Ermali dhe Dr Flori sjellin këngën “Ku ka si Tirona”

Prezantuesi televiziv, humoristi e këngëtari, Ermal Mamaqi, ka realizuar një këngë në bashkëpunim me Dr. Florin.
Kënga e titulluar “Ku ka si Tirona”, flet për fëmijërinë dhe rininë e dy këngëtarëve të kaluar në kryeqytetin shqiptar.
Teksti i këngës dhe videoklipi është i mbushur me plot humor e satirë, duke sjellë krahasime mes Tiranës së dikurshme dhe kësaj të sotmes.

Tuna vjen me një super klip

Pop ylli shqiptar, Tuna, ka lansuar këngën e re të titulluar “I Asaj”, të cilës këngë dhe ia ka shoqëruar një videolip të jashtëzakonshëm.
Kënga është punuar nga Vig Poppa dhe Cekic, ndërsa për videoklipin është përkujdesur Entermedia.
Vlen të përmendet dukja e fantastike e Tunës në këtë klip, për të cilën janë përkujdesur stilisti shqiptar Niko Komani, kurse për flokët dhe grimin Studio Kaci respektivisht Angel Vogue.
Është ky një klip që pos e vërteton Tunën si yll në maje të skenës tonë, e vërteton po ashtu statusin e këngëtares si seks simbol shqiptar. 

Me akupresurë ndihmohet shkrirja e kilogramëve

Akupresura është një metodë që ka zgjuar vëmendjen e VIP-ave në Hollywood dhe është ndjekur nga Madonna, Gwyneth Paltrow, Julia Roberts dhe Demi Moore.
Për zbutje të urisë: pika mbi buzën e epërme shtypet me gishtin tregues. Kjo përsëritet tri herë. Pastaj: me shtypje të fuqishme të pikës rreth katër centimetra mbi kapakun e gjurit, me gishtin e madh ose me atë tregues, ndikohet në nxjerrjen e toksineve nga organizmi.
Nëse dëshirohet të aktivizohet metabolizmi, atëherë me gishtërinj shtypet ana e majtë dhe e djathtë e lukthit, në të dy anët e kërthizës.
Akupresura është një teknikë masazhi në kuptimin më të gjerë. Ajo punon nëpërmjet një masazhi të veçantë, duke bërë presionin e saktë në pika të caktuara akupunkturale. 

Pse fshihet depresioni postpartal dhe nuk flitet për të?

Shumë gra kalojnë një periudhë paqartësie emocionale për shkak të ndryshimit të hormoneve, por depresioni postpartal është një gjendje shumë serioze dhe zgjatë shumë.
Zakonisht depresioni postpartal fshihet dhe nuk flitet për të. Periudha pas lindjes perceptohet si një periudhë kur ju duhet të jeni e lumtur dhe “dielli duhet të shkëlqejë në sytë tuaj”. Për këtë arsye shpeshherë nuk i kushtohet rëndësi parandalimit dhe trajtimit të depresionit postpartal.
Shumë gra pas lindjes kalojnë nëpër një periudhë kur ndihen mërzitshëm. Kjo zakonisht fillon rreth tri ditë pas lindjes dhe mund të zgjasë deri në dy javë. Shenjat e kësaj gjendjeje janë: të qarit, irritabiliteti, shqetësimi, tensioni, anksioziteti dhe ndoshta pagjumësia. Në paraqitjen e kësaj gjendjeje luajnë rol hormone, por ndoshta edhe stresi gjatë lindjes dhe shqetësimi që lidhet me beben.
Një përqindje e grave do të kalojnë në depresion postpartal. Kjo gjendje karakterizohet nga përkeqësimi i simptomave normale me panikë ose mani postpartale, ndonjëherë më çrregullimeve obstesive-kompulsive. Disa gra do të përjetojnë të ashtuquajturin çrregullimin e stresit posttraumatik, sidomos nëse lindja ka qenë traumatike.
Rrallëherë ndodhë që gjendja të përkeqësohet skajshmërisht, por ajo që shihet shumë shpesh është gjendja me simptomat e sipërshënuara e shoqëruar me halucinacione, konfuzion dhe diluzion. Kjo gjendje është shumë serioze! 

