Aguero dëshiron shumë tituj me Cityn

Sulmuesi i Manchester Cityt, Sergio Aguero, beson se nëse skuadra e tij arrin ta fitojë titullin e Ligës Premier këtë sezon, kjo do të jetë fillimi i të ardhme të mbushur me trofe për klubin.
City është në prag të fitojë titullin e parë pas 44 vitesh, nëse shënon fitore gjatë të dielës ndaj QPR në Etihad Stadium. Por argjentinasi mendon se skuadra është e aftë të fitojë edhe shumë tituj të tjerë pas këtij.
“Dua ta fitoj titullin e këtij sezoni – dhe pastaj edhe shumë sezoneve të tjera me Cityn. Ne kemi pasur një sezon të shkëlqyeshëm por ka ende shumë për t’u pritur nga ekipi”, ka thënë Aguero për The Sun.

Lavezzi drejt Interit?

Ezequiel Lavezzi mund të largohet nga Napoli gjatë verës pasi Interi është duke treguar interesim të shtuar për të nënshkruar me argjentinasin, shkruan La Gazzetta dello Sport.
Nerazzurrët janë në treg për përforcime në sulm për shkak të paqartësive rreth të ardhmes së Diego Forlan dhe ata raportohet se e shohin 27-vjeçarin Lavezzi si një shtesë të përkryer në skuadër.
Argjentinasi besohet se ka një klauzolë blerëse në vlerën e 31 milionë eurove në kontratën e tij aktuale me Napolin, por Interi shpreson ta ulë çmimin dhe do t’i fillojë negociatat pas finales së Kupës së Italisë.
Napoli do të përballet me Juventusin më 20 maj dhe Interi nuk dëshiron ta destabilizojë skuadrën gjatë përgatitjeve për finalen e Romës.
Lavezzi iu bashkua Napolit nga San Lorenzo gjatë verës së vitit 2007 dhe që atëherë është shndërruar në lojtar kyç për skuadrën nga Serie A.

Falcao në qiell pas triumfit në Europa League

Radamel Falcao është i ngazëllyer që ka fituar trofeun e Ligës së Evropës për të dytin vit radhazi.
Kolumbiani shënoi dy gola për të ndihmuar Altetico Maridin të mposhtë Athletic Bilbaon me rezultat 3-0 në finalen e mbrëmshme, një vit pasi ai e fitoi të njëjtën garë me Porton.
“Kur erdha te Atletico thash se doja të vij në Bukuresht dhe të fitoj. Tash e falënderoj Zotin për këtë dhuratë për këtë skuadër, për bashkëlojtarët e mi dhe stafin stërvitës”.
“Ia dedikoj këtë së pari Zotit, pastaj familjes time në Kolumbi dhe po ashtu tifozëve të Atleticos”, ka thënë Falcao për UEFA.com.
Dy golat e Falcaos në Bukuresht e çuan në 12 numrin e golave të tij duke përfunduar kështu i pari për të dytin vit radhazi në këtë garë.

Di Matteo: Terry ka qenë i mrekullueshëm

Menaxheri i Chelseat, Roberto Di Matteo, ka mbështetur kapitenin John Terry pas performancës së dobët të tij në disfatën 4-1 nga Liverpooli.
Anglezi u mashtrua nga Luis Suarez në golin e parë të takimit, para se ta lejojë Jordan Henderson t’i çojë Redsat në avantazh të dyfishtë.
31-vjeçari po ashtu është kritikuar për kartonin e tij të kuq për ndeshjen gjysmëfinale të Ligës së Kampionëve kundër Barcelonës, kur e kishte goditur Alexis Sanchez dhe do të mungojë në finale.
“John ka qenë i mrekullueshëm për ne. Ai ka luajtur të gjitha ndeshjet, ai ka qenë lider dhe gjithçka që ju dëshironi te një kapiten”, ka thënë Di Matteo.
Edhe pse disfata nga Redsat u dha fund shpresave të Chelsea për përfundim në top katërsh, ata ende kanë gjasa të luajnë në Ligën e Kampionëve sezonin e ardhshëm.
Nëse Blutë mposhtin Bayern Munichun në finale të Ligës së Kampionëve më 19 maj, ata do ta fitonin biletën për të luajtur në këtë garë edhe sezonin e ardhshëm, në dëm të skuadrës që do të rreshtohej e katërta në kampionatin anglez.

