Njerëzit e trashë kërcënojnë civilizimin

Shkencëtarët britanik pohojnë personat me peshë të tepruar trupore nuk e dëmtojnë vetëm shëndetin e vet, por me shprehitë e veta ushqyese kërcënojnë edhe ekzistencën e pjesës tjetër të popullatës botërore.
“Të gjithë e pranojnë që rritja e popullatës kërcënon qëndrueshmërinë globale të mjedisit, por studimi jonë tregon që edhe pesha trupore është faktor kyç. Nëse diçka nuk bëjmë sa i përket pyetjes së popullatës dhe trashësisë, shanset i kemi minimale”, ka thënë dr. Ian Roberts, koautor i studimit dhe profesor nga Shkolla londineze për higjienë dhe sëmundje tropike.
Profesor Roberts dhe kolegët, kanë llogaritur që të gjithë njerëzit në botë së bashku peshojnë rreth 287 milionë tonë, nga ajo 15 milionë ton i bie personave të shëndoshtë, ndërsa 3,5 milionë ton në njerëzit e trashë. Edhe pse pesha mesatare e njeriut është 62 kilogram, është vënë re një dallim në regjionet e ndryshme të botës.
Në Amerikën veriore pesha trupore është 80,7 kilogram, ndërsa në Azi 57,7 kilogram.
Studimi është publikuar në revistën profesionale BMC Public Helth.

Rrjedhin pamjet e tabletit Google Asus Nexus 7?

Me ditë të tëra është duke u folur për tabletin e ri Android të prodhuar nga Google dhe Asus, për të cilin është thënë se do të vijë i pajisur me Android 4.1 Jelly Bean, ndërsa tani dyshohet se disa pamje të publikuara në internet shfaqin Asus Nexus 7.
Sipas Gizmodo Australia, tableti në fotografi paraqet Asus Nexus 7, ndërsa faqja thotë se përveç fotografisë ka arritur të marrë edhe disa nga specifikat e avancuara të këtij tableti që vjen me versionin më të ri të Android.
Asus Nexus 7 do të vijë me ekranin e ndjeshëm në prekje me 7 inç, rezolucionin prej 1280 x 800 piksel, kamerën me 12MP, si dhe procesorin quad core NVIDIA Tegra 3 me 1.3GHz, GeForce 12-core GPU dhe 1GB RAM.
Me sa duket, Asus Nexus 7 do të vijë në dy versione, njërin me 8GB memorie të brendshme që do të kushtojë 199 dollarë, si dhe tjetrin me 16GB, çmimi i të cilit thuhet se do të jetë 249 dollarë.

Xhiron përbindëshin në liqen (Video)

Një punëtor kinez nga Kanas pohon se ka xhiruar një ‘përbindësh’ në liqenin me të njëjtin emër dhe për këtë ka edhe dëshmitarë.
Wang Hongqiao, njëri nga punëtorët në liqenin Kanas në krahinën autonome Xinjiang Uygur, ka publikuar një video ku shihet ‘përbindëshi’.
Përveç tij, edhe disa njerëz të tjera kanë vërejtur se në liqen po lëvizte diçka me shpejtësi të madhe. 

Spanja kërkon kredi shpëtimi

Spanja ka kërkuar zyrtarisht një kredi shpëtimi në vlerë prej 100 miliardë eurosh nga partnerët e eurozonës për të ruajtur sistemin e saj bankar "të sëmurë".
Ministri spanjoll i Ekonomisë, Luis de Guindos ia ka dërguar një letër presidentit të Eurogroup-it Zhan-Klod Xhanker, dhe i ka kërkuar zyrtarisht “ndihmë financiare”.
Në letër nuk është përfshirë ndonëj shifër, dhe nuk dihej se çfarë vlerëe kërkonte Spanja.
Më herët u raportua se bankave spaniolle do t’iu duhet një pako prej 62 milionë eurove për t’i mbijetuar krizës financiare.
Eurozona më herët ka dhënë indikacione se është e përgatitur që të japë deri në 100 miliardë euro për sistemin bankar në Spanjë, që po vuan nga kriza e gjatë ekonomike dhe papunësia prej 25 për qind. 