HTC largohet nga Brazili, ndalon shitjet direkte

Fansat brazilian të sistemit operativ Android dhe telefonave të HTC’së me siguri se nuk janë të gëzuar me lajmin se prodhuesi tajvanez HTC do të largohet nga vendi i tyre.
Ky lajm tani është konfirmuar edhe zyrtarisht nga zëdhënësi i HTC’së, i cili ka thënë se zyrat e kompanisë do të mbyllen në Brazil “pas një analize të kujdesshme të tregut”.
Megjithatë, dyshohet se arsyeja kryesore e largimit të HTC-së nga tregu i madh jug-amerikan janë tarifat e larta të importit të teknologjisë, për të cilën arsye Foxconn kishte vendosur të hapte fabrikat e saj në këtë vend, në mënyrë që Apple të mund të shesë pajisjet e saj si iPad dhe iPhone në këtë vend.
Edhe pse HTC kishte kohë që nuk prodhonte telefonat e saj në Brazil, mbajtja e kostove të ulëta është faktor qenësor në këtë biznes, pasi që kompanitë kryesore që po krijojnë profite nga kjo industri janë Apple dhe Samsung, ndërsa të tjerat duhet t’i mbajnë kostot e ulëta të pajisjeve të tyre për të qenë ende atraktiv për konsumatorët. 

Qëndron në shtyllën elektrike – mendon se është mbi urë (Video)

Një ekip shpëtimi në qytetin çek Zlin ka pasur një punë jo të zakontë shpëtimi – kur nga një shtyllë elektrike të lartë 13 metra iu është dashur ta largojnë një femër.
Pasi ka tymosur marihuanë me orë të tëra, 21-vjeçarja kishte pasur halucinacione dhe duke menduar se gjendet në urë, është përpjekur që ta kalojë lumin.
“Ishte një tmerr i vërtetë, sepse vajza ishte nën ndikim të fortë të drogës dhe çfarëdo që bënte ishte e pakuptimtë. Ishte e bindur se shtylla elektrike me tension të lartë ishte urë mbi Moravë”, citon The Sun fjalët e zëdhënëses së policisë. 

Thaçi, ministrave: Kuçi do të rikthehet

Hajredin Kuçi vetëm përkohshëm do të jetë jashtë ekzekutivit. Ai do të rikthehet për t’u bërë pjesë e kabinetit qeveritar sapo të hiqen nga Kodi Penal dy nenet kontestuese për mediat.
Burime të “Kohës Ditore” kanë thënë të shtunën se ai do të rikthehet, për t’u bërë pjesë e Kabinetit qeveritar, sapo Kuvendi të heqë nga Kodi Penal dy nenet kontestuese për mediat, shkaku i moslargimit të të cilave ai ka ofruar dorëheqjen një ditë më parë.
Mirëpo, vetëm pak kohë pas votimit në Kuvend dhe ofrimit të dorëheqjes së zëvendëskryeministrit, Qeveria ka proceduar në Kuvend një projektligj për ndryshimin dhe plotësimin e Kodit, konform kërkesës së Kuçit që nenet të hiqen.
Në pjesën e parë të mbledhjes së Qeverisë, kur medieve nuk iu krijohet qasje, kreu i ekzekutivit, Hashim Thaçi, kishte dhënë një arsyetim për reflektimin e menjëhershëm. Kishte paralajmëruar edhe rikthimin e Kuçit.
“Kryeministri tha se Kodi fillimisht ishte proceduar me ato dy nene, 37 38, sepse edhe vetë ndërkombëtarët ishin pajtuar me këtë. Ai tregoi se më vonë ndërkombëtarët kishin ndërruar fjalët dhe pas tërheqjes së tyre, tha se as ne nuk insistojmë që nenet të mbesin”, ka cituar një ministër zëvendëskryeministrin.
“Ai na tha se nenet do të hiqen dhe Kuçi do të kthehet”.

