Milani ta rikthejë Capellon?

Fabio Capello është duke u lidhur me një rikthim sensacional te Milani.
Ish-përzgjedhësi i Anglisë është përmendur si zëvendësim për Massimiliano Allegrin, nëse Milani dështon ta fitojë Scudetton këtë sezon.
Megjithatë, Gazzetta dello Sport shkruan se Capello mund të arrijë edhe si menaxher për të ndihmuar zëvendës-presidentin Adriano Galliani në tregun e transferimeve dhe për të menaxhuar stafin stërvitor.

Heynckes: Mund të shënojmë në Madrid

Jupp Heynckes është i bindur se Bayern Munich mund të kualifikohet për në finale të Ligës së Kampionëve duke eliminuar Realin e Madridit.
“Ne jemi të vetëdijshëm se kemi nevojë për një ose dy gola, edhe pse jemi të aftë ta bëjmë këtë pasi ne kemi sulmues të jashtëzakonshëm”.
“Por për ta realizuar këtë ne duhet ta ruajmë kompaktësinë dhe të qëndrojnë të ngjeshur, që do të na japë neve shanse të mira në ndërprerje”.
“Është tepër e rëndësishme që ne të shfaqim potencialin tonë të plotë. Ne duhet të japim 100 ose madje 110 për qind. 10 për qind të fundit vijnë nga energjia emocionale. Nëse e arrijmë këtë, ne kemi një shans të mirë t’ia dalim në finale”, ka thënë Heyncknes. 

Kuyt: Nuk i kemi plotësuar standardet e Liverpoolit

Dirk Kuyt pranon se Liverpooli nuk ka qenë i mirë sa duhet këtë sezon në Ligën Premier.
Redsat kanë fituar vetëm tre herë në ligë gjatë vitit 2012 dhe holandezi thotë se lojtarët nuk kanë ku të fshihen pas këtyre rezultateve të dobëta.
“Çfarëdo që ndodh nga tash dhe deri në fund të sezonit, ne nuk do të jemi të lumtur ose të kënaqur me pozitën në ligë. Ne po luajmë për FC Liverpoolin dhe këtu ju duhet të fitoni çdo ndeshje. Ne kemi humbur shumë ndeshje dhe shumë pikë në ligë”.
“Ndonjëherë ne kemi qenë shumë afër fitimit të ndeshjeve dhe jemi ndjerë se kemi merituar të fitojmë. Por ju nuk mund të ndjeni keqardhje për veten – ne duhet të shikojmë përpara”.
“Ne nuk mund të shikojmë prapa, ne duam t’i ndryshojmë gjërat dhe duhet ta bëjmë këtë tash duke fituar sa më shumë ndeshje që mundemi nga tash deri në fund të sezonit”, ka thënë Kuyt.

Higuain i hapur për PSG-në

Paris Saint Germain është duke kërkaur sulmuesin e Real Madirid, Gonzalo Higuain.

Edhe pse argjentinasi ka thënë se dëshiron të mbetet te Reali, kampi i tij e ka bërë të qartë se ai është duke u përgatitur të largohet gjatë kësaj vere.
Sport shkruan se Higuain është duke i menduar opsionet, me ofertën e PSG që është më joshëse për të.
Në dy ndeshjet e fundit Higuain ka luajtur vetëm tetë minuta.

Fejohet Nani

Futbollisti i Manchester Unitedit, Louis Nani, ka njoftuar në Twitter se është fejuar me Daniela Martins, me të cilën është në lidhje qe katër vite.
“Jam i lumtur t’ju njoftoj për fejesën tonë”, ka shkruar portugezi në rrjetin social.
Të shpresojmë që Sir Alex Ferguson nuk do të nevrikoset që lojtari i tij e ka vënë në rend të parë jetën private, vetëm disa ditë para derbit vendimtar për titull.

Ingrid Gjoni bëhet nënë

Këngëtarja nga Shqipëria, Ingrid Gjoni është nëna më e re në skenën e estradës shqiptare.
Bukuroshja ka lindur djalin Parid Mara gjatë orëve të hershme të së hënës, i cili është fryt i dashurisë gjashtëvjeçare të saj me partnerin Genti.
“Jam shumë e lumtur. Nuk m’a priste mendja të kishte edhe të tilla ndjesi. Emocionet kanë qenë shumë të forta, më të fortat që kam përjetuar. Kam menduar gjithmonë se dashuria për partnerin, të afërmit, miqtë, apo profesionin është shumë e madhe, por jo. Fëmija qenka mrekulli. Më duket sikur kam rilindur”, ka thënë këngëtarja për Gazetën Shqiptare.
“Emrin e vendosi Genti. Ishte dëshirë e tij që djali të quhej Parid”, ka shtuar Ingriti duke treguar se emri i tij është emri i një prijësi, siç djali i tyre do të jetë udhëheqësi i lumturisë familjare.

