"Dy duar për një kokë, themi ne. Nuk ka asnjë alternativë tjetër", tha për SETimes Jonuz Musliu, ish-shefi politik i Ushtrisë Çlirimtare të Preshevës, Medvegjes e Bujanovcit (UÇPMB), tashmë lider i Lëvizjes për Progres Demokratik,
Musliu tha se zgjidhja paqësore është e preferueshme, por se Beogradi nuk ka vullnet për diçka të tillë.
"Beogradi mbetet i njëjti dhe kërkon të zgjidhë problemet me përdorimin e forcës".
Udhëheqësit shqiptarë në Luginën e Preshevës thanë se shqetësimi më i madh i tyre është paralajmërimi i ministrit të Brendshëm serb, Ivica Dacic, se do të vazhdojnë aksionet e tilla të policisë.
"Arrestimi i fundit ishte një mesazh nga qeveria serbe se çdo shqiptar në Luginën e Preshevës është një terrorist i mundshëm dhe subjekt arrestimi", tha për SETimes kryetari i Bujanocit, Shaip Kamberi. “Qëllimi i Serbisë është ta destabilizojë rajonin, të përhapë frikë për t’i shtyrë shqiptarët që të emigrojnë e të shkaktojnë kështu ndryshime demografike”.
Në Maqedoni, Xhezair Shaqiri - Komandant Hoxha i Ushtrisë Çlirimtare Kombëtar (UÇK) - thotë se ish-komandantët e organizatës u takuan për ta konsideruar rimobilizimin e trupave "në rast se provokimet vazhdojnë."
Sipas Valbona Zenelit, profesoreshë e sigurisë kombëtare në Qendrën Evropiane për Studime të Sigurisë, George C. Marshall në garmisch-partenkirchen, thotë se nuk ka arsye të mendosh se ish-luftëtarët shqiptare do të rigrupohen në të dyja vendet për llogari të ngjarjeve më të fundit.
“Çdo përshkallëzim përfundimtar i tensioneve kërcënon sigurinë e paqen në rajon; dëmton nevojën për një marrëdhënie normale mes Serbisë e Kosovës; ndikon negativisht mbi vazhdimësinë e bisedimeve teknike dhe më e rëndësishmja, zbatimin e marrëveshjeve të arritura së fundmi".
Gjendja e keqe ekonomike dhe niveli i krimit të organizuar përkeqëson paqëndrueshmërinë me bazë etnike, argumenton Marko Miloshevic, hulumtues në Qendrën për Politikë e Siguri në Beograd.
"Grupe të ndryshme kriminale po përdorin këtë mungesë të sigurisë për interesat e tyre. Kosova përbën një strehë të sigurt për shumicën e këtyre grupeve - shqiptarë nga Maqedonia e Serbia, bashkë me kriminelët serbë në Kosovën e veriut", thotë Miloshevic për SETimes.