Haradinaj kthehet në Hagë

Ish kryeministri i Kosovës, Ramush Haradinaj, është rikthyer të premten në Tribunalin e Hagës, kanë konfirmuar për portalin “Korieri” burime të sigurta brenda Aleancës për Ardhmërinë e Kosovës.
Haradinaj ka arritur në Tribunalin e Hagës, dy ditë para se të mbahen dy seancat përmbyllëse të procesit gjyqësor kundër ish kryeministrit të Kosovës Ramush Haradinaj dhe dy ish bashkëluftëtarëve të tij, më 25 dhe 26 qershor, në të cilat Prokuroria dhe Mbrojtja do të thonë fjalën përfundimtare, për t’i lënë pastaj kohën për rreth dy muaj trupit gjykues që të marrë një vendim përfundimtar për këtë rast.
Vendimi përfundimtar pritet të merret në fund të muajit gusht ose eventualisht gjatë muajit shtator, transmeton “Zëri”.
Lideri i Aleancës për Ardhmërinë e Kosovës iu bashkua përkohësisht familjes së tij më 10 maj, pas vendimit të Gjykatës Ndërkombëtare për krime lufte në hapësirat e ish-Jugosllavisë, që ta lirojë përkohësisht atë.
Gjatë qëndrimit disa javor në Kosovë, Haradinaj shoqërohej nga Policia e Kosovës dhe forcat e EULEX-it, pasi gjykata e liroi atë nën kushte të rrepta që nënkupton lëvizje të kufizuar dhe që të mos ketë asnjë përfshirje në veprimtari politike apo paraqitje publike.

Kodi Penal ngatërron PDK-në

Kryesia e Kuvendit të Kosovës gjatë ditëve në vijim do të përballet me shqyrtimin e dy kërkesave kontradiktore që janë parashtruar nga përfaqësuesit e Partisë Demokratike të Kosovës.
Njëra është për kthim të Kodit Penal në rivotim, ndërsa tjetra për plotësim-ndryshim të të njëjtit kod, njofton “Koha Ditore”.
Të parën e ka parashtruar grupi parlamentar, ndërsa të dytën shefi i partisë dhe i Qeverisë, Hashim Thaçi.
Dy nismat janë ndërmarr menjëherë pas dorëheqjes së Hajredin Kuçit nga posti i zëvendëskryeministrit dhe i ministrit të Drejtësisë, si pasojë e kalimit të Kodit Penal me dy nenet që cenojnë lirinë e medies.
Por si njëra, ashtu edhe kërkesa tjetër konsiderohen nga opozita parlamentare si të pambështetura në Kodin parlamentar dhe në Kushtetutën e Kosovës.
Kryetari i nënkomisionit për Rregullore të Kuvendit, Armend Zemaj, ka deklaruar të shtunën se “Kushtetuta e Kuvendit” nuk lejon kthimin në rivotim të ligjeve, kodeve, apo marrëveshjeve, pasi ato të jenë miratuar apo ratifikuar paraprakisht në seancë plenare

Për reformë zgjedhore, e presin Gjykatën

Liderët e partive politike janë duke e bllokuar reformën zgjedhore. Pavarësisht thirrjeve të Bashkimit Evropian, PDK-ja, LDK-ja, AAK-ja e AKR-ja nuk kanë arritur ende marrëveshje për çështjet kryesore të këtij procesi.
Burime të gazetës “Express”, kanë thënë se liderët janë duke pritur mendimin e Gjykatës Kushtetuese në lidhje me kushtetutshmërinë e amendamenteve.
Liderët e partive politike kanë vendosur të mbajnë peng reformën zgjedhore që ka të bëjë me numrin e zonave zgjedhore, listat zgjedhore dhe pragun elektoral.
Gjasat janë shumë të mëdha që as javën e ardhshme të mos takohen Hashim Thaçi, Isa Mustafa, Behgjet Pacolli e Blerim Shala - për ta çuar përpara reformën zgjedhore.
Burime të gazetës kanë thënë se takimi mes liderëve nuk pritet të ndodhë pa u publikuar qëndrimi i Gjykatës Kushtetuese në lidhje me ndryshimet kushtetuese për mandatin dhe kompetencat e Presidentit.
“Reforma zgjedhore dhe ajo kushtetuese janë të ndërlidhura mes vete. Çfarëdo vendimi që do të sjellë Gjykata për propozimet e amendamenteve, do të ketë ndikim në reformën zgjedhore”, ka thënë një zyrtar i afërt me reformën zgjedhore.
Ndryshe, Lideri i PDK-së, Hashim Thaçi ka bojkotuar tri takimet e fundit për reformën zgjedhore, me arsyetimin se ka pasur agjendën e ngjeshur dhe se s`ka pasur koordinim mes Komisionit dhe Zyrës së Kryeministrit. 

