Marchisio: Juventusi duhet ta mposhtë Shakhtarin

Mesfushori i Juventusit, Claudio Marchisio, do të mungojë të mekurën në Ligën e Kampionëve për shkak të suspendimit, por ai ka kërkuar nga bashkëlojtarët e tij që të shënojnë fitore kundër Shakhtarit. “Ne nuk po synojmë barazimin. Është rrezik i madh për të dy ekipet që të luajnë për barazim. Ne duhet të luajmë atje lojën tonë dhe të mundohemi ta fitojmë ndeshjen”. “Ne jemi të vetëdijshëm për kualitetin e tyre. Ata janë të parët në grup dhe janë ekipi më i fortë me të cilin jemi përballur deri më tani. Nuk do të jetë një ndeshje e lehtë, ne duhet të shfaqim lojë të njëjtë sikur ndaj Chelseait. Duhet të jemi të kujdesshëm dhe të mos i lejojmë ata të na befasojnë”, ka deklaruar Marchisio për Tuttosport.

Rivelino lëndon Xavin dhe Iniestan

Fituesi i Kupës së Botës me Brazilin në vitin 1970, Rivelino, ka lavdëruar dyshen spanjolle Xavi dhe Iniesta dhe ka thënë se ata dy gjithmonë bëjnë diçka ndryshe. “Iniesta dhe Xavi mendojnë shpejt, si brazilianët dhe kjo i jep ekipit të tyre përparësi. Ata pasojnë, pasojnë dhe papritmas e gjejnë një hapësirë për sulmuesit me precizitet maksimal. Ata gjithmonë bëjnë diçka më ndryshe”. “Lojtari i fundit që e kam parë të ketë luajtur në këtë mënyrë është Zidane. Ata e dinë çfarë do të bëjnë ende pa e pranuar topin dhe kjo në futboll vlen si flori”, tha 66 vjeçari për Marca.

Busquets: Barcelona të mos relaksohet

Mesfushori i Barcelonës, Sergio Busquets, ka thënë se Barcelona nuk guxon të relaksohet tani sepse rruga për ta fituar kampionatin është e gjatë. “Kemi rrugë të gjatë përpara deri në përfundim të kampionatit, ne nuk guxojmë të relaksohemi”. “Unë jam shumë i lumtur që e kemi bërë një start kaq të mirë në kampionat. Të vazhdojmë të fitojmë kështu. Gjëja kryesore është se ne i kemi fituar pothuajse të gjitha ndeshjet në të gjitha garat”, tha Busquets për faqen zyrtare të klubit.

Mario Balotelli drejt Milanit?

Sulmuesi i Manchester Cityt, Mario Balotelli, është i ngazëllyer nga mundësia për të kaluar te Milani në afatin kalimtar të janarit. Corriere dello Sport shkruan se presidenti i Milanit, Silvio Berlusconi, është i gatshëm të bëjë hapa konkret për të transferuar Balotellin në afatin kalimtar të janarit. Rossonerët fillimisht planifikojnë një huazim gjashtëmujor me mundësinë për të nënshkruar kontratë të përhershme me të në qershor. Trajneri i Milanit, Massimiliano Allegri, tashmë e ka aprovuar këtë lëvizje, derisa Balotelli raportohet se është i ngazëllyer nga mundësia për të luajtur në një ekip të rinjsh, me Stephan El Shaarawy dhe Kevin-Prince Boateng.

NBA: Magic befasojnë Lakersat

Orlando Magic janë ndezur në çerekun e katërt për të mposhtur Los Angeles Lakers me rezultat 113-103 dhe për të lënë me gishta në gojë ish-lojtarin e tyre, Dwight Howard. Në takimin e parë mes dy skuadrave që kur Magic e shitën Howard te Los Angeles, të parët, edhe pse jo në formë të mirë së fundi, arritën të befasojnë Lakers duke shënuar 40 pikë në çerekun e katërt për të nxjerrë fitore në udhëtim. Arron Afflalo udhëhoqi me 30 pikë, derisa Glen Davis kontribuoi me 23 pikë dhe 12 kërcime për Orlandon që i dha fund tre disfatave radhazi (gjashtë fitore dhe 10 disfata këtë sezon). Kobe Bryant shënoi më së shumti pikë në ndeshje, 34 për Los Angeles, dhe Howard përfundoi me 21 pikë dhe 15 kërcime kundër ish-skuadrës së tij, por jo mjaftueshme për të nxjerrë Lakers fitues. Kjo ishte disfata e nëntë e sezonit për Lakers, që mbeten me tetë fitore.