Dogana, vështirë të realizojë planin

Dogana e Kosovës që brenda pesë muajve të këtij viti ka pasur vështirësi të arrijë pragun e të hyrave financiare përcaktuar sipas buxhetit vjetor, do ta ketë edhe më të vështirë pjesën e dytë të vitit. Qeveria ka rritur pragun e të hyrave për 23 milionë euro nëpërmjet rishikimit të buxhetit.
Për dallim nga buxheti i këtij viti i miratuar në Kuvend, rishikimi i buxhetit i kryer nga Qeveria paraqet rritje të nivelit të të hyrave të përgjithshme nga 1 miliard e 361 milionë euro në 1 miliard e 384 milionë euro. Niveli i të hyrave i planifikuar nga Dogana e Kosovës, është rritur për 8 milionë euro, nga 867 milionë sa ishte në fillim të vitit, në 875 milionë euro pas rishikimit të buxhetit.
Doganierët janë optimistë se do të arrijnë cakun e vendosur nga Qeveria. “Marrë për bazë zhvillimet e përgjithshme dogana ka besim se do t’i arrijë cakun e planifikuar”, thotë Adriatik Stavileci, zëdhënës i Doganave të Kosovës. Por trendi i të hyrave ende nuk është pozitiv në krahasim me planifikimet e bëra. Sipas të dhënave zyrtare, Dogana deri në javën e 23 të këtij viti, ka grumbulluar 306 milionë euro apo 1.1 për qind më pak se në të njëjtën periudhë të vitit të kaluar, transmeton Koha.net.
Gjatë kësaj periudhe doganat kanë grumbulluar rreth 15 milionë euro më pak se planifikimi i bërë për këtë vit. “Sipas trendëve aktuale të mbledhjes së të hyrave, nëse merren parasysh 8 javët e fundit, mesatarja javore ka qenë mbi 16 milionë euro brenda një jave, nëse vazhdon ky trend i dy muajve të fundit gjithsesi se do të arrihen parashikimet buxhetore”, thotë Stavileci. Ai nuk dëshiron të komentojë nëse Doganat kanë qenë dakord me vendimet e Qeverisë për rritjen e të hyrave nga Doganat.
“Dogana është institucion ekzekutiv nuk është politike bërës. Neve në përputhje me këto politika mbledhim të hyrat që të arrijmë projeksionet e parapara buxhetore”, thotë Stavileci. 

Brenda javës zgjidhet çështja e çimentos

Presionet e mëdha për shfuqizimin e vendimit për marrjen e masave të përkohshme mbrojtëse në importin e çimentos për të gjitha vendet, kanë shtyrë Ministrinë e Tregtisë të përshpejtojë procedurat për heqjen e këtij vendimi. Ky vendim përfundimisht do të hiqet deri në fund të kësaj jave.
Një paralajmërim të tillë e ka lëshuar edhe kryeministri Hashim Thaçi, gjatë qëndrimit të tij në Shqipëri. “Flas me besim të plotë se çështja e taksës për çimento do të jetë çështje e tejkaluar”, ka thënë kryeministri Thaçi pas takimit me kryeministrin Sali Berisha në Tiranë.
Para se kryeministri të lëshonte këtë deklaratë, burimet e gazetës brenda Ministrisë së Tregtisë kanë pohuar se çështja e taksës për çimento do të zgjidhet përfundimisht brenda kësaj jave, duke mos ditur ende se si do të jetë epilogu i zgjidhjes së këtij problemi.
Të martën pritet të mbahet debati publik, të mërkurën do të ketë takime me përfaqësuesit nga Shqipëria dhe me importues të tjerë të çimentos, dhe në fund të javës do të hiqen masat e përkohshme. “Deri të premten do të hiqet masa e përkohshme”, pohoi një zyrtarë i lartë i MTI-së, shkruan “Koha Ditore”

Krasniqi: Dorëheqja e Kuçit e ngutshme

Kryetari i Kuvendit të Kosovës, Jakup Krasniqi e ka cilësuar si të ngutshme dorëheqjen e zëvendëskryeministrit dhe ministrit të Drejtësisë, Hajredin Kuçi, pas vendimit të Kuvendit për mos heqjen e neneve 37 dhe 38 nga Kodi Penal, nene këto që kanë të bëjnë me mediat dhe gazetarët dhe përgjegjësitë e tyre penale.
“Mendoj se këtu ka pasur një ngutje, sepse në fund të fundit te institucionet ka një ndarje. Parlamenti është institucion në vete dhe vendimet e tij janë vullnet i shumicës së deputetëve, kurse anëtarët e qeverisë do të duhej ta kishin përgjegjësinë për veprimet apo mos veprimet e qeverisë”, tha kryeparlamentari Krasniqi, i cili ditën e votimit të Kodit Penal ishte në një vizitë në Shtetet e Bashkuara të Amerikës.
“Në fund të fundit Kodi ka ardhur nga Qeveria”, është shprehur Krasniqi, transmeton Rel. 