Dorëheqja e Kuçit i prin riformatizimit

Dorëheqja e zëvendëskryeministrit, njëherësh ministër i Drejtësisë, Hajredin Kuçi nga këto dy poste qeverisëse ia ka hapur derën riformatizimit të ekzekutivit-një paralajmërim i dikurshëm i kryeministrit Hashim Thaçi.
Kështu thonë burime të gazetës “Zëri”, të afërta me Qeverinë, të cilat nënvizojnë se së shpejti do të ndryshojë kabineti qeveritar, ndërsa gjasat janë minimale që në ndonjërin prej dikastereve të vijë tashmë ish-ministri Kuçi.
Ky person, që flet në kushte anonimiteti thekson se brendapërbrenda Partisë Demokratike të Kosovës është duke qarkulluar ideja që në kuadër të riformatizimit, në përbërjen e re qeveritare të jenë të përfshirë edhe disa nga njerëzit e fuqishëm të PDK-së.
“Njëri prej këtyre njerëzve të PDK-së do ta marrë Ministrinë e Drejtësisë, e tjetri ka gjasa që ta ma marrë atë të Punëve të Brendshme. Por, e tëra kjo është vetëm si ide, sepse ende nuk ka asgjë konkrete”, ka thënë ky person.
Vetë Hajredin Kuçi, të shtunën nuk ka dashur të flasë për këtë çështje, duke pohuar se për ndryshimet e mundshme në qeveri dhe për pasuesin e tij, gazeta duhet të marrë qëndrimin nga Qeveria e Kosovës. Por, një gjë e tillë ishte e pamundur ngase siç dihet, qeveria “Thaçi 2” pothuajse po i bën dy vjet të funksionimit pa zëdhënës.
I vetmi person që të shtunën është deklaruar për hapat e mëtejmë të PDK-së në raport me ndryshimet në qeveri është ministri i Bujqësisë, Blerand Stavileci, zëdhënës i PDK-së.
Stavileci ka thënë se është herët të flitet për mundësinë se kush do të jetë në vend të Kuçit, ndërsa ka mohuar se ardhja e një ministri të ri mund të jetë e lidhur me procesin e riformatizimit të qeverisë.
Nga ana tjetër, analistët politikë nuk e shohin krejtësisht të “rastësishme” largimin e Kuçit, duke hedhur dyshime se gjithçka ishte e përgatitur nga partia më e madhe në vend.

Buffon: Anglia si Chelsea

Kapiteni i Italisë, Gianluigi Buffon, ka bërë listën e lojtarëve më të rrezikshëm të Anglisë, para supersfidës çerekfinale të Euro 2012.“Wayne Rooney ka karizëm dhe ai është lider, i cili e tërheq ekipin përpara. John Terry, Steven Gerrard dhe Ashley Cole janë po ashtu lojtarë që dinë të fitojnë”, ka thënë Gigi.

Portieri i Juventusit e ka lëvduar edhe homologun e tij te Tre Luanët, Joe Hart, duke thënë se së bashku me Manuel Neuer dhe Salvatore Sirigu, ai mund të bëhet një nga më të mirët në botë.

Për më shumë, Buffon e ka krahasuar stilin e lojës së Anglisë me atë të Chelseat që i solli triumfin në Ligën e Kampionëve.

“Chelsea ka luajtur jashtëzakonisht mirë në mbrojtje ndaj Barcelonës dhe Bayernit në Ligën e Kampionëve. Padyshim se edhe Barcelona edhe Bayerni janë ekipe më të forta se Chelsea, por ekipi londinez i mposhti. Në këtë aspekt mund të gjejmë ngjashmëri mes Chelseat dhe Anglisë”, ka shtuar Buffon. 

Laporta: Rosell dëshironte t’i shesë Puyolin, Xavin dhe Valdesin

Ish-presidenti i Barcelonës, Joan Laporta, ka thënë se shefi aktual i Blaugranëve, Sandro Rosell, kishte planifikuar shitjen e yjeve, si Xavi, Carles Puyol dhe Victor Valdes.
Politikani katalunas nuk është i kënaqur me punën e presidentit aktual të Barcës dhe e ka kritikuar atë për mënyrën se si i udhëheq gjërat.
Për më shumë, Laporta ka deklaruar se është i gatshëm që të garojë për postin e presidentit.