Krijesë e çuditshme nënujore? (Video)

Një xhirim ku shihet një krijesë të çuditshme, për të cilën nuk dihet nëse është gjallesë deti apo ndonjë objekt, është lansuar në internet dhe ka zgjuar mjaft kureshtje.
Kamerat e kompanisë për shpime nënujore, “Oceaneering”, në thellësitë detare kanë xhiruar një masë të pazakontë, e cila nuk u ngjan gjallesave të njohura deri më tani.
Disa nga komentuesit në YouTube thonë se bëhet fjalë për ndonjë lloj meduze, ndërsa ka të tillë që flasin për krijesë jashtëtokësore. Ndërkaq, të tretët pohojnë se është placentë balene.
Ka të tillë që kanë bërë edhe shaka, ndërsa njëra prej tyre është se çfarëdo të jetë “së shpejti Lady Gaga do ta bëjë një fustan nga ajo”. 

Paratë, i shpërlajnë me ndërtime

Kreu i Shoqatës së ndërtimeve në Kosovë, Nebih Zariqi alarmon se Kosova mund të goditet nga një krizë e patundshmërive. Sipas tij, shumë ndërtues po i shpërlajnë paratë që nuk u dihet prejardhja duke ndërtuar objekte banesore kolektive dhe po e shkatërrojnë tregun pa e llogaritur se a ka kush i blen ato. Ekonomistët thonë se standardi i ulët jetësor mund të pamundësojë kthimin e kredive nga qytetarët.
Kosova do t’ua shohë sherrin banesave të shumta që po ndërtohen. Madje për shkak të tyre, vendi mund të kaplohet nga një valë e krizës së patundshmërive si ajo e Shteteve të Bashkuara të Amerikës. Ky është shqetësim i Shoqatës së ndërtimtarisë të Kosovës dhe njohësve të ekonomisë.
Kreu i Shoqatës, Nebih Zariqi thotë se shumica e ndërtimeve në vend po bëhen me para të pista që nuk u dihet origjina dhe pronarët nuk e kanë profesion ndërtimtarinë, por kanë për qëllim vetëm shpëlarjen e parave. “Shpëlarja e parave është duke u bërë në ndërtimtari. Shteti nuk ka kontroll mbi ndërtimin e objekteve kolektive dhe gjithkush investon pa e ditur se nga vijnë paratë”, thekson Zariqi, shkruan Express.
Shumë pronarë të kompanive që punojnë në këtë formë, ai thotë se nuk janë kujdesur shumë për cilësinë e ndërtimit, madje as për obligimet komunale. Kjo, sipas Zariqit, po bën që qytetarët të ngurrojnë të blejnë dhe çmimet e banesave kanë rënë shumë në disa vende.
“Kjo ka filluar të hetohet te disa ndërtues dhe njerëzit janë vetëdijesuar dhe nuk blejnë pa leje e pa kualitet të ndërtimeve. Tani për tani kemi raste në lagjen Arbëria në Prishtinë e në lagjen e Matit”, pohon Zariqi. 

Merkel: Greqia jashtë Eurozonës katastrofë

Kancelarja gjermane, Angela Merkel theksoi se do të ishte katastrofike nëse Greqia do të dilte nga eurozona, e cila nga ana e saj do të dobësohej jashtëzakonisht. ''Kemi marrë vendimin t’i përkasim një bashkimi monetar. Ky është një vendim jo vetëm monetar, por edhe politik'', deklaroi Merkel në një intervistë për rrjetin televiziv BBC.
''Do të ishte katastrofike nëse i thoshnim një vendi që ka vendosur të jetë bashkë me ne se nuk të duam më'', shtoi Merkel.
''Veç kësaj, konventat europiane nuk e lejojnë. Njerëzit në gjithë botën pyesin: kush do të jetë tjetri. Eurozona do të dobësohej jashtëzakonisht'', theksoi ajo.
''Greqia është në qendër të planeve evropiane të shpëtimit, ka përpara një rrugë të gjatë e të vështirë, por do të ishte një gabim kolosal politik të lejohej që Greqia të braktiste euron'', shtoi Merkel. 

Diskriminohet Evropa, favorizohet Serbia

Vetëm nga Serbia dhe Maqedonia, Kosova importon mallra pothuajse sa nga të gjitha vendet anëtare të Bashkimit Evropian (BE).
Përfaqësuesit e biznesit thonë se me politikat e veta, Kosova po i favorizon vendet të cilat e dëmtojnë vazhdimisht ekonominë e vendit nëpërmjet kontrabandës, përderisa një favorizim i tillë nuk ndodh me vendet e BE-së.
Importi nga Serbia dhe Maqedonia, të cilat janë vende anëtare të CEFTA-s, mund të realizohet pa iu nënshtruar taksave doganore, ndërsa një gjë e tillë nuk është e mundur për vendet evropiane, shkruan Zëri.
Nga ana tjetër, eksporti i Kosovës në BE është i liruar nga dogana. 

