Asistenti i Capellos kritikon Rooneyn

Italo Galbiati ka kritikuar rëndë Wayne Rooney për komentet e tij të fundit, ku ka vënë në dyshim kualitetet e strategut italian, Fabio Capello.
Galbiati është asistent i besueshëm i Capellos dhe beson se komentet e Rooneyt janë pa vend. Ai mbrojti punën e bërë të tyre me Anglinë gjatë viteve të fundit.
“Ai është mos mirënjohës. Capello e ka bërë veten të kuptueshëm dhe të respektuar. Futbolli ka vetëm një gjuhë: topin. Ai nuk mund të na mësojë asgjë. Anglia tani është ekip solid, i mirë dhe i fortë në kundërsulme”, ka theksuar Galbiati.

Zyrtare: United transferon Kagawan

Gjiganti anglez, Manchester United, ka bërë të ditur se ka kompletuar transferimin e mesfushorit ofensiv japonez, Shinji Kagawa.
Më herët gjatë muajit United kishte arritur marrëveshjen me Dortmundin, ndërsa pas testeve mjekësore, lojtari ka nënshkruar kontratë katërvjeçare.
“Shinji është lojtar i jashtëzakonshëm me aftësi të mëdha, vizion dhe sy të mirë për gol. Jam i ngazëllyer që ka zgjedhur të vijë te United. Besoj se ai do të bëjë impakt në ekip shpejt, pasi i përshtatet lojës tonë. Ne mezi presim të punojmë me të”, ka theksuar pas nënshkrimit Sir Alex Ferguson. 

Pedro dëshiron Alban dhe Martinez në ekip

Pedro e ka sugjeruar Barcelonën që të ndërmarrë hapa konkret për transferimin e Jordi Albas dhe Javi Martinezit në Camp Nou.
“Le të shpresojmë se Barca e transferon Alban. Ai është lojtar i mrekullueshëm. Ai është i kompletuar, ai mund të luaj edhe si anësor, por edhe si mbrojtës i krahut, është i shpejtë dhe godet fuqishëm me të majtën”.
“Ai do t’i përshtatej shpejt Barcelonës, kështu që shpresojmë se ai, por edhe Martinez do të transferohen”, tha Pedro.

Messi: Barcelona m’i realizoi ëndrrat

Lionel Messi ka falënderuar Barcelonën që arriti t’i ndihmojë atij në realizimin e ëndrrave si futbollist profesionist.
“Që kur isha tri-katër vjeç unë ëndërroja që të bëhem futbollist. Unë ecja me një top futbolli dhe gjithë ajo që doja të bëj ishte të luaj. Kam dashur të jem vetëm futbollist, asgjë tjetër, unë nuk mendoja për asgjë tjetër. Nëse nuk do të kisha mundur të jem futbollist, nuk e di se çka do të kisha qenë sot”.
“Unë nuk e di se çfarë kishte parë Barcelona te unë, por unë gjithmonë do të jem falënderues për atë që kanë bërë për mua. Në atë kohë, kisha një trajtim të shtrenjtë mjekësor dhe ata mbuluan të gjitha shpenzimet dhe ma ofruan mundësinë për të luajtur”, është shprehur Messi. 

Përmirësojeni seksin me joga

Problemet në seks më së shpeshti janë pasojë e stresit, pamundësisë për relaksim, por edhe arritjes së kënaqësisë në momentet intime.
Ndërsa sapo trupi të relaksohet, gjaku fillon të rrjedhë lirshëm nëpër arterie dhe qarkullon deri në gjenitale. Organet seksuale në këtë mënyrë pranojnë më shumë gjak që për meshkujt do të thotë ereksion më i mirë dhe më i gjatë, ndërsa për femrat ndjeshmëri e shtuar e klitorisit.
Joga përveç që njeriut i jep fleksibilitet dhe muskuj bukur të ndërtuar- si edhe përparësi të ndryshme fizike dhe psikike- në radhë të parë shërben për çlirimin nga stresi. Duke e praktikuar jogën, në trup shtohet sensualiteti, vetëbesimi dhe energjia. Ata të cilët e praktikojnë jogën janë më të hapur dhe më intimë me partnerët dhe kanë orgazma më të mira, pjesërisht edhe për shkak të pozitës.
Disa nga pozitat më të preferuara për qarkullimin e gjakut janë ‘Upavistha Konasana’ dhe ‘Baddha Konasana’.
Rekomandohet edhe kombinimi i 12 pozitave të ndryshme që quhet ‘Surya Namaskar’, përmes të cilave mund t’i tendosni nervat në pjesën e pelvikut, gjë që është shumë e rëndësishme për seksualitet. Po ashtu, stimulohen hormonet seksuale, zvogëlohet kortizoli (hormoni i stresit) dhe vjen deri te baraspesha seksuale.
Prandaj provojeni jogën, sepse sjell vetëm dobi.