Argjentina probleme me të dashurin?

Lidhja e Argjentina Ramosaj me të dashurin e saj mund të jetë jo aq e qëndrueshme sa duket.
Këngëtarja së fundi kishte ndryshuar statusin e saj në Facebook në “single”, gjë që kishte nxitur huti në mesin e fansave të saj.
Duke parë reagimet e fansave, Argjentina më pas ka fshirë postimin, shkruan Koha Jonë, duke i lënë kureshtarë të gjithë ata që paraprakisht kishin parë ndryshimin në statusin e këngëtares.
Argjentina ende nuk e ka shpjeguar këtë, por kjo mund të ketë qenë ndonjë grindje kalimtare me të dashurin, ose ndoshta edhe ndonjë shaka për të parë reagimin e publikut. 

Kim: Interneti më bëri të famshme

Kim Kardashian është e bindur se fama e saj është rritur dukshëm falë internetit dhe rrjeteve sociale si Twitter dhe Facebook, pasi përmes tyre ajo lidhet drejtpërdrejt me fansat.
“Mendoj se shumë prej bazës tonë të fansave dhe shumica e lidhjeve tona me njerëz është e bazuar në internet”.
“Mendoj se interneti ka sjellë një lloj tjetër të famës. Ne të gjithë jemi të vetëdijshëm se kush jemi dhe ku është vendi jonë. Ne jemi shumë aktive në Twitter, në Facebook, ne përgjigjemi, ne jemi të lidhur. Ne kënaqemi”, ka thënë Kim.

Pse femrat flasin më shumë

Sepse, pjesët e trurit të ngarkuara për të folur janë më të zhvilluara së paku për 20 për qind më shumë tek femrat se te meshkujt.
Për këtë arsye llafazania ‘femërore’ është thjesht çështje e anatomisë. Për femrat, të folurit shumë është një çlirim stresi dhe u jep një kënaqësi të madhe fizike, ashtu siç japin drogat.
Neuropsikiatrja kaliforniane, Louann Brizedine, në librin “Truri femëror”, pohon se truri i një femre dhe truri i një mashkulli ndryshojnë shumë nga njëri-tjetri për shkak të aktivitetit të ndryshëm hormonal. Progesteroni dhe testosteroni janë elementët bazë të sjelljes dhe identitetit, me të gjitha pasojat e mundshme.
Pra, le të sqarojmë një fakt të rëndësishëm: e folura është një tipar që natyra ia ka dhuruar femrës. Këtë e di mirë ish-rektori i Harwardit, Lawrence Summers, i cili rrezikoi vendin e punës sepse u shpreh që femrat janë aq pak të zonjat për të përballuar shkencën, saqë në fushën akademike kanë shumë pak sukses. 

Guaska për testikuj

Nëse me kujdes i shikoni guaskat, do të vëreni se si forma e tyre përngjan me testikujt. Guaskat janë burim i shkëlqyer i acidit folik, zinkut, hekurit, acideve yndyrore omega 3, proteinave dhe kolesterolit të mirë.
Janë të shkëlqyeshme për shëndetin e përgjithshëm dhe veçanërisht për shëndetin e testikujve.
Konsumimi i guaskave do të ndihmojë te përmirësimi i kualitetit të spermës dhe me këtë do të ndihmojë edhe tek përmirësimi i fertilitetit.
Guaskat do të nxisin krijimin e testosteroneve, reduktojnë rrezikun nga krijimi i kancerit të prostatës dhe përmirësojnë shëndetin e organeve reproduktive në përgjithësi. 

