Spalletti përjashton rikthimin në Serie A

Trajneri i Zenit St Petersburg, Luciano Spalletti, thotë se ai nuk është i interesuar të rikthehet në Serie A.
“Jo, në Itali atje ka shumë presion. Unë jam shumë i moshuar për t’u rikthyer atje dhe shoh po thuajse çdokënd duke u shkarkuar”.
“Përderisa nuk ka ndonjë befasi të madhe, jam shumë i lumtur këtu”, ka thënë Spalletti për La Repubblica.
Trajneri italian ka drejtuar Zenitin drejt dy titujve radhazi në kampionatin rus.

Gwen Stefani, e pëlqyera e Rita Oras

Rita Ora thotë se ikona e saj e stilit është Gwen Stefani, pasi gjithmonë e ka admiruar pamjen e saj me flokë bionde dhe të kuq të theksuar të buzëve.
“Gwen Stefani gjithmonë e bën si duhet. Dhe më pëlqejnë biondet. Flokët e mia natyrale janë shumë të zeza dhe kaçurrela, por i kam ndryshuar krejtësisht. Gjëja e parë që kam bërë kur kam dalë nga shkolla ishte të blej një shishe zbardhues të flokëve”, ka thënë këngëtarja me prejardhje shqiptare.
21-vjeçarja po ashtu ka thënë se i pëlqen të përziejë veshjet e rrugës me krijime të disenjatorëve të famshëm, por gjithmonë kujdeset të ketë vendosur edhe të kuq të buzëve.
“Më pëlqejnë veshjet. Kam veshje të rrugëve që mbushin dollapin tim të veshjeve dhe pastaj ‘këndin e artë’ të veshjeve të disenjatorëve: Mark Fast, Galliano, Oscar de la Renta. Më pëlqen koleksioni i ri i Kanye West. Por ajo që më dallon mua është buzëkuqi”, ka thënë Ora për revistën Grazia.

Së shpejti ‘Shpija e Kosovës 3’

Së shpejti pritet të fillojnë përgatitjet për edicionin e tretë të reality shou, “Shpija e Kosovës”.
Kësaj radhe “Shpija e Kosovës” pritet të jetë me një format më ndryshe se që jemi mësuar ta shohim.
Sipas burimeve të Telegrafit, konkursi për aplikantën që duan të jenë pjesë e këtij reality shou, do të publikohet së shpejti.
Në edicionin e dytë të “Shpija e Kosovës” fitues ishte Ylll Dervishi, i njohur si Buci. 

Limaj shpallet i pafajshëm

Trupi gjykues në rastin “Kleçka”, para pak çastesh i ka shpallur të pafajshëm për të gjitha pikat me të cilat akuzoheshin ish-luftëtarët e UÇK-së, deputetin e PDK-së Fatmir Limaj dhe tre bashkëluftëtarët e tij - Nexhmi Krasniqi, Naser Shala dhe Naser Krasniqi.
Ndaj katër të akuzuarve për krime lufte, i njohur si rasti “Kleçka”, trupi gjykues kishte vendosur kohë më parë që të vazhdonte gjykimi, me arsyetimin se ata gjatë kohës për të cilën akuzohen, kanë pasur pozita komanduese, njofton KosovaPress.

Kosova pret njohje nga shtetet myslimane

Kosova pret të njihet nga vendet myslimane në Afrikë dhe në Azi, përfshirë edhe vendet e prekura nga Pranvera Arabe, ka thënë për mediat turke, kryetari i Kuvendit të Kosovës, Jakup Krasniqi.
Krasniqi javën e kaluar ishte në një vizitë në Turqi, ku kishte takime edhe me Kryeministrin Recep Tayyip Erdogan, si dhe Kryetarin e Parlamentit turk, Çemil Çiçek. Në një intervistë për ditoren turke Hurriyet Daily News, ai ka thënë se Turqia është një nga shtetet që i ka dhënë mbështetjen më të madhe Kosovës.
"Ne jemi duke biseduar me shtetet myslimane, si Pakistani, Indonezia dhe Bangladeshi; vendet afrikane dhe vendet që kanë kaluar nëpër Pranverë Arabe, si dhe me vendet e Amerikës së Jugut", tha Krasniqi.
Kosova, një vend i varfër me një popullsi shumicë shqiptare, shpalli pavarësinë në shkurt të vitit 2008. Territori menjëherë u pranua nga Shtetet e Bashkuara të Amerikës dhe vendet kryesore të Bashkimit Evropian. Krasniqi tha se Kosova ka marrë nga BE premtimet për liberalizim - brenda dy viteve - të vizave.
Kryeparlamentari thotë se marrëdhëniet ndërmjet Kosovës dhe Serbisë nuk janë zbutur ende, për shkak të rezistencës së palës serbe për të ndërtuar marrëdhënie me Kosovën.
"Ne duam ta përmirësojmë dialogun me Serbinë, me ndihmën e BE-së. Megjithatë, politika e jashtme e politikanëve serbë në Beograd shikon kombet tjera në rajon".
Krasniqi tha gjithashtu se ka mundësi të mëdha dhe të reja në Kosovë për biznesmenët turq, dhe se Kosova pret që ata të bëjmë më shumë investime në Kosovë.
"Ka mundësi të reja që duhet të shfrytëzohen nga biznesmenët turq. Kosova është një vend i pasur, për shembull në aspektin e burimeve natyrore. Dhe, si një vend që e po merr veten nga lufta, Kosova ka nevojë për këto investime në mënyrë që ta riparojë ekonominë e sajë të dëmtuar", tha Krasniqi.