Benitez: Mungon karakteri i kohës së Mourinhos

Menaxheri i Chelseat, Rafa Benitez, ka kritikuar lojtarët e tij duke thënë se ata nuk janë në nivelin e kohës së Jose Mourinhos, kur fitonin tituj. Chelsea u mposht 3-1 nga West Hami gjatë vikendit, duke lënë Benitezin pa fitoren edhe në ndeshjen e tij të tretë në detyrë. “Është normale që kur humbet, nuk je i lumtur, por unë jam i zemëruar. Ne nuk mund ta arrinim nivelin e lojës së tyre fizike, topat e gjatë, topat e dytë, harkimet nga këndi”. “Ne u dhamë shumë opsione të luajnë lojën e tyre dhe ne nuk mund të mbanim posedimin. Kjo është kur ju duhet të shënoni karakter dhe kualitet – dhe ne nuk e bëmë këtë”.
“Karakteri dhe lidershipi gjithmonë janë të patjetërsueshëm në një ekip. Chelsea i Jose Mourinhos kishte shumë karakter, por tash është një kohë tjetër”, ka thënë Benitez.

Galliani: El Shaarawy ka tejkaluar pritjet

Zëvendëspresidenti i Milanit, Adriano Galliani, thotë se Stephan El Shaarawy i ka tejkaluar pritjet e tyre. “Ai ka kaluar përtej pritjeve tona. Ai ka mbushur 20 vjet javën e kaluar dhe unë nuk njoh shumë sulmues të moshës së tij që po shënojmë me këtë kontinuitet”. “Kur ai arriti nga Padua ai kishte shumë probleme. Por tash ai është mirë dhe është një prej talentëve më të mëdha në botë. Goditjet e tij janë të mahnitshme dhe ai e dërgon topin kudo që dëshiron me shijen e tij për gol”. “Stephan është një djalosh serioz dhe i pjekur. Ai duket se është më i moshuar se mosha e tij biologjike. Ai është shumë i pëlqyer nga të gjithë, është serioz dhe është djalosh i mirë, përveç që është lojtar i shkëlqyeshëm”, ka thënë Galliani.

Abramovich ta rikthejë Avram Grantin?

Pronari i Chelseat, Roman Abramovich, është duke i dërguar “ndihmë” ish-menaxherit Avram Grant. Daily Mail shkruan se Abramovich ka frikë se ka bërë gabim duke sjellë Rafa Benitezin dhe e sheh angazhimin e Grant në rolin e këshilltarit të spanjollit si një zgjidhje të mundshme. Benitez ka drejtuar skuadrën për tre ndeshje, por ende është pa fitore, dhe tifozët janë egërsisht kundër tij. Pas disfatës së të shtunës 3-1 nga West Ham, Abramovhich ka folur me stafin e tij për angazhuar personin të cilin e shkarkoi pas finales së Ligës së Kampionëve të vitit 2008. Grant, i cili aktualisht është duke drejtuar Partizanin e Beogradit, mendohet se ka raporte të mira me Benitez, që e ka inkurajuar Abramovich të mendojë se dyshja mund të punojnë në tandem.

Adebayor mungon në Kupën Afrikane

Sulmuesi i Tottenhamit, Emmanuel Adebayor, do të mungojë në turneun e muajit të ardhshëm, Kupën e Kombeve të Afrikës. Adebayor ka zbuluar se ai do të lërë anash karrierën ndërkombëtare me Togon pasi ndaj tij nuk janë realizuar pagesat. “Lojtari dhe kapiteni i Togos, Emmanuel Sheyi Adebayor, nëpërmjet kësaj informon publikun se ai po e suspendon karrierën e tij me skuadrën e Togos”, thuhet në një deklaratë të lëshuar nga lojtari.

Adil Rami në planet e Milanit

Milani është duke menduar të bëjë ofertë për mbrojtësin e Valencias, Adil Rami. E ardhmja e francezit është e paqartë me Valencian që është në krizë pas shkarkimit të trajnerit Mauricio Pellegrino. Milani është duke menduar një ofertë në vlerën e 15 milionë eurove për Rami në prag të afatit kalimtar të janarit.