HTC zhvillon çipa mobil

HTC në telefonat e vet të ardhshëm mobil dhe në tablet mund të ndodhë të filloj të përdorë zgjidhjen e vet SoC.
Kompania sipas pohimeve në fshehtësinë qysh tani po bashkëpunon me ST-Ericsson dhe Qualcomm në dizajnin e procesorit për pajisjet e veta, e më vonë mund të ndodhë të formohet edhe një departament i posaçëm brenda HTC-së pikërisht për këtë qëllim.
HTC kështu po punon duke marrë yrnek nga prodhuesit tjerë më të mëdhenj të pajisjeve mobile (përveç Apple dhe Samsung), të cilët gjithashtu në top-modelet e tyre kanë çipat të cilët i kanë dizajnuar dhe/ose prodhuar vet. SoC zgjidhjet e para të këtilla pritet të paraqiten vetëm gjatë vitit të ardhshëm, por nuk dihet nëse kompania vet po i dizajnon çipat ose nëse thjesht ka kërkuar nga ST-Ericsson dhe Qualcomm dizajnin dhe prodhimin e SoS-së sipas specifikave të veta. 

I hakmerret burrit me pesë meshkuj

Një gjermane për dy vite me radhë ka bërë një ‘eksperiment’ të pazakontë – ka pasur njëkohësisht pesë dashnorë, ndërsa përjetimet e saj i ka shkruar në një libër.
39-vjeçarja nga Kylni pas 15 vitesh martesë kishte zbuluar se burri e tradhtonte me shoqen e saj më të mirë dhe i dha fund martesës.
Ajo e kishte të vështirë që të kishte lidhje me ndonjë mashkull tjetër, duke qenë se zemra e saj “nuk i takonte më asnjë burri”.
Gruaja gjeti pesë meshkuj të ndryshëm me të cilit nisi lidhje seksuale, ku nuk kishte vend për dashuri, ndërsa asnjërit prej tyre nuk i tregonte rreth aftësive të të tjerëve në krevat.
Tash, ajo i ka dhënë fund këtij ‘eksperimenti’, megjithatë akoma nuk e imagjinon veten me një mashkull të vetëm. 

I kujt është gjevreku?

Turqia dhe Greqia, dy rivalët historikë, të cilët nuk pajtohen për shumë çështje, tash kanë hapur një tjetër front: I kujt është gjevreku?
Shitësit e gjevrekëve në Stamboll kanë kërkuar që ky produkt të licencohet si turk, pasi që grekët thonë se është i tyre.
‘Lufta’ ka filluar kur një gazetë greke (Eleftheros Typos) ishte përpjekur të dëshmojë se gjevreku ekzistonte para erës së re dhe se ka qenë mjaft i popullarizuar në Selanik dhe Stamboll dhe se, sipas gazetës, ishte produkt bizantin e në asnjë mënyrë turk.
“Gjevreku është simbol i Stambollit. Është pjesë e kulturës turke edhe për të pasurit edhe për të varfrit. Ekziston dallim i madh mes gjevrekut turk dhe atij grek në mënyrën e gatimit dhe vendosjes së susamit nëpër të”, thonë ekspertët turq.
Të dyja palët kanë argumentet e tyre, përmes të cilave dëshmojnë se gjevreku (në Turqi – simite, në Greqi – koulouri i Selanikut) është i tyre.
Athina dhe Ankaraja nuk mund të gjejnë gjuhë të përbashkët edhe për shumë çështje politike, siç është problemi i Qipros dhe hapësira detare dhe ajrore në Egje.

Prifti i dikurshëm shet lodra seksuale

Një ish-prift nga Holanda me emrin Marc Angenent, aktualisht ka për profesion shitjen e lodrave seksuale.
Der Spiegel raporton se Angenent ka krijuar një faqe interneti përmes së cilës shet vibratorë, kondomë dhe gjësende tjera seksuale.
Bëhet e ditur se për 23 vite ai kishte shërbyer si prift, ndërsa tani ka filluar një biznes skajshmërisht të pazakontë për të.
Ai ka thënë se është shqetësuar për jetën seksuale të besimtarëve të krishterë edhe gjatë kohës sa ka qenë prift. Ashtu që çiftet i kishte pyetur haptas: “A jeni të kënaqur me jetën tuaj seksuale?”.
Dhe, pasi me vite të tëra kishte marrë përgjigje negative, Angenent vendosi që t’i përkushtohej në tërësi kësaj pune duke u angazhuar në rolin e një lloj terapeuti seksual. 