Sot vendoset për Limajn

Të mërkurën në Gjykatën e Qarkut në Prishtinë do të mbahet seanca përmbyllëse gjyqësore për rastin “Kleçka”, në të cilin janë të përfshirë deputeti, Fatmir Limaj, Naser Shala, Naser Krasniqi dhe Nexhmi Krasniqi.
Lajmin e ka konfirmuar për “Epokën e Re”, Tahir Rrecaj, avokat mbrojtës i Limajt.
Avokati Rrecaj ka shprehur optimizëm se trupi gjykues i kësaj gjykate do të shpallë një aktgjykim lirues për të gjithë të akuzuarit në rastin Kleçka.

Sekiraça strehohej në banesën e Zvonkos

Strehën më të sigurt Enver Sekiraça e kishte gjetur një kohë të gjatë në shtëpinë e Zvonko Veselinovicit. Dy njerëzit – sinonim të krimit, njëri shqiptar e tjetri serb, në veri të Kosovës ecnin e vepronin pa asnjë pengesë falë policëve të korruptuar në krye me ish-komandantin e stacionit policor të veriut, Milija Miloshevic.
Enver Sekiraça i kërkuar nga Interpoli ka qëndruar në shtëpinë e Veselinovicit në Mitrovicë dhe në Serbi afër kufirit me Kosovës, derisa lëvizja e lirë i ishte kufizuar edhe nikoqirit të tij, shkruan “Koha Ditore”.
Atëherë, Sekiraça, i kërkuar për vrasjen e policit Triumf Riza, kishte arritur ilegalisht të shkonte në Republikën e Irlandës. Zbulimi i vendit ku po fshihej, kishte rezultuar me nisjen e procedurave për ekstradimin e tij, të cilat mbetën në tentativë për shkak se ai është larguar në një vend që tash për tash nuk dihet se ku.
Më 12 nëntor të vitit të kaluar autoritetet irlandeze patën njoftuar ato kosovare se në shtetin verior evropian është arrestuar një person i quajtur Enver Sekiraça.
Enver Sekiraça (1973) i lindur në Prishtinë është shpallur person në kërkim që nga viti 2007 pas vrasjes së policit Trumf Riza në gusht të këtij viti.

Në Bruksel për legjislacionin e punësimit

Në kryesimin e ministrit të Ministrisë së Punës dhe Mirëqenies Sociale, Nenad Rashiq, të mërkurën ka udhëtuar për në Bruksel një delegacion ekspertësh të çështjeve sociale, të punës dhe punësimit si dhe të sferës së legjislacionit e pensioneve i Ministrisë së Punës dhe Mirëqenies Sociale.
Ky delegacion më 3 dhe 4 maj do të merr pjesë në takimin sektorial të dialogut të stabilizim asocimit (DPSA) në inovacion, kapital njerëzor, politika sociale dhe shoqëri informative.
Nga ana e delegacionit të MPMS-së në këtë takim do të prezantohet progresi i arritur njëvjeçar në Kosovë, në fushën e legjislacionit që rregullon sferat që janë përgjegjësi e MPMS-së, si ato të çështjeve sociale, punës dhe punësimit, sigurisë në punë, çështjen e pensioneve si dhe të arriturat që janë evidentuar në vendin tonë në këto sfera.
Ky takim do të bashkëkryesohet nga ministri i MPMS-së, Nenad Rashiq, Ministria për Integrime Evropiane dhe Drejtoria për Zgjerim e Komisionit Evropian.

