LDK: Qeveria Thaçi e pasionuar në përgatitjen e strategjive

Lidhja Demokratike e Kosovës vlerësoi të mërkurën se Qeveria Thaçi 2 ka filluar mandatin pa ndonjë plan qeverisës, duke kërkuar kështu që të ndërpritet praktika e përgatitjes së strategjive, pasi sipas LDK-së vendit i duhet një qeveri e përgjegjshme, që ka vizion, që integron objektivat zhvillimore në një plan të përgjithshëm dhe që i orienton resurset e vendit drejt atyre objektivave.
LDK përmes një kumtese për media thekson se premtimet e dhëna gjatë zgjedhjeve asnjëherë nuk u kthyen në plan pune të qeverisë, duke pohuar se plani i vetëm që ka kjo qeveri është Plani i Bullgarisë, i përgatitur gjatë një fundjave nga disa anëtarë të kabinetit qeveritar.
“Qytetarët në veri kanë nevojë për siguri për jetë normale, e jo përgatitje të strategjive kundër krimit. Bujqit në Kosovë duhet të sigurohen se produktet e tyre do të gjejnë tregun e duhur dhe nuk do kenë pengesa për eksport të produkteve. Të papunët kanë nevojë për masa konkrete që të rrisin shpresat se një ditë do të sigurojnë të ardhura për familjet e tyre. Studentët duhet të kenë shpresa se do gjejnë punë pas diplomimit, e jo t’ju drejtohen zyrave të punësimit për tu regjistruar si të papunë. Këtij vendi i duhet kthyer shpresat e humbura nga Qeveria Thaçi”, thekson LDK.
Sipas kësaj partie, përgatitja e strategjive është bërë mani për Qeverinë e Kosovës. “Gjatë vitit 2012 planifikohet të përgatiten 41 strategji të ndryshme (bazuar në Planin Vjetor të Dokumenteve Strategjike për vitin 2012 të Qeverisë së Kosovës)”, thuhet ndër të tjera në kumtesë.

Kroacia mbështet forcimin e shtetësisë së Kosovës

Ministri i Punëve të Jashtme i Republikës së Kosovës, Enver Hoxhaj, ka pritur një delegacion të lartë të Ministrisë së Punëve të Jashtme dhe Çështjeve Evropiane të Republikës së Kroacisë, i cili po qëndron për një vizitë pune në Kosovë, ndërsa me këtë rast është konfirmuar mbështetja e shtetit kroat për forcimin e shtetësisë së Kosovës.
Në njoftimin për media bëhet e ditur se në takimin që ministri Hoxhaj zhvilloi me delegacionin kroat, të kryesuar nga Nebojsa Koharovic, drejtor Gjeneral i Çështjeve Bilaterale në Ministrinë e Punëve të Jashtme dhe Çështjeve Evropiane të Kroacisë, u bisedua për thellimin e bashkëpunimit politik, ekonomik, social e arsimore mes dy shteteve.
Hoxhaj ka shprehur vullnetin e Qeverisë së Kosovës për të përfituar nga eksperienca e suksesshme e Kroacisë në proceset integruese të Kosovës.
Ndërsa, udhëheqësi i delegacionit kroat, Nebojsa Koharovic dhe zëvendësministri i Punëve të Jashtme i Kosovës, Ibrahim Gashi, kanë dhënë një deklaratë për medie.
Koharović ka shprehur mbështetjen e plotë të Republikës së Kroacisë jo vetëm për pavarësinë e Kosovës, por edhe për të gjitha proceset e tjera që lidhen me forcimin e shtetësisë së Kosovës.
Ai ka theksuar gatishmërinë e plotë të Kroacisë për të mbështetur Kosovën në proceset integruese në Bashkimin Evropian dhe në NATO.
“Ne si Qeveri e Kroacisë, mbështesim fuqishëm Kosovën në të dy këto procese integruese sepse Kosova jo vetëm që e meriton nga faza dhe dimensionet e reformave që janë ndërmarrë gjatë katër vjetëve pas pavarësisë, por pasi që është edhe një shtet që është i paevitueshëm në çdo lloj procesi të stabilizimit të rajonit tonë”, tha Koharovic.
Ai vlerësoi po ashtu se Kosova është një nga partnerët e Kroacisë në rajon, duke theksuar rëndësinë e thellimit të mëtutjeshëm të marrëdhënieve bilaterale mes dy shteteve në aspektin politik, ekonomik por edhe në raportet sociale mes qytetarëve të të dyja vendeve.
Nga ana tjetër, zëvendësministri i Punëve të Jashtme i Kosovës, Ibrahim Gashi tha se vizita e delegacionit kroat në Kosovë ka karakter pune dhe se gjatë takimeve konsultative do të vlerësohet shkalla e bashkëpunimit midis dy vendeve tona.
“Republika e Kosovës është shumë e interesuar që të thellojë bashkëpunimin, të rris numrin e marrëveshjeve bilaterale ndërmjet dy shteteve si dhe të përfitoj nga përvoja e Kroacisë në procesin e shtetndërtimit e mbi të gjitha nga eksperienca kroate në procesin e integrimit evropian, ku Kroacia në fakt ka kryer me shumë sukses këtë proces dhe është në fazën finale të anëtarësimit”, tha Gashi, duke shtuar se eksperienca e Kroacisë është e vlefshme jo vetëm për Kosovën, por edhe për të gjitha vendet e rajonit. 