BE 5.2 miliardë euro për Greqinë

Greqia do të marrë sot një pagesë prej 5.2 miliardë euro nga kreditorët e saj publikë, pavarësisht nga pasiguria politike, që peshon në vend, por pagesa e kësteve të ardhshme për ndihmë është në diskutim paralajmëroi sot një ministër evropian.
“Pagesa do të bëhet sepse është miratuar tashmë nga donatorët e fondit”, deklaroi një zëdhënës i Komisionit Evropian, Amadeu Altafaj, i pyetur në qoftë se Greqia do të marrë siç pritet 5.2 miliardë euro, që pritet t’i jepen më 10 maj. 

NBA: Heat eliminojnë Knicksat

Miami Heat ka arritur të mposhtë New York Knicks me rezultat 106-94 në ndeshjen e pestë mes tyre, për të siguruar biletën për në rundin e dytë të playoffit të NBA-së.
LeBron James shënoi 29 pikë dhe Dwayne Wade 19 të tjera, derisa Heat kualifikohen më tej duke fituar 4-1 në rundin e parë. Heat në sfidën e radhës do të takohen me Indiana Pacers.
Nga ndeshjet tjera të mbrëmshme, Memphis Grizzlies ka shmangur eliminimin duke mposhtur Los Angeles Clippers me rezultat 92-80 dhe për të ngushtuan në 3-2 disavantazhin.
Marc Gasol shënoi 23 derisa Zach Randolph 19 pikë për Grizzlies. Ndeshja e gjashtë zhvillohet të premten në Los Angeles.

Marchisio i befasuar me suksesin e Juves

Shpallja e Juventusit kampion i Italisë këtë sezon e ka befasuar mesfushorin Claudio Marchisio.
“Jam i lumtur që ne kemi qenë në gjendje të kompletojnë ëndrrën tonë për të fituar Scudetton. Ne e fituam Ligën falë punës së fuqishme dhe sakrificave”.
“Dy sezonet e fundit nuk shkuan mirë për ne, por ne kemi arritur diçka vërtet të papritur këtë vit”, ka thënë Maschisio.

Bielsa: Humbëm për fajin tim

Menaxheri i Athletic Bilbao, Marcelo Bielsa, ka marrë përgjegjësinë e plotë për paraqitjen e dobët të skuadrës së tij në disfatën e mbrëmshme 3-0 nga Altetico Madrid në finalen e Europa League.
Baskët arritën në finale duke bërë paraqitje të shkëlqyeshme dhe duke mposhtur favoritë si Manchester United dhe Schalke, por ishin të paaftë ta shfaqin lojën e tyre të zakonshme edhe në finale.
“Ndjehem tmerrësisht i zhgënjyer. Ne nuk luajtëm mirë. Ne luajtëm si dëshironte Atletico ne të luajmë, duke u lejuar atyre të luajnë në mënyrën e tyre. Është e qartë se unë jam përgjegjës se si luajti skuadra ime dhe ne nuk e arritëm qëllimin tonë”.
“Kundërshtarët merituan të jenë fitues. Kishte një dallim të madh në mes të dy skuadrave”, ka deklaruar argjentinasi për faqen zyrtare të UEFA-së.

Simeone krenar me skuadrën e tij

Trajneri i Atletico Madridit, Diego Simeone, ka lavdëruar lojtarët e tij pas fitores 3-0 ndaj Athletic Bilbao në finalen e Europa League.
Argjentinasi po ashtu ka përmendur në veçanti paraqitjen e sulmuesit Radamel Falcao, i cili shënoi dy gola të shkëlqyeshëm në pjesën e parë.
“Skuadra luajti shumë mirë dhe Radamel kishte një ndeshje të jashtëzakonshme. Por meritat u shkojnë të gjithë lojtarëve. Ne e nxjerrim në hartë rrugën e tyre, por janë ata që i realizojnë gjërat”.
“Kjo është një kohë e shkëlqyeshme për të kujtuar të gjithë të cilët kanë besuar në ne”, ka thënë Simeone.
Madrilenët tash kanë një tjetër ndeshje të rëndësishme, atë të së dielës ndaj Villarrealit, dhe kanë nevojë për fitore në El Madrigual për të pasur gjasa për vendin e katërt që dërgon në Ligën e Kampionëve, e ku aktualisht ndodhet Malaga.

Bolt ende shpreson t’i bashkohet United

Sprinteri nga Xhamajka, Usain Bolt, edhe një herë ka deklaruar se dëshiron ta provojë veten në futboll te Manchester United.
Në një intervistë me Diario, ai ka zbuluar se ëndrra e tij është të veshë fanellën e futbollistit profesionist pas disa vitesh.
“Vërtet dua ta provoj futbollin pasi mendoj se mund të jem një lojtar i mirë. Mendoj se jam mjaft i mirë për të luajtur te Manchester United. Zakonisht luaj në mesfushë. Luaj me këmbën e majtë dhe jam i shpejtë. Nuk e di se kush mund të krahasohej me mua”, ka thënë atleti. 

