Urdhri për tkurrje

Miratimi i Ligjit për shërbyesit civilë dhe dy rregullore të tjera për reformim të administratës publike mund t’i lërë pa punë shumë punëtorë kosovarë. Burime brenda Qeverisë, thonë se tashmë u ka shkuar një kërkesë agjencive buxhetore që të mos punësojnë njerëz të rinj. Reformimi i administratës vjen edhe si kërkesë e ndërkombëtarëve.
Qeveria e Kosovës ka filluar ta marrë seriozisht procesin e reformimit të administratës publike në Kosovë. Përveç miratimit të ligjeve përkatëse, në funksion tashmë janë edhe dy rregullore që kanë për qëllim sistematizimin e punëtorëve brenda institucioneve.
Por, në emër të këtij procesi, më së keqi pritet ta kenë vetë punëtorët. Miratimi i Ligjit për shërbyesit civilë dhe dy rregullore të tjera për reformim të administratës publike mund t’i lërë pa punë shumë punëtorë kosovarë, shkruan Express.
Burime brenda Qeverisë kanë thënë se, përveç reduktimit të numrit të punëtorëve, do të ndalohet edhe punësimi i njerëzve të rinj. Për këtë punë tashme disa prej agjencive buxhetore kanë pranuar një kërkesë nga Ministra e Administratës Publike që të mos punësojnë njerëz të rinj.
“Në rastet kur ndonjë institucion kërkon një punëtor, atë duhet ta gjejë brenda institucionit. Në rastet kur kjo nuk mund të ndodhë, atëherë duhet ta bëjë një kërkesë në ministrinë përkatëse”, ka thënë ky burim, shkruan Express.
Megjithatë, të dhënat për tremujorin e parë të këtij viti, tregojnë të kundërtën.
Rreth 500 punëtorë të rinj i janë shtuar administratës publike këtë periudhë. Si pasojë, shpenzimet në paga u rritën për 15 milionë euro. Statistikat zyrtare tregojnë se të punësuar që marrin paga nga buxheti i Kosovës janë gjithsej 75,609 persona.
Ndërkaq, reformimi i administratës publike ka qenë kërkesë e kamotshme edhe e ndërkombëtarëve.
Të premten, nën organizimin e Ministrisë së Administratës Publike është organizuar një takim pune për procesin e zbatimit të Rregullores Nr.09/2012 për standardet e organizimit të brendshëm dhe sistematizimit të vendeve të punës në administratën shtetërore dhe të Rregullores Nr.05/2012 për klasifikimin e vendeve të punës në shërbimin civil.
Ministri Mahir Yagcilar tha se me hyrjen në fuqi të Ligjit për shërbimin civil, Ligjit për pagat e nëpunësve civilë dhe Ligjit për administratën shtetërore dhe me aprovimin e akteve nënligjore, të cilat dalin nga këto ligje, krijohen kushte për kalimin në riorganizimin e brendshëm dhe sistematizimin e vendeve të punës.
“Me këtë ligj bëhet ndarja nga shërbimi civil e kategorive siç janë: punonjësit e sistemit arsimor, punonjësit e sistemit shëndetësor, zyrtarët policorë të Policisë së Kosovës, zyrtarët e Doganave të Kosovës, zyrtarët korrektues të Shërbimit Korrektues të Kosovës dhe pjesëtarët e Forcës së Sigurisë të Kosovës, të cilat kategori rregullohen me Ligjin e punës, ligje të veçanta, me marrëveshje kolektive ose me rregullore sektoriale”, tha ai.
Sipas ligjit, do të bëhet edhe kategorizimi i personelit të punësuar në shërbimin civil në 4 kategori funksionale: nëpunës civilë të nivelit të lartë drejtues, nëpunës civilë të nivelit drejtues, nëpunës civilë të nivelit ekzekutues dhe profesional dhe nëpunës civilë të nivelit administrativ.
Ndërkaq, me Ligjin për pagat e nëpunësve civilë do të bëhet edhe sistemimi dhe strukturimi i pagave, shtesave dhe të kompensimeve të tjera për nëpunësit civilë, kurse për herë të parë bëhet përcaktimi i të drejtave të nëpunësve civilë lidhur me pagat, shtesat dhe kompensimet e tjera.
Ndryshe, Qeveria e Kosovës me qëllim të zbatimit të Ligjit për administratën shtetërore tashmë ka aprovuar Rregulloren për Organizimin e Brendshëm dhe Sistematizimin e Vendeve të Punës. Kjo rregullore nuk zbatohet për Zyrën e Kryeministrit dhe organet e tjera të administratës shtetërore, struktura organizative dhe funksionale e të cilave është rregulluar me ligje të veçanta. 