Me ushqim mbrohuni nga dielli

Padyshim që tashmë dini gjithçka në lidhje me kremrat me faktor përgjegjës mbrojtës dhe sa të dëmshme janë rrezet e diellit për lëkurën tuaj. Por a e keni ditur se ushqimi i caktuar mund të na ndihmojë nga efekti i dëmshëm i UV...
Domatet
Gjatë verës domatet mund të konsumohen me ushqime të ndryshme, ndërsa ka të tillë që i hanë si mollën. Antokisduesi likopen që është i pranishëm në domate zvogëlon ndjeshmërinë e lëkurës ndaj diellit dhe djegies.
Shalqiri 
Kur të shkoni herën tjetër në treg të blini pemë, mos harrona të blini shalqi. Edhe gjatë qëndrimit në plazh mund ta hani shalqirin e famshëm, i cili është mbrojtës natyror i lëkurës suaj nga dielli
Manaferrat, boronicat 
Shpeshherë mezi e presim verën që të kënaqemi me manaferra dhe boronica, që mund të hahen si të vetme, si sallata pemësh ose si pjesë e tortave të ndryshme. Janë shumë të pasura me antioksidues që kanë efekt mbrojtës nga rrezet UV.
Spinaqi
Gjyshet dhe nënat gjithmonë ju kanë folur se spinaqi është i shëndetshëm, dhe kanë pasur të drejtë. Vitamina në spinaq ndihmojnë në luftën kundër efektit negativ të rrezeve të diellit, ndërsa ngadalësojnë edhe procesin e plakjes së lëkurës,
Në listën e ushqimeve shumë të dobishme për mbrojtje nga veprimi i dëmshëm i rrezeve ultravjollce të diellit bëjnë pjesë edhe patatja, karota, peshku, çaji i gjelbër dhe i zi, çokollata etj. 

iOS dhe Mac App Store në 32 vende të reja

Në ngjarjen e WWDC’së e cila është mbajtur më herët gjat këtij muaji, Apple ka njoftuar se sistemi i saj operativ, iOS, por edhe dyqani virtual i aplikacioneve për kompjuterët e saj, Mac App Store do të lansohet në 32 shtete të reja, disa prej të cilave tashmë kanë fituar qasje.
Në listën e 32 shteteve të reja përfshihen vendet si Fixhi, Ukraina, Nepali, dhe shumë vende të tjera, ndërsa zhvilluesit së shpejti do t’i shohin aplikacionet e tyre në 32 shtete më shumë.
Njësoj sikurse iOS, edhe Mac App Store ka qenë shërbim shumë popullor në mesin e përdoruesve lojal të kompjuterëve Mac, ndërsa më herët gjatë muajit Apple njoftoi se në dyqanin e saj të aplikacioneve janë shkarkuar më shumë se 30 miliardë shkarkime nga mbarë bota.

Vdes duke shikuar futboll

Një tifoz i fiksuar pas futbollit nga Kina ka ndërruar jetë, pasi 11-të net rresht ka përcjellë ndeshjet e Kampionatit Evropian të futbollit.
Për shkak të dallimeve kohore mes Evropës dhe Kinës, me kohë të atjeshme shumica e ndeshjeve fillojnë pas orës 2:45 të mëngjesit. Vdekja e tij ka ndodhur në sfidën Itali-Irlandë, të cilën Azzurrët e fituan me rezultat 2-0.
26-vjeçarin e ka gjetur të vdekur nëna e tij përpara televizorit. Sipas Sansijang Metropolis, i ndjeri ishte anëtar i ekipit të futbollit në fakultetin e tij, ndërsa nuk ishte ankuar asnjëherë për probleme shëndetësore.
“Ne pushonim kohë pas kohe, ndërsa ai dëshironte t’i ndiqte të gjitha ndeshjet”, ka thënë një mik i tij.
Sipas mjekëve, mungesa e gjumit ia ka dobësuar fuqinë organizmit, gjë që ka sjellë deri te vdekja. 

Të shtunën pjesa e dytë e provimit të Maturës

Të shtunën, rreth 35 mijë maturantë do t’i nënshtrohen pjesës së dytë të provimit të maturës. Derisa në pjesën e parë të provimit më 9 qershor, i janë nënshtruar testit në lëndët e përgjithshme: gjuhë shqipe, gjuhë angleze dhe matematikë, në pjesën e dytë do të përgjigjen në pyetjet nga lëndët që janë të përafërta me drejtimet që i kanë ndjekur gjatë shkollimit të mesëm dhe që përbëjnë dyzet për qind të pyetjeve.
Sipas njoftimit të Ministrisë së Arsimit, Shkencës dhe Teknologjisë, testi i maturës fillon në ora 10:00, ndërsa do të përmbajë 80 pyetje.
Në këtë proces do të jenë të angazhuar 900 komisione, 2 mijë e 600 administrues të cilët drejtpërdrejtë do të merren me administrimin, dhe së paku 300 monitorues nga UP-ja.