Mertesacker: Unë e solla Podolskin te Arsenali

Per Mertesacker thotë se ai kishte qenë faktor i rëndësishëm që Lukas Podolski t’i bashkohet Arsenalit.
“Unë kam folur me të disa herë dhe i kam dhënë një referencë të mirë këtij klubi. Ai do të kënaqet gjatë kohës së tij këtu. Disa gjëra janë ndryshe në Gjermani krahasuar me këtë klub, veçanërisht fusha këtu. Ju nuk keni shtypin, as tifozë këtu rrotull dhe mund të përqendroheni në stërvitje”.
“Këtu është shumë qetë dhe kjo është gjë e mirë, veçanërisht për të, pasi ai është shumë i famshëm në Gjermani dhe ka luajtur shumë mirë në disa turnetë e mëdha të fundit për ta”.
“Ai është shumë i popullarizuar dhe kjo ndonjëherë mund të jetë e rrezikshme pasi çdokush bën presion në të, por këtu ai mund të përqendrohet në veten dhe në skuadrën. Ky është një vend i mrekullueshëm për të për të zhvilluar paraqitjet e tij si futbollist dhe si person, siç kam bërë unë vitin e kaluar”, ka thënë Mertesacker. 

Milito lavdëron Stramaccionin

Diego Milito ka lavdëruar ndikimin që ka pasur te Interi trajneri i përkohshëm Andrea Stramaccioni.
Interi ka humbur vetëm një herë që nga caktimi i Stramaccionit si pasues i Claudio Ranierit, pavarësisht faktit se ai është më i ri se kapiteni Javier Zanetti.
“Është e qartë se unë nuk e kam njohur atë, siç nuk e ka njohur asnjëri prej neve. Për dikë i cili është vetëm 36-vjeçar, ai vërtet më ka befasuar. Trajneri është mirë i përgatitur, di si të imponojë personalitetin e tij në skuadër, ka treguar vetëbesim dhe na ka dhënë edhe neve vetëbesim”.
“Sigurisht gjërat kanë ndryshuar në fushë, pasi ai dëshiron një skuadër e cila gjithmonë është protagoniste dhe sulmon e para. Vetëm fakti se ai nxjerr tre sulmues është i rëndësishëm, edhe për kundërshtarët të cilët kanë nevojë të jenë më të kujdesshëm dhe për ne që kemi më shumë opsione”, ka thënë Milito. 

Moggi: Yllin e tretë do t’ia ngulja Morattit në ballë

Ish-drejtori i Juventusit, Luciano Moggi, është përfshirë në debatin rreth “titullit të 30-të” të Zonjës së Vjetër në Serie A, duke thënë se yllin e tretë të Juves do t’ia ngulte në kokë presidentit të Interit, Massimo Moratti.
Pas skandalit të shumëpërfolur Calciopoli në vitin 2006, Juventusit iu morën dy Scudetto, një nga të cilat iu dha Interit.
Mirëpo, dëshmitë e fundit rreth kësaj çështjeje nxorën edhe klubet tjera të përfshira në skandal, madje edhe më shumë sesa Juventusi. Por, për shkak të pamundësisë së vënies së ligjit nëse një çështje kalon pesë vjet, gjërat kanë mbetur ashtu si janë – Juventusi ka zyrtarisht 28 tituj, ndërkohë që klubi thotë se ka fituar 30-të të tillë.
Sidoqoftë, njeriu në qendër të skandalit, Luciano Moggi, mendon se Juventusi e meriton yllin e tretë në fanellë.
“Sigurisht që Juventusi duhet ta vë yllin e tretë në fanellë. Nëse do të varej nga unë, do t’i ngulja Morattit në ballë”, ka thënë Moggi përRadio 24.

DJDalool në bashkëpunim me Andos

DJ i njohur kosovar DJ Dalool këto ditë ka realizuar edhe një bashkëpunim të ri.
Ai kësaj radhe vjen në bashkëpunim me këngëtarin Andos, me këngën ‘Ti je ajo’. Kënga i takon zhanrit progresive-house dhe pritet t’i pushton klubet e natës.
Dj Dalool së fundmi realizoi këngën ‘Ta Buena La Cosa’ në bashkëpunim me Dia dhe Mark Hardy.

Cilat janë fantazitë më të shpeshta erotike te femrat?