Zvicër, kontroll special për pasagjerët nga Kosova!

Për të parandaluar imigrimin ilegal, nuk mjafton vetëm kontrolli i kufijve dhe i aeroporteve zvicerane. Kështu kanë konstatuar autoritetet kompetente zvicerane, të cilat kanë pohuar se nga tetori i vitit të kaluar kontrollimi bëhet edhe në vendet e nisjes së imigrantëve potencialë ilegalë, në aeroportet e vendeve “të dyshimta”. Ndër këto vende është edhe Kosova!
Kompanitë ajrore që operojnë nga Prishtina, Dubai (Emiratet Arabe) Dar es Salam (Tanzani) dhe Nairobi (Kenia) janë të detyruara që Zyrës Federale për Migracion (BFM) t`ua dorëzojnë të dhënat e të gjithë pasagjerëve që udhëtojnë me aeroplanët e tyre.
Ndërkaq, duke filluar nga shtatori, në këtë rreth aeroportesh të dyshimta do të hyjnë edhe ai i Moskës dhe i Stambollit, ka bërë të ditur për gazetën "NZZ am Sonntag" zëdhënësi i BFM-së Jürg Walpen.
“Me këto masa do të ndihmohet përmirësimi i kontrollimit të kufijve dhe luftimi i migrimit ilegal”, ka thënë ai. BFM të dhënat që i merr nga kompanitë ua dorëzon autoriteteve të kontrollimit të kufijve. Këto të fundit pastaj kanë mundësinë që të shfrytëzojnë kohën e fluturimit të për t`i bërë kontrollimet e para, transmeton Albinfo.ch.
Këto masa mundësojnë që në të ardhmen për çdo muaj në duart e mbikëqyrësve të kufijve të dorëzohen të dhënat personale të rreth 80 mijë pasagjerëve.
Sipas gazetës, kohëve të fundit është shtuar dukshëm numri i të huajve që shfrytëzojnë rrugën ajrore për të hyrë ilegalisht në Zvicër.

FSK-ja tejkalon standardet e parashikuara nga NATO

Nëntëdhjetë nënoficerë të FSK-së kanë përfunduar trajnimin në Akademinë prestigjioze të ushtrisë amerikane në Gjermani, ku kanë treguar performancë të madhe. Ky trajnim është shumë i rëndësishëm për FSK-ën, sepse vlerësimet e këtij trajnimi janë mbi 30 për qind i tejkalimit të standardeve që ka parashikuar NATO për FSK-në, ka vlerësuar Komandanti i FSK-së Gjeneral-lejtnant, Kadri Kastrati.
Në Akademinë e Nënoficerëve në Qendrën Ndërkombëtare të Trajnimeve në Grafenworh, të Gjermanisë është mbajtur trajnimi i 90 nënoficerëve të FSK-së, kurse Komandanti i FSK-së, Kadri Kastrati tha se struktura e nënoficerëve është objektivi kryesor dhe duhet të ndërtohet me të gjitha standardet.
Ai vlerësoi se FSK-ja i nevojitet Kosovës, por edhe rajonit.
“Kjo tregon që FSK-ja është shumë aktive tregon që FSK-ja është duke ecur drejt ngritjes së profesionalizmit dhe drejt shndërrimit në një forcë që i nevojitet jo vetëm Republikës së Kosovës, por shumë shpejt ne synojmë që të japim kontribut edhe jashtë Kosovës në misione humanitare nëpër botë nëse kërkohet nga ne”, tha Kastrati.
Ndërkaq sa i përket buxhetit lidhur me blerjen e automjeteve të rënda për Forcën e Sigurisë së Kosovës, komandanti Kastrati tha se FSK-ja është duke bërë rishikimin strategjik të FSK-së dhe sigurisë në Kosovë dhe pritet që gjatë këtij vitit të nxirren nevojat e FSK-së për pajisjet, raporton RTK.
Si çdo vit edhe këtë vit për të dytën herë më radhë pjesëtarët e FSK-së do të marrin pjesë në marrshin e NATO-s në Holandë. 