Alessio: Ishte vështirë kundër Torinos

Ndihmës trajneri i Juventusit, Angelo Alessio, ka deklaruar se ishte vështirë të fitonin kundër Torinos në derbin lokal. Ndihmës trajneri i Juventusit, i cili e zuri vendin e trajnerit kryesor në ekip pas dënimit të Antonio Contes, ishte shumë i nervozuar gjatë pjesës së parë por buzëqeshjen ia kthyen golat e Marchisios dhe të Giovincos. ”Nuk ishte fare e lehtë të luash ndaj një ekipi që ishte i organizuar aq mirë. Ne kishim vështirësi në 20 minutat e parë të lojës, por loja ndryshoi pas përjashtimit të lojtarit të tyre, që ishte vendim i padiskutueshëm”, tha Alessio për mediat italiane.

Messi i nderuar që krahasohet me Pelen dhe Maradonën

Sulmuesi i Barcelonës, Lionel Messi, ka deklaruar se ndihet krenarë që po e krahasojnë me Pelen dhe Maradonën. Sulmuesit të Barcelonës i duhet vetëm edhe një gol për ta barazuar rekordin e Gerd Mullerit, i cili pati shënuar 85 gola për një vit kalendarik dhe së fundmi ai ka marrë shumë lëvdata të cilat e kanë krahasuar atë me më të mirët në historinë e futbollit, si Pele e Maradona. ”Ndihem shumë i nderuar që po krahasohem me Pelen dhe Maradonën, por unë më së shumti mundohem të përmirësoj veten dhe t’i ndihmoj ekipit, e jo t’i kaloj të tjerët”, tha Messi për Voetbal International.

Neymar: Dua Robinho të kthehet te Santosi

Superylli brazilian, Neymar, thotë se ai mezi pret që ta ketë ndonjëherë përsëri në ekipin e tij Robinhon, me të cilin thotë se përshtatet shumë mirë në lojë. “Unë dua ta kem në ekip, ai është idoli im. Të kemi një prej idolëve përsëri në klub do të ishte dicka shumë speciale. Nëse tifozët e dëshirojnë atë, edhe unë dua ta kem në klub”. “Unë gjithmonë dua lojtarët e mirë të vijnë te Santosi, dyert janë gjithmonë të hapura për lojtarët e mirë në klubin tonë”, është shprehur Neymar.

Cazorla: Jemi të paqëndrueshëm

Mesfushori i Arsenalit, Santi Cazorla, thotë se ai dhe bashkëlojtarët e tij duhet të largojnë paqëndrueshmërinë në rezultate, në mënyrë që të luftohet për titull në Ligën Premier. “Nuk e dimë ku është problemi. Është e vërtetë se nuk jemi të paqëndrueshëm. Unë besoj se ne mund të luftojmë për titull, por ndeshje të tilla ndaj klubeve të nivelit mesatar nuk duhet që t’i lëshojmë”. “Shikoni ndeshjen ndaj Fulhamit. S’mund të jetë rezultati i barabartë pas pesë minutave. Këto pikë nuk do të kthehen më. Më pas edhe ndaj Aston Villas barazuan. Nuk mund të kuptoj, duhet gjithsesi të reagojmë ndaj kësaj situate”, ka thënë Cazorla.

Benitez: Lampard dhe Cole mund të qëndrojnë

Menaxheri i përkohshëm i Chelseat, Rafael Benitez, ka konfirmuar se është i pasigurt për të ardhmen e Lampard dhe Ashley Coles, duke thënë se ata edhe mund të qëndrojnë, por edhe mund të largohen. “Kur jam pyetur një ditë pas deklaratës time, e kuptova se është keqkuptuar nga anglishtja ime, që nuk është e mirë, por situata e tyre është se janë në përfundim të kontratave. Më shumë se kjo nuk e di”. “Nuk mund të them po ose jo, nuk e di nëse ata do të largohen në janar apo në fund të sezonit. Në këtë moment nuk di asgjë”, ka thënë Benitez. Benitez në tri ndeshjet e para me Chelsean ka dy barazime dhe një humbje.