Serbia “ndërpret” hetimet kundër Thaçit e Çekut

Prokurori serb për krime lufte, Vladimir Vukcevic, tha se do të shqyrtohen të gjitha urdhër-arrestet e luftës sepse “po krijohet përshtypja se ato janë procese politike”.
"Reliktet e luftërave të viteve nëntëdhjetë janë procese në mungesë kundër personave të panjohur, të motivuar nga rrethanat politike në atë kohë. Unë mendoj se janë shumë njerëz në këto urdhër-arreste, dhe se kur vjen koha e pajtimit, ne duhet së bashku të rishqyrtojmë të gjitha këto lista nga lufta. Ato diskreditojnë vendin tonë dhe krijojnë përshtypjen se këtu po zhvillohen proceset politike”, tha Vukcevic për Danas.
I pyetur se çfarë po ndodhë me hetimet kundër Hashim Thaçit dhe Agim Çekut, “për krime lufte kundër serbëve gjatë konfliktit me UÇK-në më 1998 dhe 1999”, Vukcevic tha se "hetimet kanë një ndërprerje, dhe se lëndët në atë kohë ishin të përgatitura keq".
"Ka pas shkelje të rënda të procedurave, sidomos për Çekun... Kjo nuk do të thotë se ata nuk janë përgjegjës për shumë krime, por se hetimet nuk është dashur të bëhen para kamerave, pa avokatë e gjëra të ngjashme”
I pyetur nëse ai pret të zbulohen autorët dhe urdhëruesit e vrasjes së vëllezërve Bytyqi, Vukcevic thotë se “bashkë me kolegët amerikanë po bëjmë gjithçka që është e mundur për të ardhur deri te zgjidhja e këtij rasti”.
"Në asnjë moment nuk jemi ndalë. Në fjalën përfundimtare të Prokurorisë, të cilin keni pas rast ta dëgjoni javën e kaluar në rigjykimin e kësaj lënde, thuhet qartë se kush ka urdhëruar këtë krim: Vlastimir Dordevic, i cili nga Tribunali i Hagës pret vendimin e shkallës së dytë, dhe të gjithë personat në zinxhirin komandues janë përmendur në padinë tonë. Problemi është, e këtë e kemi cekur, se ish policët dhe pjesëmarrësit tjerë të këtij krimi po e mbulojnë njëri-tjetrin”.

A ka keqpërdorim të të dhënave personale?

Mbrojtja e të dhënave personale në Kosovë është e garantuar me Kushtetutë. Neni 36 mbron privatësinë dhe garanton mbrojtjen e të dhënave personale, ndërsa neni 3 përcakton në mënyrë eksplicite se fshehtësia e korrespondencës, telefonisë dhe mjeteve e tjera të komunikimit janë të drejta të pacenueshme.
Ato, në raste të caktuara mund të kufizohen vetëm përkohësisht, dhe atë me vendim të gjykatës, nëse një gjë e tillë është e domosdoshme për vijimin e procedurës penale, apo edhe për të garantuar sigurinë kombëtare të vendit, në mënyrë të përcaktuar me ligj, shkruan Evropa e Lirë.
Por, pavarësisht gjithë kësaj, në Kosovë, ligji për mbrojtjen e të dhënave personale, i miratuar nga Kuvendi i Kovës në vitin 2010, sipas njohësve të çështjeve të telekomunikacionit dhe përfaqësuesve të Qendrës Kosovare për Studime të Sigurisë, ka nivel shumë të ulët të zbatueshmërisë, dhe moszbatimi i tij, thonë ata, lë hapësira të mëdha për keqpërdorim të të dhënave personale.
Eksperti i telekomunikacionit, dikur udhëheqës në PTK, Agron Dida, thotë se Kosova ka infrastrukturë shumë të dobët të ligjeve për mbrojtjen e të dhënave personale.
Ai thekson se shkelja e privatësisë në Kosovë nuk bëhet vetëm në aspektin e telefonisë, por edhe në aspektin e të dhënave, kur ka të bëjë me komunikime digjitale, siç është interneti.
Të dhënat personale, qytetarët e Kosovës i kanë dhënë edhe kur është bërë regjistrimi i përdoruesve të telefonave mobil.
Në Kosovë janë katër operatorë mobil: “Vala”, “Ipko”, “Z-Mobile” dhe “D3”. Prej tyre, operatori i parë mobil i licencuar në Kosovë - Vala (ish- Vala 900), operon në Kosovë që prej vitit 2000.
Krahasuar me operatorët tjerë të telefonisë mobile, Vala ka numrin më të madh të konsumatorëve, që është mbi 1 milion konsumatorë. Megjithatë, të kontaktuar nga Radio Evropa e Lirë lidhur me mbrojtjen e të dhënave personale të konsumatorëve të tyre, zyrtarë të këtij mekanizmi të telefonisë mobile nuk janë deklaruar.
Ndërkaq, përfaqësues të Autoritetit Rregullativ të Telekomunikacionit (ART), deklaruan se deri më tani nuk ka ndonjë ankesë nga qytetarët se të dhënat e tyre janë keqpërdorur.
Drejtuesi i ART-së , Ekrem Hoxha, thotë për Radion Evropa e Lirë se regjistrimi i përdoruesve të telefonave mobil është bërë sipas rregullores në fuqi.
“ART nuk ka pranuar asnjë shqetësim apo ankesë nga një përdorues apo operator mobil, se të dhënat personale që kanë qenë të obliguara t’i renditen rregullores për regjistrimin e përdoruesve të telefonisë mobile, janë keqpërdorur”, thekson Hoxha.
Në anën tjetër, hulumtues të Qendrës Kosovare për Studime të Sigurisë, thonë se gjatë grumbullimit të të dhënave personale të regjistrimit të përdoruesve te telefonave mobil, nuk është përfillur fare ligji për mbrojtjen e të dhënave personale.
“Ne e kemi vërejtur se kanë ndodhur disa procese, siç është regjistrimi i përdoruesve të telefonisë mobile, po ashtu ka qenë edhe regjistrimi i popullsisë që ka ndodhur, por që në bazë të intervistave që i kemi bërë më zyrtarët përkatës, është vërejtur se nuk është marrë përsipër ligji për mbrojtjen e të dhënave personale”, thekson për Radion Evropa e Lirë, Mentor Vrajolli, hulumtues në qendrën kosovare për studime të sigurisë.
Agjencia shtetërore për mbrojtjen e të dhënave personale është themeluar një vit pas miratimit të këtij ligji. Kjo agjenci është themeluar që t’u japë këshilla organeve publike dhe private për çështjet lidhur me mbrojtjen e të dhënave, të përkrahë të drejtat themelore për mbrojtjen e të dhënave personale.
Ruzhdi Jashari, kryesues i kësaj agjencie, thotë për Radion Evropa e Lirë se mbrojtja e të dhënave personale është një lëmi e re në Kosovë, dhe përballë saj ka shumë sfida. Ai thotë se nuk ka nevojë për shqetësim sa i përket keqpërdorimeve, pasi që, siç thotë ai, mekanizmat për mbrojtjen e këtyre të dhënave janë duke treguar punë të suksesshme.
Ndryshe, sipas studimeve të bëra nga Qendra Kosovare për Studime të sigurisë, deri më tani nuk ka pasur asnjë kriter për verifikimin e rasteve të grumbullimit të të dhënave personale, në mënyrë të paautorizuar, sikurse edhe nuk ka pasur ndonjë kontroll adekuat për mënyrat se si procedohen të dhënat e grumbulluara në rastet kur ekziston një autorizim i tillë.

