AK: Berisha e Thaçi, fajtorë për mos integrim në BE

Aleanca Kuqezi ka kritikuar kryeministrit e Shqipërisë, Sali Berisha, i cili me rastin e 22 vjetorit të fitores së PD-së në zgjedhjet e 22 marsit të 1992-it në Shqipëri, “me vendosmëri deklaroi së është kundër bashkimit të Kosovës me Shqipërinë”.
AK deklaron së rruga drejtë Bashkimit Evropian për Shqipërinë dhe Kosovën duket afër, por në fakt, sipas tyre, “është shumë larg si pasojë e qeverisjes së dobët të Sali Berishës dhe Hashim Thaçit të cilët i kanë lënë dy vendet tona të fundit në rajon në proceset integruese dhe të parat për korrupsion”.
“Numërimi mbrapsht i kësaj politike ka nisur dhe votat kuqezi do të largojnë njëherë e përgjithmonë lidershipin krokodil të politikës shqiptare”, thuhet në një komunikatë të Aleancës Kuqezi. 

Robinho: Te Reali nuk vlerësohesha

Sulmuesi i Milanit, Robinho, thotë se ai nuk është ndjerë një figurë e vlefshme te Real Madridi gjatë vitit të fundit të kaluar në Santiago Bernabeu.
Braziliani iu bashkua Madridit nga Santos në verën e vitit 2005, por u largua nga klubi tre vite më vonë, për t’u transferuar te Manchester City.
“Kam pasur disa momente të shkëlqyeshme atje, por lamtumira ime ishte zhgënjyese. Reali dëshironte të blejë dikë tjetër [Cristiano Ronaldon] dhe përnjëherë ata nuk ishin të interesuar në mua”.
“Më vjen keq për mënyrën se si u largova nga Madridi, por tifozët jo gjithmonë e kuptojnë se çfarë ndodh në raste të tilla. Marrëveshja ndodhi dhe klubi nuk ishte i kënaqur. Unë nuk ndjehesha i vlerësuar dhe doja të largohem”, ka thënë Robinho.
Braziliani iu bashkua Milanit në verën e vitit 2010, pas një sezoni e gjysmë të pasuksesshëm te Manchester City. 

Stekelenburg: Ibra gjithmonë i rrezikshëm

Portieri i Romës, Maarten Stekelenburg, thotë se Zlatan Ibrahimovic është kërcënimi kryesor i sulmit të Milanit, në prag të ndeshjes derbi që zhvillohet të shtunën në San Siro.
“Ibrahimovic është një lojtar i fuqishëm i cili gjithmonë shënon shumë gola. Ai ka fituar tituj të ligës me disa klube të mëdha dhe mendoj se ai është një prej lojtarëve më të mirë në botë”.
“Nuk pajtohem me ata që thonë se ai është vendimtar në ligë, por jo në Evropë. Nuk e di pse njerëzit e thonë këtë. Gjithmonë do ta dëshiroja Zlatan në skuadrën time”, ka thënë Stekelenburg për Corriere dello Sport.

Trezeguet: Messi, pengesa më e madhe e Mourinhos

David Trezeguet nuk ka dyshime se Jose Mourinho do të kishte fituar 10 herë më shumë trofe po të mos kishte qenë Lionel Messi te Barcelona.
“Nëse Messi nuk do të kishte qenë në klub, Mourinho do të kishte fituar 10 herë më shumë trofe se sa ka fituar tash”.
“Ai është lojtari më i mirë në botë. Ai e merr topin dhe shkon një në një me portierin gjashtë ose shtatë herë në çdo ndeshje – ai është më i jashtëzakonshmi në mesin e dhjetë lojtarëve të jashtëzakonshëm”.
“Barcelona po shkëlqen, derisa Madridi, një prej skuadrave më të mira në botë, ende po vazhdon të qëndrojë në terr”, ka thënë francezi gjatë një interviste për Tyc Sports. 

Rossi kushton 20 milionë euro?