Në seksualitetin femëror mbizotërojnë fantazitë ekzibicionale (p.sh. shikimi i mashkullit në drejtim të femrës mund të veprojë si ndonjë afrodiziak i fuqishëm, edhe në fantazi edhe në realitet).
Pothuajse në tërësi mungojnë fantazitë voajere, derisa tipi i sadomazohizmit është shumë i përhapur: shumë femra ëndërrojnë sikur mashkulli i merr në përqafim fuqishëm. Atë fantazi mund ta lexojmë si porosi të pavetëdijshme apo si synim që femra nuk dëshiron të marrë mbi vete përgjegjësinë për seks.
A mund të ndahen fantazitë me partnerin? Po, por jo përherë. Kjo mund të ndodhë kur ndër partnerët ekziston mirëkuptimi dhe bashkëpjesëmarrja.
humica e meshkujve vërtet mund të bien në krizë kur dëgjojnë se partnerja e tij fantazon për seks me meshkuj të tjerë. Andaj, është mirë që të mos teprohet: pak fshehtësi dhe fshehje të fantazive vetjake do të jenë një afrodiziak magjik. 

Orangutangët komunikojnë me iPad

Në një kopsht zoologjik në Miami, kanë filluar të bëhen disa eksperimente të veçanta te orangutangët, të cilëve u mundësohet shfrytëzimi i ‘kompjuterëve tableta’ të Apple, si mjete komunikimi.
Sipas ekspertëve, qëllimi i eksperimentit është që të ndihmojnë në tejkalimin e dallimeve mes njerëzve dhe majmunëve.
Programi që e përdorin orangutangët është i dedikuar për personat autistë, ndërsa në ekran shfaqen fotografi dhe objekte të ndryshme. Arsimtari thotë emrat e objekteve, ndërsa majmuni duhet ta shtypë butonin se për kë është fjala.
Punonjësit në këtë eksperiment thonë se orangutangët janë shumë të mençur, mirëpo paaftësua e tyre për të folur, i kufizon në shfaqjen e inteligjencës së tyre.
Prandaj, thonë ata, përdorimi i iPad-ëve ua jep mundësinë që të tregojnë se çfarë dinë, çfarë janë në gjendje të bëjnë dhe çfarë duan.

Keni apo nuk keni menstruacione në menopauzë?

Ndikimi më i dukshëm i hormoneve në menopauzë është nxitja e menstruacioneve të rregullta.
Cikli menstrual me ndihmën e hormoneve mund të nxitet edhe në moshën 70-vjeçare, mirëpo cikli atëherë është vetëm pasojë e rrudhave e mureve të brendshme të mitrës (për shkak të pranisë së hormoneve), e cila është përgatitur që të pranojë shtatzënësinë eventuale (disa lloje të mjekimeve plotësuese hormonale nuk shkaktojnë menstruacione).
Mirëpo, riprodhimi është tjetër gjë: është i pamundshëm nga momenti kur vezoret kanë pushuar së punuari, si edhe te femrat të cilat marrin pilula kontraceptive, sepse edhe atëherë cikli menstrual shkaktohet nga terapia plotësuese, pra krejtësisht në mënyrë artificiale.
Dobia nga terapia assesi nuk është zgjatja e ciklit të menstruacioneve, por pengimi i vështirësive dhe i sëmundjeve serioze.

USB monitori i Philipsit për afaristë

Philips paraqet USB monitorin 221S3UCB brenda familjes së vet të monitorëve S-Link që i dedikohet përdoruesve afarist. Monitori i dedikohet kryesisht shfrytëzuesve afarist me kërkesa më të vogla të cilët thjeshtë kanë nevojë për më shumë hapësirë ekrani pa ndonjë investim shtesë në nënsistemin grafik të kompjuterit.
Zgjidhja e Philips ka diagonalen e ekranit prej 21.5 inç, matricën TN të rezolucionit të plotë HD (1,920 x 1,080 pikë), LED ndriçimin e prapavijës dhe mundësinë e përkuljes dhe rotacionin e ekranit dhe rregullimin për lartësi. Monitori në kompjuter lidhet përmes USB ndërfaqes së përmendur, derisa specifikat tjera përfshijnë kohën e përgjigjes prej 5 milisekonda, ndriçimin prej 150 cd/m2 dhe marrëdhënien e kontrastit prej 1,000 : 1. Çmimi i propozuar për shitje pa tatim është rreth 145 euro.

Fotografitë artistike nxisin hetim ndërkombëtar për vrasje (Foto)

Disa fotografi artistike të një femre në Vjenë kanë nxitur një hetim policor të Interpolit me dyshimin për vrasje.
Sigrid Fleckseder dhe partneri i saj, Christian Thomas, në kuadër të projektit “Katër stinët e vdekjes” kishin bërë disa fotografi, ku Sigrid kishte pozuar si trup i vdekur.
Ata e kishin dërguar flesh memorien në një dyqan në kryeqytetin austriak për t’i nxjerrë fotografitë, mirëpo stafi është trishtuar aq shumë saqë i ka lajmëruar detektivët e Interpolit.
“Ato ishin aq bindëse. I mashtruan shumë forca policore”, kanë thënë burime të policisë.
Sigrid e kuptoi se ishte hapur një çështje ndërkombëtare rreth “vrasjes” së saj, atëherë kur policia ishte shfaqur në derën e shtëpisë, për të cilën ishte dhënë adresa e kthimit të fotografive.
“Nuk e di kush ishte më shumë i befasuar – unë që isha këtu, apo ata që më gjetën të gjallë”, ka deklaruar artistja.