Vekaric kërcënon: Do t’ju arrestojmë

Zëvendësprokurori serb për krime lufte, Bruno Vekaric, ka thënë se “qytetarët e Kosovës, të dyshuar për krime lufte, duhet të jenë të kujdesshëm, sepse i pret arrestimi sipas urdhër-arresteve sekrete të Serbisë”.
"Ne kemi ende lëndë të të dyshuarve për krime lufte”, ka thënë Vekaric për REL në gjuhën serbe, duke refuzuar të përgjigjet se cili është numri lëndëve të tilla.
Për akuzat për krime lufte kundër Mark Koshnjetit, ai thotë se “ato janë të bazuara dhe se shumë shpejtë do të vërtetohen nga dëshmitarët”.
"Do të vijnë shumë dëshmitarë, të dëmtuar, që të bëjnë identifikimin. Kjo do të bëhet nesër, pra atëherë do të keni informata të reja”, ka thënë Vekaric.

BERZH: Shqiptarët konsumojnë më pak, kujdes me borxhin

Banka Europiane për Rindërtim dhe Zhvillim (BERZH) parashikon një rritje ekonomike prej vetëm 1.2 për qind këtë vit për Shqipërinë. Shifra është publikuar në një raport të BERZH-it me temë ‘Kriza dhe Tranzicioni’, ku pasqyrohet ecuria dhe zhvillimet ekonomike të 29 vendeve të Evropës Qëndrore dhe Azinë.
Parashikimi i BERZH-it për rritjen ekonomike është më pesimist se ai Bankës Botërore, që flet për një rritje të ekonomisë sonë gjatë 2012, me 2 për qind. Peter Sanfey, përfaqësues i BERZH-it, i cili prezantoi raportin përcakton si faktor ndikues në krizë rritjen e borxhit duke këshilluar të bëhet kujdes, pasi ai ndikon direkt në rritjen ekonomike të vendit.
Sipas BERZH-it në raportin për vitin 2 011 ku janë testuar familjet në rajon për ndikimet e krizës nënvizohet se në Ballkan 40 për qind e familjeve thonë se kriza ka ndikuar shumë, ndërsa në Shqipëri 60 për qind e familjeve kanë pohuar se kriza ka ndikuar në jetesën e tyre dhe për këtë arsye kanë ulur konsumin e ushqimeve, mallrave të luksit apo reduktim të vizitave vizita mjekësore.
BEZH-i thekson gjithashtu se ka shumë pasiguri në parashikim, pasi gjërat ndryshojnë dita ditës, ndaj dhe ky raport nuk është përfundimtar. 

Punëtorët e Sharrcem kërcënojnë me ndërprerje të prodhimit

Punëtorët e çimentores "Sharrcem" në Han të Elezit kanë protestuar për të tretën herë, të martën, afro dy orë, ndërsa kanë deklaruar se do t'i përshkallëzojnë veprimet nëse menaxhmenti i fabrikës nuk i përfill kërkesat e tyre.
"Sot edhe një herë ia kam dorëzuar drejtorit të përgjithshëm kërkesat e punëtorëve në formë të shkruar, ndërsa në plan është ndërprerja e prodhimit nëse menaxhmenti i fabrikës nuk i plotëson ato ndërkohë", ka theksuar Sabit Sallahu, kryetar i Sindikatës së të punësuarve të "Sharrcemit", pa dhënë ndonjë datë sa i përket jetësimit të këtij kërcënimi. Sallahu ka deklaruar se do të vazhdohet me protesta deri në çastin kur menaxhmenti i fabrikës të përcaktohet për anulimin e vendimit për zvogëlimin e bonuseve, sikundër edhe për shfuqizimin e vendimit tjetër për heqjen nga listat e pagave të 86 punëtorëve në pushim me pagesë dhe të 21 të tjerëve me status të pensionistëve të parakohshëm.
"Një orë kemi protestuar para objektit të administratës së fabrikës dhe një orë në repartin e paketim-ngarkimit", ka thënë Sallahu.
Për një orë nuk ishte lejuar të ngarkohet me çimento asnjë kamion. Kryesindikalisti Sallahu ka sqaruar se punëtorët janë të pakënaqur edhe me vendimin e menaxhmentit për kontraktimin e një kompanie private për paketimin e thasëve me çimento dhe ngarkimin e kamionëve të blerësve me to.
"Punëtorët e këtij reparti i ka brengosur kontraktimi i kësaj kompanie pasi druajnë se do të mbesin pa vendet e tyre të punës pas skadimit të afatit për mos largimin nga puna të asnjërit punëtor të fabrikës, më 2013", ka nënvizuar Sallahu, raporton Koha.
Në këtë kontekst, është rikujtuar se në paragrafët e kontratës së privatizimit të "Sharrcemit" figuron edhe zotimi i blerësit për t'ua ruajtur vendet e punës të gjithë punëtorëve për 3 vjetët në vijim. Gjiganti "Sharrcem", prodhuesi i vetëm i çimentos në Kosovë, është shitur për 30 milionë euro. 