Fillon ndalimi i produkteve me mbishkrimin UNMIK/KOSOVO

Inspektorati i Tregut në Ministrinë e Tregtisë dhe Industrisë ka marrë vendim që të ndalojë importin e produkteve në tregun e brendshëm me mbishkrimin UNMIK/KOSOVO. Ndalimi i eksportit ka filluar të zbatohet nga 1 maj.
Zyrtarët e MTI-së kanë bërë të ditur se subjektet të cilat kanë akoma në stoqet e tyre produkte me mbishkrimin UNMIK/KOSOVO do të mund t’i shesin deri më 1 qershor të këtij vitit.
Ndërsa, subjektet që tregtojnë produkte me këtë mbishkrim, pas datës 1 qershor 2012, do të ndërmerren masa konform ligjeve në fuqi.
Gjobat për këto veprime sipas Inspektoratit në MTI janë prej 2000 deri në 10000 euro.
Tani e tutje, në produkte, emri i shtetit importues duhet të jetë KOSOVË apo KOSOVO.

ATK privilegjon naftarët

Një nga bizneset më profitabile dhe me qarkullim shumë të madh ditor ende po arkëton të hyra pa arka fiskale. Fiskalizimin e naftarëve e kanë premtuar zyrtarë të Administratës Tatimore të Kosovës (ATK) qysh në muajin tetor të vitit të kaluar, mirëpo deri tani nuk është ndërmarr asgjë në këtë drejtim. As tani kur kanë kaluar gjashtë muaj nga premtimi i dhënë, zyrtarë nga ATK-ja nuk janë në gjendje të japin një datë të saktë se kur do të fillojë ky projekt. Edhe përfaqësues të Shoqatës së Naftëtarëve të Kosovës kanë thënë se fiskalizimi ende nuk ka filluar, por thonë se është duke u punuar në këtë drejtim.
“Fiskalizimi i pikave shitëse të derivateve ende nuk ka filluar sepse procesi i certifikimit ende nuk ka përfunduar tërësisht. Pasi të ketë përfunduar certifikimi teknik i pajisjeve elektronike fiskale. Kompanitë janë të licencuara, mirëpo përveç këtij licencimi ata duhet të certifikojnë çdo pajisje para se të vendoset në funksion”, tha për “Lajm”, Valentina Bytyqi, zyrtare për komunikim me publikun në ATK.
Kryetari i kryetari i Shoqatës së Naftëtarëve të Kosovës, Nazmi Bytyqi, tha se fiskalizimi ende nuk ka filluar, ai vetëm ka bërë të ditur se është duke u punuar në këtë drejtim, duke mos dhënë asnjë datë se kur fillon fiskalizimi. “Është duke u punuar për ketë çështje. Kemi takime çdo herë me zyrtarë të ATK-së dhe me Shoqatën. Nuk jemi të informuar se është përmendur ndonjë datë, as unë nuk mund të them një datë se kur do të fillojë fiskalizimi. Ne besojmë që të gjithë pronarët e pompave do të pranojnë që të pajisen me arka fiskale”, është shprehur Bytyqi.
Administrata Tatimore e Kosovës kishte bërë të ditur se pajisjet që do të instalohen nëpër pompat e derivateve janë më specifike se ato që janë instaluar deri tani. Sipas tyre, këto pajisje do të instalohen në brendi të pompës, në mënyrë që çdo gjë që kalon nëpër gypat e pompave të memorizohet në memorien fiskale.
Gjatë vitit të kaluar në Kosovë janë futur derivate të naftës në vlerë prej 320 milionë eurove.
Në shënimet e Doganave të Kosovës ka qenë vlera e 86 milionë litrave mazut që janë futur në tregun e Kosovës gjatë vitit 2011. Naftë janë futur 347 milionë litra që kanë vlerë rreth 215 milionë euro, benzinë janë futur 101 milionë litra që kanë vlerë 57 milionë euro, si dhe 14 milionë litra vaj solar që kanë vlerë rreth 7 milionë euro. Në total, duke përfshirë periudhën katërvjeçare prej fillimit të 2008-ës e deri në fund të 2011-ës, sipas Doganave të Kosovës, vlera e derivateve të naftës që ka hyrë në Kosovë ka qenë 960 milionë euro. Gjatë kësaj periudhe katërvjeçare janë importuar mbi 2 miliardë litra derivate të naftës. Nafta importohet më së shumit nga Maqedonia e Greqia.
Një pjesë e saj importohet edhe nga Franca, Irani, India, Republika e Koresë, Rusia, Gjeorgjia, Turkmenistani, Azerbajxhani.

