Mourinho: Kush është Zeman?

Trajneri i Real Madridit, Jose Mourinho, nuk është tifoz i trajnerit të ri të Romës, Zdenek Zeman.
Zeman ka qenë kritik ndaj ish-trajnerit të Interit, i cili fitoi tre tituj në një sezon me Nerazzurrët në të kaluarën, dhe tash Mourinho ia ka rikthyer me tallje trajnerit çek.
“A jam unë i paditur? Më falni, por Zeman, kush është ky? Ku ka luajtur ai?”, ka tallur Mourinho pasi ka dëgjuar rikthimin e Zeman në Serie A. 

Messi: KURRË nuk do të luajë për Realin

Ylli i Barcelonës, Lionel Messi, ka rikonfirmuar se ai kurrë nuk do ta veshë fanellën e Real Madridit.
Messi i ka siguruar tifozët e Barcës se ai kurrë nuk do të lejojë përsëritjen e kundërthënieve pas transferimit të Luis Figos te Madridi.
“Kurrë nuk kam menduar për Real Madridin. Barcelona është shtëpia ime dhe do të doja ta kaloj të gjithë karrierën time të futboll atje, ndoshta mund të qëndroj derisa të pensionohem, shpresoj”, ka thënë Messi.

Nëna e Kim gisht në porno videon me Ray J?

Kris Humphries ka nxehur edhe më shumë atmosferën pas divorcit të tij nga Kim Kardashian, duke pohuar se ishte nëna Kris Jenner ajo që urdhëroi regjistrimin e porno videos së famshme vetëm e vetëm që ta bënte vajzën e saj të famshme.
Humphries thotë se Jenner jo vetëm se ishte regjisore e video xhirimit të famshëm, por madje edhe urdhëroi ri-regjistrimin e videos, pasi video e parë nuk ishte mjaft e mirë.
Këto pohime sensacionale të Humphries janë bërë gjatë një bisede të tij me ish të dashurën, shqiptaren Fatmire Sinanaj, raporton TMZ.
Burimet nga ana tjetër bëjnë të ditur se Fatmire Sinanaj ka numër të konsiderueshëm të mesazheve në të cilat Kris Humphries i thotë se ajo është dashuria e jetës së saj dhe ku thotë se mezi pret kompletimin e divorcit nga Kim.
Tashmë ky konflikt sipas mediave amerikane pritet të zhvendoset në gjykata, sepse këto mesazhe të shqiptares e dëmtojnë rëndë imazhin e Kris Jenner dhe të Kim Kardashian. Këto të fundit i kanë mohuar plotësisht pohimet e basketbollistit Humphries.
Kim Kardashian momentalisht është në lidhje me superyllin Kanye West.

Stresi publikon dissin për Noizyn

Edhe pse ishte arrestuar, kjo nuk e ka shqetësuar aq shumë reperin e Babastars, Stresi, i cili ka publikuar dissin e paralajmëruar kundër Noizyt.
Ishte fillimisht lideri i OTR ai që lansoi dy diss këngë ndaj Babastars, duke e shpjerë konfliktin në një dimension tjetër, të cilit tashmë i ka dhënë formë Stresi.
Stresi, i cili njihet për konfliktin me Noizyn, ka përdorur vargje të rënda dhe të dhunshme kundër rivalit të tij, por nuk ka prekur në familje, me ç’rast ka respektuar dhe paktin e tyre në polici të arritur dy vite më parë. 

Rita Ora demanton lidhjen me Chris Brown

Pasi Rita Ora dhe Chris Brown ishin fotografuar së bashku derisa kishin dalë nga një klub nate në Londër, ishte shkruar për një lidhje të mundshme dashurie mes tyre.
Mirëpo, Rita ka reaguar shpejt duke deklaruar se kjo nuk është aspak e vërtetë dhe se ajo me Chrisin janë vetëm shokë dhe asgjë më shumë.
“Ka filluar të flitet se unë dhe Chris jemi në lidhje, por kjo nuk ka të bëjë me realitetin. Unë dhe Chris jemi miq të mirë dhe e respektojmë njëri-tjetrin. Pra mes nesh ka vetëm miqësi dhe asgjë më shumë”, është shprehur Rita

Të lahesh pa përdorur ujë

Duke marrë shkas nga një shok që s’kishte fort qejf të lahej dhe me disa muaj kërkime në internet, studenti afrikano-jugor Ludwick Marishane shpiku një mënyrë për t’u larë pa përdorur ujë.
22-vjeçari, student në Universitetin e Cape Town, ka shpikur një produkt të quajtur “Dry Bath” (Banjë e thatë), një xhel që përdoret në lëkurë dhe bën punën e ujit dhe sapunit.
Shpikja, që e shpërbleu Marishane me çmimin e studentit më të mirë sipërmarrës global, ka përdorim të gjerë në Afrikë dhe në vende të tjera në zhvillim, ku higjiena bazike është në nivele të ulëta dhe miliona njerëz vuajnë mungesën e ujit.
Ky produkt ndryshon nga ata që përdoren për pastrimin e duarve, pasi nuk e ka aromën e alkoolit. Ai formon një shtresë të hollë e të lagësht që pastron lëkurën dhe nuk ka erë.
22-vjeçarit i erdhi ideja një ditë dimri në shtëpinë e tij të varfër në fshat, kur një shok i tha se e lara ishte bezdi e madhe në mungesë të ujit të ngrohtë. “Ai përtonte dhe shpesh thoshte ‘pse dikush nuk shpik diçka që thjesht ta vësh në lëkurë e të mos kesh pse të bësh banjë?’”, ka treguar Marishane.
Ai filloi menjëherë të kërkojë me anë të telefonit të tij në Google dhe Wikipedia për të gjetur formulën. Gjashtë muaj më pas shpiku “Dry Bath”, për të cilin siguroi edhe një patentë.
Produkti ka filluar të përdoret nga kompanitë e fluturimit për udhëtimet e gjata dhe nga qeveritë për ushtarët në front.
Marishane thekson se produkti i tij do të ndihmojë në kursimin e ujit në pjesët e varfra të globit.