Kosova ka përparësi për investitorët turq

Në Samitin Ndërkombëtar të Ballkanit të mbajtur në Bursa të Turqisë, në një takim me zëvendëskryeministrin e turk, Bulent Arinc dhe para të ftuarve tjerë, zëvendëskryeministrja dhe Ministrja e Tregtisë dhe Industrisë, Mimoza Kusari Lila tha se reformat e të bërit biznes në Kosovë duhet të ju shërbejnë bizneseve turke që ta shohin Kosovën si vend me përparësi për investime në rajon. “Siç ka treguar raporti i fundit i Bankës Botërore për të bërit biznes, Kosova është duke bërë reforma të thella ekonomike në këtë fushë. Bizneset turke janë të mirëseardhura për të investuar në Kosovë dhe duhet ti shohin këto reforma si përparësi në investimet e tyre në rajon”, ka thënë Kusari – Lila, thuhet në një kumtesë të lëshuar nga MTI. Ministrja Kusari Lila tha po ashtu që investitorët turq duhet ta kenë të qartë që Qeveria e Kosovës dhe Qeveria e Turqisë kanë bashkëpunim të shkëlqyeshëm ekonomik. “Ekonomikisht, Qeveria e Kosovës e trajton bashkëpunimin në mes të dy vendeve tona si të veçantë për shumë arsye. Si rezultat, kompanitë turke janë pjesë e projekteve më të mëdha në Kosovë, autostradës së re e cila sapo është lëshuar në qarkullim dhe aeroportit ndërkombëtar të Prishtinës i cili i është dhënë me koncesion një kompanie turke”, tha Kusari Lila. Tregtia në mes Kosovës dhe Turqisë, sipas saj, është duke u forcuar dhe se kjo është shenjë e bashkëpunimit të vazhdueshëm ekonomik në mes vendeve tona. “Ne kemi nënshkruar marrëveshjen për mbrojtjen e investimeve dhe para disa muajsh kemi filluar negociatat për marrëveshjen e tregtisë së lirë në mes Kosovës dhe Turqisë. Turqia po ngritet në listën e partnerëve tanë kryesorë tregtar dhe investimet turke në Kosovë po rriten gradualisht. Shkëmbimet tregtare në mes Kosovës dhe Turqisë janë dyfishuar prej 100 milion, në 2007, në rreth 200 milion në fund të vitit 2011. Këto janë tregues të qartë për lidhjet e fuqishme në mes dy shteteve tona dhe unë shpresoj që ato do të forcohen edhe më tutje”, ka thënë ministrja Kusari- Lila. Zëvendëskryeministri i Turqisë Bulent Arinc tha që Turqia ka interesa në Ballkan dhe është e interesuar që rajoni të prosperojë sa më shumë. “Asgjë nuk është më normale për Turqinë sesa të tregojë interes për Ballkanin me të cilin ne ndajmë lidhjet të thella historike, kulturore dhe humanitare. Turqia nuk ka prioritet tjetër sesa të shoh kombet e Ballkanit të prosperuara dhe të lumtura. Sukseset dhe e ardhmja e vendeve të Ballkanit është përbashkët.”, tha ai. Zëvendëskryeministri Arinc shprehu edhe përkrahjen për vendet e rajonit në proceset euroatlantike. “Ne besojmë që paqja dhe stabiliteti i rajonit janë faktorë të rëndësishëm për këto vende të cilat janë dëmtuar shumë nga luftërat. Për këtë arsye ne përkrahim perspektivën evropiane të vendeve të Ballkanit dhe anëtarësimin e tyre në NATO”, përfundoi ai. Samiti ndërkombëtar për Ballkanin që po mbahet në Bursa është organizim për të forcuar bashkëpunimin ekonomik dhe tregtar në mes të vendeve të Ballkanit dhe Turqisë si dhe të promovojë mundësitë e investimeve dhe bizneseve të reja në rajon.

