Në një prononcim për mediat Haxhinasto theksoi se nuk duhen të bëhen keqinterpretime, apo manipulime politike e mediatike lidhur me ngjarjes së vrasjes së pesë personave në Maqedoni.
“Ne po i ndjekim me shumë vëmendje të gjitha këto zhvillime. Së pari, duhet të ri shpreh ngushëllimet e mia për atë që u ka ndodhur familjeve të qytetarëve, që janë gjetur të vrarë në Maqedoni. Gjithashtu, them se në këto momente është e nevojshme të ketë një qetësi nga ana e të gjithë faktorëve. Është e rëndësishme t’i japim mundësi hetimit të plotë të kësaj çështjeje dhe të mos lejojmë aspak të bëhen keqinterpretime, apo manipulime politike e mediatike përsa i takon kësaj ngjarje. Kërkohet një hetim i plotë dhe pas hetimit, fajtorët të vihen para ligjit” theksoi Haxhinasto, shkruan “BalkanWeb”.
Ndërsa lidhur me gjendjen ne veri të Kosovës, ai tha se “sigurisht jemi gjatë një procesi zgjedhor në Serbi dhe uroj që këto tensionime të mos jenë në funksion të zhvillimeve zgjedhore atje”.
I pyetur në lidhje me problemit që kanë qytetarët shqiptarë me origjinë çame për të hyrë në Greqi, Haxhinasto theksoi se çështja e të drejtave të shqiptarëve, është çështja madhore, kryesore e Ministrisë së Punëve të Jashtme.