Thaçi: Komuniteti turk, shembull i integrimit

Popullata turke natyrshëm dhe në harmoni me interesat e veta dhe të shumicës së qytetarëve të Kosovës, ishte pjesë e proceseve historike që çuan drejt lirisë dhe pavarësisë së Kosovës, ka thënë të hënën kryeministri Hashim Thaçi, në Ditën Memoriale të turqve të Kosovës.
 “Në të gjitha periudhat historike të Kosovës moderne komuniteti turk luajti rol pozitiv, duke ruajtur dhe kultivuar harmoninë, miqësinë, tolerancën dhe respektin me komunitetet tjera dhe popullatën shumicë të Kosovës”, tha kryeministri në ceremoninë e organizuar për këtë datë.
“Komuniteti turk dha kontribut në të gjitha fazat e tranzicionit, duke qenë pjesëmarrës aktiv në institucionet e pushtetit lokal, aty ku ishte më i madh në numër, por edhe në nivel të pushtetit qendror, duke dhënë kontribut në Kuvendin, në Qeveri dhe segmente tjera të shoqërisë sonë”.
“Përfaqësuesit e komunitetit turk janë pjesë e procesit të shpalljes së Kosovës shtet i pavarur dhe sovran më 17 shkurt 2008. Komuniteti turk në Kosovë është shembull më i mirë i integrimit të tërësishëm në jetën institucionale të vendit tonë. Përfaqësues të komunitetit janë kudo: në radhët e Forcës së Sigurisë së Kosovës, në Policinë e Kosovës, në Gjykatën Kushtetuese, në Universitet dhe institucione tjera”.
“Në Ditën e Komunitetit Turk të Kosovës, rikonfirmojmë qëndrimin e Qeverisës së Kosovës për thellimin e klimës politike dhe njerëzore që komunitetet e Kosovës të jenë autorë dhe aktorë të barabartë në realizimin e lirisë dhe të drejtave të tyre”, tha ndër të tjera kryeministri Thaçi. 

Serbia e fajëson OSBE-në për ‘zgjedhjet’ në Kosovë

Pas heqjes dorë nga organizimi i zgjedhjeve lokale, askush në Serbi nuk mund të shpjegojë se kush dhe si do t’i organizojë zgjedhjet presidenciale dhe ato parlamentare serbe në Kosovë, për ata qytetarë që kanë dyshtetësi.
 Kryetari i Komisionit zgjedhor republikan, Veljko Odalovic, ka thënë për Radion Evropa e Lirë në gjuhën serbe, se nuk mund të thotë asgjë lidhur me këtë çështje. Edhe pse kanë mbetur dy javë deri në ditën e zgjedhjeve, ai ka thënë se kjo është duhet drejtuar ‘Ministrisë për Kosovën’ në Qeverinë e Serbisë.
I ashtuquajturi sekretar shtetërorë në të ashtuquajturën Ministri për Kosovën, Oliver Ivanovic, është shprehur i habitur me përgjigjen e Komisionit zgjedhor. Ai ka thënë se është detyrë e këtij komisioni ta bëj hapjen e qendrave të votimit edhe në territorin e Kosovës.
Pak më i qartë rreth kësaj teme ka qenë i ashtuquajturi ministri për Kosovën në Qeverinë e Serbisë, Goran Bogdanovic, i cili për këtë paqartësi ka fajësuar Organizatën për Siguri dhe Bashkëpunim Evropian, OSBE. Ai ka thënë se Serbia është e gatshme ta pranojë ndihmën e OSBE-së, por assesi ta lejojë atë që t’i organizojë zgjedhjet serbe në Kosovë.
“Jemi të gatshëm të zvogëlojmë numrin e qendrave të votimit; jemi të gatshëm që zgjedhjet të mos i mbajmë në objektet, që sic thonë shqiptarët, shfrytëzohen nga strukturat paralele; jemi të gatshëm të mos vendosim simbole në jug të Ibrit, e që do t’i irritonin shqiptarët, por nuk jemi të gatshëm që këto zgjedhje t’i organizojë OSBE-ja”, ka thënë Bogdanovic.
Autoritetet kosovarë kanë paralajmëruar Serbinë se do të pengojnë me forcë mbajtjen e zgjedhjeve lokale serbe. Beogradi publikisht ka hequr dorë nga këto palë zgjedhje, por strukturat paralele të Serbisë, vazhdojnë të pohojnë se do të mbahen edhe zgjedhjet lokale. Por sipas autoriteteve kosovare, në Kosovë nuk do të organizohen asnjë palë zgjedhje, ndërsa serbët që kanë dyshtetësi, mund të votojnë në zgjedhjet presidenciale dhe parlamentare përmes postës. 