OPEC-u prodhon mbi 31 milionë fuçi naftë në ditë

Oferta për naftë e Organizatës së Vendeve Eksportuese të Naftës (OPEC) ka arritur në nivelin më të lartë të 4 viteve të fundit. Sipas informacioneve me burim autoritete të OPEC-ut, muajin e kaluar organizata prodhonte mesatarisht 31 milionë e 320 mijë fuçi naftë në ditë, ndërsa këtë muaj prodhimi u rrit në 31 milionë e 750 mijë fuçi në ditë.
Kjo shifër rezulton në 2 milionë fuçi më shumë se sa objektivi i ofertës për naftë, vendosur nga vendet e OPEC-ut. Ndërkohë që oferta për naftë e Iranit në tregjet ndërkombëtare ka rënë për shkak të masave detyruese, Iraku, Arabia Saudite, Libia, Angola dhe Nigeria kanë shtuar prodhimin e tyre ditor.
Autoritetet të kësaj organizate ndërkombëtare theksuan se gjatë dy muajve të fundit prodhimi i naftës në Iran është ulur në nivelin e vitit 1990, kurse muajin e kaluar ka rënë në 3 milionë e 150 mijë fuçi në ditë.
Kurse tregjet ndërkombëtare kaluan në rënie, pasi aspektativat janë për rritje akoma më shumë të prodhimit dhe ngadalësim të ekonomive. Në bursën e Londrës një fuçi naftë e tipit Brent ra në 119 dollarë, ndërsa në bursën e Nju-Jorkut një fuçi naftë e papërpunuar kushton 104 dollarë.

Enrique i pakënaqur me barazimin ndaj Chievos

Trajneri i Romës, Luis Enrique, është i zhgënjyer me barazimin e mbrëmshëm pa gola ndaj Chievos, që u dha fund shpresave të skuadrës për një vend në Ligën e Kampionëve sezonin e ardhshëm.
“Kjo nuk është ndeshje futbolli dhe gjithçka dukej më shumë si një vaterpolo. Të dyja ekipet bëmë gjithçka që ishte e mundshme për të fituar, por nuk mund të bënin më shumë në këtë sipërfaqe [të lagësht]”.
“Nuk kam ndonjë pendim të veçantë për këtë sezon. Ne të gjithë e dimë se ishim të paqëndrueshëm me ngritje dhe ulje, por nuk mendoj se është e drejtë të diskutohet tash”.
“Ne gjithmonë kemi menduar për një ndeshje në kohë dhe gjithmonë kemi qëndruar afër pozitave të caktuara, por kemi zhvilluar disa ndeshje të gabuara dhe gjithmonë e kemi pranuar këtë”.
“Ne ishim afër për ta siguruar Ligën e Kampionëve, por nuk arritëm. Diçka sigurisht mungoi. Ne duhet të përmirësohemi në mbrojtje dhe duhet të jemi më të vendosur”, ka thënë Enrique. 

Di Matteo: Ta sulmojmë Newcastlen

Menaxheri i Chelseat, Roberto di Matteo, u ka thënë lojtarëve të tij të mos qëndrojnë në mbrojtje në ndeshjen e sotme kundër Newcastle United.
“Ne nuk mund t’ia lejojmë vetes të mendojmë kështu dhe mendoj se e kemi dëshmuar edhe më herët se ne nuk e bëjmë këtë, si në gjysmëfinale kundër Spurs para gjysmëfinales së Ligës së Kampionëve, dhe te Arsenali dhe kështu me radhë”.
“Nuk mendoj se kjo është për ne. Ne e dimë se sa e rëndësishme është ndeshja për klubin dhe për lojtarët të cilët do të luajnë në të me një përkushtim të plotë”, ka thënë italiani. 

NBA: Boston barazon serinë

Boston Celtics i ka bërë ballë mungesës së yjeve në skuadër për të shënuar fitore ndaj Atlanta Hawks dhe për të barazuar në 1-1 sfidën në rundin e parë të playoffit të NBA-së.
Boston, edhe pse ishte në mungesë të të suspenduarit Rajon Rando, arriti të shënojë fitore 87-80 ndaj Atlanta Hawks. Paul Pierce mori rolin e liderit duke shënuar 36 pikë dhe 14 kërcime.
Dy ndeshjet e ardhshme tash zhvendosen në Boston me ndeshjen e tretë që zhvillohet të premten.
Chicago Bulls, që përfundoi lider në sezonin e rregullt në Konferencën Perëndimore, e që është pa liderin Derrick Rose për shkak të lëndimit, është mposhtur nga Philadelphia me rezultat 109-92, duke barazuar 1-1 serinë e ndeshjeve të playoffit.
Jrue Holiday shënoi 26 pikë për 76ers derisa Lou Williams kontribuoi me 20 pikë. Te Bulls më i miri ishte Joakim Noah me 21 pikë. Ndeshja e tretë zhvillohet të premten, tash në Philadelphia. 

Hana Cakuli me projekte të reja

 Hana Cakuli, e cila së fundmi realizoi këngën “Kopshti” në bashkëpunim me këngëtarin Kushtrim Hoxha, ka pohuar se është duke u përgatitur për projekte të reja muzikore.
“Jam në fillim të projektit. Kam filluar negociatat me producentë dhe muzikantë të ndryshëm që të sjell diçka për të gjithë publikun”.
“Nuk po e zbuloj tani. Dua që të mbetët surprizë e bukur dhe që publiku ta kuptojë vetëm kur gjithçka të jetë gati”, ka pohuar Hana për gazetën ‘Express’.
Sa i përket statusit të saj Hana Cakuli ka pohuar se ende është beqare.