Jenkins: Kosova ka perspektivë euroatlantike

Ministri i Punëve të Jashtme i Republikës së Kosovës, Enver Hoxhaj, priti të enjten në një takim, drejtorin për Ballkanin Perëndimor dhe Zgjerimin e BE-së në Zyrën e Jashtme dhe të Commonwealth britanik (FCO), Owen Jenkins.
Ministri Hoxhaj e ka falënderuar diplomatin Jenkis për mbështetjen që ai dhe shteti i tij kanë dhënë për Republikën e Kosovës në shtetndërtimin e brendshëm dhe në konsolidimin ndërkombëtar të saj.
Ministri Hoxhaj e njoftoi diplomatin britanik për progresin që po arrihet në Kosovë, avancimin e proceseve të brendshme dhe forcimin e vazhdueshëm të subjektivitetit ndërkombëtar të Republikës së Kosovës.
Në anën tjetër, drejtori për Ballkanin Perëndimor dhe Zgjerimin e BE-së në Zyrën e Jashtme dhe të Commonwealth britanik shprehu vlerësimin për reformat që janë ndërmarr në Republikën e Kosovës dhe shprehi bindjen se Kosova ka perspektivë të qartë euroatlantike.

Përse në Serbi po fshihen detajet për Kosovën?

Opinioni në Serbi mësoi indirekt se për çfarë është rënë vërtetë dakord mes Beogradit dhe Prishtinës. Kjo është një shenjë që tregon se politikanët nuk e kanë kuptuar seriozisht mesazhin nga zgjedhjet e kaluara.
Ndërmjetësuesi i Bashkimit Evropian në dialogun mes Beogradit dhe Prishtinës Robert Cooper vizitoi Beogradin, para së gjithash për të inkurajuar vazhdimin e dialogut teknik, vlerëson analisti politik Dusan Janjic.
“Një tjetër arsye që është specifike për Beogradin, sepse ajo nuk vlen për Prishtinën, është se autoritetet lokale, në veçanërisht presidenti serb dhe kabineti i tij duhet të njihen me të dhënat dhe bisedimet e deritanishme. Gjithashtu, ai dëshiron t’i informojë ata për detyrimet që kanë mbetur, si në nivelin e zbatimit ashtu dhe në çështjet që duhet të trajtohen. Pra, në tërësi unë mendoj që kjo së bashku me vizitën në Prishtinë është paralajmërim i vazhdimit të dialogut teknik”, thotë Janjic.
Profesori i shkencave politike Predrag Simic thotë për Deutsche Welle se vizita e Cooper-it është para së gjithash njohje me partnerët e rinj politikë, kryesisht për arsye se Serbia ka një president të ri. Në këtë kontekst, vëren Simic, befasia më e madhe është ndoshta lajmi që Tomislav Nikolic është i gatshëm të takohet me presidenten e Kosovës, Atifete Jahjaga.
“Por, siç më duket mua, ky takim mund të kryhet vetëm me intonimin e dy himneve shtetërore dhe kjo do të nënkuptonte njohjen formale të Kosovës nga ana e Beogradit. Kështu që ne kemi tani shumë konfuzion, dhe unë mendoj se të paktën në këtë pikë, autoritetet në Beograd nuk kanë përgjigje të mjaftueshme lidhur me çështjen se cila është politika e re, përkatësisht politika e ardhshme e Beogradit ndaj Kosovës”, thekson Simic.
Kur është fjala për atë se çfarë është rënë dakord mes Beogradit dhe Prishtinës në këtë dialog, rezulton se opinioni serb në mënyrë indirekte është informuar për detajet e këtyre marrëveshjeve. Vetëm kur u paraqitën pengesa për formimin e qeverisë, kreu i Partisë Socialiste të Serbisë, Ivica Dacic (SPS) njoftoi për hapjen e një zyre të Prishtinës në Beograd dhe anasjelltas, si dhe për një kod të ri telefonik për Kosovën.
Janjic beson se Dacic si anëtar i qeverisë do të duhej të ishte i informuar për këto çështje dhe se është abuzim politik që shfrytëzohet fakti se Borislav Stefanovic e ka kryer keq punën e tij. “Por që të jemi të qartë, ai e ka kryer keq punën e tij sepse ashtu e ka udhëhequr Boris Tadic. Ky i fundit e ka thënë qartë edhe në Kuvendin e Serbisë se ishte ai që duhej fajësuar, dhe se ai i udhëheq të gjitha këto negociata. Prandaj tani ekziston ideja e bashkësisë ndërkombëtare që bisedimet të zhvillohen në një nivel më të lartë në mënyrë që askush të mos të fshihet pas zyrtarëve më të ulët”, thotë Janjic.
Problemi është se ky lloj i mostransparencës nuk e dëmton vetëm Boris Tadicin dhe Borisllav Srefanovicin, por edhe interesat e Serbisë, paralajmëron Janjic. Tani shtrohet pyetja përse ata vendosën për të fshehur disa gjëra dhe të manipulojnë me ato, ka thwnw Janjic për Deutsche Welle.
“Arsyeja e parë është kuptimi i tyre i përgjithshëm i politikës si marketing. Një tjetër arsye është diçka që Tadic në njëfarë mënyre kishte marrë për obligim para disa vitesh me deklaratat e tij se ai do të gjejë një zgjidhje për Kosovën që do t’i kënaqte të gjithë, duke përfshirë këtu edhe Brukselin dhe Uashingtonin. Ai nuk kishte një zgjidhje të tillë kështu që mund të thuhet se ka bërë blof e si rrjedhojë zgjidhja e fundit duke e komplikuar çështjen është konsideruar të jetë gjëja më e mirë...”, ka thënë Janjic. 