Wenger: Paratë nuk janë motivim për mua

Menaxheri i Arsenalit, Arsene Wenger, e ka bërë të qartë se paratë nuk kanë qenë asnjëherë motiv gjatë karrierës së tij si trajner.
Francezi ka pasur një numër të madh ofertash me vite të tëra, ku ia janë premtuar paga të mëdha, por ai ka refuzuar luksin për besnikërinë.
“Mund të shkoja te klubet që më paguan dhjetë herë më shumë, por nuk kam shkuar. Kam 16 vite te Arsenali dhe qëndroj këtu, sepse është filozofia dhe vizioni im”.
“Paratë nuk janë motivimi im, ndërsa kjo vlen edhe për (Johan) Cryff te Ajaxi dhe (Wim) Jansen te Fayenoordi", ka thënë Wenger për De Telegraaf.

Cavani e Falcao në listën e dëshirave të Cityt

Manchester City ka bërë kërkesa për dy sulmuesit e përfolur, Radamel Falcao dhe Edinson Cavani.
Menaxheri Roberto Mancini i ka vënë në krye të listës dy sulmuesit latino-amerikanë, ndërkohë që kampioni i Anglisë pritet të largojë ndonjërin nga sulmuesit aktualë.
Shënjestra kryesore e Cityt për fazën e sulmit ishte sulmuesi i Arsenalit, Robin van Persie, mirëpo klubi është tërhequr paksa për shkak të shumës së lartë që kërkojnë Topçinjtë.
Ndërkohë, sulmuesi i Atletico Madridit, Falcao dhe ai i Napolit, Cavani, kushtojnë rreth 40 milionë funte së bashku. 

Borini qëndron te Roma

Në Itali janë kompletuar marrëveshjet rreth bashkëpronësisë së lojtarëve.
Transferi kryesor është Fabio Borini, i cili do të mbetet në Stadio Olimpico, pasi Roma ka siguruar pronësinë e plotë të 21-veçarit.
Ndërkohë, Fiorentina ka siguruar pronësinë e Andrea Lazzarit dhe Houssine Kharjas.

Milani dhe Interi të interesuar për Granqvist

Mbrojtësi i Genoas, Andreas Granqvist, ka bërë të ditur se Milani dhe Interi janë të interesuar për shërbimet e tij.
“E di se jam në listën e tyre të dëshirave. Do të shohim se çfarë do të ndodhë. Por kjo tregon se kam pasur një sezon të mirë me Genoan”.
“Në javën e ardhshme do të takohem me agjentin Martin Dahlin për të biseduar dhe për të shikuar opsionet e mia. Megjithatë, unë jam i lumtur te Genoa”, ka deklaruar suedezi. 

Edhe Juve për Ogbonnan

Juventusi i është bashkuar garës për nënshkrimin e mbrojtësit të Torinos, Angelo Ogbonna – raporton Goal.com.
24-vjeçari ka joshur interesimin e klubeve të mëdha, mes tyre edhe Milani, ndërsa është pjesë e përfaqësueses së Italisë në Euro 2012.
Rossonerët thuhet të jenë në krye të listës për të siguruar shërbimet e tij, megjithatë edhe Bianconerët pritet të jenë konkurrentë të fortë në këtë garë. 

Allen mohon të ketë një muzë

Filmbërësi i famshëm, Woody Allen, ka refuzuar të pranojë se frymëzohet nga aktoret që i përfshin në filmat e tij.
Bashkëpunimi i shpeshtë me aktoret, si Diane Keaton, Mia Farrow, Penelope Cruz dhe Scarlett Johansson, ka nxitur spekulime se ai sheh inspirim tek ato.
“Kur parakaloj nëpër tepihun e kuq, është vërtet frustruese sa herë që më pyesin nëse Scarlett Johansson apo Penelope Cruz është muza ime e re. Nëse xhiroj ndonjë film me dikë, njerëzit menjëherë mendojnë se kam muzë dhe se dua një muzë”, ka deklaruar Allen.

Rodman akuzohet për sulm fizik ndaj ish-gruas

Ylli i dikurshëm i NBA, Dennis Rodman, është akuzuar për sulm fizik ndaj ish-gruas së tij Michelle Rodman.
Incidenti thuhet të ketë ndodhur në fund të muajit maj, ndërsa Michelle është paraqitur në një gjykatë duke kërkuar që t’i ndalohet afrimi Rodmanit.
Sipas TMZ, Dennis kishte hyrë në shtëpinë e ish-gruas në orët e hershme të mëngjesit dhe e ka sulmuar pasi ajo nuk e ka lejuar që të takohej me djalin e tij.
Më pas ai është larguar dhe ka kërkuar që të dilte për drekë me djalin, ndërsa Michelle ka pranuar me kusht që edhe ajo të ishte e pranishme. Dhe, pasi ka pirë disa gota, Rodman ka filluar ta ofendojë atë dhe të dashurin e saj në sy të djalit. 