Nuhiu hedh poshtë akuzat e prokurorisë serbe

Ish-pjesëtari i Ushtrisë Çlirimtare të Kosovës, Shemsi Nuhiu, ka hedhur poshtë akuzat para Departamentit për krime të luftës të Gjykatës së Lartë të Serbisë se ka marrë pjesë në vrasjen dhe torturimin e civilëve serbë në Gjilan në vitin 1999, si anëtar i të ashtuquajturit ‘Grupit të Gjilanit të UÇK-së’.
 Në fillim të gjykimit të unifikuar kundër 17 anëtarëve të të ashtuquajturit Grupit të Gjilanit të UÇK-së, 12 nga të cilët janë në arrati, Nuhiu ka mohuar edhe se ka qenë anëtar i UÇK-së, duke argumentuar se për krimin në Gjilan, me të cilin është ngarkuar nga prokuroria serbe, ka mësuar nga gazetat dhe ka pohuar se aktakuza nuk është e saktë.
Nuhiu është arrestuar një vit më parë në Zvicër në bazë të një fletarrestimi të Serbisë dhe në fund të muajit mars u ekstradua në Serbi, ndërsa është paraqitur për herë të parë në gjykatë të hënën.
Përveç tij në paraburgim gjenden edhe tre të pandehur, njëri mbrohet në liri, ndërsa të tjerët janë të paarritshëm për autoritetet gjyqësore të Serbisë dhe janë duke u gjykuar në mungesë.
Në gjykimin e së hënës, të gjithë të akuzuarit përsëriten se procesi është i motivuar politikisht kundër tyre, duke mohuar përfshirjen në krimet që i vishen UÇK-së.

Topalli: Ferizaj është rrënuar nga hajnia

“Me mbi 100 mijë banorë, Ferizaj është komuna e tretë më e populluar në Kosovë. Me njerëzit e kësaj komune, me potencialin e ekonomisë tonë dhe me pasuritë që na ka falur natyra, Ferizaj i ka të gjitha mundësitë që të jetë një komunë ku lulëzon mirëqenia”, tha të hënën kandidati i Lëvizjes Vetëvendosje për kryetar të Ferizajt, Faton Topalli, në tubimin e hapjes së fushatës elektorale.
 Ai tha se në vend të zhvillimit, në Ferizaj ka ndodhur e kundërta për shkak të pushtetit të mbrapsht të të gjitha partive që e kanë qeverisur dhe vazhdojnë ta qeverisin komunën. “Ata nuk kanë punuar kurrë që t’i japin Ferizajt peshën, rëndësinë dhe mirëqenien që i takon. Ne kemi mbetur një komunë e varfër, me mijëra njerëz të papunë; një komunë e rrënuar nga hajnia dhe korrupsioni. Degradimi tashmë ka depërtuar në çdo sektor publik, dhe ka arritur deri aty sa t’u grabisë njerëzve edhe shpresën. Kjo gjendje nuk mund të tolerohet më. Bashkë, së pari duhet t’i njohim dhe t’i themi me zë të lartë të gjitha të vërtetat e dhimbshme të pushtetit të pasluftës në Ferizaj”.
Topalli tha se në Ferizaj, për çdo tre njerëz të aftë për punë, vetëm njëri punon. “Shumë familje të qytetarëve kanë mbetur pa të ardhura, ndërsa familjet e pushtetarëve kanë marrë për vete secilën mundësi. Varfëria e ka lënë fshatin të pazhvilluar, dhe qytetin të paurbanizuar. Varfëria e ka bërë të pamundshëm dinjitetin e pensionistit, dhe e ka rrezikuar të ardhmen e gjithë brezit të ri. Të rinjtë tanë ndodhen para dy mundësive, ose të largohen ose të punësohen në vende pune ku shfrytëzohen”.
“Varfëria dhe papunësia janë plagë të rënda që nuk i kemi marrë rastësisht. Ato janë pasojat e një mendësie të sëmurë që ka mbizotëruar te krejt partitë e tjera politike. I kemi parë pushtetarët që pasurohen në kurriz të një populli që varfërohet. Ata blejnë xhipa të shtrenjtë, ndërtojnë vila e pallate për familjet e tyre; dhe shtrohet pyetja si i arrijnë këto të mira materiale? I arrijnë me ato para që dalin prej kontributeve tona, para që do të duhej t’i përdornin për të ndërtuar shkolla, spitale e fabrika. Ky lloj pushteti e dobëson shtetin. Ky lloj pushteti forcon korrupsionin. Dhe korrupsioni sjell krimin”, tha ndër të tjera Topalli duke u bërë thirrje qytetarëve të Ferizajt të votojnë Vetëvendosjen.