Paralajmërimet e Pacollit, pa rezultat

Behgjet Pacolli ka paralajmëruar se në vjeshtë Kosova mund të aplikojë për anëtarësim në OKB. Por deklaratat e tij i kanë nervozuar lobuesit e pavarësisë së Kosovës në Washington dhe New York. Burime nga këto dy qendra amerikane të vendosjes thonë se aplikimi do të ndodhë vetëm kur të jenë votat e sigurta dhe kur të evitohet mundësia që Rusia dhe Kina ta përdorin veton e tyre.
Zëvendëskryeministri Behgjet Pacolli ka vendosur ta imitojë shtetin palestinez, kur ka paralajmëruar se në vjeshtën e këtij vitit Kosova mund të aplikojë për anëtarësim në Organizatën e Kombeve të Bashkuara.
Palestina vitin e kaluar ka aplikuar për anëtarësim në këtë institucion, pavarësisht se e dinte se nuk mund të anëtarësohet për shkak të vetos së Shteteve të Bashkuara.
E njëjta mund t’i ndodhë edhe Kosovës nëse aplikon për anëtarësim në OKB, por në këtë rast mund të jetë Federata Ruse apo Kina ato që përdorin veton e tyre.
Kosova deri më tash është njohur nga 91 shtete, por jo të gjitha vendet anëtare me të drejtë vetoje në Këshillin e Sigurimit e njohin shtetin e ri. Madje, Rusia njihet si kundërshtare e fuqishme e shtetit të Kosovës, shkruan Express.
Pavarësisht kësaj, Zëvendëskryeministri i Parë, Behgjet Pacolli ka përmendur faktin se shifra prej gati 100 njohjeve e ka mobilizuar diplomacinë e Kosovës të aplikojë për anëtarësim në OKB.
“Pas njohjes së Çadit, numri i njohjeve të Kosovës po i afrohet shifrës 100 dhe mund t’ju them se shtatorin e ardhshëm diplomacia e Kosovës po përgatitet të aplikojë për anëtarësim në Kombet e Bashkuara”, ka thënë Zëvendëskryeministri Pacolli, për Presheva Jonë, të shtunën. 

Galucci fajëson KFOR-in

Ish-administratori rajonal i UNMIK-ut në Mitrovicë, Gerard Galuci, i njohur për qëndrime pro serbe, ka thënë se aksioni i javës së kaluar në Rudarë të Zveçanit paraqet sulm ndaj paqes dhe sigurisë, çfarë “është edhe në kundërshtim me rolin e forcës paqeruajtëse”.
“Barrikadat nuk lëndojnë askënd, ndërsa banorëve lokalë u japin ndjenjën e sigurisë në mesin e provokimeve të vazhdueshme të Qeverisë në Prishtinë”, ka thënë Galuci, raportojnë mediat serbe.
Të premten e kaluar, misioni paqeruajtës i NATO-s ka ndërmarrë aksion për heqjen e barrikadës në fshatin Rudarë, ku edhe ka hasur në rezistencën e serbëve lokalë.
Gjatë përleshjeve janë lënduar dy ushtarë të KFOR-it dhe të paktën tre serbë.
Galuci ka thënë se përgjegjës për konfliktin dhe të plagosurit është KFOR-i.
Në vitin 2008, kur ishte administrator rajonal në Mitrovicë, Galuci pat kritikuar edhe intervenimin e UNMIK-ut dhe të KFOR-it për të liruar objektin e gjykatës së uzurpuar nga serbët në veri.
Qëndrimi i tij kishte shkaktuar pakënaqësi te liderët kosovarë. 

Ferguson premton rikthimin e titullit

Menaxheri i Manchester United, Sir Alex Ferguson, ua ka garantuar tifozëve të United, më saktësisht atyre që janë abonuar për gjithë sezonin e ardhshëm, se ata duhet të presin rikthimin e titullit në Old Trafford në një sezon edhe më dramatik.
Djajtë e Kuq e humbën titullin e 20-të nga City që shënoi dy gola në sekondat e fundit për të shokuar kështu klubin nga Old Trafford dhe miliarda tifozët anë e mbanë globit. Sidoqoftë, premtimet Ferguson ka thënë se do t’i mbajë.

“Kur shikoni sezonin e kaluar, kjo flet më shumë për historinë e Manchester United. Nuk ka klub që mund të krijojë dramën që krijuam ne vitin e kaluar. Në rregull, nuk doli e jonë, por kur ktheneni ndër vite dhe shikoni ndeshjet kur shënonim gola në sekondën e fundit, atëherë e kuptoni se është drama e Manchester United”.

“Gjithmonë do të ekzistojë kjo, pasi jemi klub i tillë. Kur bleni biletën sezonale, jeni të garantuar: Një – mund të pësoni sulm në zemër. Dy – kënaqësi maksimale deri në minutin e fundit. Dhe nën tre: Faktin se do ta kthejmë titullin te vendi”, është shprehur në një videomesazh Ferguson.