Azem Syla nuk është më banor i Zvicrës

Deputeti i Kuvendit të Kosovës, Azem Syla dje është çregjistruar nga vendbanimi i tij zyrtar i deritashëm në komunën Biberist të Kantonit të Solothurnit, në Zvicër. Me këtë ai ka shpallur edhe kthimin përfundimtar në Kosovë, duke plotësuar detyrimin që ka marrë nga Gjykata Administrative e Soloturnit. Kjo e fundit i pati caktuar Sylës 15 majin 2012 si datë për lëshimin e Zvicrës.
“Azem Syla me bashkëshorten e tij Hysnije Sylën janë çregjistruar përfundimisht nga komuna e Biberistit”, ka thënë kryetari i komunës Martin Blaser për gazetën “Aargauer Zeitung”.
Blaser ka thënë se ka biseduar personalisht me Sylën dhe ia ka kumtuar se do të kthehet në Kosovë. Me këtë akt po përmbyllet kapitulli me lejen e qëndrimit në Zvicër të deputetit kosovar, transmeton albinfo.ch.
Siç është njoftuar tashmë, Azem Syla ka jetuar në Zvicër nga viti 1994 ndërsa në vitin 1999 është pajisur me lejen e përhershme të qëndrimit (C). Pasi që aktivitetet e tij politike të kryera në Kosovë u bënë të njohura për publikun, Zyra për Migracion e Solothurnit e kishte anuluar atij lejen e qëndrimit.
Shuma prej më shumë se 400 mijë frangash për të cilën ai ngarkohet se e ka marrë pa të drejtë nga ndihmat sociale është objekt i një hetimi penal që po e zhvillon Prokuroria publike e Solothurnit.

Riformulimi i neneve të Kodit në dorën e Kuvendit

Presidentja Atifete Jahjaga ia ka lënë Kuvendit të Kosovës që të dalë me propozime për formulimin e neneve të diskutueshme në Kodin Penal, të cilin një ditë më parë presidentja Atifete Jahjaga e ka kthyer mbrapsht, pa dhënë asnjë propozim se çfarë duhet të bëhet.
Zëdhënësi i Presidencës së Kosovës, Arbër Vllahiu, ka thënë se presidentja e Kosovës e ka kryer punën e saj dhe se tashmë i mbetet Kuvendit që të merret me Kodin, transmeton Koha.net.
Sipas tij, presidentja ka vepruar konform nenit 84 pika 6 të Kushtetutës së Republikës së Kosovës.
“I mbetet Kuvendit tash të japë propozimin e vet për pjesën e cila është e debatueshme”, ka thënë ai.

“Reporterët pa Kufij” mirëpresin kthimin e Kodit në Kuvend

Reporterët pa Kufij kanë përshëndetur kthimin në Kuvend të Kodit të ri Penal të Kosovës nga ana e presidentes Atifete Jahjaga, e cila ka kërkuar rishqyrtimin e neneve që kërcënojnë lirinë e shtypit.
“Ne përshëndesim këtë vendim nga presidentja, e cila ka treguar se është e vëmendshme ndaj shqetësimeve të gazetarëve vendas dhe komunitetit ndërkombëtar," ka thënë organizata për lirinë e shtypit.
“Është jetike që gazetarët të gëzojnë mbrojtje ligjore dhe të mos jenë subjekt i dënimeve penale pse po e kryejnë punën e tyre. Presidentja duhet të ndjekë të gjitha mjetet brenda mandatit të saj për të mbrojtur organizatat mediatike nga presionet ligjore, që nuk bëjnë gjë tjetër, pos që forocojnë vetë-censurën”, vlerësoi grupi “Reporterët pa Kufij”, njofton Rel.
Dy nenet e kontestueshme nga asociacionet vendore dhe ndërkombëtare të mediave, neni 37 dhe 38, janë cilësuar si “përpjekje për të heshtur gazetarinë hulumtuese”.
Nenet në fjalë kanë të bëjnë me sanksionimin e shpifjes dhe zbulimin e burimit të informacionit në rastet kur bëhet fjalë për procedime kriminale.