Maqedonia, partner i rëndësishëm

Maqedonia për Republikën e Kosovës është një partner i rëndësishëm politik, ekonomik dhe strategjik, ka deklaruar ministri i Jashtëm Enver Hoxhaj në takimin e sotëm me homologun e tij, Nikola Popovskin në Shkup.
Hoxhaj me këtë rast tha se Kosova në vitin e ardhshëm do të fillojë ta ndërtojë autostradën që do ta lidhë Prishtinën me Shkupin përmes Hanit të Elezit

“Republika e Kosovës ka më së shumti marrëveshje të nënshkruara me Republikën e Maqedonisë ka vizita të shumta në nivele të ndryshme në mes të vendeve tona dhe ka bashkëpunim të rëndësishëm në fusha të rëndësishme të jetës. Kosova në vitin e ardhshëm do të fillojë ta ndërtojë autostradën që do ta lidhë Prishtinën me Shkupin përmes Hanit të Elezit. Dhe ne biseduam se si në një të ardhme të afërt qytetarët e dy vendeve tona të lëvizin lirshëm vetëm me kartat e identitetit në mes Kosovës dhe Maqedonisë”, tha Hoxhaj, transmeton Rel.
I pyetur për rastin e Smilkovcit ai tha se në mes ministrive të Brendshme të Kosovës dhe Maqedonisë si dhe policisë ka një bashkëpunim të shkëlqyer.
“Të dy ministrat tanë janë në kontakt të përhershëm kanë pasur edhe takime gjatë këtij viti. Prandaj falë këtij bashkëpunimi të shkëlqyer që kemi dhe çështjet e tilla nuk janë çështje të cilat i rëndojnë relacionet tona. Unë para se të vij në këtë vizitë kam biseduar me kolegët e mi në Prishtinë dhe ata më kanë thanë se janë në kontakt me kolegët e tyre në Shkup dhe i dinë detajet. Mirëpo nuk kanë qenë temë e bisedës që kemi pasur”, është shprehur shefi i diplomacisë kosovare Enver Hoxhaj.

PDK-ja kërkon rishqyrtim të Kodit Penal

Partia Demokratike e Kosovës, përmes përfaqësuesit të saj, ka kërkuar sot në Kryesinë e Kuvendit të Kosovës që të tërhiqet Kodi Penal i Kosovës dhe të rishqyrtohen nenet e diskutueshme.
Kryeparlamentari, Jakup Krasniqi, tha se qeveria duhet të bëjë ndryshimet e nevojshme, në mënyrë që dhe kodi të jetë i pranueshëm për të gjithë.
Krasniqi i ka cilësuar të ngutshme, veprimin e Kuçit për dorëheqje, por edhe deklaratat e kryeministrit më pas.
“Fundi i fundit Kodi Penal ka ardhur në Kuvend nga vetë Qeveria”, ka theksuar Krasniqi, transmeton RTK. 

Hoxhic: Nuk i rrezikojmë institucionet e Serbisë në veri!

Shefja e Zyrës Administrative në veri të Mitrovicës, Adrijana Hoxhic, ka vlerësuar se është e panevojshme vendosja e trupave të KFOR “me armë të gjata” përreth kësaj zyre, e cila, sipas saj, nuk kërcënon asnjë institucion të Serbisë në veri.
"Kjo zyrë nuk ka të bëjë asgjë me vendosjen e ushtarëve të KFOR-it dhe unë mendoj se ‘tytat e gjata’ vërtetë janë të panevojshme. Qytetarët e veriut të Mitrovicës janë shumë të vetëdijshëm për gjithçka dhe kurrë nuk kanë qenë iniciatorë të dhunës”, citohet të ketë thënë Hoxhic për gazetën "Dnevnik" të Novi Sadit.
Sipas saj, hapja e zyrës administrative në veri të Mitrovicës ‘nuk paraqet kërcënim për asnjë institucion të Serbisë në veri”.
"Nuk është përgjegjësi e jona që të merremi me këto çështje. Tek e fundit, kur flasim për kujdesin shëndetësor ose arsimin, ne jemi shumë të interesuar për të përmirësuar funksionimin e tyre, e jo t’i shuajmë", tha Hoxhic.