AGPK t’i drejtohet Avokatit të Popullit, pastaj në Kushtetuese

Asociacioni i Gazetarëve Profesionistë të Kosovës në konsultim me mediat vendase ka vendosur që t’i drejtohet Avokatit të Popullit me kërkesën që vendimin e Kuvendit të Kosovës për mos heqjen nga Kodi Penal të neneve 37 dhe 38 t’i dërgojë në Gjykatën Kushtetuese.
Siç transmeton Radio Evropa e Lirë, AGPK ka paralajmëruar edhe vazhdimin e protestave të gazetarëve deri në ndryshimin e këtyre dy neneve, të cilat nga mediat vendase konsiderohen se cenojnë lirinë e shprehjes dhe rrezikojnë punën e tyre.
Të premten, Kuvendi i Kosovës nuk miratoi kërkesën e presidentes Atifete Jahjaga për heqjen nga Kodi Penal të neneve 37 dhe 38 që kanë të bëjnë me sanksionimin e shpifjes dhe zbulimin e burimit të informacionit, në rastet kur bëhet fjalë për procedime kriminale.
Një vendim i tillë çoi deri te dorëheqja e zëvendëskryeministrit dhe ministrit të Drejtësisë, Hajredin Kuçi, si dhe nxiti reagime nga presidentja Atifete Jahjaga, kryeministri Hashim Thaçi dhe përfaqësuesi i posaçëm i BE-së në Kosovë, Samuel Zbogar, të cilët e konsideruan vendimin e Kuvendit si kthim parapa që cenon lirinë e shtypit dhe medias së lirë.

“Tendencë dhe dëshirë për kontroll të plotë të mediave”

Miratimi për herë të dytë nga ana e Kuvendit të Kosovës të Projekt-Kodit me nenet 37, 38 dhe 39, është një dëshmi e qartë e tendencës dhe dëshirës për kontroll të plotë të mediave të pavarura - thuhet në një komunikatë të lëshuar nga Lëvizja “Vetëvendosje”.
“Duhet përkujtuar që është pikërisht Qeveria e Kosovës dhe pikërisht Ministri i Drejtësisë, Hajredin Kuçi, që e sollën Projekt-Kodin Penal me këto nene në Kuvend në dhjetor të vitit të kaluar. Asokohe, duke e pasur shumicën në Kuvend, ata e miratuan këtë Projekt-Kod dhe, në fund, edhe pse e ktheu presidentja Jahjaga në rishqyrtim, ata e rivulosën Projekt-Kodin me të njëjtat nene, duke iu falënderuar grupit të deputetëve të PDK-së me në krye shefin e saj, Adem Grabovci”, thuhet në komunikatën e “Vetëvendosje”, ku theksohet se ndryshimet në Projekt-Kodin Penal, ”pra heqja e neneve të dëmshme, nuk kaloi vetëm për dy vota”.
Sipas kësaj lëvizjeje, neni 37 mundëson që media të shndërrohet në fajtor për gjithçka dhe të ndëshkohen gazetarët redaktorët, botuesit, shtypshkronjat e deri te shpërndarësit e gazetave. “Asnjë Kod Penal i vendeve perëndimore nuk përmban një nen të tillë apo të ngjashëm. Ky nen është në kundërshtim me Kushtetutën e Kosovës, neni 40 dhe 43 si dhe me nenin 10 të Konventës Evropiane të të Drejtave të Njeriut”, sqaron “Vetëvendosje”.
Lëvizja “Vetëvendosje” ka njoftuar se së shpejti do të procedojë në Kuvend “Projektligjin për mbrojtjen e burimeve të gazetarisë”, i cili, siç thuhet, do të ofrojë një mbrojtje shumë të gjerë të burimeve dhe lirisë së shprehjes.