Verbani: Jam viktimë e vehabistëve

Bashkësia Islame e Kosovës (BIK)nuk i lufton vehabistët dhe rrymat ekstreme që veprojnë në Kosovë. Kështu thotë Musli Verbani, imam dhe kryetar i Këshillit të BIK-ut në Kaçanik. Për shkak se i ka luftuar këto grupe, beson se është shkarkuar nga detyra që kishte si imam. Thotë se askush nuk e di se çfarë bëhet me milionat e BIK-ut.
Musli Vërbani , imam në xhaminë Gazi Sinan Pasha, njëherësh kryetar i BIK-ut në Kaçanik, thotë se “në Këshillin e BIK-ut në Kaçanik, jo që ka pasur zgjedhje të mirëfillta, por në esencë nuk ka ekzistuar kurrfarë Kuvendi Zgjedhor, nga shkaku se imamët nëpër xhamitë e tyre nuk kanë mbajtur zgjedhje më 13 janar dhe nuk i kanë zgjedhur delegatët e tyre”.
“Disa huliganë kanë ardhur me imamët e tyre dhe kanë mbajtur zgjedhje, kuptohet me miratimin e Sabri Bajgorës dhe nën menaxhimin e Bashkësisë Islame të Kosovës. Këto nuk janë zgjedhje, por instalim i zgjedhjeve. Zgjedhje diktatoriale – komuniste, të cilat janë të parapara me Kushtetutën e BIK-ut, e cila vetëm është përkthyer prej Kushtetutës të Bashkësisë Islame të Jugosllavisë të vitit 1989”, thotë ai në një intervistë për Express.
Ndërsa, për konfliktin e tij me kryetarin e Këshillit të BIK-ut, Sabri Bajgoren thotë se ai ka ndodhur për shkak të mospranimit të zgjedhjeve, “sepse në të njëjtën ditë ka qenë një delegacion prej shtatë anëtarëve të xhematit të xhamisë që kanë shkuar të bisedojnë për gjendje e tensionuar në Kaçanik”.
“Unë rastësisht kam zbritur nga vetura, e kam pyetur për gjendjen në Kaçanik. Ai nuk ka dashur të flasë duke më injoruar tërësisht dhe me një fjalë deshi të thotë se “nuk i intereson gjendja për Kaçanik” dhe aty ka ndodhur një konflikt verbal me të”, thotë Verbani. 

Ramush Haradinaj të enjten në mesditë në Prishtinë

Ramush Haradinaj do të kthehet të enjten në mesditë në Prishtinë, pas gati dy vitesh që ndodhet në burgun e Hagës. Ish-komandantit të UÇK-së iu mundësua mbrojtja në liri, pak kohë përpara se Tribunali ta thotë fjalën përfundimtare në këtë proces gjyqësor.
Pas shumë kohe qëndrimi në paraburgim nga Tribunali i Hagës, ai do t’i bashkohet familjes së tij, njofton “Express”.
Ish-komandanti i UÇK-së nga Rrafshi i Dukagjinit dhe më vonë kryeministër i vendit vetëm për njëqind ditë, është liruar të martën nga paraburgimi.
Deri në marrjen e një vendimi përfundimtar ndaj tij, ai do të mbrohet në liri. Ky ishte vendimi i Tribunalit, të cilin as Prokuroria nuk e kundërshtoi.
Ndonëse gjatë ditës së mërkurë nga Tribunali i Hagës, nuk është konfirmuar lajmi në mënyrë zyrtare për lirimin e Haradinajt, në familjen e tij në Gllogjan të Deçanit, këtë e kanë kuptuar të martën.
Këtë e konfirmon për Express, Vetoni, njëri nga vëllezërit e Ramush Haradinajt.
Sipas tij, lajmi për lirimin e të vëllait nga Tribunali i Hagës u ka shkuar të martën, ndonëse detajet e tjera nuk i di.
Megjithëkëtë, edhe pse nuk di për shumë të tregojë se çfarë do të ndodhë në orët në vazhdim, Vetoni konfirmon se Ramush Haradinaj pritet të zbresë me aeroplan në Aeroportin Ndërkombëtar “Adem Jashari” në Prishtinë.
Ardhja e tij pritet ndodhë të enjten, rreth orës 11. E, familja e tij në Gllogjan të Deçanit, lajmin për lirimin e djalit të tyre e kanë pritur me gëzim të madh.
Hilmi Haradinaj, babai i ish-kryeministrit, ka deklaruar se nuk është gëzuar vetëm ai, por e gjithë Kosova.
“Nuk jemi gëzuar vetëm ne, por edhe Deçani e krejt Kosova, sepse Ramushi nuk është veç i familjes Haradinaj, po është i krejt Kosovës. E, unë e shoh shumë ditë të madhe dhe shumë gëzim të madh këtë ditë”, është shprehur Hilmi Haradinaj.
Ai beson shumë në drejtësi dhe thotë se sikurse herën e parë, edhe kësaj radhe, djali i tij do të dalë i pafajshëm.
“Gjithnjë e kam ditë se Ramushi do të del i pafajshëm, sepse Ushtria Çlirimtare e Kosovës e ka bërë një luftë mbrojtëse, e lufta e drejtë dhe drejtësia gjithmonë triumfon”, ka thënë Hilmi Haradinaj.
Pas vendimit të Tribunalit për lirim me kusht të Haradinajt, Prokuroria ka pasur kohë deri të mërkurën në orën 12 të bëjë ankesë, por një veprim të tillë nuk e ka bërë.
Procesi i rigjykimit ndaj ish-eprorit të UÇK-së dhe dy bashkëluftëtarëve të tij, Idriz Balaj dhe Lahi Brahimaj, pritet të përfundojë diku nga mesi i këtij viti.
Gjykata Ndërkombëtare për Krime Lufte në ish-Jugosllavi, ka vendosur që më 25 dhe 26 qershor të këtij viti, të mbahen seancat përmbyllëse të procesit gjyqësor kundër ish-kryeministrit të Kosovës, Ramush Haradinaj dhe dy ish-bashkëluftëtarëve të tij, Idriz Balaj dhe Lah Brahimaj.
Gjykata ka kërkuar që deklaratat përfundimtare të prokurorisë dhe të mbrojtjes të paraqiten me shkrim deri më 11 qershor.
Ish-kryeministri i Kosovës, Ramush Haradinaj dhe dy të akuzuarit e tjerë, Idriz Balaj dhe Lah Brahimaj, ngarkohen me “krime të kryera gjatë luftës në Kosovë”.
Rigjykimi i pjesshëm i ish-komandantëve të Ushtrisë Çlirimtare të Kosovës ka nisur në muajin gusht të viti 2011.
Ramush Haradinaj ishte shpallur të pafajshëm më 3 prill të vitit 2008 nga akuzat për krime kundër njerëzimit, ndërsa një rigjykim i pjesshëm kishte filluar vitin që shkoi për shkak të paraqitjes së dëshmive shtesë në procesin kundër tyre.