Pesë Superkupa të Spanjës në Kinë

Federata Spanjolle e Futbollit (RFEF) ka bërë të ditur se Kina do të jetë mikpritëse e pesë edicioneve të Superkupës së Spanjës.
RFEF ka arritur një marrëveshje në vlerë prej 32 milionë eurosh me United Vansen International Sport, për t’i lejuar kështu vendit aziatik mikpritjen e pesë prej shtatë ndeshjeve të Superkupës.

Superkupa e parë e cila do të zhvillohet në Kinë do të jetë në vitin 2013.

Këtë vit Superkupa e Spanjës do të zhvillohet ndërmjet kampionit Real Madrid dhe fitueses së Kupës, Barcelonës. Të dyja ekipet janë takuar edhe vitin e kaluar me ç’rast fitimtarë ishin Blaugranët me rezultat të përgjithshëm prej 5-4.

Hodsgon: E kërkova Hazardin te Liverpooli

Përzgjedhësi i Anglisë, Roy Hodgson, ka deklaruar se ai e ka shikuar si transfer të mundshëm anësorin e Lille, Eden Hazard, në kohën kur ai ishte menaxher i The Reds.
Hazard po kërkohet nga shumë klube angleze dhe Hodgson ka zbuluar se po që se do ta kishin dëgjuar drejtuesit e klubit, Hazard tani do të kishte qenë lojtar i Liverpoolit.

“Unë shkova për ta shikuar Hazardin si transfer potencial që ishte dhe kur isha trajner i Liverpoolit, kështu që e di se sa i mirë është ai. Ishte një ndeshje mes Lille dhe Monacos, ishte një ndeshje ku ai shkëlqeu”, ka theksuar Hodgson.

Lucasit nuk i intereson Interi

Ylli i Sao Paulos, Lucas Moura, ka qenë subjekt i një oferte prej 18 milionë eurosh nga Interi, ka zbuluar agjenti i futbollistit brazilian.
Sensacioni 19 vjeçar konsiderohet si një prej talentëve më të mirë në botë dhe Chelsea, Interi dhe Real Madridi kanë qenë në kërkim të tij, ndëras tani agjenti pohon se ai s’është i interesuar për ofertën e Nerazzurëve.

“Interi më bëri ofertë prej 18 milionë eurosh për Luasin, por unë as që e kam humbur kohën me këtë ofertë sepse lojtari tashmë ka thënë se ai nuk dëshiron të largohet nga Sao Paulo. Mourinho është i interesuar për të, i shikon të gjitha ndeshjet e tij”, ka theksuar agjetni i Lucas, Wagner Ribeiro.

Messi: Do ta përballojmë humbjen e Guardiolës

Superylli i Barcelonës, Lionel Messi, është i bindur se Barcelona do të jetë në gjendje që ta përballojë largimin e trajnerit Pep Guardiola.
“Jam më se i lumtur te Barcelona dhe kurrë nuk kam menduar për ndërrim klubesh. Unë nuk do të largohem”.

“Ne do të tejkalojmë humbjen e Guardiolës dhe shpresojmë se gjithçka do të vazhdojë njëjtë me Titon, i cili ka filozofi dhe mentalitet të njëjtë”, ka thënë Messi për Expansion.

Madonna fillon turneun botëror

Madonna e ka filluar turneun e saj botëror në Izrael mbrëmjen e kaluar, me një koncert fantastik në Tel Aviv.
53 vjeçarja e filloi turneun e saj “MDNA” me një koncert fantastik në stadiumin Ramat Gan në Tel Aviv, ku ajo kënodi këngë të ndryshme nga karriera e saj 30 vjeçare me hite si “Like a Virgin” dhe “Vogue”.

PoëoëEntertainment tashmë ka konfirmuar se data pesë korrik është për Eve dhe 15 korrik për Unikkatilin, por befasia është data 9 korrik, ku ndoshta-ndoshta, pse jo...

Degert: Presim qëndrimin e Nikolicit për Kosovën

Shefi i Delegacionit të BE-së në Beograd, Vincent Degert, ka thënë se BE pret qëndrimin e presidentit të ri të Serbisë, Tomislav Nikolic, përkitazi me Kosovën.
"Presidenti i porsazgjedhur Nikolic ka shprehur gatishmërinë për të trajtuar këtë çështje të vështirë dhe ne presim me kujdes javët dhe muajt e ardhshëm qëndrimin që ai do ta ketë për Kosovën”, ka thënë Degert për “Danas”.

Degert shpreson se dialogu Prishtinë-Beograd do të vazhdojë posa të formohet qeveria e re e Serbisë. Ai vlerëson se vazhdimi duhet të jetë një ndër prioritetet kryesore të kësaj qeverije. Sipas tij, BE dëshirën po ashtu që sa më shpejtë ta shoh zbatimin e marrëveshjeve të arritura.

Fletarrest “fantom” ndaj Xhezair Shaqirit!