Qeveria paguan “Swiss Diamondin” për mikun e Pacollit

Behgjet Pacolli ftoi gjatë marsit një guvernator nigerian për vizitë në Kosovë, angazhoi protokollin shtetëror për ta pritur, e akomodoi në hotelin më luksoz në Kosovë dhe e përcolli me një garanci se Kosova do të investojë në shtetin e tij.
Megjithëkëtë, paraja e buxhetit të shtetit dedikuar akomodimit të mysafirit afrikan u derdh në biznesin e Pacollit, shkruan “Koha Ditore”.
Zyra e kryeministrit ka deklaruar një shumë prej rreth 12.500 eurosh të jetë shpenzuar për vizitën zyrtare në Kosovë të guvernatorit të shtetit IMO të Republikës Federale të Nigerisë, Owelle Anayo Rochas Okorocha.
Kjo zyrë nuk ka treguar shumë detale rreth organizimit të vizitës dhe as për mënyrën se si është përzgjedhur hoteli për ta akomoduar guvernatorin.
Pacolli prej kohësh ka proklamuar se Nigeria, shtet me ndikim në Afrikë, e ka njohur Kosovën. Por ai është demantuar në këtë pohim, madje së fundi edhe nga administrata e Shteteve të Bashkuara.
Gazeta kishte raportuar disa herë se Pacolli nuk po e deklaronte të vërtetën për njohjen. Edhe vetë guvernatori Okorocha ishte përmbajtur në deklarim gjatë vizitës në Kosovë, kur ishte pyetur nga gazetarët për çështjen e njohjes.

Bisedime për format

Brukseli ende nuk ka marrë ndonjë vendim rreth formatit të dialogut. Zyrtarë të BE-së kanë deklaruar se për këtë do të vendoset pas bisedimeve me palët.
Një nga arsyet që procesi nuk do të mund të zhvillohet deri në vjeshtë janë vonesat për formimin e Qeverisë së re në Beograd dhe pushimet verore.
Bashkimi Evropian ende nuk ka vendosur se në çfarë formati do të vazhdojnë bisedimet mes Kosovës dhe Serbisë. Sipas zyrtarëve në Bruksel, për këtë pritet të vendoset pasi të diskutohet me të dyja palët.
Sipas burimeve të gazetës “Express”, BE është duke pritur edhe formimin e Qeverisë në Beograd për të proceduar më tutje.
“Para se të mund të vazhdojmë, duhet të formohet Qeveria në Beograd. Kur të bëhet kjo, do të diskutojmë me të dyja palët se cila do të jetë mënyra më e mirë për të vazhduar dialogun”, ka thënë një zyrtar i BE-së i afërt me dialogun.
Një ditë më parë, lehtësuesi i bisedimeve Robert Cooper vizitoi Kosovën dhe takoi Kryeministrin Hashim Thaçin, por jo edhe kryenegociatoren Edita Tahiri.
Zyrtarët e BE-së thonë se është në dorën e Thaçit të vendosë se kush do të marrë pjesë nga pala kosovare në takime me zyrtarët evropianë.
“Takimi ishte me Thaçin edhe natyrisht varet nga ai që të vendosë se kush merr pjesë në takime nga pala kosovare. Nuk di ma shumë diçka se kjo, por kam parë raportet mediale ku z. Kuçi thotë se zonja Tahiri mbetet në këtë pozitë”, ka thënë zyrtari evropian.

Hodgson: Nuk dua këshilla nga Capello

Menaxheri i Anglisë, Roy Hodgson, ka hedhur poshtë pohimet se ai do të kërkojë këshilla nga Fabio Capello për ndeshjen çerekfinale ndaj Italisë, ndërsa ka pranuar se njerëzit presin ta krahasojnë me Capellon për këtë sfidë.“Unë nuk mendoj se do të kërkoj këshilla nga dikush për këtë takim. Ne do të shfrytëzojmë atë që kemi në dorë, do të studiojmë me video lojën e tyre dhe ne do ta bëjmë punën sipas kokës tonë”.
 
“Një gjë është e qartë, nëse ne rastësisht arrijmë të kualifikohemi tutje, atëherë nuk do të mungojnë krahasimet me dikë, por as për këtë nuk jam i interesuar”, ka thënë Hodgson.
 
Anglia takohet të shtunën me Italinë në duelin klasik çerekfinal të Euro 2012.

Lehmann: Grekët të motivuar nga kriza

Ish-reprezentuesi i Gjermanisë, Jens Lehmann, ka thënë se Greqia do të jetë shumë e motivuar në sfidën çerekfinale ndaj Gjermanisë, pasi Helenët fajsojnë gjermanët për krizën e tyre ekonomike.“Unë pres që grekët të shfaqin problem për ne për herë të parë pas shumë vitesh. Ata luajtën mirë, prandaj arritën në çerekfinale. Lojtari më i rëndësishëm i tyre (Karagounis) do të mungojë, kështu që jam optimist për kualifikim”.
 