Punëtorët e Rexhepit hetohen për falsifikime

Zyrtarët e Ministrisë së Punëve të Brendshme (MPB) duket se kanë aftësi të “jashtëzakonshme” pune. Në të njëjtën kohë kur ata ndodhen jashtë Kosovës, në zyrat e tyre në Prishtinë “nënshkruhen” dokumente të rëndësishme nga ta.
Kështu të paktën figuron në dokumentet zyrtare, të cilat i ka siguruar “Zëri”, ku vërehet qartazi se si Komisioni për Shtetësi, i përbërë nga zyrtarët, Islam Caka, Dukagjin Dinaj, Blerim Camaj dhe Drenusha Zeneli, ka nënshkruar vendime për lirim dhe dhënie të nënshtetësisë në kohën kur nuk kanë qenë fare në Kosovë.
Janë pikërisht këto dyshime që kanë shtyrë Departamentin Special Antikorrupsion të Policisë së Kosovës, që me autorizim të Prokurorisë Speciale t’i fillojnë hetimet për keqpërdorim të detyrës zyrtare.
Ditë më parë “Zëri” ka raportuar se si hetuesit policorë kanë kërkuar nga Ministria e Punëve të Brendshme që t’ua dërgojë komplet dosjen me të gjitha udhëtimet që katër zyrtarët e këtij dikasteri i kanë bërë gjatë periudhës 2010-2011 dhe gjithashtu, siç shkruan në kërkesën e policisë, “të gjitha lëndët e gjetura nga auditori i brendshëm ku janë gjetur shkeljet, auditori i datës 25.10.2011”. 

Trofeu i EL shkon në Madrid

Atletico Madridi ka triumfuar në finale të Europa League duke e mposhtur Athletic Bilbaon me rezultat 3-1 në ndeshjen e zhvilluar në Arena Nationala në Bukuresht.
Ekipi kryeqytetas luajti më mirë në fraksionin e parë të lojës duke arritur të realizojë dy gola.
Ishte minuta e shtatë kur Radamel Falcao pranoi një top nga Diego për ta kaluar Atleticon në epërsi.
Kolumbiani Falcao e dyfishoi epërsinë (34’) pas asistimit të Arda Turan dhe me këtë rezultat skuadrat shkuan në pushim.
Në gjysmën e dytë, më të mirë në fushë ishin baskët, të cilët u përpoqën ta përmbysnin rezultatin duke krijuar raste, mirëpo nuk mundën ta thyenin mbrojtjen madrilene.
Ndërkohë që Bilbao nuk mund të shënonte, këtë e bëri Atletico me anë të Diegos, i cili fundosi çdo shpresë të baskëve në minutën e 85-të.
Atletico Madridi është fitues i Europa League për edicionin 2011/2012, ndërsa Athletic Bilbao do ta kërkojë një trofe këtë sezon në finale të Kupës së Mbretit kundër Barcelonës.