë duke u zhvilluar ndaj tyre, por është zotuar se nuk do të pushojnë për asnjë moment deri në ndriçimin e së vërtetës së këtij skandali.
Kryetari i Komisionit parlamentar për punë të brendshme dhe siguri, Ahmet Isufi në mënyrë të prerë ka kërkuar përgjegjësi më të lartë institucionale për rastin e Pejës.
“Me qëllim që në të ardhmen të mos ndodhin ngjarje të tilla, kërkoj përgjegjësi institucionale nga niveli i lartë, duke filluar nga hierarkia komanduese, e deri te politika udhëheqëse”, ka thënë Isufi. 

Thaçi largon Tahirin nga dialogu

Zëvendëskryeministrja Edita Tahiri nuk është më përfaqësuese e Kosovës në dialogun me Serbinë. Kryenegociatorja kosovare është lënë jashtë këtij procesi nga kryeministri i vendit Hashim Thaçi.
Të enjten, lehtësuesi i dialogut teknik, Robert Cooper, ka qëndruar në Prishtinë. Në Qeverinë e Kosovës ai është takuar me kryeministrin Hashim Thaçi dhe me ministren e Integrimeve, Vlora Çitaku, por pjesë e këtij takimi nuk ka qenë edhe zëvendëskryeministrja Edita Tahiri, shkruan “Koha Ditore”.
Burime të gazetës kanë thënë se në këtë mënyrë po paralajmërohet përfundimi i dialogut teknik me Serbinë dhe fillimi i atij politik. Në procesin e ri, Edita Tahiri nuk do të jetë më përfaqësuese e Kosovës.
Por, lehtësuesi i dialogut, Robert Cooper, gjatë takimit me kryeministrin ka folur ekskluzivisht vetëm për dialogun teknik, pasi që edhe vetë ai nuk është e sigurt nëse do të ndërmjetësojë procesin më të avancuar të bisedimeve, që do të bëhet ndërmjet dy të besuarve të dy kryeministrave të Kosovës dhe atij të Serbisë.
Sipas burimeve të gazetës, dialogu politik duhet të presë derisa në Serbi të zgjidhet qeveria e re, kryeministër i së cilës, sipas paralajmërimeve, pritet të jetë ish-presidenti Boris Tadic.
Sipas burimeve, presidenti i ri i Serbisë, Tomislav Nikolic, gjatë vizitës që ka pasur në Bruksel, ka shprehur gatishmëri që të takohet me presidenten e Kosovës, Atifete Jahjaga, dhe të zbatojë marrëveshjet e arritura deri më tash në dialog, por ka preferuar që vazhdimi i procesit të bëhet ndërmjet dy qeverive. 

Australi, bregu i mbushur me një shkumë të pazakontë (VIDEO)

Fenomen natyror në Point Lorne, në Australi. Kilometra të tërë bregu janë mbushur nga një shkumë natyrale shkaktuar nga moti i keq i tejzgjatur dhe nga erërat jug-lindore që sjellin drejt bregut këto materiale organike. Fenomeni verifikohet cdo dy-tre vjet dhe tërheq cdo herë persona që duan të bëjnë foto dhe të shijojnë malin e madh të shkumës.

Zola: Italia, delja e zezë e Euro 2012

Legjenda e futbollit italian, Gianfranco Zola, beson se Italia duhet të merret më seriozisht nga të gjithë, pasi ai pret që kombëtarja Azzure të jetë ‘delja e zezë’ e evropianit.“Nëse Italia luan sikurse në tri ndeshjet hapëse, Anglia ose Franca nuk do të jenë problem, por ata do të kenë probleme”.
 
“Italia ka ditur të mbajë topin mirë dhe përpos një lodhje në ndeshjen e dytë, gjithçka ishte mirë në ndeshjen e tretë. Italia për mua është ‘delja e zezë’ e këtij evropiani”, ka thënë Zola.
 
Italia përballet me Anglinë në çerekfinale. 

Maradona: Futeni në kafaz Ronaldon

Legjenda argjentinase, Diego Maradona beson se Çekia duhet që ta neutralizojë Cristiano Ronaldon nëse dëshiron të ketë sukses në sfidën çerekfinale që zhvillohet sonte mbrëma.“Nuk ka dyshime se Portugalia është favorite për ndeshjen. Mbrojtja e fortë portugeze do të ketë punë me mesfushën e fortë çeke. Por, në sulm Portugalia ka avantazhin dhe ai është Cristiano Ronaldo”. 
 
“Ata e kanë atë dhe Çekia nuk e ka. Bilek e di se duhet të gjejë një zgjidhje për të futur në kafaz Ronaldon fantastik”, tha Maradona.