“Ata nuk kanë mjaft cilësi për të na mohuar gjysmëfinalen, por ata do të jenë shumë të motivuar për këtë takim, sepse në Greqi, ne gjermanët shihemi si fajtorët e problemeve ekonomike të vendit të tyre”, ka thënë Lehmann.
 
Gjermania takohet me Greqinë sonte mbrëma në sfidën e dytë çerekfinale, ndërsa fituesi takohet me fituesin e duelit tjetër çerekfinal, Angli-Itali.  

Messi refuzon t’i kundërpërgjigjet Ronaldos

Ylli i Barcelonës, Lionel Messi, edhe njëherë e ka shfaqur klasin e tij duke refuzuar që t’i kundërpërgjigjet rivalit të tij, Cristiano Ronaldo.
Ronaldo kritikoi Lionel Messin për dështimin e tij në Copa America pas provokimit të tifozëve të Danimarkës në ndeshjen ku Ronaldo dështoi totalisht.

“Unë nuk kam asgjë për të thënë në lidhje me komentet e Ronaldos”, ka theksuar Messi.

Guardiola i kënaqur që Chelsea gjeti menaxher

Pep Guardiola është shumë i kënaqur që pronari i Chelseat, Roman Abramovich, nuk e ka kërkuar me ngulm në Stamford Bridge.
Daily Mail shkruan se Guardiola është i interesuar vetëm në një projekt afatgjatë dhe se kjo nuk i përshtatej absolutisht te Chelsea.
Në vend të Chelseat, syrin e Guardiolës e ka zënë Bayerni, që nuk do të ishte befasi nëse do të nënshkruane me Guardiolën për shkak të filozofisë së njëjtë që klubi bavarez ka me ish-klubin e Pep, Barcelonën. 

Zayn Malik: Ja femra ime ideale

Këngëtari i bendit të njohur të djemve “One Direction”, Zayn Malik, ka thënë se atij i pëlqejnë femrat që jetojnë me stil të vjetër të veshjes dhe të vlerave tjera.
Zayn, i cili është në lidhje me Perrie Edwards, thotë se është me rëndësi që një femër të ketë respekt për vetveten dhe më pas edhe për të dashurin e saj.
“Më pëlqen dikush që është me mentalitet të vjetër dhe që është e ftohtë, që nuk i merr gjërat aq afër zemrës. Mendoj se vlerat e vjetra janë me rëndësi, pasi kështu ajo respekton më shumë veten. Vajza ime e përkryer do të ishte thjesht një vajzë e mirë, dikush që mund të flas me orë të tëra pa ndërprerje”, ka theksuar Zayn Malik. 

Del Bosqe lavdëron Gjermaninë dhe trajnerin e saj

Vicente del Bosque ka lavdëruar trajnerin Joachim Low për “elegancën” e tij dhe udhëheqjen e Gjermanisë në mesin e përfaqësueseve elite dhe ka pohuar se ai është i gatshëm ta drejtojë Barcelonën ose Real Madridin.“Ai është një burrë elegant i cili përfaqëson vendin e tij shumë mirë. Ai ka bërë punë në klub dhe nivel ndërkombëtar. Real Madridi dhe Barcelona sigurisht se nuk do të ishin shumë të mëdha për të”, ka thënë Del Bosque për Bild
 
“Gjermania ka luajtur futboll në nivel shumë të lartë. Shpirti i tyre luftarak është unik. Ata janë një skuadër fantastike. Nuk mund të mendoj për ndonjë dobësi. Ata janë shumë të mirë në mbrojtje, derisa Mario Gomez është një gjigant në sulm”, ka shtuar spanjolli. 

Pepe dëshiron finalen e Euro 2012

Mbrojtësi i Portugalisë, Pepe, thotë se fitorja 1-0 ndaj Republikës Çeke tregon se ata kanë kualitete për t’ia dalë mirë në garën evropiane.“Ne siguruam një fitore të rëndësishme, që na çon në gjysmëfinale. Spanja ose Franca? Nuk kam preferenca. Të dyja janë ekipe të shkëlqyeshme. Ne i presim ata. Shpresoj të luajmë mirë në atë ndeshje dhe të arrijmë në finale”.
 
“Kritikat na ndihmojnë neve të zhvillohemi. Gjëja më e rëndësishme është se ne e dimë se kemi kapacitete për t’ia dalë deri në fund. Kjo është mënyra se si ne gjithmonë i qasemi këtij turneu”, ka thënë Pepe. 