Agjenti i Giuseppe Rossit thotë se cilido klub i interesuar në klientin e tij duhet të bëjë gati 20 milionë euro.
“Vlera prej 15 milionë eurosh e raportuar nuk është e vërtetë. Do të duhen së paku 20 milionë. Ai është shumë i lidhur me Villarrealin, por ka shumë oferta – dhe jo vetëm nga klubet italiane, por edhe klube të huaja”.
“Ai dëshiron ta testojë veten me lojtarët më të mirë dhe të fitojë diçka, por loja në Ligën e Kampionëve nuk do të jetë obsesion për të. Rikthimi në Itali do të ishte ideal, pasi ai e konsideron atë si kampionatin e tij”, ka thënë agjenti.

Forlan: Mediat po na dëmtojnë

Sulmuesi i Interit, Diego Forlan, mendon se seksione të caktuara të shtypit përpiqen t’u shkaktojnë probleme Nerazzurrëve.
“Shumë gjëra mund të thuhen pas një ngjarje, por mendoj se është e rëndësishme që njerëzit të dinë diçka, dhe ajo çfarë shtypi raporton është gabim”.
“Unë kam respekt për tifozët, fanellën e Interit, dhe nuk kam ardhur për t’i bërë lëmsh gjërat. Nëse duhet të kërkoj falje sepse disa njerëz mendojnë se kam bërë gabim, atëherë u kërkoj falje, ne të gjithë mund të bëjmë gabime, por tash dua të them çfarë në të vërtetë po ndodh”.
“Ka disa persona keqbërës të cilët e dinë si ta shfrytëzojnë avantazhin e situatave të caktuara. Ne të gjithë jemi shumë të bashkuar dhe nuk ka problem. Është e vërtetë se gjërat nuk shkojnë mirë për momentin, por shpresoj t’ia dal mirë, dua të luaj, të shënoj shumë gola dhe ta ndihmoj ekipin”, ka deklaruar Forlan për faqen zyrtare të Interit.
Interi të dielën udhëton në Torino ku do të përballet me Juventusin në derbin e javës në Serie A.

Shaarawy: Jemi superior ndaj Juventusit

Stephan El Shaarawy mendon se Milani është një skuadër më e  mirë se Juventusi dhe shpreson se ata do të arrijnë ta mbrojnë titullin e Serie A këtë sezon.
“Ne jemi të vetëdijshëm se jemi një skuadër e mirë. Ne po ia dalim mirë në ligë, po luftojmë kundër Juventusit, por në aspekt të kualitetit ndjehemi më superior”.
“Tash kemi nevojë për tre pikë kundër Romës [të shtunën] pasi nuk do të jetë lehtë as në Catania [vikendin e ardhshëm], në një fushë ku shumë lojtarë të mëdhenj kanë vuajtur”.
“Ne duhet ta fitojmë çdo ndeshje, vërtet. Megjithatë, ne jemi të kënaqur me paraqitjen në Kupë kundër Juventusit, duke luajtur para tifozët të tyre, që janë një armë e fuqishme”.
“Ne ishim të kënaqur me rezultatin, por jo me faktin që u eliminuam. Megjithatë, tash ne duhet të mendojmë për dy objektivat e radhës që janë Liga e Kampionëve dhe Scudetto”, ka thënë Shaaraway për Sky Sport 24. 

Henry fton Ballackun në New York

Veterani i Bayer Leverkusen, mesfushori Michael Ballack, do të ishte i mirëpritur te New York Red Bulls, thotë Thierry Henry.
Pavarësisht disa komenteve kontroverse të bëra nga agjenti i Ballack ndaj Red Bulls më herët gjatë kësaj jave, Henry do të pëlqente të luajë në krah të gjermanit, i cili do të jetë pa kontratë në fund të kësaj vere dhe ka kthyer shikimin kah New Yorku.
“Kush nuk do të dëshironte të luajë me Michael Ballack? CV-ja e tij flet vetë”.
“Ai shënon gola, ai ka përvojë dhe e sheh ndeshjen mirë si mesfushor. Nuk e di si është situata, por ai është një prej mesfushorëve më të mirë që kam parë”, ka thënë sulmuesi francez. 