Në stacionimet policore dhe pikat kufitare të Kosovës është shpërndarë një fletarrest ‘fantom’ ndaj ish-komandantit të Ushtrisë Çlirimtare Kombëtare, Xhezair Shaqiri.
“Këtë ma kanë thënë disa të njohur që punojnë në Ministrinë e Punëve të Brendshme të Kosovës”, ka thënë Shaqiri për “Tribuna Shqiptare”.

Ekzistencën e fletarrestit e ka konfirmuar një pjesëtar i Policisë së Kosovës, i ngarkuar me punë në Pikën kufitare në Merdarë. Por, zyrtarisht Policia e Kosovës dhe EULEX-i e kanë mohuar ekzistencën e një fletarresti të tillë.

Shaqiri, i njohur më parë si Komandant Hoxha, thotë se ky fletarrest është shpërndarë pas akuzave që i ka bërë i ashtuquajturi sekretar shtetëror për Kosovën, Oliver Ivanovic, për sulmin që “Xhezair Shaqiri dhe Eljesa Sherifi e bënë ndaj xhandarëve serbë në Dobrosin të Bujanocit”.

“Në kohën kur u krye ky sulm unë kam pasur një kontratë pune në një shtet evropian. Gjithashtu edhe Sherifi ka qenë jashtë”, ka thënë Shaqiri.

Ikni më 2015

Pikërisht në kohën kur po diskutohet përmbyllja e Zyrës së ICO-s, e cila ka mbikëqyrur përmbushjen e Pakos së Ahtisaarit, Qeveria e Kosovës po ia shkruan fundin edhe EULEX-it.
Propozimin për largimin e Misionit për Sundimin e Ligjit e ka elaboruar Zëvendëskryeministri Hajredin Kuçi para evropianëve, duke kërkuar që ky mision të përmbyllë mandatin efektivisht në fund të vitit 2015.

Këtë kërkesë Kuçi e ka bërë të mërkurën në Bruksel, ku ka shpalosur një strategji dhe fazat që çojnë në përmbylljen dhe largimin e këtij misioni nga Kosova, shkruan “Express”.

Kjo ka ndodhur po ashtu në kohën kur Brukseli ka vendosur ta ristrukturojë EULEX-in, siç thonë zyrtarët evropianë, me qëllim të funksionimit më të mirë.

Në fakt institucionet e vendit konsiderojnë se EULEX’i nuk është i nevojshëm këtu më shumë se deri në vitin 2014, por qëndrimi i tyre është së ky mision mund të vazhdojë punën për çështjen e krimeve të luftës dhe për veriun deri në fund të vitit 2015. Kuçi ka deklaruar në Bruksel se pas kësaj periudhe, kosovarët e duan vendin e tyre pa EULEX.

Kushtetuesja s’ka gjyqtarë për ‘Hoçën e Prizrenin’

Projektligji për Qendrën Historike të Prizrenit dhe Hoçën e Madhe ka mbetur peng i mungesës së gjyqtarëve në Gjykatën Kushtetuese. Këto dy projektligje ishin dërguar në Kushtetuese nga Lëvizja Vetëvendosje të përkrahur nga shoqëria civile dhe nga deputeti i PDK-së, njëherësh kryetar i Komisionit për Bujqësi, Pylltari dhe Mjedis e Planifikim Hapësinor, Nait Hasani.
Ishte konsideruar se miratimi i tyre nga Kuvendi i Kosovës ishte në kundërshtim me Kushtetutën, pasi përbënte shkelje të parimeve të laicitetit dhe neutralitetit të besimeve fetare.

Kryetari i Komisionit për Bujqësi, Pylltari dhe Mjedis e Planifikim Hapësinor, Nait Hasani, ka deklaruar për “Tribuna Shqiptare” se lënda e tyre vazhdon të qëndroj në sirtarët e Gjykatës Kushtetuese për shkak të mungesës së gjyqtarëve të cilët do ta shqyrtonin lëndën.

“Ne jemi në pritje të shqyrtimit të këtyre dy ligjeve, mirëpo na është thënë se lënda një herë nuk mund të shqyrtohet për shkak të mungesës së gjyqtarëve në Gjykatën Kushtetuese”, ka thënë Hasani.

Deputeti Hasani beson se Gjykata Kushtetuese do të vendos në favor të tyre, pasi sipas tij, janë ofruar dokumente të mjaftueshme e të cilat vërtetojnë se miratimi i ligjit për Qendrën Historike të Prizrenit dhe Hoçën e Madhe janë në kundërshtim me Kushtetutën e Kosovës.

PDK “tradhton” Bahri Hysenin

Deputetët e Partisë Demokratike të Kosovës (PDK) në seancën e së enjtes kanë “tradhtuar” bashkëpartiakun e tyre, Bahri Hyseni, i cili ka qenë njëri nga kandidatët për anëtar të Gjykatës Kushtetuese.
Për ish-deputetin e PDK-së dhe njërin nga anëtarët e devotshëm të këtij subjekti politik, deputetët e partisë së kryeministrit, Hashim Thaçi, nuk janë treguar dorëlirë, duke ia pamundësuar atij që të bëhet njëri nga gjykatësit e Kushtetueses, shkruan “Zëri”.