Shqiptarët fituan 15.59 për qind të votave në Medvegjë

Mbrëmë vonë janë shpallur rezultatet preliminare të zgjedhjeve lokale të mbajtura dje në Medvegjë, sipas të cilave Partia për Veprim Demokratik ka fituar 15.59 për qind të votave.
Sipas Komisionit Komunal Zgjedhor në Medvegjë, Partia për Veprim Demokratik, me bartës të listës Florim Sahitin, ka fituar 15.59 për qind të votave nga numri i përgjithshëm, prej 10 102 votuesve.
Ndërkaq, sipas këtij komisioni zgjedhjet e sivjetme lokale i ka fituar përsëri kryetari aktual Slobodan Draskovic me mbi 46 për qind të votave, kurse vendet tjera i kanë fituar partitë e vogla serbe.
Rezultatet përfundimtare pritet të shpallen sot dhe kështu në një afat të shkurtër kohor do të konstituohet Kuvendi Komunal i Medvegjës, i cili në përbërjen e vetë do të ketë edhe shqiptarë, transmeton “Presheva Jonë”.
Duhet të theksohet se Kuvendin e ardhshëm komunal të Medvegjës do ta përbëjnë 35 këshilltarët e rinj që morën besimin në zgjedhjet e djeshme lokale, të parapara për 6 maj e që nuk u mbajtën për shkaqe teknike.

Kocijancic: Dialogu duhet të vazhdojë

Bashkimi Evropian ende nuk e di se në ç’drejtim do të vazhdojë dialogu ndërmjet Kosovës dhe Serbisë. Për vazhdimin e dialogut BE-ja po pret formimi i qeverisë së re në Serbi.
“Ajo ende nuk është formuar. Kur Serbia të ketë një qeveri, atëherë do të konsultohemi me Beogradin dhe Prishtinën për mënyrën dhe kur dialogu do të vazhdojë”, ka theksuar Maja Kocijancic, zëdhënëse e Përfaqësueses së Lartë të BE-së, raportojnë mediat serbe, citon RTK.
Sipas saj, është e qartë se dialogu patjetër duhet të vazhdojë dhe që marrëveshjet e arritura patjetër të zbatohen sa më parë që është e mundur.
Mediat serbe raportojnë se në selinë e BE-së nuk kanë në plan që me vetiniciativë të ndryshojnë në formatin e tanishëm të dialogut ndërmjet Kosovës dhe Serbisë, duke theksuar se ngritja e dialogut në nivel politik para së gjithash varet nga përgjigjja e të dyja palëve. 

Nesta mendon të pensionohet

Legjenda e Milanit, Alessandro Nesta, është duke menduar t’i japë fund futbollit pas një karriere të bujshme.
Dy herë fituesi i Ligës së Kampionëve u largua nga Rossonerët, ku qëndroi për një dekadë dhe teksa gjendet pa klub, mbrojtësi italian ka pranuar se mendon që të pensionohet pasi nuk ka gjetur ndonjë klub jashtë Italisë ku mund t’i kthehet interesimi për lojën.
Nesta është shprehur i interesuar që të kalojë në MLS, mirëpo asnjë klub nga SHBA-të nuk i ka bërë ofertë, duke qenë se ata dëshirojnë ta shfrytëzojnë mundësinë e transferimit të sulmuesve. 

Tifozët e Realit nuk e duan Modricin

Sipas rezultateve të një ankete të bërë nga Marca, 45 për qind e tifozëve të Real Madridit janë kundër transferimit të Luka Modric, ndërkohë që 55 për qind e tyre e konsiderojnë si përforcim.
Mediat në Spanjë dhe Angli raportojnë se klubi mbretëror në javën e ardhshme do t’i bëjë ofertë Tottenhamit për shërbimet e mesfushorit me një shumë që besohet të jetë 35-40 milionë euro.
Nga ana tjetër, Modric thuhet të jetë mjaft i pëlqyer nga trajneri Jose Mourinho, por për të interesohen edhe shumë klube të tjera evropiane. 

Lavezzi: Napoli gjithmonë në zemrën time

Ezequiel Lavezzi nuk e di me saktësi se kur do të finalizohet kalimi i tij te Paris Saint-Germain, por ai tashmë është përshëndetur me tifozët e Napolit.
“Nuk di shumë rreth negociatave. Agjenti im po i menaxhon ato. Mirëpo, nga Napoli do ta mbaj në zemrën time dashurinë e jashtëzakonshme për njerëzit”.
“Napoli më ka shtyrë përpara dhe më ka dhënë mbështetje të madhe në skenën ndërkombëtare”, ka thënë Lavezzi për Il Mattino.
Lavezzi iu bashkua Napolit në vitin 2007 nga San Lorenzo. 