Nuk ka evidenca për dëmet e luftës

Ndonëse kanë kaluar 13 vjet që nga përfundimi i luftës në Kosovë, ende nuk dihet saktësisht se sa janë dëmet e luftës të shkaktuara nga Serbia, para dhe gjatë luftës së vitit 1999. Gjatë luftës së fundit në Kosovë, në vitin 1998 dhe 1999, përveç vrasjeve, dhunimeve, shpërnguljes me dhunë të shqiptarëve dhe maltretimeve në forma të ndryshme, regjimi serb shkatërroi në masë të madhe edhe pronat e shqiptarëve. Ndër zonat më të shkatërruara gjatë luftës konsiderohen zona e Drenicës, Dukagjinit, por edhe zonat tjera në mbarë vendin. Shqiptarët e kthyer në shtëpitë e tyre pas përfundimit të luftës nuk u morën me vlerësimin e dëmeve, por pas shumë vitesh, disa prej tyre vendosën të kërkojnë kompensimin e tyre. Njëri ndër ta është Brahim Gjaka nga fshati Oshlan i komunës së Vushtrrisë, i cili në vitin 2010 ka bërë kërkesë-padi për dëmshpërblim. “Kërkesën që e kam bërë për dëmshpërblim, për tri shtëpi, për bagëti, traktor, objektet tjera jashtë banimit, si stalla, e kam përfshirë edhe pjesën e ushqimit të shtazëve, pastaj drithërat, grurin, misrin, elbin, tërshërën, e kam futur edhe vjedhjen dhe plaçkitjen që e kanë kryer serbët gjatë vitit 1998 dhe ’99. atë vlerë që unë e kam paraqitë ka qenë rreth 350 mijë euro”, tha Gjaka, transmeton RTK. Me qëllim të adresimit të çështjeve që kanë të bëjnë me dëmet e luftës, në vitin 2008 është themeluar shoqata “Ngritja e zërit” me seli në Skenderaj, e përbërë nga avokatë dhe juristë profesionistë. Kjo shoqatë, pavarësisht vështirësive materiale dhe mungesës së fondeve, ka arritur të hartojë shumë padi për qytetarë të 12 komunave, tërësisht falas, thotë përfaqësuesi i shoqatës, Jahir Bejta. “Ne kemi hartuar 800 padi, dhe të njëjtat i kemi dërguar në gjykatat komunale, varësisht qytetari cilës komunë i përket. Shumica e padive janë nga territori i komunës së Skenderajt, por edhe komunat tjera, 12 sosh. Paditë e para i kemi dorëzuar nëpër gjykata në muajin mars 2012 dhe prej atëherë deri më tani nuk ka asnjë përgjigje të mirëfillta, me prova relevante, shumica janë të komunës së Skenderajt, por ka edhe të 12 komunave tjera”, thotë Bejta. Sipas Bejtës në aplikacion kanë paraparë të pasqyrohen humbjet, qoftë në aspektin human, si vrasjet, dhunimet, burgosjet etj, po ashtu edhe në atë material, dëmtimin e shtëpive, fondeve bujqësore etj. Ndërkohë, grupi i ekspertëve “E15” ditë më parë ka kërkuar nga institucionet vendore që gjatë bisedimeve me autoritetet e Serbisë, të angazhohen edhe për zgjidhjen e këtij problemi, duke thënë se sipas të gjitha konventave ndërkombëtare, kompensimi i dëmeve është një e drejtë e patjetërsueshme. Dëmet materiale vlerësohen në miliarda euro, si ndaj sektorit privat, po ashtu edhe ndaj atij publik.

Pa depo doganore

Drejtuesit e Doganës së Kosovës po planifikojnë t’i mbyllin thuajse të gjitha depot doganore, pasi disa kompani i kanë shfrytëzuar këto depo për ta shtyrë afatin e pagesave. Përfaqësuesit e komunitetit të biznesit ankohen se dogana në mungesë të kapaciteteve monitoruese, po i mbyll depot. Doganës së Kosovës nuk po i pritet që bizneset t’i paguajnë taksat. Të gjithë importuesit që deri më tani kanë mundur ta sjellin njëherë mallin në Kosovë e pastaj t’i paguajnë detyrimet doganore varësisht nga sasia e shitur, rrezikojnë ta humbin këtë të drejtë. Dogana e Kosovës u ka dërguar letër afro 160 ndërmarrjeve që kanë depo doganore se nuk ka arsyeshmëri ekonomike të vazhdohet më kështu. “Ju njoftojmë se ky është një njoftim paraprak para se të merret vendimi definitiv për ndërprerje të autorizimit me qëllim që ju të merrni masa që në një periudhë sa më të shkurtër të filloni me pagesën e taksave për mallin e deponuar ose t’i jepni trajtim tjetër të lejuar doganor”, thuhet në shkresën e doganës dërguar bizneseve, shkruan Express. Në praktikë, deponimi doganor krijon mundësin e vendosjes së mallrave nën mbikëqyrje doganore në një vend të autorizuar nga Dogana e Kosovës (Depo Doganore), pa pagesën e detyrimeve të importit, pra do të shtyhet pagesa e taksave doganore deri atëherë kur ato plasohen në treg. Kur ato të dalin në treg, atëherë kompania duhet t’i paguajë detyrimet doganore për atë sasi të mallrave të plasuar në treg. Gjithashtu jep mundësinë e ri-eksportimit të mallrave në ndonjë treg të huaj, pa ndonjë ngarkesë të detyrimeve. Por, sipas zyrtarëve të doganës, bizneset nuk janë duke e respektuar këtë të drejtë në përpikëri. “Depot doganore kanë lëvizur nga qëllimi kryesor. Disa kompani i kanë shfrytëzuar depot për t’i shtyrë pagesat doganore dhe për këtë arsye do të mbyllen”, thotë Adriatik Stavileci, zëdhënës i doganave.