Rooney: Do t’ia tregojmë vendin Italisë

Sulmuesi i Anglisë, Wayne Rooney, është optimist për sfidën çerekfinale ndaj Italisë të dielën, duke pohuar se ekipi është mjaft i mirë për të mposhtur ekipin e Cesare Prandellit.“Ne jemi më të organizuar se kurrë. Djemt kanë luftuar shumë për njëri-tjetrin. Ne duam ta bëjmë këtë së bashku, kështu që mendoj se ne kemi një shans të mrekullueshëm. Ne ndihemi mirë, ne jemi përgatitur mirë dhe mezi presim sfidën”.
 
“Është me rëndësi që të besojmë në vetvete. Ne kemi një grup të madh të lojtarëve dhe kemi shumë besim. Nuk do të jetë ndeshje e lehtë, por ma merr mendja se do t’ia tregojmë vendin Italisë”, ka thënë Rooney. 

Walcott: Mund ta mposhtim këdo

Theo Walcott ka deklaruar se Anglia mund ta mposhtë cilido rival të mbetur në Euro 2012.Mesfushori i Arsenalit është i bindur se Tre Luanët kanë shans të shkëlqyeshëm ta fitojnë trofeun e parë të madh pas 46 vitesh.
 
“Nuk është me rëndësi kundër kujt luani në këtë garë, të gjithë janë të vështirë”.
 
“Të luash kundër kampionëve të botës dhe Evropës do të jetë vështirë, por ne do ta pranonim këdo në këtë moment pasi ne besojmë se mund ta mposhtim këdo”, ka thënë Walcott.

Neuer: Gjermania nuk do të përfundojë e dyta

Manuel Neuer është i vendosur ta fitojë titullin e kampionit të Evropës, për t’i dhënë fund sezonit zhgënjyes me Bayern Munichun.Portieri u desh të kënaqej me vendin e dytë në Bundeliga me Bayernin, ndërsa përfundoi i dyti edhe në Ligën e Kampionëve, ku në finale u mposht nga Chelsea, dhe në Kupën e Gjermanisë, ku u mposht nga Borussia Dortmundi.
 
“Nuk kam nevojë të frikohem se do të përfundoj i dyti edhe një herë. Kjo thjesht nuk do të ndodhë”.
 
“Është shumë e qartë. E gjithë skuadra dëshiron të qëndrojë në turne deri në finale, dhe pastaj ta fitojë titullin evropian”, ka thënë Neuer për Bild.
 
Gjermania nesër përballet me Greqinë në çerekfinale të Euro 2012. 

De Rossi: Gerrard, heroi im

Njëshi i Romës, Daniele de Rossi, ka zbuluar se ai është admirues i Steven Gerrard, në prag të ndeshjes së të dielës kur Italia përballet me Anglinë në çerekfinale të Euro 2012.“Gerrard gjithmonë ka qenë idhulli im dhe ka luajtur në nivel të lartë për shumë vite”.
 
“Anglia është shumë e fuqishme dhe luan në stilin italian, duke qenë e fuqishme në mbrojtje. Mbase ne do të kishim preferuar të përballemi me Ukrainën, por edhe kjo është në rregull”, ka thënë De Rossi.

Low: Spanja është favorite

Trajneri i Gjermanisë, Joachim Low, mendon se Spanja është një skuadër e “klasit botëror” dhe se mbetet favorite për ta fituar Euro 2012.“Ata kanë lojtarë fantastik, [Andres] Iniesta, për shembull, është një produkt i një kulture të shkëlqyeshme futbolli. Spanja gjithmonë ka qenë, dhe mbetet, favorit për ta fituar garën”.
 
“E kam parë Spanjën dy herë dhe ata janë absolutisht të klasit botëror me kombinimet që kanë”.
 
“Ata kanë pasur të njëjtin fat si shumë skuadra tjera këtu, kundërshtarë që qëndrojnë thellë në mbrojtje dhe përpiqen ta prishin ritmin tuaj. Megjithatë, ju sërish pritni Spanja të bëjë lëvizje për të shënuar gola”, ka thënë Low. 

Zidane paralajmëron: Kujdes nga Iniesta

Ish-ylli i Real Madridit, Zinedine Zidane, ka paralajmëruar ekipin e Francës ta ndalojë mesfushorin e Spanjës, Andres Iniesta, nëse dëshiron të arrijë në gjysmëfinale të Euro 2012.“Iniesta vërtet po më impresionon. Ai ka shumë ndikim në lojën e Spanjës. Ai më kujton veten time, por ai është më i mbyllur se unë”.
 
“Mendoj se shtypi është shumë i ashpër me Spanjën. Për mua, skuadra luan mirë, por nuk është lehtë kur rivalët e tyre janë të ngjeshur në mbrojtje”, ka thënë 39-vjeçari.
 