Zyra administrative në veri nuk do të jetë politike

Një ditë pas emërimit në postin e shefes së Zyrës Administrative për veriun e Mitrovicës, Adrijana Hodzic ka thënë se kjo zyre nuk do të jetë politike, por do të ketë qëllim t’u dal në ndihmë qytetarëve serbë të veriut të Mitrovicës.
Hodzic i ka bërë këto komente gjatë një interviste për programin në gjuhen serbe në radion Blue Sky. “Unë mund të garantoj se ne do të veprojmë në planin teknik dhe praktik. Do të punojmë me qytetarët dhe politikën do ta lëmë për nivelin e lartë. Shpresoj se të gjitha palët si ajo e Beogradit dhe udhëheqja lokale që vepron në veri të Mitrovicës të mendojnë se kjo që unë po them është e vërtetë. Nuk kisha dashur që të politizohet kjo zyrë sepse në të vërtetë ne jemi këtu që qytetarëve t’ua mundësojmë një të ardhme më të mirë”, ka thënë Hodzic, raporton RTK.
Hodzic ka thënë se detyrë kryesore e kësaj zyre do të jetë ndihma për serbët e veriut të Mitrovicës në zgjidhjen e problemeve që kanë. Ajo gjithashtu ka thënë se zyra që ajo do të udhëheqë respekton dialogun Prishtinë-Beograd, por ka mohuar që si zyre të jetë pjesëmarrëse në këtë proces.
“Qëllim i kësaj zyre është që t’u dal qytetarëve përballë të gjitha kërkesave të e tyre. Natyrisht kjo zyrë do të respektoj dialogun mes Prishtinës dhe Beogradit dhe konsiderojmë se pjesëmarrja jonë në atë dialog e vështirëson njërën apo anën tjetër të sjellin zgjidhje të vërteta që mund të ndikojnë në kualitetin e jetës së qytetarëve”, ka thënë ajo. 

Jahjaga takoi një delegacion nga Bosnja dhe Hercegovina

Presidentja e Republikës së Kosovës, Atifete Jahjaga, priti të enjten një delegacion nga Bosnja dhe Hercegovina, i përbërë nga parlamentarë, analistë, artistë, përfaqësues të shoqërisë civile dhe të mediave, ndërsa me këtë rast Jahjaga tha se në kuadër të procesit të decentralizimit, nga i cili kanë përfituar komunitetet e tjera në Kosovë, së shpejti do të mund të krijohet edhe një komunë ku komuniteti boshnjak përbën shumicën.
Gjatë takimit, Jahjaga ka theksuar se e ardhmja e Kosovës dhe e Bosnjë Hercegovinës, dy vendeve që kanë pasur një histori të rëndë dhe të dhimbshme, është integrimi në strukturat e NATO-s dhe të BE-së.
Ajo tha se integrimet euro-atlantike janë synim i të gjitha vendeve të rajonit dhe ato duhet ta ndihmojnë njëra tjetrën në këtë rrugë.
Presidentja me këtë rast vlerësoi se Kosova është bërë faktor paqeje dhe stabiliteti dhe po ndërton marrëdhënie të mira me të gjitha vendet e rajonit, ndërsa sipas saj, Bosnja e Hercegovina duhet të mundësojë qarkullimin e lirë të qytetarëve dhe të mallrave nga Kosova.
Ajo tha se Kosova është shtet i ndërtuar mbi parimin qytetar, që respekton të drejtat dhe liritë të të gjitha komuniteteve dhe vlerësoi angazhimin dhe përfshirjen e komunitetit boshnjak në jetën institucionale në vend.
Presidentja Jahjaga tha se në kuadër të procesit të decentralizimit, nga i cili kanë përfituar komunitetet e tjera në Kosovë, së shpejti do të mund të krijohet edhe një komunë ku komuniteti boshnjak përbën shumicën. 