NBA: Bucks ndalohen nga Celticsat

Boston Celtics i kanë dhënë fund serisë prej gjashtë fitoreve radhazi të Milwaukee Bucks, duke fituar në udhëtim me rezultat 100-91 për të shtuar gjasat për një vend që dërgon në play-off.
Paul Pierce udhëhoqi te Celtics me 25 pikë dhe ishte jashtëzakonshëm në çerekun e tretë kur shënoi 10 nga 18 pikët e skuadrës, ndërsa ndihmoi edhe në repartin mbrojtës kur Milwaukee shënoi vetëm 13 pikë.
Boston që shënoi fitoren e 25-të të sezonit përkundër 21 disfatave, tash pozicionohet i shtati në Konferencën Lindore dhe katër ndeshje para pozitës së nëntë, ku pozicionohen pikërisht Bucks, që shijuan disfatën ishte e 25-të të sezonit (21 fitore).
Brandon Jennings ishte lider te Milwaukee me 19 pikë, ndërsa Carlos Delfino shënoi 16 t tjera. 

Ferdinand: Ta fitojmë çdo ndeshje të mbetur

Mbrojtësi i Manchester United, Rio Ferndinand, beson se skuadra e tij duhet ta fitojë çdo ndeshje të mbetur, për të siguruar titullin e 20-të në Ligën Premier.
Pas fitores së Manchester Cityt ndaj Chelseat, United mbetet një pikë në maje të tabelës, dhe Ferdinand mendon se ata duhet të fitojnë çdo pikë të mundshme me synimin për ta mbrojtur titullin.
“Ne jemi në një pozitë në të cilën duam të jemi. Ne dëshironim të ishim në maje në këtë fazë të sezonit, por më e rëndësishme është të mbetemi aty deri në fund”.
“Mendoj se është një periudhë vitale, secila ndeshje duhet fituar. Për momentin, nëse ne i fitojmë të gjitha ndeshjet e mbetura deri në fund, ne do të jemi kampionë. Kjo është ajo që duhet të bëjmë”, ka thënë Ferdinand për Sky Sports News.

Vergara dhe Stone, të dashura lesbike!

Sofia Vergara dhe Sharon Stone do të luajnë të dashurat lesbike në komedinë e re “Fading Gigolo”.
Stone, 54-vjeçare, e cila do të luajë një dermatologe, dhe Sofia, 39-vjeçare, shijojnë një marrëdhënie intime në treshe me karakterin e John Turturro.
Filmi do të xhirohet në New York që nga muaji prill. Turturro do të jetë regjisor dhe do të luajë rolin e zhigolos (personit që paguhet për të bërë seks me femër), ndërsa në film do të luajë edhe Woody Allen.
“Sharon mendon se do të jetë shumë qejf të luajë të dashurën e një prej aktoreve më seksi për momentin. Skenat do të jenë shumë të nxehta”, ka thënë burimi për revistën amerikane “Life & Style”.

Denada lë të fejuarin, kalon pushimet në Paris

Fotomodelja Shqiptare me famë në Spanjë Denada Muça, ka ‘lënë’ të fejuarin e saj për të shkuar për pushim në Paris.
Ajo ishte e lodhur nga ditët që u ishin bërë rutinë dhe vendosi të ikte për pushime të papritura. Këtë herë ajo ka vendosur të shkojë e vetme duke lënë të fejuarin e saj në Spanjë.
Gjatë një prononcimi për Telegrafi, modelja ka thënë se ka pasur nevojë për pushim dhe njëkohësisht për tu qetësuar pas punëve dhe angazhimeve të shumta që i ka në Spanjë.
Këto ditë përveç pushimit ajo gjithashtu do të jetë e angazhuar edhe në disa seanca fotografimi. 

Ledina Çelo në Tiranë për “X Factor Albania”

Spektakli i talenteve “X Factor Albania” këtë fundjavë pritet të befasojë publikun shqiptar me ringjitjen në skenë të këngëtares Ledina Çelo, e cila prej vitesh jeton jashtë Shqipërisë.
Këngëtarja që është bërë nënë rreth një vit më parë, e që për momentin po shijon rritjen e të birit, do të ketë mundësinë sërish për tu rishfaqur para fansave të saj pas një kohe relativisht të gjatë.
Nuk është mësuar ende se me çfarë kënge do të ngjitet ajo në skenën e “X Factor”, por pritet të jetë mbresëlënëse. 