Simpson bëhet nënë

Jessica Simpson më në fund ka lindur. Bukuroshja dhe i fejuari i saj, Eric johnson, kanë mirëpritur një vajzë, të cilën e kanë emëruar Maxwell.
“Eric dhe unë jemi të ngazëllyer t’ju zbulojnë lindjen e vajzës tonë, Maxwell Drew Johnson”.
“Ne jemi falënderues për gjithë dashurinë, mbështetjen dhe lutjet që i kemi pranuar. Kjo ka qenë përvoja më e madhe në jetët tona!!”, ka shkruar Simpson në faqen e saj. 

Recesioni evropian prek Bullgarinë

Rreziqet e vetme për drejtimin e zhvillimit të ekonomisë botërore kanë të bëjnë me Evropën, ndërsa Eurozonën e pret recesioni. Këtë e tregojnë sondazhet e fundit të Fondit Monetar Ndërkombëtar (FMN). Arsyeja ka të bëjë me krizën e borxheve në vendet e BE-së, e cila ngadalëson zhvillimin e tyre ekonomik.
Në Bullgari kriza do të ndikojë më tepër mbi eksportin, i cili konsiderohej tërheqësi i rimëkëmbjes delikate të ekonomisë gjatë 2 viteve të fundit. Për shkak të kufizimit të tregjeve të eksportit të Bullgarisë, FMN-ja parashikon rritje të ekonomisë së Bullgarisë prej 0.8 përqindësh, me gjithë pritjet e qeverisë për 1.4 për qind.
Gjithsesi ka dritë në tunel. Sivjet pritet që investimet në Evropën Qendrore dhe Lindore të arrijnë 34 miliardë dollarë. Bullgaria mund të përfitojë nga këto para, tregojnë të dhënat e FMN-së.
Ngadalësimin e rritjes së ekonomisë së Bullgarisë e parashikojnë disa organizata hulumtuese, institucione zyrtare, vëzhgues të situatës ekonomike në vend dhe banka investuese evropiane, që interesohen për Bullgarinë. 

villas-Boas i gatshëm për Interin ose Romën

Ish-menaxheri i Chelseat, Andre Villas-Boas, raportohet se është i gatshëm të vazhdojë karrierën e tij në Itali.
Mediaset shkruan se portugezi është duke joshur Interin dhe Romën derisa përgatitet t’i rikthehet punës për sezonin e ardhshëm.
Përfaqësues të Villas-Boas janë duke nxitur menaxherin e Interit, Marco Branca, të fillojnë bisedat, edhe pse Nerazzurrët dëshirojnë t’i japin rast Andrea Stramaccionit ta dëshmojë veten deri në fund të sezonit. Nëse Interi përfundon në pozitën e tretë, ai do të mbetet në drejtim të skuadrës.
Villas-Boas vlerësohet lartë edhe nga drejtori gjeneral i Romës, Franco Baldini, dhe mund të pasojë Luis Enriquen, i cili ka dështuar ta kualifikojë klubin për në Ligën e Kampionëve këtë sezon. 

Dalglish i zhgënjyer me lojtarët

Menaxheri i Liverpoolit, Kenny Dalglish, është i zemëruar me lojtarët e tij pas disfatës 1-0 nga Fulhami.
“Qasja e tyre nuk ishte e duhur dhe nëse ju keni një qasje të gabuar ju do të bëni një performancë të keqe dhe kjo është ajo që ne bëmë”.
“Mendoj se ky është vlerësimi i saktë. Unë jam fajtor po ashtu pasi kam ndryshuar shumë lojtarë për t’u përpjekur t’i jap secilit një mundësi në prag të ndeshjes së të shtunës (finale të Kupës FA)”.
“Mendoj se duke bërë këtë unë isha një faktor që kontribuoi në atë çfarë ndodhi, por ju duhet të jeni të drejtë. Unë u përpoqa të jem i drejtë dhe t’i jap secilit një mundësi – ndoshta e kisha gabim”.
“Kishte një ose dy anë pozitive, por kishte edhe shumë anë negative. Ne nuk mund të luajmë në atë tempo, ne duhet të luajmë në një tempo më të shpejtë se kjo. Ne nuk merituam asgjë”, ka thënë Dalglish pas ndeshjes së mbrëmshme. 