Wenger i kënaqur me formën e Podolskit në Euro

Menaxheri i Arsenalit, Arsene Wenger, është i impresionuar nga forma që lojtari i ri i skuadrës, Lukas Podolski, po e shfaq në Euro 2012.
Wenger është duke punuar si ekspert mediatik gjatë kampionatit evropian dhe është i impresionuar me paraqitjen e Podolskit deri tash.
“Podolski ka bërë një punë të shkëlqyeshme për skuadrën e Gjermanisë, ai po bën një punë të shkëlqyeshme ekipore”.
“Ai luan në mënyrë të kujdesshme ndonjëherë, por ai megjithatë ka shënuar një gol shumë të rëndësishëm kundër Danimarkës në paraqitjen e tij të 100-të.
“Jam shumë i kënaqur me atë çfarë kam parë nga ai”, ka thënë Wenger.

Ronaldo: Euro të më ndihmojë në Topin e Artë

Cristiano Ronaldo mendon se paraqitja e tij në Euro 2012 nuk ia siguron, por mund t’i ndihmojë atij ta fitojë çmimin FIFA Topi i Artë.
27-vjeçari shihet si favorit për ta fituar shpërblimin prestigjioz pasi shënoi 60 gola për Realin në të gjitha garat sezonin e kaluar, përfshirë 46 në La Liga që ndihmuan ekipin ta fitojë titullin e kampionit të Spanjës.
“Nuk mendoj se paraqitjet e mia në Euro do të jetë vendimtare që unë ta fitoj Topin e Artë, por ato mund të ndihmojnë”, ka thënë Ronaldo.
Portugezi mbrëmë ndihmoi Portugalinë të kualifikohet në gjysmëfinale të garës evropiane pasi shënoi golin e vetëm të ndeshjes në fitoren 1-0 ndaj Republikës Çeke, të cilin gol ia dedikoi djalit të tij. 

Hana Cakuli: Ju tregoj mashkullin tim ideal

Këngëtarja nga Ulqini, Hana Cakuli gjatë një interviste ka pohuar se çfarë duhet të ketë mashkulli i saj ideal.
Hana ka rrëfyer se mashkulli ideal për të duhet ta mbush shpirtërisht dhe ta dojë jetën
“Duhet ta dojë jetën, të punojë fort për të, me pasion dhe mbi të gjitha të dijë të më përmbushi shpirtërisht”, ka pohuar Hana.
Përveç kësaj ajo ka pohuar se është duke u përgatitur për disa projekte muzikor, por nuk ka dashur të zbulojë më shumë.
“Janë disa projekte dhe nuk dua ta zbuloj. Por mund t’u them se jam në bisedime për shumë projekte dhe ende nuk kam zgjedhur një të vetme, apo konkrete .Por, mund t’i them disa bashkëpunëtorë, me të cilët po flas për kompozime nga ana e tyre: Rrusta (Petrit Carkaxhiu) – vokalist i grupit Jericho, Shpat Deda, e disa emra të tjerë që dua t’i mbaj sekret”, ka shtuar Hana

Zbogar, i zhgënjyer me vendimin e Kuvendit

Përfaqësuesi i posaçëm i Bashkimit Evropian në Kosovë, Samuel Zbogar, është shprehur i zhgënjyer me vendimin e Kuvendit të Kosovës për të mbajtur në fuqi nenet 37 dhe 38 të Kodit Penal, të cilat zhvlerësojnë lirinë e medias.
Zbogar citohet të ketë thënë nëpërmjet një komunikate të lëshuar nga zyra e tij se nenet në fjalë janë në kundërthënie me konventat e BE-së që mbrojnë lirinë e medias dhe lirinë e të shprehurit.
“Provizionet për përgjegjësinë penale dhe burimin e informacionit do të kenë një ndikim negative në lirinë e shprehjes dhe lirinë e medias në Kosovë”, ka thënë Zhbogar, duke rikujtuar se BE mbetet thellësisht e përkushtuar në promovimin dhe ruajtjen e lirisë së shprehjes dhe medias, si vlera të një rëndësie të veçantë për konsolidimin e demokracisë së Kosovës.
Ai ka shprehur keqardhjen gjithashtu se ky vendim pason vizitën që një delegacion i Komisionit Evropian ka realizuar në Kosovë për të vlerësuar arritjet e Kosovës dhe aftësitë e saj për t’u angazhuar në bisedimet e Mekanizmit të Stabilizim – Asociimit.
“Mbi të gjitha, ky hap e lë Kosovën prapa në kontekstin rajonal, duke qenë se pothuajse të gjitha vendet fqinje kanë hequr tashmë provizionet që penalizojnë mediat për kryerjen e detyrave të tyre”, citohet të ketë thënë Zbogar. 