Soldado te Valencia deri në vitin 2017

Roberto Soldado dhe Valencia kanë përfunduar me sukses bisedimet për vazhdimin e kontratës së lojtarit spanjoll.
Sulmuesi iu bashkua Los Che në vitin 2010 nga Getafe, ndërsa tani është pajtuar që të qëndrojë në Mestalla deri në vitin 2017.
“Performancat e Roberto Soldados kanë qenë fantastike – kjo është diçka të cilën e kanë parë të gjithë”.
“Megjithatë, përkushtimi i tij, dëshira për ta çuar Valencian përpara dhe karakteri i tij fitues e bëjnë atë një gurëthemel për skuadrën dhe një emblemë për valencianistët”, ka thënë presidenti i klubit, Manuel Llorente. 

Liverpooli të shesë Skrtel

Liverpooli është i gatshëm që ta shesë mbrojtësin Martin Skrtel gjatë kësaj vere, për të mbushur arkat e klubit.
Daily Star Sunday shkruan se Manchester City do të jetë ekipi i parë që do të tentojë të transferojë sllovakun në Etihad Stadium.
Liverpooli ka opsione të shumta për mbrojtje dhe duket se klubi nga Anfield po i përgatit goditjet e veta në treg për muajin gusht, ku dhe çmimet ulen ndjeshëm. 

“Mirë që Robben dështoi në finale të LK-së”

Një anëtar i kombëtares holandeze ka pohuar se ai dhe bashkëlojtarët e tij kanë qenë shumë të lumtur kur mësuan se Arjen Robben humbi penaltinë vendimtare në finalen e Ligës së Kampionëve.
Burimi anonim ka deklaruar për Telegrafin holandez se ata kanë menduar se Robben do të jetë më i angazhuar me ekipin që të kenë sukses në Euro 2012.
“Paramendoni se si do të kishte ardhur ai në kombëtare po që se do ta shënonte atë penalti. Ai do të kishte qenë më arrogant dhe kurrë nuk do t’ua pasonte topin bashkëlojtarëve”, ka theksuar ky burim për De  Telegraaf.
Arjen Robben njihet si lojtar shumë egoist, gjë që i kushtoi atij humbjen në finalen e Botërorit ku lëshoi dy-tri mundësi të pastra shënimi përderisa kishte lojtarë tjerë në pozitë të sigurtë shënimi dhe ky imazh u përsërit edhe në finalen e Ligës së Kampionëve. 

City ofertë për De Rossin

Manchester City është duke e menduar një ofertë për mesfushorin e Romës, Daniele De Rossi.
Mediat angleze raportojnë se Roberto Mancini që një kohë të gjatë e përcjell mesfushorin e Romës dhe se tani ka ardhur momenti për hapin konkret.
Vet De Rossi siç dihet ka shprehur admirimin e tij ndaj futbollit anglez, duke aluduar kështu ndoshta te një kalim te gjiganti anglez që po tremb botën e futbollit me sukseset. 

Juventusi, ofertë astronomike për Cavanin

Gjiganti italian, Juventus, është i vendosur që të lansojë një ofertë për sulmuesin e Napolit, Edinson Cavani.
Il Corriere dello Sport raporton se Napoli është në gjendje që ta lëshojë Cavanin vetëm për 70 milionë euro.
Sidoqoftë, Juventusi e ka menduar një ofertë më të mirë. Bianconerët duan të ofrojnë 20 milionë euro dhe shërbimet e sulmuesve Sebastian Giovinco dhe Alessandro Matrit. 

Humphries: Kam dëshmi se Kim më ka tradhtuar

Ish burri i Kim Kardashian, Kris Humphries, ka thënë se ka dëshmi se ylli televiziv e kishte tradhtuar gjatë kohës sa ishin së bashku.
Sipas TMZ, basketbollisti këtë informatë ia ka dhënë ish-të dashurës së tij Myla (Fatmire) Sinanaj, të cilës i ka thënë se e dinte që Kim e tradhton me reperin Kanye West.
Këngëtari konsiderohej si mik i afërt i familjes edhe para se të lidhej zyrtarisht me bukuroshen, ndërkohë që dyshimet e Humphries kishin filluar qëkur ai nuk u shfaq në ceremoninë martesore.
Pas përfundimit të martesës 72-ditore me Kris Humphries, Kim Kardashian u hodh në krahët e Kanye West.