Kushtet shtesë për Serbinë lidhur me Kosovën

 Pohimet e politikanëve serb se BE-ja nuk i ka caktuar Serbisë kushte të reja të ndërlidhura me Kosovën, janë vetëm formale. Ato kushte janë përsëritur disa herë nga zyrtarë të BE-s, shkruajnë mediet serbe.
E kushte shtesë për Beogradin, nëse dëshiron vazhdim të rrugës së euro-integrimit, janë: - Zbatimi i marrëveshjeve të deritanishme midis Beogradit dhe Prishtinës (të cilat Beogradi, Prishtina dhe Brukseli i komentojnë në mënyra të ndryshme); Shpërbërja e institucioneve paralele në veri të Kosovës, e ku mendohet për institucionet arsimore dhe shëndetësore; Hapja e zyrës së Beogradit në Prishtinë dhe të Prishtinës në Beograd; Pezullimi i gjykatës në veri të Mitrovicës; Kodi i veçantë telefonik për Kosovën si dhe takimi në nivelin më të lartë midis Beogradit dhe Prishtinës.
Gazeta serbe “Politika”, shkruan se është e vërtetë që të gjitha këto nuk janë qëndrime zyrtare të Komisionit Evropian, por është e vërtetë që ato i janë thënë palës serbe disa herë si qëndrime të shteteve më me ndikim të Bashkimit Evropian, transmeton “Express”.
Aleksander Vucic, ushtrues i detyrës së kryetarit të Partisë Përparimtare të Serbisë, dje ka pohuar se hapja e zyrave nuk është kusht i BE-së, por që për to bisedohet prej dy-tre vjetësh.
Po sipas kësaj gazete, Maja Kocijancic, zëdhënëse e përfaqësuese së lartë për politikë të jashtme dhe siguri të BE-së, Catherine Ashton, ka deklaruar se BE nuk ka përcaktuar kushte të reja për afrim të Serbisë kah BE-ja, por njëkohësisht ka përmendur qëndrimin e Këshillit Evropian i cili nga Serbia kërkon që nëpërmjet hapjes së dialogut të arrijë përmirësim të dukshëm dhe të qëndrueshëm të marrëdhënieve me Kosovën.
Nuk janë të rastësishme as qëndrimet e Ivica Dacicit, shkruan kjo e përditshme, i cili në këto momente mban litarët në duar kur është në pyetje formimi i qeverisë së ardhshme.
“Mendoni se do të mundemi në qeverinë e cila pas tri ditësh do të thotë se duhet hapur zyra e qeverisë së Serbisë në Prishtinë dhe e qeverisë së Kosovës në Beograd”, është shprehur Dacic, lider i Partisë Socialiste të Serbisë.

Franca mbështet përfundimin e pavarësisë së mbikëqyrur

Franca mbështet Qeverinë e Kosovës në procesin e përfundimit të pavarësisë së mbikëqyrur.
Kështu u tha në takimin ndërmjet zëvendëskryeministrit, njëherësh ministër i Drejtësisë, Hajredin Kuçi dhe ambasadorit francez në Kosovë, Jean Francois Fitou.
Në këtë takim, po ashtu u bisedua edhe për bashkëpunimin politik në mes të Republikës së Kosovës dhe asaj të Francës, ndërsa vëmendje e veçantë iu kushtua bashkëpunimit në fushën e drejtësisë, ku ministri Kuçi kërkoi mbështetjen e shtetit francez në themelimin e Akademisë së Drejtësisë.

Kryeqyteti do të bëhet me muze të holokaustit të shqiptarëve

Kryetari i Prishtinës, Isa Mustafa ka deklaruar të enjten se Komuna e Prishtinës ka marrë iniciativën për krijimin e Muzeut Memorial në të cilin përmes dokumenteve, fotografive, video incizimeve, shkresave të ndryshme, do të argumentohej se çfarë ka ndodhur në fund të viteve të '90-ta këtu, tendencën që të bëhet shpërngulja/eksodi masiv i popullatës se Kosovës nga ana e forcave pushtuese serbe.
Mustafa këto deklarata i bëri në Arkivin e qytetit të Prishtinës, ku përuroi raftet e reja të arkivit që janë blerë me mjete të buxhetit komunal.
“"Ne këto ditë do të marrim iniciativën në Kuvendin Komunal që në vitin e ardhshëm ta ndërtojmë një muze, i cili do të jetë muze memorial, që do të përfshinte të gjitha ngjarjet e fundit të eksodit të popullsisë së Kosovës. Këtë muze do ta ndërtojmë afër stacionit të trenit, vendit prej nga janë deportuar qytetarët tanë. Do të mundësojmë që përmes fotografive, teksteve, dokumenteve, video prezantimeve dhe përmes ligjëratave, që do të mbahen, t'i informojmë qytetarët e Prishtinës, Kosovës dhe ndërkombëtarët se çfarë ka ndodhur në fund të viteve të '90-ta këtu, me tendencën që të bëhet shpërngulja masive e popullatës se Kosovës dhe të organizohet eksodi i popullatës", theksoi Mustafa, njofton “Koha”.
"Ne këtë duhet ta argumentojmë para qytetarëve, para familjeve që u ka ndodhur tragjedia me rastin e eksodeve, vrasjeve, torturave të ndryshme, por edhe para ndërkombëtarëve në mënyrë që të mbetet një histori e prezantuar në një muze të cilin ne do ta bëjmë me mjetet të Komunës së Prishtinës", tha ndër të tjera Mustafa. 

