Trysnia ndërkombëtare dhe refuzimi i administratës së UNMIK-ut që t’i organizojë këto zgjedhje, duket të kenë qenë vendimtare që Beogradi të mos mbajë këto zgjedhje brenda territorit të Kosovës.
Sekretari në Ministrinë për Kosovën në Qeverinë e Serbisë, Oliver Ivanovic, i tha Radios Evropa e Lirë se vendimi ende nuk është marrë, por mund të pritet ditëve në vijim.
“Nëse UNMIK-u nuk i përkrah zgjedhjet lokale, teknikisht mbajtja e tyre do të jetë gati e pamundur”, tha Oliver Ivanovic.
Megjithatë, me mosmbajtjen e zgjedhjeve lokale, Qeveria në Beograd nuk ka hequr dorë edhe nga mbështetja e mëtutjeshme për strukturat komunale që ka ngritur nëpër komunat me shumicë serbe në Kosovë, të cilat për institucionet e Kosovës njihen si ilegale.
Ivanovic tha se organet serbe nëpër komunat e Kosovës do të marrin mandat shtesë duke u bazuar në ligjin serb për vetëqeverisje lokale.
“Në rast nuk mbahen zgjedhjet, sipas Ligjit për vetëqeverisje lokale të Republikës së Serbisë është e mundur të emërohen këshillat e përkohshëm dhe mendoj se do të gjenden zgjidhje ligjore edhe për ato komuna ku qeverisjes lokale i ka skaduar mandati”, sqaron Ivanovic.
Ndërkohë, Beogradi po i vazhdon konsultimet me praninë ndërkombëtare në Kosovë për mënyrën e organizimit të zgjedhjeve parlamentare të Serbisë brenda territorit të Kosovës.
Mirëpo, Parlamenti i Kosovës, përmes një rezolute, i ka shpallur ilegale dhe të ndaluara zgjedhjet lokale dhe parlamentare të Serbisë brenda territorit të Kosovës.
Zëvendëskryeministri Hajredin Kuçi tha se këto zgjedhje janë ilegale dhe ata që merren me organizimin e tyre do të ballafaqohen me pasoja ligjore. Ai megjithatë e pranon se në veri të vendit, autoritetet janë më shumë të sfiduara që të veprojnë dhe parandalojnë aktivitetet e tilla, të shpallura ilegale.
“Qeveria e Kosovës i ka shpallur ilegale ato zgjedhje dhe natyrisht që organizatorët e tyre apo testuesit për organizim do të trajtohen për veprimet e tyre ilegale sipas ligjit, kudo që ata takohen, në cilëndo pjesë të territorit të Kosovës. Natyrisht në veri jemi të sfiduar pak më tepër sesa në pjesët tjera, por kur ka mundësi Policia e Kosovës, EULEX-i dhe organet tjera kanë mandatin e plotë për veprim”, deklaroi Kuçi.