“Edhe Spanja edhe Franca do të kenë nevojë për një ndeshje të mirë për të arritur në gjysmëfinale. Parashikimi im është Spanja, ata janë favoritë”, ka shtuar më tej francezi.

Mancini: Capello ka merita për suksesin e Anglisë

Fabio Capello meriton lëvdata për suksesin e Anglisë në Euro 2012, thotë menaxheri i Manchester Cityt, Roberto Mancini.“Anglia duhet ta falënderojë Capellon. Unë i kam parë ata duke luajtur dhe e njoh organizimin e tij”.
 
“E kuptoj se Anglia luan në një mënyrë që mund të duket e mërzitshme, por në këtë moment të sezonit, të gjithë lojtarët janë të lodhur dhe nga ky aspekt ekipi që shënon i pari ka gjasa më të mëdha të fitojë”.
 
“Andaj Hodgson duhet të punojë në mbrojtje dhe të përmirësojë pjesën e tij të lojës. Ai është i mençur pasi, për një periudhë të shkurtër, revolucioni nuk funksionon. Ai ndjek punën e Capellos dhe, në fund të ditës, ai është një trajner anglo-italian”, ka thënë Mancini. 

Van Persie në bisedime me Cityn?

Asi i Arsenalit, Robin Van Persie, është parë në Mançester, duke ngritur spekulime se ai mund të jetë në bisedime me Manchester Cityn ose Manchester Unitedin.
Sulmuesi holandez është parë duke drekuar në Mançester, me ç’rast të gjitha mediat në ishull kanë filluar të flasin për një kalim të tij në këtë qytet.
Sidoqoftë, dilema mbetet në atë se me kë është duke biseduar Van Persie, pasi përpos interesimit të konfirmuar të Manchester Cityt, nuk duhet të befasohemi nga ndonjë atak i skocezit Sir Alex Ferguson, i cili në çdo moment është i gatshëm t’i bëjë bajat Cityt. 

“Ronaldo nën presion nga penaltitë”

Ikona e futbollit çek, Antonin Panenka, mendon se Cristiano Ronado do të jetë nën presion të madh psikologjik në penaltitë e radhës që do t’i godasë, ndërsa parasheh një fitore të Çekisë sonte mbrëma.
“Ndeshja do të mbarojë me rezultat 1-1 dhe Çekia do të fitojë pas penaltive. Ne Jemi më të ftohtë se portugezët. Ata janë shumë emocionalë dhe impulsivë. Në një skenar të tillë, në penalti fiton ekipi më i qetë. Kjo do të jetë përparësi për ne”.
“Unë dua të them se Ronaldo është më i mirë në gjuajtjet e lira se në penalti. Ai dridhet aq shumë gjatë penaltive, presioni ndaj tij ështës humë i madh. Për të mbarimi i një takimi pa shënuar është sikurse ndeshje e humbur. Dhe nëse duhet ta marrë një penalti, ai sigurisht se e dështon”, ka potencuar Panenka. 

Mancini: Balotelli, futbollisti më i talentuar

Teksa Mario Balotelli po vazhdon t’ia garantojë vetes kryetitujt e gazetave me batutat në stërvitje, është menaxheri i tij, Roberto Mancini, ai që ka lëvduar SuperMarion, duke thënë se ai është talenti më i madh në kombëtaren italiane.
“Mario gjithmonë duhe të startojë për Italinë, ai është lojtari më i talentuar dhe me të, kombëtarja është më e fortë”.
“Anglia është ekip i organizuar dhe është vështirë t’i mposhtësh, prandaj duhet të luani me teknikë, shpejtësi dhe pasime të shkurtra, një lojë që i përshtatet Balotellit”, ka theksuar Mancini. 

De Rossi: Kam oferta nga Anglia

Mesfushori i Romës, Daniele De Rossi, ka zbuluar se ka oferta nga klube angleze dhe në të njëjtën kohë ka potencuar se ai ndjen simpati për futbollin anglez.
“Unë kam marrë shumë oferta nga Anglia. Dhe më duhet të them se më pëlqen futbolli anglez”.
“Më pëlqen shumë futbolli anglez. Mendoj se është shumë futboll më atraktiv se sa ai italian. Ka shumë lojtarë të talentuar dhe kjo vlen edhe për Spanjën, ku luajnë futbollistët më të mirë në botë”, ka deklaruar De Rossi.

Liverpooli pas Fabio Borinit

Liverpooli është i gatshëm të nënshkruajë me ish-sulmuesin e Chelseat, Fabio Borini.
Gazzetta dello Sport shkruan se Redsat do ta sigurojnë Borinin për rreth 10 milionë euro sapo të zgjidhet çështja e pronësisë së tij.
Roma dhe Parma kanë dështuar të arrijnë marrëveshje për shumën rreth sulmuesit dhe pritet ta zgjidhin çështjen nesër përmes një ankandi të fshehtë.