BE-ja mbështet zhvillimin ekonomik

Perspektiva evropiane e Kosovës, veçanërisht marrëveshja e tregtisë së lirë ishin temë kryesore e diskutimit në mes të ministres së Tregtisë dhe Industrisë (MTI) Mimoza Kusari-Lila si dhe shefit të zyrës së BE-së në Kosovë Samuel Zhbogar.
Në takimin e parë të saj me shefin e ri të BE-së në Kosovë, ministrja Kusari – Lila e njoftoj Zhbogarin për reformat që janë duke ndodhur në kuadër të ministrisë që ajo drejton për përgatitjen më të mirë të misionit verifikues që pritet të vij në qershor të këtij viti.
Më tutje, zëvendëskryeministrja e informoj Zhbogar për agjendën e gjerë zhvillimore që është duke e drejtuar MTI me fokus të veçantë në projektet e përbashkëta siç janë: projektin për përkrahjen e zhvillimit të ndërmarrjeve të vogla dhe të mesme, zhvillimi i projektit të Brezovicës, funksionalizimi dhe zhvillimi i projektit Mbështetja e BE-së për Zhvillimin Ekonomik Rajonal në Kosovë. Ajo foli edhe për reformat e administratës publike në kuadër të MTI-së. “Reformat që jemi duke ndërmarrë lidhur me administratën publike, me theks të veçantë ngritjen e kapaciteteve në departamentin e tregtisë do të jenë kruciale për marrëveshjen e tregtisë së lirë dhe integrimit Evropian”, tha Kusari-Lila.

Po ashtu ata kanë diskutuar edhe për reformat e të bërit biznes. Ministrja e njoftoj shefin e BE-së në Kosovë për një varg reformash që janë ndërmarrë deri tani me qëllim të lehtësimit të ambientit për të bërë biznes duke thënë se këto reforma do të thellohen edhe më tej deri sa të arrijmë të jemi vendi më i mirë në rajon për të bërë biznes.

Nga ana tjetër shefi i zyrës së BE-së në Kosovë, Samuel Zhbogar, shprehu përkrahjen e plotë për reformat e ndërmarra nga MTI dhe ofroj bashkëpunimin e mëtejmë të zyrës që ai drejton për projektet ekzistuese si dhe projektet potenciale. “Zyra e BE-së mbetet e përkushtuar të përkrah zhvillimin ekonomik dhe integrimin e Kosovës në BE”, theksoi Zhbogar.

Zyra e BE-së në Kosovë është një partnerët kryesor të Ministrisë së Tregtisë dhe Industrisë. Tregtia dhe Agjencia për Mbështetjen e Ndërmarrjeve të Vogla dhe të Mesme mbeten projekte kyçe që kjo zyrë financon.

Diddy reperi më i pasur në botë

Moguli i muzikës rap, Sean Combs, i njohur si P Diddy, ka kryesuar listën vjetore të revistës Forbes për më të pasurit e muzikës hip-hop.
Pasuria e yllit dhe producentit të muzikës sipas kësaj reviste vlerësohet rreth 550 milionë dollarë.
Babai i ri, Jay-Z, vjen i dyti me një pasuri prej 460 milionë dollarësh.
Ndërkohë reperët tjerë, të cilët së fundi shkëlqyen në festivalin Coachella, Dr. Dre, Bryan 'Birdman' Williams dhe 50 Cent, mbyllin top pesëshin. 

Rovena Stefa: Djemtë e Prishtinës më të bukur

Këngëtarja Rovena Stefa, e cila kohëve të fundi ka lënë Tiranën për të jetuar në Prishtinë, ka pohuar se në Prishtinë çunat janë shumë të bukur.
“Do të them në Prishtinë, por nëse do të flasim për të tjera qytete, se nëse do të thoshin në Prizren, apo në Shkodër, do të thosha për qytetin e dytë. Por, them në Prishtinë, pasi në Tiranë ka më shumë femra të bukura”, ka thënë Rovena.
Ndërsa e pyetur se ku do ta bëjë martesën në Tiranë apo Prishtinë, ajo është përgjigjur në kufirin Qafë-Morinë.
“Në kufirin Qafë-Morinë-Kukës-Prizren. Nuk e di, varet, dasma tri orë është larg, mund të bëhet në Prishtinë, edhe në Tiranë, i kënaqim të gjithë të ftuarit, pse jo”, ka shtuar Rovena për ‘Kosova Sot’. 

Reagon familja e Almedës

Pas publikimit të lajmit për një lidhje të mundshme mes modeles shqiptare Almeda Abazi dhe futbollistit turk Sergen Yalacin, ka reaguar familja e Almedës duke demantuar atë dhe duke thënë se kjo është vetëm një thashetheme.
“Për faktin se Almeda për momentin ndodhet në reality shou ‘Survivor’ dhe nuk ka të drejtë të japë informatë deri në mbarim të këtij shou, unë po ju drejtohem sinqerisht se ajo nuk ka nisur asnjë lidhje dashurie me askënd”.
"Kjo është vetëm spekulim dhe mes saj dhe Sergen Ylacin nuk ka dashuri. Ata mund të jenë vetëm miq dhe asgjë më shumë”, është shprehur nëna e Almedës për ‘Zëri’.
Almeda përveç këtij reality shou ajo ka qenë edhe pjesë e "Dancing with the stars" në Turqi, ku zuri vendin e tretë.

