Fadil Hoxha, kryetar i SPPRTK-së, përmes një kumtese për media thekson se çfarëdo vonese e mëtutjeshme në paga, do të jete e papranueshme për punëtorët e RTK-së dhe do të përcillet me radikalizim të veprimeve, deri në dorëheqjen e të gjithë përgjegjësve.
“Paga për pjesën dërmuese të punëtorëve të RTK-së është alternativa e vetme ekzistenciale. Problemet serioze në RTK, të ngritura në vazhdimësi nga Sindikata e RTK-së, e të cilat Menaxhmenti i RTK-së mundohej t’i maskonte, tanimë kanë filluar të dalin në sipërfaqe”, thuhet ndër të tjera në kumtesë.
Sipas tij, m ungesa totale e nikoqirllëkut tregon se ky menaxhment, që nga fillimi, tërë fatin e RTK-së, të tashmen dhe të ardhmen e saj, e ka lënë në duar të disa faktorëve dhe qarqeve të caktuara jashtë RTK-së.
“I drejtohemi për herë të dytë Kuvendit të Republikës së Kosovës me kërkesën e njëjtë, që urgjentisht të formojë një komision hetues parlamentar me qëllim të konstatimit të gjendjes reale financiare me të cilën po përballet RTK-ja. Fati i RTK-së, dhe i 550 punëtorëve të saj (495 anëtarë të Sindikatës) nuk duhet të vazhdojë të mbetet në duart e disa personave, të cilët gjatë gjithë mandatit të deritanishëm kanë shkuar drejt dështimit dhe pothuajse aspak drejt profesionalizmit”, thuhet ndër të tjera në kumtesë.