Rezultatet e testit të Maturës më 30 qershor

Për rreth 31 mijë maturantët e Kosovës është organizuar dita e dytë e Provimit të Maturës Shtetërore 2012. Gjatë kësaj dite, maturantët patën mundësinë të përgjigjeshin në 80 pyetje sa përmbante testi nga lëndët e përafërta me drejtimin, pasi që në ditën e parë të provimit, të mbajtur më 9 qershor, ata iu nënshtruan testit me 120 pyetje nga lëndët e përgjithshme.
Nehat Mustafa, kryetar i Komisionit Qendror Shtetëror të Maturës (KQShM), njëherësh zëvendësministër i Arsimit, vizituan maturantët, të cilët iu nënshtruan provimit të maturës në shkollën fillore “Xhemajl Mustafa” në Prishtinë, e më pas edhe ata në gjimnazin “Sami Frashëri”.
“Jemi në këtë shkollë për të vizituar nxënësit që po testojnë njohuritë e tyre. Siç po shihet, çdo gjë ishte në rregull. Ministria e Arsimit, në bashkëpunim me Drejtoritë Komunale të Arsimit, dhe me shkollat ku po organizohet testi, kanë bërë të gjitha përgatitjet e duhura që ky test të shkojë si duhet”, tha Mustafa.
Ai tha se informatat nga terreni flasin se testi ka filluar pothuaj në të gjitha qendrat në kohën e duhur.
Ndërsa, drejtori i DKA-së në Komunën e Prishtinës, Halim Halimi tha se testi ka filluar me kohë në tërë komunën. “Sipas reagimeve të nxënësve, pyetjet janë të bazuara në planprogrameve të zhvilluara gjatë viteve”, tha ai.
Publikimi i rezultateve të provimit do të bëhet më 30 qershor. Afati i ankesave të nxënësve do të jetë nga 2-4 korrik, ndërkaq publikimi i rezultateve të ankesave do të bëhet më 5 korrik.
Njësitë akademike të cilat këtë vit do të bëjnë pranimin e studentëve pa provim pranues janë: Fakulteti i Bujqësisë dhe Veterinarisë, Fakulteti i Inxhinierisë Mekanike dhe Fakulteti i Shkencave Matematiko- Natyrore, Fakulteti i Inxhinierisë Elektrike dhe Kompjuterike, Fakulteti i Gjeoshkencës dhe Teknologjisë, si dhe Fakultetet e Shkencave të Aplikuara në Ferizaj dhe Pejë. 

Nikolic premton vazhdimin e dialogut me Kosovën

Sekretarja amerikane e Shtetit, Hillary Clinton, ia ka bërë të ditur presidentit serb Tomisllav Nikolicit se Washingtoni është i interesuar që Serbia të kontribuojë në paqen dhe stabilitetin e Ballkanit.
Ajo ka kërkuar që Serbia të vazhdojë të mbajë marrëdhënie të mira me fqinjët dhe të çështjet të zgjidhet me dialog, raportojnë mediat serbe.
Sipas këtyre mediave, Nikolic ka thënë se Serbia është e gatshme të vazhdojë dialogun me Prishtinën në kuadër të stabilizimit të situatës në rajon.
Gjithashtu Nikolic ka kërkuar nga Clinton, që Shtetet e Bashkuara të Amerikës të investojnë në Serbi.
Kurse në Beograd, shefi i ekipit të Serbisë në bisedimet me Kosovën, Borislav Stefanovic, ka deklaruar se qeveria e re duhet ta vazhdojë dialogun me Prishtinën.
Stefanovic ka deklaruar se Qeveria e re e Serbisë është e obliguar t’i zbatojë të gjitha marrëveshjet e arritura në bisedimet e deritashme.
“Problem serioz është çështja e pazgjidhur e autotargave, liria e lëvizjes dhe përfaqësimi rajonal i Kosovës, gjegjësisht pyetja se a do të gjendet fusnota në tabelë apo jo”, ka thënë Stefanovic.
Ai ka vlerësuar se ekipi i ri i qeverisë për bisedime me Prishtinën do të ketë detyrë të vështirë, por beson se do të arrijë rezultat të mirë. 

Messi tifoz i Spanjës

Superylli argjentinas, Lionel Messi, ka deklaruar se do t’i pëlqente që Spanja të shpallej kampion në Euro 2012.Furia e Kuqe të shtunën mbrëma do të përballet me Francën në çerekfinale, ndërsa nëse kualifikohet në gjysmëfinale, atje e pret Portugalia e Cristiano Ronaldos.