Rita thotë “How We Do”

Këngëtarja kosovare Rita Ora, pas publikimit të këngës R.I.P, ajo sërish ka sjell një tjetër projekt të ri muzikor.
“How We Do”, titullohet kënga më e re e Ritës. Këngë kjo e punuar nga Roc Nation.
Kjo këngë tashmë ka filluar të klikohet menjëherë në YouTube, dhe është vënë menjëherë në shitje në ITunes.
Më poshtë sjellim këngën “How We Do” nga Rita Ora.

10 rregullat e takimit të parë

Jeni mërzitur nga darkat romantike të cilat nuk ju çojnë asgjëkundi? Tani erdhi momenti që të merrni në dorë fatin e takimeve të para. Në ç’mënyrë?
Ju zbulojmë 10 rregulla që do ta bëjnë telefonin tuaj të tingëllojë madje që në të nesërmen.

* Mbyllni gjithmonë celularin kur ai mbërrin në takim.
* Përpiquni të jeni sa më korrekte në takimin tuaj.
* Mos përmendi në bisedë asnjë nga ish të dashurit tuaj.
* Mos pini kurrë shumë, pasi do të humbisni pikë përpara tij, sado pijanec qoftë.
* Mos përmendi ndonjë koleksion veshje që keni mbi krevat dhe se cili ju mungon.
* Kërkoni të ndani më dysh llogarinë dhe mos u ofendoni nëse ai e pranon këtë.
* Bëjeni atë të qeshë. Ndjenja e humorit është edhe ajo po kaq e rëndësishme sa edhe ju.
* Mos porosisni kurrë fruta deti. Mund të jetë një përzgjedhje tepër elegante, por e vështirë për t’u ngrënë.
* Mos përdorni në asnjë mënyrë fjalën ‘cikël’, duke pasur parasysh menstruacionet e as shprehjen ‘ora biologjike’.
* Mos u ngatërroni në analiza karakteresh që bazohen tek shenja e horoskopit.

Frutat e malit mbrojnë nga sëmundja e Parkinsonit

Frutat e malit siç janë dredhëzat, boronicat dhe manaferrat përmbajnë materie të veçanta të cilat reduktojnë rrezikun nga zhvillimi i sëmundjes së Parkinsonit.
Hulumtimi është kryer nga ana e ekipit të Universitetit Harward dhe Universitetit East Anglia dhe është publikuar në revistën Neurology. Shkencëtarët kanë përcjellë 130.000 meshkuj dhe femra për periudhën 20-vjeçare. Në fund të periudhës 800 prej tyre kanë pasur sëmundjen e zhvilluar të Parkinsonit.
Duke analizuar ushqyerjen e tyre, mënyrën e jetës dhe shprehitë kanë përfunduar që ato që kanë konsumuar më së shumti flavonoide kanë për 40 për qind rrezik më të vogël nga zhvillimi i sëmundjes së Parkinsonit.
Duke shikuar vetëm frutat e malit, të cilat janë një nga burimet e flavonoideve, me konsumimin e tyre rreziku reduktohet për 25 për qind.
Flavonoidet mbrojnë nga dëmtimet e shkaktuara nga mplakja, reduktojnë probabilitetin e zhvillimit të sëmundjeve të zemrës, tensionit të lartë të gjakut dhe formave të caktuara të kancerit.
Shkencëtarët pohojnë që rezultatet nuk janë përfundimtare, sepse duhet të vërtetohen nga ana e institucioneve të mëdha epidemiologjike dhe klinike.

Ish shfrytëzuesit e iPhoneit dhe Androidëve më së shpeshti blejnë WP7

Sipas rezultateve të anketës të cilën e ka bërë faqja WPCentral, 60% e blerësve në SHBA të pajisjeve të bazuara në Windows Phone janë ish pronarë të pajisjeve të Apple dhe të atyre të bazuar në Android.
Në hulumtim janë përfshirë më shumë se 3,500 shfrytëzues të pajisjeve të bazuara në Windows Phone, prej të cilëve gati 30% ishin më parë pronar i një iPhone, e 27% të një telefoni të bazuar në Android. Ish shfrytëzuesit e BlackBerryt përbëjnë rreth 10% të të anketuarve, 12% më parë kishin telefon me Symbian, e pak mbi 6% telefon të HP me WebOS.
Rreth 15% të tjerë kishin telefona “të zakonshëm” celularë. 

Pilotit i duket Venera sikur aeroplan

Pilotit të kompanisë “Air Canada” planeti Venera i është dukur si aeroplan tjetër që po i vjen përpara, prandaj e ke kthyer përnjëherë aeroplanin Boeing 767-300 duke lënduar 16 njerëz.
Aeroplani po udhëtonte nga Toronto në drejtim të Cyrihut dhe bartte 95 pasagjerë dhe tetë anëtarë të ekuipazhit.
Pasi kishte bërë një sy gjumë, piloti ishte zgjuar i dezorientuar dhe bashkëpiloti e kishte informuar se në trajektoren e tyre fluturonte edhe një aeroplan amerikan mallrash. Ndërsa piloti i përgjumur e kishte parë Venerën dhe në moment e ka ulur për 120 metra Boingun duke kujtuar se planeti që shihej ishte pikërisht aeroplani tjetër.
Ai ka arritur që të reagojë dhe ta stabilizojë aeroplanin, megjithatë ka lënë të lënduar disa pasagjerë dhe pjesëtarë të ekuipazhit. 