Si këndonte dhe vallëzonte Shakira 13-vjeçare (Video)

Këngëtarja kolumbiane, Shakira, që në moshën 13-vjeçare kishte një zë të bukur dhe po ashtu dinte të vallëzojë.
Këto ditë në YouTube është lansuar kënga “Magia”, të cilën e performon këngëtarja si e re.
Kjo këngë është përfshirë në albumin e parë të Shakiras nga viti 1991. 

Tony Parker të padisë ‘clubin’ ku u rrahën Drake dhe Brown

Tony Parker, ylli basketbollistik i kampionatit NBA pritet që ta padisë ‘clubin’ e natës W.I.P në New York, për lëndimet që ai i ka pësuar pas rrahjes së Chris Broën dhe Drake.
Basketbollisti po kërkon dëmshpërblim prej 20 milionë eurosh nga ky klub i natës, për shkak se ai ishte goditur me shishe në fytyrë duke dëmtuar rëndë syrin e tij.
Nëse Parker arrin të vërtetojë se klubi i natës ishte përqëndruar më shumë në marrjen e të hollave se kujdesin ndaj konsumatorëve, ashtu sikurse në faktin se nuk është dashur t’i lë në një vend Drake dhe Brown, atëherë dëmshpërblimin do ta fitojë pa problem francezi. 

Liami besnik ndaj të dashurës

Ish-banori i Big Brother Albania, Liami, kishte qenë pjesë e spekulimeve mediatike për jetën tij private. Shumë mediume shqiptare kanë raportuar se ai ishte ndarë nga e dashura Evelina, të cilës i propozoi martesë në finalen e Big Brother.
Ky duket të jetë një thashethem shumë i madh, pasi largimi i Evelinës drejt Gjermanisë ka bërë mediat të besojnë se ata mund të jenë ndarë .
“Unë kam një të dashur dhe ajo quhet Evelinë. Duke qenë se studion administrim-biznesi, ajo kishte për të dhënë ca provime. I kam dëgjuar thashethemet që fliten për jetën time, por do të bindeni se nuk jam ndarë”, ka theksuar Liami. 

Justin Bieber nuk rebelohet ndaj prindërve

Pop ylli amerikan, Justin Bieber, thotë se kurrë nuk është rebeluar ndaj prindërve të tij, por thotë të jetë i lumtur që është pjekur për t’i marrë vet vendimet.
18 vjeçari thotë se ai dëgjon çfarë i thotë nëna dhe babai, por e di se nëse nuk dëshiron të bëjë diçka nuk ka nevojë që të shtyhet me ta.
“Unë jam tani burrë. Unë jam pjekur shumë dhe jam rritur shumë. Tani jam një i rritur dhe kjo më jep më shumë liri. Unë nuk kam nevojë që të bëj atë që më thonë prindërit. Nuk kam nevojë që të shtyhem me ta për diçka. Nëse duhet të bëj diçka që ata nuk pajtohen, atëherë e bëj pa problem”, ka thënë Bieber.

Pjesëtarë të FSK-së shkollohen në Maqedoni

Komandanti i FSK-së, gjeneral-lejtnant Kadri Kastrati, tha se FSK-ja ka planifikuar që të dërgojë për shkollim katër vjeçar në Akademinë Ushtarake të Maqedonisë ushtarët serbë dhe boshnjakë të FSK-së.
Në kuadër të memorandumeve të bashkëpunimit me shtetet e rajonit, FSK-ja ka hartuar edhe planet konkrete për shkollimin e oficerëve të saj jashtë vendit.
Komandanti i FSK-së, gjeneral-lejtnant Kadri Kastrati, tha se FSK-ja ka planifikuar që të dërgojw për shkollim katër vjeçar ushtarët e FSK-së, serbë dhe boshnjak, në Akademinë Ushtarake të Maqedonisë.
“Jepet mundësia që edhe komunitetet jo shqiptare edhe komunitetit serb dhe boshnjak t’i prodhojmë oficerët e parë dhe të kemi kuadro të këtyre dy komuniteteve që për momentin janë deficitarë në FSK-së”, shpjegon general-lejtnant Kastrati.
Përveç nevojave të FSK-së për oficer nga minoritetet, shkak për shkollim jashtë vendit është edhe shkollimi jo adekuat i tyre dhe mos njohja e gjuhës angleze.
“Një prej detyrave tona dhe qëllimeve tona në të ardhmen si forcë multietnuike është që të përfshijmë edhe të gjitha komunitetet shqiptare dhe jo shqiptare, kjo nuk mjafton vetëm me ushtarë. Por, ne dëshirojmë që në të ardhmen në zhvillimin e karrierës të përfshijmë edhe komunitetet jo shqiptare, sidomos në këtë rast komunitetin boshnjak dhe serbë”, tha Kastrati, raporton RTK.
Ndërkaq, me 27 qershor do të bëhet edhe gradimi i radhës së kadetëve të rinj të FSK-së, bëri të ditur gjeneral Kastrati. Ai shtoi se FSK-ja si ushtri e Kosovës do të tregojë se është e gatshme dhe e vullnetshme që në kuadër të saj të përfshijë të gjitha komunitetet. 