Salihaj, porosi Thaçit, Ferizajn e ke të humbur

Kryetari i Degës së LDK-së në Ferizaj, Adem Salihaj, njëherësh kandidat për kryetar komune në këtë komunë, shpalosi të hënën programin me të cilin do të qeveriset komuna e Ferizajt në rast se ai do të fitojë. Ai tha se do të bëj shumë ndryshime dhe se do të jetë i pakompromis në luftën kundër krimit të organizuar.
 “Unë ju premtoj një zhvillim të mirfillt për kushte më të mira dhe lehtësime të bizneseve, me qëllim që të hapen vende të reja pune për të rinjtë e komunës sonë. Ne do të punojmë me përkushtim ashtu siç kemi punuar dikur dhe një nga një do ti zgjidhim problemet tuaja, problemet e infrastrukturës, siç janë rrugët, kanalizimet, ujësjellësit, do të jenë në fokusin e vëmendjes sonë. Poashtu do të punojmë shumë që ta përmirësojmë gjendjen në arsim, shëndetësi, kulturë rini dhe sport”, tha Salihaj.
“Hajnia korrupsioni dhe krimi i organizuar kanë marrë aq shumë hov sa që qytetarët e kanë humbur besimin në institucionet e Kosovës. Unë, ju premtoj se lufta ime kundër krimit të organizuar do të jetë e pakomromis”, tha Salihaj duke e porositur liderin e Partisë Demokratike, kryeministrin Hashim Thaçi, se ‘as Lipjani, as Gjilanin, e as vjedhja dhe manipulimi i zgjedhjeve, nuk do ta shpëtojë atë nga humbja e sigurt në Ferizaj”. 

Gudjohnsen: Chelsea mund ta kalojë Barcën

Lojtari i cili ka veshur edhe fanellën e Chelseat edhe atë të Barcelonës, Eidur Gudjohnsen, mendon se Blutë janë të aftë ta eliminojnë Barcelonën nga Liga e Kampionëve.
“Chelsea i ka dhënë vetes shpresë me mënyrën se si është mbrojtur në Stamfrod Bridge. Pakëz kanë pasur edhe fat, por mendojnë se mund të fitojnë”.
“Në Stamford Bridge ishin taktikisht mirë të organizuar. Ia kufizuan Barcelonës hapësirën për lojë.
“I pret një punë shumë e vështirë në 90 minutat në Camp Nou, mirëpo një herë ia dolën (në fitoren prej 1-0 në Londër)”, ka thënë sulmuesi i AEK-ut për BBC.

Xavi: Chelsean e pret ferri

Tifozët e Barcelonës janë duke përgatitur një ‘ferr’ për lojtarët e Chelseat në ndeshjen kthyese gjysmëfinale të Ligës së Kampionëve – ka deklaruar Xavi.
Ekipi i Roberto di Matteos të martën do ta fillojë ndeshjen në Camp Nou me avantazh prej 1-0 nga përballja e parë, ndërsa mesfushori spanjoll beson se tifozët katalunas do t’u japin shtytje të madhe lojtarëve të Barcës.
“Luajmë për finale dhe kjo tregon gjithçka. Tifozët e dinë mirë se çfarë rëndësie ka kjo ndeshje dhe vërtet na duhet mbështetja e tyre, e cila gjithmonë na ka shërbyer në raste të këtilla”.
“Padyshim, lojtarët e Chelseat i pret ferri”, citon The Sun fjalët e kreatorit të lojës së Blaugranëve.

Kthehen Boateng dhe Silva

Skuadra e Milanit ka marrë një shtytje, pasi Kevin Prince-Boateng dhe Thiago Silva janë kthyer në stërvitje.
Për shkak të problemeve muskulore, Boateng nuk ka luajtur që nga çerekfinalja e Ligës së Kampionëve ndaj Barcelonës.
Nga ana tjetër, Silva u lëndua edhe më herët (në sfidën ndaj Romës më 24 mars), ashtu që nuk luajti në asnjërën ndeshje ndaj Barcës.
Sido që të jetë, të hënën të dy lojtarët ishin në seancën stërvitore në Milanello, ashtu që pritet të luajnë në mesjavë ndaj Genoas. 