Gjatë procesit të fshehtë të votimit, ai ka marrë votat e nevojshme në raundin e parë, duke vazhduar kështu në të dytin, por 63 vota sa ka marrë në raundin e dytë kanë qenë të pakta që ai të kalojë në të tretin. Ndërsa, e kundërta ka ndodhur me kandidaten Arta Rama-Hajrizi e cila ka marrë 71 vota.

Burime të besueshme brenda PDK-së kanë thënë se ka qenë kryeministri Thaçi ai që ka penguar ardhjen e Hysenit dhe e ka favorizuar kandidaten Rama-Hajrizi.

“Hyseni i takon krahut të Jakup Krasniqit. Problemi është se Thaçi është frikësuar që nëse zgjidhet gjykatës i Gjykatës Kushtetuese, Hyseni nuk do ta dëgjojë, por do të punojë për Jakup Krasniqin”, ka thënë burimi.

Rreth 15 mijë euro për “çmimin” e blerë

Autoritetet e Universitetit të Prishtinës nuk ishin mashtruar nga “Business Initiative Direction” (B.I.D.), kur i ishin përgjigjur pozitivisht kësaj skeme për të marrë një “çmim”. Menaxhmenti e dinte se “çmimin” po e blinte.
“Koha Ditore” ka siguruar të premten një kupon shpenzimi që UP-ja ka bërë për të. Në kupon është evidencuar shuma prej 3900 eurosh që alokohet tek shitësi “Business Initiative Direction”. Alokimi ishte bërë më datën 25 maj.

Tri ditë më vonë me “trofe” në dorë do të shihej rektori Mujë Rugova në një ceremoni të organizuar në New York, gjatë së cilës u janë ndarë “çmimet” të gjithë blerësve gjithandej globit, që në numër ishin 117. Të “shpërblyerit” nëpër vite, që i ka parë gazeta, janë kryesisht biznese nga Kina, Rusia apo India.

Rugovës ia kanë bërë edhe një foto gjatë momentit të ndarjes së “çmimit”, ngaqë edhe ky shërbim mbulohej si kundërvlerë e 3900 eurove që kishte ndarë UP-ja. Po kështu, organizatori për pjesëmarrësin e subjekteve që kishin blerë “çmimet” kishte siguruar edhe një dhomë hoteli, një drekë gala, një certifikatë dhe pullën e fituesit. Edhe një DVD me foto dhe xhirime të bëra në ceremoni u është dhënë pjesëmarrësve.

UP-ja e ka publikuar me pompozitet këtë “çmim”, duke thënë se këtë e meritonte, ngaqë ishte vlerësuar për cilësi.

Nga UP-ja ishin pjesëmarrës në ceremoni dy përfaqësues. Rektorin Rugova e kishte shoqëruar zëvendësi i tij, prorektori Naser Mrasori. Për këtë udhëtim UP-ja a ka dhënë hiç më pak se 7000 euro si avancë të dyve. Megjithëkëtë, në arsyetimin e vendimin që mban firmën e prorektorit Enver Kutllovci, kurrkund nuk përmendet pjesëmarrja në ceremoninë e B.I.D.

Ditë më parë, sipas një komunikate të lëshuar nga Lëvizja Studentore për Barazi “Studim, Kritikë, Veprim”, Business Initiative Direction (Drejtimi për Nismat Biznesore), është e njohur për mashtrimet që i ka bërë më herët. Rasti më i hapur është kur B.D.I. i ka dërguar mesazh të tillë një kompanie nga Botswana, për performancë të mirë biznesore në vitin 2010.

“Por, problemi ishte që kjo kompani nuk punonte që nga viti 2003”, thanë në SKV.

Sipas SKV, ajo që kërkon B.D.I. nga viktimat e mashtrimit të saj, është pagesa prej minimum 3.800 euro për ta blerë medaljen dhe pjesëmarrjen në një gala mbrëmje ku ndahen çmimet, për ata që i kanë blerë ato.

SKV vlerësonte se është e turpshme se si udhëheqësi i institucionit kryesor të Arsimit të Lartë në Kosovë bënë gafa të tilla.

“Në vend se ai të ishte një intelektual që zhvillon mendimin kritik në Kosovë, ai bëhet palaço i mashtrimeve. Mujë Rugova, në fund të mandatit të tij të paligjshëm si Rektor i UP-së, më çdo kusht po mundohet të krijojë e të marrë çmime. Ai së fundmi ia dha vetes titullin ‘Profesor Emeritus’, ndërsa tani e pranoi medaljen e artë të mashtrimit”, thuhej në reagimin e Lëvizjes Studentore për Barazi, SKV.

