LDK, përmes një kumtese për media ka thënë se deri më sot nuk janë zbuluar dhe ndëshkuar ekzekutuesit e krimeve të rënda, të vrasjeve e të tentim-vrasjeve të shumë atdhetarëve e drejtuesve të lartë të Lidhjes Demokratike të Kosovës dhe veprimtarëve dhe zyrtarëve tjerë në Kosovë.
“Lidhja Demokratike e Kosovës tërheq vëmendjen që drejtësia e vonuar është drejtësi e munguar, kurse krimi i pandëshkuar është krim që mund të përsëritet”, thuhet në deklaratën e LDK-së.
Kjo parti thekson se në ditët e fundit kanë dalë deklarata të hapura për dy tentim atentate ndaj themeluesit e kryetarit të LDK-së, Ibrahim Rugovës, në vitin 2004 dhe në vitin 2005, pikërisht në kohën kur Rugova ishte president i Republikës së Kosovës.
“Ne besojmë fort se do t’i shërbente drejtësisë në Kosovë dhe besimit në shtetin e Kosovës që Prokuroria e Kosovës dhe Prokuroria e EULEX-it të trajtojnë të gjitha këto raste të vrasjeve dhe tentimvrasjeve dhe të sjellin para drejtësisë, për të marrë dënimin e merituar, ekzekutorët e krimeve të rënda dhe frymëzuesit e tyre. Besojmë që thirrjes sonë do t’i bashkohen qytetarët, që e duan Kosovën të lirë e shtet të së drejtës, po ashtu edhe shoqëria civile e partitë politike. Presim që t’i bashkohen kësaj thirrjeje në radhë të parë përfaqësuesit më të lartë të Republikës së Kosovës, Presidentja, Kryetari i Kuvendit e Kryeministri”, thuhet në deklaratën e LDK-së.