Hoxhaj viziton Maqedoninë

Ministri i Punëve të Jashtme i Republikës së Kosovës, Enver Hoxhaj, nesër (e hënë) shkon në një vizitë zyrtare në Republikën e Maqedonisë.
"Gjatë qëndrimit në Shkup, ministri Hoxhaj do të zhvillojë takime me udhëheqësit e institucioneve të Maqedonisë, me përfaqësues të shoqërisë civile e të trupit diplomatik të akredituar në Maqedoni", thuhet në njoftimin për media të Ministrisë së Jashtme.
"Ministri Hoxhaj gjatë vizitës do të takohet me presidentin e Republikës së Maqedonisë, George Ivanov, me kryeministrin, Nikola Gruevski, homologun maqedonas, Nikola Poposki dhe zëvendëskryeministrin, Musa Xhaferi", thuhet në njoftim. 

Ekzekutivi kontrollon shërbimet që merr nga OJQ-të

Qeveria e Kosovës ka filluar hartimin një strategjie për përfshirje dhe bashkëpunim me shoqërinë civile. Strategjia është pjesë e obligimeve që ka marrë ekzekutivi i vendit për përmbushjen e detyrave që dalin si obligim nga Raporti i Progresit dhe pretendon të përfshijë shoqërinë civile në hartimin legjislacionit, dhe të kontrollojë shërbimet që ekzekutivi i blen nga OJQ-të.
Pas presioneve që kanë ardhur përmes raporteve të ndryshme ndërkombëtare për Kosovën, Qeveria ka vendosur të formalizojë bashkëpunimin me sektorin jo qeveritar.
Një strategji, e cila po punohet në bashkëpunim me platformën CIVIKOS, që përfshin mbi 100 organizata në rrjetin e saj, pritet t’i standardizojë format e partneritetit të Qeverisë me shoqërinë civile.
Valdete Idrizi, udhëheqëse e rrjetit CIVIKOS, thotë se strategjia do të hedh bazat e përfshirjes së shoqërisë civile në hartimin e ligjit, në transparencë e sidomos do të mundësojë edhe mbikëqyrjen rreth financimit.
“Shumë ministri japin para për OJQ në forma të ndryshme, por askush nuk e din kush merr. Tash me këtë strategji vendoset një lloj kriteri dhe transparence dhe dihet kush ofron dhe kush çka merr”, ka thënë Idrizi për Radio Kosovën.
Shefi i zyrës për qeverisje të mirë në Qeverinë e Kosovës, Abit Hajredini ka thënë se përmes kësaj strategjie, tani, jo vetëm që do të jetë e përfshirë shoqëria civile, por edhe do të kontrollohen shërbimet e blera nga OJQ-të.
Ndërsa, Driton Selmanaj nga Instituti Demokratik i Kosovës ka theksuar tri dimensione në të cilat shoqëria civile do të duhej të jetë e përfshirë.
“Për të pasur efekt strategjia duhet të fokusohej në çështje me shumë rëndësi për jetën e qytetarëve duke filluar nga informimi, pra qasja në dokumente, dialogu dhe krejt në fund partneriteti”, ka thënë Selmanaj për RTK.
Përmes kësaj strategjie që nuk është e para e këtij lloji, Qeveria pretendon të përmbush një prej detyrimeve të saj për të cilat ka pasur vërejtje edhe Raporti i Progresit i Komisionit Evropian.