Real Madridi pranë Drogbas

Real Madridi është shumë pranë transferimit të ish-sulmuesit të Chelseat, Didier Drogba dhe se problem mbetet vetëm kontrata të cilën duhet ta nënshkruajë sulmuesi nga Bregu i Fildishtë.
Skuadra kineze Shanghai Shenhua është shprehur optimiste se do ta transferojë Drogban, por Daily Mail raporton se ikona e Chelseat ka zhvilluar bisedime edhe me Real Madridin.

Sidoqoftë, problemi i vetëm me të cilin përballen gjigantët spanjollë është paga të cilën 34 vjeçari është duke e kërkuar, e që është një kontratë dy vjeçare me përfitime prej 150 mijë funtesh në javë.

Villas Boas i kushtoi Chelseat 32 mil.

Strategu portugez, Andres Villas Boas, ka marrë një kompensim prej 12 milionë funtesh nga Chelsea, pasi ishte shkarkuar nga detyra e menaxherit të klubit nga Stamford Bridge në mars.
Daily Mail shkruan se Chelsea është pajtuar që t’ia paguajë kompensimin teknikut portugez, pas vetëm shtatë muajsh qëndrimi në klub.

Chelsea është dashur po ashtu të paguajë 10 milionë funte për transferimin e tij nga Porto, ku fitoi tripletë në sezonin e tij të parë.

Kjo do të thotë që së bashku me pagën e tij prej 125 mijë funtesh në javë, fatura e Chelseat në raport me Villas Boas qëndron diku rreth 32 milionë funte për vetëm shtatë muaj.

Chelsea arrin marrëveshje për Hulk?

Chelsea besohet të ketë arritur marrëveshjen me Porton për transferimin e super sulmuesit brazilian, Hulk.
Guardian raporton se Chelsea është pajtuar që të paguajë 38 milionë funte për Hulk në rast se dështon transferimi i Eden Hazard në Stamford Bridge.

Shuma totale e transferimit është diku rreth 60 milionë euro, që deri diku i afrohet klauzolës prej 100 milionë eurosh për Hulk, të cilin e kishin vënë drejtuesit portugez.

PSG mposht Interin për Lavezzin

Paris Saint-Germain është pranë transferimit të yllit argjentinas, Ezequiel Lavezzi, duke mposhtur kështu Interin për firmën e sulmuesit kreativ.
L’Equipe raporton se 27 vjeçari ka një klauzolë prej 31 milionë eurosh në kontratën e tij, por Napoli besohet se është pajtuar ta shesë te PSG për një shumë prej 26 milionë eurosh.

PSG e kishte konkurrent të fortë Interin në garën për Lavezzin, por Nerazzurët nuk ishin në gjendje të ofrojnë më shumë se 10 milionë euro dhe dy lojtarë të formacionit bazë.

Mediat serbe: Serbia bind FIFA-n për Kosovën

Kosova nuk do të mund të luajë miqësore me përfaqësueset ndërkombëtare dhe as nuk do të njihet nga UEFA apo FIFA në një të ardhme të afërme – ky ishte vendimi i përbashkët i arritur pas një takimi nga krerët e UEFA-s, FIFA-s dhe Federatës Serbe të Futbollit (FSS).
Kështu raportojnë mediat serbe, të cilat besojnë se takimi i mbajtur ditë më parë është një fitore e radhës në përpjekje për të penguar ndërkombëtarizimin e sportit kosovar.

Kujtojmë se FIFA kishe marrë vendimin që Kosovës t’i lejohet zhvillimi i ndeshjeve miqësore me përfaqësueset ndërkombëtare, ndërsa në diskutim këtë vendim e kishte vënë presidenti i UEFA-s, Michel Platini, një pro-serb i njohur, tek i cili kishte bërë presion FSS-ja.

“Edhe njëherë kemi gjetur pritje të ngrohtë dhe mirëkuptim nga preidenti i FIFA-s, Sepp Blatter, ashtu si nga pjesëmarrësit tjerë në këtë takim. Unë mund të shpreh kënaqësinë me akordin që arritëm”, ka theksuar kreu i FFS-së, Tomislav Karadzic.

Sidoqoftë, përderisa Serbisë i është garantuar se Kosova nuk do të pranohet në të ardhmen e afërt në UEFA dhe FIFA, kjo gjë duket se nuk ka ndodhur për miqësoret, vendimi definitiv për të cilin pritet të mirret në një takim më 29 qershor.

Një gjë është e sigurtë – Kosovës sipas të gjitha gjasave do t’i lejohet zhvillimi i miqësoreve nën kushte të caktuara, por fakti se në gjithë këtë katrahurë nuk ka kurrfarë ndikimi Federata e Futbollit të Kosovës (FFK), ashtu sikurse ndikimi i madh i Serbisë në UEFA dhe FIFA, janë dy faktorë brengosës për të ardhmen e sportit shqiptaro-kosovar.

