“Nevoja është emergjente për jetën e bashkëkombësve tanë atje (Luginë të Preshevës). Për ne ky është një gjest solidariteti. Kur është fjalë për t’u ardhur në ndihmë një komuniteti shqiptar, jemi të gjithë bashkë të motivuar për të bërë më të mirën në Kuvend pa asnjë dallim mes mazhorancës dhe opozitës”, tha Rama në fjalën e tij.
Ky projektligj do t’i dorëzohet së shpejti kryetares se Parlamentit te Shqipërisë, Jozefina Topallit. Me anë të këtij projektligji grupi nismëtar i deputetëve të Partisë Socialiste propozon miratimin e fondeve që shteti shqiptar do të japë në ndihmë për ndërtimin e një materniteti dhe një shkolle në Komunën e Preshevës, Republika e Serbisë.
Sipas Presheva.com, nisma mbështetet në Nenin 8 (1) të Kushtetutës ku thuhet se: “Republika e Shqipërisë mbron të drejtat kombëtare të popullit shqiptar që jeton jashtë kufijve të saj”.
Ndërkohë që Rezoluta e Parlamentit Evropian e 9 janarit 2012 përcakton qartë nevojën për përmirësimin rrënjësor të gjendjes dhe pjesëmarrjes në jetën publike të pakicës shqiptare që jeton në Luginën e Preshevës. Sikundër për përmirësimin e jetës ekonomike dhe shoqërore të kësaj zone.
Shqiptarët në Preshevë (rreth 80-100 mijë banorë), nuk kanë maternitet dhe detyrohen të shfrytëzojnë spitalin e qytetit serb të Vranjës, i cili ndodhet 70 km larg, ku ballafaqohen jo rrallëherë me diskriminim etnik. Ndërkohë, në Preshevë ka një shkolle të re fillore, shkolla fillore “Ibrahim Kelmendi” e cila është aktualisht shkolla më e ngarkuar në tërë Serbinë.