MPB: Raporti i Departamenti amerikan për Kosovën objektiv

Ministria e Punëve të Brendshme e ka vlerësuar objektiv raportin e Departamentit amerikan të shtetit për trafikim me qenie njerëzore në Kosovë, që thotë se vendi është burim, destinacion dhe ndoshta vend transit për gratë dhe fëmijët që janë viktima të trafikimit për seks, dhe për fëmijët që i nënshtrohen lypjes së detyruar
Zëvendësministri i Punëve të Brendshme, Sasa Rasic ka mbajtur në konferencë për media lidhur me këtë çështje.
“Ministria e Punëve të Brendshme e mirëpret raportin e Departamentit Amerikan të Shtetit, i cili është publikuar dje, lidhur me situatën në Kosovë, sa i përket luftës kundër trafikimit me qenie njerëzore. Raporti është objektiv dhe ka gjëra të cilat mund të përmirësohen dhe disa veç janë përmirësuar që nga dita e përpilimit, deri në ditën e shpalljes së raportit”, ka thënë zv/ministri.
“Ne kemi arritur të analizojmë mirë raportin dhe mund të ju them se Qeveria e Kosovës është e përkushtuar në luftën kundër trafikimit me qenie njerëzore. Jemi të vendosur që me të gjitha forcat dhe mjetet në mënyrë institucionale të luftojmë kundër kësaj dukurie, e cila drejtpërsëdrejti cenon dinjitetin njerëzor”, tha zëvendësministri Rasic.
Koordinatori Nacional Kundër Trafikimit me Qenie Njerëzore, Sasa Rasic, tha se qëllimi Qeverisë së Kosovës është që t’i mbrojë të gjithë qytetarët e Kosovës, në mënyrë që vendi të jetë i sigurt.
Kosova është gjithnjë burim, vend transit i mundshëm dhe destinim i trafikimit me qenie njerëzore. Numri më i madh i viktimave të trafikimit në Kosovë janë viktima me qëllim të eksploatimit seksual, por gjithashtu dhe eksploatimit në punë, por është edhe një dukuri që po vërehet kohëve të fundit, ajo e fëmijëve që kërkojë lëmoshë.
“Ne kemi bazën ligjore, ku ekzistojnë dokumente strategjike dhe operative dhe ne merremi me aktivitete të përditshme duke u përpjekur t’i përmbushim objektivat tona të parapërcaktuara. Do të vazhdojmë me gjitha kapacitetet tona të cilat gjithnjë e më tepër jemi duke i forcuar. Në këtë aspekt ekziston edhe dimensioni politik, sepse lufta kundër kësaj forme të krimit të organizuar ndërlidhet edhe me integrimet evropiane, liberalizimin e vizave etj”, theksoi Rasic.
Zëvendësministri Rasic tha se Qeveria e Kosovës ka arritur që të përmbush të gjitha standardet, por janë duke bërë përpjekje të vazhdueshme që kjo të reflektohet edhe në këtë raport.
Ai tha se ajo që deri diku është negative në raport është procedimi i lëndëve të atyre që janë të përfshirë në trafikim, si kryes të veprës dhe të përshirë në vepra penale që ndërlidhen me trafikimin e qenieve njerëzore.
Ndryshe, raporti i Departamentit amerikan të shtetit, në pjesën kushtuar Kosovës thotë se vendi është burim, destinacion dhe ndoshta vend transit për gratë dhe fëmijët që janë viktima të trafikimit për seks, dhe për fëmijët që i nënshtrohen lypjes së detyruar. 

Nuk prishet BMW-ja kështu! (VIDEO)

Nuk dihet nëse shoferi ishte i pirë apo nuk i punonin frenat por ajo që dihet është se për ta rregulluar këtë BMW që ju shihni në video pas aksidentit kërkon shumë para.
Video është regjistruar në një rrugë në Azerbajxhan teksa një BMW X6 ka goditur një makinë të ndaluar në kryqëzim duke prodhuar një aksident zinxhir. 


Është një kërpudhë!? Jo, në fakt, lodër seksuale (Video)

Një prezantuese televizive në Kinë ka mbetur me fytyrë të skuqur pasi e ka gabuar një lodër seksuale me një ‘kërpudhë të rrallë’.
Fshatarët nga Liucunbu të qytetit kinez Xi'an e zbuluan objektin e çuditshëm, ndërkohë që po groponin – raporton Shanghaiist.
“Kishte një hundë dhe një sy, por nuk e kemi idenë se çfarë është”, ka thënë njëri.
Ata vendosën ta thirrin televizionin lokal për ndihmë, ndërsa reporterja e re Ye Yunfeng u paraqit menjëherë në vendin e ngjarjes.
“Mund të themi se ka diçka si gojë, ndërsa nga ana tjetër është një vrimë, e cila lidhet deri në fund me pjesën tjetër. Është shumë e lëmuar. Ka ndjesinë e mishit”, deklaroi prezantuesja.
Më tej ajo tha se ishte një kërpudhë e rrallë mjekësore, e cila kishte nevojë për kushte specifike për t’u rritur.
Mirëpo, një numër shikuesish e thirrën stacionin televiziv për të treguar se “kërpudha misterioze” ishte në fakt një lodër seksuale për meshkuj.
Një ditë më pas, stacionin televiziv lëshoi një kumtesë kërkimfaljeje për gabimin e reporteres së tyre. 

Kush është më frikacaku? (VIDEO)

Të gjithëve na ka ndodhur t'i çojmë fëmijët në vende të ndryshme pë tu argëtuar. Dhe ndodh shpesh që fëmijët kanë frikë nga lojra të ndryshme.
Një video interesante në internet, në fakt na tregon një situatë krejt ndryshe nga e zakonshmja. Babai i vajzës frikësohet më shumë se e bija.


Qëndron mbi shina, treni i kalon lartë (VIDEO)

Djaloshi që ju shikoni në videonuk ka frikë nga treni edhe nëse ai kalon sipër, mjafton që ai të mos e shtypë. 
Video është regjistruar në një hekurudhë në Kanada teksadjaloshi qëndron mbi shina gjatë momentit që mbi to kalontreni.

Nderohet vepra e dëshmorit të kombit, Ilir Konushevci

Në kazermën “Adem Jashari” të Komandës së Forcave Tokësore të FSK-së në Prishtinë, është nderuar vepra e dëshmorit të kombit, gjeneralmajorit Ilir Konushevci, në 43 vjetorin e lindjes së tij.
Në manifestimin e organizuar për nder të ditëlindjes së dëshmorit Ilir Konushevci, morën pjesë familjarë të dëshmorit, zëvendëskomandanti i KFT-së, gjeneralbrigade Gëzim Hazrolli, oficerë dhe bashkëluftëtarë të Ilirit.