UGK: Nenet 37, 38 të papranueshme

Edhe Unioni i Gazetarëve të Kosovës (UGK), ka pranuar me shqetësim miratimin e Kodit Penal të Kosovës, nga ana e Kuvendit, së bashku me nenet 37 dhe 38, të cilat e cenojnë lirinë e shprehjes dhe të medieve.
UGK konsideron se miratimi i këtyre dy neneve të Kodit Penal, pa ndryshimin e tyre është i papranueshëm dhe në kundërshtim me Kushtetutën e Republikës së Kosovës.
“Unioni i Gazetarëve të Kosovës, është pro rregullimit të legjislacionit për mediet në Kosovë, duke përfshirë edhe Kodin Penal, por, kundërshton çdo lloj tendence e cila do ta dëmtonte lirinë e tyre dhe do ta vështirësonte punën e gazetarëve”, thuhet në reagimin e UGK-së. 

Miratohet projektligji për përmbylljen e mbikëqyrjes së pavarësisë

Me 78 vota për, 10 kundër dhe asnjë abstenim, Kuvendi miratoi në parim Projektligjin për plotësimin dhe ndryshimin e Ligjeve që kanë të bëjnë me përmbylljen e mbikëqyrjes ndërkombëtare të pavarësisë së Kosovës.
Ligjvënësit e konsideruan këtë si një moment shumë të rëndësishëm për Kosovën, ndërkohë që ishin deputetët e Lëvizjes Vetëvendosje ata që e kundërshtuan këtë projektligj.
Janë 21 ligje që kanë të bëjnë me mbikëqyrjen e pavarësisë së Kosovës, të cilat pritet të ndryshohen dhe të plotësohen me një ligj të veçantë.
Zëvendëskryeministri Hajredin Kuçi tha përmes miratimit të këtij projektligji, do të bëhet bartja e kompetencave nga institucionet ndërkombëtare tek ato vendore.
“Që të gjitha këto ligje deri më tani kanë pasur mbikëqyrje të drejtpërdrejt ndërkombëtare dhe këtu do të bëhet bartja e kompetencave nga institucionet ndërkombëtare tek ato vendore. Qeveria e Kosovës synon që me përkushtim të saj të plotë do të punojë në drejtim të arritjes sa më të shpejtë dhe të suksesshme të realizimit të këtij synimi i cili është synim nacional”, tha Kuçi.
Të gjitha grupet parlamentare, përveç Lëvizjes Vetëvendosje, i dhanë mbështetje projektligjit. Shefi i Grupit Parlamentar të kësaj lëvizje, Visar Ymeri tha se nenet e propozuara përmes këtij ligji që ndryshon 21 ligje, tregojnë qartë se nuk po përmbyllet mbikëqyrja.
“Krejt çka po ndodhë sot është se na janë propozuar për miratim disa nene përmes të cilave hiqet roli i Përfaqësuesit Civil Ndërkombëtare, dhe kaq. Ky është një shtrembërim i skajshëm i realitetit politik në Kosovë dhe reduktim i vrazhdët por edhe i pavërtetë i një strukture të tërë e mjaft të gjerë të mbikëqyrjes”, u shpreh Ymeri.
Ligjvënësit u fokusuan në ligje të ndryshme, duke kundërshtuar nene të caktuara, sikur që ishte Ligji për liritë fetare. Duke pasur parasysh këtë, deputeti i LDK-së, Sabri Hamiti tha duhet të miratohet secili ligj veç e veç, përderisa e vuri në pikëpyetje përfundimin e pavarësisë, derisa do t’i jepet mandat shtesë EULEX-it.
“Nuk është mirë ta bëjmë të padijshmin gjithë Kuvendin, sepse nëse i jepet një mandat shtesë EULEX-it, që do t’i jepet, atëherë mbikëqyrja e pavarësisë do të vazhdojë funksionalisht”, tha Hamiti.
Kryetari i Komisionit për ndryshimin e Kushtetutës, Arsim Bajrami tha se shumica e vërejtjeve të bëra nga ligjvënësit, janë amandamentuar nga komisioni, por nuk mund të prezantohet në këtë fazë.