Sulmohet Kim Kardashian

Kim Kardashian nuk po kalon shumë ditë të mira së fundi. Ylli televiziv ishte viktimë e një gjuajtje me pudër derisa ajo promovonte aromën e saj të re “True Reflection” në The London Hotel në West Hollywood gjatë të enjtes mbrëma.
Kim, e veshur me një xhaketë të zezë, pantallona të lëkurës dhe një bluzë të kaltër, ishte në qilimin e kuq kur një femër e paidentifikuar i ka hedhur asaj pudër të bardhë.
Flokët e Kim dhe e gjithë shpina ishin mbuluar me pluhurin e bardhë, që më vonë u kuptua se kishte qenë sodë buke.
TMZ raporton se rojet e sigurimit e kishin dërguar atë në një dhomë private ku ajo kishte pastruar veten, para se të zgjedhë të rikthehet në ngjarje sërish.
“Mbase ishte gjëja më e çmendur, më e papritur dhe më e çuditshme që ndonjëherë më ka ndodhur mua. Siç i thash grimerit tim, doja më shumë pudër dhe këtu ka aq shumë pudër të tejdukshme tash”, ka thënë Kim për E! News. 

Pamja e fytyrave të njohura rrit tërheqjen seksuale

Antropologu Cindy Cornell nga New York-u, arriti në përfundim se pamja e fytyrave të njohura çliron një hormon, i cili rrit kënaqësinë për kontakt fizik.
Nëqoftëse vendosim në një kafaz dy krijesa të seksit të kundërt, por të të njëjtit lloj, më e mundura është që të vijnë në kontakt fizik. Në qoftë se quajmë kafaz zyrat ku punojmë dhe kalojmë orët më të shumta të ditëve tona, atëherë mund të kuptojmë pse disa herë atmosfera është e elektrizuar.
Asnjë nuk pranon sigurisht që u dashurua me dikë sepse thjesht kaloi para tij, por Cornell thotë që takimet e shpeshta dhe të pafajshme, mund të rritin mundësitë e tërheqjes seksuale dhe në qoftë se nevoja jonë biologjike është të riprodhojmë, atëherë është e panevojshme të kërkojmë gjysmën tonë në gjithë planetin. 

Limoni largon gurët biliarë

Rreth 80 për qind e gurëve biliarë përbëhen nga kolesteroli, i cili krijohet në rast se mëlçia ose fshika biliare nuk mund ta largojnë me sukses. Mirëpo, limoni është ushqim ideal për këtë!
Për shkak të mungesës së acideve biliare (që mund të vijë si pasojë e plakjes, stresit ose marrjes së barnave të caktuar), kontraksionet e fshikës mund të jenë të dobësuara. Në këtë mënyrë shpjegohet zbrazja e zvogëluar dhe e parregullt e lëngut biliar dhe mbetja e lëngut “të vjetër” biliar, i cili pastaj shtresohet në formë të gurëve kolesterolikë.
Prandaj rekomandohet konsumimi i ushqimeve acidike përpara ushqimit, sepse ato mund ta imitojnë acidin biliar dhe e “inkurajon” fshikën biliare për tkurrje në mënyrë që të largoj

ICS në Nokia N9

Atyre të cilët mendojnë se Nokia në vend të Windows Phone ishte dashur të zgjidh Androidin, do të ju pëlqej rezultati i projektit Nitroid, dhe do të mund të shohin se si duket kjo në një pajisje të vërtetë. Është publikuar alpha versioni i ROM-it për përdorimin e Androidit në Nokia N9.
Është mundësuar dual boot në mes Android 4.0.3 dhe MeeGos me të cilin vjen ky celularë në shitje, ndërsa SO zgjidhet pas ristartimit të pajisjes. Të përfshirë janë driverët 3D, përkrahja për multi-touch, tastet harduerike punojnë, ekrani fiket në gjendje të gatishmërisë, ndërsa është e përfshirë edhe përkrahja për Bluetooth dhe akcelerometrin. Është i përkrahur edhe dekodimi i videos, por për shkak të mungesës së akselerimit harduerik, reproduktimi nuk është mjaftë i rrjedhshëm. Gjithashtu, indikatori i baterisë nuk reflekton gjendjen reale të saj.
Udhëzimet për instalim ndodhen në faqet e forumit zyrtar të Nitroid. 