Për veprën dhe heroizmin e dëshmorit foli zëvendëskomandanti i KFT-së, gjeneralbrigade Gëzim Hazrolli, i cili tha se kontributi i Ilir Konushevcit gjatë luftës është shumë i madh, sidomos në organizimin dhe themelimin e Logjistikës të Ushtrisë Çlirimtare të Kosovës, pastaj në udhëheqjen e luftës si ushtar dhe si gjeneral.
“Vepra e gjeneral Konushevcit edhe sot është shembull për ne, se si duhet organizuar dhe furnizuar çdo ushtri, komandë, batalion dhe njësit. Edhe në të ardhmen gjeneral Ilir Konushevci do të mbetet shembull i organizatorit dhe strategut të shquar gjatë luftës sonë Çlirimtare. Ai do mbetet shembull edhe për ne pjesëtarët e FSK-së. Ne sot po përkujtojmë me pietet punën dhe veprën e tij të madhe, që dha për Lirinë e Kosovës”, tha Hazrolli.
Bashkëluftëtarët e familjarë, ushtarë dhe oficerë të FSK-së, vendosën lule dhe bënë nderime para bustit të dëshmorit të Kombit Ilir Konushevci. 

Stefanovic: Në radhë çështjet politike

Dialogu me Prishtinën do të udhëhiqet nga një nivel më i lartë shtetëror, ka thënë shefi i delegacionit serb në bisedime, Borislav Stefanovic. Ai ka thënë se dialogu teknik me Prishtinën ka dhënë rezultate konkrete, porse “tash në radhë janë çështjet politike, si veriu i Kosovës, mbrojtja e serbëve në jug të lumit Ibër, statusi i manastireve dhe kishave serbe dhe pronat”.
Në një konferencë shtypi në Qeverinë e Serbisë, Stefanovic e ka kritikuar ndërmjetësin e BE-së në bisedime, Robert Cooper, duke thënë se diplomati evropian interpreton disa marrëveshje “ashtu si i konvenon Prishtinës”, transmeton Rel.
Dy palët, në nëntë raunde negociatash, kanë arritur shtatë marrëveshje, por zbatimi i tyre thuhet të ketë ngecur.
Cooper sot po qëndron në Beograd, kurse nesër do të vizitojë Prishtinën.
Vazhdimi i dialogut pritet të ndodhë pas formimit të Qeverisë së re të Serbisë, e cila do të pasojë zgjedhjet parlamentare të 6 majit.

VV i shkruan amerikanëve për vdekjen Dino Asanajt

Lëvizja Vetëvendosje kërkoi të mërkurën të zbardhet vdekja e drejtorit të Bordit të Agjencisë kosovare të privatizimit, Dino Asanaj, ndërsa lidhur me këtë çështje, Vetëvendosje do t’i shkruajë edhe zyrtarëve amerikanë.
Sipas Vetëvendosjes, duke ditur ndjeshmërinë e postit të tij, afërsinë me politikanë, aferat e shumëpërfolura të shpronësimit të popullit të Kosovës për përfitime private dhe akuzat e muajve të fundit hapën shumë rrugë për spekulime, pyetje dhe drejtime gishtash, mirëpo gjithmonë me frikën se diçka e tillë mund të ndodhë në Kosovë për çfarëdo arsye.
“Nga lajmërimet e gazetarëve nga Qendra Klinike Universitare ku së paku kuptohej gjendja dhe plagët e të ndjerit, përnjëherë u kalua në një terr informativ që filloi të duket si një përmbyllje e shpejtë e rastit e që për pasojë kishte frikësimin e mëtutjeshëm të qytetarëve, mosbesimin në institucione, kësaj radhe përfshi këtu edhe institucionet shëndetësore e deri të mosbesimi se institucionet e rendit dhe ligjit në Kosovë si shumë herë më parë nuk do të arrijnë të zbardhin këtë krim të mundshëm”, thuhet në kumtesë.
“Për të shtuar rrugët e spekulimeve, Dino Asanaj u varros menjëherë të nesërmen me një nguti të paparë në raste të tilla jo vetëm në Kosovë, për të shtuar pyetjet dhe dyshimet e qytetarëve mbi arsyet e vërteta të këtij krimi dhe prapaskenave të mundshme të (vetë)vrasjes se Asanajt”, vlerëson Vetëvendosje.
Sipas kësaj lëvizje, një konsultim i thjeshtë me ekspertë të pavarur gjyqësorë dhe mjekësorë tregon se në raste të tilla të një vdekje misterioze pas 11 plagëve me thikë, pas ndërrimit të duarve me të cilin është goditur viktima, pas gjetjes së barnave në tavolinën e tij, tregon se obduksioni, hetimi dhe analiza e rrethanave (raportet toksikologjike etj.) do të kërkonin shumë më shumë kohë para se i ndjeri të varrosej.
“Kështu qytetarët dhe populli i Kosovës vazhdojnë të ballafaqohen me pyetje dhe frikë edhe më shumë se më herët. Vazhdojnë të ngrenë mosbesimin në institucionet e Republikës së Kosovës për t’u marrë me ligj dhe drejtësi. Kësaj radhe vetëm duke iu shtuar akterët dhe institucionet për të përmbyll edhe një rast të madh të krimit të mundshëm që mund të ndodhë në mes të ditës në cilindo qytet të Kosovës. Për të forcuar shtetin e Kosovës, sundimin e rendit dhe ligjit, lëvizja Vetëvendosje ! kërkon transparencë në zbardhjen e rastit të vdekjes së Dino Asanaj. Meqenëse tanimë është lëkundur edhe besimi në institucionet e mjekësisë ligjore, dhe meqenëse Dino Asanaj ishte edhe shtetas amerikan, kërkojmë që ekspertë të pavarur të mjekësisë ligjore të Shteteve të Bashkuara të Amerikës të bëjnë një vlerësim të pavarur të rrethanave dhe shkaqeve të vdekjes së Dino Asanajt”, thuhet në kumtesën e Vetëvendosjes.
Këtë kumtesë, Vetëvendosje njofton se do t’ia dërgojë edhe zyrtarëve të shtetit amerikan, përfshirë këtu edhe disa kongresistë e senatorë.