Rossi dhjetë muaj jashtë fushe

Sulmuesi i Villarrealit, Giuseppe Rossi, ka nevojë për një tjetër ndërhyrje kirurgjike në gjunjë, që do të thotë se ai nuk do të mund të luajë në dhjetë muajt e ardhshëm.
Gjatë prillit italiani e ka dëmtuar ligamentin e përparmë për të dytën herë për më pak se një muaj dhe fillimisht u mendua se ai do të mungonte vetëm gjashtë muaj, por tash është thënë se mungesa e tij do të jetë më e gjatë.
Kjo do të thotë se Rossi nuk do ta përfaqësojë Italinë në Kampionatin e ardhshëm Evropian dhe nuk do të mund të transferohet në ndonjë skuadër italiane, ashtu siç ishte pritur. 

Zidane u thotë lojtarëve: Do të luani në finale!

Drejtori sportiv i Real Madridit, Zinedine Zidane, u ka thënë lojtarëve të klubit mbretëror se ata do ta eliminojnë Bayern Munichun nga Liga e Kampionëve.
Bavarezët kanë avantazh prej 2-1 nga përballja e parë gjysmëfinale, ndërsa mesfushori i dikurshëm mendon se vetëbesimi i Los Blancos do të jetë vendimtar për kualifikim në finale të Ligës së Kampionëve.
“Mbrojtja e fanellës së Real Madridit është unike. Të mposhtësh një lojtar të shkathët është drithëruese. Të shënon gol në Bernabeu është magjike”.
“Por ka diçka që më lë pa fjalë, është kur je i bindur se do ta fitosh ndeshjen. Atëherë do ta fitosh ndeshjen”, ka thënë francezi. 

Adele, ikonë e homoseksualëve

Këngëtarja britanike, Adele, është ikonë e re e homoseksualëve. Një radio në Britani të Madhe e dedikuar për homoseksualët e ka shpallur atë si artiste të vitit.
Krijuesja e hitit “Someone Like You” ka grumbulluar 55 për qind nga 4.000 votat e përgjithshme, ndërsa konkurrentja e saj më e afërt ishte Lady Gaga me 19 për qind të votave.
Sipas The Sun, redaktori i radios Gaydar, Robin Crowley, ka deklaruar se ky është një nga çmimet më të rëndësishme që ka fituar ndonjëherë Adele.

‘Mësoni shumë, Kosova është vend i mundësive’

Këtë javë shkollat në Kosovë do të realizojnë aktivitete të ndryshme edukativo-arsimore (sipas zgjedhjes së tyre: debate, ekspozita, orë letrare, shfaqje teatrale, dhe aktivitete tjera) në përputhje me temën e përmendur.
 Ministri i Arsimit, Shkencës dhe Teknologjisë, Ramë Buja, në shkollën e mesme teknike “ Fehmi Agani” në Klinë, të hënën ka shpallur të hapur aktivitetin “ Java e arsimit për të gjithë” me temë “Të rinjtë, shkathtësitë dhe puna”.
Ministri Buja tha se kjo javë është e karakterit global dhe i kushtohet kryesisht zhvillimit dhe aftësimit profesional të të rinjve, përkatësisht aftësimit të tyre për jetën. “Rezultati i juaj është evident ndonëse në kushte jo të mira, ndërkaq çështja e shkollave dhe arsimit profesional është brengë e të gjithë neve”.
“Ne si institucioni më i lartë arsimor i vendit po insistojmë që kjo të përmirësohet në vazhdimësi dhe në këtë kontekst kemi marrë iniciativën dhe do të themelojmë Agjencionin për Arsim dhe Aftësim Profesional, i cili do të avancojë më shumë këtë sektor të arsimit“, tha Buja.
“Porosia ime është që të mësoni sa më shumë. Kosova është dhe do të jetë vend i mundësive të mëdha dhe me perspektivë të ndritshme edhe për ju të dashur nxënës”, tha Buja, i cili ndau mirënjohje dhe shpërblime të veçanta për nxënësit e dalluar në mësim dhe punën praktike.