Kuçi jep dorëheqje nga të dy postet qeveritare

Hajredin Kuçi ka dhënë dorëheqje nga posti i zëvendëskryeministrit dhe ministrit të Drejtësisë, pasi që deputetët e Kuvendit të Kosovës të premten votuan kundër heqjes së neneve 37 dhe 38 nga Kodi Penal, nene këto që cenojnë lirinë e shtypit.
Kuçi ka thënë se e ka ndërmarrë këtë hap për të mbajtur fjalën që e kishte dhënë me parë, se nëse miratohen në Kuvendin e Kosovës dy nenet (37 e 38) të Kodit Penal të kontestuara nga shoqëria civile dhe asociacionet ndërkombëtare, ai do të japë dorëheqje.
Ministria e Drejtësisë është sponsorizuese e Projekt Kodit Penal të Kosovës. Në një takim të zhvilluar me 3 shkurt, në mes të Ministrit Hajredin Kuçi dhe përfaqësuesve të Asociacionit të Gazetarëve Profesionist të Kosovës, palët janë pajtuar që këto dy nene të largohen nga Projekt Kodi Penal.
Kuçi pati paralajmëruar dorëheqjen e tij në rast se nuk do të hiqen nga Kodi i ri Penal, neni 37 dhe 38.
Ai ishte zotuar se do ta amendamentojë Kodin, nëse Jahjaga, nuk ndërmerr asgjë edhe pak kërkesës së tij. “Do të loboj në Kuvendin e Kosovës, që ato dy nene të mos miratohen. Nëse edhe përkundër përpjekjeve të mia, ato dy nene më 1 janar hyjnë në fuqi, hyn në fuqi edhe dorëheqja ime”, pati thënë Kuçi.
Pasi Kodi Penal ishte miratuar në Kuvendin e Kosovës, presidentja e Kosovës, Atifete Jahjaga nuk e pati nënshkruar, duke marrë vendim kështu më 8 maj, që Kodin Penal t’ia kthejë Kuvendit të Kosovës për rishqyrtim.
Megjithatë, deputetët e Kuvendit të Kosovës, sërish të premten votuan kundër heqjes së nenit 37 dhe 38 nga Kodi Penal.
Pas kësaj, Kuçi në një konferencë për media njoftoi dorëheqjen e tij nga posti i zëvendëskryeministrit dhe ministrit të Drejtësisë.
Edhe organizatat e huaja janë shprehur kundër nenit 37 dhe 38 të Kodit Penal, pasi cenojnë lirinë e shtypit.

Kodi Penal nuk ndryshon, Kuçi paralajmëron dorëheqje

Asociacioni i Gazetarëve Profesionistë të Kosovës (AGPK) është shprehur e tmerruar me rezultatin e votimit të deputetëve të Kuvendit të Republikës së Kosovës, të cilët votuan kundër heqjes së neneve 37 dhe 38 nga Kodi Penal.
AGPK konsideron se me këtë vendim, Kuvendi e ka fundosur lirinë e shtypit në Kosovë.
“Votimi i deputetëve tregon për papjekuri politike dhe tendenca diktatoriale ndaj lirisë së shtypit dhe të shprehjes në Kosovë”, thuhet në kumtesën e AGPK-së.
Ministria e Drejtësisë është sponsorizuese e Projekt Kodit Penal të Kosovës. Në një takim të zhvilluar me 3 shkurt, në mes të ministrit Hajredin Kuçi dhe përfaqësuesve të Asociacionit të Gazetarëve Profesionist të Kosovës, palët janë pajtuar që këto dy nene të largohen nga Projekt Kodi Penal.
Kuçi pati paralajmëruar dorëheqjen e tij në rast se nuk do të hiqen nga Kodi i ri Penal, neni 37 dhe 38.
Ai është zotuar se do ta amendamentojë Kodin, nëse Jahjaga, nuk ndërmerr asgjë edhe pak kërkesës së tij. “Do të loboj në Kuvendin e Kosovës, që ato dy nene të mos miratohen. Nëse edhe përkundër përpjekjeve të mia, ato dy nene më 1 janar hyjnë në fuqi, hyn në fuqi edhe dorëheqja ime”, pati thënë Kuçi.
Ndryshe, të premten pasi deputetë votuan kundër heqjes së neneve 37 dhe 38 nga Kodi Penal, Ministria e Drejtësisë përmes një kumtese për media ka njoftuar se ministri Kuçi në ora 15.00 do të mbajë një konferencë për media. 

Kuçi: Nuk e larguam Editën

Zëvendëskryeministri Hajredin Kuçi ka deklaruar të premten se Qeveria e Kosovës nuk e ka larguar nga procesi i bisedimeve shefen e delegacionit të Kosovës Edita Tahiri.
“Jo nuk është larguar nga procesi” ka thënë Kuçi në një prononcim për “Express”.
Ndërmjetësi, Robert Cooper të enjten ka qëndruar në Prishtinë ku ka takuar kryeministrin Thaçi, por jo edhe kryenegociatoren Tahiri.
Pas kësaj, mediat kanë njoftuar se Tahiri është larguar nga procesi i bisedimeve.