Medalje për të dënuarit

Zyrtarët e një burgu në Kinën qendrore kanë filluar të ndajnë çmime për të burgosurit, në mënyrë që t’i ndihmojnë që të ndjehen më mirë për veten e tyre.
Të burgosurve në burgun e sigurisë së lartë në provincën Hubei u jepen çmime për respektimin rregullave, për pastrimin e qelive, për marrjen e notave të mira në orët e edukimit dhe për ndihmesën që u japin të burgosurve të tjerë.
Në një ceremoni në stilin e atyre të Lojërave Olimpike, stafi i burgut ndan një lule të kuqe, një dhuratë të vogël dhe një certifikatë.
“Është e mirë për moralin, sepse u jep të burgosurve rastin për të arritur diçka dhe u tregon atyre se angazhimi më i madh jep rezultate”.
“Ka mësime të rëndësishme për njerëzit që një ditë do të largohen nga burgu dhe do t’i kthehen botës së vërtetë”, ka thënë një zëdhënës i burgut.

Elefantët urdhërohen në dietë!

Menaxhmenti i cirkut zviceran “Knie” ka vendosur që të hedhë në dietë tre elefantë, të cilët duhet të humbin nga 50 deri 300 kilogramë, sepse i konsiderojnë me mbipeshë.
Tages Anzeiger raporton se veterinarët i kanë peshuar elefantët në një peshore speciale të cilën e përdorin doganierët për caktimin e tonazhit të kamionëve dhe kanë vërejtur se Sabu, Siri dhe Rani kanë tepricë kilogramësh.
Dietës më rigoroze duhet t’i nënshtrohet Sabu, 28-vjeç, i cili peshon 4.3 tonelata, ndërsa i duhet të humbë 300 kilogramë.
Për dietën e elefantëve, veterinarët kanë menduar një formë të ushqyerjes, e cila njëkohësisht do t’i detyrojë ata që të ushtrojnë çdo ditë. Në fakt, ushqimi do t’u vendoset në fuçi mbi kokat e tyre, ashtu që elefantët do të duhet të zgjaten për ta arritur atë. 

Në garë vallëzimi në moshën 102-vjeçare (Video)

Victoria Harvey është 102-vjeçarja e cila është duke u stërvitur për të marrë pjesë në një garë vallëzimi.
Në një prononcim për ABC News, Harvey e cila vjen nga shteti amerikan Utah, ka thënë se vallëzon tango që nga mosha 15-vjeçare dhe se vallëzimi e mban në jetë.
“Mendoj se është një ushtrim i përsosur fizik dhe më duket se vallëzimi më ndihmon të hapem pakëz më shumë ndaj njerëzve tjerë”, ka thënë 102-vjeçarja, ndërsa transmeton Huffington Post. 
 

Foshnja 31-vjeçare

Amerikani Stanley Thornton i ka kaluar 18 vitet e fundit të jetës së tij duke u sjellë si një foshnje e madhe e rritur, duke mbajtur pelena dhe duke fjetur në një krevat të vogël.
31-vjeçarit i pëlqen të mendojë se i ka dy vjet dhe i pëlqen tavolina për foshnja në të cilën e konsumon ushqimin.
“Ndjehem sikur nëna më përqafon gjithnjë kur mbaj pelena. Mendoj se do të sillem si foshnje gjithë jetën time... Mendoj se djepi është gjëja më e rëndësishme në jetë”, citon The Sun fjalët e Stanleyt. 

Hoxhaj “zëvendëson” Tahirin

Paralajmërimet se bisedimet e ardhshme Kosovë-Serbi nuk do të jenë të karakterit teknik por të atij politik, dhe se njëra nga temat e bisedimeve do të jetë veriu i vendit, kanë shtyrë kryeministrin e vendit, Hashim Thaçi, që të mendojë për ndërrimin e delegacionit të bisedimeve.
Burime të afërta me Qeverinë e Kosovës, i kanë thënë “Zërit” se shefi i qeverisë kosovare është duke menduar që ta “pensionojë” kryenegociatoren e deritashme, Edita Tahiri, dhe ta zëvendësojë me një person tjetër.
“Kryeministri po pretendon që ta shkarkojë Editën, e në vend të saj ta emërojë Enver Hoxhajn. E në Ministrinë e Jashtme do të vijë ministrja e Tregtisë dhe Industrisë, Mimoza Kusari-Lila, me çka AKR-ja do ta marrë edhe një ministri të re, përveç Ministrisë së Tregtisë dhe Industrisë të cilën gjithashtu do ta udhëheqë kjo parti”, ka thënë burimi.
Ky person sqaron se vërejtjet që i ka shprehur opozita e shoqëria civile në shumë pika që kanë të bëjnë me zëvendëskryeministren Tahiri, qoftë sjellja e saj karshi Serbisë, apo shpenzimet e mëdha, duke përfshirë edhe udhëtimin në Shqipëri për 8 mars ku janë shpenzuar pesëdhjetë mijë euro, ia kanë mbushur mendjen kryeministrit që të mendojë për ndryshime.