Parkon në katin e dytë

Shpeshherë vozitësit i parkojnë automjetet vend e pa vend, mirëpo një vozitës nga Sao Paolo e ka ndalur automjetin e tij në murin e jashtëm të katit të dytë të një ndërtese.
Dëshmitarët okularë kanë treguar se vozitësi e kishte humbur kontrollin gjatë kalimit nëpër një urë që gjendet pranë ndërtesës dhe kishte fluturuar drejt saj.
Në dhomën ku ka goditur ka qenë një foshnje gjashtëmujore, por fatmirësisht ka qenë në skajin tjetër të dhomës dhe ka shpëtuar e pa lënduar.
Ndërkaq, vozitësi ka pësuar lëndime të rënda dhe është dërguar në spital për mjekim. /

Dashuria e një qeni (Video)

Një qen i zi është xhiruar duke ruajtur trupin e një qeni tjetër në rrugë, të cilin e kishte goditur një automjet në Kaliforni.
Personi që e ka bërë xhirimin ka vërejtur se qeni i gjallë i kishte qëndruar pranë qenit të ngordhur, në mënyrë që të pengonte shkeljen e tij nga automjetet tjera.
Më pas të njëjtën gjë e ka bërë edhe xhiruesi duke thirrur edhe policinë dhe shërbimet për mbrojtjen e kafshëve. 

Mourinho i shqetësuar me golat e Bayernit

Jose Mourinho është i shqetësuar me mënyrën se si ata pranuan dy gola nga Bayern Munichu në disfatën e mbrëmshme 2-1 në Ligën e Kampionëve, por shpreson se në ndeshjen e kthimit gjithçka do të jetë ndryshe.
“Real Madridi gjithmonë luan për të fituar dhe skuadra është e gatshme të përgjigjet në një ndeshje në të cilën publiku sigurisht do të dëshirojë të na ndihmojë. Besoj se barazimi do të ishte më i drejtë, por ky është futbolli: kush shënon fiton. Nuk është me rëndësi nëse ju e bëni këtë në të parën ose në të fundit”.
“Rezultati nuk është i keq pasi ky nuk na detyron neve të bëjmë rikthim historik në shtëpi. Ne do të duhet të nxjerrim një rezultat normal dhe mendoj se jemi të gatshëm të përgjigjemi. Ne do të fillojmë të përgatitemi për këtë pas ndeshjes së të shtunës”.
“Ne deshëm të fitojmë sonte. Ne pranuam një gol nga ndalimi në pjesën e parë, gjatë të cilës ne luajtëm në mënyrën më të mirë. Pastaj barazuam dhe menduam se është vështirë të fitohet edhe pse ne dhamë më të mirën”.
“Të dyja skuadrat bënë gabime dhe Bayerni shënoi kur dukej se ndeshja do të përfundonte me barazim. Goli i tyre i parë ishte nga pozita jashtë loje, por unë nuk mund ta kritikoj gjyqtarin për këtë. Nuk ndjehem negativ për këtë”, ka deklaruar portugezi.

Pjesëtarë të MUP-it zhvendosen, “Obraz” paralajmëron ardhjen në veri

Gjashtë pjesëtarët e MUP-it serb, Jovan Arsic, Nebojsha Rasic, Sinisha Mihajlovic, një i katërt me nofkën “Piko” dhe dy të tjerë (emrat e pakonfirmuar) janë larguar nga banesat e tyre te “Tre rrokaqiejt” në veri të Mitrovicës.
Burime të gazetës “Koha Ditore”, kanë bërë të ditur se urdhrin për t`u zhvendosur pjesëtarët e MUP-it e kanë marrë pas shpërthimit që ka ndodhur tek “Tre Rrokaqiejt” e ku ka mbetur i vrarë Selver Haradinaj.
Lëvizja e një njësiti të ROSU-s që i ka shkuar në përforcim ROSU-s në Mitrovicë, në natën e 12 prillit, katër ditë pas shpërthimit, ka shqetësuar jo vetëm prezencën ndërkombëtare në Kosovë, por edhe strukturat e Serbisë në veri të lumit Ibër.
Sipas burimeve të gazetës, informatat e tilla, kanë bërë që pjesëtarët e MUP-it të largohen të paktën nga “Tre Rrokaqiejt”.
Por largimi i pjesëtarëve të MUP-it nuk i ka lënë shumë që të gëzohen qytetarët shqiptarë në veri të Ibrit. Grupi çetnik që mban emrin “Obraz” (Fytyra), ka paralajmëruar se do të niset për në veri të Kosovës. Njoftimin ua kanë dërguar me letër para dyerve të shtëpive, qytetarëve shqiptarë të asaj pjese.
“Koha Ditore” ka raportuar ditë më parë se Qeveria e Kosovës dhe ajo e Serbisë janë marrë vesh para disa muajsh që të mos lejojnë përshkallëzimin e situatës në veri të Kosovës gjatë zgjedhjeve të Serbisë. Sipas marrëveshjes që është konfirmuar nga zyrtarë të lartë të institucioneve të Kosovës, qëllimi i strukturave ilegale në veri, që janë degë të partive radikale, është që të provokojnë konflikt ndëretnik, ngase do të avanconte pozitën e tyre si në zgjedhjet e Serbisë, ashtu edhe në dialogun për veriun që pritet të nisë pas zgjedhjeve në shtetin fqinjë.
Sipas marrëveshjes, Qeveria e Kosovën nuk do të dërgojë ROSU-n në veri, derisa Serbia do të ndalë ardhjen e grupeve çetnike në veri.
Përndryshe, burime ndërkombëtare kanë shpjeguar për “Kohën Ditore” se gjatë kësaj kohe, paralajmërime për t`u nisur drejt Kosovës kanë bërë edhe grupe të tjera famëkëqija.
Sipas burimeve të gazetës, përveç organizatave ultranacionaliste dhe të shpallura si ilegale edhe nga shteti serb “Obraz” (fytyra), “Srpski Cetnicki Pokret” (Lëvizja Çetnike Serbe), janë edhe disa grupe të tjera ekstremistësh, siç janë “Delije” (Trimat) dhe ‘Grobari’ (Varrmihësit) që mund të pritet që të rrisin aktivitetin e tyre në veri gjatë kësaj kohe. Sipas të njëjtave burime, pjesë e dy organizatave çetnike, janë edhe familjarë të përfaqësuesve të veriut të Kosovës, që janë liderë të institucioneve ilegale të Serbisë. 