Mazzarri i kënaqur që lufton për top tresh

Napoli thotë se ai është i kënaqur që skuadra e tij vazhdon të jetë në garë për top tresh pas fitores 2-0 të mbrëmshme ndaj Palermos.
“Dua t’i falënderoj tifozët që na dhanë një mbështetje të fuqishme sot dhe jam i bindur se shumë prej tyre do të vijnë në Bologna, pasi ne duhet të fitojmë”.
“Kjo megjithatë varet nga Lazio pasi ata kanë një avantazh ndaj nesh në ndeshjet kokë-më-kokë”, ka thënë Mazzarri pas fitores ndaj Palermos.

Hart tall United: Nuk luajta kundër jush

Portieri i Manchester Cityt, Joe Hart, është ndjerë si spektator gjatë fitores së të hënës ndaj Manchester United.
“Unë nuk isha në ndeshje. United erdhi me një plan për ndeshjen dhe ne e prishëm duke shënuar një gol para fundit të pjesës së parë”.
“Ne i bëmë ballë presionit në pjesën e dytë dhe kërkuam të shënojmë sërish, andaj më dhemb ca që nuk fituam me më shumë se një gol diferencë”, ka deklaruar Hart.

Hodgson: Anglia pritet të fitojë në Euro 2012

Përzgjedhësi i ri i Anglisë, Roy Hodgson, thotë se pavarësisht kohës së shkurtër për përgatitje, nga ai pritet ta fitojë kampionatin evropian.
Ai ka vetëm gjashtë javë kohë përgatitje para ndeshjes së parë të Euro 2010 që Anglia e zhvillon më 11 qershor kundër Francës.
“Sigurisht se do të jetë vështirë. Por shpresoj se kam mjaft kohë në duar për të marrë vendimet e duhura. Lojtarët janë shumë mirë të njohur për mua, edhe pse nuk kam punuar me shumë prej tyre”.
“Ne gjithmonë shkojmë në turme për t’i fituar, pasi jemi një komb i madh i futbollit. Nuk do të jetë e lehtë, dhe do të jetë më vështirë këtu pasi personi që e kualifikoi skuadrën nuk është me ne dhe unë e kam marrë drejtimin në shkallën e fundit”.
“Por askush nuk pret nga ne diçka më pak se sa të përpiqemi ta fitojmë garën”, ka thënë Hodgson.

Napoli forcon pozitën e tretë

Me rezultat prej 2-0, Napoli e ka mposhtur Palermon në ndeshjen e të martës mbrëma që u zhvillua në Stadio San Paolo.
Vendasit i dhanë fund ndeshjes që në pjesën e parë me golat e Edinson Cavanit (16’) dhe Marek Hamsik (35’).
Pas kësaj fitoreje, Napoli ka 58 pikë, tri më shumë se rivalët për pozitën që dërgon në Ligën e Kampionëve – Udinese, Inter dhe Lazio, të cilët ndeshjet e kësaj xhiroje i zhvillojnë të mërkurën. 

Elvana: Kërcimi, pasion i imi

Këngëtarja nga Shqipëria, Elvana Gjata, e cila është konkurrente në “Dancing with the Stars”, ka pohuar se ky angazhim është shfaqur në kohën e duhur dhe në mënyrë profesionale.
“’Dancing with the stars’ është një pasion i madh i imi, shumë i hershëm, që vjen dhe shfaqet në kohën e duhur në mënyrë profesionale”, ka pohuar Elvana gjatë një interviste.
Këngëtarja e sheh spektaklin në fjalë si një mundësi të mirë për ta shfaqur edhe një talent tjetër të saj.
“Më shumë se sa një garë, për mua ‘Dancing’ është një mundësi shumë e mirë për të treguar një aftësi tjetër timen, që e bëj me shumë dashuri”, ka shtuar Elvana.

Statham pendohet për skenat e rrezikshme

Ylli i aksionit, Jason Statham, është penduar që ka vendosur t’i bëjë vetë skenat e rrezikshme filmike, pasi që tashmë gjithmonë pritet nga ai që të luajë skenat e vështira.
Aktori britanik është i njohur për marrjen e rreziqeve mbi supe në filmat, si “The Transporter” dhe “The Expendables”, mirëpo thotë se do t’i pëlqente sikur të mos kishte folur rreth skenave të rrezikshme.
“Kam bërë një deklaratë qesharake para disa vitesh se do t’i bëja vet skenat e rrezikshme dhe që atëherë po ndodh kështu. E bëra ‘The Transporter’ me Luc Besson dhe përfundova duke i bërë të gjitha”, ka theksuar Statham.