Përsëritet tenderi për autostradën drejt Shkupit

Ministria e Infrastrukturës ka rihapur garën për kontraktimin e këshilltarit të transaksionit për ndërtimin e “Rrugës 6”, autostradës Prishtinë-Han i Elezit. Për dallim nga tenderët e kaluar të shpallur për të njëjtin qëllim, ministria ka futur në një “pako” dy procedura tenderuese, atë për këshillime për procesin e kontraktimit të kompanive ndërtuese dhe procedurën për kryerjen e transaksioneve për të njëjtin projekt, shkruan Koha Ditore. Në vendimin për rihapje të procedurës tenderuese thuhet se puna që duhet të ndërmerret nga këshilltari ka të bëjë me ofrimin e ndihmës për Qeverinë Kosovës dhe Ministrisë së Infrastrukturës në implementimin e procesit të prokurimit për caktimin e një kompanie ose konsorciumi të kompanive për të ekzekutuar projektin e zgjeruar të autostradës Prishtinë - Hani i Elezit.

San Salvador, sfilatë mode në burg (Foto)

Jeta vazhdon normalisht edhe pas hekurave të një burgu.
Këto janë disa të burgosura në një nga burgjet e San Salvador, të cilat mundohen të argëtohen brenda mundësive që kanë.
Këtu ato janë duke u përgatitur për një sfilatë mode brenda ambienteve të burgut.

Apple, prodhuesi i dytë i telefonave në SHBA

Gjiganti amerikan i teknologjisë dhe prodhuesi i telefonit më të famshëm në botë, iPhone, kompania Apple ka rrëmbyer vendin e dytë në tregun e prodhuesve të telefonave të thjeshtë dhe atyre të mençur në SHBA, thuhet sipas raportit të fundit të comScore. Samsung ka mbajtur pozitën e liderit të tregut me 26.3 për qind të bazës së përdoruesve të telefonave mobil në Amerikë, e përcjell nga Apple e cila mban 17.8 për qind të tregut, duke e tejkaluar rivalin LG, e cila ka mbetur për .2 pikë prapa prodhuesit të famshëm amerikan, i cili ia ka zënë vendin e dytë tani. Apple ka fituar 1.5 për qind për tre muaj, duke filluar prej muajit gusht e deri në tetor, periudhë e cila përfshin edhe lansimin e iPhone 5. Në anën tjetër, LG, Motorola dhe HTC kanë rënë me pjesëmarrjen e tyre në treg, për .8, .2, dhe .4% respektivisht. Në muajin prill të këtij viti, Apple kishte lënë pas rivalin Motorola për tu ngjitur në vendin e tretë në radhitje, ndërsa tani “viktima” e saj e radhës ka qenë LG.

E ardhme e paqartë për kërkimet në Google

Përfaqësuesit e rregullatorëve antitrust për Evropë dhe SHBA, Joaquin Almunia dhe Jonathan Leibowitz, do të takohen të hënën për një diskutim që mund të jetë vendimtar për të ardhmen e motorit më të madh të kërkimit në botë, kompanisë Google, për të marrë një vendim nëse do të merren vesh me gjigantin amerikan të teknologjisë apo për ta paditur atë lidhur mbi dominimin e saj në treg. Komisioni Evropian dhe Komisioni Federal i Tregtisë (FTC) janë duke e hetuar kompaninë Google për më shumë se 18 muaj, ndërsa po përpiqen për të vendosur se çfarë veprimi duhet marrë lidhur me pozitën e saj të monopolit të dukshëm në kërkimet në internet si dhe në kërkimet që lidhet me reklamat. Rregullatorët janë duke menduar për masa të cilat do të aplikohen në të dyja anët e Atlantikut. Nëse të dy rregullatorët veprojë kundër saj, Google me siguri se do të jetë e detyruar të përmbush kërkesat dhe të modifikojë mënyrën se si i tregon rezultatet e kërkimit në internet, që të mos i favorizojë shërbimet e veta mbi ato të rivalëve. Google është kritikuar nga konkurrentët e saj, duke përfshirë rivalin kryesor Microsoft, lidhur me shfrytëzimin e pozitës dominuese të kësaj të parës për të favorizuar shërbimet e veta si Google Shopping ndaj atyre të konkurrencës. Google është përgjigjur duke thënë se kompania vetëm i është përgjigjur kërkesës së përdoruesve të saj, dhe se rivalët e Google janë vetëm një klik larg përdoruesit.