Bayerni transferon Weiser nga Koln

Bayerni i Munichut ka kompletuar transferimin e Mitchell Weiser nga Koln, konfirmuan klubet gjermane gjatë të premtës.
18 vjeçari është pajtuar që të nënshkruajë një kontratë që zgjatë deri në vitin 2015 dhe futbollisti i ri do të bartë fanellën me numër 23.
“Ne jemi të kënaqur që me transferimin e Mitchell Weiser dhe Emre Can kemi dy prej talentëve më të mirë të rinj gjermanë që do të luajnë në skuadrën e parë”, ka theksuar drejtori i Bayernit, Christian Nerlinger.
Bayerni besohet se ka paguar 500 mijë euro për transferimin e Weiser. 

Mancini konfirmon interesimin për Van Persien

Roberto Mancini ka thënë se Manchester City mund të bëjë përpjekje për të nënshkruar me sulmuesin e Arsenalit, Robin van Persie këtë verë.
“Ne do të nënshkruajmë me një sulmues nëse ndonjëri do të largohet gjatë verës. Ne duam t’i mbajmë të gjithë”.

“Van Persie është një lojtar i klasit. Situata e tij është më ndryshe se e Clichy dhe Nasri, kur ne nënshkruam me ta. Ishte vështirë për Wenger t’i mbante ata në Londër”.

“Është e pamundshme të nënshkruajmë me Cavanin për çmimin aktual, Van Persie është më ndryshe. Cavani ka gjithçka. E doja atë kur isha te Interi dhe ai nuk shënonte shumë gola aso kohe”, ka thënë Mancini për Tuttosport.

Rodgers: Jam i bekuar që do të drejtoj Liverpoolin

Brendan Rodgers thotë se ai është “i bekuar” që ka fituar rastin të drejtojë një klub si Liverpooli.
Redsat sot edhe zyrtarisht prezantuan ish-menaxherin e Swansea si trajner të ri, pasi shkarkuan Kenny Dalglish muajin e kaluar për shkak të rezultateve të dobëta.

“Jam i bekuar që më është dhënë kjo mundësi. Dua ta falënderoj John Henry, Tom Werner dhe FSG për mundësinë që më kanë dhënë të drejtoj një klub kaq të madh”.

“Jam vërtet i ngazëllyer dhe mezi pres të filloj në këtë projekt të mahnitshëm. Premtoj t’ia dedikoj jetën time luftës për këtë klub dhe të mbroj principet e Klubit Futbollistik Liverpool si brenda ashtu edhe jashtë fushe”, ka thënë Hodgers.

Menaxheri ka thënë se vendimi për t’u larguar nga Swansea ka qenë i vështirë, pasi ai ka pasur një projekt për të mbaruar atje, por nuk ka mundur ta refuzojë ofertën e Liverpoolit.

“Ku të vjen një mundësi për të punuar në një klub që është më shumë se klub, është një sfidë profesionale që është shumë e mirë për t’u refuzuar”.

“Liverpooli është një prej dinastive të lojës. Ata kanë fituar pesë Kupa Evropiane dhe statusi i tyre është atje lart me Milanin, Interi, Barcelonën, Real Madridin dhe Bayern Munichun.


Drejtori menaxhues i Liverpoolit, Ian Ayre, trajneri i ri, Brendan Rodgers, dhe kryetari i bordit, Tom Werner, duke pozuar në Anfield

Higuain NUK largohet nga Reali

Agjenti i Gonzalo Higuain, Norberto Recasens, ka thënë se argjentinasi nuk ka synime të largohet nga Real Madridi gjatë afatit kalimtar veror.
“Gonzalo nuk do të largohet nga Real Madridi. Ai do të mbetet në klub për të plotësuar kontratën e tij. Ne kemi pasur oferta nga skuadrat tjera, por ai do të qëndrojë te Madridi”.

“Ai është shumë i lumtur në klub. Nuk është se ai luan në ndonjë divizion të tretë. Ne flasim për Madridin këtu. Sigurisht, ne duam ai të luajë rregullisht në ekipin e parë, por ai është i lumtur”, ka thënë agjenti për Goal.

Higuain ka kontratë me Realin deri në verën e vitit 2016.

Beckham ‘kopjon’ Leninin

Superylli anglez, David Beckham, duket se i ka ‘pastruar’ nga pluhuri librat e tij të historisë, ndërsa kjo po pasqyrohet në ‘lookun’ e tij të ri – ai duket njëjtë sikurse ish-lideri i Bashkimit Sovjetik, Vladimir Lenin.
Ish-futbollisti i Manchester United është shfaqur me dukjen e tij të re gjatë një mbrëmje me disa miq të tij në Londrën Veriore.