Të lumturit vendosin më shpejtë

Një studim i realizuar së fundmi ka treguar se njerëzit e lumtur i marrin shumë më shpejtë vendimet e logjikshme.
Ekspertët pranë Universitetit New Hampshire kanë realizuar një hulumtim për të vërtetuar ‘nëse’ dhe ‘sa’ ndikon disponimi në aftësinë e marrjes së vendimeve.
Drejtuesit e studimit kanë manipuluar me disponimin e participantëve duke iu treguar fotografi të këndshme dhe më pas të pakëndshme.
Derisa kanë shikuar fotografitë në ekran janë shfaqur fjalët: “më pëlqen, nuk më pëlqen, mirë, keq, tërheqëse, jotërheqëse...”, ndërsa pjesëmarrësit në studim është dashur që të tregojnë se çfarë emocioni tregon tek ata fotografia e treguar.
Rezultatet kanë treguar se participantët të cilët kanë qenë në disponim më të mirë janë përgjigjur shumë më shpejtë në krahasim me ata që kanë shikuar fotografi negative.

Mungesa e vitaminës D ngadalëson rritjen

Simptomat të cilat tregojnë për mungesën e vitaminës D te fëmijët janë rritja e vonshme dhe e ngadalësuar e dhëmbëve, rritja e ngadalshme, ngërçet muskulore dhe nervozizmi.
Rreth 70 për qind të fëmijëve në SHBA u mungon vitamina D, e cila mund të shkaktojë sëmundjen serioze të eshtrave, rakitin. Edhe pse fëmijët evropianë ushqehen më shëndetshëm se moshatarët e tyre amerikanë, problemi është i shpeshtë edhe tek ata.
Sulmet dhe vështirësitë me frymëmarrje po ashtu mund të lidhen me mungesën e kësaj vitamine, e cila krijohet gjatë ekspozimit në dritën e diellit, por edhe me konsumimin e qumështit, jogurtit, djathit dhe vezëve.
Edhe pse mungesat e vitaminave të caktuara është e nevojshme të kompensohen, ndërsa ndonjëherë edhe të shërohen, e rëndësishme është që të mos teprohet me sasitë, sepse sasia e tepërt mund të jetë toksike për trupin. Kjo kryesisht ka të bëjë me shtesat e vitaminave në formë të tabletave ose shurupit, theksojnë ekspertët.

Grykësi institucionale

Nëse do t’u jepeshin paratë, çmimi i një aparati për fotokopje, për Prokurorinë e Shtetit, do të ishte 20 mijë euro. Për kabinetin e Ministrit Enver Hoxhajt janë planifikuar të blihen 260 mijë euro mobile, pa llogaritur edhe 16 mijë të tjera për kompjuterë. Këto janë vetëm disa nga planifikimet e shpenzimeve që në total arrijnë 286 milionë euro, të hartuara nga të gjitha institucionet e vendit vetëm për tre muajt e parë të këtij viti.
Rrafsh 260 mijë euro janë parashikuar nga Ministria e Punëve të Jashtme për blerjen e mobileve, vetëm për kabinetin e ministrit Enver Hoxhaj, shkruan “Express”.
Për tre muajt e parë të këtij viti, në përgjithësi, pa llogaritur pagat e mëditjet e zyrtarëve të saj, kjo ministri ka bërë plan të harxhojë më shumë se 2 milionë e 200 mijë euro, por prej të cilave në dispozicion i ka pak më shumë se 1 milion euro.
Bazuar në raportin zyrtar tremujor të shpenzimit të buxhetit të siguruar nga “Express”, e të hartuar nga Ministria e Financave, del se aq shumë pajisje teknologjike kishte planifikuar të blejë ky dikaster, sa duket sikur dëshiron t’i bëjë konkurrencë edhe Qendrës Amerikane për Kërkime në Gjithësi.
Për tre muaj, përveç parave për mobile të kabinetit Hoxhaj, sërish për të njëjtin kabinet, kjo ministri kishte parashikuar të harxhojë edhe 16 mijë euro të tjera në blerjen e pajisjeve kompjuterike, prej të cilave në dispozicion i ka vetëm 7 mijë e 500 euro.
Përveç tyre, MPJ-ja ka menduar sërish të harxhojë edhe 336 mijë e 500 euro për të blerë “pajisje të tjera teknologjike”, por pa treguar se për çfarë bëhet fjalë. Paratë për këtë ajo i ka të zotuara. 