A do të hapë rrugë Jahjaga?

Pas përfundimit të procedurave për ndryshimet kushtetuese, qëndrimi i Presidentes Atifete Jahjaga do të jetë vendimtar kur është fjala për shpalljen e zgjedhjeve presidenciale në vend.
Në fund të majit pritet që deputetët t’i miratojnë amendamentet e ndryshuara, por, zgjedhjet presidenciale nuk mund të shpallen nëse nuk jep dorëheqje Atifete Jahjaga, shkruan “Express”.
Kjo paralajmërohet edhe nga deputetët e Kuvendit të Kosovës, të cilët thonë se fjala e Presidentes do ta drejtojë procesin nëse zgjedhjet presidenciale mund të mbahen sipas marrëveshjes së partive politike apo në bazë të mandatit pesëvjeçar, që shefja aktuale e shtetit e ka sipas Kushtetutës së vendit.
Presidentja Jahjaga nuk pritet të deklarohet për ndryshimet kushtetuese, derisa nuk e kthen përgjigjen Gjykata Kushtetuese rreth kushtetutshmërisë së propozimeve të deputetëve. “Derisa të mos kryhen procedurat për ndryshimet kushtetuese ne nuk deklarohemi”, ka thënë zëdhënësi i Presidencës, Arbër Vllahiu.
Megjithatë, deputeti i Lëvizjes Vetëvendosje, Afrim Kasapolli, i cili është pjesë e Komisionit për Ndryshimet Kushtetuese, thotë se Presidentja mund të mos e pranojë shkurtimin e mandatit.
Ai thotë se është në vullnetin e saj nëse do të pranojë të përfundojë mandatin kushtetues pjesë vjeçar. Por, thekson se shkurtimi i mandatit është antikushtetues.
Ndërkaq, anëtarja tjetër e Komisionit Kushtetues, Vjosa Osmani thotë se deri tash gjithçka ka shkuar në pajtueshmëri dhe pret që zgjedhjet presidenciale të mbahen këtë vit.
“Edhe në vetë amendamentet kushtetuese thuhet se brenda gjashtë muajsh kryetari i Kuvendit shpall zgjedhjet presidenciale, që i bie më së largu në nëntor do të mund të mbaheshin zgjedhjes të mund të mbaheshin zgjedhjet sipas kësaj dinamike që është përcaktuar deri më tani”, ka thënë Osmani.
Edhe kryetari i Komisionit, Arsim Bajrami thotë se varet nga partitë politik se kur do të shkojnë në zgjedhje.

Haliti: Muralet në Kuvend, janë kopje dhe të pavlera

Në vitin 2004, pas përfundimit të renovimit të sallës së Kuvendit të Kosovës, u vendosen tri piktura me përmbajtje kombëtare shqiptare. Asokohe kjo ishte mirëpritur nga qytetarët e Kosovës dhe nga shumica e deputetëve të Parlamentit.
Mirëpo, deputetët serbë të ish koalicionit “Kthimi” i cilësuan si monoetnike dhe sipas tyre duhej të largoheshin nga Kuvendi i Kosovës. Kjo, edhe u realizua, pasi që në shenjë pakënaqësie ata i bojkotuan seancat e rregullta të Kuvendit.
Ndërkaq, tash e sa vjet këto piktura vazhdojnë të jetë të mbuluara dhe askush nuk merret me to. Sipas zv/kryeministrit të Kosovës, Hajredin Kuçi, kjo është çështje e Kuvendit të Kosovës, e jo e Qeverisë. “Kjo është kompetencë e Kuvendit të Kosovës”, tha ai për “Tribuna Shqiptare”.
Pikturat e vendosura në hollin e Kuvendit të Kosovës janë kopje që nuk kanë asnjë vlerë artistike, ka thënë për “Tribuna Shqiptare”, nënkryetari i Kuvendit, Xhavit Haliti. Sipas tij, në objektin e Kuvendit duhet të ketë piktura me vlera arti e jo kopje dhe kiç. 