Ushqimi që lufton kancerin, lufton edhe shtimin e peshës

Qendra për Kancer MD Anderson pranë Universitetit të Texasit thotë që lista e saj e artikujve ushqimorë u ndihmon njerëzve të shmangin shtimin e peshës duke blerë ushqimet të cilat e luftojnë kancerin. Mary Ellen Herdon eksperte e dietës në MD Anderson, u rekomandon njerëzve që të shfrytëzojnë listën e ushqimeve për të gjetur artikuj më të shëndetshëm derisa bëjnë pazar për festa, raporton UPI. "Njerëzit kanë tendencë të fitojnë peshë gjatë muajve të ftohtë, sepse qëndrojnë më shumë brenda, janë më pak aktivë dhe hanë më shumë ushqim me kalori", deklaroi Herdon. "Shtimi i pashëndetshëm i peshës është shumë i dëmshëm për shëndetin dhe e bën të pamundur që trupi juaj të luftojë sëmundjet siç është kanceri". Herdon sugjeron që meshkujt duhet të orientohen nga shujtat me jo më shumë se 500 kalori dhe femrat të hanë ushqim deri në 400 kalori për shujtë. "Ushqimet bimore janë të mbushura me përbërës që luftojnë kancerin. Pra, sigurohuni të keni dy të tretat e pjatës suaj të mbushur me perime, fruta, drithëra të plota apo fasule", ka këshilluar Herdon. "Në pjesën e mbetur të pjatës suaj, zgjidhni mish ose proteina bimore". Mbajtja e një diete të pasur me bimë, plot fruta, perime, drithëra të plota dhe fasule dhe të qenit fizikisht aktiv janë mënyrat më të mira për të reduktuar rreziqet nga kanceri, përfundoi Hemdon.

Intuita mund të ndihmojë në marrjen e vendimeve të duhura

Tashmë me shekuj shkencëtarët tentojnë të kuptojnë pse njerëzit zgjedhin një rrugë nga një tjetër dhe si në mes numrit të madh të zgjedhjeve bëjnë atë për të cilën konsiderojnë që është më e mira. Marrja e vendimeve është pjesë e pashmangshme e jetës njerëzore dhe është ndër më misteriozet. Gjatë një hulumtimi, profesor Marius Usher nga Universiteti në Tel Aviv ka zbuluar që intuita është armë jashtëzakonisht e fuqishme dhe precize. Kur është dashur të bëjnë zgjedhjen në mes dy opsioneve duke u mbështetur vetëm në instinkt, vullnetarët kanë bërë zgjedhjen e duhur në madje 90 për qind të rasteve. Madje edhe në nivelin intuitiv një nga pjesët më të rëndësishme të procesit të marrjes së vendimit është integrimi i vlerave ose marrja parasysh e të gjithë faktorëve pozitiv dhe negativ të çdo opsioni për t'u krijuar pamja komplete. "Hulumtimi ka treguar që njerëzit kanë aftësi të jashtëzakonshme për t'i vlerësuar intuitivisht opsionet, çka çon deri te përfundimi që truri ka sistemin i cili specializohet për vlerësimin e vlerës", ka thënë Usher. Eksperimenti është përbërë nga ndryshimi i shpejtë i numrave në pjesën e majtë dhe të djathtë të monitorit. Numrat kanë paraqitur fitimet në tregun e aksioneve. Vullnetarët është dashur të zgjedhin grupin me përfitimin më të madh. Pasi që numrat kanë ndryshuar shumë shpejt, vullnetarët nuk kanë pasur kohë për të mbajtur mend shumën e parave të fituara por është dashur të mbështeten te instinkti gjatë vendimit. Vullnetarët kanë treguar aftësi të jashtëzakonshme të llogaritjes instinktive dhe saktësia e tyre është rritur proporcionalisht me informatat që i kanë marrë. Kur u janë treguar vetëm gjashtë çifte numrash, saktësia e tyre e zgjedhjes së shumës më të madhe të parave ka përbërë 65 për qind, ndërsa kur u janë treguar 24 çifte numrash, saktësia ka qenë 90 për qind.

Tyson: E gjeta gruan në shtrat me Brad Pittin

Legjenda e gjallë e boksit botëror, Mike Tyson, ka treguar për mediat amerikane se si e ka gjetur aktorin e njohur Brad Pitt në shtrat me bashkëshorten e tij Robin Givens. Momenti kur Tyson e zuri në vepër Givensin ishte gjatë kohës kur ata po divorcoheshin dhe ai papritmas vendosi të kthehej në mbrëmje në shtëpinë e bashkëshortes, kur e kishte parë befasinë që e priste në dhomën e fjetjes. “Ne ishim duke u divorcuar, por nuk ka pasur ndonjë natë kur nuk bënim seks. Secilën ditë unë shkoja në shtëpinë e saj dhe bënim seks, por një ditë dikush u tregua më i shpejt se unë dhe ai ishte Brad Pitt. Isha i inatosour, por nuk reagova, pasi atë kohë isha i përfshirë në shumë probleme me kokainë dhe gjëra tjera”, ka thënë Tyson. Mike Tyson është i lumtur me bashkëshorten e tij nga martesa e tretë, Lakiha Spencer, teksa ka lënë pas të gjitha problemet që i ka pasur në jetë.