Adriana Hoxhic, emërohet drejtoreshë e Zyrën Administrative në veri

E plotësuar - Qeveria e Kosovës ka miratuar propozim-vendimin e Komisionit për emërimin e drejtoreshës së Zyrës Administrative në veri të Mitrovicës dhe me shumicë votash ka emëruar në këtë fuksion Adriana Hoxhicin.
Në mbledhjen e sotme të Qeverisë, kryeministri i vendit, Hashim Thaçi ka shprehur falënderimet për ministrin e Pushtetit Lokal, Slobodan Petrovic për punën që ka bërë.
Ministri, Petrovic ka thënë se Komisioni ka punuar intensivisht dhe ka nxjerrë si kandidate më të suksesshme, Adriana Hoxhic.
Në garë për këtë pozitë kanë qenë 7 kandidat, ndërkohë ka bërë të ditur se 55 zyrtarët e tjerë do të emërohen në ditët në vazhdim, pasi që ka qenë numër i madh i aplikantëve.
Hoxhic, deri më tash, ka qenë shefe e ekipit përgatitor për formimin e komunës së Mitrovicës së Veriut.
Zyrtarë të Qeverisë së Kosovës kanë thënë më herët se Zyra Administrative në veri do të hapet deri në fund të këtij muaji./Telegrafi/
Adriana Hoxhic, shefe e Zyrës në veri?
(14.55) Adriana Hoxhic është emri i vetëm i propozuar për shefe të Zyrës Administrative për veriun e Mitrovicës nga Qeveria e Kosovës. Ndërsa ajo nuk e ka pohuar, por as mohuar një gjë të tillë.
“Është e vërtetë se kam konkurruar për udhëheqëse të Zyrës, por akoma nuk kam marrë ndonjë përgjigje në lidhje me këtë”, ka thënë Hoxhic .
Nëse emri i saj kalon edhe zyrtarisht në mbledhjen e Qeverisë, e cila është duke u mbajtur, ajo do të jetë përgjegjëse për organizimin e punës dhe funksionimin e kësaj Zyre të formuar me vendim të Qeverisë së Kosovës muajin e kaluar. Shefi i kësaj Zyre do të ketë kompetenca të njëjta me kryetarët e komunave të vendit, ndërsa detyrë e Zyrës do të jetë të ofrojë të gjitha shërbimet për qytetarët dhe të koordinojë aktivitetet, si dhe investimet në këtë pjesë të Kosovës.
Ndryshe, Zyra në fillim do të përbëhet nga 7 drejtori me gjithsej 55 të punësuar, ndërsa parashihet që më vonë në këtë Zyrë të punësohen edhe 25 punëtorë tjerë. Buxheti vjetor i saj do të jetë 4 milionë euro, të cilat do të shërbejnë për shërbime elementare dhe infrastrukturë të objekteve në veri të Mitrovicës. 

Higuain aludon në rikthim te River Plate

Sulmuesi i Real Madridit, Gonzalo Higuain, ka aluduar se ai mund të transferohet te gjiganti argjentinas, River Plate gjatë kësaj vere.
24 vjeçari ka shënuar 15 gola në 35 paraqitje për skuadrën nga Buenos Aires, para se të kompletonte kalimin e tij në Madrid në janar të vitit 2007.
“Unë kam pasur një periudhë të vogël si lojtar te River Plate dhe ua kam borxh një rikthim. Më pëlqen Argjentina. Në Spanjë, ka shumë femra të bukura, por më pëlqejnë argjentinaset”, ka thënë Higuain.

Interi shumë pranë Silvestres

Presidenti i Palermos, Maurizio Zamparini, ka konfirmuar se është shumë pranë marrëveshjes me Massimo Morattin që Matias Silvestre të kalojë te Interi.
27 vjeçari, i cili kaloi një sezon të shkëlqyer te Palermo ka bërë të ditur se dëshiron të largohet dhe si duket oferta prej 7 milionë eurosh për mbrojtësin nga Massimo Moratti është pranuar.
“Unë jam takuar me Massimo Morattin. Ne kemi biseduar për argjentinasin Silvestre dhe jemi të pajtimit. 99% marrëveshja do të arrihet. Do të jetë një transfer prej 8 deri në 10 milionë euro”, ka thënë Zamparini për një radio italiane.