E shqetëson EULEX-i!

Shefi i NATO-s, Anders Fogh Rasmussen, ka deklaruar të hënën se është i shqetësuar për faktin se misioni i Bashkimit Evropian në Kosovë, EULEX, nuk ka burime të mjaftueshme, dhe për pasojë shpeshherë i është dashur Aleancës ushtarake të marrë barrën që nuk i takon.
 “Të jem i sinqertë, jam shumë i shqetësuar, për faktin se misioni i Bashkimit Evropian, EULEX-i, nuk ka burime të mjaftueshme, që në praktikë, ka implikime të fuqishme për NATO-n, sepse pastaj po ndikohen operacionet e KFOR-it”, ka thënë Rasmussen para ligjvënësve të BE-së, njofton DPA.
KFOR-i është vendosur në Kosovë pas sulmeve ajrore të NATO-s dhe kapitullimit të Serbisë, më 1999, ndërsa EULEX-i është dërguar pas shpalljes së pavarësisë së Kosovës, për të ndihmuar ndërtimin e institucioneve shtetërore dhe sundimin e ligjit.
“Shpresoj se ju mund të përdorni ndikimin tuaj në mënyrë që EULEX-i të ketë burime të mjaftueshme. Tani për tani ne duhet të ndërmarrim detyrat dhe përgjegjësitë që nuk janë paraparë, në veçanti në pjesën veriore të Kosovës”, ka thënë Rasmussen gjatë një debati në Komitetin e Parlamentit Evropian për Punë të Jashtme në Bruksel.
Shefja e diplomacisë së BE-së, Catherine Ashton, duke komentuar deklaratën e shefit të NATO-s, ka thënë se Bashkimi Evropian është gjithmonë në pozicionin e kërkimit të burimeve më të mëdha për të ndihmuar misionin e vet në veri të Kosovës. Ajo ka thënë se kjo çështje është ngritur edhe gjatë diskutimeve me sekretaren amerikane të Shtetit, Hillary Clinton gjatë një takimi të ministrave të Jashtëm të NATO-s. 

Lamela suspendohet për tri ndeshje

Mesfushori i Romës, Erik Lamela, është suspenduar për tri ndeshje pasi pështyu mbrojtësin e Juventusit, Stephan Lichtsteiner, në ndeshjen e të dielës në Juventus Stadium.
Argjentinasi pati një mosmarrëveshje me zviceranin, ndërsa sjellja e tij josportive nuk u rra në sy gjyqtarëve të ndeshjes, por kamerat xhirojnë gjithçka.
Si pasojë e këtij veprimi, Lamela nuk do të luajë ndaj Fiorentinas, Napolit dhe Chievos. 

Pique nuk ka probleme me Guardiolan

Mbrojtësi i Barcelonës, Gerard Pique, ka mohuar spekulimet, sipas të cilave, ai nuk ka raporte të mira me trajnerin Pep Guardiola.
Në javët e fundit, spanjolli ka munguar në formacionin bazë të Blaugranëve, mirëpo ai thotë se raportet me trajnerin janë shumë të mira.
“Do ta vendosja dorën në zjarr që Pep të qëndrojë (në postin e trajnerit). Edhe pse ka njerëz që dyshojnë, raporti im me Guardiolan është fantastik. Ne flasim shumë më tepër saqë mendojnë njerëzit”.
“Qëndrimi në bankën rezervë është përvojë e re për mua, por është vendimi i trajnerit dhe unë duhet ta respektoj”, u ka thënë Pique gazetarëve. 

Ferguson: Derbi vendos titullin

Menaxheri i Manchester United, Sir Alex Ferguson, thotë se ndeshja e të hënës së ardhshme kundër Manchester Cityt do ta vendosë titullin.
“Po, definitivisht. Ne u kemi dhënë atyre një iniciativë, nuk ka dyshim për këtë. Kjo e bën ndeshjen në Etihad një ndeshje vërtet të rëndësishme. Një ndeshje vërtet vendimtare”.
“Ka pasur një pritje nga City se kjo mund të jetë ndeshja e tyre vendimtare, por kjo është vendimtare edhe për ne”, ka thënë Fergie.
United aktualisht është tre pikë para Cityt, me këta të fundit që kanë një diferencë më të mirë të golave dhe nëse fitojnë në derbi do ta merrnin kreun e tabelës.