Problemi i Kosovës është korrupsioni

Një raport i fundit që studion përparimin e 128 vendeve në zhvillim dhe në tranzicion, Fondacionit Bertelsmann, arrin në përfundimin se shumë vende po e ulin gjithnjë e më shumë lirinë politike. Vendet e rajonit të Evropës Juglindore janë në mesin atyre ku një dukuri e tillë është më e theksuar. Ndërsa Kosova vlerësohet si vendi më i varfër në rajon.
Indeksi i Transformimit, një tregues i shoqëruar nga një raport dyvjeçar (2009-2011), i Fondacionit Bertelsmann, me qendër në Gjermani, shqyrton prirjet kryesore politike, sociale dhe ekonomike të 128 vendeve të përfshira në raport.
Përsa i takon Kosovës, në raport thuhet se tre vjet pas pavarësisë është arritur sukses i konsiderueshëm, por ende mbeten shumë sfida. “Përfaqësuesit e zgjedhur vazhdojnë ta ndajnë pushtetin me praninë ndërkombëtare, ndërsa integriteti territorial dhe siguria ruhen nga KFOR-i”.
Në raport thuhet theksohet se problemi kryesor me të cilin përballet administrata është korrupsioni shumë i përhapur, ndërsa një problem tjetër është politizimi i administratës publike me klientë politikë që mbajnë pozita të ndryshme pa kualifikimin e duhur.
Duke folur për zgjedhjet e vitit 2010, raporti thekson se ato u dëmtuan nga shumë raste mashtrimesh dhe manipulimesh, raporton VOA.
Sfida më e madhe për vendin është ekonomia, ku rritja nuk ka qenë e mjaftueshme për të luftuar varfërinë dhe papunësinë. Kosova mbetet vendi më i varfër në rajon. Ekonomia informale, korrupsioni dhe shteti ligjor i dobët janë pengesat kryesore për një ekonomi tregu funksionale.
Kosova radhitet e 41-a mes 128 vendeve përsa i takon treguesit të statusit në përgjithësi me një vlerësim 6.28 pikë. Përsa i takon transformimit politik, Kosova zë vendin e 43-ë me 6.70 pikë dhe transformim ekonomik me 5.86, në vendin e 58-ë. Përsa i takon treguesit të menaxhimit, që mat cilësinë e qeverisjes, Kosova është e 57-a me 5.35 nga 10 pikët e mundshme.

Reali, ishull super luksoz në Emirate

Klubi mbretëror spanjoll, Real Madrid, ka marrë vendimin që të ndërtojë një ishull superluksoz në Emiratet e Bashkuara Arabe, projekt që do të kushtojë hiç më pak se një miliard dollarë.
Projekti do të inaugurohet në vitin 2015 dhe ajo që madrilenët e quajnë ‘parajsë’ të tyre lokacionin e ka në ishullin Al Marjan në Emiratet e Bashkuara Arabe. Më poshtë mund të gjeni disa prej detajeve të këtij ishulli.

- Përmasa gjigante prej 430 mijë m²
- 60 Vendpushime superluksoze
- 48 vila gjigante me plazh privat
- Jahte luksoze me klube nate
- Një park madhështor
- Një hotel me 5 yje dhe me 450 dhoma
- Nje muze të Real Madridit
- 400 apartamente
- Stadiume sportive për seanca stërvitore
- Stadium ku do të zhvillohen ndeshjet me kapacitet prej 10 000 spektatorëve.

“Reali le të qajë në park”

Mbrojtësi i Villarrealit, Angel Lopez, i ka dhënë një ide gjithë stafit të Real Madridit, duke përfshirë dhe tifozët që të qajnë nëpër parqe për gabimet e gjyqtarit në sfidën që përfundoi me barazim.
“Ata janë duke tentuar të bëjnë presion në gjyqtarët për ndeshjet e tyre të radhës. Ne mund të themi se Lassana Diarra është dashur të përjashtohej dhe se ne është dashur të fitojmë një penalti, por ne nuk mund të bëjmë asgjë”.
“Siç e thonë nga vendi ku jam rritur, ata mund të shkojnë dhe të qajnë në park. Ne jemi me fat që gjyqtari pati aq shumë personalitet. Unë e njoh gjyqtarin Paradas dhe ai më përjashtoi edhe mua sikurse Ozilin”, ka thënë Lopez.