Lojërat Olimpike, momenti më nevrik për Emeli Sande

Momenti më nevrik për Emeli Sanden ka qenë performanca e saj në ceremoninë hapëse të Lojërave Olimpike, por kur filloi të këndonte ajo është ndjerë e qetë. Ajo thotë se ishte ndjerë me fat që performoi në dy ceremonitë hapëse të Lojërave Olimpike, që janë shikuar nga miliona njerëz anë e mbanë botës, ndërsa ajo ishte tejet nervoze para momenteve të saj të mëdha në karrierë. “Momenti më i mirë i vitit ishte kur dola të këndoj këngën “Abide With Me” në ceremoninë hapëse të Lojërave Olimpike. Ishte moment i madh për karrierën time dhe momenti më nevrik në jetën time, jo vetëm gjatë vitit. Unë më pas jam ndjerë e qetë dhe nuk e pata problem. Nuk keni mundur të shihni njerëz, vetëm drita”, ka thënë Emeli Sande.

Argjentina, tash duet me Florin

Argjentina Ramosaj ka paralajmëruar realizimin e një dueti me kantautorin nga Shqipëria, Flori Mumajesi. “Jemi duke punuar një duet me Flori Mumajesin, është një baladë shumë e bukur, besoj do të lansohet para Vitit të Ri”, ka treguar këngëtarja në një intervistë për Panorama. Sa i përket duetit të dështuar me Vedat Ademin, ajo ka thënë: “Unë Vedatin e kam shumë mik të mirë dhe e vlerësoj shumë si artist". "Ka pasur disa mosmarrëveshje dhe bashkë me labelin tim vendosëm të ndërpresim duetin”.

Rihanna paralajmëron këngën e re

Këngëtarja mjaft e popullarizuar, Rihanna, ka njoftuar se së shpejti do të lansojë një këngë të re si pjesë e albumit “Unapologetic”. Është fjala për këngën “Stay”, e cila, sipas këngëtares, do të publikohet nga 7 janari i vitit të ardhshëm. Ndryshe, kënga është emetuar në një radio londineze, ndërsa ata që e kanë dëgjuar e kanë lëvduar. “Diamonds”, kënga e parë nga albumi i ri i Rihannas, u pranua shumë mirë nga publiku dhe kryesoi top-listat në 12 shtete, duke përfshirë edhe SHBA-të dhe Britaninë e Madhe.

E megatalentuara Rita

DJ Fresh mendon se bashkëpunëtorja e tij në hitin “Hot Right Now”, Rita Ora, është e ‘megatalentuar’ dhe është mjaft i kënaqur që ka ndihmuar në ndërtimin e karrierës së saj. Producenti 35-vjeçar ka punuar bashkë me këngëtaren shqiptare në këngën që kryesoi top-listat britanike dhe tash (dy vjet pasi Rita nënshkroi me shtëpinë incizuese të Jay-Z, “Roc National”) ai është i lumtur që i ka ndihmuar në fillet e karrierës. “Ajo është e megatalentuar. Asaj i nevojitej platforma e duhur për t’u promovuar. Për një kohë të gjatë, menaxhmenti i saj dhe shtëpia incizuese po kërkonin një këngë për ta promovuar atë, ndërsa ‘Hot Right Now’ ishte pikërisht çfarë po kërkonin”, ka thënë DJ Fresh për BANG Showbiz.

Becks: Të gjitha ekipet e duan Kakan

David Beckham është duke e mbështetur mundësinë që Kaka të kalojë te La Galaxy, duke thënë se secili klub do të dëshironte. “Mendoj se të gjitha klubet e dëshirojnë Kakan. Unë e njoh Kakan nga koha kur kam luajtur kundër tij me Anglinë. Natyrisht, unë kam kaluar shumë kohë me të edhe kur isha te Milani”. “Ai është talent i madh. Ai është person i mrekullueshëm dhe është punëtor i madh. Ai është një prej lojtarëve më profesionist që kam parë në jetën time”, ka thënë Beckham.