Wenger: Serie A nuk është për Van Persien

Menaxheri i Arsenalit, ka hedhur mundësinë që sulmuesi Robin Van Persie të largohet nga klubi për të luajtur në Serie A.
E ardhmja e holandezit në Emirates vazhdon të mbetet e paqartë, me kontratën e tij që skadon verën e ardhshme dhe me bisedat për vazhdimin e saj që po zhvillohen me një rritëm të ngadalshëm.
Juventusi është lidhur me një transferim të holandezit së fundi, por Wenger ka hedhur poshtë këto spekulime, duke thënë se liga italiane nuk është e nivelit të Van Persiet.
“Në Itali ka probleme të mëdha dhe liga juaj është në një nivel më të ulët se Liga Premier. Serie A është në nivelin më të ulët tash”.
“Nuk ka arsye pse një lojtar i shkëlqyeshëm si Van Persie të vijë dhe të luajë me ju, në Itali, në ligën tuaj. Lojtarët paguhen më mirë në Angli, ju nuk keni dëgjuar për kontratat e reja televizive?”.
“Liga italiane dikur ishte e jashtëzakonshme, dhe mbaj mend mirë, kur liga kishte 16 ekipe dhe secili kishte kampionin e vet. Tashmë kjo nuk është rast”, ka thënë Wenger për Corriere dello Sport.

Napoli 18 milionë për Doumbia

Seydou Doumbia mund të largohet nga CSKA Moska këtë verë pasi Napoli ka ofruar 18 milionë euro për sulmuesin e Bregut të Fildishtë.
Skuadra nga Serie A është në treg për përforcime në repartin sulmues, për shkak të largimit të pritshëm të Ezequiel Lavezzit drejt Paris-Saint Germain, dhe ata e shohin 24-vjeçarin Doumbia si zëvendësim ideal.
Drejtori sportiv i Napolit, Riccardo Bigon, është takuar me përfaqësues të CSKA-së gjatë të martës në Milano, ku ai ka bërë ofertën e parë zyrtare për sulmuesin.
Rusët më herët kishin kërkuar 30 milionë euro për Doumbia, por tash e kanë ulur çmimin në 25 milionë, edhe pse Napoli ka ofruar 18 milionë për lojtarin.
Edhe pse të dyja palët ende janë larg një shifre të përbashkët, ata pritet të takohen edhe një herë në ditët në vazhdim për të vazhduar bisedimet që mund ta ulin çmimin deri në 22 milionë. 

Caliendo: Caku i vërtetë i PSG është Pato

Agjenti Antonio Caliendo beson se PSG është e vendosur të transferojë Alexandre Paton nga Milani.
Rossonerët tashmë kanë refuzuar një ofertë masive të PSG për Thiago Silvan, megjithatë Caliendo paralajmëron se francezët do të rikthehen me oferta.
“Caku i vërtetë i Paris Saint-Germain është Alexandre Pato. Por Galliani e ka bërë punën e tij, presidenti ka zgjedhur ta mbajë brazilianin (Thiago Silva), dujke ruajtur fuqinë e skuadrës”, ka thënë agjenti.

Ghetto dhe Astro vijnë me “Baby”

Reperi nga Ferizaji, Ghetto, ka lansuar këngën e re “Baby” në bashkëpunim me Astron.
Nga titulli mund të kuptojmë se kemi të bëjmë me një këngë dashurie, e cila sikur nga askush tjetër vihet në pah nga reperi i ri, i cili vazhdimisht po ngritet në piedestalin e potencialit të tij.
Nuk dihet ende nëse kënga do të ketë videoklip, por një gjë është e sigurtë – kënga të cilën mund ta dëgjoni më poshtë premton të bëhet një hit. 

Rona e treta sipas jurive

Nëse do të merrej për bazë vetëm vlerësimi i jurisë profesionale në garën më të madhe të këngës në Evropë, përfaqësuesja e Shqipërisë, Rona Nishliu, do të zinte vendin e tretë.
Faqja zyrtare e “Eurovisionit” në internet, 24 ditë pas përfundimit të garës, ka publikuar listën e ndarë me votat e jurisë dhe ato të publikut.
Aty përfaqësuesja e Shqipërisë ka marrë 157 vota nga juria, që e rendit atë të tretën, shkruan sot “Koha Ditore”. Por Nishliu ka marrë 106 vota nga publiku, që në listën e ndarë vetëm me vota nga kjo kategori, ajo renditet e teta.
Sistemi i votimit në këtë festival është kombinim ndërmjet këtyre dy kategorive të votave, derisa rezultati i të dyjave e ka renditur Nishliun në vendin e pestë./Telegrafi/

Premtimi, këngëtar i ri në skenën muzikore (video)

Premtim Ibrahimi, i cili për herë të parë u shfaq në skenën muzikore në vitin 2011, nuk ka të ndalur me punën dhe angazhimin e tij rreth muzikës.
Ai tashmë ka publikuar edhe një këngë të re "I yt mall", këngë kjo e cila është mirëpritur nga publiku. Premtimi thotë se së shpejti do të shfaqet edhe me dy këngë të reja të cilat janë në fazën e përfundimit. Gjithashtu do të publikojë edhe albumin e tij të parë, i cili përfshinë nënë këngë.
“Falë bashkëpunimit tim të ndërsjellët me producentin e këngëve të mia, unë arrita të realizoj këngët e para që disa prej tyre u përfshin edhe në albumin ‘Summer 2011’”.
“Unë frymëzohem duke kënduar shqip, ndërsa publiku është ai për të cilin do të jap maksimumin tim gjithmonë, andaj shpresoj që këngët e mia të mirëpriten nga të gjithë”, u shpreh Premtimi.
Ai thotë se ky është vetëm fillimi pasi shpreson të vazhdojë edhe më tutje dhe “gjithmonë falë fuqisë së Zotit dhe përkrahjes së njerëzve” rreth tij.
Së shpejti Premtimi do të vijë me dy klipe të reja “8me2” dhe “Edhe sonte”.