“Ndëshkohet” kryeneçësia e Beogradit

Injorimi që i është bërë sekretarit të përgjithshëm të OSBE-së në Beograd nga Boris Tadic dhe ministri i Jashtëm serb, Vuk Jeremic, i është kthyer bumerang vetë Beogradit.
Udhëheqësit shtetërorë serbë kanë menduar që me sjellje injoruese dhe duke insistuar vazhdimisht që vetëm UNMIK-u të organizojë votimin e serbëve të Kosovës për zgjedhjet parlamentare dhe presidenciale të Serbisë, do ta bindin bashkësinë ndërkombëtare në favor të kërkesës së tyre, shkruan “Zëri”.
Diplomati italian ka qenë shefi i parë i UNMIK-ut pasi Kosova ka shpallur pavarësinë më 2008, pozitë që kohë më parë e la për t’u bërë sekretar i përgjithshëm i OSBE-së me seli në Vjenë.
Javë më parë, Lamberto Zannier fillimisht e kishte vizituar Kosovën për të marrë qëndrimin kosovar rreth mundësisë që serbët e Kosovës të hedhin votën e tyre në kuadër të zgjedhjeve të gjashtë majit, dhe më pas ishte nisur drejt Beogradit. Atje, shteti serb raportohet se është sjellë shumë keq me të, duke e injoruar pothuajse në tërësi.
Pas kësaj, lajmin e keq për pushtetin serb se votimin e serbëve të Kosovës nuk do e organizojë UNMIK-u, ua ka dhënë javën e kaluar një nga zyrtarët e lartë të OKB-së nga New York, Peter Schmitz.
“Mospritja në takim të Zannierit as nga Boris Tadic e as nga Vuk Jeremic, ka qenë një nga elementët kyç të këtij vendimi. Injorimi që i është bërë Zannierit në Beograd ka ashpërsuar sidomos evropianët dhe më pas zyrtari i lartë i OKB-së, Peter Schmitz, e viziton Beogradin dhe i jep qëndrimin final ndërkombëtar, pra që OSBE-ja do të krijojë mundësitë që serbët e Kosovës të votojnë më 6 maj”, i ka thënë “Zërit” një nga zyrtarët e lartë të Qeverisë së Kosovës.
Zyrtarë vendorë e ndërkombëtarë e konfirmojnë gjithashtu se ideja që OSBE-ja të merret me mundësinë e votimit të serbëve të Kosovës ka qenë e qeverisë në Prishtinë. Këtë e thotë edhe ministrja për Integrime, Vlora Çitaku, e cila thotë se ideja është mbështetur në bazë të rezolutës së Parlamentit, Kushtetutës dhe Pakos së Ahtisaarit, të cilat garantojnë mundësinë e dyshtetësisë për qytetarët serbë të Kosovës.

Komision parlamentar për hetimin e SHIK-ut!

Florin Krasniqi, deputet i Lëvizjes Vetëvendosjes, është optimist se Kuvendi i Kosovës mund ta hetojë veprimtarinë e ish-Shërbimit Informativ të Kosovës (SHIK) përmes krijimit të një komisioni parlamentar.
Edhe pse ka mbledhur 21 nënshkrime prej 40 sa i duhen, Krasniqi thotë se këtë do ta bëjë ditët në vazhdim. Por partitë që e kanë zhgënjyer më së shumti, LDK-ja dhe AKR-ja, nuk e kanë ndërmend të ndryshojnë pozicion. Ato vlerësojnë se SHIK-u duhet të hetohet nga Prokuroria, e jo nga Kuvendi i Kosovës.
Por një muaj pas iniciativës, Krasniqi është optimist se mund t’i mbledhë nënshkrimet e duhura prej 40 sish për të themeluar komisionin parlamentar në Kuvendin e Kosovës që do të hetonte veprimtarinë e SHIK-ut dhe agjencive të tjera. Ai ka thënë se shumë deputetë kanë frikë se SHIK-u disponon dosje, prandaj hezitojnë, por do t’i kontaktojë ata deputetët të LDK-së që nuk kanë dosje.
Krasniqi ka deklaruar për KTV-në se ai është optimist dhe shpreson se Kuvendi do ta hetojë një dit veprimtarinë e SHIK-ut, fillimisht, e pastaj edhe të shërbimeve të tjera ilegale të sigurimit.
Por kështu nuk mendojnë kolegët e Krasniqit nga Lidhja Demokratike e Kosovës, të cilët as që kanë ndryshuar qëndrim. Deputeti Imri Ahmeti thotë se LDK-ja dëshiron që me SHIK-un të merret Prokuroria dhe jo Kuvendi i Kosovës. Ndërsa shefja e Grupit parlamentar të AKR-së, Myzejene Selmani, nuk ka dashur të flasë në kërkesën e KTV-së.
Në seancën e 29 marsit kur Krasniqi e bëri publike idenë, pothuajse të gjitha partitë politike i dhanë mbështetje deklarative iniciativës. Përfshirë edhe ata të Grupit parlamentar të PDK-së, një numër i deputetëve të së cilës kanë pranuar se ishin pjesë e SHIK-ut.
Debati për SHIK-un në Kosovë ka qenë spontan, përderisa së fundi në gjykatat kosovare po përfundon një proces i dytë për Nazim Bllacën, që pretendon se si agjent i SHIK-ut ka vrarë kundërshtarë politikë në Kosovë.