Shënohet Java globale kundër dhunës me armë

Ministria e Punëve të Brendshme i është bashkëngjitur shënimit të Javës Globale Kundër Dhunës me Armë për vitin 2012. Në këtë javë kampanja ndërkombëtare mbahet me qëllim të ndaljes së përhapjes dhe keqpërdorimit të armëve të vogla dhe të lehta.
Me këtë rast, ministri i Punëve të Brendshme, Bajram Rexhepi, tha se për sikurse viteve të mëhershme, MPB-ja ka vendosur që t’i bashkohet javës Globale kundër Dhunës me Armë.
“Unë iu bëj thirrje qytetarëve që të përmbahen nga shkrepja e armëve në ajër, për shkak se plumbat të cilët shkrepen lartë kthehen gjithsesi poshtë dhe ata kthehen poshtë me një shpejtësi vdekjeprurëse. Rreziku i lëndimit ose madje edhe vrasjes së dikujt është i pashmangshëm në një ambient urban. Unë në veçanti dua t’u drejtohem organizatorëve të dasmave dhe ahengjeve tjera, që të kërkoni nga mysafirët tuaj që të mos përfshihen në këtë sjellje të rrezikshme dhe pronarëve të restoranteve që të mos e lejojnë një gjë të tillë në lokalet e tyre”, theksoi ministri Rexhepi.
Ministri Rexhepi vuri në dukje se korniza e re ligjore në Kosovë e lejon posedimin legal të armëve në bazë të kritereve shumë të rrepta dhe i përfshinë të gjitha kriteret drejt zvogëlimit të këtij rreziku.
Ndërsa ndihmësdrejtori për Operativë në Policinë e Kosovës, Shefqet Beqaj, tha se në kuadër të planit zhvillimor 2011-2015, njëra ndër objektivat strategjike është ngritja e nivelit të sigurisë publike, e që ndërlidhet direkt me parandalimin dhe luftën kundër dhunës me armë.
“Gjatë sezonit veror kryesisht nëpër ahengje familjare dhe organizime tjera rritet numri i përdoruesve të armëve dhe për këtë Policia e Kosovës ka hartuar plane policore që kanë për qëllim shtimin e patrullimeve dhe vëzhgimeve policore në ato lokacione ku zhvillohen ceremonia dhe manifestime të tilla. Njëkohësisht sjellim në vëmendje tek të gjithë qytetarët se përdorimi i paligjshëm i armëve është veprim i kundërligjshëm dhe ekzistojnë ndëshkime ligjore për këtë veprim joligjor”, theksoi Beqaj.
Ilir Kukaj nga Agjencia Nacionale e Forenzikës theksoi se plumbat bredhës, përpos dëmeve materiale mund të shkaktojnë edhe vdekjen. “Para se të shkrepni me armë në ajër gjithmonë ta keni parasysh se ju mund t’ ia merrni jetën dikujt.”, tha Kukaj.
Në këtë rast, u prezantuan edhe detaje kontrolli simultativ i një veture që barte armë ilegale nga Njësia e Specializuar e Policisë së Kosovës K9, ku në veturë qeni i këtij njësiti gjeti armën ilegale.
Java Globale Kundër Dhunës me Armë ka për qëllim vetëdijesimin e opinionit publik për parandalimin e përdorimit të pakontrolluar të armëve të zjarrit, sidomos në rastet festive. Ky projekt u përkrah nga Programi i Kombeve të Bashkuara për Zhvillim në Kosovë ( UNDP), projekti KOSSAC dhe WSSI. 

Maradona: Grekët mund t’i ndalojnë gjermanët

Diego Maradona thotë se nëse 300 grekë kanë qenë në gjendje t’i ndalojnë 10 mijë persianë, ata sigurisht mund ta ndalojnë edhe Gjermaninë në ndeshjen e sotme çerekfinale të Euro 2012.“Fernando Santos (trajneri i Greqisë) e di se ai e ka ndeshjen e jetës në duart e tij, pasi ka përballë një betejë të përpjetë të një madhësie gjigante. Por nëse 300 grekë ishin në gjendje t’i ndalojnë 10 mijë persianë në Thermopylae, atëherë 11 grekë sigurisht se kanë një shans kundër 11 gjermanëve”.
 
“Ai bëri mrekulli duke u mbrojtur ndaj rusëve dhe do të duhet ta dyfishojë shpirtin e skuadrës për mbrëmjen në Gdansk”.
 
“Skuadra gjermane është në formë, e re dhe e fuqishme. Grekët janë të vështirë, të moshuar dhe me përvojë. Ky kampionat ka nxjerrë në pah fuqinë dhe forcën, dhe edhe pse jam i sigurt se grekët do të bëjnë një rezistencë heroike, Gjermania duhet të fitojë”, ka shkruar Maradona në kolumnen e tij për Times of India.

Cech: Ronaldo ndër dy më të mirët në botë

Portieri i Republikës Çeke, Petr Cech, ka lavdëruar Cristiano Ronaldon pas fitores 1-0 të Portugalisë ndaj çekëve.“Nuk është një ndjenjë e mirë për ne sonte. Ne humbëm. Ata ishin më të mirë dhe merituan të fitojnë”.
 
“Ronaldo është një prej dy lojtarëve më të mirë në botë, dhe ai e dëshmoi këtë me atë golin e tij me kokë. Ai vërtet është vështirë të ndalohet”, ka thënë Cech pas disfatës së mbrëmshme.
 
Portugalia në gjysmëfinale të Euro 2012 do të takohet me Spanjën ose Francën, të cilët përballen mes veti të shtunën.