“Më duhet të pranoj se nuk e kam ndjekur Kampionatin Evropian, nuk kam ndonjë favorit të pastër”.

“Por do të më pëlqente që Spanja të fitonte për shkak të bashkëlojtarëve të mi që kam atje”, u ka thënë Messi gazetarëve.

Lahm: Të mos i përsëritim gabimet

Kapiteni i Gjermanisë, Philipp Lahm, mendon se kombëtarja e tij mund të luajë shumë më mirë sesa që luajti ndaj Greqisë.‘Die Mannschaft’ siguruan gjysmëfinalen e Euro 2012 pas triumfit prej 4-2 ndaj helenëve, por mbrojtësi i Bayern Munichut kërkon përmirësime për kundërshtarin e ardhshëm, Anglinë ose Italinë.

“Ia vështirësuam vetes punët pa nevojë. Patëm shumë shanse kundër një skuadre që bënte lojë defensive që nga fillimi. Nuk shënuam dhe kjo i vështirësoi gjërat”.

“Dhe kur më në fund e shënuam golin, nuk patëm kujdes dhe pranuam (gol). Bëmë shumë gabime dhe duhet t’i rregullojmë këto”, ka thënë Lahm për ZDF.

Capello: Nëse jo Italia, Gjermania e eliminon Anglinë

Ish-trajneri i Anglisë, strategu italiain Fabio Capello, beson se nuk ka lidhje kush fiton në çerekfinale të dielën, pasi Gjermania do të eliminojë cilindo ekip.“Unë kam ndjenja të përziera për ndeshjen e të dielës”.
 
“Unë kam punuar me Anglinë katër vite dhe nuk është e lehtë ta harroj. Sidoqoftë, Spanja dhe Gjermania do të jenë dy finalistët e Euro 2012”, është shprehur Capello.

Hart ka frikë nga Balotelli

Portieri i Anglisë, Joe Hart, është shprehur i brengosur me impaktin që mund të ketë në duelin e ardhshëm bashkëlojtari i tij te Manchester City, Mario Balotelli, nga i cili ka frikë.“Ai mund të jetë rrezik i madh, ai është lojtar i madh. Por, përpos që e njoh unë, edhe Joleon Lescott e njeh atë, që do të ketë punë direkt me Balotellin”.
 
“Është ndeshje krejt ndryshe nga sa jemi mësuar, unë kurrë nuk kam dashur të luaj ndaj këtij njeriu. Por, do të jetë shumë interesant të shohim se çfarë do të sjellë ai në tavolinë”, ka thënë Hart.
 
Anglia takohet me Italinë në duelin çerekfinal që do të përcaktojë kundërshtarin e fituesit të çerekfinales tjetër Greqi – Gjermani që zhvillohet sonte.

Seedorf ende i pavendosur për të ardhmen

Legjenda holandeze, Clarence Seedorf, nuk ka vendosur akoma nëse do t’i bashkohet Botafogos, edhe pse lajmet e fundit thonë se vetëm konfirmimi zyrtar e ndan nga ky klub.
“Ajo që mund të them është se kurrë më parë gjatë karrierës sime nuk kam marrë kaq shumë oferta”.
“Më duhet kohë të mendoj dhe të marr një vendim, njësoj siç bëra para se të largohesha nga Interi dhe t’i bashkohesha Milanit në vitin 2002”.
“Por, do ta merrni vesh të ardhmen time shumë shpejt. Në ditët në vijim, të gjithë do ta dinë. Megjithatë, kam nevojë për një përvojë të re; është koha për ndryshime”, ka thënë Seedorf. 

‘Messi e Neymar më të mirët në botë’

Mesfushori ofensiv i Atletico Mineiro, Ronaldinho, është shprehur krenar që ka ndikuar në zhvillimin e Lionel Messi dhe Neymar, dhe ka thënë se ata janë dy lojtarët më të mirë në botë.
“E shoh Neymarin që i ka të gjitha, ai është tashmë një nga më të mirët në botë për mua. Po e inkurajoj shumë që në të ardhmen të bëhet më i miri në botë”.
“Mirëpo, kuptohet, nga ana tjetër kam mikun tim Messin, i cili po i shkatërron të gjithë. Për mua, këta dy për momentin janë më të talentuarit në botë”, ka thënë për Globoesporte ish lojtari i Barcelonës dhe Milanit.