Jaksic: Nuk heqim dorë nga zgjedhjet

Zgjedhjet lokale të Serbisë do të mbahen patjetër në komunat e Zubin Potokut, Zveçanit dhe Shtërpcës, thotë Marko Jaksic, nënkryetar i të ashtuquajturës kuvend i bashkësive të Kosovës.
“Besojmë se kjo qeveri tradhtare, e cila merret me shitjen e territorit të vet, do të zbres nga froni. Qeveria kombëtare... jo vetëm që do t’i njoh zgjedhjet, por edhe në komunat tjera do t’i formojë qeveritë lokale”, thotë ai për Alo.
“Është idiotike dhe qesharake që për heqjen dorë nga zgjedhjet lokale, foli së pari ministri për Kosovën, Goran Bogdanovic, ndërsa më herët kryetarja e Kuvendit i shpalli në tërë territorin. Referimi te Rezoluta 1244 është i paqëndrueshëm, për shkak se ky dokument ka ekzistuar edhe në vitin 2008, kur ne kemi pasur zgjedhje lokale në Kosovë”.
Krstimir Pantic, i ashtuquajtur kryetar i Mitrovicës, ka thënë se moszbatimi i zgjedhjeve lokale do të thotë “eksod i qetë i serbëve, fillimisht të atyre në jug të ibrit, e pastaj në veri ku ata janë shumicë”.

Ramadani: Veriu peng i njerëzve në pushtet

Sekretari i Përgjithshëm i Aleancës për Ardhmërinë e Kosovës, Burim Ramadani ka vlerësuar se Qeveria e Kosovës nuk ka guxim dhe dije për t’i shtrirë sovranitetin dhe integritetin në veri, ndërkaq ka thënë se AAK dyshon se njerëzit që janë duke bërë kontrabandë janë të lidhur direkt me këtë Qeveri.
Në një intervistë për “Epokën e Re”, Ramadani e ka akuzuar rëndë Qeverinë, e cila, sipas tij, së bashku me kontrabandistët serbë është duke e mbajtur peng veriun e Kosovës.
“AAK dyshon se njerëzit që janë duke e bërë këtë kontrabandë janë të lidhur direkt me këtë Qeveri”, ka thënë Ramadani, duke shtuar se kësaj Qeverie është duke i munguar strategjia gjithëpërfshirëse për veriun.
Sipas tij, për shkak të hetimeve për korrupsion, Qeveria e Kosovës është duke e shfrytëzuar veriun për propagandë politike.
“Nuk ka ministri dhe zyrë të kësaj Qeverie që nuk është duke u hetuar nga Prokuroria e Shtetit. Dhe si rrugëdalje në opinionin publik e kanë gjetur propagandën për veriun”, ka deklaruar Ramadani, duke shtuar se ligji i forcës duhet të aplikohet në tërë territorin e shtetit.
Ai ka thënë se zgjidhja e veriut duhet të gjendet brenda pakos së Ahtisaarit dhe duke i bërë presion Serbisë. 

Sot flasin për veriun

Kuvendi i Kosovës do të mbajë të mërkurën një seancë të jashtëzakonshme për ngjarjet në veri të vendit.
Kështu është vendosur në mbledhjen e Kryesisë së Kuvendit të Kosovës.
Kryeparlamentari Jakup Krasniqi ka konfirmuar se me kërkesë të Grupit parlamentar të Partisë Demokratike të Kosovës, do të diskutohet për zhvillimet në veri.
Javën e kaluar Lëvizja Vetëvendosje pati kërkuar mbajtjen e një seance të jashtëzakonshme, por nuk kishte arritur t’i mblidhte më shumë se 20 nënshkrime të deputetëve.

Kurthimi Antikorrupsion

Sa dyshohet se ka korrupsion në Kosovë, aq institucione janë krijuar për të luftuar këtë fenomen. Përveç pesë institucioneve kryesore të formuara sipas Kushtetutës, janë edhe katër të tjera të krijuara me vendime të ndryshme.
Me shumë task forca, këshilla e agjenci, vendi vazhdon të mbetet në listën e zezë. Të gjitha këto, pa llogaritur Misionin e EULEX-it, shkruan “Express”.
Këto janë institucionet e shtetit të Kosovës, të cilat kush më shumë e kush më pak, detyrë kanë luftën kundër korrupsionit.
Dhe duket se nuk janë pak. Tash për tash, janë së paku nëntë të tilla. Por ka paralajmërime për të krijuar edhe të tjera.
Disa prej tyre janë të krijuara në bazë të Kushtetutës, siç zakonisht një shtet duhet t’i ketë, por disa të tjera janë themeluar mbi bazën e vendimeve të ndryshme.
Për të njëjtën punë, Qeveria e Kosovës ka krijuar Task Forcë, Prokuroria e Shtetit një tjetër, e tash së fundi një Këshill e ka formuar edhe Presidentja e vendit.
Numri i madh i këtyre mekanizmave, ndoshta do të ishte i justifikueshëm, sikur në fund, rezultatet të tregonin se korrupsioni së paku ka shënuar trend të rënies.
Por, përkundrazi. Britmat që ambasadori amerikan në Kosovë, Christopher Dell, i bëri para disa javësh për këtë fenomen është një nga përgjigjet për sukseset e këtyre task forcave.
Shkurt e anglisht, Dell tha hapur se bashkë me ardhjen e pranverës, lulet e korrupsionit kanë nisur të çelin edhe në Qeveri. 