Galliani pendohet për Tevezin

Zëvëndëspresidenti i Milanit, Adriano Galliani, pendohet që nuk e ka transferuar sulmuesin e Manchester Cityt, Carlos Tevez.
“Një tren i tillë nuk kalon për herë të dytë. E pash Tevezin në formë të lartë. Edhe pas gjashtë muaj mos lojë, ai erdhi dhe ndryshoi lojën, ndihmoi Cityn ta fitojë një ndeshje kruciale”.
“Por, ne jemi të kënaqur me Maxi Lopez, ai po bën mirë. Unë gjithmonë do të jem në dashuri me Tevezin, ne e kemi dashur atë në ekip, por fati vendosi ndryshe”, ka thënë Galliani.

Ibra dhe Silva të gatshëm për Romën

Zlatan Ibrahaimovic dhe Thiago Silva kanë marrë dritën e gjelbërt për t’u paraqitur në ndeshjen e të shtunës ndaj Romës.
Sulmuesi suedez ishte në dyshim për Romën pasi u zëvëndësua në pjesën e dytë të ndeshjes me Juventusin për një problem në shpinë, teksa i lënduar u largua edhe Thiago Silva.
Sidoqoftë, Tuttosport raporton se Thiago Silva dhe Ibrahimovic janë kthyer në kohë për supersfidat e Rossonerëve, teksa janë rikthyer edhe Alexander Merkel, Alessandro Nesta dhe Kevin-Prince Boateng.
Ndeshja zhvillohet të shtunën në ora 18:00 në San Siro, ku Rossonerët do të kërkojnë të mbesin në krye të klasifikimit në Serie A, para supersfidës ndaj Barcelonës që zhvillohet të mërkurën e ardhshme. 

Projektligji për Hoçën e Madhe, edhe një hap përpara

Amendamentet e Projektligjit për Hoçën e Madhe sot kanë marrë vizën nga Komisioni për Bujqësi, Pylltari, Zhvillim Rural dhe Mjedis e Planifikim Hapësinor. Ndërsa, për harmonizimin e qëndrimeve të këtij projektligji edhe në këtë mbledhje ishin të pranishëm kryeministri Hashim Thaçi dhe përfaqësuesi i ICO-së në Kosovë, Pieter Feith.
Kryetari i këtij Komisioni, Nait Hasani, duke folur për rëndësinë e ligjit dhe kërkoi nga anëtarët e Komisionit të jenë konstruktiv gjatë debatit lidhur me amendamentet e propozuara nga ICO-ja dhe Qeveria e Republikës së Kosovës.
Kryeministri Thaçi, ka thënë se çështja e ligjeve që dalin nga Plani i propozimit gjithëpërfshirës të presidentit Ahtisari për statusin e Kosovës, tejkalon raportet e kornizave pozitë opozitë. Edhe kryeministri apeloi që t’i kushtohet rëndësi procedimit të këtij Ligji duke e konsideruar me interes për vendin, thuhet në kumtesën e lëshuar nga shërbimi për informim i Kuvendit.
Pas kësaj, anëtarët e Komisionit vazhduan së shqyrtuari amendamentet (12 sosh), për të cilat nuk pati ndonjë mospajtim të theksuar (përpos amendamenteve, një, katërt dhe shtatë).
Lidhur me amendamentet, 1, 4 dhe shtatë, përfaqësuesi i ICO-së, Pieter Feith, bëri sqarimet duke arsyetuar propozimet nga ana e institucionit që përfaqëson.
Anëtari i Komisionit nga radhët e Vetëvendosjes, Liburn Aliu, tërhoqi vërejtjen duke thënë se “Nëse u japim kompetenca njerëzve jo kompetentë për mbrojtjen e trashëgimisë kulturore, atëherë, ajo nuk do të mund të mbrohet ashtu siç pretendohet me këtë Projektligj”.
Pas miratimit të amendamenteve nga ana e Komisionit, kryetari Hasani e shpalli të përfunduar procedurën e amendamentimit të Projektligjit për Hoçën e Madhe, i cili në vijim do të shqyrtohet edhe në komisionet e tjera funksionale, dhe së fundmi në mbledhje plenare në Kuvendin e Kosovës.