Dukja e re pritet ta shqetësojë presidentin amerikan, Barack Obama, i cili njihet si admirues i Becks dhe është takuar disa herë me të.

Lenin, i cili vdiq në vitin 1924, ishte lider revolucionar rus me filozofi marksiste, ishte intelektual dhe politikan që udhëhoqi Revolucionin e Tetorit në vitin 1917.

Kim lexon filozofinë e Nietzsches

Ylli amerikan, ëndrra e shumë meshkujve për shkak të linjave të saj atraktive, Kim Kardashian, pos që është e suksesshme në televizion dhe në jetën si biznesmene, tani duket se i është futur edhe botës intelektuale.
Kim, e njohur për porno videon e saj me reperin Ray J, ka lexuar së fundmi veprat e një prej filozofëve më të mëdhenj të të gjitha kohërave, Friedrich Nietzsches, sepse ajo e di se Kanye West është fans i madh i Nietzches.

“Kim dëshiron t’i tregojë Kanyes se ajo nuk është vetëm makinë seksi që nuk di asgjë, kështu që ajo po e lexon Nietzschen në mënyrë që t’i pëlqejë edhe më shumë Kanyes”, ka thënë një burim për The Sun.

Rita Ora në fëmijëri dhe sot (foto)

Këngëtarja nga Kosova, Rita Ora, nuk ka ndryshuar shumë nga koha kur ishte vajzë e re.
Imazhet që i shihni më poshtë janë nga ditët e saj prej adoleshenteje në shkollën Sylvia Young, ku ajo që atëherë aspiroi të jetë një këngëtare dhe aktore.

Pasi mori pjesë në X-Factor si mysafire, Rita do t’i kthehet turneut me Coldplay për dy performanca në stadiumin Emirates të Londrës, duke kompletuar kështu më shumë paraqitje në fushën e këtij stadiumi se sa shumë futbollistë të ekipit futbollistik Arsenal.







Rita Ora sot...një prej femrave më joshëse në botë!

Albëria ndryshon look-un

Këngëtarja Albërie Hadërgjonaj ka ndryshuar lookun e saj. Ajo këto ditë është shfaqur me një pamje që nuk e kemi parë deri tani.
Gjatë një emisioni në TV Klan të Shqipërisë, Albëria ka treguar se gjithmonë ka pasur frikë të ndryshojë pamjen e saj.

“Gjithmonë kam pasur frikë të ndryshoja look-un, por duhet gjithmonë të kemi diçka ndryshe mbase ndonjëherë dhe jo të qëlluar”.

“Kisha vite me flokë të gjatë dhe realisht ishin dëmtuar goxha dhe e ndjeva që ishte lodhur floku këto tre vitet e fundit”, ka thënë ajo.

Kaltrina e lumtur që është martuar

Kaltrina Selimi këto ditë është kurorëzuar me të fejuarin e saj Dritonin, dhe ndihet shumë e lumtur në këto ditë të para të martesës.
Në një ceremoni private, pa shumë të pranishëm, Kaltrina Selimi ka ndërruar unazën me Dritonin, me të cilin ishte e fejuar që një kohë të gjatë.

"Jam shumë e lumtur. Sot jam kurorëzuar me Dritonin. Ende nuk kemi menduar që të organizojmë ndonjë ceremoni martesore", ka thënë Kaltrina për Express.

Këngëtarja e hitit ”Hot” dhe shumë këngëve tjera ka më se dy vite që është në lidhje me të zgjedhurin e saj, ndërsa kohët e fundit kishte paralajmëruar rreth organizimit të dasmës së saj në Londër, ku jeton tashmë bashkëshorti i saj.

Ndërroi jetë publicisti Bardh Hamzaj

Të premten ka ndërruar jetë papritmas publicisti Bardh Hamzaj. Ai ka qenë për afro 10 vjet kryeredaktor i gazetës së përditshme Zëri, që nga viti 2000, deri më 2009.
Vite të tëra ka punuar si gazetar dhe redaktor në revistën “Zëri”, ndërsa para se të filloj punën profesionale në këtë revistë, Hamzaj ka punuar në gazetën studentore “Bota e Re”, ku për një kohë ishte edhe kryeredaktor i saj.

Hamzaj së fundmi ka punuar si redaktor edhe në Gjykatën Kushtetuese të Republikës së Kosovës.

Gjykata Kushtetuese e Republikës së Kosovës dhe kryetari i saj, Prof. dr. Enver Hasani, i shprehin ngushëllimet më të sinqerta familjes Hamzaj për këtë humbje dhe të gjithë atyre që patën rastin dhe fatin e mirë të jenë bashkëpunëtorë të tij.

Bardh Hamzaj u lind në fshatin Gllogjan të Deçanit. Shkollën fillore dhe të mesme i kishte mbaruar në vendlindje, ndërsa Fakultetin Filologjik, Dega Letërsi dhe Gjuhë në Universitetin e Prishtinës.