NBA: Spurs u hakmerren Lakersave

San Antonio Spurs janë përmirësuar pas disfatës së javës së kaluar nga Los Angeles, kësaj here duke i mposhtur Lakersat në fushë të tyre me rezultat 112-91.
Spurs, të cilët janë liderë të Konferencës Perëndimore, u hakmorën për disfatën e të mërkurës së kaluar, duke mposhtur Lakersat në mungesë të liderit Kobe Bryant, i cili qëndroi jashtë fushe për shkak të lëndimit.
Tony Parker shënoi 29 pikë dhe 13 asistime, derisa Tim Duncan, dukej energjik sërish duke shënuar 19 pikë dhe tetë kërcime për San Antonion (44 fitore, 16 disfata) që tash qëndron gjysmë ndeshje mbi Oklahoma Cityn në krye të tabelës së Perëndimit.
Andrew Bynum ishte më i sakti me 21 pikë te Los Angeles, që në ndeshjen e mbrëmshme kurrë nuk arritën ta ngushtojnë disavantazhin në më pak se 20 pikë që nga pjesa e dytë.
Lakers (39 fitore dhe 23 disfata), janë gjysmë ndeshje para rivalit lokal, Los Angeles Clippers, në krye të Divizionit Pacifist dhe në pozitën e tretë në tabelën e Perëndimit. 

Guardiola ka respekt për Chelsean

Trajneri i Barcelonës, Pep Guardiola, thotë se ata nuk do ta marrim me lehtësi rivalin e sotëm të Ligës së Kampionëve, Chelsean.
“Nuk arrij të mendoj se si do t’i lëndojmë ata, si do të krijojmë shanse dhe të shënojmë. Ne nuk duhet të harrojmë se ata kanë qenë shumë të qëndrueshëm këtu në këtë stadium, duke fituar të gjitha pesë ndeshjet [e Ligës së Kampionëve]”.
“Ne jemi kampionë për momentin, andaj çdokush dëshiron të na mposhtë dhe të luajë mirë kundër nesh”, ka thënë Guardiola. 

Heynckes: Do të shënojmë në Madrid

Trajneri i Bayern Munichut, Jupp Heynckes, ka thënë se lojtarët e tij “e dinë” se do të shënojnë në ndeshjen e kthimit gjysmëfinale të Ligës së Kampionëve ndaj Real Madridi në Santiago Bernabeu.
Bavarezët mbrëmë fituan 2-1 ndaj Los Blancos në Allianz Arena, me Mario Gomez që shënoi një gol të vonshëm pasi Mesut Ozil kishte neutralizuar golin e parë të Franck Ribery.
“Ju nuk fitoni me lehtësi kundër Realit. Ne deshëm të luajmë me pasion dhe e bëmë këtë. Jam shumë i kënaqur me paraqitjen e përgjithshme të skuadrës time. Ju keni parë karakterin tonë pasi rezultati u bë 1-1”.
“Ne e dimë se duhet të luajmë në mënyrën se si luan Bayerni edhe në ndeshjen e kthimit. Lojtarët e dinë se ne do të shënojmë në Madrid, por ne duhet të gjejmë ekuilibrin e duhur në mes të sulmit dhe mbrojtjes”, ka thënë Heynckess.

Ozil: Shihemi sërish në Munich

Mesfushori i Real Madridit, Mesut Ozil, thotë se disfata nga Bayern Munich në gjysmëfinalen e parë të Ligës së Kampionëve i ka lënë atij shije “të hidhur”, por megjithatë është optimist se ata do të arrijnë në finale.
Ozil shënoi golin e barazimit 1-1 për Realin, por bavarezët shënuan një gol të vonshëm me anë të Mario Gomez për ta fituar ndeshjen e parë në Fußball Arena, ku do të zhvillohet edhe finalja e garës evropiane.
“Disfata 2-1 është një rezultat i hidhur për ne, por jam i bindur se ne do të fitojmë në shtëpi. Ne kemi besim në fuqitë tona dhe jam i sigurt se do të arrijmë në finale. Jam ca i dëshpëruar me disfatën, por kam një ndjenjë pozitive. Ne do të shihemi sërish në Munich”, ka thënë Ozil. 

Casillas: Do ta mposhtim Bayernin në Spanjë

Kapiteni i Real Madridit, Iker Casillas, thotë se nuk ka nevojë për panik, pas disfatës së tyre në Ligën e Kampionëve në fushë të Bayern Munichut.
Casillas është i bindur se ata do ta përmbysin disavantazhin 2-1 ndaj Bayernit në ndeshjen e dytë të kthimit në Santiago Bernabeu.
“Ne e dinim se Bayerni ishte i mirë nga ndërprerjet, kur ato harkojnë topa afër shtyllës. Ne duhet të kemi parasysh se ata po ashtu kanë lojtarë të mirë. Kjo na ka ndodhur më herët, por ne nuk duhet të mbështetemi në këtë”.
“Ne pësuam 2-1, që do të thotë shënuam në udhëtim, që është e rëndësishme. Luiz Gustavo bllokoi pamjen time në golin e parë. Ju nuk e vëreni këtë në fillim pasi gjithçka ndodh aq shpejt, por ai ishte jashtë loje”.
“Coentrao ishte fenomenal gjatë ndeshjes. Ne erdhëm këtu të fitojmë, por Bayerni shënoi një gol të hershëm. Ne kishim shanse të shënojmë dhe arritëm ta mbajmë barazimin për shumicën e pjesës së dytë, por Bayerni shënoi në fund. Sfida do të vendoset në Madrid”, ka deklaruar Casillas pas ndeshjes. 

Xavi: Keni të drejtë, jemi më të mirët

Mesfushori i Barcelonës, Xavi, thotë se ata e meritojnë titullin e “skuadrës më të mirë në botë”.
“Ne po kënaqemi me titullin e skuadrës më të mirë në botë, që nuk është etiketë që ne ia kemi vënë vetes, por është një nivel të cilin ne e kemi arritur në fushë”.
“Çdo tifoz i Barcelonës e di se sa na është dashur të arrijmë këtu. Vite pa tituj, me përpjekje të mëdha por pa u shpaguar”, ka thënë Xavi.
Barca sonte udhëton te Chelsea në ndeshjen e parë gjysmëfinale të Ligës së Kampionëve.